បរទេស៖ អ្នកវិទ្យាសាស្ត្របានប្រើបច្ចេកទេសរូបភាពកម្រិតខ្ពស់ដើម្បីពិនិត្យត្បូងពេជ្រពីអាចម៍ផ្កាយ Diablo canyon ដែលពួកគេបានរកឃើញថាមិនមែនជាត្បូងធម្មតានោះទេ នេះបើយោងតាម IFL Science ដែលជាប្រភពព័ត៌មានវិទ្យាសាស្រ្តអន្តរជាតិ។

អាចម៍ផ្កាយ Diablo Canyon បានធ្លាក់ប្រហែល ៥០,០០០ ឆ្នាំមុន ដោយបង្កើតបានជារណ្ដៅភ្នំភ្លើង ដែលជារណ្ដៅមានឥទ្ធិពលបំផុតមួយរបស់ពិភពលោក។ ពេជ្រអាចម៍ផ្កាយ Diablo Canyon ពួកវាមានលក្ខណៈងាយស្រួលក្នុងការកែតម្រូវ ដែលមានសក្តានុពលសម្រាប់ប្រើប្រាស់ក្នុងឧបករណ៍អេឡិចត្រូនិក។

ពេជ្រដែលប្រើក្នុងគ្រឿងអលង្ការមានធាតុផ្សំនៃអាតូមកាបូនដែលមានរាងជាគូប នីមួយៗភ្ជាប់ជាមួយអាតូមបួនផ្សេងទៀត ជួនកាលត្រូវបានរំខានដោយធាតុផ្សេងទៀតដែលរួមចំណែកដល់ពណ៌។

ផ្ទុយទៅវិញ កាលពីឆ្នាំ ១៩៦៧ អ្នកស្រាវជ្រាវបានរកឃើញពេជ្រអាចម៍ផ្កាយ Lonsdaleite ដែលជាពេជ្របង្កើតចេញពីអាតូមកាបូនគឺជាត្បូងពេជ្រគូបដ៏កម្រមួយសម្រាប់ប្រើប្រាស់ជាគ្រឿងអលង្ការដ៏មានតម្លៃ។ ប៉ុន្តែទោះជាយ៉ាងណាក៏ដោយ ពេជ្រអាចម៍ផ្កាយ Diablo Canyon ដែលត្រូវបានគេរកឃើញថ្មីៗនេះ គឺជាត្បូងពេជ្រ ដែលត្រូវបានប្រើដើម្បីរចនាវត្ថុធាតុរឹង យ៉ាងល្អិតល្អន់ ដោយសន្យាថានឹងប្រើប្រាស់បានយ៉ាងទូលំទូលាយ ចាប់ពីសារធាតុសំណឹក អេឡិចត្រូនិច ណាណូមិក រហូតដល់បច្ចេកវិទ្យាឡាស៊ែរជាដើម៕ ប្រភព៖vnexpress

ប្រទេសថៃ ៖ កាលពីថ្ងៃទី១៩ ខែឧសភា លោក Chuwit Kamolvisit ជាអ្នកនយោបាយ និងអតីតសមាជិកសភាតំណាងរាស្ត្រប្រទេសថៃ បានធ្វើយុទ្ធនាការប្រឆាំងនឹងការលក់កញ្ឆាដោយសេរីនៅបរិវេណមុខសាលារៀនឯកជនមួយកន្លែងក្នុងតំបន់ស៊ីលុម ទីក្រុងបាងកក ។ លើសពីនេះ ក៏មានអាណាព្យាបាលសិស្សមកចូលរួមប្រឆាំងនឹងការលក់កញ្ឆានៅមុខសាលារៀនផងដែរ ។

អតីតសមាជិកសភាតំណាងរាស្ត្រ លោក Chuwit Kamolvisit លើកឡើងថា ការលក់កញ្ឆាយ៉ាងសេរីបែបនេះបង្ហាញពីការធ្វេសប្រហែសរបស់ក្រសួងសុខាភិបាល ដែលស្ថិតក្រោមការគ្រប់គ្រងរបស់លោក Anutin Charnvirakul ។ ពួកគេមិនបានពិចារណាពីពេលវេលា និងទីកន្លែងលក់កញ្ឆាទេ ហើយពួកគេមិនគួរជំរុញឱ្យមានការលក់កញ្ឆានៅមុខសាលារៀនបែបនេះទេ ។

លោកបន្តថា កន្លងមក ក្រសួងសុខាភិបាលធ្លាប់ប្រកាសថា ហាមលក់ភេសជ្ជៈមានជាតិអាល់កុល និងបង្កើតកន្លែងកម្សាន្តនៅជិតសាលារៀន ប៉ុន្តែហេតុអ្វីបានជាអនុញ្ញាតឱ្យហាងលក់កញ្ឆាមកលក់នៅមុខសាលារៀនទៅវិញ ហើយមិនមែនមានតែទីនេះមួយកន្លែងទេ ប៉ុន្តែនៅខេត្តខនកែន ក៏មានលក់ដែរ ។ ការគាំទ្រឱ្យមានការលក់កញ្ឆាយ៉ាងសេរីបែបនេះ គឺជាការបំផ្លាញសង្គម ។

លោក Chuwit Kamolvisit បញ្ជាក់ថា ក្រសួងសុខាភិបាលថៃត្រូវតែភ្ញាក់ពីដេក និងសូមឱ្យពិចារណាចេញច្បាប់ហាមឃាត់ ដោយសារប៉ូលិសមិនអាចធ្វើអ្វីបានទេ ព្រោះនេះជាតួនាទីរបស់ក្រសួងសុខាភិបាល ។ កន្លងមក ក្រសួងសុខាភិបាលបានហាមឃាត់ថា ហាមលក់កញ្ឆានៅជិតសាលារៀន និងវត្ត ។

ការលក់កញ្ឆានៅមុខសាលារៀនបានធ្វើឱ្យអាណាព្យាបាលសិស្សនៅទីនេះមិនពេញចិត្តជាខ្លាំង ព្រោះកូនសិស្សត្រូវដើរឆ្លងកាត់ហាងនេះ ហើយឃើញឧបករណ៍ប្រើប្រាស់ និងកញ្ឆាក្នុងហាង ។ អាណាព្យាបាលសិស្សលើកឡើងថា ពួកគេពិបាកពន្យល់កូនពីគ្រោះថ្នាក់នៃការប្រើប្រាស់កញ្ឆា ។

អាណាព្យាបាលសិស្សម្នាក់ដែលបានមកផ្តល់កម្លាំងចិត្តឱ្យលោក Chuwit Kamolvisit ធ្វើយុទ្ធនាការប្រឆាំងនឹងការលក់កញ្ឆានិយាយថា ហាងនេះបានបើកលក់កញ្ឆាតាំងពីខែកុម្ភៈ ឆ្នាំ២០២៣ មកម្ល៉េះ ។ អ្វីគួរឱ្យបារម្ភជាងនេះ គឺហាងនេះបិទបាំងត្រឹមតែកញ្ឆក់ភ្លឺថ្លា ដែលគេអាចមើលឃើញអ្នកចូលក្នុងហាង និងឧបករណ៍ផ្សេងៗ ។ ចំណែកអាណាព្យាបាលសិស្សម្នាក់ទៀតនិយាយថា គាត់បារម្ភពីផលវិបាកផ្សេងៗដែលនឹងកើតឡើង ដូចជា បើមានអ្នកជក់កញ្ឆានៅក្នុងហាង ហើយកើតសភាពខុសប្រក្រតី គឺវាអាចបង្កគ្រោះថ្នាក់ដល់សិស្សសាលាបាន ៕ ប្រភព ៖ Mono News

គម្រោង​ផ្លូវនាវាចរណ៍ និងប្រព័ន្ធភស្តុភារ​កម្មទន្លេបាសាក់ មាន​ប្រវែង​ប្រមាណ ១៨០គីឡូម៉ែត្រ ចាប់ផ្តើម​ពីចំណុចព្រែកតាកែវ​ទន្លេមេគង្គ ឆ្លងកាត់​តាមព្រែក​តាឯក​នៃទន្លេបាសាក់ រួច​ចូល​តាម​ព្រែក​តាហ៊ីង​នៃ​ទន្លេបាសាក់​ស្រុកកោះធំ និង​បន្តរហូតដល់​សមុទ្រខេត្តកែប ពោលគឺ​ត្រូវ​ឆ្លងកាត់​ខេត្ត​ចំនួន៤ រួមមាន ខេត្តកណ្តាល តាកែវ កំពត និងកែប។

គម្រោងផ្លូវទឹកថ្មីនេះ ត្រូវបានប៉ាន់ស្មានថា នឹងត្រូវចំណាយទុនវិនិយោគប្រមាណ ១៧០០លានដុល្លារអាមេរិក និងប្រើប្រាស់រយៈពេលសាងសង់ប្រមាណ ៤ឆ្នាំ។ គម្រោងនេះ នឹងជួយកាត់បន្ថយរយៈពេល និងចម្ងាយនៃការដឹកជញ្ជូននាពេលបច្ចុប្បន្ន ដែលត្រូវឆ្លងកាត់តាមកំពង់ផែកៃមែបរបស់វៀតណាមប្រមាណ ៦៩គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែក្រុងព្រះសីហនុ និងប្រមាណ ១៣៥គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែខេត្តកំពត។

គម្រោងនេះ នឹងផ្ដល់ផលចំណេញលើតម្លៃដឹកជញ្ជូនប្រមាណ ១៧០លានដុល្លារអាមេរិក សម្រាប់ទំនិញប្រភេទកុងតឺន័រ ២០ហ្វីត ស្មើនឹង (១TEUs) និងចំណេញប្រមាណ ២២៣លានដុល្លារអាមេរិក សម្រាប់ទំនិញប្រភេទកុងតឺន័រ ៤០ហ្វីត (២TEUs) ដែលតម្លៃនេះ គឺទាបជាងតម្លៃដឹកជញ្ជូននាពេលបច្ចុប្បន្នប្រមាណ ១៦%។

ការស្ថាបនាច្រាំងនៃផ្លូវនាវាចរណ៍នេះ នឹងប្រើប្រាស់វិធីសាស្ត្រចំនួនពីរប្រភេទដែលសមស្រប គឺការដាំស្មៅនៅក្នុងប្រឡាយនាវាចរណ៍ និងការរៀបចំច្រាំងទន្លេបាសាក់ចំណុចព្រែកតាឯក រហូតដល់ព្រែកតាហ៊ីង ដោយប្រើប្រាស់ Geotextile និងបាវខ្សាច់ Geobag សម្រាប់ការពារការបាក់ច្រាំង។ គម្រោងនេះនឹងសាងសង់សន្ទះផ្លូវនាវាចរណ៍ចំនួន ៣កន្លែង ដែលស្ថិតនៅខេត្តកណ្តាល ខេត្តតាកែវ និងខេត្តកែប សាងសង់ស្ពានចំនួន ១១កន្លែង៕

ប្រទេសជប៉ុន ៖ រដ្ឋាភិបាលជប៉ុននឹងទទួលយកកងទ័ពអ៊ុយក្រែន ដែលរងរ.បួសដោយសារសង្គ្រាមមកព្យាបាលនៅមន្ទីរពេទ្យកងទ័ពក្នុងទីក្រុងតូក្យូ ។ ការជួយព្យាបាលកងទ័ពអ៊ុយក្រែននេះ ក្នុងគោលបំណងជួយគាំទ្រប្រទេសអ៊ុយក្រែនតស៊ូការពារទឹកដីរបស់ខ្លួនពីការឈ្លានពានរបស់រុស្ស៊ី ។

សារព័ត៌មាន Japan Times បានចុះផ្សាយថា កងទ័ពអ៊ុយក្រែនដែលរងរបួសមួយចំនួននឹងត្រូវគេបញ្ជូនមកព្យាបាល និងព្យាបាលដោយចលនានៅមន្ទីរពេទ្យ Self-Defense Forces Center Hospital នៅទីក្រុងតូក្យូ ចាប់ពីដើមខែមិថុនា ឆ្នាំ២០២៣ ។ រដ្ឋាភិបាលជប៉ុនចង់បង្ហាញពីគោលជំហររបស់ខ្លួនក្នុងការគាំទ្រប្រទេសអ៊ុយក្រែន មុនកិច្ចប្រជុំកំពូលមេដឹកនាំប្រទេស G7 ដែលចាប់ផ្តើមនៅថ្ងៃទី២០ ខែឧសភា ហើយប្រទេសជប៉ុនត្រូវធ្វើជាម្ចាស់ផ្ទះ ។

សារព័ត៌មានចុះផ្សាយបន្តថា ផែនការទទួលព្យាបាលកងទ័ពអ៊ុយក្រែនដែលរងរ.បួសដោយសារសង្គ្រាមនេះ នឹងរួមបញ្ចូលទាំងកងទ័ពរងរ.បួសដោយសារគ្រាប់មីនផងដែរ ដោយសាររដ្ឋាភិបាលអ៊ុយក្រែនបានស្នើសុំឱ្យប្រទេសជប៉ុនជួយព្យាបាលកងទ័ពរបស់ខ្លួន ។

ជាមួយគ្នានេះ សហរដ្ឋអាមេរិក និងប្រទេសផ្សេងទៀតនៅអឺរ៉ុបបានបញ្ជូនរថក្រោះ និងយន្តហោះបណ្តេញឱ្យអ៊ុយក្រែន ប៉ុន្តែច្បាប់ដ៏តឹងរ៉ឹងលើការបញ្ជូនអាវុធរបស់ប្រទេសជប៉ុន បានធ្វើឱ្យរដ្ឋាភិបាលក្រុងតូក្យូធ្វើបានត្រឹមតែបញ្ជូនជំនួយផ្សេងៗទៅកាន់អ៊ុយក្រែន ដូចជា អាវក្រោះការពារគ្រាប់ មួកសុវត្ថិភាព និងដ្រូន ជាដើម ។

ទោះយ៉ាងណា ការទទួលព្យាបាលកងទ័ពអ៊ុយក្រែន គឺត្រូវធ្វើឱ្យបានគ្រប់ជ្រុងជ្រោយ ព្រោះបើកងទ័ពទាំងនេះជាសះស្បើយ ហើយត្រូវគេបញ្ជូនទៅសមរភូមិជួរមុខម្តងទៀត ជប៉ុនអាចត្រូវគេមើលថា ជាប្រទេសមួយដែលបានបញ្ជូនកងកម្លាំងប្រយុទ្ធទៅឱ្យអ៊ុយក្រែន ។ លើសពីនេះ រដ្ឋាភិបាលជប៉ុនត្រូវពិចារណាថា នឹងទទួលបន្ទុកថ្លៃព្យាបាលកងទ័ពបានច្រើនឬតិចកម្រិតណា ។ រីឯប្រទេសប៉ូឡូញ និងប្រទេសជាច្រើនទៀត ក៏មានគម្រោងជួយកងទ័ពអ៊ុយក្រែនដូចប្រទេសជប៉ុនដែរ ។

គួរបញ្ជាក់ថា មន្ទីរពេទ្យ Self-Defense Forces Center Hospital ស្ថិតនៅក្រោមការគ្រប់គ្រងរបស់កងកម្លាំងការពារផ្លូវគោក ផ្លូវទឹក និងផ្លូវអាកាស ។ បច្ចុប្បន្ន មន្ទីរពេទ្យនេះបានទទួលព្យាបាលជំងឺដូចជា វះកាត់កែសម្ឆស្ស, វះកាត់ទូទៅ និងស្តារនីតិសម្បទា ៕ ប្រភព ៖ Around the World

អ៊ីស្តាក្រាម (Instagram) គឺជាបណ្តាញសង្គមដ៏ល្បីល្បាញមួយនៅលើពិភពលោក ដែល បច្ចុប្បន្នមានអ្នកប្រើប្រាស់កម្មវិធីនេះជាង ២ ពាន់លាននាក់ ហើយអាចរកចំណូលបានតាមរយៈការផុសរូបភាពផ្សេងៗផងដែរ ។ ដូច្នេះហើយតើតារាពិភពលោកណាខ្លះដែលរកចំណូលពីអ៊ីស្តាក្រាមច្រើនជាងគេបំផុតក្នុងឆ្នាំនេះ?

១.Cristiano Ronaldo៖ គឺជាកំពូលតារាបាល់ទាត់ពិភពលោក ដែលមានអ្នកតាមដាន គណនី Instagram របស់គាត់ចំនួន ៥៨៣ លាននាក់។ ហើយក្នុង ១ រូបគាត់រកចំណូលបាន ៣.៩២ លានដុល្លារអាមេរិក។

២.Leo Messi៖ គឺជាកំពូលតារាបាល់ទាត់ពិភពលោក ដែលមានអ្នកតាមដាន គណនី Instagram របស់គាត់ចំនួន ៤៦២ លាននាក់។ ដែលក្នុង ១ រូបគាត់រកចំណូលបាន ២.៩៤ លានដុល្លារអាមេរិក។

៣.Kylie Jenner៖ គឺជាកំពូលតារាម៉ូដែលពិភពលោក ដែលមានអ្នកតាមដាន គណនី Instagram របស់គាត់ចំនួន ៣៩០ លាននាក់។ នឹងរកចំណូលបាន ១.៨ លានដុល្លារអាមេរិក ក្នុង ១ រូប។

៤.Dwayne Johnson៖ ៖ គឺជាកំពូលតារាហូលីវូតរបស់ពិភពលោក ដែលមានអ្នកតាមដាន គណនី Instagram របស់គាត់ចំនួន ៣៧៩ លាននាក់។ ដែលក្នុង ១ រូបគាត់រកចំណូលបាន ១.៧១ លានដុល្លារអាមេរិក។

៥.Selena Gomez៖ គឺជាកំពូលតារាចម្រៀងពិភពលោក ដែលមានអ្នកតាមដាន គណនី Instagram របស់គាត់ចំនួន ៤១៦ លាននាក់។ នឹងរកចំណូលបាន ១.៦ លានដុល្លារអាមេរិក ក្នុង ១ រូប ៕