សហគមន៍អេកូទេសចរណ៍ទឹកធ្លាក់ស្រែអំពិល ស្ថិតនៅភូមិក្តុល ឃុំក្តុលសែនជ័យ ស្រុកទឹកផុស មានចម្ងាយប្រមាណ ៥៨គីឡូម៉ែត្រ ពីក្រុងកំពង់ឆ្នាំង។
ទឹកធ្លាក់នេះ មានសក្តានុពលទេសចរណ៍យ៉ាងច្រើន ដោយភ្ញៀវទេសចរដែលទៅទស្សនានៅទីនោះ អាចងូតទឹកធ្លាក់លេង ដើរកម្សាន្តក្នុងព្រៃ បោះតង់សម្រាកលម្ហែ ជាពិសេសទេសចរអាចសម្រាកជាមួយជីវិតបែបធម្មជាតិដែលមានដំណាំរបស់ប្រជាជនក្នុងសហគមន៍ជាច្រើនហិកតា ជាប់ជើងភ្នំឱរ៉ាល់បានថែមទៀតផងដែរ។
នៅទីនេះ នៅរដូវវស្សា ភ្ញៀវទេសចរណ៍ដែលមកកម្សាន្តនៅទីនេះ នឹងទទួលបានអារម្មណ៍ស្រស់ស្រាញ និងបំបាត់ទុក្ខកង្វល់ ជាមួយនឹងសម្រស់ធម្មជាតិ ដ៏ស្រស់ស្អាត គួរឱ្យគយគន់។ ក៏ប៉ុន្តែនៅក្នុងរដូវវស្សា វាក៏រាងផ្តល់ផលវិបាកបន្តិចដែរ ជាមួយនឹងការធ្វើដំណើរចូល ដោយសារតែផ្លូវអាចមានការខូចខាត ឬរអិល ប្រសិនបើជាមានភ្លៀងខ្លាំង។
ក្រៅពីទឹកធ្លាក់ស្រែអំពិល ខេត្តកំពង់ឆ្នាំងក៏មានតំបន់សក្តានុពលទេសចរណ៍មួយចំនួនទៀតដូចជា តំបន់ទេសចរណ៍ទឹកធ្លាក់ថ្មក្រាល និងរមណីយដ្ឋានទឹកធ្លាក់អន្លង់ស្វាយផងដែរ៕
រូបភាព៖ ទេសចរណ៍ព្រៃភ្នំ
