សហរដ្ឋអាមេរិក ៖ ឆ្នេរសមុទ្រនៅរដ្ឋកាលីហ្វ័រញ៉ា សហរដ្ឋអាមេរិក និងបាត់បង់៧០% នៅឆ្នាំ២១០០ ឬប្រមាណ៧០ឆ្នាំទៀត ដោយសារអាកាសធាតុក្តៅធ្វើឱ្យកម្រិតទឹកសមុទ្រកើនឡើង ។ នេះបើតាមការវិភាគ និងតាមដានទិន្នន័យពីផ្កាយរណបកាលពីឆ្នាំ២០១៧ របស់ក្រុមស្រាវជ្រាវភូមិសាស្ត្រអាមេរិក ។ ពួកគេបានពិនិត្យមើលបម្រែបម្រួលអាកាសធាតុដែលកើតឡើង វាយតម្លៃនិន្នាការនាថ្ងៃអនាគត រួមទាំងបម្រែបម្រួលអាកាសធាតុផងដែរ ។

ក្រុមស្រាវជ្រាវភូមិសាស្ត្រអាមេរិករកឃើញថា ឆ្នេរសមុទ្រនៅរដ្ឋកាលីហ្វ័រញ៉ា ដែលមានប្រវែង១.៧៧០គីឡូម៉ែត្រកំពុងត្រូវបានបំផ្លាញបន្តិចម្តងៗដោយសារទឹកហូរច្រោះ ហើយវានឹងបាត់បង់ចាប់ពី២៥% ដល់៧០% នៅឆ្នាំ២១០០ ។ ការបាត់បង់នេះ ក៏អាស្រ័យលើបរិមាណកាបូនដែលគេបានបញ្ចេញទៅលើបរិយាកាសផងដែរ ដែលនឹងធ្វើឱ្យពិភពលោកក្តៅខ្លាំងជាងមុន ។

ប្រធានក្រុមស្រាវជ្រាវភូមិសាស្ត្រអាមេរិក លោក Sean Vitousek បានលើកឡើងថា ៖ «ឆ្នេរសមុទ្រដ៏ល្បីល្បាញបំផុតនៅរដ្ឋកាលីហ្វ័រញ៉ានឹងបាត់បង់សភាពដើមរបស់វា ហើយមិនមែនជាការបាត់បង់ធនធានធម្មជាតិប៉ុណ្ណោះទេ ប៉ុន្តែវាជាការបាត់បង់ផ្នែកសេដ្ឋកិច្ច និងស្ថេរភាពរបស់អ្នករស់នៅក្បែរនោះទៀតផង» ។

ការស្រាវជ្រាវកាលពីខែមករា ឆ្នាំ២០២៣ បញ្ជាក់ថា បច្ចុប្បន្ន កម្រិតទឹកសមុទ្របានកើនឡើង០,៩១ម៉ែត្រ ហើយធ្វើឱ្យទឹកហូរច្រោះនៅតាមឆ្នេរសមុទ្រ ក្នុងនោះ នៅឆ្នេរសមុទ្ររដ្ឋកាលីហ្វ័រញ៉ាមានបញ្ហាទឹកហូរច្រោះក្នុងរយៈពេលយូរ ។ ប៉ុន្តែអ្នកជំនាញនិយាយថា គេត្រូវសិក្សាបន្ថែម ព្រោះនៅមានកត្តាជាច្រើនទៀតដើម្បីឱ្យប្រាកដថា ហេតុការណ៍នេះនឹងកើតឡើងនាថ្ងៃអនាគត ។

ការស្រាវជ្រាវនេះបង្ហាញឱ្យឃើញថា ឆ្នេរសមុទ្រកំពុងតែផ្លាស់ប្តូរ ហើយអាចត្រូវប្រើប្រាស់ចំណេះដឹង និងសមត្ថភាពរបស់មនុស្សដើម្បីរក្សាធនធានធម្មជាតិ ។ បច្ចុប្បន្ន អាជ្ញាធរនៅរដ្ឋកាលីហ្វ័រញ៉ាបានគាំទ្រឱ្យទីក្រុងនានាកែលម្អច្រាំងឱ្យរឹងមាំជាងមុន ។ លោក Sean Vitousek បន្ថែមថា ៖ «ការកែលម្អច្រាំងនេះ មិនថាការសាងសង់ច្រាំងថ្មទប់ទឹកសមុទ្រ ឬការតម្រៀបថ្មធំៗទប់ទល់នឹងទឹករលក ឬការការពារខ្សាច់ធម្មជាតិ គឺត្រូវប្រើប្រាស់ការព្យាយាមយ៉ាងខ្លាំង ទើបអាចធ្វើទៅបាន» ៕ ប្រភព ៖ environman

ប្រទេសកូរ៉េខាងជើង ៖ សារព័ត៌មាន Delhi NK បានចុះផ្សាយថា មន្ត្រីរាជការ និងនិស្សិតជាច្រើននាក់ត្រូវបានគេបញ្ជូនពីទីក្រុងព្យុងយ៉ាងទៅកាន់តំបន់វាលស្រែក្នុងខេត្តវាំងហែតាយ ស្ថិតនៅភាគខាងលិចប្រទេសកូរ៉េខាងជើង ហើយសូម្បីតែមន្ត្រីទូតរុស្ស៊ីប្រចាំនៅកូរ៉េខាងជើង ក៏ត្រូវបានគេស្នើឱ្យបញ្ចេញកម្លាំងពលកម្មផងដែរ ដោយមានការឃោសនាបបួលឱ្យមន្ត្រីទូតមកធ្វើការក្នុងកសិដ្ឋានបន្លែនៅក្បែរក្រុងម៉ាន់ផូ ។ ខេត្តវាំងហែតាយ ត្រូវបានគេដាក់ឈ្មោះថាជា «កន្ត្រកនំប៉័ង» របស់កូរ៉េខាងជើង ដោយសារខេត្តនេះមានផ្ទៃដីរាបស្មើ និងមានភ្នំតិចជាងខេត្តផ្សេងទៀត ហើយសមស្របក្នុងការធ្វើស្រែចម្ការផងដែរ ។

សារព័ត៌មាន Delhi NK ជាសារព័ត៌មានផ្លូវការរបស់កូរ៉េខាងជើង ដែលបានសរសើរពីការប្រឹងប្រែងបង្កបង្កើនផលស្រូវក្នុងតំបន់របស់ក្រុមអ្នកស្ម័គ្រចិត្ត ព្រមទាំងសរសើរពីការជួយរបស់ក្រសួងផ្សេងៗ ដូចជា វិទ្យាស្ថានជាតិ និងភ្នាក់ងារនានារបស់រដ្ឋាភិបាល ។ ចំណែកអ្នកស្រុកនិយាយថា គេបានរៀបចំកន្លែងស្នាក់នៅក្នុងខេត្តសម្រាប់អ្នកស្ម័គ្រចិត្តទាំងអស់ដែលធ្វើដំណើរមកពីទីក្រុង ដើម្បីមកជួយស្រោចទឹក និងដាក់ជីដំណាំ ក្រៅពីនេះ ក៏មានអ្នកស្ម័គ្រចិត្តមកជួយដាំកូនឈើផងដែរ ។

សារព័ត៌មាន Rodong Sinmun ចុះផ្សាយថា មន្ត្រីទូតរុស្ស៊ីបានជួយកម្ចាត់ស្មៅនៅសួនបន្លែខូឆាំង ដែលនៅឆ្ងាយពីស្ថានទូតរុស្ស៊ីទៅកាន់ទិសនិរតីប្រមាណ១៣គីឡូម៉ែត្រ ។ រីឯគេហទំព័រហ្វេសប៊ុករបស់ស្ថានទូតរុស្ស៊ីប្រចាំទីក្រុងព្យុងយ៉ាងបញ្ជាក់ថា កសិដ្ឋាននេះកំពុងដាំដុះដំឡូងបារាំង ពោត និងសណ្តែកសៀង ហើយមន្ត្រីស្ថានទូតនឹងទទួលបានការបែងចែកទិន្នផលដើម្បីយកមកបរិភោគផងដែរ ក្រោយពីបានជួយដាំដុះដំណាំ ។

ភ្នាក់ងារស៊ើបការណ៍សម្ងាត់កូរ៉េខាងត្បូងលើកឡើងថា កាលពីឆ្នាំ២០២២ ចំនួនអ្នកស្លា.ប់ដោយសារការអត់ឃ្លានបានកើនឡើង៣ដងនៅប្រទេសកូរ៉េខាងជើង ចំណែកលោក គីម ជុងអ៊ុន មេដឹកនាំកំពូលកូរ៉េខាងជើង មានរាងកាយស្គមកាលពីមុន បច្ចុប្បន្ននេះ លោកមានសុខភាពល្អវិញហើយ និងមានទម្ងន់ជិត១៤០គីឡូក្រាម ។

លោក Yoo Sang Bom ជាអ្នកស្រុកម្នាក់រស់នៅក្បែរជាយដែននិយាយថា ៖ «យើងដឹងថា តម្លៃពោតនៅកូរ៉េខាងជើងកើនឡើង៦០% ហើយតម្លៃស្រូវកើនឡើង៣០% បើធៀបនឹងឆ្នាំ២០២២ ។ ដូច្នេះ វាជាតម្លៃមួយខ្ពស់បំផុតតាំងពីលោក គីម ជុងអ៊ុន ឡើងកាន់អំណាច» ៕ ប្រភព ៖ khaosod

រដ្ឋធានីកៀវ៖ ក្រោយពេលកងកម្លាំងទាហានស៊ីឈ្នួល Wagner និង កងទ័ពរបស់រដ្ឋាភិបាលរុស្ស៊ី បានវាយដណ្ដើមកាន់កាប់ទីក្រុងបាកមូត មានទំហំផ្ទៃដី ៤១,៦គីឡូម៉ែត្រការ៉េ បន្ទាប់ពីការវាយប្រយុទ្ធគ្នា អស់រយៈពេលជាច្រើនខែរួចមក ឥឡូវនេះ ថៅកែរបស់ក្រុមហ៊ុនទាហានស៊ីឈ្នួលមួយនេះ បានអះអាង ថា អ៊ុយក្រេន បានវាយរំដោះផ្នែកមួយចំនួនរបស់ទីក្រុងនេះ ត្រឡប់ទៅវិញ។

សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីថ្ងៃចន្ទ ទី៥ ខែមិថុនា ថា លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ស្ថាបនិកក្រុមហ៊ុនទាហានស៊ីឈ្នួលរបស់រុស្ស៊ី Wagner បានបញ្ជាក់ កាលពីថ្ងៃចន្ទ ថា «អ៊ុយក្រែន បានដណ្តើមយកមកវិញនូវផ្នែកមួយចំនួនរបស់ទីតាំងឈរជើង នៅប៊ឺឃីវកា (Berkhivka) នាភាគខាងជើង នៃទីក្រុងបាកមូត ( Bakhmut)។ នេះ ជាការអាម៉ាស់បំផុតមួយផងដែរ»។

កម្លាំងទាហានរបស់ក្រុមហ៊ុនទាហានឯកជន Wagner របស់លោក ព្រីហ្គោហ្ស៊ីន បានដណ្ដើមកាន់កាប់ទីក្រុងបាកមូត កាលពីខែមុន ក្រោយពេលវាយប្រយុទ្ធគ្នាយ៉ាងយូរបំផុត នៅក្នុងសង្រ្គាម។ បន្ទាប់មក ក្រុមហ៊ុនទាហានឯកជនមួយនេះ បានប្រគល់ទីក្រុងបាកមូត ទៅឱ្យកម្លាំងទាហានរបស់រដ្ឋាភិបាលរុស្ស៊ី គ្រប់គ្រង។ ដោយឡែក កម្លាំងកងទ័ពអ៊ុយក្រែន បានបន្តវាយប្រហារ ដណ្ដើមកាន់កាប់តំបន់ នៅជិតទីក្រុងនោះត្រឡប់ទៅវិញ។

លោក ព្រីហ្គោហ្ស៊ីន ថៅកែក្រុមហ៊ុនទាហានស៊ីឈ្នួលរុស្ស៊ី បានបញ្ជាក់ នៅក្នុងសារជាសំឡេងមួយ ហើយត្រូវបានផ្សព្វផ្សាយ ថា «ឥឡូវនេះ ប៊ឺឃីវកា ( Berkhivka) មានចម្ងាយត្រឹមតែ៣គីឡូម៉ែត្រ ពីទីក្រុងបាកមូត ត្រូវបានបាត់បង់ទៅវិញ ខណៈកងទ័ព កំពុងតែរត់គេចខ្លួនទៅឆ្ងាយ។ គាត់បានជំរុញឱ្យរដ្ឋមន្ត្រីការពារជាតិរុស្ស៊ី លោក ស៊ើរហ្គេ សយហ្គូ (Sergei Shoigu) និង លោកនាយអគ្គសេនាធិការ វ៉ាឡេរី ហ្គេរ៉ាស៊ីម៉ូវ (Valery Gerasimov) ទៅកាន់សមរភូមិ ប្រមូលផ្តុំកម្លាំងកងទ័ពឡើងវិញ»។

លោកថៅកែ ព្រីហ្គោហ្ស៊ីន បានឈ្លោះប្រកែកគ្នា ជាសាធារណៈជាមួយនឹងលោករដ្ឋមន្រ្ដីក្រសួងការពារជាតិរុស្ស៊ី និង លោកនាយអគ្គសេនាធិការ អស់រយៈពេលជាច្រើនខែមកហើយ ដោយគាត់បានចោទប្រកាន់ពួកគេ ជាញឹកញាប់ ថា មិនបានផ្តល់គ្រាប់រំសេវ និង ផ្ដល់ការគាំទ្រគ្រប់គ្រាន់ សម្រាប់កងកម្លាំងទាហាន Wagner នៅលើសមរភូមិ ទើបបណ្ដាលឲ្យទាហានរបស់គាត់ រងការខាតបង់យ៉ាងខ្លាំង៕

បរទេស៖ ក្រុមអ្នកជំនាញនៅសាកលវិទ្យាល័យ Stanford បានបង្កើតស្បែកអេឡិកត្រូនិកសំយោគពហុស្រទាប់សម្រាប់មនុស្សយន្ត ដែលស្បែកនោះអាចជាសះស្បើយដោយខ្លួនឯងក្នុងរយៈពេល ២៤ ម៉ោង។
យោងតាមប្រភពព័ត៌មាន New Atlas កាលពីថ្ងៃទី ៤ ខែមិថុនា បានរាយការណ៍ថា ស្បែកថ្មីធ្វើត្រាប់តាមស្បែកពិត ដែលអនុញ្ញាតឱ្យមនុស្សយន្តមានអារម្មណ៍ដូចមនុស្ស។ មានន័យថា នៅពេលដែលស្បែករបស់មនុស្សយន្តមានរបួស វានឹងជាសះស្បើយខ្លួនឯង ដោយមិនបាច់ត្រូវការជួសជុលនោះទេ។

លោក Christopher B.Cooper បណ្ឌិតនៅសាកលវិទ្យាល័យ Stanford និងជាសហអ្នកនិពន្ធនៃការសិក្សា បាននិយាយថា ការបង្កើតស្បែកអេឡិកត្រូនិកសំយោគពហុស្រទាប់សម្រាប់មនុស្សយន្ត គឺជាជំហានដ៏សំខាន់ក្នុងការធ្វើត្រាប់តាមស្បែកមនុស្ស ដែលមានផ្នែកជាច្រើនស្រទាប់។ គោលបំណងរបស់យើនោះគឺចង់ឱ្យមនុស្សយន្តមានអារម្មណ៍ និងមានការឈឺចាប់ដូចជាមនុស្សផងដែរ។

ស្បែករបស់មនុស្សយន្តគឺដូចជាស្បែករបស់មនុស្សដែល ដោយវាមានសភាពទន់ និងលាតសន្ធឹង។ ស្បែកអេឡិចត្រូនិចនេះអាចជាសះស្បើយដោយខ្លួនឯងក្នុងរយៈពេលត្រឹមតែ ២៤ ម៉ោងនៅពេលដែលកំដៅដល់ ៧០ អង្សាសេឬប្រហែលមួយសប្តាហ៍នៅសីតុណ្ហភាពបន្ទប់។ លោក Renee Zhao ដែលជាសហអ្នកនិពន្ធការសិក្សា បាននិយាយថា “ភាពរួមបញ្ចូលគ្នាជាមួយនឹងការរុករកម៉ាញេទិកនឹងកំដៅអាំងឌុចស្យុងយើងអាចបង្កើតមនុស្សយន្តទន់ៗ ដែលមានសមត្ថភាពផ្លាស់ប្តូររូបរាងនិងដឹងពីការខូចទ្រង់ទ្រាយរបស់ពួកគេតាមតម្រូវការ”៕ ប្រភព៖vnexpress

ប្រទេសថៃ ៖ លោក ប្រាយុទ្ធ ចាន់អូចា នាយករដ្ឋមន្ត្រីប្រទេសថៃ និងជារដ្ឋមន្ត្រីក្រសួងការពារជាតិ បានថ្លែងក្នុងឱកាសទិវាជាតិស្រូវអង្ករប្រចាំឆ្នាំ២០២៣ ដែលប្រទេសថៃបានប្រារព្ធធ្វើនៅរៀងរាល់ថ្ងៃទី៥ ខែមិថុនា តាមរយៈទូរទស្សន៍ដើម្បីផ្តល់កម្លាំងចិត្តឱ្យកសិករនៅទូទាំងប្រទេសថា ក្នុងឱកាសនេះ លោកសូមផ្ញើនូវក្តីស្រឡាញ់ ការនឹករលឹក និងបំណងល្អទៅកាន់បងប្អូនកសិករគ្រប់រូបត្រូវរួមគ្នាថែរក្សាអត្តសញ្ញាណស្រូវអង្កររបស់ថៃ ។

លោក ប្រាយុទ្ធ ចាន់អូចា បានថ្លែងថា ស្រូវអង្ករ គឺជាគ្រាប់ធញ្ញជាតិដ៏មានសារសំខាន់មួយ និងត្រូវបានចាត់ទុកថា ជាផ្នែកមួយនៃការរស់នៅរបស់ពលរដ្ឋថៃ ដែលបានបន្តមរតកនេះតាំងពីជំនាន់ចាស់បុរាណមកម៉្លេះ ។ កសិករគ្រប់រូបត្រូវមានជំនាញក្នុងការដាំដុះ និងថែទាំស្រូវរបស់ខ្លួន ដើម្បីទទួលបានទិន្នន័យខ្ពស់ និងគុណភាពល្អ ។ លោកបន្តថា គេបានចាត់ទុកកសិករថៃជាកម្លាំងដ៏សំខាន់ក្នុងការបង្កើតភាពសម្បូរបែប និងសន្តិសុខស្បៀង ហើយកសិករថៃបានបំពេញតួនាទីដាំដុះស្រូវដើម្បីចិញ្ចឹមពលរដ្ឋថៃនៅទូទាំងប្រទេស និងពលរដ្ឋនៅទូទាំងពិភពលោក រហូតមក ។ ដូច្នេះ កសិករគួរត្រូវបានលើកសរសើរ និងផ្តល់កិត្តិយស ព្រោះកសិករជាអ្នករួមចំណែកដល់សន្តិសុខស្បៀង និងថែរក្សាប្រពៃណីវប្បធម៌ជាតិ ។

លោក ប្រាយុទ្ធ ចាន់អូចា បន្ថែមថា បច្ចុប្បន្ននេះ ការបង្កបង្កើនផលស្រូវនៅប្រទេសថៃបានធ្វើតាមបច្ចេកវិទ្យា និងមានភាពច្នៃប្រឌិត ដើម្បីអភិវឌ្ឍន៍សក្តានុពលផលិតកម្មស្រូវឱ្យកាន់តែល្អប្រសើរឡើង ចាប់តាំងពីដំណាក់កាលដាំដុះ រហូតដល់ការកែច្នៃវេចខ្ចប់ ដើម្បីជំរុញឱ្យទិន្នផលស្រូវអង្ករមានគុណភាពខ្ពស់ ។ លើសពីនេះ ត្រូវប្រើប្រាស់ជីក្នុងស្រុកជំនួសការប្រើជីគីមីនាំចូលពីក្រៅប្រទេស ព្រោះការធ្វើកសិកម្មមានសុវត្ថិភាព គេត្រូវប្រើប្រាស់ជីក្នុងស្រុក ដែលជាមិត្តជាមួយបរិស្ថានផងដែរ ។

លោក ប្រាយុទ្ធ ចាន់អូចា សង្ឃឹមយ៉ាងមុតមាំថា បងប្អូនកសិករគ្រប់រូបនឹងអាចយកចំណេះដឹងសម័យថ្មីមកអនុវត្តក្នុងការធ្វើកសិកម្មរបស់ខ្លួន ដើម្បីរួមចំណែកបង្កើតភាពរឹងមាំផ្នែកស្បៀងដល់ប្រទេសជាតិបន្តទៀត ។ ក្នុងទិវាជាតិស្រូវអង្ករនេះ លោកក៏បានសូមឱ្យកសិករទាំងអស់រីកចម្រើនក្នុងការងារកសិកម្ម និងនាំគ្នាថែរក្សាអត្តសញ្ញាណអង្កររបស់ថៃ ៕ ប្រភព ៖ khaosod