បច្ចុប្បន្នការគ្រប់គ្រងចំណីអាហារហាមឃាត់នៅតាមសាលារៀននៅមានកម្រិតនៅឡើយ ដែលបង្កឱ្យសិស្សានុសិស្សមួយចំនួនជាពិសេសក្មេងៗ រងផលប៉ះពាល់ដល់សុខភាពពី ភេសជ្ជៈផ្អែម ប៉ូវកម្លាំង ដែលមានច្រើនប្រភេទច្រើនសណ្ឋានចរាចរលើទីផ្សារកម្ពុជា។

តាមការឱ្យដឹងមន្ទីរសុខាភិបាលនៃរដ្ឋបាលរាជធានីភ្នំពេញ ចំណីអាហារខាងក្រោមនេះមិនត្រូវបានអនុញ្ញាតិមាននៅគ្រឹស្ថានសិក្សាឡើយដែលអាហារហាមឃាត់ទាំងនោះរួមមាន៖

១. ចំណីអាហារគ្រប់ប្រភេទដែល ហួសកំណត់កាលបរិច្ឆេត ប្រើប្រាស់
២. គ្រឿងស្រវឹង និងផលិតផល ថ្នាំជក់គ្រប់ប្រភេទ
៣. ចំណីអាហារដលមិនមាន ប្រភពច្បាស់លាស់
៤. ភេសជ្ជៈប៉ូវកម្លាំង ភេសជ្ជៈផ្អែម កាហ្វេ ការ៉េមទឹកស៊ីរ៉ូ គ្រប់ប្រភេទ
៥. ស្ករសូកូឡា ស្ករគ្រាប់ និងស្ករកៅស៊ូគ្រប់ប្រភេទ
៦. ចាហួយគ្រប់ប្រភេទ នំដូណាត់ នំផ្អែម តំណាប់ផ្អែមគ្រប់ប្រភេទ

បន្ថែមពីលើការហាមឃាត់នេះ អាណាព្យាបាលគួរយកចិត្តទុកដាក់បន្ថែមលើកូនៗលោកអ្នកពេលទៅសាលារៀនដោយអាចរៀបចំណីអាហារយកពីផ្ទះនិងប្រភេទអាហារមិនប៉ះពាល់សុខភាពក្មេងជាដើម៕

តាមសេចក្តីជូនដំណឹងរបស់សហភាពសហព័ន្ធយុវជនកម្ពុជាគណៈកម្មាធិការ ស.ស.យ.ក ខេត្តស្វាយរៀង បានឱ្យដឹងថាក្រុមការងារសង្ក្រាន្តស្វាយរៀងសហការជាមួយអង្គភាពរដ្ឋករទឹកខេត្តស្វាយរៀង នឹងបន្តដំណើរការកម្មវិធីតំបន់ត្រជាក់ចិត្ត កម្មវិធីសង្ក្រាន្តស្វាយរៀង រៀងរាល់ថ្ងៃសៅរ៍-អាទិត្យ រហូតដល់ដំណាច់ខែមេសា។ ការរៀបចំនេះធ្វើឡើងតាមអនុសាសន៍របស់ ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀង ដើម្បីបន្តភាពសប្បាយរីករាយជូនដល់ប្រជាពលរដ្ឋក្នុងខេត្តស្វាយរៀងក្នុងឱកាសបុណ្យចូលឆ្នាំខ្មែរ។

កម្មវិធីខាងលើនេះមានដូចខាងក្រោមប្រពឹត្តិទៅនៅថ្ងៃសៅរ៍ និងថ្ងៃអាទិត្យ ទី២២-២៣ ខែមេសា ឆ្នាំ២០២៣ ចាប់បើកពីដំណើរពីម៉ោង ១រសៀល ដល់ម៉ោង៥ល្ងាច និង – ថ្ងៃសៅរ៍ និងថ្ងៃអាទិត្យ ទី២៩-៣០ ខែមេសា ឆ្នាំ២០២៣ ចាប់បើកដំណើរការពីម៉ោង១រសៀល ដល់ម៉ោង៥ល្ងាចដូចគ្នា ដែលមានទីតាំងនៅក្នុងក្រុងស្វាយរៀង តាមបណ្តោយផ្លូវមុខសាលាខេត្តស្វាយរៀង។

គួរបញ្ជាក់ថា រយៈពេល៣ថ្ងៃនៃពិធីបុណ្យចូលឆ្នាំខ្មែរខេត្តស្វាយរៀងមានភ្ញៀវទេសចរសរុបចំនួន ៧៦០.៣៩៩ នាក់ ក្នុងនោះភ្ញៀវអន្តរជាតិមានចំនួន៦០នាក់ ខណៈទូទាំងប្រទេសមានភ្ញៀវទេសចរជាង១៣លាននាក់៕

អ្នកបើកទូកទេសចរប្រចាំអន្លង់កាំពីបានប្រទះឃើញកូនផ្សោតកើតថ្មីចំនួន០១ក្បាល កំពុងហែលលេងជាមួយហ្វូងផ្សោតពេញវ័យជាច្រើនទៀតនៅអន្លង់កាំពី ភូមិកាំពី ឃុំ ស្រុកចិត្របុរី ខេត្តក្រចេះនាថ្ងៃទី០២នៃចូលឆ្នាំថ្មី ត្រូវនឹងថ្ងៃទី១៥ ខែមេសា ឆ្នាំ២០២៣។ ហើយនេះជាកូនផ្សោតទី២ហើយសម្រាប់ឆ្នាំ២០២៣ដែលបានប្រទះឃើញ ខណៈកូនផ្សោតដំបូងត្រូវបានប្រទះឃើញកាលពីខែមីនា កន្លងទៅនេះ។តាមការឱ្យដឹងពីក្រសួងកសិកម្មរុក្ខា ប្រមាញ់ និងនេសាទ បានឱ្យដឹងទៀតថា អ្នកបើកទូកទេសចរដែលប្រទះឃើញកូនផ្សោតថ្មីនេះបានរាយការជូនប្រធានឆ្មាំទន្លេ និងមន្ត្រីជលផលខេ្តតក្រចេះ និងបុគ្គលិកអង្គការ WWFដើម្បីជាព័ត៌មាន កត់ត្រានិងតាមដានបន្តទៀត។
តាមរយៈក្រុមស្រាវជ្រាវនៃខណ្ឌជលផលខេត្តក្រចេះ និងអង្គការ WWF បានចុះតាមដានកូនផ្សោតទើបកើតថ្មីនៅថ្ងៃទី១៨ ខែមេសា តាមការប៉ាន់ប្រមាណកូនផ្សោតនេះទើបតែមានអាយុប្រមាណ០៣ថ្ងៃប៉ុណ្ណោះ។

សូមបញ្ជាក់ជូនថា នៅឆ្នាំ២០២២ ក្រុមការងារបានកត់ត្រាកូនផ្សោតបានចំនួន០៦ក្បាល និងនៅឆ្នាំ២០២១ ក្រុមការងារបានកត់ត្រាកូនផ្សោតបានចំនួន០៦ក្បាល ខណៈ៤ខែក្នុងឆ្នាំនេះក្រុមការងារបានកត់ត្រាកូនផ្សោតបាន២ក្បាលផងដែរ៕

ដើមកញ្ឆាស្រស់ចំនួន ១០៦៧១ ដើម ទម្ងន់ ១ ២០៥គីឡូក្រាម ត្រូវអជ្ញាធរ ចុះបង្ក្រាបនិងដុតកម្ទេចចោល ព្រមទាំងឃាត់បានជនសង្ស័យជាជនជាតិវៀតណាម២នាក់ ដើម្បីកសាងសំណុំរឿង បញ្ជូនទៅសាលាដំបូងខេត្តមណ្ឌលគិរី ចាត់ការតាមនីតិវិធី។ នេះបើតាមការឱ្យដឹងពីផេកស្នងការនគរបាលខេត្តមណ្ឌលគិរីបង្ហោះកាលពីថ្ងៃទី១៥ ខែមេសា ឆ្នាំ២០២៣។

ការចុះបង្ក្រាបនេះ មានការដឹកនាំនិងចង្អុលបញ្ជាផ្ទាល់ពី លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរីបានដឹកនាំកម្លាំងជំនាញ ប្រឆាំងគ្រឿងញៀន និងកម្លាំងអន្តរាគមន៍ និងកម្លាំងអធិការស្រុកពេជ្រាដា ចុះទៅបង្ក្រាបទីតាំងដាំកញ្ឆាមួយកន្លែង ស្ថិតនៅភូមិម៉េប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរីឃាត់បានជនសង្ស័យ២នាក់ ។
ទី១.ឈ្មោះ ង្វៀន វ៉ាន់ហ្វាង ភេទប្រុស អាយុ៣២ឆ្នាំ ជនជាតិវៀតណាម ទីលំនៅភូមវូយបា ឃុំធុងដូរ ស្រុកវិញ ខេត្តងាអាន ប្រទេសវៀតណាម។
ទី២.ឈ្មោះ ហ្វាម វ៉ាន់ថាយ ភេទប្រុស អាយុ២៧ឆ្នាំ ជនជាតិវៀតណាម មានទីលំនៅភូមិវូយបា ឃុំធុងដូរ ស្រុកវិញ ខេត្តងាអាន វៀតណាម កាន់លិខិតឆ្លងដែនលេខ C2369263 ចាប់យកបានវត្ថុតាងរួមមាន÷១.កញ្ឆាស្ងួតចំនួន ០២កញ្ចប់ , ២.ជីគីមីចំនួន ៣០ ការុង
៣.ថ្នាំបំប៉នកញ្ឆា២៧កំប៉ុង , ៤.កែវជ័របណ្តុះកូនកញ្ឆា ចំនួន ៥០០កែវ , ៥.ជញ្ជីងថ្លឹងកញ្ឆាក្រៀម ចំនួន ០៣គ្រឿង , ៦.ម៉ាស៉ីនអ៊ុតកញ្ចប់កញ្ឆា ចំនួន ០៣ គ្រឿង , ៧.ថង់វេចខ្ចប់កញ្ឆា ចំនួន ៤៣៨ ថង់ , ៨.ជីម្សៅបំប៉នកញ្ឆា ចំនួន ០៨កញ្ចប់ , ០៩.ថ្នាំជ្រលក់កញ្ឆា ចំនួន ១២កំប៉ុង , ១០.ថ្នាំបាញ់ស្មៅ ចំនួន ០៤កញ្ចប់
១១.ធុងបាញ់ថ្នាំ ចំនួន ០១ , ១២.ស្លាកលេខម៉ូតូ(វៀតណាម)ចំនួន ០២សន្លឹក , ១៣.ការុងចំនួន ១៧៦ ការុង , ១៤.អាវសម្រាប់ការពារបាញ់ថ្នាំ ១ឈុត , ១៥.ប្រអប់ជ័រដាក់គ្រាប់កញ្ឆាចំនួន ០២ប្រអប់ , ១៦.ថ្នាំប៉ូវកញ្ឆា ០១ធុង២០លីត្រ , ១៧.ថូរជ័រដាំកញ្ឆាចំនួន ៧២០ថូ , ១៨.សំឡីសម្រាប់បណ្តុះគ្រាប់កញ្ឆាចំនួន ១២កញ្ចប់ , ១៩.លិខិតឆ្លងដែនចំនួន ០៣ក្បាល , ២០.ប័ណ្ណសំគាល់ខ្លួនចំនួន ០២សន្លឹក , ២១.ឯកសារចំនួន ៤២សន្លឹក។

របាយការណ៍ដដែលក៏បានបញ្ជាក់ថាដើមកញ្ឆាស្រស់ចំនួន ១០ ៦៧១ដើម ទម្ងន់ ១ ២០៥គីឡូក្រាម សមត្ថកិច្ចក៏បានកាប់និងដុតកម្ទេចចោលដូចគ្នាខណៈជនសង្ស័យទាំង២នាក់ នឹងចាត់ការតាមផ្លូវច្បាប់៕

អតីតតួឯកល្ខោន និងតារាកំប្លែងល្បីឈ្មោះមួយរូប អ្នកនាង ផន សុផារី បានទម្លាយរឿងចាំជាតិសាជាថ្មី ដែលកំពុងធ្វើឱ្យអ្នកលេងបណ្តាញសង្គមផ្ទុះការចាំអារម្មណ៍មិនធម្មតាមានអ្នកតាមដានលើបណ្តាញសង្គមហ្វេកប៊ុកជាង៥លានដង និងមានការចែករំលែករាប់ម៉ឺននាក់។ ការបង្ហោះវីដេអូចាំជាតិនេះ អ្នកនាង ផន សុផារី បានអះអាងថា ខ្លួនមិនមែនចង់ទាក់ទាញចំណាប់អារម្មណ៍ពីមហាជនឡើយគ្រាន់តែចង់បង្ហាញអំពើល្អប៉ុណ្ណោះ។

បើនិយាយពីរឿង«ចាំជាតិ» អ្នកមួយចំនួនអាចជឿ និងអ្នកមួយចំនួនមិនជឿឡើយ។ កន្លងមកក៏មានអ្នកធ្លាប់អះអាងថាខ្លួនចាំជាតិពីអតីតកាលផងដែរ កាលពីជាតិមុនជាអ្នកនេះ ជាអ្នកនោះជាដើម។ ក្នុងនោះអ្នកនាង ផន សុផារី ត្រូវជាអ្នកម៉ាក់របស់ ប៊ែលឡា និង អ៊ែលលី ដែលកំពុងមានប្រជាប្រិយភាពធ្លាប់បានទម្លាយម្តងហើយកាលពី៣ឆ្នាំមុនថាអ្នកនាងចាំជាតិដែលធ្វើឱ្យមានភាពភ្ញាក់ផ្អើលយ៉ាងខ្លាំងមានទាំងអ្នកជឿ និងមិនជឿ។

យ៉ាងណានៅថ្ងៃទី១៧ ខែមេសា នេះតួឯកល្ខោនខាងលើបានបង្ហោះវីដេអូរបស់ខ្លួនបញ្ជាក់ពីរឿងចាំជាតិ និងទៅសួរសុខទុក្ខអតីតភរិយាម្តងទៀត ដោយបង្ហាញថាកាលពីជាតិមុនអ្នកនាងជាមនុស្សប្រុស ខណៈការចាំជាតិរបស់អ្នកនាងមិនបានទាំងស្រុងនោះទេ។ ទន្ទឹមនឹងការបង្ហាញពីការចាំជាតិនេះ អ្នកនាង ផន សុផារី បានអះអាងថាខ្លួនមិនចង់បានចំណាប់អារម្មណ៍ពីមហាជនឡើយ គ្រប់យ៉ាងគ្រាន់តែចង់បង្ហាញពីការធ្វើល្អ និងការធ្វើឱ្យល្អបំផុតសម្រាប់ខ្លួនក្នុងថ្ងៃនេះ ព្រោះយើងមិនដឹងថាថ្ងៃខាងមុខយើងនឹងជួបប្រទះអ្វីឡើយ។

គួរបញ្ជាក់ថា កាលពីឆ្នាំ២០១៩ អ្នកនាង ផន សុផារី ធ្លាប់បង្ហាញរួចមកហើយថាអ្នកនាង ចាំជាតិ ដែលធ្វើឱ្យមានការភ្ញាក់ផ្អើលយ៉ាងខ្លាំងនាគ្រានេះ មានទាំងអ្នកជឿ និងអ្នកមិនជឿ ដូច្នេះហើយទើបអ្នកនាងពុំសូវបង្ហាញពីការចាំជាតិរបស់ខ្លួនឡើយដើម្បីកុំឱ្យអ្នកមួយចំនួនលើកឡើងថា នាងចង់បានចំណាប់អារម្មណ៍ពីមហាជនទើបប្រឌិតរឿងបែបនេះ ខណៈក្នុងឆ្នាំនេះនាងសម្រេចចិត្តបង្ហាញម្តងទៀតកាន់តែទទួលបានការចាប់អារម្មណ៍ខ្លាំងពីអ្នកលេងបណ្តាញសង្គម៕