តារាសម្តែង នី មុន្នីនាថ បានប្រកាសថា លោក ជី ដេវីត នឹងចូលរួមបរិច្ចាគឈាមក្នុងទិវាពិភពលោកនៃអ្នកបរិច្ចាគឈាម ដែលធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំងចំពោះការចូលរួមនេះ ខណៈ ជី ដេវីត ក៏មានការបង្ហាញទស្សនីយភាពបទមហានគរ នាថ្ងៃស្អែកផងដែរ។
នៅថ្ងៃទី១៤ ខែមិថុនា ឆ្នាំ២០២៣ ជាទិវាពិភពលោកនៃអ្នកបរិច្ចាគឈាម ដែលទិវានេះត្រូវបានចាត់តាំងជាផ្លូវការថាជាព្រឹត្តិការណ៍ប្រចាំឆ្នាំដោយមហាសន្និបាតសុខភាពពិភពលោកក្នុងឆ្នាំ២០០៥។ ការប្រារព្ធទិវានេះគឺដើម្បីអបអរសាទរ និងថ្លែងអំណរគុណដល់អ្នកបរិច្ចាគឈាមដោយស្ម័គ្រចិត្តនៅជុំវិញពិភពលោកសម្រាប់ការបរិច្ចាគឈាមរបស់ពួកគេ ហើយបានក្លាយជាការផ្តោតសំខាន់សម្រាប់សកម្មភាពឆ្ពោះទៅរកការទទួលបានឈាមសុវត្ថិភាពជាសកល។ សម្រាប់ឆ្នាំ២០២៣ ប្រទេសអាល់ហ្សេរីគឺជាម្ចាស់ផ្ទះព្រឹត្តិការណ៍ពិភពលោកនៃទិវាពិភពលោកនៃអ្នកបរិច្ចាគឈាម។ នេះតាមការបញ្ជាក់នៅលើគេហទំព័ររបស់ WHO ។
ទន្ទឹមនឹងទិវាខាងលើនេះ តារាសម្តែង នី មុន្នីនាថ បានប្រកាសនៅលើបណ្តាញសង្គមផ្ទាល់ខ្លួននាយប់ថ្ងៃទី១៣ ខែមិថុនា ថាលោក ជី ដេវីត ក៏ចូលរួមបរិច្ចាគឈាមក្នុងទិវានេះដូចគ្នា។ កញ្ញា នី មុន្នីនាថ បានសរសេរថា «ចូលរួមបរិច្ចាគឈាមជាមួយលោក G-Devith ក្នុងទិវាពិភពលោកនៃអ្នកបរិច្ចាគឈាម ថ្ងៃទី១៤ ខែមិថុនា ឆ្នាំ២០២៣ ចាប់ពីម៉ោង ៨:០០នាទីព្រឹក ដល់ម៉ោង ១៦:០០នាទីល្ងាច ដែលប្រព្រឹត្តទៅក្នុងទីតាំងមជ្ឈមណ្ឌលជាតិផ្តល់ឈាម»។
ការប្រកាសដែលតារាចម្រៀង ជី ដេវីត ចូលរួមបរិច្ចាគឈាមនេះបានធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំង ដោយមានអ្នកខ្លះលើកឡើងថានឹងចូលរួមបរិច្ចាគឈាមជាមួយអាយដលរបស់ពួកគេផងដែរ។
អ្វីដែលកាន់តែធ្វើឱ្យមានការសរសើរដល់ម្ចាស់បទ «How about Now?» រូបនេះបន្ថែមពីទង្វើល្អជួយសង្គមនោះគឺ ទោះបីជាជាប់ភារៈកិច្ចត្រូវសម្តែងផ្តល់ផ្ទាំងទស្សនីយភាពបទមហានគរ ថ្ងៃទី១៥ ខែមិថុនា ឆ្នាំ២០២៣ ការប្រកួតបាល់ទាត់មិត្តភាពអន្តរជាតិរវាងកម្ពុជា និងបង់ក្លាដេស ក្តីតែលោកនៅតែឆ្លៀតធ្វើអំពើសប្បុរសធម៌ទៀត៕
