លោក ឆេង សុភក្រ្ត ស្ថាបនិក រៀនថត ឬហៅថា ពូជ្រួញ បានអរគុណជាពិសេសដល់តារាចម្រៀងរ៉េប វណ្ណដា ផលិតកម្មបារមី និងលោក RavenBlaze រួមទាំងទស្សនិកជនដែលធ្វើឱ្យវីដេអូលោកមានអ្នកទស្សនាចំនួន១លានដងនៅលើឆាណែលយូធូប ហើយនេះក៏ជាថាមពលជំរុញឱ្យស្ថាបនិករូបនេះបន្តសកម្មភាពរបស់ខ្លួនដល់ចាស់កោងខ្នង។

ពូជ្រួញ ត្រូវបានស្គាល់ថាជា YouTuber ម្នាក់ដែលចែករំលែកបទពិសោធន៍ល្អៗផ្តល់ចំណណេះដឹងជាច្រើនទាក់ទងនឹងកាមេរ៉ា ការថតរូប កាត់វីដេអូ ជាដើម។ បន្ថែមពីនេះ រៀនថត ក៏បានបង្កើតកម្មវិធី Podcast ចែករំលែកបទពិសោធន៍ពីភ្ញៀវកតិ្តយសដល់ទស្សនិកជនដូចគ្នាដែលកម្មវិធីនេះទទួលបានការគាំទ្រគួរឱ្យកត់សម្គាល់ពីទស្សនិកជន។ ជាពិសេស កាលពី៧ខែមុន វីដេអូ Podcast បញ្ចប់រដូវកាលទី២របស់លោកដែលមានភ្ញៀវកិត្តិយសតារាចម្រៀង វណ្ណដា និង RavenBlaze ធ្វើឱ្យមានភាពល្បីល្បាញយ៉ាងខ្លាំង។

ជាមួយគ្នានេះដែរ នៅយប់ថ្ងៃទី១៣ ខែមិថុនា ស្ថាបនិក រៀនថត បានបង្ហោះសារអរគុណជាពិសេសសម្រាប់វត្តមានរបស់ វណ្ណដា ផលិតកម្មបារមី និង RavenBlaze ក្នុងការចូលរួមជាភ្ញៀវកត្តិយសក្នុងកម្មវិធី Podcast របស់លោកដែលធ្វើឱ្យវីដេអូនោះមានអ្នកទស្សនា១លានដងនៅឆាណែលរបស់ខ្លួន។ លោក ឆេង សុភក្រ្ត បានរៀបរាប់ថា«

វីដេអូទីមួយដែលបានចំនួនទស្សនា ១លានដង នៅលើ YOUTUBE របស់ខ្ញុំ
អរគុណ ប្អូន Vann Da – វណ្ណដា ប្អូន RavenBlaze Baramey Production និង បងប្អូនទាំងអស់គ្នា សម្រាប់ខ្ញុំ វាជាថាមពលដែលជំរុញឱ្យខ្ញុំបន្តការងារនេះដល់ចាស់កោងខ្នង »។

គួរបញ្ជាក់ផងដែរ សម្រាប់ប្រាក់ចំណូលបានមកពីហ្វេកប៊ុកលើវីដេអូនេះ និងបន្ថែមពីលើប្រាក់ផ្ទាល់ខ្លួនមួយចំនួនទៀត ពូជ្រូញ ក៏បានចូលរួមបរិច្ចាគចំនួន១ពាន់ដុល្លារដល់លោកតា គង់ ណៃ ផងដែរក្នុងយុទ្ធនាការ ១០០ លានរៀល “Rise For Master Kong Nay”ដែលបង្កើតឡើងដោយផលិតកម្មបារមីកាលពីថ្ងៃទី២៥ ខែតុលា ឆ្នាំ២០២២ ដែលបទចម្រៀង Time To Rise មានអ្នកទស្សនា១០០លានដងលើយូធូប៕

ខណៈមានមហាជនរិះគន់យ៉ាងចាស់ដៃពីការមិនគោរពដល់ម្ចាស់ដើម ស្រាប់តែ សុខុម រចនា បានបង្ហោះសារអរគុណដល់អ្នកមួយចំនួនសម្រាប់ការបញ្ចេញមតិបែបជាន់ពន្លិចដល់នាងហើយពាក្យសម្តីនេះ កាន់តែធ្វើឱ្យមហាជនរិះគន់នាងបន្ថែមទៀតថាមនុស្សដែលផឹកទឹកភ្លេចប្រភពមិនរីកចម្រើនវែងឆ្ងាយទេ និងឱ្យបេក្ខនារីរូបនេះរៀនទទួលស្គាល់កំហុសខ្លះទៅបើមានចរិតខ្មើតបែបនេះនិងមានលទ្ធផលមិនល្អឡើយ។

នៅយប់ថ្ងៃទី១៣ ខែមិថុនា អ្នកCover បទ How about Now? សុខុម រចនា បានបញ្ចេញសារមួយបន្ទាប់ពីមានមតិរិះគន់ថា «សូមអរគុណសម្រាប់ការស្រលាញ់គាំទ្រពីពុកម៉ែបងប្អូនទាំងអស់គ្នាហើយក៏អរគុណបងប្អូនមួយចំនួនសម្រាប់ការបញ្ចេញមតិបែបជាន់ពន្លិចផងដែរ ។ ខ្ញុំមិនខឹងបងប្អូនទេ តែខ្ញុំខឹងនឹងខ្លួនឯងដែលធ្វើឱ្យបងប្អូនទាំងអស់គ្នាស្រលាញ់នាងខ្ញុំមិនបានគ្រប់ៗគ្នា។ តែខ្ញុំនៅតែស្រលាញ់បងប្អូនខ្មែរទាំងអស់គ្នា ។ អរគុណខ្លាំងៗ»។
ការសរសេរសំណេរខាងលើនូវពាក្យសម្តីថាការបញ្ចេញមតិជាន់ពន្លិចនេះ អ្នកលេងបណ្តាញសង្គមកាន់តែរិះគន់បេក្ខនារី The Voice Cambodia រដូវកាលទី៣រូបនេះកាន់តែខ្លាំង។ មានអ្នកខ្លះបានលើកឡើងថា «ត្រឹមជាអ្នកចម្រៀង Cover បទចម្រៀងគេ បានល្បីឈ្មោះបន្តិចបន្តួច ប្អូនបែរជាគិតថាប្អូនខ្ពស់ហួសមេឃ។ ប្អូនចូរចងចាំ មនុស្សដែលខ្វះគុណធម៌ មិនអាចទទួលបានការគាំទ្រយូរអង្វែងនោះទេ។ មនុស្សដែលផឹកទឹកភ្លេចប្រភព ក៏មិនរីកចម្រើនវែងឆ្ងាយដែរ។ ប្អូនមានថ្ងៃនេះដោយសារមានអ្នកគាំទ្រទំនុកច្រៀងរបស់Davidបូកជាមួយភ្លេងអកកាដង់ មិនមែនដោយសារប្អូនមានសមត្ថភាពច្រៀងពីរោះនោះទេ។ ម្យ៉ាងក៏ដោយសារម្ចាស់បទគេមិន Report ចម្រៀងប្អូន Cover ចុងក្រោយប្អូនបានចិត្តធ្វើដូចគេមិនដល់ខ្លួន។ សម្រាប់ប្អូន ត្រឹមចូលរួម The Voice Cambodia សូមកុំគិតថាអាចជោគជ័យនោះ។ មិនខ្វះទេអ្នកលើកពាន តែចុងក្រោយគ្មានអ្វីដុំកំភួន ព្រោះឈ្លក់នឹងភាពល្បីបន្តិចបន្តួច។ , ចេះកែផងទៅមិនមែនឱ្យតែគេរិះគន់ថាគេជាន់ពន្លិចនោះទេភាសាសាមញ្ញសម្រាប់តែមនុស្សដែលមិនចេះទទួលយកពាក្យរិះគន់ដើម្បីកែលម្អ, រៀនទទួលស្គាល់ការពិតទើប ប្រពៃណា,មើលៗរៀមច្បងផង កុំខ្មើតពេក,ឱ្យតែគេរិះគន់គឺថាគេជាន់ពន្លិចហើយ នេះជាទ្រឹស្តីអ្នកមិនទទួលស្គាល់កំហុសគ្រាន់តែនិយាយថាសូមទោសពេលហ្នឹងខ្ញុំរំភើបពេកនិយាយទៅមានចំណុចខ្វះខាតសូមអធ្យាស្រ័យ កុំអីរឿងមិនវែងបែបនេះទេគេមិនសូវប្រកាន់ការមានកំហុសទេ តែគេស្អប់អ្នកខ្មើតមិនទទួលកំហុស គ្មានសុជីវធម៌ចំពោះម្ចាស់ដើមគេសោះ សូមឱ្យបានជាប់ Copy right រឺ អ្នកគាំទ្រ report Chanel ឆាប់ៗ»។

អ្នកផ្សេងទៀតបានខំមិនថា «ឱ្យតែខ្មើតចឹងអត់យូរទេ ,បើពេលនោះប្អូន ប្រកែកថាបទនេះមិនមែនបទប្អូន ប្អូនក៏មិនជួបរឿងបែបនេះ ហើយកុំនិយាយថាគេជាន់ពន្លិចថា ប្អូនគ្មានអគុណដល់ម្ចាស់បទទេ តែទៅអរគុណដល់30M,ខ្ញុំមិនចង់ស្តាប់អ្វីទាំងអស់ អរគុណសម្រាប់ 30អឹម ម៉ាញ៉ូ,គេមិនហៅថាជាន់ពន្លិចទេ នេះគេកំពុងបង្រៀនឲ្យមានសុជីវធម៌ក្នុងខ្លួនខ្លះតើ បើនឹកឃើញចេះអរគុណម្ចាស់គេតែមួយម៉ាត់ក៏មិនមានអ្នកណាថាអីដែរគេបែបសរសើរគាំទ្រកាន់តែខ្លាំងផងក៏មិនដឹង, ប្រសិនបើការផុសមួយនេះរបស់កញ្ញាប្ដូរជាការសុំទោសមហាជននូវកំហុសដោយចេតនាឬអចេតនាក្ដី កញ្ញាប្រហែលជាអាចទទួលបាននៅការស្រឡាញ់ចូលចិត្តពីសំណាក់មហាជនច្រើនជាងមុន ប៉ុន្តែកញ្ញាហាក់ពុំបានសម្លឹងរកមូលហេតុ ថាម្ដេចបានជាមហាជនភាគច្រើនគេនាំគ្នាមិនពេញចិត្តឬរិះគន់កញ្ញាដូច្នេះ តែកញ្ញាបែរជាមកចាក់សាំងបន្ថែមពីលើ ភ្លើងដែលកំពុងតែឆេះ ខ្ញុំអត់បានស្អប់កញ្ញាទេតែក៏ពុំបានចូលចិត្តដូចគ្នា ហើយមួយទៀតសូមបែងចែកឱ្យដាច់រវាងពាក្យថា “រិះគន់“ និងពាក្យ ”ជាន់ពន្លិច” ន័យអត់ដូចគ្នាទេ តែយ៉ាងណាខ្ញុំក៏សូមជូនពរកញ្ញាឱ្យសំណាងល្អ »៕

តារាសម្តែង នី មុន្នីនាថ បានប្រកាសថា លោក ជី ដេវីត នឹងចូលរួមបរិច្ចាគឈាមក្នុងទិវាពិភពលោកនៃអ្នកបរិច្ចាគឈាម ដែលធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំងចំពោះការចូលរួមនេះ ខណៈ ជី ដេវីត ក៏មានការបង្ហាញទស្សនីយភាពបទមហានគរ នាថ្ងៃស្អែកផងដែរ។

នៅថ្ងៃទី១៤ ខែមិថុនា ឆ្នាំ២០២៣ ជាទិវាពិភពលោកនៃអ្នកបរិច្ចាគឈាម ដែលទិវានេះត្រូវបានចាត់តាំងជាផ្លូវការថាជាព្រឹត្តិការណ៍ប្រចាំឆ្នាំដោយមហាសន្និបាតសុខភាពពិភពលោកក្នុងឆ្នាំ២០០៥។ ការប្រារព្ធទិវានេះគឺដើម្បីអបអរសាទរ និងថ្លែងអំណរគុណដល់អ្នកបរិច្ចាគឈាមដោយស្ម័គ្រចិត្តនៅជុំវិញពិភពលោកសម្រាប់ការបរិច្ចាគឈាមរបស់ពួកគេ ហើយបានក្លាយជាការផ្តោតសំខាន់សម្រាប់សកម្មភាពឆ្ពោះទៅរកការទទួលបានឈាមសុវត្ថិភាពជាសកល។ សម្រាប់ឆ្នាំ២០២៣ ប្រទេសអាល់ហ្សេរីគឺជាម្ចាស់ផ្ទះព្រឹត្តិការណ៍ពិភពលោកនៃទិវាពិភពលោកនៃអ្នកបរិច្ចាគឈាម។ នេះតាមការបញ្ជាក់នៅលើគេហទំព័ររបស់ WHO ។

ទន្ទឹមនឹងទិវាខាងលើនេះ តារាសម្តែង នី មុន្នីនាថ បានប្រកាសនៅលើបណ្តាញសង្គមផ្ទាល់ខ្លួននាយប់ថ្ងៃទី១៣ ខែមិថុនា ថាលោក ជី ដេវីត ក៏ចូលរួមបរិច្ចាគឈាមក្នុងទិវានេះដូចគ្នា។ កញ្ញា នី មុន្នីនាថ បានសរសេរថា «ចូលរួមបរិច្ចាគឈាមជាមួយលោក G-Devith ក្នុងទិវាពិភពលោកនៃអ្នកបរិច្ចាគឈាម ថ្ងៃទី១៤ ខែមិថុនា ឆ្នាំ២០២៣ ចាប់ពីម៉ោង ៨:០០នាទីព្រឹក ដល់ម៉ោង ១៦:០០នាទីល្ងាច ដែលប្រព្រឹត្តទៅក្នុងទីតាំងមជ្ឈមណ្ឌលជាតិផ្តល់ឈាម»។
ការប្រកាសដែលតារាចម្រៀង ជី ដេវីត ចូលរួមបរិច្ចាគឈាមនេះបានធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំង ដោយមានអ្នកខ្លះលើកឡើងថានឹងចូលរួមបរិច្ចាគឈាមជាមួយអាយដលរបស់ពួកគេផងដែរ។

អ្វីដែលកាន់តែធ្វើឱ្យមានការសរសើរដល់ម្ចាស់បទ «How about Now?» រូបនេះបន្ថែមពីទង្វើល្អជួយសង្គមនោះគឺ ទោះបីជាជាប់ភារៈកិច្ចត្រូវសម្តែងផ្តល់ផ្ទាំងទស្សនីយភាពបទមហានគរ ថ្ងៃទី១៥ ខែមិថុនា ឆ្នាំ២០២៣ ការប្រកួតបាល់ទាត់មិត្តភាពអន្តរជាតិរវាងកម្ពុជា និងបង់ក្លាដេស ក្តីតែលោកនៅតែឆ្លៀតធ្វើអំពើសប្បុរសធម៌ទៀត៕

នៅលើបណ្តាញសង្គមផ្ទុះការវែកញែកមិនធម្មតារវាងរឿងអ្នកCover បទ How about Now ? សុខុម រចនា និងម្ចាស់ដើមតារាចម្រៀង ជី ដេវីត ព្រមទាំងមានការរិះគន់ទៅលើអ្នកCover ដែលថាធ្វើខ្លួនដូចជាម្ចាស់បទ។ ទន្ទឹមនឹងមានការជជែកវែកញែកលើរឿងនេះ តារាចម្រៀងប្រចាំផលិតកម្ម រាម ពុធ មិថុនា បានលើកឡើងថា ខ្លួនក៏ធ្លាប់ជាអ្នកCoverបទគេដូចគ្នា ប៉ុន្តែមិនដែលមានអំនួតអួតអាងពេលបានលទ្ធផលច្រើនឡើយព្រោះទាំងនោះសុទ្ធតែជាចំណែករបស់បទម្ចាស់ដើម ផ្ទុយមកវិញពេលមានគេច្រឡំថាជាម្ចាស់ដើមលោកប្រកែកយ៉ាងលឿន។

ជឿជាក់ថាសម្រាប់អ្នកលេងបណ្តាញសង្គមហ្វេកប៊ុក និងទិកតុកជ្រាបមកហើយថា ជុំវិញការរិះគន់ទៅលើបេក្ខនារី The Voice Cambodia រដូវកាលទី៣ សុខុម រចនា ដែលនាងបាននិយាយអរគុណទៅដល់ទស្សនិកជនដែលបានគាំទ្រ How about Now? មានអ្នកទស្សនាចំនួន៣០M Views ។ ពាក្យសម្តីរបស់ សុខុម រចនា ដែលមិនបាននិយាយពីម្ចាស់ដើមគឺតារាចម្រៀង ជី ដេវីត សូម្បីមួយម៉ាត់នោះក៏ធ្វើឱ្យអ្នកលេងបណ្តាញសង្គមមានការរិះគន់ទៅដល់បេក្ខនារីរូបនេះដែលធ្វើខ្លួនជាម្ចាស់បទ មិនប្រកែកសូម្បីមួយម៉ាត់ពេល Coash ក្នុងកម្មវិធីនិយាយថាបានជួបម្ចាស់បទ។

រឿងនេះដែរ លោក ពុធ មិថុនា ជាតារាចម្រៀងប្រចាំផលិតកម្មរាមបានបញ្ចេញយោបល់នៅលើបណ្តាញសង្គមរបស់លោកយ៉ាងចាក់ដោតថា លោកក៏ធ្លាប់ជាអ្នកCover បទចម្រៀងគេដូចគ្នា ប៉ុន្តែមិនដែលមានអំនួតអួតអាងឡើយ។
តារាចម្រៀងវ័យក្មេងរូបនេះ បានសរសេរនៅយប់ថ្ងៃទី១៣ ខែមិថុនា ថា«ខ្ញុំក៏ជាអ្នកធ្លាប់ Cover បទគេដែរប៉ុន្តែខ្ញុំមិនដែលមានមោទកភាព ឬ អំនួតអួតអាងពេលទទួលបានលទ្ធផលច្រើនយ៉ាងណាទេព្រោះលទ្ធផលទាំងនោះសុទ្ធតែជាចំណែកនៃរបស់ម្ចាស់ដើម»។ បន្ថែមពីលើនេះ ម្ចាស់បទ «Crush អូនអ្នកគាំទ្រ » រូបនេះបន្ថែមថា «ធ្លាប់មានគេច្រឡំថាជាម្ចាស់បទខ្ញុំប្រកែកយ៉ាងលឿនថា អត់ទេបងខ្ញុំ Cover បទគេដែរទេ»។

ការលើកឡើងយ៉ាងច្បាស់លាស់របស់តារាចម្រៀងរូបនេះ ធ្វើឱ្យអ្នកលេងបណ្តាញសង្គមកោតសរសើរថាលោកមានអត្តចរិតល្អធ្វើបែបនេះនឹងធ្វើឱ្យយើងមានផ្លូវដើរទៅមុខទៀត៕