អ្នកលេងបណ្តាញសង្គមមួយចំនួនជ្រាបមកហើយថានៅល្ងាចថ្ងៃទី២៧ ខែមេសា ឆ្នាំ២០២៣ ផ្ទុះការវែកញែកយ៉ាងខ្លាំងបន្ទាប់ពី ប្រាសាទ ដាវីន ចេញបញ្ជាក់ថា អេឡិច ហ្សូរ៉ា មិនមែនឪពុករបស់កូនស្រី ឌី សូនិត្តា ឡើយ។ រឿងក្តៅដូចបាយពុះនេះ ឌី សូនិត្តា មិននៅស្ងៀមដូចគ្នាចេញបកស្រាយជាសំណេរជូនមហាជនទាំងយប់ ខណៈ ឌី សូនិត្តា អាចឈានដល់ប្រព័ន្ធផ្លូវច្បាប់ជាមួយ ប្រាសាទ ដាវីន។

ម្ចាស់ពាន I Am a Singer Cambodia រដូវកាលទី៣ ឌី សូនិត្តា ចេញមកបញ្ជាក់ជូនមហាជនទាំងយប់ព្រោះមិនអាចទ្រាំមើលគេយកកូនស្រី និងខ្លួន ធ្វើជាប្រធានបទ ទាំងកន្លងមកនាងមិនដែលមានរឿងជាមួយ ប្រាសាទ ដាវីន សូម្បីម្តងទោះបីកន្លងមក ប្រាសាទ ដាវីន ធ្វើអ្វីខ្លះនិងនិយាយអ្វីខ្លះ នាងរក្សានៅភាពស្ងៀមស្ងាត់ តែបែរជាវាយប្រហារនាងដោយចំហថែមទាំងយកកូនស្រីខ្លួនទៅពាក់ព័ន្ធទៀត។

ឌី សូនិត្តា បកស្រាយទៀតថា ទោះបីជាកូនស្រីនាង ជាកូនរឺមិនមែនកូនរបស់ អេឡិច ហ្សូរ៉ា ក៏ដោយនៅតែជាកូនរបស់នាង សំខាន់នាងមានទំនួលខុសត្រូវបែបណាខ្លះចំពោះកូននាង។ តារាស្រីរូបនេះ បានផ្តាំទៅ ប្រាសាទ ដាវីន ទៀតថា ខ្លួនមិនមែនជាមនុស្សទម្លាប់យករឿងមិនល្អដើម្បីល្បីដែរ និងចោទសំណួរទៅភាគីម្ខាងទៀតថា មិនខ្លាចបាបកម្មដោយមិនដឹងខ្លួនដោយសារតែទង្វើឈឺឆ្អាលរឿងរបស់អ្នកដទៃហួសហេតុ។ បន្ថែមលើនេះ សូនិត្តា ក៏បានបញ្ជាក់ទៀតថាចាប់ពីពេលនេះ កូនស្រីជារបស់នាងតែម្នាក់មិនមានឪពុកទេ ហើយអេឡិច ហ្សូរ៉ា ក៏មិនត្រូវជាអ្វីនឹងនាង និងកូននាងដែរ កូនស្រីនាងគ្មានឪពុកតាំងពីដើម។

មិនត្រឹមតែមានការបកស្រាយតែប៉ុណ្ណោះទេ តែ ឌី សូនិត្តា អាចឈានដល់ប្រព័ន្ធផ្លូវច្បាប់ជាមួយ ប្រាសាទ ដាវីន ដោយ ឌី សូនិត្តា បាន add Story ថា «នៅសុខៗគេមកបរិហារកេរ្តិ៍ ហើយ បំភ្លើសជាសារធារណៈពីកូនស្រីខ្ញុំ គាត់ជាតារាទៀត គាត់និយាយការពិតខ្ញុំអត់ខឹងទេ តែនេះបន្ថែមទាល់តែលើសចូលដល់បទ ព្រហ្មទណ្ឌហើយ។ បងសាង បងចាំទទួលផង»។

គួរបញ្ជាក់ផងដែរថា ជុំវិញរឿងក្តៅគគុកនេះ ប្រាសាទ ដាវីន បានចេញមកទម្លាយថា អេឡិច ហ្សូរ៉ា មិនមែនជាឪពុកកូនស្រីរបស់ ឌី សូនិត្តា នឹងចង់ឱ្យ អេឡិច ហ្សូរ៉ា ចេញមកបកស្រាយការពិតព្រោះចង់ឃើញពីភាពសម្តែងបន្តទៀត ក្រោយ ឌី សូនិត្តា និយាយថាមិនស្តាយក្រោយដែលស្ពាយឈ្មោះមេម៉ាយត្រូវមើលថែកូនស្រីតែម្នាក់ឯង៕

ផ្ទុះការវែកញែកមិនធម្មតា បន្ទាប់អ្នកនាង ប្រាសាទ ដាវីន បានបង្ហោះសារនៅលើបណ្តាញសង្គមឱ្យតារាសម្តែង អេឡិច ហ្សូរ៉ា ចេញមកទម្លាយការពិតក្រោយមានការផ្សព្វផ្សាយពី ឌី សូនិត្តា មិនសោកស្តាយដែលស្ពាយឈ្មោះម៉េមាយចិញ្ចឹមមើលថែកូនស្រីម្នាកក់ឯង រហូតមហាជនអ្នកលេងបណ្តាញសង្គមលើកឡើងថា កន្លងមក ឌី សូនិត្តា បោកភ្នែកមហាជនដល់ត្រើយក៏រុះស្ពាន រឿងយក អេឡិច ហ្សូរ៉ា ជាគូស្នេហ៍ធ្វើជាឪពុករបស់កូនទាំងមិនមែនការពិតទាំងកូននោះកាត់ទៅបរទេសច្រើនជាង។

តារាម៉ូឌែល ប្រាសាទ ដាវីន ដែលតំណាងប្រទេសកម្ពុជា ចូលរួមប្រកួត Universal Woman International 2023 កាលពីដើមឆ្នាំ២០២៣ ដោយទទួលបានជ័យលាភីលំដាប់រងទី៤
បានធ្វើឱ្យផ្ទុះកក្រើកយ៉ាងខ្លាំងនៅថ្ងៃទី២៧ ខែមេសា ឆ្នាំ២០២៣ នេះដែលចេញមកទម្លាយទំនាក់ទំនងរវាង ឌី សូនិត្តា និង អេឡិច ហ្សូរ៉ា ដែលកន្លងមកមហាជនលើកឡើងថាអ្នកទាំងពីរបង្កាត់ភ្លើងស្នេហ៍រហូតមានដំណក់ឈាមរួមគ្នាទាំងមិនទាន់ចូលរោងការ។

ប្រាសាទ ដាវីន បានភ្ជាប់សំណេរជាមួយព័ត៌មានមួយ ដែលលើកឡើងពី ឌី សូនិត្តា មិនសោកស្តាយដែលស្ពាយឈ្មោះមេម៉ាយមើលថែកូនស្រីម្នាក់ឯង បន្ទាប់ពីមានភាពរង្គោះរង្គើទំនាក់ទំនងជាមួយ អេឡិច ហ្សូរ៉ា។ ប្រាសាទ ដាវីន បានទម្លាយថា «និយាយមែនដូចអត់ចប់សោះដឹងកាលណាបានគេសារភាពការពិត Alexora John It’s time to speak up…………» ក្នុងនោះតារាស្រីរូបនេះដែលត្រូវជាមិត្តជិតស្និទ្ធរបស់ អេឡិច ហ្សូរ៉ា បានលើកឡើងថា កូនស្រីរបស់ ឌី សូនិត្តា មិនមែនជាកូនរបស់អេឡិច ហ្សូរ៉ា ឡើយ។
អ្នកលេងបណ្តាញសង្គមជាច្រើនបានចូលទៅខំមិនវែកញែកយ៉ាងច្រើន ដោយអ្នកខ្លះក៏លើកឡើងថា កូនកាត់ទៅបរទេស ហើយមនុស្សភាគច្រើនសុទ្ធតែដឹងថា អេឡិច ហ្សូរ៉ា មិនមែនជាឪពុកក្មេងឡើយ ព្រោះកូនអត់ដូចប៉ា។ អ្នកខ្លះទៀតក៏លើកឡើងថា ដល់ត្រើយហើយក៏រុះស្ពាន កន្លងមក ឌី សូនិត្តា បោកភ្នែកមហាជនប៉ុណ្ណោះ ខណៈអ្នកមួយចំនួនក៏បានបញ្ចេញមតិរិះគន់ ប្រាសាទ ដាវីន ដូចគ្នាព្រោះនិយារឿងឯកជនរបស់គេ។

ការទម្លាយរឿងនេះ ប្រាសាទ ដាវីន ក៏បានលើកឡើងទៀតថា នាងមិនមានបំណងវែកញែកពីជីវិតឯកជនរបស់ ឌី សូនិត្តា នោះទេ គ្រាន់តែចង់ឱ្យ អេឡិច ហ្សូរ៉ា បញ្ជាក់ការពិតជូនមហាជនតែប៉ុណ្ណោះមិនចង់ឃើញភាពសម្តែងតទៅទៀត។

គួរបញ្ជាក់ផងដែរថា ក្នុងឆ្នាំ២០២០ ឌី សូនិត្តា និង អេឡិច ហ្សូរ៉ា បានធ្វើឱ្យមហាជនភ្ញាក់ផ្អើលយ៉ាងខ្លាំង បន្ទាប់ពីទម្លាយរឿងមានកូនជាមួយគ្នាទាំងមិនទាន់ចូលរោងការរហូត សូនិត្តា សុំចិត្តមហាជនកុំឱ្យខឹងស្អប់រូបនាងដោយសារនាងមានជំងឺ ទើបសម្រេចចិត្តពរពោះទាំងមិនទាន់ចូលរោងការ។ យ៉ាងណាមិញ ទំនាក់ទំនងរបស់ពួកគេមានភាពរង្គោះរង្គើចុងឆ្នាំ២០២២៕