ប្រទេសថៃ ៖ បន្ទាប់ពីមានការប៉ះទង្គិចដោយអាវុ.ធជាបន្តបន្ទាប់នៅមីយ៉ាន់ម៉ារវាងកងទ័ពរដ្ឋាភិបាល និងក្រុមប្រឆាំង ដែលស្ថិតនៅទល់មុខខេត្តតាក ប្រទេសថៃ បណ្តាលឱ្យពលរដ្ឋថៃ៤នាក់រងរបួស ខូចខាតផ្ទះសម្បែង និងមានគ្រាប់កាំភ្លើ.ងធំធុនធ្ងន់៥គ្រាប់ធ្លាក់ចូលទឹកដីថៃ ហើយកងទ័ពថៃក៏បា.ញ់ទៅមីយ៉ាន់ម៉ាវិញ ប៉ុន្តែមីយ៉ាន់ម៉ាមិនខ្វល់នឹងការបា.ញ់តបតរបស់កងទ័ពថៃ ព្រមទាំងមើលឃើញការប្រយុទ្ធគ្នានៅមីយ៉ាន់ម៉ាមិនថមថយ ថៃក៏សម្រេចចិត្តដកថយ និងបិទព្រំដែនជាបណ្តោះអាសន្នជាមួយមីយ៉ាន់ម៉ាដើម្បីការពារអាយុជីវិតពលរដ្ឋ ។ ទោះមានគ្រា.ប់កាំភ្លើ.ងធ្លាក់ចូលក្តី ថៃមិនថ្កោលទោសមីយ៉ាន់ម៉ាទេ បែរជាបារម្ភពីព្រំដែនជាប់កម្ពុជាទៅវិញ ។

នៅថ្ងៃទី៣ ខែធ្នូ ឆ្នាំ២០២៥ រដ្ឋមន្ត្រីក្រសួងការពារជាតិថៃ លោក Natthaphon Narkphanit បានផ្តល់សម្ភាសន៍ជាមួយសារព័ត៌មានថា ថៃតាមដានស្ថានការណ៍ប៉ះទង្គិចដោយអាវុធនៅមីយ៉ាន់ម៉ាគ្រប់ពេលវេលា ប៉ុន្តែវាមិនគួរឱ្យបារម្ភដូចនៅព្រំដែនជាប់កម្ពុជាទេ ។ ថៃបានបិទព្រំដែនខេត្តតាកជាប់មីយ៉ាន់ម៉ាក្រោយពីមានការប្រយុទ្ធគ្នាជាបន្តបន្ទាប់ ទោះជាថៃមិនរងផលប៉ះពាល់ធ្ងន់ធ្ងរ ប៉ុន្តែមិនមើលស្រាលស្ថានការណ៍ គឺត្រៀមខ្លួនជានិច្ច ។

នៅវិមានរដ្ឋាភិបាល រដ្ឋមន្ត្រីក្រសួងការពារជាតិ លោក Natthaphon បាននិយាយពីការបិទព្រំដែនមីយ៉ាន់ម៉ា-ថៃ នៅស្រុកមេស៊ត ខេត្តតាក រយៈពេល៧ថ្ងៃ ក្រោយការប្រយុទ្ធគ្នារវាងកងទ័ពរដ្ឋាភិបាលមីយ៉ាន់ម៉ា និងក្រុមប្រឆាំងថា ថៃការពារខ្លួនរហូតមក បច្ចុប្បន្ន ថៃមានបញ្ហាព្រំដែននៅខាងកើត (ជាប់កម្ពុជា) និងខាងលិច (ជាប់មីយ៉ាន់ម៉ា) ប៉ុន្តែសង្គមថៃចាប់អារម្មណ៍តែព្រំដែនខាងកើតច្រើនជាង ខណៈព្រំដែនខាងលិចមានបញ្ហារហូតមករវាងកងទ័ពរដ្ឋាភិបាលមីយ៉ាន់ម៉ា និងក្រុមប្រឆាំង ។

ការប្រយុទ្ធគ្នានៅមីយ៉ាន់ម៉ាធ្វើឱ្យពលរដ្ឋថៃនៅព្រំដែនខាងលិចរងផលប៉ះពាល់ ហើយកងទ័ពថៃនៅព្រំដែនខាងលិចបានត្រៀមខ្លួនជានិច្ច បើមានគ្រាប់កាំភ្លើងធ្លាក់ចូលទឹកដីថៃពេលណា ថៃនឹងបាញ់ជូនដំណឹងវិញ ។ ដូចគ្នានេះ ប្រសិនបើមានការល្មើសអធិបតេយ្យនៅព្រំដែនខាងកើត (ជាប់កម្ពុជា) ថៃនឹងតបតភ្លាមៗដែរ ។

រដ្ឋមន្ត្រីក្រសួងការពារជាតិថៃបន្តថា ព្រំដែនខេត្តតាកជាប់មីយ៉ាន់ម៉ា មិនគួរឱ្យបារម្ភដូចនៅព្រំដែនជាប់កម្ពុជាទេ ពីព្រោះគ្មានការល្មើសអធិបតេយ្យ គ្រាន់តែកន្លងមក ការប្រយុទ្ធគ្នារវាងកងទ័ពរដ្ឋាភិបាលមីយ៉ាន់ម៉ា និងក្រុមប្រឆាំង បណ្តាលឱ្យគ្រាប់កាំភ្លើងធ្លាក់ចូលទឹកដីថៃ ។ ថៃមិនដឹងថា តើគ្រាប់កាំភ្លើងដែលធ្លាក់នោះជារបស់ភាគីណា កងទ័ពថៃក៏បាញ់ជូនដំណឹងទៅមីយ៉ាន់ម៉ាវិញ និងត្រៀមខ្លួនជម្លៀសពលរដ្ឋ ។ មីយ៉ាន់ម៉ាគ្មានចេតនាបាញ់ចូលទឹកដីថៃទេ ពីព្រោះពួកគេប្រយុទ្ធគ្នាឯងនៅលើទឹកដីមីយ៉ាន់ម៉ា ។

ក្រសួងមហាផ្ទៃបានត្រៀមខ្លួនជានិច្ចក្នុងការជម្លៀសពលរដ្ឋថៃនៅព្រំដែនជាប់មីយ៉ាន់ម៉ាចេញពីតំបន់គ្រោះថ្នាក់ ខណៈអភិបាលខេត្តតាកឱ្យពលរដ្ឋហ្វឹកហាត់ការជម្លៀស បើការប្រយុទ្ធគ្នានៅមីយ៉ាន់ម៉ាធ្ងន់ធ្ងរ ។ កងទ័ពថៃបង្កើនការប្រុងប្រយ័ត្នទាំងព្រំដែនជាប់កម្ពុជា ទាំងព្រំដែនជាប់មីយ៉ាន់ម៉ា ហើយលោក Natthaphon នឹងទៅពិនិត្យស្ថានការណ៍ព្រំដែនជាប់មីយ៉ាន់ម៉ា នៅខេត្តតាក និងខេត្តមេហុងសន ។

គួរបញ្ជាក់ថា ទាំងរដ្ឋាភិបាលថៃ និងកងទ័ពថៃ ខ្លាចញញើតមិនហ៊ានថ្កោលទោសមីយ៉ាន់ម៉ាទេ បើទោះជាការប្រយុទ្ធរវាងកងទ័ពរដ្ឋាភិបាលមីយ៉ាន់ម៉ា និងក្រុមប្រឆាំង បណ្តាលឱ្យគ្រាប់កាំភ្លើងតូច កាំភ្លើងធំ ធ្លាក់ចូលទឹកដីថៃជាបន្តបន្ទាប់ រហូតខូចខាតផ្ទះសម្បែង និងជនស៊ីវិលថៃរងបួសក្តី កងទ័ពថៃគ្រាន់តែបាញ់ជូនដំណឹងទៅវិញប៉ុណ្ណោះ ។ រដ្ឋមន្ត្រីក្រសួងការពារជាតិថៃថា មីយ៉ាន់ម៉ាគ្មានចេតនាបាញ់ចូលទឹកដីថៃ ប៉ុន្តែបើជាមួយប្រទេសជិតខាងផ្សេងវិញ ថៃថ្កោលទោសមិនឈប់ឈរ គំរាមធ្វើសង្គ្រាម ចោទប្រកាន់បង្កប់មីនថ្មី លាបពណ៌ ទម្លាក់កំហុស និងរករឿងគ្មានទីបញ្ចប់ ៕

ប្រទេសអូស្ត្រាលី ៖ កាលពីខែវិច្ឆិកា ឆ្នាំ២០២៥ រដ្ឋាភិបាលអូស្ត្រាលីបានប្រកាសអនុវត្តច្បាប់ហាមយុវជនអាយុក្រោម១៦ឆ្នាំលេងបណ្តាញសង្គម រួមមាន ៖ TikTok, YouTube និង Reddit ចាប់ពីថ្ងៃទី១០ ខែធ្នូ ដើម្បីកុំឱ្យយុវជនចំណាយពេលច្រើនជាមួយទូរស័ព្ទដៃ ។ ការញៀនបណ្តាញសង្គមជាបញ្ហាមួយគួរឱ្យបារម្ភ ដោយសារមើលខ្លឹមសារមិនសមរម្យ ចាញ់បោកជនខិលខូច ប៉ះពាល់សុខភាពរាងកាយ-ផ្លូវចិត្ត អារម្មណ៍តានតឹង ប្រៀបធៀបខ្លួនឯងជាមួយអ្នកដទៃ ទទួលបានព័ត៌មានសុខភាពមិនត្រឹមត្រូវ បោះបង់ការហាត់ប្រាណ និងនៅដាច់ឆ្ងាយពីសង្គម ។

ការហាមឃាត់របស់រដ្ឋាភិបាលអូស្ត្រាលីបែរជាធ្វើឱ្យយុវជនមិនពេញចិត្ត និងនាំគ្នាដាក់ពាក្យប្តឹងទៅកាន់តុលាការកំពូលនៅទីក្រុងស៊ីដនី និងប្តឹងទៅរដ្ឋមន្ត្រីក្រសួងទូរគមនាគមន៍ អ្នកស្រី Anika Wells និងប្រធានការិយាល័យសុវត្ថិភាពអ៊ិនធើរណេត អ្នកស្រី Julie Inman Grant ដើម្បីឱ្យបញ្ឈប់ការអនុវត្តច្បាប់ហាមយុវជនអាយុក្រោម១៦ឆ្នាំលេងបណ្តាញសង្គម ។ នេះបើតាមការចុះផ្សាយរបស់សារព័ត៌មាន Reuters កាលពីថ្ងៃទី២ ខែធ្នូ ។

រដ្ឋាភិបាលអូស្ត្រាលីប្រកាសអនុវត្តច្បាប់ហាមយុវជនអាយុក្រោម១៦ឆ្នាំលេងបណ្តាញសង្គមចាប់ពីថ្ងៃទី១០ ខែធ្នូ ក្រោមហេតុផលការពារយុវជនពីខ្លឹមសារគ្រោះថ្នាក់ និងកុំឱ្យចាញ់បោកជនខិលខូច ។ ច្បាប់នេះទទួលការចាប់អារម្មណ៍ពីប្រទេសនានាលើពិភពលោក រួមទាំងបណ្តាប្រទេសនៅអឺរ៉ុបផងដែរបានសាកល្បងអនុវត្តច្បាប់កំណត់អាយុយុវជន ក៏ដូចជាម៉ាឡេស៊ីប្រកាសហាមយុវជនអាយុក្រោម១៦ឆ្នាំលេងបណ្តាញសង្គមចាប់ពីឆ្នាំ២០២៦ ។

យុវជន Noah Jones អាយុ១៥ឆ្នាំ រួមទាំងយុវជនជាច្រើនទៀតបានដាក់ពាក្យប្តឹងរដ្ឋាភិបាលនៅតុលាការកំពូលក្នុងទីក្រុងស៊ីដនី ដោយនិយាយថា វិធានការរបស់រដ្ឋាភិបាលកាន់តែបង្កគ្រោះថ្នាក់ខ្លាំង ដោយសារជំរុញឱ្យយុវជនលួចលេងបណ្តាញសង្គមដោយគ្មានការត្រួតពិនិត្យ ។ យុវជននឹងចាប់ផ្តើមលួចលាក់ធ្វើអ្វីមួយកំបាំងភ្នែកអាណាព្យាបាល ហេតុនេះ រដ្ឋាភិបាលគួរកម្ចាត់ខ្លឹមសារមិនល្អក្នុងបណ្តាញសង្គម វាល្អជាងហាមឃាត់យុវជន ។

យុវជន Jones បន្តថា ៖ «បច្ចុប្បន្ន ការប្រើប្រាស់បណ្តាញសង្គមចាំបាច់យ៉ាងខ្លាំងសម្រាប់ទំនាក់ទំនង ចែករំលែកគំនិត វាដូចគ្នានឹងទីប្រជុំជនមួយដែរ ។ ខ្ញុំបានជួបមិត្តភក្កិជាច្រើនក្នុងបណ្តាញសង្គម ដោយសារងាយស្រួលទាក់ទងគ្នា និងឆាប់រហ័ស បើរដ្ឋាភិបាលហាមឃាត់ការលេងបណ្តាញសង្គមនឹងធ្វើឱ្យបាត់បង់ទំនាក់ទំនង ។ ច្បាប់ថ្មីនេះនឹងមានយុវជនអនុវត្តតាម ប៉ុន្តែខ្លះទៀតព្យាយាមលួចលេងបណ្តាញសង្គម សូម្បីតែខ្ញុំ និងមិត្តភក្តិជាច្រើន ក៏រកវិធីលេងវាដែរ» ។

យុវជនរូបនេះចង់ឱ្យអាណាព្យាបាល ឬឪពុក-ម្តាយ មានតួនាទីហាមឃាត់ ឬគ្រប់គ្រងការលេងបណ្តាញសង្គមរបស់កូនៗ មិនមែនរដ្ឋាភិបាលទេ ។ ទោះយ៉ាងណា រដ្ឋាភិបាលអូស្ត្រាលីនៅតែប្រកាន់គោលជំហរយ៉ាងតឹងរ៉ឹងចំពោះការលេងបណ្តាញសង្គមរបស់យុវជន និងប្រកាសអនុវត្តច្បាប់ថ្មី បើទោះជាយុវជនជាច្រើនដាក់ពាក្យប្តឹងក៏ដោយ ។

ចំណែកយុវជនម្នាក់ទៀតដែលចូលរួមប្តឹងរដ្ឋាភិបាលដែរនោះ និយាយថា ច្បាប់នេះបំពានសិទ្ធិសេរីភាពយុវជនដែលផ្ទុយពីរដ្ឋធម្មនុញ្ញអូស្ត្រាលី វិធានការរបស់រដ្ឋាភិបាលគួរផ្តោតតែលើបុគ្គលបានហើយ មិនមែនហាមយុវជនគ្រប់គ្នានោះទេ ។

គួរបញ្ជាក់ថា ការដាក់ពាក្យប្តឹងរបស់យុវជនអូស្ត្រាលីទទួលបានការគាំទ្រពីមន្ត្រីសិទ្ធិមនុស្ស និងសមាជិកសភាជាច្រើននៅរដ្ឋ New South Wales ។ ប៉ុន្តែអ្នកជំនាញថា បើរដ្ឋាភិបាលអូស្ត្រាលីអាចហាមឃាត់ការលេងបណ្តាញសង្គមរបស់យុវជនអាយុក្រោម១៦ឆ្នាំ អូស្ត្រាលីនឹងក្លាយជាប្រទេសគំរូសម្រាប់ប្រទេសផ្សេងៗដែលកំពុងស្វែងរកវិធីដោះស្រាយបញ្ហាយុវជនមានជំងឺផ្លូវចិត្ត និងប៉ះពាល់សុខភាពដោយសារបណ្តាញសង្គម ៕

ប្រទេសថៃកំពុងប្រឈមនឹងមហាទុក្ខផ្ទួនៗហើយនៅពេលនេះ ក្រោយពីព្រះបរមរាជវាំងបានប្រកាសថា ម្ចាស់ក្សត្រី Sirikit ដែលជាព្រះមាតាស្តេចថៃបច្ចុប្បន្នបានយាងសោយទិវង្គតមិនទាន់បាន ១០០ថ្ងៃផង ពេលនេះស្រាប់តែលេចធ្លាយដំណឹងដ៏គួរឲ្យភ្ញាក់ផ្អើលមួយទៀតថា បុត្រីបង្កើតរបស់ព្រះអង្គដែលប្រឈួនរ៉ាំរ៉ៃជាយូរមកហើយនោះ ក៏បានចូលទិវង្គតផងដែរ។

យោងតាមការបង្ហោះរបស់លោក Andrew MacGregor Marshall អតីតអ្នកកាសែត Reuters ដ៏មានឥទ្ធិពល និងជាសាស្ត្រាចារ្យជនជាតិស្កុតឡេន ដែលដឹងរឿងរ៉ាវផ្ទៃក្នុងជាច្រើនពាក់ព័ន្ធនឹងនយោបាយ និងសៃរាជវង្សថៃ បានលាតត្រដាងថា ព្រះនាង Bajrakitiyabha Narendira Debyavati បុត្រីច្បងរបស់ព្រះបាទ Maha Vajiralongkorn ឬស្ដេចរាមាទី១០ របស់ថៃបច្ចុប្បន្ន បានសោយទិង្គតហើយ។

តាមរយៈការប្រកាសរបស់ការិយាល័យព្រះបរមរាជវាំងថៃ ដែលអញ្ជើញសាធារណជនឲ្យចូលរួមថ្វាយព្រះពរដល់ព្រះនាងម្ចាស់ Bajrakitiyabha ក្នុងឱកាសព្រះរាជពិធីចម្រើនព្រះជន្ម នៅថ្ងៃទី៧ ខែធ្នូ ខាងមុខតាមប្រព័ន្ធអនឡាញ លោក Andrew MacGregor Marshall បានធ្វើការចែករំលែកបន្តជាមួយនឹងការសរសេយ៉ាងខ្លីថា «នាងបានស្លា.ប់ហើយ»។

ការបង្ហោះរបស់លោក គឺដូចទៅនឹងការបង្ហោះជូនដំណឹងជាមុននៃការសោយទិវង្គតរបស់ម្ចាស់ក្សត្រី Sirikit កំឡុងពេលថៃកំពុងឈ្លានពានទឹកដីកម្ពុជាដែរ ដែលនៅខណៈនោះ ព្រះបរមរាជវាំងថៃមិនបានទទួលស្គាល់ការពិតឡើយ រហូតដល់ស្ថានភាពមានការធូរស្បើយទើបធ្វើការប្រកាសជាផ្លូវការ ទាំងដែលមនុស្សជាច្រើនជឿជាក់ថា ការពិតម្ចាស់ក្សត្រីយានារបស់ថៃអង្គនេះ បានចូលទិវង្គតមុននេះយូរមកហើយ។

ដោយឡែក សម្រាប់ដំណឹងពាក់ព័ន្ធនឹងការសោយទិវង្គតរបស់ព្រះនាង Bajrakitiyabha ដូចលោក Andrew បានបង្ហើបដូចខាងលើ មហាជនក៏មានការយល់ឃើញមិនខុសគ្នាប៉ុន្មានពីករណីរបស់ម្ចាស់ក្សត្រី Sirikit ផងដែរ ដ្បិតព្រះនាង Bajrakitiyabha បានបាត់ព្រះភ័ក្រពីក្រសែភ្នែកសាធារណយូរឆ្នាំមកហើយ។

គួររម្លឹកថា កាលពីថ្ងៃសុក្រ ទី ១៥ សីហា ឆ្នាំ ២០២៥កន្លងទៅ មានសេចក្តីថ្លែងការណ៍អំពីសុខភាពរបស់ព្រះនាង Bajrakitiyabha ថាមានការឆ្លងមេរោគក្នុងចរន្តឈាមធ្ងន់ធ្ងរ ហើយកំពុងសម្រាកព្យាបាល។ ព្រះនាង ត្រូវជាបុត្រីច្បងក្នុងចំណោមបុត្រទាំង ៧អង្គរបស់ស្តេច Vajiralongkorn។ កាលពីឆ្នាំ២០២២ ព្រះនាង បានដួលសន្លប់ដោយសារបញ្ហាបេះដូង ហើយគិតត្រឹមខែវិច្ឆិកា ឆ្នាំ២០២៥ ព្រះនាងអង្គនេះនៅតែសន្លប់ និងមិនត្រូវបានគេរំពឹងថានឹងជាសះស្បើយឡើងវិញឡើយ៕

ប្រទេសថៃ ៖ កាលពីថ្ងៃទី២ ខែធ្នូ ឆ្នាំ២០២៥ គណៈរដ្ឋមន្ត្រីថៃបានសម្រេចបន្តសុពលភាពប័ណ្ណអនុញ្ញាតការងារឱ្យពលករមកពី៣ប្រទេស រួមមាន ៖ ឡាវ មីយ៉ាន់ម៉ា និងវៀតណាម ធ្វើការស្របច្បាប់រយៈពេល១ឆ្នាំទៀតដើម្បីបំពេញការខ្វះខាតកម្លាំងពលកម្មនៅប្រទេសថៃ លើកលែងតែពលករខ្មែរ គណៈរដ្ឋមន្ត្រីថៃមិនអនុញ្ញាតឱ្យបន្តសុពលភាពប័ណ្ណអនុញ្ញាតការងារទេ ។ ពលករខ្មែរដែលផុតសុពលភាពប័ណ្ណអនុញ្ញាការងារនៅថ្ងៃទី៣១ ខែមីនា ឆ្នាំ២០២៦ នឹងគ្មានសិទ្ធិធ្វើការនៅថៃ ដោយថៃនឹងជ្រើសរើសពលករមកពីប្រទេសផ្សេងៗធ្វើការជំនួស ។

អ្នកនាំពាក្យរដ្ឋាភិបាលថៃ លោក Siripong Angkasakulkiat និយាយនៅថ្ងៃទី២ ខែធ្នូ ថា គណៈរដ្ឋមន្ត្រីថៃបានប្រជុំសម្រេចបន្តសុពលភាពប័ណ្ណអនុញ្ញាតការងារឱ្យពលករមកពី៣ប្រទេស រួមមាន ៖ ឡាវ មីយ៉ាន់ម៉ា និងវៀតណាម ធ្វើការស្របច្បាប់នៅប្រទេសថៃរយៈពេល១ឆ្នាំ ។ ការបន្តសុពលភាពប័ណ្ណអនុញ្ញាតការងារឱ្យពលករបររទេស គឺដើម្បីបំពេញការខ្វះខាតកម្លាំងពលកម្ម ក៏ដូចជាគាំទ្រម្ចាស់អាជីវកម្មថៃអាចដំណើរការផលិតទំនិញ និងសេវាកម្មដោយគ្មានការរាំងស្ទះ រួមទាំងជំរុញសមត្ថភាពប្រកួតប្រជែងរបស់ថៃលើពិភពលោក ។

ចំណែកពលករខ្មែរ គណៈរដ្ឋមន្ត្រីថៃមិនបន្តសុពលភាពប័ណ្ណអនុញ្ញាតការងារទេ ដោយសារស្ថានការណ៍នៅតំបន់ព្រំដែនកម្ពុជា-ថៃមានភាពមិនប្រក្រតីឡើងវិញ ។ ពលករ៣ប្រទេស រួមមាន ឡាវ មីយ៉ាន់ម៉ា និងវៀតណាម (លើកលែងតែពលករខ្មែរ) ដែលផុតសុពលភាពប័ណ្ណអនុញ្ញាការងារនៅថ្ងៃទី៣១ ខែមីនា ឆ្នាំ២០២៦ គឺអាចស្នើសុំធ្វើការស្របច្បាប់នៅថៃរហូតដល់ថ្ងៃទី៣១ ខែមីនា ឆ្នាំ២០២៧ ។

រោងចក្រ នាយកដ្ឋានការងារ និងភ្នាក់ងារពាក់ព័ន្ធ មានតួនាទីផ្សព្វផ្សាយសេចក្តីសម្រេចរបស់គណៈរដ្ឋមន្ត្រីថៃពីការបន្តសុពលភាពប័ណ្ណអនុញ្ញាតការងារដើម្បីឱ្យពលករ៣ប្រទេសនេះ និងម្ចាស់អាជីវកម្មនៅទូទាំងប្រទេសថៃបានជ្រាបព័ត៌មាន ។ នេះបើតាមការលើកឡើងរបស់អ្នកនាំពាក្យរដ្ឋាភិបាលថៃ លោក Siripong ។

នៅថ្ងៃដដែល រដ្ឋមន្ត្រីក្រសួងការងារថៃ អ្នកស្រី Trinuch Thienthong និយាយថា គណៈរដ្ឋមន្ត្រីបានសម្រេចបន្តសុពលភាពប័ណ្ណអនុញ្ញាតការងារឱ្យពលករតែ៣ប្រទេសប៉ុណ្ណោះ រួមមាន ៖ ឡាវ មីយ៉ាន់ម៉ា និងវៀតណាម អាចរៀបចំឯកសារស្នើសុំធ្វើការស្របច្បាប់នៅថៃរយៈពេល១ឆ្នាំទៀត ។ ការអនុញ្ញាតឱ្យពលករ៣ប្រទេសធ្វើការស្របច្បាប់ គឺជាវិធានការរបស់រដ្ឋាភិបាលថៃដើម្បីជួយម្ចាស់អាជីវកម្មអាចផលិតទំនិញ និងសេវាកម្មដោយគ្មានការរាំងស្ទះក្រោយពីខ្វះខាតកម្លាំងពលកម្ម ។

លោក Somchai Morakotsriwan អគ្គនាយកនៃនាយកដ្ឋានការងារថៃថា ពលករបរទេសត្រូវតែស្នើសុំបន្តសុពលភាពមុនពេលប័ណ្ណអនុញ្ញាតការងារផុតសុពលភាព និងទទួលការត្រួតពិនិត្យទិដ្ឋាការក្នុងរយៈពេលកំណត់ ។ នាយកដ្ឋានការងារបានប្រកាសឱ្យម្ចាស់អាជីវកម្មនានាត្រៀមឯកសាររបស់ពលករបរទេសដើម្បីស្នើសុំបន្តសុពលភាពប័ណ្ណអនុញ្ញាតការងារតាមពេលកំណត់ ។

គួរបញ្ជាក់ថា តាមសេចក្តីសម្រេចរបស់គណៈរដ្ឋមន្ត្រីថៃ គឺការបន្តសុពលភាពប័ណ្ណអនុញ្ញាតការងារសម្រាប់ពលករខ្មែរត្រូវពន្យារពេលសិន ដោយសារស្ថានការណ៍ព្រំដែនកម្ពុជា-ថៃនាពេលបច្ចុប្បន្នមានសភាពផុយស្រួយឡើងវិញ ហេតុនេះ ពលករខ្មែរអាចរង់ចាំតាមដានការជូនដំណឹងរបស់នាយកដ្ឋានការងារថៃ ៕

ក្រុមហ៊ុន AI របស់ចិនគឺ DeepSeek បានកំពុងទាក់ទាញចំណាប់អារម្មណ៍ទូទាំងពិភពលោក ដោយសារការប្រកាសបង្ហាញពីម៉ូដែលបញ្ញាសិប្បនិម្មិត (AI) ដ៏មានឥទ្ធិពលបំផុតរបស់ខ្លួន គឺ DeepSeek-V3.2-Speciale ដែលបានអះអាងថា ម៉ូដែលថ្មីនេះមានសមត្ថភាពអាចប្រកួតប្រជែងជាមួយម៉ូដែល AI យក្សអាមេរិក ដូចជា Gemini 3 Pro របស់ Google DeepMind ក្នុងកិច្ចការវែកញែកមួយចំនួន។ នេះបើយោងតាមកាសែត South China Morning Post។

ការដាក់ឱ្យដំណើរការនេះ ត្រូវបានធ្វើឡើងស្របពេលនឹងសន្និសីទ AI ប្រចាំឆ្នាំដ៏មានកិត្យានុភាពគឺ NeurIPS ដោយបង្កើតឱ្យមានការពិភាក្សាយ៉ាងក្តៅគគុកក្នុងចំណោមអ្នកស្រាវជ្រាវ។

យើងតាមរបាយការណ៍របស់ DeepSeek កាលពីថ្ងៃចន្ទ បានបង្ហាញថា ម៉ូដែល V3.2-Speciale គឺស្មើនឹង Gemini 3 Pro របស់ Google ក្នុងសមត្ថភាពវែកញែក។ រីឯម៉ូដែលមូលដ្ឋានរបស់ខ្លួនគឺ V3.2 គឺមានសមត្ថភាពស្មើនឹង GPT-5 របស់ OpenAI។ V3.2-Speciale បានឈ្នះមេដាយមាសលើការធ្វើតេស្តអូឡាំពិកគណិតវិទ្យាអន្តរជាតិ (IMO) ដែលនេះជាសមិទ្ធផលមួយដែលធ្លាប់សម្រេចបានដោយម៉ូដែលផ្ទៃក្នុងរបស់ OpenAI និង Google DeepMind ដែលមិនទាន់ត្រូវបានបង្ហាញជាសាធារណៈនៅឡើយ។

អ្វីដែលធ្វើឱ្យសមិទ្ធផលនេះកាន់តែគួរឱ្យចាប់អារម្មណ៍នោះគឺ DeepSeek បានបញ្ជាក់ថាវាសម្រេចបានម៉ូដែលនេះដោយជោគជ័យ បើទោះបីជាប្រើប្រាស់ «FLOPs» ដែលជាមាត្រដ្ឋានថាមពលកុំព្យូទ័រ តិចជាងដៃគូប្រជែងរបស់ខ្លួនក្ដី។ នេះបង្ហាញពីប្រសិទ្ធភាពខ្ពស់ក្នុងការបណ្តុះបណ្តាលរបស់ក្រុមហ៊ុនចិន ទោះបីជាពួកគេមានការចូលប្រើប្រាស់បន្ទះឈីបកម្រិតខ្ពស់នៅមានកម្រិតក៏ដោយ។ DeepSeek បានបើកចំហរម៉ូដែល V3.2 នៅលើវេទិកា Hugging Face ដើម្បីជំរុញការស្រាវជ្រាវជាសាធារណ។ ប៉ុន្តែដោយសារតែការប្រើប្រាស់ធនធានខ្ពស់ ម៉ូដែល V3.2-Speciale អាចចូលប្រើបានតែតាមរយៈ API ប៉ុណ្ណោះ។

DeepSeek បានទទួលស្គាល់ថាពួកគេនៅតែយឺតយ៉ាវជាងគំរូរបស់សហរដ្ឋអាមេរិកទាក់ទងនឹងប្រសិទ្ធភាពសញ្ញាសម្គាល់ (token afficiency) និងចំណេះដឹងពិភពលោក (world knowledge) ប៉ុន្តែពួកគេមានបំណងបិទចន្លោះប្រហោងនេះដោយបង្កើនការបណ្តុះបណ្តាលកុំព្យូទ័រនាពេលអនាគត៕