តើនារីៗជឿឬទេថា ការអនុវត្តទម្លាប់នៅពេលព្រឹកអាចជួយឱ្យរាងកាយរំលាយអាហារបានល្អ និងសម្រកទម្ងន់បាន ។ យើងអាចអនុវត្តតាមវិធីទាំង៥នេះជារៀងរាល់ព្រឹក ដើម្បីជួយសម្រកទម្ងន់យ៉ាងមានសុវត្ថិភាព និងប្រសិទ្ធភាព ។

១-សម្រាកឱ្យបានគ្រប់គ្រាន់ ៖
ការសម្រាកបានគ្រប់គ្រាន់មានសារសំខាន់យ៉ាងខ្លាំង ហើយមិនគួរប្រញាប់ភ្ញាក់ពេកទេ បើយើងមិនទាន់បានសម្រាកគ្រប់គ្រាន់ ព្រោះការសម្រាកបានគ្រប់គ្រាន់តាមរាងកាយត្រូវការ គឺវានឹងជួយឱ្យរាងកាយអាចរំលាយអាហារបានល្អ ។ ដូច្នេះ ការសម្រាកគ្រប់គ្រាន់ និងបានយូរនោះ តម្រូវឱ្យយើងដាក់ផែនការសម្រាកនៅពេលយប់ឱ្យល្អ ។ ផ្ទុយទៅវិញ ការសម្រាកមិនគ្រប់គ្រាន់ វានឹងធ្វើឱ្យយើងឆាប់ឡើងទម្ងន់ ហើយវានឹងបង្កើនអរម៉ូនធ្វើឱ្យយើងចង់បរិភោគអាហារ និងបង្កើនជាតិខ្លាញ់ទៀតផង ។

២-ផឹកទឹកនៅពេលព្រឹក ៖
នៅពេលភ្ញាក់ពីគេងនៅពេលព្រឹក យើងអាចផឹកទឹកមុនគេ ហើយយកល្អ គួរផឹកទឹកក្តៅ ឬទឹកមានសីតុណ្ហភាពធម្មតា ។ ការផឹកទឹកមុនពេលបរិភោគអាហារនឹងជួយជំរុញឱ្យរាងកាយឆាប់រំលាយអាហារ, ជួយលាងជាតិពុលក្នុងខ្លួន និងធ្វើឱ្យពោះវៀនមានចលនាល្អ ។ ចំណុចសំខាន់ ការផឹកទឹកពេលព្រឹក គឺជាការបង្កើនសីតុណ្ហភាពក្នុងខ្លួន ហើយពេលសីតុណ្ហភាពរាងកាយកើនឡើង វានឹងអាចជួយរំលាយអាហារ និងធ្វើឱ្យរាងកាយអាចបំផ្លាញកាឡូរីបានរហ័ស ។

៣-ផឹកទឹកតែ ឬកាហ្វេមិនដាក់ស្ករ ៖
ការផឹកទឹកតែ ឬកាហ្វេមិនដាក់ស្ករនៅពេលព្រឹកអាចធ្វើឱ្យរាងកាយទទួលបានជាតិកាហ្វេអ៊ីន ព្រោះជាតិកាហ្វេអ៊ីនបានរួមចំណែកដល់ការរំលាយអាហារ ប៉ុន្តែស្ត្រីទាំងអស់គួរចៀសវាងផឹកតែ ឬកាហ្វេដាក់ស្ករ ឬដាក់ទឹកដោះគោ ព្រោះវាអាចបំផ្លាញសុខភាពបាន ហើយវាធ្វើឱ្យការរំលាយអាហារក្នុងរាងកាយមិនបានល្អ ។

៤-បរិភោគអាហារមានជាតិប្រូតេអ៊ីន ៖
យើងគួរបរិភោគអាហារប្រភេទប្រូតេអ៊ីននៅពេលព្រឹក ព្រោះអាហារប្រភេទនេះអាចជួយឱ្យយើងឆ្អែតបានយូរ និងជួយការពារកុំឱ្យឆាប់ឃ្លានអាហារ ដែលផ្តល់ផលមិនល្អដល់សុខភាព ។ ក្រៅពីនេះ អាហារប្រូតេអ៊ីនអាចជួយកាត់បន្ថយការហេវនៅពេលថ្ងៃ និងកាត់បន្ថយការបរិភោគនំចំណីក្រោយការបរិភោគបាយ ។ លើសពីនេះ អាហារប្រូតេអ៊ីនអាចជួយបង្ខំឱ្យរាងកាយឆាប់រំលាយអាហារ និងសម្រកទម្ងន់ ។

៥-ទទួលយកពន្លឺព្រះអាទិត្យ និងវីតាមីន D ៖
ការទទួលយកពន្លឺព្រះអាទិត្យនៅពេលព្រឹកដើម្បីឱ្យរាងកាយទទួលបានវីតាមីន D និងជួយពន្លឿនការរំលាយអាហារក្នុងខ្លួន ព្រោះវីតាមីន D មានភាពចាំបាច់ដល់រាងកាយ ហើយរាងកាយរបស់យើងងាយនឹងខ្វះវីតាមីន D ណាស់ ។ ដូច្នេះ នៅពេលព្រឹក ស្ត្រីទាំងឡាយគួរដើរនៅខាងក្រៅផ្ទះដើម្បីទទួលបានពន្លឺព្រះអាទិត្យ និងវីតាមីន D ដែលអាចកាត់បន្ថយខ្លាញ់ក្នុងខ្លួន ៕

ប្រភព ៖ sanook

ជាទូទៅដុំសាច់ និងដុំគីស សុទ្ធតែជាមុខសញ្ញានៃជំងឺមហារីក ដែលជំងឺទាំងនេះអាចបង្កគ្រោះថ្នាក់ដល់អាយុជីវិតរបស់យើងបាន។ ដូច្នេះហើយតើអ្នកដឹងទេ? រវាងដុំសាច់ និងដុំគីស ខុសគ្នាដូចម្តេច? ហើយមួយណាគ្រោះថ្នាក់ជាង?

១.ដុំគីស៖ ដុំគីស គឺជាការបែងចែកកោសិកាមិនធម្មតានៅក្នុងខ្លួន បណ្តាលឱ្យមានភាពមិនប្រក្រតីដែលមើលទៅដូចជាថង់ទឹក ឬដូចជាប៉េងប៉ោងដែលពោរពេញទៅដោយទឹកថ្លា នៅលើផ្នែកណាមួយនៃរាងកាយ។ ដុំគីសភាគច្រើន កើតនៅខាងក្រោយត្រចៀក ក សុដន់ និងស្បូន។

២.ដុំសាច់៖ ដុំសាច់ គឺជាកោសិកាមិនធម្មតាដែលលូតលាស់ដូចជាដុំគីស។ ប៉ុន្តែវាមានលក្ខណៈខុសគ្នា ត្រង់ថាដុំសាច់ មានហានិភ័យខ្លាំងជាងដុំគីស ព្រោះដុំសាច់អាចក្លាយទៅជាកោសិកាមហារីកយ៉ាងសាហាវ និងគ្រោះថ្នាក់បំផុត។ ដុំសាច់ អាចរីករាលដាលពេញរាងកាយហើយធំទៅៗ ទោះជាយ៉ាងណាក៏ដោយដុំសាច់ កើតឡើងនៅពេលដែលស្ត្រីអស់រដូវ ឬស្ត្រីដែលមានវ័យកណ្តាល។

ទោះបីជាវាស្តាប់ទៅគួរឱ្យខ្លាច ប៉ុន្តែបើយើងរកឃើញអ្វីដែលមិនប្រក្រតីលើរាងកាយ អ្នកគួរតែសាកសួរវេជ្ជបណ្ឌិត ឬត្រូវព្យាបាលភ្លាមៗដោយមិនចាំបាច់វះកាត់។ វិធីល្អបំផុតគឺត្រូវញ៉ាំផ្លែឈើ និងបន្លែឱ្យបានច្រើន។ ធ្វើលំហាត់ប្រាណឱ្យបានទៀងទាត់ ហើយសម្រាកឱ្យបានគ្រប់គ្រាន់ នោះវានឹងជួយអ្នកឱ្យនៅឆ្ងាយពីដុំគីស និងដុំសាច់ហើយ៕ ប្រភព៖sanook

គ្រោះថ្នាក់ នៃជំងឺដាច់សរសៃឈាមខួរក្បាលមានរោគសញ្ញាប្រហាក់ប្រហែលទៅនឹងការគាំងបេះដូងដែរ។ ជាក់ស្ដែង គ្រោះថ្នាក់នៃជំងឺនេះ កើតឡើងនៅពេលដែលផ្នែកខ្លះនៃខួរក្បាលត្រូវបានរំខាន និងធ្វើឱ្យរាងកាយមិនអាចដំណើរការបានប្រក្រតី។ ដូច្នេះហើយខាងក្រោមនេះគឺជាសញ្ញាគ្រោះថ្នាក់ទាំង ៥ នៃជំងឺដាច់សរសៃឈាមខួរក្បាល៖

១.វិលមុខភ្លាមៗ៖ នៅក្នុងការសិក្សាមួយបានបង្ហាញថា អាការៈវិលមុខ ក៏ជាកត្តាទូទៅក្នុងចំណោមអ្នកដែលកើតមានអាការៈគ្រោះថ្នាក់សរសៃឈាមខួរក្បាល។ ស្ថានភាពនៃការវង្វេងស្មារតីអាចជាលទ្ធផលនៃផ្នែកខួរក្បាលដែលរងផលប៉ះពាល់។

២.បញ្ហាភ្នែក៖ គ្រោះថ្នាក់សរសៃឈាមខួរក្បាលក៏អាចនាំឱ្យយើងងងឹតភ្នែកម្ខាង ឬព្រិលភ្នែកផងដែរ។

៣.ស្ពឹកខ្លួន ឬញ័រដៃជើង៖ ជាទូទៅ អាការៈស្ពឹកខ្លួន ឬញ័រដៃជើង ក៏ជាសញ្ញានៃគ្រោះថ្នាក់សរសៃឈាមដូចគ្នា នៅក្នុងករណីខ្លះ វាក៏អាចធ្វើឱ្យយើងពិការអវយវៈផងដែរ។

៤.សម្ពាធឈាមខ្ពស់៖ សម្ពាធឈាមខ្ពស់ អាចបណ្ដាលឱ្យយើងមានបញ្ហាធ្ងន់ធ្ងរជាច្រើន ដូចជាគ្រោះថ្នាក់សរសៃឈាមខួរក្បាល ដោយបំផ្លាញសរសៃប្រសាទខួរក្បាល ឬធ្វើឱ្យសរសៃឈាមចុះខ្សោយ និងបណ្ដាលឱ្យសរសៃឈាមធ្លុះធ្លាយ។

៥.ឈឺក ឬឈឺក្បាលធ្ងន់ធ្ងរ៖ ក្នុងពេលដែលកើតមានអាការៈគ្រោះថ្នាក់សរសៃឈាមខួរក្បាល លំហូរឈាមទៅកាន់ខួរក្បាលត្រូវបានរារាំង ឬកាត់ផ្ដាច់ ដោយសារតែការរំខានដែលបណ្ដាលមកពីចរន្តឈាម។ កត្តានេះអាចបណ្ដាលឱ្យមានការដាច់រហែក ឬខូចខាតសរសៃឈាម ជាលទ្ធផល វាធ្វើឱ្យយើងចាប់ផ្ដើមឈឺក្បាលប្រកាំង ឬឈឺក្បាលភ្លាមៗ និងបណ្ដាលឱ្យយើងឈឺក ឬឈឺស្មា ជាដើម៕ ប្រភព៖ sanook