តារាចម្រៀង វ៉ាន់ នីឡា កំពុងទទួលបានការកោតសរសើរយ៉ាងពីសំណាក់អ្នកលេងបណ្តាញសង្គមទៅលើបទចម្រៀង Cover ជាភាសាអង់គ្លេស ដោយបានលើកឡើងថានាងច្រៀងច្បាស់ល្អ សំឡេងពីរោះគួរឱ្យចង់ស្តាប់ម្តងហើយម្តងទៀត។
អ្នកមួយចំនួនធំជ្រាបមកហើយថា តារាចម្រៀង វ៉ាន់ នីឡា គឺជាតារាចម្រៀងរូបដែលមានភាពលេចធ្លោម្នាក់ក្នុងអាជីពសិល្បៈ។ ប៉ុន្តែដោយសារមានបញ្ហាផ្ទាល់ខ្លួននាងបានដកខ្លួនចេញពីវិស័យសិល្បៈអស់រយៈពេលជាច្រើនឆ្នាំ។ យ៉ាងណា ប៉ុន្មានឆ្នាំចុងក្រោយនេះ វ៉ាន់ នីឡា បានវិលមកប្រឡូកក្នុងជីពសិល្បៈវិញនិងលេចវត្តមានតាមកម្មវិធីផ្សេងៗ រីឯប្រជាប្រិយភាពរបស់តារាចម្រៀងរូបនេះនៅទទួលបានការគាំទ្រគួរឱ្យកត់សម្គាល់។
នាពេលថ្មីៗនេះ អ្នកលេងបណ្តាញសង្គមជាច្រើនបានផ្ទុះការចាប់អារម្មណ៍ទៅលើ វ៉ាន់ នីឡា ក្រោយពីចម្រៀងរូបនេះច្រៀងលេងកម្សាន្តបទជាភាសាអង់គ្លេសមានចំណងជើងថា «Happier» រហូតផ្ទុះការគាំទ្របានសំណូមពរឱ្យនាងច្រៀងបទផ្សេងទៀត។ តារាចម្រៀងរូបនេះ មិនឱ្យអ្នកគាំទ្រខកចិត្តនាងបានបកស្រាយបទ «Million reason » យ៉ាងខ្លីជូនតាមសំណូមពរអ្នកគាំទ្រ។
អ្នកលេងបណ្តាញសង្គមបានលើកឡើងថា តារាចម្រៀងរូបនេះច្រៀងបទជាភាសាអង់គ្លេសបានពីរោះណាស់ ត្រូវតុងច្បាស់ល្អស្តាប់ហើយជក់ចិត្ត ពីរោះដូចចាក់ឌីស។ អ្នកខ្លះទៀតក៏បានចំអន់ វ៉ាន់ នីឡា ក្នុងន័យលេងសើចថាច្រៀងពីរោះហើយច្បាស់ចឹងប្រយ័ត្ន ជាប់ copyright ដោយតារារូបនេះតបវិញក្នុងន័យលេងសើចថា «អត់ទេ មានអីជាប់»។
គួរបញ្ជាក់ផងដែរថា វ៉ាន់ នីឡា ត្រូវមហាជនស្គាល់យ៉ាងទូលំទូលាយកាលតារាចម្រៀងរូប នេះចាប់ដៃគូជាមួយ លោក ម៉ានិត នៅក្នុងផលិតកម្ម Pleng record និងល្បីតាមរយៈបទចម្រៀងមានដូចជា «ស្នេហ៍ជិតផ្ទះ» «មនុស្សបងធុញវិលវិញបានទេ?» និងបទ «ស្រលាញ់អ្នកមុនរៀបការអ្នកក្រោយ» ព្រមទាំងបទចម្រៀងជាច្រើនទៀត៕
