ប្រទេសសិង្ហបុរី ៖ តាមការចុះផ្សាយរបស់សារព័ត៌មានបរទេសកាលពីថ្ងៃទី២ ខែធ្នូ ឆ្នាំ២០២៥ ប្រទេសសិង្ហបុរីនឹងហាមឃាត់កូនសិស្សប្រើប្រាស់ទូរស័ព្ទដៃ (ស្មាតហ្វូន) នៅសាលារៀន ចាប់ពីឆ្នាំ២០២៦ ដោយសារបារម្ភពីផលប៉ះពាល់សុខភាពយុវជន និងលទ្ធផលការសិក្សាធ្លាក់ចុះ ។ សិង្ហបុរី គឺជាប្រទេសចុងក្រោយបង្អស់ដែលបានហាមយុវជនលេងបណ្តាញសង្គម ខណៈម៉ាឡេស៊ី និងអូស្ត្រាលី ទើបតែប្រកាសហាមឃាត់នាពេលមុននេះ ។

ក្រសួងអប់រំសិង្ហបុរីបានប្រកាសពីការហាមឃាត់កូនសិស្សរៀនកម្រិតមធ្យមសិក្សាទាំងអស់ប្រើប្រាស់ទូរស័ព្ទដៃក្នុងអំឡុងពេលនៅសាលារៀន ចាប់ពីខែមករា ឆ្នាំ២០២៦ តទៅ ។ នេះជាវិធានការមួយក្នុងការលើកកម្ពស់ទម្លាប់ប្រើប្រាស់ទូរស័ព្ទដៃកុំឱ្យប៉ះពាល់សុខភាព និងជាការបន្តពីវិធានការអនុវត្តបច្ចុប្បន្ន ដែលបានហាមកូនសិស្សប្រើប្រាស់ទូរស័ព្ទដៃតែក្នុងបន្ទប់រៀន ។

មន្ត្រីក្រសួងអប់រំសិង្ហបុរីបញ្ជាក់ថា ការហាមឃាត់នេះនឹងកំណត់ឱ្យកូនសិស្សត្រូវទុកទូរស័ព្ទដៃ និងនាឡិកាទំនើប (Smart Watch) នៅទីកន្លែងដែលសាលារៀនកំណត់ ឬទុកក្នុងកាបូបរបស់ពួកគេពេញមួយថ្ងៃ ប៉ុន្តែសាលារៀនក៏មានការលើកលែងដែរ ប្រសិនបើកូនសិស្សត្រូវការប្រើប្រាស់ទូរស័ព្ទដៃក្នុងករណីចាំបាច់ ។ ការប្រើប្រាស់ទូរស័ព្ទដៃ និងនាឡិកាទំនើប (Smart Watch) របស់សិស្សសាលាធ្វើឱ្យប៉ះពាល់សុខភាព រំខានការសម្រាក ហាត់ប្រាណ និងចូលរួមជាមួយសង្គម ឬគ្រួសារ ។

ថ្មីៗនេះ ម៉ាឡេស៊ីបានហាមឃាត់យុវជនអាយុក្រោម១៦ឆ្នាំលេងបណ្តាញសង្គមចាប់ពីឆ្នាំ២០២៦ ដោយសារបារម្ភពីផលប៉ះពាល់ផ្លូវចិត្ត និងរងការគំរាមកំហែង ខណៈអូស្ត្រាលីនឹងហាមយុវជនអាយុក្រោម១៦ឆ្នាំលេងបណ្តាញសង្គមមួយចំនួន ចាប់ពីថ្ងៃទី១០ ខែធ្នូ ឆ្នាំ២០២៥ ដើម្បីកាត់បន្ថយពេលវេលានៅជាមួយបណ្តាញសង្គម ។ ចំណែកបារាំង អេស្ប៉ាញ អ៊ីតាលី ដាណឺម៉ាក និងក្រិក កំពុងសាកល្បងប្រព័ន្ធផ្ទៀងផ្ទាត់អាយុអ្នកលេងបណ្តាញសង្គមក្រោយពីការគំរាមកំហែង និងការឆបោកតាមអនឡាញកើនឡើង ។

គួរបញ្ជាក់ថា ការញៀនបណ្តាញសង្គមរបស់យុវជនជាបញ្ហាមួយដែលពិភពលោកបារម្ភខ្លាំង ដោយសារការមើលខ្លឹមសារមិនសមរម្យ ចាញ់បោកជនខិលខូច ប៉ះពាល់សុខភាពផ្លូវកាយ-ផ្លូវចិត្ត អារម្មណ៍តានតឹង ប្រៀបធៀបខ្លួនឯងជាមួយអ្នកដទៃ ទទួលបានព័ត៌មានសុខភាពមិនត្រឹមត្រូវ បោះបង់ការហាត់ប្រាណ និងនៅដាច់ឆ្ងាយពីសង្គម ៕

ប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមានប្រើកម្លាំងយោធា បើលោកនីកូឡាស ម៉ាឌូរ៉ូ (Nicolás Maduro) មិនចុះចេញពីតំណាងប្រធានាធិបតីវ៉េណេហ្ស៊ុយអេឡា។

លោក ត្រាំ បានស្នើឱ្យលោក នីកូឡាស ម៉ាឌូរ៉ូ (Nicolás Maduro) ចុះចេញពីតំណាង ដោយអនុញ្ញាតឱ្យនាំសមាជិកគ្រួសាររត់គេចខ្លួនបាន តែបើបដិសេធមិនចុះចេញពីអំណាចដោយខ្លួនឯង អាមេរិកនឹងប្រើកម្លាំងយោធា។

ការគំរាមឱ្យចុះចេញចេញពីតំណែងនេះ ក៏ព្រោះតែត្រាំ មើលឃើញថា លោក ម៉ាឌូរ៉ូ (Nicolás Maduro) ជាមេកើយនៅពីក្រោយ ក្រុមឧក្រិដ្ឋជនជួញដូរគ្រឿងញៀន ដែលអាចបង្កជាភេរវកម្ម និងអ​សន្តិសុខដល់ប្រជាជាតិអាមេរិក។

ប្រទេសវ៉េណេហ្ស៊ុយអេឡា បានធ្លាក់ចូលវិបត្តិសេដ្ឋកិច្ច ចាប់តាំងពីលោក នីកូឡាស ម៉ាឌូរ៉ូ (Nicolás Maduro) ចូលកាន់តំណាងពីឆ្នាំ២០១៣។

រដ្ឋបាលលោក ដូណាល់ ត្រាំ បានចាត់ទុកលោកម៉ាឌូរ៉ូ  គឺជាគីម ជុងអ៊ុន នៃទ្វីបអាមេរិកខាងត្បូង ក្រោយពីលោកកាន់តំណាងជិត១៣ឆ្នាំបានកែប្រែប្រទេសនេះទៅជារបរផ្តាច់ការ ដែលស្រដៀងគ្នាទៅនឹងប្រទេសកូរ៉េខាងជើង៕

ចិន បានទាមទារឱ្យកម្ពុជា និងម៉ាឡេស៊ី បកស្រាយឱ្យបានច្បាស់លាស់ ជុំវិញកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក កាលពីថ្ងៃទី២៦ ខែតុលា ឆ្នាំ២០២៥ នៅប្រទេសម៉ាឡេស៊ី។

ចិន សម្តែងការព្រួយបារម្ភខ្លាចកិច្ចព្រមព្រៀងនេះ នឹងធ្វើឱ្យប៉ះពាល់ដល់ប្រយោជន៍របស់ខ្លួន និងការគំរាមកំហែងសន្ដិសុខនៅក្នុងតំបន់។

ជុំវិញបញ្ហានេះ ក្រសួងពាណិជ្ជកម្មកម្ពុជា និងក្រសួងពាណិជ្ជកម្មម៉ាឡេសុី មិនទាន់បានចេញបកស្រាយបញ្ជាក់ឱ្យច្បាស់ទៅកាន់ភាគីចិននៅឡើយនោះទេ។

ប្រទេសចិនគឺជាដៃគូសេដ្ឋកិច្ច និងពាណិជ្ជកម្មដ៏សំខាន់បំផុតមួយរបស់ប្រជាជាតិអាស៊ាន ប៉ុន្តែដោយសារតែការគំរាមកំហែងពន្ធរបស់លោកដូណាល់ ត្រាំ បានបង្ខំឱ្យប្រទេសនានាធ្វើសម្បទានពាណិជ្ជកម្ម និងកិច្ចព្រមព្រៀងវិនិយោគបន្ថែមទៀតជាមួយសហរដ្ឋអាមេរិក។

គួរបញ្ជាក់ថៃទី២៦ ខែតុលា ឆ្នាំ២០២៥កន្លងទៅ កម្ពុជាបានយល់ព្រមលុបបំបាត់ពន្ធគយទាំងអស់លើទំនិញរបស់សហរដ្ឋអាមេរិក រួមទាំងផលិតផលម្ហូបអាហារ និងកសិកម្ម ក៏ដូចជាទំនិញឧស្សាហកម្ម ដែលមានន័យថា ការនាំចេញរបស់សហរដ្ឋអាមេរិកមកកាន់កម្ពុជា នឹងមិនត្រូវបង់ពន្ធគយឡើយ៕

គូឡាឡាំពួ៖ ក្រោយការបាត់ខ្លួនយ៉ាងអាថ៌កំបាំងបំផុត អស់រយៈពេលជាង១ទសវត្សរ៍មក នៅថ្ងៃពុធ ទី៣ ខែវិច្ឆិកា ឆ្នាំ២០២៥ ម៉ាឡេសុីបានធ្វើការប្រកាសថា កិច្ចប្រឹងប្រែងស្វែងរកយន្តហោះជើងហោះហើរ MH370 របស់អាកាសចរណ៍ម៉ាឡេស៊ី នឹងបន្តធ្វើឡើងវិញនៅខែក្រោយនេះ។ បើតាមការចេញផ្សាយដោយ ទីភ្នាក់ងារព័ត៌មាន Aljazeera។

ក្រសួងដឹកជញ្ជូននៃប្រទេសម៉ាឡេស៊ី នាថ្ងៃពុធនេះ បានប្រកាសថា កិច្ចប្រឹងប្រែងស្វែងរកយន្តហោះជើងហោះហើរ MH370 របស់អាកាសចរណ៍ម៉ាឡេស៉ី នឹងបន្តឡើងវិញ នៅថ្ងៃទី៣០ ខែធ្នូ ដោយបញ្ជាក់ពីគោលជំហរមិនព្រមបោះបង់ចោលការស្វែងរកនេះថា គឺជាការប្ដេជ្ញាចិត្តរបស់រដ្ឋាភិបាលម៉ាឡេស៊ីក្នុងការផ្តល់ការបិទបញ្ចប់ដល់ក្រុមគ្រួសារដែលរងផលប៉ះពាល់ដោយសារសោ.កនាដក.ម្មនេះ។

ជើងហោះហើរ MH370 ដែលជាយន្តហោះ Boeing 777 មានផ្ទុកអ្នកដំណើរចំនួន២២៧នាក់ និងក្រុមការងារយន្តហោះ១២នាក់ នៅពេលដែលវាបានបាត់ចេញពីប្រព័ន្ធរ៉ាដា នៅលើគន្លងផ្លូវ ពីទីក្រុងគូឡាឡាំពួ ឆ្ពោះទៅទីក្រុងប៉េកាំង កាលពីឆ្នាំ២០១៤។ តាំងពីពេលនោះ ធ្លាប់មានប្រតិបត្តិការរុករកជាច្រើន ត្រូវបានធ្វើឡើង ប៉ុន្តែសុទ្ធតែមិនទទួលបានលទ្ធផល។

ប្រតិបត្តិការរុករកចុងក្រោយគេ នៅភាគខាងត្បូងមហាសមុទ្រឥណ្ឌា ត្រូវបានផ្អាកកាលពីខែមេសា ក្រោយប្រព្រឹត្តទៅបានត្រឹមតែប៉ុន្មានសប្តាហ៍ ដោយសារបញ្ហាលក្ខខណ្ឌអាកាសធាតុ។ តាមក្រសួងដឹកជញ្ជូនម៉ាឡេស៉ី ក្រុមហ៊ុនរុករក Ocean Infinity បានបញ្ជាក់ថា ខ្លួននឹងបើកប្រតិបត្តិការរុករកក្រោមបាតសមុទ្រ សម្រាប់រយៈពេល៥៥ថ្ងៃ ក៏ប៉ុន្តែមិនប្រព្រឹត្តទៅជាប់គ្នាតែម្តងនោះទេ។

ក្រុមអ្នកស៊ើបអង្កេតម៉ាឡេស៊ី មិនបានច្រានចោលលទ្ធភាព ដែលថាយន្តហោះ ត្រូវបានបង្វែរគោលដៅធ្វើដំណើរ ដោយចេតនាឡើយ ដ្បិតបំណែកមួយចំនួន ដែលខ្លះត្រូវបានផ្ទៀតផ្ទាត់ និងខ្លះត្រូវបានជឿថា ជារបស់យន្តហោះនោះ ត្រូវបានប្រទះឃើញនៅតាមបណ្តោយឆ្នេរនៃទ្វីបអាហ្រ្វិក និងនៅតាមកោះក្នុងមហាសមុទ្រឥណ្ឌា។

បើយោងតាមទិន្នន័យផ្កាយរណបបានបង្ហាញថា យន្តហោះនេះបានបង្វែរចង្កូតចេញពីផ្លូវហោះហើររបស់វា ហើយបានធ្វើដំណើរទៅភាគខាងត្បូង ទៅកាន់មហាសមុទ្រឥណ្ឌាភាគខាងត្បូងឆ្ងាយ ជាកន្លែងដែលវាត្រូវបានគេជឿថាអស់ប្រេងឥន្ធនៈ ហើយធ្លាក់។

គួរបញ្ជាក់ថា នៅលើយន្តហោះ MH370 រួមមានអ្នកដំណើរជនជាតិចិនជាង១៥០នាក់ ម៉ាឡេស៉ី៥០នាក់ និងពលរដ្ឋមកពីបណ្តាប្រទេសដទៃទៀត ដូចជាបារាំង អូស្រ្តាលី ឥណ្ឌូណេស៉ី ឥណ្ឌា សហរដ្ឋអាមេរិក អ៊ុយក្រែន និងកាណាដា ជាដើម៕

រាជធានីភ្នំពេញ៖ នៅថ្ងៃទី៣ ខែធ្នូ ឆ្នាំ២០២៥នេះ ផេកផ្លូវការរបស់កងទ័ពភូមិភាគទី២ថៃ បានចេញផ្សាយថា “មានករណីផ្ទុះមីនចំនួនមួយគ្រាប់ នៅតំបន់ហួយតាម៉ារៀ កាលពីថ្ងៃទី២ ខែធ្នូ ឆ្នាំ២០២៥ នៅវេលាម៉ោង ១៤:២០នាទីរសៀល និងបានចោទប្រកាន់ថាជាមីនដែលបានដាក់ដោយកម្ពុជា” ដែលជំរុញឲ្យក្រសួងការពារជាតិកម្ពុជា ធ្វើការប្រកាសទាត់ចោលទាំងស្រុង ចំពោះការចោទប្រកាន់ដោយគ្មានមូលដ្ឋាននេះ។

បើតាម លោកស្រី ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ គឺក្រសួងការពារជាតិបានចាត់ទុកថា ការចោទប្រកាន់របស់កងទ័ពភូមិភាគទី២ថៃ ធ្វើឡើងក្នុងគោលបំណងបំភ័ន្តសហគមន៍អន្តរជាតិ និងលាក់កំបាំងនូវមហិច្ឆតារំលោភបំពានខុសច្បាប់របស់ខ្លួនចូលមកដែនអធិបតេយ្យស្របច្បាប់របស់កម្ពុជា។

បើយោងតាមព័ត៌មានដែលទទួលបានពីយោធភូមិភាគទី៤ របស់កម្ពុជា បានបញ្ជាក់ថា កាលពីថ្ងៃទី២ ខែធ្នូ ឆ្នាំ២០២៥ នៅវេលាម៉ោង ១៤:២០នាទីរសៀល គឺ “ពុំមានឮសម្លេងផ្ទុះគ្រាប់មីន ដូចការអះអាងរបស់កងទ័ពភូមិភាគទី២ថៃឡើយ”។

ក្រសួងការពារជាតិ បានធ្វើការបញ្ជាក់យ៉ាងមុតមាំសាជាថ្មីថា ចាប់តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាតែងតែប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីដែលគំរាមកំហែងដល់សន្តិសុខ និងសុវត្ថិភាពរបស់មនុស្សជាតិនោះឡើយ។ កម្ពុជាក៏សូមអំពាវនាវឱ្យភាគីថៃបញ្ឈប់ជាបន្ទាន់ការយកបញ្ហាមីនដែលជាព័ត៌មានមិនពិត ដើម្បីធ្វើជាលេសរំលោភបំពានមកលើដែនអធិបតេយ្យស្របច្បាប់របស់កម្ពុជា។

ក្រសួងការពារជាតិ នៃព្រះរាជាណាចក្រកម្ពុជា បន្តប្តេជ្ញាចិត្តក្នុងការគោរពយ៉ាងម៉ឺងម៉ាត់សេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ជាពិសេសពាក់ព័ន្ធនឹងការទប់ស្កាត់ព័ត៌មានក្លែងក្លាយ ឬព័ត៌មានមិនពិត ក្នុងគោលបំណងបន្ធូរបន្ថយភាពតានតឹង និងបង្កើតបរិយាកាសអំណោយផលដល់ការរក្សាសន្តិភាព និងស្ថិរភាពរវាងប្រទេសទាំងពីរ៕

ប្រទេសថៃ ៖ បើទោះជាប្រធានាធិបតីអាមេរិក លោក Donald Trump អំពាវនាវឱ្យរដ្ឋាភិបាលថៃគោរពកិច្ចព្រមព្រៀងសន្តិភាពជាមួយកម្ពុជាដែលបានចុះហត្ថលេខារួមគ្នានៅម៉ាឡេស៊ី និងឈប់ធ្វើសង្គ្រា.មឈ្លានពា.ន ក៏រដ្ឋាភិបាលថៃនៅតែផ្អាកកិច្ចព្រមព្រៀងសន្តិភាពដដែល ។ លើសពីនេះ រដ្ឋមន្ត្រីក្រសួងការពារជាតិថៃថែមទាំងមានផែនការបណ្តេញពលរដ្ឋខ្មែរចេញពីភូមិជោគជ័យ ខណៈកងទ័ពថៃបន្តប្រឌិតរឿងចោទប្រកាន់កម្ពុជាបង្កប់មីនថ្មីដើម្បីទម្លាក់កំហុសមិនឈប់ឈរ និងត្រៀមធ្វើសង្គ្រា.មមិនញញើតអាមេរិក ។

«កិច្ចប្រជុំ GBC នាដើមឆ្នាំ២០២៦ ថៃនឹងស្នើឱ្យកម្ពុជាជម្លៀសពលរដ្ឋចេញពីភូមិណងចាន់ (ភូមិជោគជ័យរបស់កម្ពុជា) ឱ្យបានមុនពេលថៃរំលាយសភានៅថ្ងៃទី៣១ ខែមករា ឆ្នាំ២០២៦ ហើយកងទ័ពថៃក៏ត្រៀមធ្វើសង្គ្រា.មផងដែរ ខណៈលោកនាយករដ្ឋមន្ត្រី Anutin Charnvirakul នឹងទៅខេត្តសុរិន្ទនៅថ្ងៃទី៤ ខែធ្នូ ឆ្នាំ២០២៥ ដើម្បីត្រួតពិនិត្យស្ថានការណ៍» ។ នេះបើតាមការលើកឡើងរបស់រដ្ឋមន្ត្រីក្រសួងការពារជាតិថៃ លោក Natthaphon Narkphanit ពេលផ្តល់សម្ភាសន៍ជាមួយសារព័ត៌មាននៅថ្ងៃទី៣ ខែធ្នូ ។

នៅថ្ងៃទី៣ ខែធ្នូ រដ្ឋមន្ត្រីក្រសួងការពារជាតិ លោក Natthaphon បាននិយាយពីស្ថានការណ៍ព្រំដែនកម្ពុជា-ថៃថា បច្ចុប្បន្ន ថៃបអនុវត្តតាមផែនការរបស់ខ្លួន៣ចំណុច រួមមាន ៖ ១-ការដោះមីន ២-ការបោះបង្គោលព្រំដែនបណ្តោះអាសន្ននៅបរិវេណភូមិណងយ៉ាកែវ និងភូមិណងចាន់ (ភូមិព្រៃចាន់ និងភូមិជោគជ័យ) និង៣-ធ្វើរបងព្រំដែននៅខេត្តចន្ទបុរី និងត្រាត ។ ប្រសិនបើកម្ពុជាល្មើសអធិបតេយ្យ ភាគីថៃនឹងមិនព្រមជាដាច់ខាត ។

លោក Natthaphon បន្តថា ថៃបានដោះមីននៅភូមិណងយ៉ាកែវរួចហើយ រីឯការដោះមីននៅភូមិណងចាន់ នៅសល់តែបន្តិចប៉ុណ្ណោះ ។ ការបោះបង្គោលព្រំដែន គឺគ្រាន់តែបណ្តោះសន្ន មិនមែនជាការកំណត់ខ្សែបន្ទាត់ព្រំដែនអចិន្ត្រៃយ៍ទេ ត្រូវរង់ចាំឱ្យគណៈកម្មការ JBC កម្ពុជា-ថៃទទួលស្គាល់ បន្ទាប់មក ទើបប្រទេសទាំងពីរចូលរួមកិច្ចប្រជុំ GBC ពេលនោះ ថៃនឹងស្នើឱ្យកម្ពុជាជម្លៀសពលរដ្ឋចេញពីភូមិណងចាន់ (ភូមិជោគជ័យ) ឱ្យបានមុនពេលរំលាយសភាថ្ងៃទី៣១ ខែមករា ឆ្នាំ២០២៦ ។ ទោះជារំលាយសភាក្តី ប៉ុន្តែរដ្ឋាភិបាលចាំផ្ទះអាចធ្វើការពាក់ព័ន្ធនឹងសន្តិសុខប្រទេសតាមធម្មតា ពេលនេះ អ្វីៗដំណើរការយ៉ាងរលូន គ្មានឧបសគ្គទេ និងរំពឹងថា កិច្ចប្រជុំ JBC និង GBC ធ្វើឡើងនាដើមឆ្នាំ២០២៦ ។

ចំណែកករណីមេបញ្ជាការកងទ័ពជើងគោកថៃរាយការណ៍ទៅលោកនាយករដ្ឋមន្ត្រី Anutin ថា កងទ័ពថៃបានត្រៀមខ្លួនធ្វើសង្គ្រាមនៅតំបន់ព្រំដែនកម្ពុជា-ថៃរួចរាល់ហើយ រដ្ឋមន្ត្រីក្រសួងការពារជាតិបញ្ជាក់ថា កងទ័ពថៃត្រូវតែត្រៀមខ្លួនគ្រប់ស្ថានការណ៍ ដោយផ្តោតលើគោលនយោបាយចម្បងឈានទៅរកសន្តិភាព ប៉ុន្តែប្រសិនបើមានការល្មើសអធិបតេយ្យ ឬល្មើសផលប្រយោជន៍ជាតិ ថៃនឹងប្រតិបត្តិការកងទ័ពភ្លាមៗដើម្បីផ្តល់ទំនុកចិត្តដល់ពលរដ្ឋ ។

រដ្ឋមន្ត្រីក្រសួងការពារជាតិថៃបានចោទប្រកាន់ដោយគ្មានមូលដ្ឋានថា មានការញុះញង់នៅតំបន់ព្រំដែនកម្ពុជា-ថៃ បើទោះជាប្រទេសទាំងពីរបានប្រជុំជជែកគ្នារហូតមក ទើបធ្វើឱ្យថៃត្រូវប្រុងប្រយ័ត្ន និងត្រៀមខ្លួនជានិច្ច ។ ពេលនេះ គ្មានហេតុការណ៍ប៉ះទង្គិច ណាមួយកើតឡើងគួរឱ្យបារម្ភទេ ។

គួរបញ្ជាក់ថា ភូមិជោគជ័យ គឺជាភូមិរបស់កម្ពុជាស្ថិតនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលពលរដ្ឋខ្មែរបានរស់នៅ កាន់កាប់ និងប្រើប្រាស់អាស្រ័យផលជាយូរមកហើយ មុនការចូលជាធរមាន MOU ឆ្នាំ២០០០ ពលរដ្ឋភូមិជោគជ័យមិនបានរស់នៅលើទឹកដីថៃដូចការចោទប្រកាន់របស់ភាគីថៃនោះទេ ៕