បរទេស៖ នាយករដ្ឋមន្ត្រីរុស្ស៊ី លោក Mikhail Mishustin បាននិយាយថា ទំហំទីផ្សារពាណិជ្ជកម្មរុស្ស៊ី-ចិន ត្រូវបានគេរំពឹងថានឹងឈានដល់កម្រិតកំពូលថ្មីចំនួន ២០០ ពាន់លានដុល្លារនៅឆ្នាំនេះ។
កាលពីថ្ងៃទី២៣ ខែឧសភា ប្រភពព័ត៌មាន Global Times បានដកស្រង់សម្ដីរបស់លោក Mishustin ក្នុងវេទិកាធុរកិច្ចរុស្ស៊ី-ចិន ក្នុងទីក្រុងសៀងហៃ ដែលលោក Mishustin បាននិយាយថា ប្រទេសចិននឹងទិញផលិតផលកសិកម្មជាច្រើនពីប្រទេសរុស្ស៊ី ហើយអាជីវកម្មរបស់ប្រទេសរុស្ស៊ី និងចិន កំពុងមានការកើនឡើងយ៉ាងខ្លាំងក្នុងទីផ្សារអន្តរជាតិនៅឆ្នាំនេះ។

សេដ្ឋកិច្ចរុស្ស៊ី-ចិន កាន់តែមានភាពស្និទ្ធស្នាលជាមួយគ្នា បន្ទាប់ពីជម្លោះនៅអ៊ុយក្រែនផ្ទុះឡើង ដែលជំរុញឱ្យលោកខាងលិចដាក់ទណ្ឌកម្មលើទីក្រុងម៉ូស្គូ។ កាលពីឆ្នាំមុន ពាណិជ្ជកម្មរវាងប្រទេសទាំងពីរបានកើនឡើងជិត ៣០ ភាគរយដល់ចំនួន ១៩០ ពាន់លានដុល្លារ ដែលជំរុញដោយវិស័យថាមពលជាចម្បង។ នៅឆ្នាំនេះ ពាណិជ្ជកម្មទ្វេភាគីនៅតែកើនឡើង ៤១% ក្នុងរយៈពេល ៤ ខែដំបូងនៃឆ្នាំនេះ នេះបើយោងតាមទិន្នន័យគយរបស់ចិន។

លោក Mishustin បាននិយាយថាទំនាក់ទំនងរវាងប្រទេសទាំងពីរ “គឺស្ថិតក្នុងកម្រិតខ្ពស់គ្រប់ពេលវេលា” ។ លោកបានបញ្ជាក់ថា រុស្ស៊ី និងចិន «តែងតែគោរពផលប្រយោជន៍គ្នាទៅវិញទៅមក»។ លោកនាយករដ្ឋមន្ត្រីរុស្ស៊ី ក៏បានបន្តទៀតថា ប្រទេសទាំងពីរនឹងបង្កើនកិច្ចសហប្រតិបត្តិការក្នុងវិស័យហិរញ្ញវត្ថុ។ នៅក្នុងវេទិកានេះ នាយកប្រតិបត្តិធនាគារ VTB លោក Andrey Kostin បាននិយាយថា ធនាគារកណ្តាលនៃប្រទេសរុស្ស៊ីបានស្តុកទុកប្រាក់យន់ ហើយកំពុងផ្តល់ប្រាក់យន់ និងរូប្លែជាង ៧០% នៃពាណិជ្ជកម្មរវាងប្រទេសទាំងពីរ៕ ប្រភព៖vnexpress

វៀតណាម៖ វៀតណាមស្ថិតក្នុងក្រុមប្រទេសដែលមានចំនួនកម្មវិធីច្រើនជាងគេបំផុតដែល Apple លុបចេញក្នុងពិភពលោក ដោយសារតែការក្លែងបន្លំ និងបទពិសោធន៍មិនល្អ។
Apple បានចេញផ្សាយ របាយការណ៍តម្លាភាព App Store ជាលើកដំបូង ដោយបង្ហាញព័ត៌មានជាច្រើនអំពីប្រតិបត្តិការរបស់កម្មវិធីនីមួយៗក្នុងឆ្នាំ ២០២២។ ពត៌មានមួយក្នុងចំណោមព័ត៌មានដែលបានលើកឡើងភាគច្រើនគឺការដកចេញនូវកម្មវិធីបំពានលើវេទិកា ឬតាមសំណើរបស់រដ្ឋាភិបាលជាតិ។

ដូច្នោះហើយ កម្មវិធីរបស់ Apple មានប្រហែល ១.៧៨ លានកាលពីឆ្នាំមុន។ ដែលបច្ចុប្បន្នមានត្រឹមតែជាង ១.៧៧ លានកម្មវិធីប៉ុណ្ណោះ។ ប្រទេសវៀតណាមមានកម្មវិធីចំនួន ៨,៤៦២ ត្រូវបានលុបដោយហេតុផលផ្សេងៗគ្នា ដែលភាគច្រើនជាការបំពានគោលការណ៍រចនាជាមួយនឹងកម្មវិធីចំនួន ៤,៦៥៧ ដែលជាប់ចំណាត់ថ្នាក់ទីប្រាំមួយនៅក្នុងពិភពលោក។ ហើយហេតុផលនៃការបន្លំមានចំនួន ៣,៦២៦ ដែលជាប់ចំណាត់ថ្នាក់លេខ ២ នៅលើពិភពលោក។

របាយការណ៍តម្លាភាពរបស់ក្រុមហ៊ុន Apple ក៏បង្ហាញផងដែរថា វៀតណាមស្ថិតនៅក្នុងប្រទេសកំពូលទាំង ១០ ទាក់ទងនឹងចំនួនអ្នកអភិវឌ្ឍន៍ដែលបានត្អូញត្អែរបន្ទាប់ពីកម្មវិធីត្រូវបានដកចេញដោយមាន ៤១៦ ដង។ ទីផ្សារដែលមានចំនួនកម្មវិធីច្រើនបំផុតដែលត្រូវបានដកចេញពី App Store របស់ Apple គឺប្រទេសចិនដែលមានជាង ៤១ ពាន់ សហរដ្ឋអាមេរិកមានច្រើនជាង ៣២ ពាន់ និងប្រទេសឥណ្ឌាច្រើនជាង ១០ ពាន់៕ ប្រភព៖Cafef.com

ប្រទេសចិន ៖ សារព័ត៌មានចិនបានចុះផ្សាយថា ប្រទេសចិនត្រៀមដំណើរការរថភ្លើងល្បឿនលឿនឆ្លងសមុទ្រដំបូងគេ ដែលចាកចេញពីទីក្រុង Fuzhou ទៅកាន់ទីក្រុង Xiamen នៅខែកញ្ញា ឆ្នាំ២០២៣ ។ បច្ចុប្បន្ន មន្ត្រីជំនាញរថភ្លើងកំពុងតែសាកល្បងដំណើរការរថភ្លើងនេះ ដោយបានបើកបរចេញពីស្ថានីយរថភ្លើង Fuzhou ដែលស្ថិតនៅភាគខាងកើតខេត្ត Fujian ។

មន្ត្រីជំនាញរថភ្លើងលើកឡើងថា ការសាងសង់ផ្លូវរថភ្លើងល្បឿនលឿនពីទីក្រុង Fuzhou ទៅកាន់ទីក្រុង Xiamen បានចាប់ផ្តើមតាំងពីខែកញ្ញា ឆ្នាំ២០១៧ មកម៉្លេះ ដែលមានប្រវែងសរុបជាង២៧៧គីឡូម៉ែត្រ និងបានឆ្លងកាត់ទីក្រុងធំៗជាច្រើនដូចជា ទីក្រុងពូធៀន, ឈួនចូវ និងឆាងចូវ ហើយមានស្ពានឆ្លងសមុទ្រចំនួន៣កន្លែងដែលតភ្ជាប់ឈូងសមុទ្រមៃចូវ, ឈូងសមុទ្រឈួនចូវ និងឈូងសមុទ្រអានហៃ ព្រមទាំងទីក្រុង Xiamen ផងដែរ ។

រថភ្លើងល្បឿនលឿនធ្វើដំណើរចាកចេញពីទីក្រុង Fuzhou ទៅកាន់ទីក្រុង Xiamen នេះ អាចរត់ក្នុងល្បឿនលឿនបំផុត គឺស្មើនឹង៣៥០គីឡូម៉ែត្រក្នុង១ម៉ោង ដែលធ្វើឱ្យការធ្វើដំណើរពីទីក្រុង Fuzhou ទៅកាន់ទីក្រុង Xiamen ចំណាយពេលមិនដល់១ម៉ោងទេ ។ គេរំពឹងថា រថភ្លើងល្បឿនលឿនឆ្លងកាត់សមុទ្រនេះ នឹងចាប់ផ្តើមផ្តល់សេវាកម្មធ្វើដំណើរដល់ពលរដ្ឋចិន នៅចុងខែកញ្ញា ឆ្នាំ២០២៣ នេះ ៕ ប្រភព ៖ China Face

ប្រទេសចិន ៖ កាលពីពេលថ្មីៗនេះ សារព័ត៌មានចិនបានចុះផ្សាយពីការបោកប្រាស់ថ្មីមួយទៀត គឺជនខិលខូចបានប្រើប្រាស់បញ្ញាសិប្បនិម្មិត AI មកបោកប្រាស់ជនរងគ្រោះរហូតយល់ព្រមផ្ទេរប្រាក់អស់ប្រាក់ចំនួន៤លាន៣សែនយាន់ ។ ជនរងគ្រោះលើកឡើងថា បច្ចេកវិទ្យា AI អាចបន្លំផ្ទៃមុខ និងសំឡេងរបស់អ្នកណាម្នាក់ដូចគ្នាបេះបិទ ។

ហេតុការណ៍នេះបានកើតឡើងចំពោះបុរសម្នាក់រស់នៅទីក្រុងហ្វូចូវ ខេត្ត Fujian ។ បុរសរងគ្រោះជាអ្នកធ្វើការក្នុងក្រុមហ៊ុនអាជីវកម្មមួយនិយាយថា ខ្លួនបានទទួលវីដេអូខលពីទូរស័ព្ទអនាមិកមួយ ហើយនៅពេលសន្ទនាគ្នាតាមវីដេអូនោះ លោកបានឃើញផ្ទៃមុខមិត្តភក្តិរបស់លោកនិយាយជាមួយលោក ។ ចំណែកសំឡេងវិញ គឺដូចគ្នានឹងមិត្តលោកខ្លាំងណាស់ រហូតដល់លោកមិនអាចបែងចែកថា វាជាសំឡេងពិតប្រាកដ ឬសំឡេងក្លែងក្លាយ ។

ក្រោយមក ជនខិលខូចទូរស័ព្ទមកប្រាប់ថា ខ្លួនមានបញ្ហាក្នុងគ្រួសារ ហើយសូមឱ្យលោកជួយ ដោយឱ្យលោកផ្ទេរប្រាក់ទៅឱ្យគេជាបន្ទាន់ ។ ជននោះអះអាងថា នឹងយកប្រាក់នេះទៅដេញថ្លៃការងារមួយរបស់រដ្ឋ ធ្វើឱ្យលោកជឿទាំងស្រុង រួចក៏យល់ព្រមផ្ទេរប្រាក់តាមសំណូមពរ ។

ទោះយ៉ាងណា ក្រោយពីបានសន្ទនាគ្នា និងផ្ទេរប្រាក់ចប់សព្វគ្រប់ លោកក៏បានផ្ញើសារទៅកាន់មិត្តភក្តិជិតស្និទ្ធរូបនេះ ស្រាប់តែមិត្តរបស់លោកមិនដឹងរឿងរ៉ាវដែលកើតឡើងទេ លោកក៏ដឹងភ្លាមៗថា មានគេបន្លំធ្វើជាមិត្តរបស់លោក ។ លោកបានទៅដាក់ពាក្យបណ្តឹង និងជូនដំណឹងទៅកាន់ធនាគារផងដែរឱ្យពិនិត្យមើលការផ្ទេរប្រាក់នេះឡើងវិញ បន្ទាប់មក លោកក៏បានទទួលប្រាក់ត្រឡប់មកវិញចំនួនតែ៣លាន៤សែនយាន់ប៉ុណ្ណោះ ចំណែកប្រាក់នៅសល់ គឺគេកំពុងតាមដាន ។

ក្រោយហេតុការណ៍នេះ មន្ត្រីប៉ូលិសបានដាស់តឿនទៅកាន់ពលរដ្ឋទាំងអស់ឱ្យបង្កើនការប្រុងប្រយ័ត្ន និងពិនិត្យមើលអ្នកសន្ទនាជាមួយយើងឱ្យគ្រប់ជ្រុងជ្រោយ មុននឹងសម្រេចចិត្តផ្ទេរប្រាក់ទៅឱ្យនរណាម្នាក់ ពីព្រោះបច្ចុប្បន្ន គេបានយកបច្ចេកវិទ្យាទំនើបមកប្រើប្រាស់ក្នុងផ្លូវខុសកាន់តែច្រើន ៕

ប្រភព ៖ Mono News