ភ្នាក់ងារអាកាសធាតុរបស់អង្គការសហប្រជាជាតិបានផ្សព្វផ្សាយរបាយការណ៍ថា កម្រិតទឹកសមុទ្រលើពិភពលោកបានកើនឡើងទ្វេដង បើធៀបនឹងទសវត្សរ៍មុន ហើយវានឹងកើនឡើងជាបន្តបន្ទាប់ក្នុងរយៈពេលរាប់ពាន់ឆ្នាំទៅមុខទៀត ។

កាលពីថ្ងៃទី២១ ខែមេសា អង្គការឧតុនិយមពិភពលោកនៃអង្គការសហប្រជាជាតិបានបង្ហាញរបាយការណ៍ប្រចាំឆ្នាំរបស់ខ្លួនថា ការកើនឡើងនៃកម្រិតទឹកសមុទ្រលើពិភពលោកក្នុងរយៈពេលកន្លងមក គឺវាបានកើនឡើងទ្វេដង បើធៀបនឹងចន្លោះពីឆ្នាំ១៩៩៣ ដល់ឆ្នាំ២០០២ ។ អង្គការនេះដាស់តឿនថា កម្រិតទឹកសមុទ្រនឹងកើនឡើងបែបនេះក្នុងរយៈពេលរាប់ពាន់ឆ្នាំទៀត ។

របាយការណ៍បញ្ជាក់ថា ចាប់ពីឆ្នាំ២០១៣-២០២២ កម្រិតទឹកសមុទ្រលើពិភពលោកបានកើនឡើងជាមធ្យម៤,៦២មីល្លីម៉ែត្រក្នុង១ឆ្នាំ ដោយសារផ្ទាំងទឹកកកបានរលាយយ៉ាងឆាប់រហ័ស និងសីតុណ្ហភាពនៅមហាសមុទ្រកើនឡើងខ្លាំង មានន័យថា កម្រិតទឹកសមុទ្រពិភពលោកបានកើនឡើងរួចហើយ តាំងពីឆ្នាំ១៩៩០ មកម៉្លេះ ។

លោក Petteri Thalas អគ្គលេខាធិការនៃអង្គការឧតុនិយមពិភពលោកបានថ្លែងថា ៖ «យើងចុះចាញ់ហើយចំពោះការរលាយរបស់ផ្ទាំងទឹកកក ហើយកម្រិតទឹកសមុទ្រកើនឡើងជាបន្តបន្ទាប់ ដូច្នេះ វាជាព័ត៌មានអាក្រក់មួយ ។ ការបញ្ចេញឧស្ម័នផ្ទះកញ្ចក់កម្រិតខ្ពស់នឹងធ្វើឱ្យកម្រិតទឹកសមុទ្រកើនឡើងរាប់ពាន់ឆ្នាំទៅមុខទៀត» ។

លោក Petteri Thalas បន្តថា អាកាសធាតុនឹងក្តៅខ្លាំងរហូតដល់ឆ្នាំ២០៦០ ហើយមិនថាមនុស្សនឹងប្រើវិធានការផ្សេងៗដើម្បីកាត់បន្ថយការបញ្ចេញឧស្ម័នផ្ទះកញ្ចក់ក្តី ប៉ុន្តែលោកជឿថា យើងនៅតែមានឱកាសគេចចេញពីស្ថានការណ៍អាក្រក់នេះ និងអាចសម្រេចបានគោលដៅមិនឱ្យសីតុណ្ហភាពពិភពលោកកើនលើសពី១,៥អង្សារសេ ។ ដូច្នេះ ក្រុមប្រទេស G7 ត្រូវមានផែនការការពារពិភពលោកក្តៅ ។ កម្រិតទឹកសមុទ្រកើនឡើងបានធ្វើឱ្យប៉ះពាល់ដល់ទីក្រុងជាច្រើននៅជាប់ឆ្នេរសមុទ្រទូទាំងពិភពលោក រួមទាំងគំរាមកំហែងប្រទេសកោះទូវ៉ាលូផងដែរ ។

របាយការណ៍របស់អង្គការឧតុនិយមពិភពលោកបានផ្សព្វផ្សាយនៅមុនថ្ងៃ Earth Day តែ១ថ្ងៃប៉ុណ្ណោះ និងបង្ហាញថា ផ្ទាំងទឹកកកនៅសមុទ្រអង់តាក់ទិកបានរលាយនៅសល់តិចបំផុតកាលពីខែមិថុនា-ខែកក្កដា ឆ្នាំ២០២២ ខណៈផ្ទៃទឹកសមុទ្រប្រមាណ៥៨% នៅទូទាំងពិភពលោកកំពុងប្រឈមនឹងអាកាសធាតុក្តៅ ។ អង្គការឧតុនិយមពិភពលោកបញ្ជាក់ថា នៅឆ្នាំ២០២២ ជាឆ្នាំក្តៅខ្លាំងបំផុតក្នុងលំដាប់ទី៥ ឬទី៦ គិតចាប់ពីអង្គការនេះបានកត់ត្រាទិន្នន័យមក ៕ ប្រភព ៖ Thairath

នាយកដ្ឋានឧតុនិយមប្រទេសថៃបានព្រមាន និងសម្តែងក្តីព្រួយបារម្ភពីសីតុណ្ហភាពកំដៅកើនឡើងខ្លាំងនឹងឈានដល់កម្រិតគ្រោះថ្នាក់នៅក្នុងទីក្រុងបាងកក និងខេត្តចំនួនបីផ្សេងទៀត។ នេះបើយោងតាមការចុះផ្សាយរបស់សារព័ត៌មាន The Nation ថ្ងៃទី២២ ខែមេសា នេះ។

ក្នុងនោះ តំបន់ភាគខាងជើង ខេត្ត Phetchabun មានសីតុណ្ហភាព៤៨.១អង្សាកម្រិតគ្រោះថ្នាក់។ តំបន់ភាគឦសាន មានសីតុណ្ហភាព ៤៤.៥ អង្សា ជាកម្រិតគ្រោះថ្នាក់។ លើសពីនេះក្នុងតំបន់កណ្តាល ទីក្រុងបាងកក , តំបន់ភាគខាងកើត ខេត្តឈុនបុរី និងខេត្តភូកេតមានសីតុណ្ហភាពឡើងដល់ ៥៤.០ អង្សាក្នុងកម្រិតគ្រោះថ្នាក់ខ្លាំង ដែលអាចវិវត្តទៅជាជំងឺដាច់សរសៃឈាមខួរក្បាល ប្រសិនបើត្រូវកំដៅក្នុងរយៈពេលយូរ។ មិនត្រឹមតែប៉ុណ្ណោះការឡើងកម្តៅខ្លាំងនេះអាចឱ្យអស់កម្លាំង វិលមុខ ចង្អោរ ក្អួត ឈឺក្បាល និងឈឺសាច់ដុំ ដោយសារការប៉ះពាល់នឹងកំដៅ ឬសកម្មភាពរាងកាយក្នុងលក្ខខណ្ឌអាកាសធាតុក្តៅ។

នាយកដ្ឋានឧតុនិយម បានធ្វើការណែនាំប្រជាជនអំពីសុខភាពនៅក្នុងរលកកម្តៅគឺត្រូវតាមដានរោគសញ្ញា ជាពិសេសកុមារតូចៗ មនុស្សចាស់ និងអ្នកដែលមានជំងឺនិង បានណែនាំឱ្យកាត់បន្ថយសកម្មភាពក្រៅផ្ទះ ពាក់មួក វ៉ែនតា និងសម្លៀកបំពាក់រលុង និងខ្យល់ចេញចូលបានផងដែរ។
បន្ថែមពីនេះ នាយកដ្ឋានឧតុនិយមក៏បានព្យាករណ៍ពីភ្លៀងធ្លាក់រាយប៉ាយ និងខ្យល់បក់ខ្លាំងពាសពេញភាគខាងជើង និងភាញខាងត្បូងក៏នឹងមានភ្លៀងធ្លាក់រាយប៉ាយផងដែរ ខណៈកម្រិតផ្សែងពុល PM2.5 នឹងនៅតែខ្ពស់នៅភាគខាងលើប្រទេសថៃដដែល៕

ប្រទេសហ្វីលីពីន ៖ ក្រោយពីប្រទេសហ្វីលីពីន និងចិនបានចុះហត្ថលេខាលើកិច្ចព្រមព្រៀងនាំចេញទុរេនរយៈពេល៣ខែមកឃើញថា ហ្វីលីពីនបាននាំចេញទុរេនស្រស់របស់ខ្លួនទៅកាន់ប្រទេសចិនរួចរាល់ហើយ ។

ប្រទេសចិនបានបើកទីផ្សារថ្មីៗសម្រាប់ហ្វីលីពីនជាបន្តបន្ទាប់ ដែលជួយបង្កើតការងារ និងប្រាក់ចំណូលដល់កសិករហ្វីលីពីន តាមរយៈការនាំចេញចេក ម្នាស់ ផ្លែប័រ និងទុរេន ។ ការនាំចេញផ្លែឈើថ្មីៗទៅកាន់ប្រទេសចិនជាផ្លូវការនេះ អ្នកជំនាញជាច្រើននាក់ជឿថា ពាណិជ្ជកម្មទ្វេភាគីរវាងប្រទេសទាំងពីរនឹងកាន់តែរឹងមាំថែមទៀត ក្រោយពីការរាតត្បាតនៃជំងឺកូវីដ-១៩ ។

កាលពីដើមខែមេសា ឆ្នាំ២០២៣ ទុរេនហ្វីលីពីនមានទម្ងន់សរុប១៨តោនត្រូវបានគេនាំចេញទៅដល់អាកាសយានដ្ឋានណាននីង តំបន់ក្វាងស៊ីចូវ ដែលស្ថិតនៅភាគខាងត្បូងប្រទេសចិន ។ ក្រោយមក គេបានដឹកជញ្ជូនទុរេនទាំងនេះទៅកាន់ក្រុមហ៊ុន Dole Food Co Inc. ដែលជាក្រុមហ៊ុននាំចូលផ្លែឈើដ៏ធំមួយនៅសៀងហៃ ។

បុគ្គលិកក្រុមហ៊ុន Dole Food Co Inc. និយាយថា ទុរេនហ្វីលីពីនដែលនាំមកលក់នៅប្រទេសចិនលើកដំបូងនោះលក់ដាច់អស់ពីស្តុក ហើយហ្វីលីពីននឹងនាំចេញទុរេនមកលក់នៅចិនជាលើកទី២ នាពេលឆាប់ៗនេះ ។ បុគ្គលិកក្រុមហ៊ុន Dole បន្តថា ទុរេនហ្វីលីពីនមានគុណភាពល្អ ។ ក្រៅពីនេះ ក្រុមហ៊ុនសង្ឃឹមថា ចិននឹងក្លាយជាប្រទេសគោលដៅនាំចេញធំបំផុតរបស់ទីក្រុង Davao ដែលទីក្រុងនេះបានដាំទុរេនច្រើនជាងគេនៅហ្វីលីពីន ។ ក្រុង Davao អាចប្រមូលទិន្នផលទុរេនបាន៧៨% នៃទុរេនទាំងអស់របស់ហ្វីលីពីន ។

លោក Xu Liping នាយកមជ្ឈមណ្ឌលការសិក្សានៃតំបន់អាស៊ីអាគ្នេយ៍និយាយថា ការបង្កើនកិច្ចសហការផ្នែកកសិកម្មរវាងប្រទេសហ្វីលីពីន និងចិន នឹងជួយបង្កើតការងារផ្នែកកសិកម្មដល់ពលរដ្ឋហ្វីលីពីន ព្រមទាំងជួយបំពេញតម្រូវការនាំចូលផ្លែឈើកើនឡើងរបស់ចិនផងដែរ ។

ចំណែកនាយកដ្ឋានកសិកម្មហ្វីលីពីនរំពឹងថា នឹងអាចនាំចេញទុរេនស្រស់ទៅប្រទេសចិនជាង៥,៧លានគីឡូក្រាមក្នុង១ឆ្នាំ ។ រីឯមន្ត្រីគយចិនថា ប្រទេសចិនបាននាំចូលទុរេនស្រស់ចំនួន៨២១.៥០០តោននៅឆ្នាំ២០២២ ។ ក្រៅពីនេះ ហ្វីលីពីនបាននាំចេញចេក និងម្នាស់ជាច្រើនទៅកាន់ចិន ខណៈចិនជាទីផ្សារនាំចេញទំនិញកសិកម្មធំលំដាប់ទី៣ របស់ហ្វីលីពីន ៕ ប្រភព ៖ AEC connect

ប្រទេសថៃ ៖ សហព័ន្ធប្រដាល់ Muay Thai អន្តរជាតិលើកឡើងថា ថៃនឹងត្រៀមខ្លួនធ្វើជាម្ចាស់ផ្ទះការប្រកួត World Muay Thai Championships 2023 នៅក្រុងបាងកក ហើយពេលនេះ មានប្រទេសចំនួន១០០ បានចុះឈ្មោះចូលរួមប្រកួតក្នុងព្រឹត្តិការណ៍នេះ គឺចាប់ពីថ្ងៃទី៤ ដល់ថ្ងៃទី១៣ ខែឧសភា ។ រឿងគួរឱ្យចាប់អារម្មណ៍ គឺប្រទេសថៃលើកឡើងថា ខ្លួនធ្វើជាម្ចាស់ផ្ទះការប្រកួតនេះឱ្យត្រូវនឹងថ្ងៃប្រកួតកីឡាស៊ីហ្គេមនៅកម្ពុជាដែរ ។

តាមប្រភពព័ត៌មានពីវិស័យប្រដាល់ថៃឱ្យដឹងថា សហព័ន្ធប្រដាល់ Muay Thai អន្តរជាតិ (IFMA) បានត្រៀមរៀបចំការប្រកួត World Muay Thai Championships 2023 ដែលនឹងប្រព្រឹត្តឡើងចាប់ពីថ្ងៃទី៤ ដល់ថ្ងៃទី១៣ ខែឧសភា ។ វាជាពេលវេលាដូចគ្នាជាមួយការប្រកួតកីឡាស៊ីហ្គេម ឆ្នាំ២០២៣ នៅប្រទេសកម្ពុជា ដែលនឹងធ្វើឡើងចាប់ពីថ្ងៃទី៦ ដល់ថ្ងៃទី១០ ខែឧសភា ។

លោក Sakchai Thapsuwan ប្រធានសហព័ន្ធកីឡាប្រដាល់អន្តរជាតិ ថ្លែងថា ៖ «ការប្រកួតនេះ គឺជាពេលវេលាមួយដ៏មានមោទនភាពរបស់ប្រទេសថៃ ។ យើងសង្ឃឹមថា នឹងមានកីឡាករ, coach និងភ្ញៀវវីអាយភី ជាង៣.០០០នាក់មកពី១០០ប្រទេស (ក្នុង៥ទ្វីប) ធ្វើដំណើរមកកាន់ប្រទេសថៃ ។ ការប្រកួតនេះ នឹងក្លាយជាវគ្គជម្រុះលើកចុងក្រោយសម្រាប់កម្មវិធី World Combat Games 2023 នៅប្រទេសអារ៉ាប៊ីសាអូឌីតផងដែរ» ។

លោក Sakchai Thapsuwan បន្តថា ៖ «កីឡាករនឹងជាបេះដូង និងវិញ្ញាណក្នុងការប្រកួតកីឡាប្រចាំឆ្នាំ២០២៣ ហើយឆ្នាំនេះដែរ គឺជាឆ្នាំដែលថៃនឹងបង្ហាញកីឡា Muay Thai ឱ្យពិភពលោកបានស្គាល់ និងជាឱកាសជាច្រើនសម្រាប់កីឡាករ ។ ដូច្នេះ សម្រាប់ Muay Thai នឹងធ្វើឱ្យកីឡាករទាំងអស់មានមោទនភាពក្នុងការប្រកួតដើម្បីកសាងកេរ្តិ៍ឈ្មោះ និងកិត្តិយសជាតិ នៅក្រោមសហព័ន្ធដែលអន្តរជាតិបានទទួលស្គាល់» ។

លោកបន្ថែមថា សហព័ន្ធប្រដាល់ Muay Thai អន្តរជាតិមានសមាជិកសរុបចំនួន១៤៣ប្រទេស និងត្រូវបានបញ្ចូលក្នុងព្រឹត្តិការណ៍កីឡាអន្តរជាតិ ដូចជា World Games និង European Games ជាផ្លូវការហើយ នៅសល់តែអូឡាំពិកមួយប៉ុណ្ណោះ ដែលប្រទេសថៃកំពុងតែជំរុញចូលក្នុងការប្រកួតប្រជែងនាពេលអនាគត ។

ប្រទេសថៃធ្លាប់បានប្រកាសថា មិនបញ្ជូនកីឡាករមកប្រកួតគុនខ្មែរក្នុងកីឡាស៊ីហ្គេម ឆ្នាំ២០២៣ ទេ ហើយថៃនិយាយថា ម្ចាស់ផ្ទះកម្ពុជាបាននាំកីឡាគុនខ្មែរមកដាក់ជំនួស Muay Thai ហើយកម្ពុជាមិនស្គាល់ Muay Thai រហូតធ្វើឱ្យអ្នកលេងបណ្តាញសង្គមក្នុងប្រទេសទាំងពីរជជែកគ្នាពីរឿងក្បាច់គុនមួយណាកើតមុនគេ ។

ប្រទេសថៃនឹងធ្វើជាម្ចាស់ផ្ទះរៀបចំការប្រកួត World Muay Thai Championships 2023 ហើយត្រូវគ្នានឹងថ្ងៃប្រកួតកីឡាស៊ីហ្គេមនៅកម្ពុជា តើថៃរៀបចំការប្រកួតនេះឡើងក្នុងគោលបំណងអ្វី ? ហើយហេតុអ្វីបានជាប្រទេសថៃមិនជ្រើសរើសយកពេលវេលាផ្សេងសម្រាប់ប្រកួត ? បែរជាអំពាវនាវឱ្យប្រទេសនានាមកប្រកួតនៅថៃ ចំថ្ងៃដែលកម្ពុជាធ្វើជាម្ចាស់ផ្ទះកីឡាស៊ីហ្គេមទៅវិញ ? ប្រព័ន្ធផ្សព្វផ្សាយថៃឈ្មោះ sanook សរសេរថា បន្តិចទៀត ពិភពលោកនឹងដឹងថា រវាង Muay Thai និងគុនខ្មែរ តើមានប្រភពមកពីប្រទេសណាពិតប្រាកដ ៕ ប្រភព ៖ sanook

ប្រទេសចិន ៖ ក្មេងម្នាក់អាយុ៦ឆ្នាំ រស់នៅប្រទេសចិនបានសន្លប់ និងត្រូវបានក្រុមគ្រួសារដឹកទៅកាន់មន្ទីរពេទ្យ ក្រោយពីបានញ៉ាំស៊ុតចៀនដាក់ប៉េងប៉ោះដែលយាយធ្វើឱ្យ ។ គ្រូពេទ្យនិយាយថា វាជាគ្រោះថ្នាក់នៅជិតខ្លួន ព្រោះប៉េងប៉ោះបៃតងមានគ្រោះថ្នាក់ដល់សុខភាពក្មេង និងមនុស្សចាស់ ។

សារព័ត៌មានបរទេសបានចុះផ្សាយរឿងរ៉ាវមួយសម្រាប់ដាស់តឿនដល់ឪពុកម្តាយទាំងអស់ ដែលចូលចិត្តចម្អិនអាហារឱ្យកូនៗញ៉ាំ ដូចជា ស៊ុតចៀនដាក់ប៉េងប៉ោះ ខណៈប៉េងប៉ោះជាបន្លែមានប្រយោជន៍ ហើយក្មេងៗងាយស្រួលញ៉ាំ បើចៀនស៊ុតហើយដាក់ប៉េងប៉ោះចូល ។ បើទោះជាប៉េងប៉ោះមានប្រយោជន៍ក៏ពិតមែន ប៉ុន្តែមិនគួរយកប៉េងប៉ោះបៃតងមកឱ្យក្មេងញ៉ាំទេ គឺត្រូវយកប៉េងប៉ោះពណ៌ក្រហម និងចម្អិនឱ្យឆ្អិនល្អ ។ ស៊ុតចៀនដាក់ប៉េងប៉ោះដែលលោកយាយម្នាក់នេះធ្វើឱ្យចៅញ៉ាំនោះ គឺយកប៉េងប៉ោះបៃតងទៅធ្វើ ព្រោះយាយនិយាយថា ចៅរបស់គាត់ចូលចិត្តញ៉ាំ ហើយយាយក៏ធ្វើឱ្យចៅជាប្រចាំ និងគ្មានអាការៈខុសប្លែកដូចពេលនេះទេ ។

ប៉ុន្តែលើកនេះ ចៅរបស់យាយមានអាការៈប្លែកជាច្រើនដូចជា ក្អួតចង្អោរ រួចសន្លប់បាត់ស្មារតី ។ ដូច្នេះ ក្រុមគ្រួសារក៏បានបញ្ជូនទៅកាន់មន្ទីរពេទ្យ ហើយសំណាងល្អ ដែលគ្រូពេទ្យអាចជួយសង្គ្រោះទាន់ពេលវេលា ធ្វើឱ្យអាការៈបានធូរស្រាល និងនាំមកផ្ទះនៅវិញដើម្បីតាមដានសុខភាពបន្តទៀត ។

តាមការសាកសួរទៅកាន់គ្រូពេទ្យឱ្យដឹងថា លោកយាយបានចៀនស៊ុតដាក់ប៉េងប៉ោះឱ្យចៅញ៉ាំ ហើយយកប៉េងប៉ោះបៃតងមកចៀន ។ គ្រូពេទ្យបន្តថា ប៉េងប៉ោះបៃតងមានសារធាតុសូឡានីនច្រើន ដូច្នេះ ធ្វើឱ្យរលាកប្រព័ន្ធរំលាយអាហារ ក្អួត និងពិបាកដកដង្ហើម ។ ប៉េងប៉ោះបៃតងមានជាតិពុលច្រើនដែលបង្កគ្រោះថ្នាក់ដល់កុមារ និងមនុស្សចាស់ ព្រោះសារធាតុសូឡានីនអាចធ្វើឱ្យខូចប្រព័ន្ធសរសៃប្រសាទកណ្តាល ឈឺពោះ និងស្លាប់បាន ។ លោកគ្រូពេទ្យបានណែនាំឱ្យទទួលទានប៉េងប៉ោះទុំ ដើម្បីចៀសវាងសារធាតុសូឡានីនដែលបណ្តាលឱ្យមានគ្រោះថ្នាក់ដល់សុខភាព ៕ ប្រភព ៖ Chiang Mai News