ប្រទេសថៃ ៖ លោក Pita Limjaroenrat មេដឹកនាំគណបក្សកាវក្លៃបានផ្តល់បទសម្ភាសន៍ជាមួយសារព័ត៌មាន ក្រោយពីលោកបញ្ចប់ការប្រជុំពិភាក្សា និងចូលរួមទទួលទានអាហារជាមួយមេដឹកនាំគណបក្សនយោបាយចំនួន៥ ថា ការប្រជុំពិភាក្សានៅថ្ងៃទី១៧ ខែឧសភា មានគោលជំហរច្បាស់លាស់មួយ ហើយលោកពេញចិត្តក្នុងការជជែកពិភាក្សាគ្នានេះ ។ ចំណែកបរិយាកាសការប្រជុំវិញដំណើរការទៅដោយរលូន ហើយវាបង្ហាញពីភាពច្បាស់លាស់ក្នុងការចូលរួមបង្កើតរដ្ឋាភិបាល ។ចំណែកការបារម្ភអំពីស្ថិរភាពរបស់រដ្ឋាភិបាល លោក Pita Limjaroenrat លើកឡើងថា សូមឱ្យមានទំនុកចិត្តលើការឯកភាពគ្នារបស់គណបក្សផ្សេងៗ និងភាពច្បាស់លាស់ក្នុងការបំពេញការងារនេះ ។ លោកបន្តថា សូមឱ្យពលរដ្ឋទាំងអស់សប្បាយចិត្ត ហើយគ្មានអ្វីដែលពលរដ្ឋត្រូវបារម្ហនោះទេ ដោយលោកនឹងព្យាយាមធ្វើឱ្យមានស្ថិរភាពខ្ពស់ក្នុងការដឹកនាំប្រទេស និងឆាប់រហ័សបំផុត ។ រីឯភាគីមួយចំនួនបារម្ភពីហេតុការណ៍នយោបាយមិនល្អផ្សេងៗ លោកសូមបញ្ជាក់ថា គ្មានទេ ។

ក្រៅពីនេះ លោក Pita Limjaroenrat បានបង្ហោះរូបភាព ព្រមទាំងខ្លឹមសារនៅក្នុង Instagram របស់លោកថា ៖ «ការបង្កើតរដ្ឋាភិបាលរបស់ខ្ញុំ គឺមានការឯកភាពគ្នា ច្បាស់លាស់ និងមានផែនការជាក់ស្តែង ។ សូមឱ្យពលរដ្ឋទាំងអស់ សង្គមស៊ីវិល ក្រុមហ៊ុនអាជីវកម្ម និងវិនិយោគិនសប្បាយចិត្តសម្រាប់ស្ថិរភាព និងសក្តានុពលរបស់ប្រទេសថៃ» ។

ចំណែកលោក Chonnan Srikaew មកពីគណបក្សភឿថៃ បាននិយាយទៅកាន់ក្រុមអ្នកសារព័ត៌មានថា មាន២គណបក្សទៀតនឹងចូលរួមបង្កើតរដ្ឋាភិបាល គឺគណបក្សផ្លាំងសាំងឃុមម៉ៃ ចំនួន១អាសនៈ និងគណបក្សភឿថៃរួមផ្លាំង ចំនួន២អាសនៈ ។ គណបក្សទាំងពីរនេះបានទំនាក់ទំនងផ្ទាល់ទៅកាន់មេដឹកនាំគណបក្សកាវក្លៃ លោក Pita Limjaroenrat ដើម្បីសុំចូលរួមបង្កើតរដ្ឋាភិបាល ដែលធ្វើឱ្យពេលនេះ មានគណបក្សនយោបាយចូលរួមបង្កើតរដ្ឋាភិបាលចំនួន៨គណបក្ស និងមាន៣១៣អាសនៈ ៕ ប្រភព ៖ Mono News

ប្រទេសថៃ ៖ កាលពីថ្ងៃទី១៧ ខែឧសភា គណបក្សភូមិចៃថៃបានចេញសេចក្តីថ្លែងការណ៍មួយមិនគាំទ្រនាយករដ្ឋមន្ត្រីមកពីគណបក្សកាវក្លៃ ដោយសារគណបក្សនេះមានគោលនយោបាយធ្វើវិសោធនកម្ម ឬលុបចោលច្បាប់ព្រហ្មទណ្ឌ មាត្រា១១២ ។ ខ្លឹមសារក្នុងសេចក្តីថ្លែងការណ៍បញ្ជាក់ថា គណបក្សភូមិចៃថៃសូមជម្រាបថា គោលជំហររបស់គណបក្សភូមិចៃថៃ គឺមិនចូលរួមបង្កើតរដ្ឋាភិបាលជាមួយគណបក្សនយោបាយណាដែលមានគោលនយោបាយធ្វើវិសោធនកម្ម ឬលុបចោលច្បាប់ព្រហ្មទណ្ឌ មាត្រា១១២ ទេ ។ នេះជាគោលជំហររបស់គណបក្សភូមិចៃថៃ ដែលមេដឹកនាំគណបក្សនេះធ្លាប់បានថ្លែងទៅកាន់មហាជនកាលពីពេលកន្លងមក ។

គោលជំហរចម្បងរបស់គណបក្សភូមិចៃថៃ គឺមិនអាចផ្លាស់ប្តូរ ឬទាមទារបានទេ ។ ហេតុនេះ គណបក្សភូមិចៃថៃមិនគាំទ្របេក្ខជននាយករដ្ឋមន្ត្រីរបស់គណបក្សនយោបាយដែលមានគោលនយោបាយធ្វើវិសោធនកម្ម ឬលុបចោលច្បាប់ព្រហ្មទណ្ឌ មាត្រា១១២ ទេ ។ ការអំពាវនាវ ការគំរាមកំហែង និងដាក់សម្ពាធមកលើគណបក្សភូមិចៃថៃឱ្យគាំទ្របេក្ខជននាយករដ្ឋមន្ត្រីរបស់គណបក្សនយោបាយ ដែលមានគោលនយោបាយធ្វើវិសោធនកម្ម ឬលុបចោលច្បាប់ព្រហ្មទណ្ឌ មាត្រា១១២ នឹងមិនអាចធ្វើឱ្យគណបក្សភូមិចៃថៃ និងសមាជិករបស់គណបក្សផ្លាស់ប្តូរគោលជំហរបានទេ ។

ហេតុនេះ បើការបង្កើតរដ្ឋាភិបាលដែលមានគោលនយោបាយធ្វើវិសោធនកម្ម ឬលុបចោលច្បាប់ព្រហ្មទណ្ឌ មាត្រា១១២ ទទួលជោគជ័យនោះ គណបក្សភូមិចៃថៃនឹងធ្វើជាគណបក្សប្រឆាំងដើម្បីត្រួតពិនិត្យការងាររបស់រដ្ឋាភិបាលសម្រាប់ជាផលប្រយោជន៍របស់ពលរដ្ឋ និងការពារស្ថាប័នសំខាន់របស់ជាតិឱ្យអស់ពីសមត្ថភាព ។

គណបក្សភូមិចៃថៃសូមអំពាវនាវឱ្យគណបក្សមានសំឡេងគាំទ្រច្រើន គោរព និងស្តាប់គណបក្សមានសំឡេងគាំទ្រតិចទៅតាមគោលការណ៍ប្រជាធិបតេយ្យ មិនមែនគំរាមកំហែង និងដាក់សម្ពាធឱ្យធ្វើតាមតម្រូវការរបស់គណបក្សមានសំឡេងគាំទ្រច្រើនទេ ។ គណបក្សសូមអំពាវនាវឱ្យគណបក្សនយោបាយ និងសមាជិកគណបក្ស ដែលដាក់សម្ពាធឱ្យគណបក្សភូមិចៃថៃគាំទ្របេក្ខជននាយករដ្ឋមន្ត្រីមកពីគណបក្ស ដែលមានគោលនយោបាយធ្វើវិសោធនកម្ម ឬលុបចោលច្បាប់ព្រហ្មទណ្ឌ មាត្រា១១២ បានបង្ហាញពីគោលជំហរការធ្វើវិសោធនកម្ម ឬលុបចោលច្បាប់ព្រហ្មទណ្ឌ មាត្រា១១២ របស់គណបក្សលោកឱ្យពលរដ្ឋថៃដឹងផង ។

គណបក្សភូមិចៃថៃបញ្ជាក់ថា ខ្លួនជាគណបក្សនយោបាយសំខាន់មួយដែលបំពេញតួនាទីការពារស្ថាប័នសំខាន់របស់ជាតិ ។ ដូច្នេះ គណបក្សភូមិចៃថៃនឹងបំពេញតួនាទីនេះសម្រាប់ពលរដ្ឋទាំងអស់ មិនថាគណបក្សភូមិចៃថៃនឹងស្ថិតក្នុងឋានៈអ្វីក៏ដោយ ៕ ប្រភព ៖ Thairath

បរទេស៖ កាលពីថ្ងៃទី១៧ ខែឧសភា តម្លៃប្រាក់យន់នៅក្នុងទីផ្សារអន្តរជាតិបានធ្លាក់ចុះ ០.២% ធៀបនឹង USD ដែលនេះជាតម្លៃទាបបំផុតក្នុងរយៈពេល ៥ ខែចុងក្រោយនេះ ដោយសារតែទិន្នន័យសេដ្ឋកិច្ចចិនមិនសូវមានសុទិដ្ឋិនិយមក្នុងសប្តាហ៍នេះ។
សរុបចាប់តាំងពីដើមឆ្នាំមក ប្រាក់យន់បានធ្លាក់ចុះ ១.២% ដូច្នោះហើយក្នុង ១ដុល្លារស្មើនឹង ៧ យន់។ ប៉ុន្តែនៅក្នុងទីផ្សារប្រទេសចិន តម្លៃនៃរូបិយប័ណ្ណនៅថ្ងៃទី១៧ ខែឧសភា នេះក៏បានធ្លាក់ចុះ ០.២% មកនៅត្រឹមជាង ៦ យន់ក្នុងមួយដុល្លារវិញ។

រូបិយប័ណ្ណរបស់ប្រទេសចិនបានធ្លាក់ចុះដោយសារតែ ទិន្នន័យខែមេសា ជាបន្តបន្ទាប់ ដូចជាទិន្នផលរោងចក្រ ការលក់រាយ ការវិនិយោគលើទ្រព្យសកម្មថេរបានកើនឡើងយឺតជាងការរំពឹងទុក។ ក្រៅពីនេះ ប្រាក់យន់ក៏មានទំនោរធ្លាក់ចុះក្នុងត្រីមាសនេះផងដែរ ដោយសារលំហូរមូលធនចាកចេញ ហើយប្រជាជនធ្វើដំណើរទៅក្រៅប្រទេសបានកើនឡើង។កាលពីខែមីនា អភិបាលធនាគារកណ្តាលនៃប្រទេសចិន PBOC លោក Yi Gang បាននិយាយថា ៧ យន់ក្នុងមួយដុល្លារមិនមែនជាឧបសគ្គផ្លូវចិត្តសម្រាប់រូបិយប័ណ្ណទៀតទេ។ ហេតុផលគឺដោយសារយន្តការអត្រាប្តូរប្រាក់កាន់តែមានភាពបត់បែន ហើយការប្រែប្រួលមិនមែនជាបញ្ហាធំសម្រាប់អាជីវកម្ម ឬគ្រួសារនោះទេ។ កាលពីខែមេសា លោកបាននិយាយថា ប្រទេសចិនបានបញ្ឈប់ការជ្រៀតជ្រែកក្នុងទីផ្សាររូបិយប័ណ្ណ។ ប្រសិនបើតម្លៃនៃរូបិយប័ណ្ណនេះធ្លាក់ចុះទាបពេក PBOC ក៏មានវិធីជាច្រើនដើម្បីទប់ទល់នឹងការធ្លាក់ចុះនេះផងដែរ៕

ប្រភព៖vnexpress

បរទេស៖ កែវយឺតអវកាស James Webb បានរកឃើញចំហាយទឹកជុំវិញផ្កាយដុះកន្ទុយដ៏កម្រមួយនៅក្នុងខ្សែក្រវាត់អាចម៍ផ្កាយរវាងភពព្រហស្បតិ៍ និងភពអង្គារ។

យោងតាម Space នៅថ្ងៃទី ១៦ ខែឧសភា បានរកឃើញរបកគំហើញថ្មី ដែលជារបកគំហើញបែបវិទ្យាសាស្ត្រ ដោយកែវយឺតអវកាស James Webb បានសម្គាល់ឧស្ម័នជាលើកដំបូង ក្នុងករណីនេះ ចំហាយទឹកត្រូវបានរកឃើញជុំវិញផ្កាយដុះកន្ទុយ ២៣៨P/Read។ នេះគឺមានសារៈសំខាន់ខ្លាំងណាស់ព្រោះវាអាចបង្ហាញថាទឹកនៅក្នុងប្រព័ន្ធព្រះអាទិត្យដំបូងត្រូវបានរក្សាទុកជាទឹកកកនៅក្នុងខ្សែក្រវ៉ាត់អាចម៍ផ្កាយដ៏សំខាន់។

ការរកឃើញនៃចំហាយទឹកនៅជុំវិញផ្កាយដុះកន្ទុយ ២៣៨P/Read មានទីតាំងនៅខ្សែក្រវាត់អាចម៍ផ្កាយសំខាន់នៃប្រព័ន្ធព្រះអាទិត្យ ជួយគាំទ្រទ្រឹស្តីដែលថាទឹកគឺជាធាតុផ្សំសំខាន់នៃជីវិតត្រូវបានដឹកដោយផ្កាយដុះកន្ទុយពីអវកាសមកផែនដី។
លោក Stefanie Milam សហអ្នកនិពន្ធនៃការស្រាវជ្រាវបាននិយាយថា យើងមិនប្រាកដទេថា តើទឹកនេះកើតមកដោយរបៀបណា” ។ ការយល់ដឹងអំពីប្រវត្តិនៃការចែកចាយទឹកនៅក្នុងប្រព័ន្ធព្រះអាទិត្យនឹងជួយ យើងយល់ពីប្រព័ន្ធភពផ្សេងទៀត ហើយវាយតម្លៃថាតើវាអាចមានភពដូចផែនដីដែរឬអត់?

បន្ទាប់មក ក្រុមការងារមានគោលបំណងសង្កេតមើលផ្កាយដុះកន្ទុយ ២៣៨P/Read ដើម្បីរកមើលថាតើមានផ្កាយដុះកន្ទុយកម្រណាខ្លះដែលស្រដៀងគ្នា ហើយមានសមាសភាពដូចគ្នាដែរឬទេ។ ដើម្បីធ្វើដូច្នេះបាន ពួកគេទំនងជានឹងពិនិត្យមើលកាន់តែដិតដល់ជាមួយកែវយឺតអវកាស James Webb និងកែវយឺតផ្សេងទៀត ហើយពឹងផ្អែកលើកប៉ាល់ដើម្បីប្រមូលគំរូពីផ្កាយដុះកន្ទុយស្រាវជ្រាវបន្តទៀត៕

ប្រភព៖vnexpress

នៅក្នុងពិធីបិទជាផ្លូវការព្រឹត្តិការណ៍កីឡាអាស៊ីអាគ្នេហ៍លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះបានប្រកាសឱ្យដឹងថា កីឡាការិនី២រូបរួមមាន កីឡាការិនី ប៉ាល់ ឆរស្ម៊ី របស់កម្ពុជា និងកីឡាការិនី Ting Wn Quah របស់សិង្ហបុរី ក្លាយជាអត្តពលិកឆ្នើម ដែលអាចរកមេដាយច្រើនជាងគេជូនជាតិមាតុភូមិ។

កីឡាការិនីវ៉ូវីណាមកម្ពុជា ប៉ាល់ ឆរស្ម៊ី បានឈ្នះមេដាយសរុបចំនួន៦គ្រឿងតែម្នាក់ឯងរួមមាន៖ មាស ៤គ្រឿង, ប្រាក់ ១គ្រឿង ,សំរឹទ្ធ ១គ្រឿង។ ចំណែកឯ កីឡាការិនីហែលទឹកសិង្ហបុរី Ting Wn Quah វិញបានឈ្នះមេដាយសរុបចំនួន៨គ្រឿង ក្នុងនោះ មេដាយមាស ៦គ្រឿង និងប្រាក់ ២គ្រឿង។ ជាមួយគ្នានេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC ផ្តល់កិត្តិយសប្រគល់ពាន ជូនកីឡាការិនីទាំងពីររូបផងដែរ នៅក្នុងពិធីបិទកីឡាអាស៊ីអាគ្នេហ៍លើកទី៣២ ឆ្នាំ២០២៣ នាពហុកីឡដ្ឋានជាតិមរតតេជោកាលពីយប់មិញនេះ។

គួរបញ្ជាក់ផងដែរ ព្រឹត្តិការណ៍កីឡាអាស៊ីអាគ្នេហ៍ឆ្នាំ២០២៣ បានចាប់ផ្តើមជាផ្លូវការនៅថ្ងៃទី៥ ខែឧសភា និងបញ្ចប់នៅថ្ងៃទី១៧ ខែឧសភា ដោយកម្ពុជាទទួលបានមេដាយសរុបចំនួន ២៨២ គ្រឿង ក្នុងនោះទទួលមានមេដាយមាស ៨១គ្រឿង ប្រាក់ ៧៤គ្រឿង និងសំរឹទ្ធ១២៧គ្រឿង ខណៈប្រទេសវៀតណាមបានឈរនៅលេខរៀងទី១ ដែលទទួលបានមេដាយច្រើនជាងគេនៅក្នុងព្រឹត្តិការណ៍ស៊ីហ្គេមលើកនេះ៕

ប្រទេសកម្ពុជា ៖ ព្រឹត្តិការណ៍ប្រកួតកីឡាស៊ីហ្គេមលើកទី៣២ ដែលប្រទេសកម្ពុជាបានធ្វើជាម្ចាស់ផ្ទះ ដោយបើកការប្រកួតតាំងពីថ្ងៃទី៥ ខែឧសភា និងបានបិទការប្រកួតជាផ្លូវការនៅពហុកីឡដ្ឋានជាតិមរតកតេជោ នាទីក្រុងភ្នំពេញ កាលពីល្ងាចថ្ងៃទី១៧ ខែឧសភា ក្រោមអធិបតីភាពរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC ក្នុងការរៀបចំការប្រកួតកីឡាស៊ីហ្គេមលើកទី៣២នេះ បានប្រគល់ទង់តំណាងម្ចាស់ផ្ទះការប្រកួតកីឡាស៊ីហ្គេមទៅឱ្យមន្ត្រីតំណាងប្រទេសថៃ លោក Prawit Wongsuwan ជាប្រធានគណៈកម្មាធិការអូឡាំពិកប្រទេសថៃ ។

ការទទួលទង់ធ្វើជាម្ចាស់ផ្ទះការប្រកួតកីឡាស៊ីហ្គេមនេះ ក៏មានមន្ត្រីសំខាន់ៗរបស់ថៃផងដែរ ដូចជា លោក Kongsak Yodmanee អភិបាលនៃអាជ្ញាធរកីឡាថៃ, លោក Cherdkiat Atthakon ឯកអគ្គរាជទូតថៃប្រចាំទីក្រុងភ្នំពេញ, លោក Chatchart Sittipunt អភិបាលក្រុងបាងកក, លោក Niti Wiwatwanich អភិបាលរងខេត្តឈុនបុរី, លោក Jetsada Jitrat អភិបាលខេត្តសុងក្លា រួមទាំងលោក Prachum Boonthiam អភិបាលរងអាជ្ញាធរកីឡាថៃ ។

ក្នុងពិធីបិទការប្រកួតកីឡាស៊ីហ្គេមនេះ ប្រទេសកម្ពុជាបានសម្តែងនូវសិល្បៈប្រពៃណីរបស់ខ្លួន ដើម្បីអបអរដល់ការបញ្ចប់តួនាទីជាម្ចាស់ផ្ទះការប្រកួតកីឡាស៊ីហ្គេមនៅលើទឹកដីកម្ពុជា ដែលបានប្រព្រឹត្តទៅយ៉ាងមានមោទនភាព និងទាក់ទាញចំណាប់អារម្មណ៍ជាច្រើនពីភ្ញៀវជាតិ និងអន្តរជាតិ ។ ចំណែកប្រទេសថៃវិញបានសម្តែងរបាំឈ្មោះ «សួស្តី ស៊ីហ្គេម» ព្រមទាំងបានទទួលទង់តំណាងពីកម្ពុជាផងដែរ ដើម្បីធ្វើជាម្ចាស់ផ្ទះការប្រកួតកីឡាស៊ីហ្គេម លើកទី៣៣ នៅឆ្នាំ២០២៥ ។

ប្រទេសថៃបានសម្រេចជ្រើសរើសយកទីក្រុងបាងកក ខេត្តឈុនបុរី និងខេត្តសុងខ្លា សម្រាប់ធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣៣ ដែលប្រព្រឹត្តទៅចាប់ពីថ្ងៃទី៩-២០ ខែធ្នូ ឆ្នាំ២០២៥ ហើយខេត្តនគរាជសីមា នឹងក្លាយជាម្ចាស់ផ្ទះការប្រកួតកីឡាអាស៊ាន ប៉ារ៉ាហ្គេម (Asean Para Games) លើកទី១៣ ធ្វើចាប់ពីថ្ងៃទី២០-២៦ ខែមករា ឆ្នាំ២០២៦ ៕ ប្រភព ៖ khaosod

រដ្ឋធានីកៀវ៖ ដំណើរទស្សនកិច្ចរបស់ប្រធានាធិបតីអ៊ុយក្រែន ទៅកាន់បណ្ដាប្រទេសបស្ចិមលោក នៅក្នុងរយៈពេលប៉ុន្មានថ្ងៃកន្លងមកនេះ ក្រុងកៀវ រំពឹង ថា នឹងទទួលបានយន្ដហោះចម្បាំងដ៏ទំនើប ផលិតដោយសហរដ្ឋអាមេរិក ពីប្រទេសជាដៃគូ នៅលោកខាងលិច ហើយមេដឹកនាំនៅតំបន់អឺរ៉ុបជាច្រើនកំពុងតែពិភាក្សាគ្នា អំពីបញ្ហាយន្ដហោះនេះ។

សារព័ត៌មាន Al Jazeera បានចេញផ្សាយ កាលពីរសៀល ថ្ងៃពុធ ទី១៧ ខែឧសភា ថា លោករីស៊ី ស៊ូណាក់ (Rishi Sunak) នាយករដ្ឋមន្រ្ដីចក្រភពអង់គ្លេស និង លោក ម៉ាក រូតតេ (Mark Rutte) នាយករដ្ឋមន្រ្ដីហូល្លង់ដ៍ បានព្រមព្រៀងគ្នា បង្កើតសម្ពន្ធភាពចម្រុះអន្ដរជាតិមួយ សម្រាប់ផ្ដល់យន្ដហោះចម្បាំង ប្រភេទ F-16 ផលិតនៅសហរដ្ឋអាមេរិក ជាច្រើនគ្រឿង ជួយដល់ប្រទេសអ៊ុយក្រែន។ គ្រឿងចម្បាំងដ៏សំខាន់ប្រភេទនេះ គឺប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) កំពុងតែស្វែងរកនូវការគាំទ្រពីសម្ពន្ធមិត្តលោកខាងលិច អស់រយៈពេលជាយូរមកហើយ សម្រាប់ជួយដល់ប្រទេសរបស់គាត់ ដែលកំពុងតែប្រយុទ្ធនឹងកម្លាំងទាហានរុស្ស៊ី។

អ្នកនាំពាក្យ ការិយាល័យវិមានដោនីងស្ដ្រីត (Downing Street) របស់លោក ស៊ូណាក់ បានបញ្ជាក់ នៅក្នុងសេចក្ដីថ្លែងការណ៍ កាលពីថ្ងៃអង្គារ ក្រោយកិច្ចប្រជុំកំពូលរបស់ក្រុមប្រឹក្សាអឺរ៉ុប ស្ថិតក្នុងប្រទេសអ៊ីស្លង់ដ៍ (Iceland) ថា «លោកនាយករដ្ឋមន្រ្ដី ស៊ូណាក់ និង លោកនាយករដ្ឋមន្រ្ដី រូតតេ បានឯកភាពគ្នា ថា ពួកគាត់នឹងបង្កើតសម្ពន្ធភាពអន្ដរជាតិចម្រុះមួយ ដើម្បីផ្ដល់សមត្ថភាពប្រយុទ្ធតាមផ្លូវអាកាស ដោយគាំទ្រដល់បញ្ហាផ្សេងៗទៀត ចាប់ពីការហ្វឹកហ្វឺន រហូតដល់ការទិញយន្ដហោះ F-16 ជាច្រើនគ្រឿងផងដែរ។

សមាជិកភាគច្រើនរបស់អង្គការណាតូ នៅតំបន់អឺរ៉ុប នៅតែរក្សាជាចំហ អំពីលទ្ធភាពបញ្ជូនយន្ដហោះចម្បាំងរបស់ពួកគេ ប្រភេទ F-16 ទៅកាន់ប្រទេសអ៊ុយក្រែន ថ្វីបើប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានថ្លែង កាលពីខែមករា ថា សហរដ្ឋអាមេរិក នឹងមិនធ្វើដូច្នេះក្ដី។

បើតាមក្រុមអ្នកជំនាញការពារដែនអាកាស បានបញ្ជាក់ ថា យន្តហោះចម្បាំង F-16 ផលិតដោយសហរដ្ឋអាមេរិក នឹងផ្តល់ឱ្យនូវភាពខ្លាំងក្លាដល់អ៊ុយក្រែន ជាងកងទ័ពអាកាសរបស់រុស្ស៊ី។ ប៉ុន្តែប្រសិនបើរួមបញ្ចូលជាមួយមីស៊ីលដ៏មានអានុភាពខ្លាំង និង ព័ត៌មានគោលដៅ ដែលលោកខាងលិច នឹងត្រូវផ្តល់ឲ្យផង រឹតតែធ្វើឲ្យសមត្ថភាពវាយប្រហារតាមដែនអាកាសរបស់អ៊ុយក្រែន កាន់តែខ្លាំងឡើងបន្ថែមទៀត។ ប៉ុន្ដែសកម្មភាពបែបនេះ នឹងប្រថុយប្រថាន ចំពោះការអូសទាក់ទាញសម្ពន្ធមិត្តរបស់លោកខាងលិច ធ្លាក់ចូលទៅក្នុងសង្គ្រាមរបស់ក្រុងមូស្គូ ផងដែរ។

លោកនាយករដ្ឋមន្រ្ដី រូតតេ បានបញ្ជាក់ នៅលើបណ្ដាញសង្គមធ្វីធើរ ថា គាត់ និង លោក ស៊ូណាក់ បាននិយាយគ្នា អំពីបញ្ហាជាច្រើន ដោយយើងកំពុងតែធ្វើការរួមគ្នា ហើយបន្ដចូលរួមគាំទ្រដល់អ៊ុយក្រែន នៅក្នុងការប្រឈមមុខ ជាមួយនឹងការលុកលុយរបស់រុស្ស៊ី។ បណ្ដាប្រទេសលោកខាងលិច បានប្រុងប្រយ័ត្ន ចំពោះការផ្គត់ផ្គង់យន្តហោះចម្បាំងទំនើបៗ ជួយដល់ប្រទេសអ៊ុយក្រែន ដោយសារតែមានការព្រួយបារម្ភ ថា ការប្រើប្រាស់យន្ដហោះចម្បាំងដ៏ទំនើបរបស់ពួកគេ អាចនឹងធ្វើឲ្យសង្គ្រាមនេះ កាន់តែរីករាលដាលធំឡើងបន្ថែមទៀត។

ស្របគ្នានេះដែរ លោក អេមម៉ាញ៉ែល ម៉ាក្រុង (Emmanuel Macron) ប្រធានាធិបតីបារាំង កាលពីថ្ងៃចន្ទ ក៏បានបញ្ជាក់ ថា ប្រទេសរបស់គាត់ បានបើកទ្វារចំហ សម្រាប់ការបណ្ដុះបណ្ដាល ដល់អាកាសយានិកយន្ដហោះចម្បាំងរបស់អ៊ុយក្រែន បើទោះជាគាត់មិនរាប់បញ្ចូលជាមួយនឹងការបញ្ជូនយន្តហោះចម្បាំង ទៅឱ្យកងទ័ពអ៊ុយក្រែន យ៉ាងណាក្ដី។

ការអះអាងរបស់មេដឹកនាំរបស់ប្រទេសមហាអំណាចទាំងនេះ បានកើតឡើង ស្របពេលលោកប្រធានាធិបតីអ៊ុយក្រែន បានធ្វើដំណើរទៅកាន់តំបន់អឺរ៉ុប រួមមាន ហូល្លង់ដ៍ បារាំង អាល្លឺម៉ង់ ចក្រភពអង់គ្លេស កាលពីប៉ុន្មានថ្ងៃមុនេះ។ ការផ្គត់ផ្គង់ F-16 នេះ កំពុងតែមានការពិភាក្សាគ្នាយ៉ាងល្អិតល្អន់ រវាងចក្រភពអង់គ្លេស ដាណាម៉ាក និង ប៊ែលហ្ស៊ិក ខណៈក្រុងអាមស្ទឺរដាម (Amsterdam) និង ក្រុងឡុងដ៍ ក៏កំពុងតែពិភាក្សាគ្នា អំពីបញ្ហាយន្ដហោះចម្បាំងនេះដែរ៕