យោងទៅតាមការបង្ហោះរបស់រដ្ឋមន្រ្តីក្រសួងព័ត៌មាន ឯកឧត្តម ខៀវ កាញារីទ្ធ នៅថ្ងៃនេះបានឱ្យដឹង៖” សម្តេចហ៊ុនសែន បានហាមប្រាមមិនឱ្យមន្ត្រីរបស់យើងចេញទៅក្រៅប្រទេសនោះឡើយ ចាប់ពីថ្ងៃទី៦ ខែសីហា ខាងមុខនេះតទៅ”។

ទាក់ទងនឹងរឿងនេះហាមប្រាមនេះផងដែរ លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យ​រាជ​រដ្ឋាភិបាល បានឱ្យដឹងថា ការហាមនេះ ដោយសារចាប់ពីខែមិថុនាទៅ មន្ត្រីជាប់រវល់​បំពេញ​ការងារច្រើននៅមូលដ្ឋាន (សុីហ្គេម និងដំណើរការបោះឆ្នោត)។ ចំណែកការងារក្រៅប្រទេសសម្តេចណែនាំទុក​ឱ្យ​មន្ត្រីទូតជាអ្នកបំពេញ៕

មហាជនអ្នកស្នេហាវិស័យគុនខ្មែរមានក្តីសោកស្តាយយ៉ាងខ្លាំងក្រោយពីកីឡាករ ធឿន ធារ៉ា អ្នកលេងពូថៅដៃ ភ្លាត់ស្នៀតចាញ់ក្រោយថ្វីដៃរបស់កីឡាករថៃ ក្រុងចក្រ រងរបួសដៃត្រូវបោះបង់ការប្រកួតក្នុងទឹកទី៤។ ជាមួយគ្នានេះ តារាល្បីៗជាច្រើនរូបរួមមាន តារាចម្រៀង ខេម ពិធីករ ប៉ែនចំរ៉ុង តារាកំប្លែង ពាក់មី និងឧកញ៉ា ហេង ឡុង ជាដើមបានចូលរួមលើកទឹកចិត្ត និងសំណូមពរកុំឱ្យមានការស្តីបន្ទោស ខណៈឧកញ៉ា ស្រី ចាន់ថន ប្រកាសចេញថ្លៃព្យាបាលទាំងស្រុងដល់កីឡាករ ធឿន ធារ៉ា។

នៅសង្វៀនស្ថានីយ៍ទូរទស្សន៍បាយ័ន គូមិត្តភាពអន្តរជាតិរវាងកីឡាករខ្មែរ ធឿន ធារ៉ា និងកីឡាករថៃ ក្រុង ចក្រ ដែលប៉ះគ្នាជាលើកទី២នេះ បានធ្វើឱ្យអ្នកស្នេហាគុនខ្មែររំភើបចិត្តជាខ្លាំង។ ជាក់ស្តែងនៅថ្ងៃអាទិត្យ ទី២៣ ខែមេសា ឆ្នាំ២០២៣ ការប្រកួតមកដល់ មានបងប្អូនទៅទស្សនាផ្ទាល់ និងទស្សនាតាមគេហដ្ឋាន យ៉ាងច្រើនកុះករចំពោះគូនេះ ទស្សនាយ៉ាងជក់ចិត្តដិតអារម្មណ៍តាំងពីទឹកទី១ដល់ទឹកទី៣។ តែគួរឱ្យសោកស្តាយសម្រាប់កីឡាករ ធឿន ធារ៉ា បានភ្លាត់ស្នៀតចាញ់កីឡាករថៃ ក្រុង ចក្រ ឱ្យបោះបង់ការប្រកួតនៅក្នុងទឹកទី៤ ដែលកីឡាកររូបនេះត្រូវរងរបួសដៃស្តាំ មិនអាចបន្តការប្រកួតបានឡើយ។

មហាជនអ្នកស្នេហាគុនខ្មែរបានសម្តែងក្តីសោកស្តាយយ៉ាងខ្លាំង ព្រោះជារឿងនឹកស្មានមិនដល់ដែលកីឡាករ ធឿន ធារ៉ា ត្រូវភ្លាត់ស្នៀតចាញ់កីឡាករថៃរងរបួសដៃស្តាំ។ បន្ទាប់ពីមិនអាចយកជ័យជំនះជូនប្រជាជនកម្ពុជាបាន អ្នកលេងពូថៅដៃ រូបនេះ បានពោលពាក្យថា «ជាងការប្រកួតមួយនេះខ្ញុំសុំទោសទៅដល់ពុកម៉ែបងប្អូនដែលខ្ញុំធ្វើមិនបានល្អ»។ បើតាមការបញ្ជាក់របស់លោកគ្រូ អេ ភូថង ទៅលើរបួស ធឿន ធារ៉ា លោកបានរៀបរាប់ថា «តាមការបញ្ជាក់របស់លោកគ្រូពេទ្យកែងដៃរបស់ ធឿន ធារ៉ា ក្រោយពិនិត្យនិងថតរួចមក គឺមិនប៉ះពាល់ដល់ឆ្អឹងទេគ្រាន់តែត្រូវសម្រាកព្យាបាលនៅផ្ទះមួយរយៈខ្លីប៉ុណ្ណោះអាចប្រកួតវិញបានធម្មតា សូមអគុណដល់ហ្វេនៗដែលព្រួយបារម្ភដល់ ធឿន ធារ៉ា»។
ការចាញ់របស់ធឿន ធារ៉ា នេះទៀតសោត អ្នកសិល្បៈល្បីៗជាច្រើនរូបបានបង្ហោះសារលើកទឹកចិត្តដល់កីឡារូបនេះផងដែរ។

តារាចម្រៀង ខេម ដែលជាអ្នកស្នេហាគុនខ្មែរមួយរូបបានរៀបរាប់នៅលើបណ្តាញសង្គមថា «ទោះចាញ់ឈ្នះយ៉ាងណា ពួកយើងនៅតែគាំទ្រប្អូន ជូនពរប្អូនឆាប់ជាសះស្បើយ»។ ពិធីករ ប៉ែន ចំរ៉ុង បានលើកឡើងថា «ខ្ញុំបានមើលការប្រកួតគាត់រួចហើយ ខ្ញុំជឿថាគាត់ប្រឹងអស់សមត្ថភាពហើយ តែការប្រកួតជាបាល់មូល ពេលខ្លះក៏សុខភាពល្អ ពេលខ្លះសុខភាពមិនល្អ តែក្នុងនាមជាហ្វេនរបស់ប្អូនសូមសំណូមពរប្អូនប្រុសបន្ថយការប្រកួតខ្លះ(Great A ហើយ) ប្រកួតតែគូសំខាន់ៗ ទុកពេលថែរក្សាសុខភាពខ្លះផង ប្រឹងប្រែងហាត់បង្កើនថាមពល ដើម្បីមុខមាត់គុនខ្មែរ ។ ហើយក៏សូមជូនពរប្អូនប្រុសឆាប់ជាសះស្បើយមានសុខភាពល្អប្រសើរឆាប់ៗ និងជោគជ័យគ្រប់ការប្រកួតណា»។

ងាកទៅកាន់ តារាកំប្លែងល្បីឈ្មោះ នាយ ពាក់មី វិញ ក៏បានលើកទឹកចិត្តទៅដល់ ធារ៉ា ផងដែរថា «សូមបងប្អូនកុំអាលផុសបន្ទោស ធឿនធារ៉ា បានអត់? គ្នាកំពុងរបួស លើទឹកចិត្តគ្នាសិនទៅ»។ ឧកញ៉ា ហេង ឡុង វិញបានសរសេរថា «កីឡាចាញ់ឈ្នះជារឿងធម្មតាប្អូនប្រុសនេះជាបទពិសោធន៍មួយដែលធ្វើប្អូនកាន់តែខ្លាំង គាំទ្រប្អូនជានិច្ច» ក្នុងនោះលោកក៏លើកឡើងទៀតថា ធឿន ធារ៉ា មិនគួរវៃញឹកពេកទេ។

ទាក់នងនឹងរបួសដៃស្តាំរបស់ ធឿន ធារ៉ា ,ឧកញ៉ា ស្រី ថន ក៏បានប្រកាសជាសាធារណៈចេញថ្លៃព្យាបាលទាំងស្រុងដល់កីឡករមានដើមកំណើតនៅខេត្តព្រៃវែងរូបនេះផងដែរ។

គួរបញ្ជាក់ផងដែរថា អ្នកលេងពូថៅដៃ ធឿន ធារ៉ា ជាម្ចាស់ខ្សែក្រវាត់ថៃហ្វៃស៍ ជាម្ចាស់ខ្សែក្រវាត់ IPCC Kun Khmer World Campions និងគ្រុឌគុនខ្មែរ ផងដែរ៕

យោងទៅតាមការចេញផ្សាយរបស់សហព័ន្ធបាល់ទាត់កម្ពុជា បានឱ្យដឹងថា បងប្អូនដែលចង់បានសំបុត្រចូលរួមទស្សនា ការប្រកួតរបស់គោព្រៃកម្ពុជា ពេលនេះអាចទៅយកសំបុត្របានហើយ ចាប់ពីម៉ោង១២ ថ្ងៃទី២៤ ខែមេសានេះតទៅ។

នកទស្សនាទាំងអស់ អាចទៅយកសំបុត្រចូលរួមទស្សនាដោយសេរីនៅ៥ទីតាំងនេះ៖

• ពហុកីឡដ្ឋានជាតិអូឡាំពិច
• ទីលាន​ The Blue
• FAN  SPORT
• DOUBLE SPORT
• Sport Castle STM

នៅក្នុងផងដែរអ្នកគាំទ្រម្នាក់ អាចទទួលបានសំបុត្រតែមួយសន្លឹកប៉ុណ្ណោះ ដោយសំបុត្រមួយនោះអាចទស្សនាបាន២ប្រកួតនាក្នុងថ្ងៃតែមួយតែម្តង៕

ការរិះគន់រឿងសំលៀកបំពាក់របស់របស់លោក ឯម រៀម បានស្ងប់ស្ងាត់មួយរយៈហើយ ប៉ុន្តែស្រាប់តែអ្នកច្នៃម៉ូតរូបនេះបានផ្តាំផ្ញើយ៉ាងស្លូតបូត តែមានអត្ថន័យយ៉ាងជ្រាលជ្រៅទៅកាន់លោក គួច ខេវិន និងលោក ថៃ នរៈសត្យា ក្រោយអ្នកទាំងពីរបានចែករំលែកពីរឿង លោក ឯម រៀម លួចចម្លងម៉ូតអ្នកដទៃ។

បណ្ឌិតដែលបញ្ចប់ការសិក្សាពីប្រទេសបារាំងលោក ឯម រៀម បានសរសេររៀបរាប់នៅលើបណ្តាញសង្គមនៅថ្ងៃទី២២ ខែមេសា ឆ្នាំ២០២៣ យ៉ាងដូច្នេះថា «ផ្ញើជូនបងៗដែលថា ឯម រៀម ចម្លងម៉ូតពីគេ ការពិតរូបម៉ូតប្រុសស្រីដែលបងប្អូនបានឃើញ គឺ LIMVIRIYA គាត់បានគូរតាមម៉ូតរបស់ខ្ញុំ ក្រោយផ្ទុះការរិះគន់ ២ថ្ងៃ ដោយគាត់គូរតាមកម្មវិធី Artificial Intelligence (AI) ហើយសូមបងប្អូនមើលអក្សរខាងក្រោមនៃរូបរបស់ខ្ញុំ គាត់បានសរសេរថា ORIGINAL EM RIEM’S FASHION ហើយគាត់បាន Post ដាក់ឈ្មោះឱ្យម៉ូតរបស់ខ្ញុំថែមទៀតផង ដូចនេះហើយសូមបងប្អូន កែអត្ថន័យ ឬប្រើភាសារឱ្យបានថ្លៃថ្នូរ»។

អ្នកច្នៃម៉ូតរូបនេះបន្តទៀតថា «ជាពិសេស បងៗ តែៗ ស្ករៗ Share បន្ត មានដូចជាបង គួច ខេវិន និងបងថៃ នរៈសត្យា បងៗសុទ្ធតែនៅក្នុងសិល្បះដូចគ្នា ហើយនេះជាសម័យ Digital ទីផ្សារមានការប្រជែងគ្នា បងៗធ្វើតាមទីផ្សារសិល្បៈរបស់បងៗ ឯខ្ញុំធ្វើតាមទីផ្សារសិល្បៈរបស់ខ្ញុំ មុននិងបងៗ Share សូមបងៗពិនិត្យមើលផង មនុស្សម្នាក់ៗមានសិទ្ធិក្នុងការបញ្ចេញមតិ តែសូមកុំជាន់គេដើម្បីខ្លួនឯង ដោយក្តីគោរព ពីខ្ញុំ ឯម រៀម»។

គួរបញ្ជាក់ផងដែរថា លោកគួច ខេវិន ជាផលិតករកម្មវិធីកម្សាន្តល្បីឈ្មោះមួយរូប និងជាអតីតអគ្គនាយករងប៉ុស្ដិ៍CTN ,SEA Tv និងETV ផងដែរ។ ចំណែកឯលោកថៃ នរៈសត្យា ជាអតីតរដ្ឋលេខាធិការក្រសួងវប្បធម៌ និងវិចិត្រសិល្បៈដែលត្រូវបានដកចេញពីតំណែងក្រោយលេចធ្លាយរឿងអាស្រូវក្នុងគ្រួសារ៕

ប្រទេសឥណ្ឌា ៖ បរិស្ថាននៅជុំវិញពិតជាបានទាក់ទងនឹងការរីកចម្រើននៃសេដ្ឋកិច្ចរបស់ប្រទេសណាមួយ ។ ជាក់ស្តែង ប្រទេសឥណ្ឌាកំពុងប្រឈមនឹងអាកាសធាតុក្តៅខ្លាំងដែលមិនធ្លាប់កើតមានពីមុនមក និងធ្វើឱ្យប៉ះពាល់ដល់កសិករ សេដ្ឋកិច្ច និងប្រព័ន្ធសុខាភិបាលរបស់ប្រទេសនេះផងដែរ ។

តាមការស្រាវជ្រាវថ្មីមួយរបស់សាកលវិទ្យាល័យ Cambridge បង្ហាញថា រលកកំដៅបានសម្លាប់ជីវិតមនុស្សនៅឥណ្ឌាជាង២៤.០០០នាក់តាំងពីឆ្នាំ១៩៩២ មក និងធ្វើឱ្យកើតជាតិពុលនៅលើបរិយាកាស ។ លើសពីនេះ វាបានធ្វើឱ្យផ្ទាំងទឹកកកនៅភាគខាងជើងប្រទេសឥណ្ឌារលាយយ៉ាងឆាប់រហ័ស ។

ចាប់ពីខែមករា រហូតដល់ខែតុលា ឆ្នាំ២០២២ ប្រទេសឥណ្ឌាក៏បានប្រឈមនឹងអាកាសធាតុប្រែប្រួលផងដែរ ។ ហេតុនេះ អាកាសធាតុបានជះឥទ្ធិពលដល់មនុស្សទាំងអស់ ហើយវាអាចជាឧបសគ្គរារាំងការព្យាយាមរបស់ប្រទេសឥណ្ឌា ដែលមានគោលដៅកាត់បន្ថយភាពក្រីក្ររយៈពេលវែង និងដោះស្រាយបញ្ហាសុខភាព ។

លើសពីនេះ សមត្ថភាពធ្វើការរបស់ពលរដ្ឋឥណ្ឌាបានធ្លាក់ចុះដោយសារអាកាសធាតុក្តៅ ជាពិសេស អ្នកធ្វើការនៅក្រោមកំដៅថ្ងៃ ។ ការស្រាវជ្រាវបង្ហាញថា អាកាសធាតុក្តៅខ្លាំងធ្វើឱ្យការបំពេញការងាររបស់មនុស្សទូទៅធ្លាក់ចុះ១៥% ហើយគុណភាពជីវិតរបស់ពលរដ្ឋជាច្រើននាក់កាន់តែអាក្រក់ទៅ ។ ដូច្នេះ វាអាចធ្វើឱ្យផលិតផលក្នុងស្រុកសរុប (GDP) របស់ប្រទេសឥណ្ឌាធ្លាក់ចុះ២,៨% នៅឆ្នាំ២០៥០ ។ បច្ចុប្បន្ន តំបន់ប្រមាណ៩០% នៅប្រទេសឥណ្ឌាបានប្រឈមនឹងអាកាសធាតុក្តៅខ្លាំង ខណៈប្រទេសនេះមិនបានត្រៀមខ្លួនទប់ទល់នឹងការបម្រែបម្រួលអាកាសធាតុ ៕ ប្រភព ៖ environman

កម្ពុជា រំពឹងទទួលបានភ្ញៀវទេសចរអន្តរជាតិប្រមាណ៤លាននាក់ ក្នុងនោះនឹងទទួលបានភ្ញៀវទេសចរចិនប្រមាណ១លាននាក់ដែរក្នុងឆ្នាំ២០២៣។ នេះជាការថ្លែងរបស់ឯកឧត្តម ទិត ចន្ថា រដ្ឋលេខាធិការប្រចាំការក្រសួងទេសចរណ៍ ជាមួយអ្នកសារព័ត លើកិច្ចសហប្រតិបត្តិការវិស័យទេសចរណ៍បន្ថែមទៀតរវាងកម្ពុជា ជាមួយមជ្ឈមណ្ឌលអាស៊ាន-ចិន។

កម្ពុជា បានឯកភាពជាមួយមជ្ឈមណ្ឌលអាស៊ាន-ចិន លើការបន្តកិច្ចសហប្រតិបត្តិការវិស័យទេសចរណ៍បន្ថែមទៀត បន្ទាប់ពីវិបត្តិជំងឺកូវីដ១៩ សំដៅទាក់ទាញកំណើនទេសចរពីគ្នាទៅវិញទៅមក និងទេសចរប្រទេសទី៣។ ការឯកភាពនេះធ្វើឡើងក្នុងជំនួបពិភាក្សារវាង ឯកឧត្តម ទិត ចន្ថា រដ្ឋលេខាធិការប្រចាំការក្រសួងទេសចរណ៍ តំណាងឯកឧត្តម ថោង ខុន រដ្ឋមន្ត្រីក្រសួងទេសចរណ៍ ជាមួយគណៈប្រតិភូនៃមជ្ឈមណ្ឌលអាស៊ាន-ចិន ដឹកនាំដោយលោក ស្ស៉ឺ ចុងជុន (Shi Zhongjun) អគ្គលេខាធិការនៃមជ្ឈមណ្ឌលអាស៊ាន-ចិន នៅទីស្ដីការក្រសួងទេសចរណ៍ នារសៀលថ្ងៃទី២១ ខែមេសា ឆ្នាំ២០២៣។

ក្នុងកិច្ចពិភាក្សានេះ មជ្ឈមណ្ឌលអាស៊ាន-ចិននឹងរៀបចំឱ្យមានសកម្មភាពរួមគ្នារវាងអាស៊ាន-ចិន ពិសេសជាមួយភាគីកម្ពុជា ដូចជាការធ្វើពិព័រណ៍ផ្សព្វផ្សាយពីគោលទេសចរណ៍នៅកម្ពុជានិងនៅចិន, ការបណ្ដុះបណ្ដាលជំនាញ និងមគ្គុទ្ទេសក៍ខ្មែរនិយាយភាសាចិន, ការផ្លាស់ប្ដូរទស្សនកិច្ចរបស់អ្នកសារព័ត៌មានកម្ពុជានិងចិន ដើម្បីផ្សព្វផ្សាយពីគោលដៅទេសចរណ៍ប្រទេសទាំងពីរទៅវិញទៅមក, ការជំរុញឱ្យមានការហោះហើរត្រង់ដឹកអ្នកដំណើរទៅកាន់គោលដៅឱ្យបានច្រើន និងញឹកញាប់ជាមុន, ការជំរុញចរន្តភ្ញៀវទេសចរ និងអ្នកវិនិយោគមកកាន់ប្រទេសកម្ពុជា ក៏ដូចជាការបង្កើនផលិតផលទេសចរណ៍សម្រាប់ភ្ញៀវទេសចរចិន និងទេសចរបរទេសដទៃទៀតជាដើម។

នាឱកាសនោះ ឯកឧត្តម ទិត ចន្ថា បានបញ្ជាក់បន្ថែមប្រាប់អ្នកសារព័ត៌មានថា ក្នុងឆ្នាំ២០២៣នេះ កម្ពុជារំពឹងទទួលបានភ្ញៀវទេសចរអន្តរជាតិប្រមាណ៤លាននាក់ ក្នុងនោះនឹងទទួលបានភ្ញៀវទេសចរចិនប្រមាណ១លាននាក់ដែរ៕