បរទេស៖ កាលពីថ្ងៃទី ២៣ ខែឧសភា អ្នកស្រាវជ្រាវនៅទីក្រុងឡុងដ៍បានរកឃើញ ដាវដែលមានអាយុកាល ២០០ ឆ្នាំរបស់ស្តេចឥណ្ឌា Tipu Sultan នឹងមានតម្លៃ ១៧.៥ លានដុល្លារស្មើនឹង ២.៥ ដងនៃកំណត់ត្រាមុន។

យោងតាមលោក Oliver White ដែលជាប្រធានដេញថ្លៃរបស់ក្រុមហ៊ុន ដាវតំណាងឱ្យកម្រិតសិល្បៈហត្ថកម្មដ៏អស្ចារ្យ បានឱ្យដឹងថា ដំបូងឡើយដាវរបស់ស្តេចឥណ្ឌា Tipu Sultan មានតម្លៃត្រឹមតែ ២.៥ លានដុល្លារប៉ុណ្ណោះ។ ទោះជាយ៉ាងណាក៏ដោយ កាលពីថ្ងៃទី ២៣ ខែឧសភា អាវុធបុរាណនេះត្រូវបានដាក់លក់ដេញថ្លៃនៅទីក្រុងឡុងដ៍ ហើយបានឈានរហូតដល់ ១៧.៥ លានដុល្លារអាមេរិក។ នេះមិនត្រឹមតែបំបែកឯតទគ្គកម្មតម្លៃខ្ពស់បំផុតសម្រាប់ដាវប៉ុណ្ណោះទេ ប៉ុន្តែថែមទាំងបង្កើតកំណត់ត្រាពិភពលោកថ្មីសម្រាប់វត្ថុពីប្រទេសឥណ្ឌា/ឥស្លាមផងដែរ។

ស្តេច Tipu Sultan ដែលត្រូវបានគេស្គាល់ថាជាខ្លានៃ Mysore គឺជាស្តេចសតវត្សទី ១៨ ដែលគ្រប់គ្រងនគរ Mysore ក្នុងប្រទេសឥណ្ឌា។ ស្តេចអង្គនេះមានភាពល្បីល្បាញដោយសារការតស៊ូអត់ធ្មត់ចំពោះអាណានិគមអង់គ្លេស Tipu Sultan តែងតែប្រើបច្ចេកវិទ្យាថ្មីៗជាច្រើន នឹងបានបង្កើតគំនិតផ្តួចផ្តើមគោលនយោបាយយោធា និងសេដ្ឋកិច្ចជាច្រើន រួមទាំងការប្រើប្រាស់កាំភ្លើងធំរ៉ុក្កែតប្រឆាំងនឹងប្រទេសជិតខាងទៀតផង។

ដាវរបស់ស្តេច Tipu Sultan ច្នៃដោយជាងដែក Mughal មានសិលាចារឹក “King’s Sword” និងក្រវាត់មាសដែលពណ៌នាអំពីគុណសម្បត្ដិទេវទាំងប្រាំ។ ទោះបីជាមានការក្លែងបន្លំនៅក្នុងប្រទេសឥណ្ឌាក៏ដោយ ក៏កាំបិតនេះបានឆ្លុះបញ្ចាំងពីការរចនានៅសតវត្សរ៍ទី ១៦ ដែលនាំចូលពីប្រទេសអាល្លឺម៉ង់ផងដែរ។

នៅឆ្នាំ ១៧៩៩ ដាវនេះត្រូវបានប្រគល់ទៅឱ្យមេដឹកនាំអង់គ្លេស ឧត្តមសេនីយ David Baird ដែលលោកបានឃើញការស្លាប់របស់ស្តេចឥណ្ឌា Tipu Sultan ។ Tipu ត្រូវបានគេយកទៅបញ្ចុះសពនៅ Gumbaz ដែលមានទីតាំងជិត Srirangapatna, Karnataka នៃប្រទេសឥណ្ឌា ជាកន្លែងដែលផ្នូររបស់ឪពុករបស់ទ្រង់ Hyder Ali និងម្តាយរបស់ទ្រង់ Fatima Begum ស្ថិតនៅផងដែរ៕

ប្រភព៖vnexpress

ប្រទេសថៃ ៖ កាលពីថ្ងៃទី២៥ ខែឧសភា កន្លងមក ប្រទេសថៃបានបញ្ជាក់ថា ការប្រកួតស៊ីហ្គេមលើកទី៣៣ ឆ្នាំ២០២៥ ខាងមុខ ប្រទេសថៃនឹងមិនដាក់បញ្ចូលគុនខ្មែរក្នុងការប្រកួតកីឡាស៊ីហ្គេមទេ ប៉ុន្តែប្រទេសថៃនឹងដាក់ Muay Thai ជំនួសគុនខ្មែរវិញ ដែលថៃធ្លាប់បានដាក់ Muay Thai ក្នុងការប្រកួតលើកដំបូងកាលពីឆ្នាំ២០០៧ នៅខេត្តនគរាជសីម៉ា ។

លោក Chaiyaphak Siriwat អនុប្រធានគណៈកម្មាធិការអូឡាំពិកប្រទេសថៃ និងជាប្រធានសហព័ន្ធកីឡាស៊ីហ្គេមលើកឡើងថា លោកជឿជាក់ថា គុនខ្មែរ និងល្បុកតោរបស់ប្រទេសកម្ពុជា នឹងគ្មានឱកាសដាក់បញ្ចូលក្នុងការប្រកួតស៊ីហ្គេមលើកក្រោយៗទៀតទេ បន្ទាប់ពីថៃធ្វើជាម្ចាស់ផ្ទះការប្រកួតស៊ីហ្គេមនៅឆ្នាំ២០២៥ ។

លោក Chaiyaphak Siriwat និយាយថា ៖ «គុនខ្មែរ និងល្បុកតោ ឬប្រភេទកីឡាផ្សេងទៀតដែលកម្ពុជាយកមកបញ្ចូលក្នុងការប្រកួតកីឡាស៊ីហ្គេមឆ្នាំ២០២៣ នោះ នឹងត្រូវបញ្ចូលជាកីឡាប្រភេទទី៣ ។ ដូច្នេះ ប្រទេសនីមួយៗដែលធ្វើជាម្ចាស់ផ្ទះការប្រកួតស៊ីហ្គេមនឹងជ្រើសរើសប្រភេទកីឡា ហើយខ្លួនខ្ញុំផ្ទាល់ជឿថា ការប្រកួតស៊ីហ្គេមនៅឆ្នាំ២០២៧ និងឆ្នាំ២០២៩ ដែលប្រទេសម៉ាឡេស៊ី និងសិង្ហបុរី នឹងធ្វើជាម្ចាស់ផ្ទះបន្តពីថៃនោះ ច្បាស់ណាស់ ពួកគេនឹងមិនជ្រើសរើសគុនខ្មែរទេ ពីព្រោះនាពេលកន្លងមក ប្រទេសកម្ពុជាដណ្តើមបានមេដាយមាសរហូតដល់ចំនួន១៤ ក្នុងចំណោមមេដាយ១៩ ។ លើសពីនេះ វាជាកីឡាដែលកម្ពុជាវិនិច្ឆ័យដោយភ្នែកទទេ» ។

លោកបន្តថា ៖ «ការកែសម្រួលច្បាប់ការប្រកួតកីឡាស៊ីហ្គេមដើម្បីដាក់បញ្ចូលកីឡាក្នុងស្រុកចំនួន៤ប្រភេទ គឺជាការអភិវឌ្ឍកីឡាស៊ីហ្គេមឱ្យកាន់តែឈានទៅមុខនៅលើឆាកអន្តរជាតិ ។ បន្ទាប់មក យើងនឹងទំនាក់ទំនងជាមួយសមាគមកីឡាដើម្បីចេញលិខិតបញ្ជាក់ថា សមាគមនីមួយៗទទួលបានមេដាយស៊ីហ្គេម ឆ្នាំ២០២៣ ចំនួនប៉ុន្មាន ក្នុងគោលបំណងដាក់លិខិតទៅកាន់នាយករដ្ឋមន្ត្រីថៃ និងនាំយកថវិកាមកចែកជូនកីឡាករ-កីឡាការិនីទាំងអស់» ។

គួរបញ្ជាក់ថា ក្រោយពីលោក Chaiyaphak Siriwat អនុប្រធានគណៈកម្មាធិការអូឡាំពិកប្រទេសថៃលើកឡើងថា ប្រទេសម៉ាឡេស៊ី និងសិង្ហបុរី នឹងមិនដាក់គុនខ្មែរក្នុងការប្រកួតស៊ីហ្គេមនៅពេលពួកគេធ្វើជាម្ចាស់ផ្ទះបន្តពីថៃនោះ អ្នកលេងបណ្តាញសង្គមថៃបានសាទរយ៉ាងខ្លាំង ហើយនិយាយថា គុនខ្មែរ និងល្បុកតោនឹងត្រឡប់ទៅនៅលើជញ្ជាំងប្រាសាទដូចដើម ។ ដូចគ្នានេះ ពលរដ្ឋថៃម្នាក់ទៀតថា ខ្មែរចង់អួតកីឡារបស់ខ្លួនខ្លាំងណាស់ ប្រទេសថៃមិនយកមកដាក់បញ្ចូលក្នុងការប្រកួតស៊ីហ្គេមនៅថៃដាច់ខាត ។ រីឯពលរដ្ឋថៃម្នាក់ទៀតថា គុនខ្មែរដល់ថ្ងៃអវសាន្តហើយ ហើយគ្មានឱកាសចូលរួមប្រកួតស៊ីហ្គេមលើកក្រោយទៀតទេ ព្រោះប្រទេសម៉ាឡេស៊ី និងសិង្ហបុរី ក៏មានគំនិតដូចថៃដែរ ។

ទោះយ៉ាងណា នេះគ្រាន់តែជាការសន្និដ្ឋានរបស់ប្រទេសថៃប៉ុណ្ណោះថា ប្រទេសម៉ាឡេស៊ី និងសិង្ហបុរីនឹងមិនដាក់បញ្ចូលគុនខ្មែរក្នុងការប្រកួតស៊ីហ្គេម នៅពេលប្រទេសទាំងពីរនេះធ្វើជាម្ចាស់ផ្ទះនៅឆ្នាំ២០២៧ និងឆ្នាំ២០២៩ ។ ប៉ុន្តែប្រទេសទាំងពីរនេះមិនបានប្រកាសថា តើពួកគេនឹងដាក់គុនខ្មែរក្នុងការប្រកួតស៊ីហ្គេមនាពេលខាងមុខឬអត់ ហើយបើប្រទេសទាំងពីរមិនដាក់គុនខ្មែរមែន គឺមានតែថៃនេះហើយជាអ្នកសំណូមពរកុំឱ្យប្រទេសទាំងពីរដាក់គុនខ្មែរក្នុងការប្រកួតស៊ីហ្គេម៕ប្រភព ៖ Thairath Sport

រដ្ឋធានីវ៉ាស៊ីនតោន៖ ស្របពេលនាយអគ្គសេនាធិការចម្រុះ លោកនាយឧត្ដមសេនីយ៍ ម៉ាក មីលឡេ (Mark Milley) បានចូលនិវត្ដន៍ នៅចុងឆ្នាំនេះ លោកប្រធានាធិបតីសហរដ្ឋអាមេរិ ក៏ បានតែងតាំងមេទ័ពកំពូល នៃកងទ័ពអាកាស ចូលមកកាន់តំណែងកំពូលនេះបន្ដ សម្រាប់ដឹកនាំកម្លាំងទាហានជើងគោក ជើងទឹក និង កងទ័ពអាកាសរបស់ប្រទេសមហាអំណាចកំពូលមួយនេះ។

គេហទំព័ររបស់បណ្ដាញទូរទស្សន៍របស់សហរដ្ឋអាមេរិក Fox News បានចេញផ្សាយ កាលពីរសៀល ថ្ងៃព្រហស្បតិ៍ ទី២៥ ខែឧសភា ឆ្នាំ២០២៣ ថា មន្រ្ដីជាន់ខ្ពស់មួយរូបរបស់សហរដ្ឋអាមេរិក បានអះអាង ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក នឹងតែងតាំងលោកឧត្ដមសេនីយ៍ ស៊ីឃ្យូ ប្រោន (CQ Brown Jr.) មេបញ្ជាការកងទ័ពអាកាស ជានាយអគ្គសេនាធិការចម្រុះ ជំនួសតំណែងរបស់លោកនាយឧត្ដមសេនីយ៍ ម៉ាក មីលឡេ ដែលនឹងត្រូវចូលនិវត្ដន៍ នៅក្នុងខែតុលា ខាងមុខនេះ។ ប្រធានាធិបតី គ្រោងនឹងបង្ហាញលោកឧត្ដមសេនីយ៍ ប្រោន ជាអ្នកបើកយន្តហោះចម្បាំង ចូលមកកាន់តំណែងកំពូល នៅក្នុងជួរកងទ័ពរបស់សហរដ្ឋអាមេរិក ហើយបង្កើតប្រវត្តិសាស្ត្រ នៅក្នុងការតែងតាំងរបស់គាត់ នៅក្នុងអំឡុងពេលព្រឹត្តិការណ៍ នៅឯឧទ្យានផ្កាកូឡាប នារសៀលថ្ងៃព្រហស្បតិ៍។

លោកឧត្ដមសេនីយ៍ ប្រោន វ័យ៦០ឆ្នាំ ត្រូវបានគេចាត់ទុក ជាអ្នកឈានមុខគេ នៅក្នុងការចូលមកជំនួសតំណែងរបស់លោកនាយឧត្ដមសេនីយ៍ មីលឡេ ជាពិសេស ចំពេលមន្ទីរបញ្ចកោណ ផ្លាស់ប្តូរសមត្ថភាពយោធារបស់ខ្លួន ចេញពីសង្គ្រាមផ្លូវគោក កាលពីអតីតកាល ដើម្បីឆ្លើយតបទៅនឹងសង្គ្រាមតាមបណ្ដាញអ៊ិនធើរណេត លំហអាកាស នុយក្លេអ៊ែរ និង ការគំរាមកំហែងពីអាវុធមានល្បឿនលឿនជាងសំឡេងរបស់ប្រទេសចិន។

បើតាមមន្ត្រីជាន់ខ្ពស់មួយរូប នៃរដ្ឋបាលរបស់លោកប្រធានាធិបតី ចូ បៃដិន បានមើលឃើញ ថា លោកឧត្ដមសេនីយ៍ ប្រោន ជាមនុស្សត្រឹមត្រូវ មានសមត្ថភាពសមនឹងកាន់តំណែង ជាមន្ត្រីយោធាកំពូលបន្ទាប់របស់ប្រទេសមហាអំណាចមួយនេះ។ លោក ប្រោន បានធ្វើយោធូបនីយកម្មដល់កងទ័ពអាកាសរបស់សហរដ្ឋអាមេរិក សម្រាប់ការប្រយុទ្ធ ប្រកបដោយសក្ដានុពល នៅសតវត្សទី២១ រួមទាំងការធ្វើបច្ចុប្បន្នភាព ដល់កងនាវារបស់សហរដ្ឋមេរិក និង ការពង្រឹងឃ្លាំងអាវុធនុយក្លេអ៊ែររបស់ក្រុងវ៉ាស៊ីនតោន បន្ថែមទៀត។

លោកឧត្ដមសេនីយ៍ ប្រោន មានអាជីពជាអាកាសយានិកយន្ដហោះចម្បាំង ប្រភេទ F-16 ជាមួយនឹងម៉ោងហោះហើរ ជាង ៣ ០០០ម៉ោង ហើយត្រូវបានកំណត់ ជាកម្រិតមានសមត្ថភាពគ្រប់គ្រាន់ នៅក្នុងកងទ័ពអាកាស និង នៅក្នុងបញ្ជាការដ្ឋានកងទ័ពអាកាសចម្រុះ រួមទាំង តំបន់អឺរ៉ុប មជ្ឈិមបូព៌ា និង ទ្វីបអាស៊ី។ លោក ប្រោន បានធ្វើជាមេបញ្ជាការកងទ័ពអាកាស ប្រចាំតំបន់សមុទ្រប៉ាស៊ីហ្វិក ជាកន្លែងដែលគាត់ប្រឈមមុខជាមួយនឹងចិន នៅតំបន់ឥណ្ឌូ-ប៉ាស៊ីហ្វិក។

ស្របគ្នានេះ លោកឧត្ដមសេនីយ៍ ប្រោន ក៏បានលូកដៃយ៉ាងជ្រៅ ពាក់ព័ន្ធនឹងកិច្ចខិតខំប្រឹងប្រែងរបស់មន្ទីរបញ្ចកោណ នៅក្នុងប្រទេសអ៊ុយក្រែន ដោយសារគាត់បានត្រួតពិនិត្យមើលលុយរាប់សិបពាន់លានដុល្លារ ទាំងជំនួយហិរញ្ញវត្ថ និង យោធារបស់សហរដ្ឋអាមេរិក ត្រូវបានផ្គត់ផ្គង់ ទៅកាន់ប្រទេសមួយនេះ។ លោកឧត្ដមសេនីយ៍ កាលពីដំបូងឡើយ ក៏ធ្លាប់ជួយដឹកនាំយុទ្ធនាការ តាមផ្លូវអាកាស ប្រឆាំងនឹងក្រុមជីវពលរដ្ឋអ៊ិស្លាម ហើយគាត់ជាបុរសស្បែកខ្មៅ អាមេរិក ដើមកំណើតអាហ្វ្រិក ជាលើកដំបូង នឹងក្លាយជានាយអគ្គសេនាធិការ នៃកងទ័ពអាកាស ហើយវាជាតំណែងកំពូល នៅក្នុងវិស័យយោធារបស់សហរដ្ឋអាមេរិក។

នាយអគ្គសេនាធិការចម្រុះ ក្លាយជាមន្រ្ដីយោធាកំពូល នៅសហរដ្ឋអាមេរិក ហើយត្រូវបម្រើការងារ ជាទីប្រឹក្សាយោធាជាន់ខ្ពស់ សម្រាប់ប្រធានាធិបតី រដ្ឋមន្រ្ដីក្រសួងការពារជាតិ និង ក្រុមប្រឹក្សាសន្ដិសុខជាតិ។ នាយអគ្គមេបញ្ជាការ មិនមានកងទ័ព ប៉ុន្តែដើរតួនាទីយ៉ាងសំខាន់បំផុត នៅក្នុងវិស័យយោធាសំខាន់ៗទាំងអស់ ហើយអាចសម្រេចចិត្តខាងគោលនយោបាយ និង ផ្តល់ដំបូន្មាន លើប្រតិបត្តិការប្រយុទ្ធសំខាន់ៗរបស់ប្រទេសមហាអំណាចមួយនេះ។ តំណែងនេះ ក៏ដឹកនាំនាយអគ្គសេនាធិការចម្រុះទាំងអស់ ដែលដឹកនាំកងកម្លាំងប្រដាប់អាវុធផ្សេងៗ។

ប្រសិនលោកឧត្ដមសេនីយ៍ ប្រោន នឹងត្រូវព្រឹទ្ធសភា យល់ព្រមតាមសំណើតែងតាំងរបស់លោកប្រធានាធិបតី មែននោះ ទាំងតំណែងយោធាកំពូល និង ស៊ីវិលរបស់មន្ទីរបញ្ចកោណ នឹងត្រូវកាន់កាប់ ដោយជនជាតិអាមេរិក ដើមកំណើតអាហ្វ្រិក ជាលើកដំបូង។ ទន្ទឹមគ្នានេះ រដ្ឋមន្ត្រីក្រសួងការពារជាតិសហរដ្ឋអាមេរិក លោក ឡយ អូស្ទីន (Lloyd Austin) បានក្លាយជាប្រធានមន្ទីរបញ្ចកោណស្បែកខ្មៅលើកដំបូងគេ ត្រូវបានតែងតាំង នៅក្នុងខែមករា ឆ្នាំ២០២១ ខណៈលោកនាយឧត្ដមសេនីយ៍ ខូលីន ផៅវ៉ែល (Colin Powell) ក៏ជាបុរសស្បែកខ្មៅម្នាក់ផងដែរ ធ្វើជានាយអគ្គសេនាធិការចម្រុះ នៃកងទ័ពសហរដ្ឋអាមេរិក។

លោក ម៉ាក មីលឡេ (Mark Milley) នាយអគ្គសេនាធិការចម្រុះ នៃកងទ័ពសហរដ្ឋអាមេរិក នឹងត្រូវចូលនិវត្ដន៍ នៅខែតុលា ឆ្នាំ២០២៣ នៅក្នុងវ័យ៦៤ឆ្នាំ។ លោកនាយឧត្ដមសេនីយ៍ មីលឡេ បានក្លាយជានាយអគ្គសេនាធិការចម្រុះទី២០ នៃកងទ័ពសហរដ្ឋអាមេរិក ចាប់តាំងពីថ្ងៃទី១ ខែតុលា ឆ្នាំ២០១៩ រហូតមក។ ប៉ុន្ដែមុននឹងបោះជំហានមកកាន់តំណែងកំពូល ត្រួតត្រាទាំងកងទ័ពជើងទឹក ជើងគោក និង អាកាសនោះ លោក មីលឡេ ក៏ធ្លាប់ធ្វើជានាយអគ្គសេនាធិការទី៣៩ នៃកងទ័ពជើងគោក ចន្លោះពីថ្ងៃទី១៤ ខែសីហា ឆ្នាំ២០១៥ ដល់ថ្ងៃទី៩ ខែសីហា ឆ្នាំ២០១៩ ហើយគាត់ធ្លាប់កាន់តំណែងជាមេបញ្ជាការ និង បុគ្គលិកជាច្រើន នៅក្នុងកងពលធំចំនួនប្រាំបី និង កងកម្លាំងពិសេស ពេញមួយអាជីពយោធារបស់គាត់៕

ប្រទេសចិន ៖ អ្នកស្រាវជ្រាវមកពី China Water Risk បានដាស់តឿនថា ប្រទេសចំនួន១៦ នៅតំបន់អាស៊ីកំពុងប្រឈមនឹងការខ្វះខាតទឹក និងថាមពលវារីអគ្គិសនី ដោយសារបម្រែបម្រួលអាកាសធាតុ ជាពិសេស ទន្លេសំខាន់ៗចំនួន១០ នៅតំបន់អាស៊ីបានទទួលរងផលប៉ះពាល់យ៉ាងខ្លាំង ។

អ្នកស្រាវជ្រាវបន្តថា ផលប៉ះពាល់ដោយសារបម្រែបម្រួលអាកាសធាតុចំពោះខ្សែទឹកសំខាន់ៗ ដែលមានប្រភពមកពីភ្នំហិណ្ឌូ Kush-Himalayan កំពុងប៉ះពាល់ដល់ការអភិវឌ្ឍសេដ្ឋកិច្ច និងការផ្គត់ផ្គង់ថាមពលនៅប្រទេសទាំង១៦នេះ ហើយប្រទេសទាំងនេះត្រូវសហការគ្នាដើម្បីការពារទឹកក្នុងតំបន់ ។ ទឹកទន្លេសំខាន់ៗចំនួន១០ ដែលហូរមកពីភ្នំហិណ្ឌូ Kush-Himalayan កំពុងរងផលប៉ះពាល់ដោយសារបម្រែបម្រួលអាកាសធាតុ ដូចជា ទឹកកករលាយ និងអាកាសធាតុក្តៅខ្លាំង ។

ទឹកទន្លេទាំងនេះមានចំណែកបង្កើតថាមពលវារីអគ្គិសនីផ្គត់ផ្គង់ប្រទេសចំនួន១៦ នៅអាស៊ី រួមទាំងប្រទេសអាហ្វហ្គានីស្ថាន នេប៉ាល់ និងប្រទេសក្នុងតំបន់អាស៊ីអាគ្នេយ៍ផងដែរ ។ លើសពីនេះ វាក៏បានជួយបង្កើតថាមពលវារីអគ្គិសនីជិត៧៥% និងជួយដល់រោងចក្រថាមពលធ្យូងថ្មស្មើ៤៤% ។ អ្នកស្រាវជ្រាវប៉ាន់ស្មានថា វាអាចប៉ះពាល់ដល់ការផលិតថាមពលរហូតដល់៨៦៥គីឡូវ៉ាត់ និងប៉ះពាល់ការផ្គត់ផ្គង់នៅទូទាំងពិភពលោកទៀតផង ។

តាំងពីមានគ្រោះរាំងស្ងួតមក រដ្ឋាភិបាលចិនបានបង្កើតរោងចក្រអគ្គិសនីដើរដោយធ្យូងថ្មថ្មីជាច្រើនកន្លែង ដើម្បីកាត់បន្ថយបញ្ហាដាច់ចរន្តអគ្គិសនីនាថ្ងៃអនាគត ។ ទោះយ៉ាងណា រោងចក្រថាមពលធ្យូងថ្មទាំងនេះក៏ត្រូវការប្រើប្រាស់ទឹកផងដែរ ហើយការបង្កើនកម្លាំងផលិតនៅប្រទេសចិន និងឥណ្ឌា អាចធ្វើឱ្យប្រឈមនឹងការខ្វះខាតទឹកលើសដើមទៀត ។

ស្របពេលមានហានិភ័យអាកាសធាតុកើនឡើង ប្រទេសផ្សេងៗបានបង្កើតគោលនយោបាយដើម្បីធានាសុវត្ថិភាពថាមពល និងទឹក ។ អ្នកស្រាវជ្រាវនិយាយថា ការប្រើប្រាស់ថាមពលអាចប៉ះពាល់ដល់ទឹក ហើយការខ្វះខាតទឹកអាចធ្វើឱ្យរចនាសម្ព័ន្ធថាមពលខូចខាត ។ ហេតុនេះ កម្រិតទឹកបានកំណត់សុវត្ថិភាពថាមពល ៕ ប្រភព ៖ PPTV Online