តាមការចុះផ្សាយរបស់គេហទំព័រ Channel News Asia នៅថ្ងៃទី១៦ ខែមករា ឆ្នាំ២០២៦ មេគណបក្សប្រឆាំងវេណេស៊ុយអេឡា អ្នកស្រី Maria Corina Machado បានប្រគល់ពានរង្វាន់ណូបែលសន្តិភាពរបស់ខ្លួនជូនប្រធានាធិបតីអាមេរិក លោក Donald Trump ពេលអ្នកទាំងពីរជួបគ្នានៅសេតវិមានក្នុងទីក្រុងវ៉ាស៊ីនតោន សហរដ្ឋអាមេរិក ខណៈមន្ត្រីសេតវិមានថា ប្រធានាធិបតីអាមេរិកនឹងរក្សាទុកពានរង្វាន់នេះ ។

លោកប្រធានាធិបតី Trump បានបង្ហោះសារក្នុងបណ្តាញសង្គមថា ៖ «អ្នកស្រី Maria បានប្រគល់ពានរង្វាន់ណូបែលសន្តិភាពឱ្យខ្ញុំដែលប្រឹងប្រែងបំពេញការងារ ។ នេះជាការបង្ហាញពីការគោរពគ្នាទៅវិញទៅមក អរគុណ! អ្នកស្រី Maria» ។

មេគណបក្សប្រឆាំងវេណេស៊ុយអេឡា អ្នកស្រី Maria ថា ការជួបគ្នារវាងអ្នកស្រីជាមួយលោកប្រធានាធិបតី Trump នៅសេតវិមានដំណើរការយ៉ាងរលូន ហើយពានរង្វាន់ណូបែលសន្តិភាពដែលអ្នកស្រីប្រគល់ជូនលោកប្រធានាធិបតី Trump គឺជាការលះបង់ដើម្បីសេរីភាពរបស់ពលរដ្ឋវេណេស៊ុយអេឡា ។

ការប្រគល់ពានរង្វាន់ណូបែលសន្តិភាពទៅឱ្យលោកប្រធានាធិបតី Trump បន្ទាប់ពីកងកម្លាំងពិសេសអាមេរិកបានធ្វើប្រតិបត្តិការនៅទីក្រុង Caracas ដើម្បីចាប់ខ្លួនលោកប្រធានាធិបតី Nicolas Maduro និងភរិយា កាលពីថ្ងៃទី៣ ខែមករា ដែលធ្វើឱ្យភ្ញាក់ផ្អើលទូទាំងពិភពលោក ។

ទោះជាមេគណបក្សប្រឆាំងវេណេស៊ុយអេឡា អ្នកស្រី Maria ប្រគល់ពានរង្វាន់ណូបែលសន្តិភាពរបស់ខ្លួនឱ្យប្រធានាធិបតីអាមេរិក ប៉ុន្តែលោកស្រីនៅតែជាបុគ្គលដែលទទួលបានពានរង្វាន់ណូបែលសន្តិភាពជាផ្លូវការ ។ វិទ្យាស្ថានណូបែលសន្តិភាពប្រទេសន័រវេសបញ្ជាក់ថា ពានរង្វាន់នេះមិនអាចប្រគល់ឱ្យអ្នកដទៃ បែងចែក ឬដកហូតឡើយ ។

គួរបញ្ជាក់ថា អ្នកស្រី Maria ជាមេគណបក្សប្រឆាំងវេណេស៊ុយអេឡាដ៏មានឥទ្ធិពលនិងលេចធ្លោ ដែលទទួលបានពានរង្វាន់ណូបែលសន្តិភាពកាលពីខែតុលា ឆ្នាំ២០២៥ បន្ទាប់ពីព្យាយាមជំរុញចលនាលទ្ធិប្រជាធិបតេយ្យនៅវេណេស៊ុយអេឡាអស់រយៈពេលជាង២ទសវត្សរ៍ ដើម្បីប្រឆាំងនឹងអំណាចផ្តាច់ការរបស់លោកប្រធានាធិបតី Maduro ។

ក្នុងការតស៊ូដើម្បីប្រជាធិបតេយ្យ អ្នកស្រីរងទុក្ខបុកម្នេញពីសំណាក់មេដឹកនាំផ្តាច់ការវេណេស៊ុយអេឡា និងរងនូវបណ្តឹងជាច្រើន ។ បើតាមវិទ្យាស្ថានណូបែលសន្តិភាព គឺក្រោមអំណាចផ្តាច់ការរបស់លោក Maduro អំពើហិង្សាបានកើតឡើងជាបន្តបន្ទាប់ ពលរដ្ឋធ្លាក់ខ្លួនក្រីក្រកាន់តែខ្លាំង ។

ចំណែកលោកប្រធានាធិបតី Trump ចង់បានពានរង្វាន់ណូបែលសន្តិភាព ប៉ុន្តែបែរជាខកចិត្ត ។ កាលពីខែតុលា ឆ្នាំ២០២៥ លោកថា មិនដឹងវិទ្យាស្ថានណូបែលសន្តិភាពគិតយ៉ាងណាទេ ដែលប្រគល់ពានរង្វាន់ឱ្យអ្នកស្រី Maria ពីព្រោះគ្មានបុគ្គលណាម្នាក់ក្នុងប្រវត្តិសាស្ត្រពិភពលោក អាចដោះស្រាយជម្លោះបញ្ចប់សង្គ្រាមរហូតដល់ចំនួន៨ ក្នុងរយៈពេលត្រឹមតែ៩ខែ មានតែរូបលោកទេដែលស័ក្តិសមនឹងទទួលបានពានរង្វាន់ ៕

បាងកក ៖ ការដួលរលំដងស្ទូចជាបន្តបន្ទាប់នៅក្នុងប្រទេសថៃក្នុងរយៈពេលពីរថ្ងៃជាប់ៗគ្នា និងសម្លា.ប់មនុស្សរាប់សិបនាក់ បានទាក់ទាញការចាប់អារម្មណ៍យ៉ាងខ្លាំងពីជុំវិញពិភពលោក។ ក្នុងនោះប្រព័ន្ធផ្សព្វផ្សាយអន្តរជាតិមួយចំនួន បានចាប់ផ្ដើមចោ.ទសួរអំពីកម្រិតស្តង់ដារសុវត្ថិភាពសំណង់របស់ប្រទេសនេះ ដោយយល់ឃើញថាករណីទាំងនេះលែងជាគ្រោះថ្នាក់ចៃដន្យទៀតហើយ ប៉ុន្តែជាហានិភ័យនៃការធ្វេសប្រហែសជាប្រព័ន្ធ។

ហេតុការណ៍រន្ធ.ត់ចុងក្រោយបំផុត បានកើតឡើងនៅលើផ្លូវរាមាទី ២ ក្នុងទីក្រុងបាងកក នៅព្រឹកថ្ងៃទី ១៥ ខែមករា ដែលត្រឹមតែមួយថ្ងៃបន្ទាប់ពីដងស្ទូចសំណង់ដ៏ធំបានបា.ក់រលំសង្កត់ទៅលើរថភ្លើងដឹកអ្នកដំណើរមួយគ្រឿងនៅក្នុងខេត្តនគររាជសីមា ដែលបានសម្លា.ប់ ៣២នាក់ និងរបួសមនុស្សរាប់សិបនាក់។

ជុំវិញព័ត៌មាននេះ BBC បានរាយការណ៍ថា ហេតុការណ៍ទាំងពីរខាងលើ ពាក់ព័ន្ធនឹងក្រុមហ៊ុនម៉ៅការតែមួយ ពោលគឺក្រុមហ៊ុន Italian-Thai Development Plc ដែលជាក្រុមហ៊ុនសំណង់ធំជាងគេមួយរបស់ប្រទេសថៃ។ ទីភ្នាក់ងារ BBC បាននិយាយថា គ្រោះថ្នាក់ទាំងនេះបានបង្ហាញពីរបៀបដែលឧប្បត្តិហេតុធ្ងន់ធ្ងរនៅការដ្ឋានសំណង់នៅតែកើតមានជាញឹកញាប់នៅក្នុងប្រទេសថៃ ដែលមួយផ្នែកធំ គឺដោយសារតែកម្សោយក្នុងការអនុវត្តបទប្បញ្ញត្តិសុវត្ថិភាព ។

ដោយឡែក បើតាមកាសែតចិន South China Morning Post និង AP របស់សហរដ្ឋអាមេរិក ក៏បានរាយការណ៍ផងដែរថា កំណត់ត្រាសុវត្ថិភាពសំណង់ដ៏អន់ខ្សោយរបស់ប្រទេសថៃ បានរងការរិះគន់យ៉ាងខ្លាំង បន្ទាប់ពីហេតុការណ៍ស្រដៀងគ្នា បានកើតឡើងដល់ទៅ២ដង ក្នុងរយៈពេលត្រឹមតែ២ថ្ងៃ ដោយជំរុញឲ្យមានការស៊ើបអង្កេតលើ ក្រុមហ៊ុន Italian-Thai Development ឡើងវិញ ក្នុងនាមជាអ្នកម៉ៅការនៅការដ្ឋានទាំងពីរ។

គួរជម្រាបថា ការបរាជ័យម្តងហើយម្តងទៀត និងកម្សោយក្នុងការត្រួតពិនិត្យលើប្រព័ន្ធសុវត្ថិភាពសំណង់របស់អាជ្ញាធរថៃ ជាពិសេសការកំណត់ស្តង់ដាចំពោះក្រុមហ៊ុនម៉ៅការសាងសង់ បានធ្វើសាធារណជនថៃមានការខកចិត្ត និងរិះគ.ន់យ៉ាងចាស់ដៃ។

ជាមួយគ្នានេះ ឧបទ្ទវហេតុដដែលៗដែលបានកើតឡើងនាពេលថ្មីៗនេះបានធ្វើឲ្យគេកត់សម្គាល់ឃើញថា វាលែងទាក់ទងនឹងសំណាងអាក្រ.ក់ ឬភាពចៃដន្យទៀតហើយ ប៉ុន្តែជាហានិភ័យរចនាសម្ព័ន្ធដែលបន្តលេចចេញជារូបរាងនៅក្នុងវិស័យសំណង់របស់ថៃ៕

(ភ្នំពេញ) ៖ លោក លី គួង ដែលជាអ្នកជំនួញដ៏ធំមួយរូបនៅកម្ពុជា ជាពិសេសនៅខេត្តព្រះសីហនុ ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ សម្រេចចេញដីកាឃុំខ្លួន ពាក់ព័ន្ធនឹងឧក្រិដ្ឋកម្ម Online Scam និងការលាងលុយកខ្វក់ បន្ទាប់ពីបានប្រព្រឹត្តបទល្មើសទាំងអស់នេះ ចាប់តាំងពីឆ្នាំ ២០១៩ មក។

យោងតាមដីកាបង្គាប់ឱ្យឃុំខ្លួន ជននេះត្រូវបានតំណាងអយ្យការចោទប្រកាន់ពីបទល្មើសរួមមាន៖ ការជ្រើសរើសដោយមិនស្របច្បាប់សម្រាប់កេងប្រវ័ញ្ច បទឆបោ.កមានស្ថានទម្ងន់ទោ.សជាក្រុមមានការចាត់តាំង និងបទសម្អាតប្រាក់ ដែលបានប្រព្រឹត្តនៅក្នុងប្រទេសកម្ពុជា និងទីកន្លែងផ្សេងទៀត ចាប់តាំងពីឆ្នាំ២០១៩ រហូតមកដល់បច្ចុប្បន្ន។

ការសម្រេចឃុំខ្លួននេះ ធ្វើឡើងបន្ទាប់ពីកម្លាំងសមត្ថកិច្ចបានធ្វើការស្រាវជ្រាវយ៉ាងច្បាស់លាស់ និងរកឃើញភស្តុតាងដែលបង្ហាញពីសកម្មភាពមិនប្រក្រតី ក្នុងការកេងប្រវ័ញ្ចទ្រព្យសម្បត្តិរបស់អ្នកដទៃ ក្នុងរូបភាពជាការវិនិយោគ ឬការរកស៊ីដែលគ្មានតម្លាភាព រួចយកថវិកាទាំងនោះទៅធ្វើចរាចរណ៍ដើម្បីបន្លំភ្នែកសមត្ថកិច្ច សម្អាតប្រាក់ និងបានប្រើប្រាស់ទីតាំងកាស៊ីណូ និងសណ្ឋាគារ ដើម្បីបង្ខាំងមនុស្សឱ្យធ្វើការឆបោកអនឡាញ ចាប់តាំងពីឆ្នាំ២០១៩ រហូតមកដល់បច្ចុប្បន្ន។

ក្រោយការចោទប្រកាន់ លោក លី គួង ត្រូវបានបញ្ជូនទៅកាន់មណ្ឌលអប់រំកែប្រែ ដើម្បីអនុវត្តតាមដីកាសម្រេចរបស់ចៅក្រមស៊ើបសួរ។សំណុំរឿងនេះ កំពុងស្ថិតក្នុងដំណាក់កាលស៊ើបសួរយ៉ាងយកចិត្តទុកដាក់បន្ថែមទៀត ដើម្បីស្វែងរកអ្នកពាក់ព័ន្ធផ្សេងទៀត។

សូមជម្រាបថា លោក លី គួង គឺជាអតីតអ្នកឧកញ៉ាមួយរូប ដែលត្រូវបានព្រះមហាក្សត្រត្រាស់បង្គាប់ផ្ដល់គោរមងារនៅថ្ងៃទី២០ ខែមិថុនា ឆ្នាំ២០១៣ និងនៅតែមានគោរម្យងារនេះ រហូតមកដល់ត្រឹមខែសីហា ឆ្នាំ២០២៥ ។

កន្លងមកធ្លាប់មានបណ្ដាញសារព័ត៌មានអន្តរជាតិមួយចំនួន ធ្លាប់ចុះផ្សាយពី ទីតាំងមួយកន្លែងឈ្មោះ ហ័ងឡឺ (Huang Le) ដែលជាកម្មសិទ្ធិរបស់លោក លី គួង ស្ថិតក្នុងខេត្តព្រះសីហនុ ថាជាទីតាំងនៃការជួ.ញដូរមនុស្ស បង្ខាំង និងបង្ខំមនុស្សឱ្យធ្វើការ ដើម្បីបោ.កបញ្ឆោតប្រាក់របស់គេ ប៉ុន្តែកាលណោះលោក លី គួង ចេញមុខបដិសេធច្រានចោល។

គិតចាប់ពីឆ្នាំ២០២៥ រហូតមកដល់ថ្ងៃទី១៥ ខែមករា ឆ្នាំ២០២៦ នេះ តុលាការកម្ពុជាបានអនុវត្តនីតិវិធីលើសំណុំរឿងធំៗចំនួន ៣៧ ករណី ដើម្បីផ្តន្ទាទោសមេខ្លោង និងបក្ខពួកចំនួន ១៧២ នាក់។ ជាមួយគ្នានេះ សមត្ថកិច្ចបាន និងកំពុងបន្តស្រាវជ្រាវដើម្បីវែកមុខបណ្តាញដែលនៅពីក្រោយការឆបោ.កនេះផ្សេងទៀតមកផ្តន្ទាទោសតាមច្បាប់ផងដែរ៕

សហរដ្ឋអាមេរិក ៖ កម្មវិធី Grok បង្កើតឡើងដោយមហាសេដ្ឋីអាមេរិក លោក Elon Musk បានប្រកាសអនុវត្តវិធានការតឹងរ៉ឹង ដើម្បីទប់ស្កាត់មិនឱ្យអ្នកប្រើប្រាស់បំលែងរូបភាពធម្មតាទៅជាឈុតប៊ីគីនី ឬរូបភាពគ្មានសម្លៀកបំពាក់បិទបាំងត្រឹមត្រូវគ្មានការយល់ព្រមពីម្ចាស់រូប ក្រោយពីប្រទេសនានាលើពិភពលោកប្រឆាំងនឹងការបំលែងរូបភាពដែលបៀតបៀនផ្លូវភេ.ទ ប៉ះពាល់កិត្តិយសស្ត្រី និងកុ.មារ ។

បន្ទាប់ពីតុលាការកំពូលរដ្ឋកាលីហ្វ័រញ៉ាចាប់ផ្តើមបើកការស៊ើបអង្កេតក្រុមហ៊ុន xAI របស់មហាសេដ្ឋី Elon Musk ដែលអនុញ្ញាតឱ្យអ្នកប្រើប្រាស់បំលែងរូបភាពធម្មតាទៅជាឈុតប៊ីគីនីតាមរយៈកម្មវិធី Grok នោះ ក្រុមហ៊ុនក៏ប្រកាសកែសម្រួល Grok ឡើងវិញ ស្របពេលប្រទេសនានាបិទកម្មវិធីនេះ ឬស៊ើបអង្កេត ។ នេះបើតាមការចុះផ្សាយរបស់សារព័ត៌មានបរទេសពីទីក្រុងវ៉ាស៊ីនតោន សហរដ្ឋអាមេរិក ។

ក្រុមហ៊ុន xAI បញ្ជាក់ថា នឹងរារាំងអ្នកប្រើប្រាស់ទាំងអស់មិនឱ្យប្រើប្រាស់កម្មវិធី Grok ដើម្បីបំលែងរូបភាពធម្មតាទៅជាឈុតប៊ីគីនី និងឈុតប្រហាក់ប្រហែលគ្នានេះ ដែលចាត់ទុកជាទង្វើខុសច្បាប់ ។ ក្រៅពីនេះ សេចក្តីប្រកាសរបស់ភ្នាក់ងារសុវត្ថិភាពក្រុមហ៊ុនថា បានកំណត់វិធានការបច្ចេកវិទ្យាការពារកម្មវិធី Grok ដើម្បីទប់ស្កាត់មិនឱ្យអ្នកប្រើប្រាស់បំលែងរូបភាពធម្មតាទៅជារូបភាពមិនសមរម្យ រួមទាំងទប់ស្កាត់អ្នកប្រើប្រាស់ដែលបង់ថ្លៃសេវាផងដែរ ។

មន្ត្រីតុលាការកំពូលរដ្ឋកាលីហ្វ័រញ៉ា លោក Rob Bonta បាននិយាយកាលពីថ្ងៃទី១៤ ខែមករា ឆ្នាំ២០២៦ ថា គួរឱ្យភ្ញាក់ផ្អើលណាស់ បន្ទាប់ពីមានសេចក្តីរាយការណ៍ជាច្រើនពាក់ព័ន្ធនឹងរូបភាពគ្មានសម្លៀកបំពាក់បិទបាំងបង្កើតឡើងដោយក្រុមហ៊ុន xAI និងផ្សព្វផ្សាយក្នុងអ៊ីនធើរណេតនាពេលថ្មីៗនេះ ដោយគ្មានការអនុញ្ញាតពីម្ចាស់រូប ។ ការស៊ើបអង្កេតរបស់តុលាការកំពូលរដ្ឋកាលីហ្វ័រញ៉ានឹងពិចារណាថា តើក្រុមហ៊ុនល្មើសច្បាប់ដែរឬទេ? ខណៈរូបភាពគ្មានសម្លៀកបំពាក់បិទជិតទាំងនេះត្រូវបានប្រើប្រាស់រំខានពេញអ៊ីនធើរណេត ។

គួរបញ្ជាក់ថា xAI គឺជាក្រុមហ៊ុនអាមេរិកបង្កើតឡើងដោយលោក Elon Musk កាលពីឆ្នាំ២០២៣ ហើយក្រុមហ៊ុននេះបានបង្កើតកម្មវិធី Grok អនុញ្ញាតឱ្យអ្នកប្រើប្រាស់អាចបំលែងរូបភាពធម្មតាទៅជាឈុតប៊ីគីនី ។ រូបភាពមិនសមរម្យជាច្រើនដែលគ្មានការយល់ព្រមពីម្ចាស់រូបត្រូវបានចែកចាយពេញបណ្តាញសង្គម ដែលធ្វើឱ្យប្រទេសនានាប្រឆាំងនឹងកម្មវិធីនេះ ពីព្រោះប៉ះពាល់ដល់កិត្តិយសស្ត្រី និងកុមារ ។

នៅខែមករា ម៉ាឡេស៊ី និងឥណ្ឌូណេស៊ី បានក្លាយជាប្រទេសដំបូងគេដែលសម្រេចបិទកម្មវិធី Grok ជាបច្ចេកវិទ្យា AI បង្កើតឡើងដោយក្រុមហ៊ុន xAI របស់លោក Elon Musk ជុំវិញក្តីបារម្ភពីការបង្កើតរូបភាពគ្មានសម្លៀកបំពាក់ និងរូបភាពកាត់តគ្មានការអនុញ្ញាត ។ ការបិទកម្មវិធីបានឆ្លុះបញ្ចាំងពីការបារម្ភកាន់តែខ្លាំងនៅទូទាំងពិភពលោក ចំពោះផលប៉ះពាល់ដែលយកបច្ចេកវិទ្យា AI មកបង្កើតរូបភាពក្លែងក្លាយ ។

ប្រទេសម៉ាឡេស៊ី និងឥណ្ឌូណេស៊ី ចាត់ទុកការបង្កើតរូបភាពក្លែងក្លាយដោយគ្មានការយល់ព្រមពីម្ចាស់រូប ថាជាការរំលោភសិទ្ធិមនុស្សយ៉ាងធ្ងន់ធ្ងរ និងគំរាមកំហែងសុវត្ថិភាពឌីជីថល ហើយប្រទេសទាំងពីរនៅតែបន្តបិទកម្មវិធី Grok រហូតដល់ក្រុមហ៊ុន xAI បង្ហាញវិធានការសុវត្ថិភាព និងប្រសិទ្ធភាព ៕