អ៊ីរ៉ង់៖ លោក Gholamreza Ardeshiri មានអាយុ ៥៨ ឆ្នាំបានរស់នៅជាមួយ Pepsi និង Coca-Cola អស់រយៈពេល ១៧ ឆ្នាំដោយសារតែលោកមានអារម្មណ៍ថាចង់ក្អួតនៅពេលឃើញអាហារ។
លោក Gholamreza Ardeshiri បាននិយាយថា នៅយប់មួយ ក្នុងឆ្នាំ២០០៦ លោកមានអារម្មណ៍ថាមានសក់ជាប់នៅបំពង់ករបស់លោក ហើយលោកថប់ដង្ហើម និងមិនអាចធ្វើអ្វីបាននោះទេ។ នៅថ្ងៃបន្ទាប់លោក Ardeshiri ក៏បានទៅជួបលោកគ្រូពេទ្យជាច្រើននាក់តែរកមិនឃើញសសៃសក់ដែលជាប់នឹងបំពង់ករបស់លោកនោះទេ។

ទីបំផុតគាត់ក៏សម្រេចចិត្តបោះបង់ការហូបចុកដោយរស់នៅជាមួយភេសជ្ជៈរហូតមកដល់បច្ចុប្បន្ន។ លោក Ardeshiri បានចែករំលែកថា នៅពេលដែលគាត់បានផឹកភេសជ្ជៈមួយកែវដំបូង គាត់មានអារម្មណ៍ថាពោរពេញដោយថាមពល ហើយសម្រេចចិត្តប្រើវាជំនួសអាហារជារៀងរហូត។
គ្រួសាររបស់ Ardeshiri បាននិយាយថា ពួកគេមិនហ៊ានញ៉ាំអាហារនៅចំពោះមុខគាត់នោះទេ ពីព្រោះការមើលឃើញអាហារនោះ អាចធ្វើឱ្យគាត់មានអារម្មណ៍ឈឺ ឬចង់ក្អួតជាដើម ។ ជារៀងរាល់ថ្ងៃ គាត់ផឹកភេសជ្ជៈកែវធំចំនួនបីកែវ ហើយគាត់អះអាងថាមិនដែលឃ្លានអាហារនោះទេ។ ចាប់តាំងពីទទួលបានទម្លាប់នេះមក គាត់ស្រកបាន ៣២ គីឡូក្រាម ហើយមិនមានបញ្ហាសុខភាពធ្ងន់ធ្ងរទេអស់រយៈពេល ១៧ ឆ្នាំមកហើយ។

លោក Ardeshiri ដឹងយ៉ាងច្បាស់អំពីហានិភ័យដែលទាក់ទងនឹងការទទួលទានភេសជ្ជៈដែលមានជាតិកាបូអ៊ីដ្រាតច្រើន។ គាត់បាននិយាយថា ខ្ញុំបានទៅពិនិត្យសុខភាពជាញឹកញាប់ សូម្បីតែថតអេកូក៏ដោយ។ លទ្ធផលទាំងអស់បានបញ្ជាក់ថា សរីរាង្គ និងរាងកាយរបស់ខ្ញុំមានសភាពធម្មតាទាំងអស់។ យោងតាមអ្នកជំនាញបាននិយាយថា លោក Ardeshiri គ្រាន់តែជាករណីកម្រដែលមិនប៉ះពាល់ដល់សុខភាព ដោយសារតែទម្លាប់នៃការញ៉ាំដ៏ចម្លែកនេះ។ ជាទូទៅភេសជ្ជៈដែលមានជាតិកាបូនអាចបណ្តាលឱ្យមានជំងឺជាច្រើនដូចជា គ្រួសក្នុងតម្រងនោម, ជំងឺពុកឆ្អឹង, ជំងឺធ្មេញ, រោគប្រគ្រីវ…ជាដើម៕

ប្រភព៖vnexpress

ប្រទេសថៃ ៖ អាជីវករលក់ពងមាន់ម្នាក់នៅខេត្តនគរាជសីម៉ាបានត្អូញត្អែរពីពងមាន់ឡើងថ្លៃ ក្រោយពីមានការប្រកាសថា ពងមាន់នឹងឡើងថ្លៃបន្ថែមទៀត ។ អាជីវកររូបនេះលើកឡើងថា ការបង្កើតរដ្ឋាភិបាលយឺតយ៉ាវនឹងធ្វើឱ្យប៉ះពាល់ដល់ការប្រកបមុខរបររបស់ពលរដ្ឋ ហើយបានសំណូមពររដ្ឋាភិបាលឱ្យប្រញាប់ដោះស្រាយបញ្ហាសេដ្ឋកិច្ចជាតិជាមុន ចំណែករឿងផ្សេងទុកពេលក្រោយ ។

កាលពីថ្ងៃទី១៨ ខែឧសភា សារព័ត៌មាន Thairath បានដើរពិនិត្យមើលតម្លៃពងមាន់នៅផ្សារមួយកន្លែងក្នុងស្រុកមឿងនគរាជសីម៉ាឃើញថា ពងមាន់បានឡើងថ្លៃដល់៣.៨០បាតសម្រាប់ពងមាន់១គ្រាប់ ខណៈកាលពីមុន តម្លៃត្រឹមតែ៣.៦០បាតប៉ុណ្ណោះ ។ បើតាមការសាកសួរទៅកាន់អាជីវករក្នុងផ្សារនេះប្រាប់ថា ពងមាន់បានឡើងថ្លៃតាំងពីថ្ងៃទី១៥ ខែឧសភា មកម៉្លេះ ។

ស្ត្រីអាជីវករលក់ពងមាន់ឈ្មោះ ម៉ាលី ប្រាប់ថា មូលហេតុដែលគាត់លក់ពងមាន់ថ្លៃទៅឱ្យអតិថិជន ដោយសារគាត់ទិញយកមកលក់ថ្លៃដែរ ហើយចំពោះមូលហេតុពងមាន់ឡើងថ្លៃនោះ គាត់មិនដឹងច្បាស់ទេ គឺដឹងត្រឹមតែថា បច្ចុប្បន្ននេះ មិនមែនមានតែពងមាន់ទេដែលឡើងថ្លៃនោះ ទំនិញផ្សេងទៀតក៏ឡើងថ្លៃតាមដែរ ។ ដូច្នេះ គាត់ចង់សំណូមពរទៅកាន់រដ្ឋាភិបាលថ្មីដែលកំពុងរៀបចំបង្កើត សូមឱ្យប្រញាប់ដោះស្រាយបញ្ហាសេដ្ឋកិច្ចជាតិ និងការប្រកបមុខរបររបស់ពលរដ្ឋជាមុនសិន ចំណែករឿងផ្សេងទុកដោះស្រាយនៅពេលក្រោយ ពីព្រោះពេលនេះ ពលរដ្ឋថៃលំបាកណាស់ ។

ស្ត្រីអាជីវកររូបនេះបន្តថា គាត់ក៏បារម្ភពីការបង្កើតរដ្ឋាភិបាលផងដែរ ព្រោះបើពុំអាចបង្កើតរដ្ឋាភិបាលបានឆាប់រហ័សទេ គឺវាកាន់តែធ្វើឱ្យការដោះស្រាយបញ្ហាសេដ្ឋកិច្ចជាតិ និងការប្រកបមុខរបរប្រចាំថ្ងៃរបស់ពលរដ្ឋយឺតយ៉ាវថែមទៀត ។

គួរបញ្ជាក់ថា បច្ចុប្បន្ន ទំនិញ និងបន្លែស្ទើរគ្រប់មុខឡើងថ្លៃទាំងអស់នៅប្រទេសថៃ ដូចជា ពងមាន់ ម្ទេស តាសក់ សណ្តែកកួ និងស្លឹកខ្ទឹម ស្របគ្នានឹងប្រេងឥន្ធនៈឡើងថ្លៃ ដែលធ្វើឱ្យកសិករ និងអាជីវករត្រូវចំណាយដើមទុនខ្ពស់ក្នុងការដឹកជញ្ជូនបន្លែ និងទំនិញយកមកលក់នៅទីផ្សារ ៕ ប្រភព ៖ Thairath

ប្រទេសថៃ ៖ អាកាសធាតុក្តៅបានអូសបន្លាយពេលយូរធ្វើឱ្យប៉ះពាល់ដល់ការដាំដុះដំណាំផ្សេងៗនៅប្រទេសថៃ ក្នុងនោះដំណាំម្ទេសក៏បានរងផលប៉ះពាល់ខ្លាំងដែរ ហើយកសិករត្រូវចំណាយដើមទុនច្រើនជាងមុនដើម្បីទទួលផល ។ បច្ចុប្បន្ន ម្ទេសនៅខេត្ត Uthai Thani បានឡើងថ្លៃដល់ជិត៤០០បាតក្នុង១គីឡូក្រាម ហើយបន្លែបង្ការផ្សេងទៀតក៏ឡើងថ្លៃតាមដែរ ។

ក្នុងផ្សារមួយកន្លែងនៅខេត្ត Uthai Thani គេសង្កេតឃើញថា ពលរដ្ឋមកទិញបន្លែបាននាំគ្នារអ៊ូរទាំថា បន្លែបានឡើងថ្លៃខ្ពស់នាពេលបច្ចុប្បន្ន ។ ចំណែកអាជីវករម្នាក់ដែលបានលក់បន្លែនៅផ្សារនេះអស់រយៈពេល១០ឆ្នាំនិយាយថា នៅរដូវវស្សា ទើបតម្លៃម្ទេស និងបន្លែផ្សេងទៀតធ្លាក់ចុះ ព្រោះការដាំដុះម្ទេសនៅរដូវក្តៅពិបាកថែទាំ និងត្រូវការស្រោចទឹកបន្ថែមទៀត បើមិនដូច្នោះទេ កុំថាតែម្ទេស សូម្បីតែដំណាំផ្សេងៗក៏ងា.ប់ដែរ ។ ពេលនេះ ម្ទេសបានឡើងថ្លៃដល់៣៦០បាតក្នុង១គីឡូក្រាម ខណៈកាលពីមុន មានតម្លៃត្រឹមតែ៣០០បាតប៉ុណ្ណោះក្នុង១គីឡូក្រាម ។
លើសពីនេះ បន្លែផ្សេងទៀតក៏បានឡើងថ្លៃបន្តបន្ទាប់ដែរដូចជា ៖
-តាសក់ ១គីឡូក្រាម តម្លៃ៤០បាត (ពីមុន ១គីឡូក្រាម តម្លៃ២០បាត)
-សណ្តែកកួ ១គីឡូក្រាម តម្លៃ៦០បាត (ពីមុន ១គីឡូក្រាម តម្លៃ៤០បាត)
-ស្លឹកខ្ទឹម ១គីឡូក្រាម តម្លៃ១៥០បាត (ពីមុន ១គីឡូក្រាម តម្លៃពី៩០បាត-១០០បាត) ។

បន្លែឡើងថ្លៃជាបន្តបន្ទាប់នេះ អាជីវករប្រាប់ថា អ្នកមកទិញបន្លែរបស់គាត់រអ៊ូថា បន្លែឡើងថ្លៃខ្លាំង ប៉ុន្តែពួកគេចាំបាច់ត្រូវតែទិញយកទៅធ្វើម្ហូបនៅផ្ទះ ។ ចំណែកគាត់ជាអាជីវករក៏ឆ្លើយតបវិញថា ពេលនេះ កសិករត្រូវចំណាយដើមទុនខ្ពស់ ដោយសារវាជារដូវក្តៅធ្វើឱ្យប៉ះពាល់ដល់ផលដំណាំ ហើយកសិករត្រូវស្រោចទឹកច្រើនជាងមុនដើម្បីកុំឱ្យបន្លែងា.ប់ ។ លើសពីនេះ តម្លៃប្រេងឥន្ធនៈក៏បានកើនឡើងជាបន្តបន្ទាប់ ហើយគ្មានថ្ងៃថយចុះទេ ដែលធ្វើឱ្យថ្លៃដឹកជញ្ជូនបន្លែកើនឡើង ហើយវានឹងបន្តកើនឡើងទៀត រហូតដល់រដូវវស្សា ទើបតម្លៃបន្លែធ្លាក់ចុះវិញ ៕ ប្រភព ៖ Thairath

ប្រទេសអ៊ីតាលី ៖ នៅថ្ងៃទី១៨ ខែឧសភា សារព័ត៌មាន BBC បានរាយការណ៍ពីស្ថានការណ៍គ្រោះមហន្តរាយនៅប្រទេសអ៊ីតាលី ក្រោយពីខ្យល់ព្យុះដ៏ខ្លាំងក្លាមួយបានវា.យប្រ.ហារមកលើតំបន់ Emilia-Romagna ស្ថិតនៅភាគខាងជើងប្រទេស ។ ឥទ្ធិពលខ្យល់ព្យុះបណ្តាលឱ្យមានភ្លៀងធ្លាក់ខ្លាំង និងទឹកជំនន់ភ្លាមៗ ហើយអាជ្ញាធរក្នុងតំបន់បានរាយការណ៍ថា មានអ្នកស្លា.ប់យ៉ាងតិច៩នាក់ ហើយពលរដ្ឋប្រមាណ១ម៉ឺននាក់ទៀតបានជម្លៀសខ្លួនចេញពីតំបន់នេះ ។

អាជ្ញាធរក្នុងតំបន់បញ្ជាក់ថា កម្រិតទឹកក្នុងទន្លេចំនួន១៤កន្លែងបានកើនឡើងយ៉ាងឆាប់រហ័ស រហូតដល់ខូចខាតទំនប់ទប់ទឹក ។ លើសពីនេះ វាបានបណ្តាលឱ្យមានទឹកជំនន់ក្នុងទីក្រុងចំនួន២៣ ។ ការិយាល័យឧតុនិយមអ៊ីតាលីបញ្ជាក់ថា ភ្លៀងនឹងធ្លាក់ជាបន្តបន្ទាប់រយៈពេលច្រើនថ្ងៃទៀត ។

ប្រធានាធិបតីប្រទេសអ៊ីតាលី លោកស្រី Georgia Meloni បានកោះប្រជុំជាបន្ទាន់ជាមួយមន្ត្រីការិយាល័យការពារពលរដ្ឋ ដើម្បីទប់ស្កាត់ និងជួយសង្គ្រោះជនរងគ្រោះដោយសារទឹកជំនន់ផងដែរ ។ ក្រៅពីនេះ ក៏មានក្រុមអ្នកស្ម័គ្រចិត្តជាច្រើននាក់បានសហការជាមួយអាជ្ញាធរក្នុងតំបន់ Emilia-Romagna ដើម្បីជួយសង្គ្រោះពលរដ្ឋ ។

លោក Michelle Del Pascal អភិបាលក្រុង Ravenna បានលើកឡើងថា វាជាគ្រោះធម្មជាតិដ៏អាក្រក់បំផុតនៅតំបន់ Romagna ខណៈតំបន់នេះទទួលរងការខូចខាតខ្លាំង ។ ចំណែកលោក Gian Luca Sattini អភិបាលក្រុង Forli ខេត្ត Forli-Sechena បានលើកឡើងថា ខេត្តរបស់លោកក៏ជួបគ្រោះទឹកជំនន់ដូចគ្នាដែរ ហើយស្ថានការណ៍នៅតែអាក្រក់ ។

គេសង្កេតឃើញថា ពលរដ្ឋរស់នៅទីក្រុង Cesena បានឡើងទៅលើដំបូលផ្ទះដើម្បីរង់ចាំការជួយសង្គ្រោះពីឧទ្ធម្ភាគចក្រ ។ ចំណែកការិយាល័យអភិបាលក្រុង Castel Bolognese និយាយថា ប្រទេសអ៊ីតាលីត្រូវការជំនួយបន្ទាន់ ព្រោះមានពលរដ្ឋរាប់ពាន់នាក់រស់នៅក្នុងផ្ទះតែមួយជាន់ ៕ ប្រភព ៖ khaosod

ប្រទេសវៀតណាម ៖ Hanoi Metro ជាក្រុមហ៊ុនផ្តល់សេវាកម្មរថភ្លើងអាកាសដំបូងគេនៅប្រទេសវៀតណាម បានប្រកាសពីប្រាក់ចំណេញលើកដំបូងរបស់ខ្លួននៅឆ្នាំ២០២២ គឺស្មើប្រមាណ៩,៧ម៉ឺនលានដុង ។ វាជាការទទួលបានប្រាក់ចំណេញលើកដំបូងរបស់ក្រុមហ៊ុននេះ ក្រោយពីខាតទុនអស់ចំនួន៣,៧ម៉ឺនលានដុងកាលពីឆ្នាំ២០២១ ។

ក្រុមហ៊ុន Hanoi Metro បានចាប់ផ្តើមផ្តល់សេវាកម្មរថភ្លើងក្រោមដី ដែលចេញដំណើរពី Cat Linh ទៅកាន់ Ha Dong នៅខែមិថុនា ឆ្នាំ២០២១ ។ ប៉ុន្តែនៅចុងឆ្នាំ២០២១ ក្រុមហ៊ុនបានខាតទុនអស់ទឹកប្រាក់ប្រមាណ៣,៧ម៉ឺនលានដុង ។

ក្រោយមក ក្រុមហ៊ុន Hanoi Metro បានចាប់ផ្តើមទទួលប្រាក់ឧបត្ថម្ភពីខេត្ត តាមរយៈការលក់សំបុត្រនៅឆ្នាំ២០២២ ។ ប្រាក់ទាំងនេះអាចជួយដល់របាយការណ៍ហិរញ្ញវត្ថុរបស់ក្រុមហ៊ុនឱ្យល្អប្រសើរឡើងផងដែរ ។ ចំណែកតម្លៃសំបុត្ររថភ្លើងចាប់ពី៨.០០០ដុង ទៅ១៥.០០០ដុង គឺអាស្រ័យលើចម្ងាយផ្លូវ រីឯតម្លៃសំបុត្ររថភ្លើងប្រចាំខែគឺស្មើនឹង២០ម៉ឺនដុង ក្នុងនោះសម្រាប់កូនសិស្ស និងអ្នកធ្វើការនឹងចំណាយលើសំបុត្ររថភ្លើងត្រឹមតែពាក់កណ្តាលប៉ុណ្ណោះ ។

បច្ចុប្បន្ន នៅប្រទេសវៀតណាមមានរថភ្លើងអាកាសចំនួន៩ខ្សែ ដែលបានផ្តល់សេវាកម្មដល់អ្នកដំណើរ ។ រថភ្លើងអាកាសចេញដំណើរពី Cat Linh ទៅកាន់ Ha Dong បានរត់នៅលើផ្លូវចម្ងាយ១៣គីឡូម៉ែត្រ ក្នុងនោះមានស្ថានីយចំនួន១២កន្លែង ហើយរថភ្លើងអាកាសនីមួយៗអាចដឹកអ្នកដំណើរបានចំនួន៩៦០នាក់ ។ ក្រុមហ៊ុន Hanoi Metro មានផែនការផ្តល់សេវាកម្មធ្វើដំណើរតាមរថភ្លើងអាកាសដល់អ្នកដំណើរចំនួន១០,៦លាននាក់នៅឆ្នាំ២០២៣ នេះ ៕ ប្រភព ៖ AEC connect