យោងតាមការជូនដំណឹងពីផេក Cambodia 2023 បានឱ្យដឹងថាប្រទេសថៃបញ្ជូនប្រតិភូកីឡាច្រើនជាងគេក្នុងការប្រកួតកីឡាអាស៊ាននប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះដោយក្នុងនោះមានអត្តពលិកប្រកួតចំនួន៣០៤នាក់ មន្រ្តីបច្ចេកទេសចំនួន៣២៥ សរុបប្រតិភូចំនួន ៦២៩ នាក់ខណៈកម្ពុជាជាម្ចាស់ផ្ទះនៅលេខរៀងទី៣ បន្ទាប់ពីឥណ្ឌូនេស៊ី។

ជាមួយគ្នានេះដែរ តាមការបញ្ជាក់តាមរយៈផេកផ្លូវការ CAMSOC បានឱ្យដឹងថា ថៃបានបញ្ជូនគណៈប្រតិភូច្រើនជាងគេដូចទៅការប្រកួតកីឡាអាស៊ីអាគ្នេយ៍ដូចគ្នា ដោយការប្រកួតកីឡាប៉ារ៉ាហ្គេមប្រទេសនេះបានបញ្ជូនអត្តពលិកចូលរួមប្រកួតមានចំនួន៣០៤នាក់ មន្រ្តីបច្ចេកទេសចំនួន៣២៥ សរុបប្រតិភូចំនួន ៦២៩នាក់។ ចំណែកប្រទេសកម្ពុជាវិញស្ថិតនៅលេខរៀងទី៣ ដែលប្រតិភូសរុបចំនួន៣៤៣នាក់ ដែលមានអត្តពលិកចំនួន២៥២នាក់ និង មន្រ្តីបច្ចេកទេស៩១នាក់។

ប្រទេសឈរលេខរៀងទី២គឺ ឥណ្ឌូនេស៊ី ដោយបានបញ្ជូនប្រតិភូសរុបចំនួន ៥៨០នាក់ ដោយអត្តពលិកមានចំនួន២៧៥នាក់ និងមន្រ្តីបច្ចេកទេសមានចំនួន ៣០៥នាក់ ខណៈប្រទេសទីម័រខាងកើតមានចំនួនតិចជាងគេដោយប្រតិភូសរុបមានចំនួន៣១នាក់ប៉ុណ្ណោះ ដោយមានអត្តពលិកចំនួន១៣នាក់ និងមន្រ្តីបច្ចេកទេស ១៨នាក់។ ចំណែកឯប្រទេសព្រុយណេ ក៏តិចដូចគ្នាដោយប្រតិសរុបមានចំនួន៣២នាក់ ដោយអត្តពលិកមានចំនួន២០នាក់ និងមន្ត្រីបច្ចេកទេស១២នាក់។

គួរបញ្ជាក់ថា កីឡាអាស៊ានប៉ារ់ាហ្គេមលើកទី១២ នឹងប្រព្រឹត្តទៅរាជធានីភ្នំពេញចាប់ពីថ្ងៃទី៣-៩ ខែមិថុនា ឆ្នាំ២០២៣ ដែលមាន១៤ប្រភេទកីឡាក្នុងការប្រកួតរួមមាន៖១. អត្តពលកម្ម ២. វាយសី ៣. ប៊ូស្យា ៤.អុក ៥.បាល់បោះពិការភ្នែក ៦.បាល់ទាត់ (ម្ខាង៧នាក់) ៧.បាល់ទាត់ (ម្ខាង៥នាក់) ៨.យូដូ ៩.លើកទម្ងន់ ១០.ហែលទឹក ១១. វាយកូនឃ្លីលើតុ ១២.បាល់ទះអង្គុយ ១៣.បាល់បោះជិះរទេះ និង ១៤.កីឡាអេឡិចត្រូនិច៕

ប្រទេសចិន ៖ អ្នកជំនាញចិនបានដាស់តឿនថា ជំងឺកូវីដនឹងឆ្លងរាតត្បាតនៅប្រទេសចិនជាថ្មី ហើយពលរដ្ឋចិននឹងឆ្លងជំងឺនេះរហូតដល់៦៥លាននាក់ក្នុង១សប្តាហ៍ ក្នុងអំឡុងពេលជំងឺកូវីដឆ្លងខ្លាំងនៅចុងខែមិថុនា ឆ្នាំ២០២៣ ។

គេហទំព័ររបស់ចិនឈ្មោះ Global Times បានចុះផ្សាយថា លោក Zhong Nanshan អ្នកជំនាញផ្នែកជំងឺផ្លូវដង្ហើមលំដាប់ទី១ នៅប្រទេសចិន លើកឡើងថា ពលរដ្ឋចិនប្រមាណ៦៥លាននាក់នឹងឆ្លងជំងឺកូវីដក្នុង១សប្តាហ៍ ខណៈជំងឺកូវីដនឹងឆ្លងរាតត្បាតជាថ្មីនៅប្រទេសចិន រហូតដល់ចុងខែមិថុនា ឆ្នាំ២០២៣ ។

កាលពីថ្ងៃទី២២ ខែឧសភា កន្លងមក លោក Zhong Nanshan អ្នកជំនាញផ្នែកជំងឺផ្លូវដង្ហើមបានលើកឡើងក្នុងកិច្ចប្រជុំផ្នែកវិទ្យាសាស្ត្រនៅទីក្រុងក្វាងចូវថា ជំងឺកូវីដបានឆ្លងរាតត្បាតចំនួន២លើកនៅប្រទេសចិន គឺនៅចុងខែមេសា និងខែឧសភា ឆ្នាំ២០២៣ ។ លោកបន្តថា រដ្ឋាភិបាលចិនបានអនុម័តយកវ៉ាក់សាំងប្រឆាំងនឹងជំងឺកូវីដចំនួន២ប្រភេទ ដែលវាអាចប្រឆាំងនឹងពូជ XBB ហើយរដ្ឋាភិបាលចិននឹងអនុម័តវ៉ាក់សាំងជាច្រើនទៀត ។

មជ្ឈមណ្ឌលគ្រប់គ្រង និងបង្ការជំងឺរបស់ចិនបានរាយការណ៍ពីការឆ្លងរាតត្បាតនៃជំងឺកូវីដនៅទីក្រុងប៉េកាំងថា ជំងឺកូវីដជាជំងឺ១ ក្នុងចំណោម៥ ដែលឆ្លងរាតត្បាតខ្លាំងនៅទីក្រុងប៉េកាំង ក្នុងចន្លោះពីថ្ងៃទី១៥ ដល់ថ្ងៃទី២១ ខែឧសភា កន្លងមក ។ ជំងឺទាំង៥ប្រភេទនេះ មានអ្នកឆ្លងសរុបស្មើនឹង៩៨,៩% នៃជំងឺទាំងអស់ ។

ចំណែកមន្ត្រីសុខាភិបាលចិនបញ្ជាក់ថា XBB គឺជាពូជកូវីដចុងក្រោយបង្អស់ដែលគេបានប្រទះឃើញនៅចិន នាពេលបច្ចុប្បន្ន ។ XBB កើតមកពីពូជអូមីក្រុង ហើយវាងាយឆ្លងជាងអូមីក្រុង ដែលធ្លាប់ឆ្លងរាតត្បាតនៅប្រទេសចិនកាលពីមុន ៕ ប្រភព ៖ TNN World

បរទេស៖ Tesla Model Y គឺជាម៉ូដែលរថយន្តដែលលក់ដាច់បំផុតនៅទូទាំងពិភពលោកក្នុងត្រីមាសទីមួយនៃឆ្នាំនេះ ដោយវ៉ាដាច់ Toyota Corolla និង RAV4 ។ នេះបើយោងតាមទិន្នន័យចុងក្រោយពីក្រុមហ៊ុនស្រាវជ្រាវទីផ្សាររថយន្ត JATO នឹងប្រភពទិន្នន័យដែលប្រមូលបានយ៉ាងត្រឹមត្រូវសម្រាប់ទីផ្សារចំនួន ៥៣ នៅទូទាំងពិភពលោក បូករួមទាំងព័ត៌មាន និងការប៉ាន់ស្មានសម្រាប់ទីផ្សារសំខាន់ៗផ្សេងទៀត។

កាលពីខែសីហាឆ្នាំមុន នាយកប្រតិបត្តិ Tesla លោក Elon Musk បានប្រកាសនៅក្នុងកិច្ចប្រជុំម្ចាស់ភាគហ៊ុនប្រចាំឆ្នាំថា Model Y នឹងក្លាយជារថយន្តថ្មីដែលលក់ដាច់បំផុតនៅលើពិភពលោកក្នុងឆ្នាំ ២០២៣ នេះ។ ដូច្នេះហើយ ការរំពឹងរបស់លោក Elon Musk បានក្លាយជាការពិត ទិន្នន័យដែលប្រមូលបាននៅក្នុងត្រីមាសទី ១ បានបង្ហាញថា Tesla Model Y ជាប់ចំណាត់ថ្នាក់លេខ១ នៅលើពិភពលោក ដែលដឹកនាំជាមួយនឹងរថយន្តចំនួន ២៦៧,២០០ គ្រឿងដែលបានចែកចាយដល់អតិថិជន កើនឡើង ៦៩% ធៀបនឹងរយៈពេលដូចគ្នាកាលពីឆ្នាំមុន។

ចំណាត់ថ្នាក់លេខ ២ គឺ Toyota Corolla ជាមួយនឹងការលក់ ២៥៦,៤០០ គ្រឿង ជាមួយនឹងនិន្នាការធ្លាក់ចុះ រួមទាំងការថយចុះ ២៩% នៅក្នុងប្រទេសចិន និង ១០% នៅសហរដ្ឋអាមេរិក បើធៀបនឹងរយៈពេលដូចគ្នាកាលពីឆ្នាំមុន។ ចំណាត់ថ្នាក់លេខ ៣,៤ និងលេខ ៥ សុទ្ធតែជាកម្មសិទ្ធិរបស់ម៉ាកតូយ៉ូតាទាំងអស់។
រថយន្ត Hilux លក់បាន ២១៤,៧០០ គ្រឿង, RAV4 លក់បាន ២១១,០០០ គ្រឿង និង Camry លក់បាន ១៦៦,២០០ គ្រឿង។ រថយន្ត RAV4 និង Camry ត្រូវបានលក់ជាចម្បងនៅក្នុងទីផ្សារអភិវឌ្ឍន៍ ខណៈដែល រថយន្ត Hilux ត្រូវបានលក់យ៉ាងខ្លាំងនៅក្នុងប្រទេសកំពុងមានសេដ្ឋកិច្ចរីកចម្រើន៕ ប្រភព៖vnexpress

រដ្ឋធានីវ៉ាស៊ីនតោន៖ ប្រធានាធិបតីសហរដ្ឋអាមេរិក មកពីគណបក្សប្រជាធិបតេយ្យ និង ប្រធានសភា មកពីគណបក្សសាធារណរដ្ឋ បានចរចាគ្នាដ៏តានតឹងបំផុត អស់រយៈពេលជាច្រើនថ្ងៃកន្លងមកនេះ ជុំវិញការកម្រិតប្រាក់បំណុល (Debt ceiling) ហើយនៅទីបំផុត គណបក្សទាំង២ នឹងមានទំនុកចិត្ត លើការអនុម័ត ជុំវិញបញ្ហាប្រាក់បំណុលនេះ ដើម្បីរារាំងការដួលរំលំដល់សេដ្ឋកិច្ចរបស់ពិភពលោក។

សារព័ត៌មាន Channel News Asia មានមូលដ្ឋាន នៅក្នុងប្រទេសសិង្ហបុរី បានចេញផ្សាយ កាលពីព្រឹក ថ្ងៃចន្ទ ទី២៩ ខែឧសភា ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក មកពីគណបក្សប្រជាធិបតេយ្យ និង លោក ខេវីន ម៉ាកខាធី (Kevin McCarthy) ប្រធានសភា មកពីគណបក្សសាធារណរដ្ឋ បានអះអាង កាលពីថ្ងៃអាទិត្យ (ទី២៨ ខែឧសភា) ថា កិច្ចព្រមព្រៀងទ្វេភាគីចុងក្រោយ សម្រាប់ការដំឡើងកម្រិតប្រាក់បំណុលរបស់សហរដ្ឋអាមេរិក និង ការចៀសវាងនូវការខកខាន ប្រកបដោយមហន្តរាយ។ ឥឡូវ ដំណើរការនេះ កំពុងតែឆ្ពោះទៅកាន់សភា ហើយនឹងត្រូវឆ្លងកាត់កិច្ចព្រមព្រៀងនេះ មុនពេលរដ្ឋាភិបាល ចាប់ផ្តើមអស់សាច់ប្រាក់។

ការសម្រុះសម្រួល រវាងគណបក្សធំៗទាំងនេះ នៅសហរដ្ឋអាមេរិក បានកើតឡើង ក្រោយពេលមានការពិភាក្សាគ្នាដ៏តានតឹងបំផុត អស់រយៈពេលជាច្រើនសប្តាហ៍កន្លងមក សម្រាប់ផ្ដល់ផ្លូវដ៏ល្អត្រឡប់មកវិញ បញ្ចៀសនូវគ្រោះមហន្ដរាយ ថ្វីបើការផុតកំណត់ នៅត្រឹមថ្ងៃទី៥ ខែមិថុនា យ៉ាងណាក្ដី ខណៈក្រសួងហិរញ្ញវត្ថុសហរដ្ឋអាមេរិក បានប៉ាន់ប្រមាណ ថា ប្រហែលជាមិនមានសាច់ប្រាក់គ្រប់គ្រាន់ សម្រាប់ការចំណាយ និង សងប្រាក់បំណុល។

លោកប្រធានាធិបតី បៃដិន បានបញ្ជាក់ នៅក្នុងការបង្ហាញខ្លួន រយៈពេលខ្លីមួយ នៅចំពោះមុខប្រព័ន្ធផ្សព្វផ្សាយ នៅឯសេតវិមាន ដោយជំរុញឱ្យសភាទាំងពីរ អនុម័តនូវកិច្ចព្រមព្រៀងនេះ ថា៖ «ខ្ញុំគិត ថា វាជាការបោះជំហានដ៏សំខាន់មួយទៅមុខ។ នេះជាការបញ្ចប់នូវការគំរាមកំហែង ប្រកបដោយគ្រោះមហន្តរាយ ការពារនូវការស្តារសេដ្ឋកិច្ច ដែលរកបានមកយ៉ាងលំបាក និង ជាប្រវត្តិសាស្ត្ររបស់យើង ហើយ … តំណាងឱ្យការសម្របសម្រួល ដោយមានន័យ ថា គ្មាននរណាម្នាក់ ទទួលបានអ្វីគ្រប់យ៉ាង ដែលពួកគេចង់បាននោះឡើយ»។

សេតវិមាន បានបញ្ជាក់ ថា លោក បៃដិន និង លោក ម៉ាកខាធី បានថ្លែង កាលពីព្រឹកថ្ងៃ អាទិត្យ ខណៈពួកគេកំពុងតែពុះពារ បញ្ចៀសហានិភ័យផ្នែកហិរញ្ញវត្ថុ កំពុងតែគំរាមកំហែងដល់បណ្តាញមនុស្សរាប់លាននាក់ ចេញពីការងារ ហើយវាជាការប្រថុយប្រថាន នឹងការរលាយដល់សេដ្ឋកិច្ចរបស់ពិភពលោក។

នៅក្នុងសេចក្ដីថ្លែងការណ៍ កាលពីល្ងាច ថ្ងៃអាទិត្យ ប្រធានសភា និង មេដឹកនាំសភា មកពីគណបក្សសាធារណរដ្ឋផ្សេងទៀត បានហៅកិច្ចព្រមព្រៀងនេះ ថា វាជា «ការឈ្នះជាប្រវត្តិសាស្ត្រ»។ ជាមួយគ្នានេះ លោកប្រធានសភា ម៉ាកខាធី បានកោះហៅសមាជិកសភា ឲ្យត្រឡប់ពីការឈប់សម្រាកវិស្សមកាលរបស់ពួកគេ មករដ្ឋធានីវ៉ាស៊ីនតោន ដើម្បីបោះឆ្នោត លើកិច្ចព្រមព្រៀងនេះ នៅពីថ្ងៃពុធ សប្ដាហ៍នេះ។

ក្របខ័ណ្ឌជាមូលដ្ឋាន នៃកិច្ចព្រមព្រៀងផ្អាកកម្រិតប្រាក់បំណុលរបស់សហព័ន្ធន៍ (Federal Debt Ceiling) ខណៈបច្ចុប្បន្នមានចំនួ៣១,៤ពាន់ពាន់លានដុល្លារអាមេរិក (US$31.4 trillion) សម្រាប់រយៈពេល២ឆ្នាំ ហើយវាគ្រប់គ្រាន់ សម្រាប់ការឆ្លងកាត់នូវការបោះឆ្នោតប្រធានាធិបតីបន្ទាប់របស់សហរដ្ឋ នៅឆ្នាំ២០២៤ ហើយអនុញ្ញាតឱ្យរដ្ឋាភិបាល រក្សានូវការខ្ចីប្រាក់ និង នៅតែអាចសងប្រាក់បំណុលបាន។

បណ្ដាញផ្សព្វផ្សាយ Fox News បានរាយការណ៍ ថា លោកប្រធានសភា ម៉ាកខាធី កាលពីថ្ងៃអាទិត្យ កំពុងតែជំរុញដល់កិច្ចព្រមព្រៀងនេះ ដោយមានការជជែកដេញដោលគ្នាយ៉ាងខ្លាំង។ ចំណែកការកំណត់នូវការចំណាយ ក៏ជាជ័យជម្នះដ៏ធំសម្បើមមួយ ហើយបានទទូច ថា ៩៥ភាគរយ នៃសមាជិកសភា មកពីគណបក្សសាធារណរដ្ឋ មានការរំភើបចិត្តយ៉ាងខ្លាំង ចំពោះការជជែកដេញដោលគ្នាបែបនេះ។

លោកប្រធានាធិបតី ចូ បៃដិន កាលពីដំបូងឡើយ បានបដិសេធចរចា ជុំវិញបញ្ហាការចំណាយ ដែលជាលក្ខខណ្ឌមួយ សម្រាប់ការដំឡើងកម្រិតប្រាក់បំណុល។ បន្ថែមពីលើនេះ គាត់ថែមទាំងបានចោទប្រកាន់ដល់គណបក្សសាធារណរដ្ឋ ថា ពួកគេកំពុងតែចាប់សេដ្ឋកិច្ចរបស់សហរដ្ឋអាមេរិក ធ្វើជាចំណាប់ខ្មាំង។ បញ្ហាកាត់បន្ថយដ៏ធំ ត្រង់ថា គណបក្សសាធារណរដ្ឋចង់បាន គឺមិនមាននៅទីនោះទេ បើទោះជាការចំណាយមិនមែនជាផ្នែកការពារជាតិ នឹងនៅតែមានប្រសិទ្ធភាព រហូតដល់ឆ្នាំក្រោយក៏ដោយ ហើយវាមានតែការកើនឡើង នៅឆ្នាំ២០២៥ប៉ុណ្ណោះ។ សរុបមក កិច្ចព្រមព្រៀងនេះ ប្រហែលជាត្រូវគេចាត់ទុកថា ល្អបំផុត សម្រាប់ជ័យជម្នះមួយរបស់លោក បៃដិន និង គណបក្សប្រជាធិបតេយ្យ ដោយបានផ្តល់នូវការកាត់បន្ថយនូវការចំណាយតិចតួច ប្រកបដោយយុត្តិធម៌ ហើយនឹងការពារដល់ការធ្លាក់ចុះ នៃប្រាក់បំណុលផ្សេងៗទៀត ឬ ការបិទរដ្ឋាភិបាល នៅក្នុងអំឡុងពេលវេលានៅសេសសល់ សម្រាប់តំណែងប្រធានាធិបតីរបស់លោក បៃដិន៕

ប្រទេសឥណ្ឌា ៖ មន្ត្រីរដ្ឋាភិបាលឥណ្ឌាម្នាក់ត្រូវបានគេឱ្យផ្អាកពីការងារមួយរយៈ និងរង់ចាំការស៊ើបអង្កេត ក្រោយពីមន្ត្រីរូបនេះបញ្ជាឱ្យគេបូមទឹកចេញពីទំនប់ដើម្បីស្វែងរកទូរស័ព្ទ១គ្រឿងដែលខ្លួនធ្វើឱ្យធ្លាក់ក្នុងទឹក ខណៈពេលកំពុងថតរូបសែលហ្វី ។

កាលពីថ្ងៃទី២៦ ខែឧសភា កន្លងមក សារព័ត៌មានក្រៅប្រទេសបានចុះផ្សាយថា លោក Rachet Wisawat មន្ត្រីផ្នែកត្រួតពិនិត្យសុវត្ថិភាពអាហាររបស់រដ្ឋាភិបាលឥណ្ឌា បានធ្វើឱ្យទូរស័ព្ទស្មាតហ្វូនរបស់ខ្លួនធ្លាក់ក្នុងទំនប់ Kherkatta កាលពីថ្ងៃទី២១ ខែឧសភា នៅពេលកំពុងព្យាយាមថតរូបសែលហ្វី ។ ក្រោយមក លោកបានទាក់ទងឱ្យអ្នកជ្រមុជទឹកមករកទូរស័ព្ទ ប៉ុន្តែនៅតែពុំឃើញ ។ ហេតុនេះ លោកក៏បានចំណាយប្រាក់ជួលម៉ាស៊ីនបូមទឹកដោយអះអាងថា ទទួលបានការអនុញ្ញាតពីអាជ្ញាធរនៅទីនេះរួចហើយ ដើម្បីឱ្យលោកបូមទឹកចេញខ្លះ ហើយអាជ្ញាធរនៅទីនេះប្រាប់ថា ការបូមទឹកចេញពីទំនប់នឹងជាប្រយោជន៍ដល់កសិករដែលកំពុងត្រូវការទឹក ។ លោកបានបញ្ជាឱ្យគេបូមទឹកចេញពីទំនប់អស់ជាច្រើនថ្ងៃ រហូតដល់អាចស្វែងរកទូរស័ព្ទនោះឃើញវិញ ប៉ុន្តែវាខូចបាត់ទៅហើយ ។

លោក Priyanka Chukla មន្ត្រីប្រចាំការិយាល័យ Kanker ក្នុងរដ្ឋ Chhattisgarh បាននិយាយទៅកាន់សារព័ត៌មានក្នុងស្រុកថា ៖ «គាត់ត្រូវបានគេឱ្យឈប់សម្រាកពីការងារហើយ រហូតដល់បញ្ចប់ការស៊ើបអង្កេត ។ ទឹក គឺជាធនធានធម្មជាតិដ៏សំខាន់មួយ ហើយគាត់មិនគួរបូមទឹកចោលដោយឥតប្រយោជន៍បែបនេះទេ» ។

ចំណែកលោក Rachet Wisawat បានបដិសេធនឹងរឿងការប្រើប្រាស់តួនាទីរបស់ខ្លួនក្នុងផ្លូវខុស ហើយនិយាយថា ទូរស័ព្ទមួយគ្រឿងនេះមានព័ត៌មានរសើបរបស់រដ្ឋាភិបាល ហើយចាំបាច់ត្រូវរកវាឱ្យឃើញ ។ លោកបន្តថា លោកបានបញ្ជាឱ្យគេបូមទឹកចេញពីផ្នែកដែលហៀរពីទំនប់ប៉ុណ្ណោះ មិនមែនបូមទឹកសម្រាប់ប្រើប្រាស់ក្នុងទំនប់ទេ ។

ទោះយ៉ាងណា ទង្វើរបស់លោក Rachet Wisawat ត្រូវបានអ្នកនយោបាយជាច្រើននាក់រិះគន់យ៉ាងខ្លាំង រួមទាំងអនុប្រធានគណបក្សប្រឆាំងផងដែរលើកឡើងថា ខណៈពលរដ្ឋឥណ្ឌាកំពុងត្រូវការទឹកប្រើប្រាស់នៅពេលអាកាសធាតុក្តៅខ្លាំង ប៉ុន្តែមន្ត្រីរូបនេះបែរជាបូមទឹកចេញពីទំនប់អស់ចំនួន៤,១លានលីត្រ ៕ ប្រភព ៖ Thairath

ប្រទេសថៃ៖ ថ្មីៗនេះ LISA សមាជិក BLACKPINK បានក្លាយជា Brand Ambassador ដំបូងរបស់ True Money ។ True Money គឺជាឧស្សាហកម្មផ្តល់សេវាហិរញ្ញវត្ថុឌីជីថលឈានមុខគេនៅអាស៊ីអាគ្នេយ៍។
លោកស្រី Anantinee Jitjarungporn នាយកផ្នែកទីផ្សារនៃក្រុមហ៊ុន Ascend Money Co., Ltd. បានមានប្រសាសន៍ថា នេះជាលើកទីមួយហើយដែល True Money ធ្វើការទំនាក់ទំនងទៅថ្នាក់ជាតិដើម្បីយក LISA ធ្វើជាទូតសុឆន្ទៈ។ លោកស្រីក៏បានបន្តទៀតថា LISA គឺជាតារាដែលមានសមត្ថភាពខ្ពស់ គួរឱ្យស្រលាញ់ រួសរាយរាក់ទាក់ ហើយអ្វីដែលពិសេសនោះគឺនាងអាចជួយឱ្យក្រុមហ៊ុនជោគជ័យខ្លាំងនាពេលអនាគត។

យោងតាមការសិក្សារបស់អ្នកប្រើប្រាស់ True Money បានរកឃើញថា មានមនុស្សជាច្រើននាក់ដែលមានគណនីធនាគារនេះ ហើយប្រឈមមុខនឹងបញ្ហាលំបាកជាច្រើនក្នុងដំណើរការ ដូចជាពេលវេលា ធនធាន…ជាដើម។ ដូច្នេះ True Money ក៏បានខិតខំបត់បែននិងអភិវឌ្ឍសេវាកម្មបន្ថែមដើម្បីតម្រូវចិត្តអតិថិជន។
នៅពេលដែល LISA បានក្លាយជាទូតសុឆន្ទៈរបស់ True Money បច្ចុប្បន្នក្រុមហ៊ុននេះមានអតិថិជនជាង ២៧ លាននាក់ នឹងក្លាយជាកម្មវិធីទំនើបផ្នែកហិរញ្ញវត្ថុតែមួយគត់នៅអាស៊ីអាគ្នេយ៍ ដែលផ្តល់សេវាកម្មដ៏ទូលំទូលាយបំផុតដោយផ្អែកលើគោលគំនិតនៃ “សេវាគ្រប់គ្រងប្រាក់ដោយងាយស្រួល” ដើម្បីជួយឱ្យប្រជាជនថៃទទួលបាននូវសេវាហិរញ្ញវត្ថុទាំងអស់បានយ៉ាងឆាប់រហ័ស និងទទួលបានអត្ថប្រយោជន៍ដ៏មានតម្លៃរាល់ពេលដែលអតិថិជនបានប្រើប្រាស់ True Money ។

ក្នុងឱកាសនៃការប្រារព្ធខួបលើកទី ១០ របស់ខ្លួនក្នុងឆ្នាំនេះ True Money ក៏កំពុងរៀបចំយុទ្ធនាការផ្តល់រង្វាន់ពិសេសៗ សម្រាប់អតិថិជនដែលបានប្រើប្រាស់ True Money ពេញមួយឆ្នាំ រួមជាមួយនឹងសកម្មភាព Surprise Fandom របស់ Lisa ដើម្បីចូលរួមសប្បាយក្នុងពេលឆាប់ៗនេះផងដែរ៕ ប្រភព៖sanook

ដើម្បីអបអរសាទរទិវាកុមារអន្តរជាតិ ១មិថុនា មូលនិធិគន្ធបុប្ផាកម្ពុជាបានរៀបចំ យុទ្ធនាការ «១ម៉ឺនរៀល ១ម៉ឺននាក់» សម្រាប់កុមារកម្ពុជា រួមទាំងអំពាវនាវសប្បុរសនានាទាំងក្នុងនិងក្រៅប្រទេស ចូលរួមបរិច្ចាគតិចក្តីច្រើនក្តីដើម្បីជួយសង្គ្រោះអាយុជីវិតកុមារកម្ពុជា។

តាមសេចក្តីជូនដំណឹងនៅថ្ងៃទី២៩ ខែឧសភា ឆ្នាំ២០២៣ នេះបានបញ្ជាក់ថា យុទ្ធនាការ «១ម៉ឺនរៀល ១ម៉ឺននាក់» សម្រាប់កុមារកម្ពុជា មានរយៈពេល៣០ថ្ងៃ ចាប់ពីថ្ងៃទី១ ដល់ថ្ងៃទី៣០ ខែមិថុនា ឆ្នាំ២០២៣។ យុទ្ធនាការនេះត្រូវបានរៀបចំឡើងក្នុងគោលបំណងកៀរគរការបរិច្ចាគ ទោះតិចក្តី ច្រើនក្តី ពីសប្បុរសជននានា ដើម្បីរួមគ្នាផ្ដល់ក្ដីស្រលាញ់ដល់កុមារនៅកម្ពុជា ជាពិសេសក្នុងឱកាសទិវាកុមារអន្តរជាតិ ១មិថុនា។

សូមបញ្ជាក់ថា យុទ្ធនាការ «១ម៉ឺនរៀល ១ម៉ឺននាក់» ត្រូវបានរៀបចំម្តងរួចមកហើយ កាលពីខែមិថុនា ឆ្នាំ២០២២ ដោយទទួលបានការគាំទ្រយ៉ាងខ្លាំងពីសាធារណជន និងទទួលបានថវិកាបរិច្ចាគជាង ៣០ម៉ឺនដុល្លារអាម៉េរិក។ ខណៈមន្ទីរពេទ្យគន្ធបុប្ផា បានព្យាបាលកុមាររាប់លាននាក់ និងចំណាយថវិកាជាមធ្យម ៤០លានដុល្លារអាមេរិក ក្នុង១ឆ្នាំៗ ដើម្បីធ្វើប្រតិបត្តិការមនុស្សធម៌សង្គ្រោះជីវិតកុមារនៅកម្ពុជា ដោយឥតគិតថ្លៃប្រកបដោយគុណភាព និងមិនមានការរើសអើង៕