កាលពីពេលថ្មីៗនេះ សហព័ន្ធបាល់ទាត់ឥណ្ឌូនេសុី (PSSI) បានប្រកាសតម្លៃសំបុត្រ នៅក្នុងការប្រកួតមិត្តភាពអន្តរជាតិរវាងឥណ្ឌូនេសុី និងអាហ្សង់ទីន ក្នុងថ្ងៃ FIFA’s Day។

សំបុត្រចូលទស្សនារវាង ឥណ្ឌូនេស៊ី ប៉ះ អាហ្សង់ទីន គឺមានតែ ៦០,០០០ សន្លឹកប៉ុណ្ណោះ នឹងត្រូវដាក់លក់នៅថ្ងៃទី៦ ខែមិថុនា ឆ្នាំ២០២៣ ខាងមុននេះ ដោយតម្លៃចាប់ពី៖

• តំបន់ CAT3 : 600,000 rupiah = 39.83 ដុល្លារ
• តំបន់ CAT2 : 1,200,000 rupiah = 79.63 ដុល្លារ
• តំបន់ CAT1 : 2,500,000 rupiah = 165.90 ដុល្លារ
• តំបន់ VIP : 4,250,000 rupiah = 282.11 ដុល្លារ

សូមជម្រាបផងដែរ ការប្រកួតនេះ នឹងប្រព្រឹត្តិទៅនៅថ្ងៃទី១៩ ខែមិថុនា ខាងមុខ នៅកីឡដ្ឋាន Gelora Bung Karno ប្រទេសឥណ្ឌូនេសុី៕

ប្រភព៖ Observerid

ប្រទេសថៃ ៖ យោងតាមទំព័រហ្វេសប៊ុករបស់ថៃមួយឈ្មោះធួរលុង (TOURLONG) បានចុះផ្សាយថា ពលរដ្ឋខ្មែរដែលធ្វើការនៅប្រទេសថៃ ត្រៀមប្រមូលបង្វេចត្រឡប់ទៅប្រទេសកំណើតវិញឱ្យហើយទៅ ដោយសារតែនាយកដ្ឋានការងារប្រទេសថៃបានចាត់វិធានការតឹងរ៉ឹងជាងមុន ។

ទំព័រហ្វេសប៊ុកថៃឈ្មោះ TOURLONG លើកឡើងថា ថៃជាប្រទេសមួយដែលមានសេដ្ឋកិច្ចរីកចម្រើនជាងប្រទេសជិតខាង ដូច្នេះ ធ្វើឱ្យមានពលករបរទេសចូលមកធ្វើការនៅប្រទេសថៃជាច្រើននាក់ ដើម្បីរកប្រាក់ចំណូលផ្គត់ផ្គង់ជីវភាពគ្រួសារ ។ ប៉ុន្តែពលករមួយចំនួនចូលមករស់នៅប្រទេសថៃបានបង្ករឿងរ៉ាវ និងធ្វើឱ្យពលករមកពីប្រទេសដូចគ្នាលក់មុខផងដែរ ។ ជាក់ស្តែង កាលពីពេលថ្មីៗនេះ មានបុរសខ្មែរម្នាក់វាយតប់ជនជាតិថៃស្ទើរស្លាប់ គ្រាន់តែឮពាក្យថាគុនខ្មែរ ហើយនេះជាព័ត៌មានគួរឱ្យតក់ស្លុតមួយ ។ បន្ទាប់ពីមានហេតុការណ៍បុរសខ្មែរម្នាក់វាយតប់ជនជាតិថៃស្ទើរស្លាប់ មនុស្សជាច្រើនមិនចង់យកពលករខ្មែរមកធ្វើការនៅប្រទេសថៃទៀតទេ ។

ទំព័រហ្វេសប៊ុកឈ្មោះ TOURLONG បន្តថា ចុងក្រោយ ក្រសួងការងារថៃបានប្រកាសថា ម្ចាស់អាជីវកម្មណាដែលចង់បានពលករមកពីប្រទេសឡាវ និងកម្ពុជា គឺត្រូវដាក់ឯកសារនៅក្រសួងការងារឱ្យបានមុនថ្ងៃទី១ ខែមិថុនា ឆ្នាំ២០២៣ ។ ក្រសួងការងារថៃប្រកាសទៀតថា ចាប់ពីថ្ងៃទី១ ខែមិថុនា តទៅ អាជ្ញាធរថៃនឹងដើរត្រួតពិនិត្យតាមកន្លែងធ្វើការនានា ហើយបើរកឃើញថា មានពលករបរទេសមិនបានស្នើសុំឯកសារធ្វើការត្រឹមត្រូវតាមច្បាប់កំណត់ គឺចាត់ទុកថា ជាពលករខុសច្បាប់ និងបញ្ជូនត្រឡប់ទៅប្រទេសកំណើតវិញ ។

ទំព័រហ្វេសប៊ុកឈ្មោះ TOURLONG បន្តទៀតថា ចាប់ពីថ្ងៃទី១ ខែមិថុនា ឆ្នាំ២០២៣ តទៅ នាយកដ្ឋានការងារថៃនឹងឈប់ទទួលយកពលករខ្មែរ និងឡាវ ទៀតហើយ រហូតដល់ប្រទេសថៃប្រកាសជូនដំណឹងជាថ្មី ។ ចំណែកពលករមីយ៉ាន់ម៉ាអាចស្នើសុំឯកសារធ្វើការនៅប្រទេសថៃតាមធម្មតា និងគ្មានកំណត់ ។ ទំព័រហ្វេសប៊ុកថៃនេះបន្តថា វាជាព័ត៌មានល្អសម្រាប់មនុស្សជាច្រើន ខណៈបច្ចុប្បន្ន នៅប្រទេសថៃបានចុះផ្សាយព័ត៌មានមិនល្អជាច្រើនអំពីពលករខ្មែរ ។

ទំព័រហ្វេសប៊ុកឈ្មោះ TOURLONG បន្ថែមថា កាលពីថ្ងៃទី២៧ ខែឧសភា កន្លងមក ប៉ូលិសថៃនៅប៉ាតាយ៉ាបានចាប់ខ្លួនជនបរទេសដែលបានប្រើក្មេងឱ្យដើរសុំទាន គឺក្មេងសុំទានទាំងនេះមានអាយុ៨ឆ្នាំចុះក្រោម ហើយពួកគេយកប្រាក់បានពីការសុំទានយកទៅលេងបៀ ។ អ្នកសុំទានទាំងនេះតែងលួចចូលប្រទេសថៃដោយខុសច្បាប់ និងពរក្មេងទៅអង្គុយនៅតាមចំណុចផ្សេងៗដែលមានភ្ញៀវទេសចរច្រើន ហើយទទួលបានប្រាក់ពី៣០០បាត ដល់១.០០០បាតក្នុង១ថ្ងៃ ។ ក្រោយហេតុការណ៍នេះកើតឡើង ក៏មានព័ត៌មានថៃចុះផ្សាយថា ប្រទេសថៃឈប់ទទួលពលករខ្មែរ និងឡាវ ហើយធ្វើឱ្យពលរដ្ឋថៃជាច្រើនចាប់អារម្មណ៍ ។

ទំព័រហ្វេសប៊ុកឈ្មោះ TOURLONG បានដកស្រង់មតិយោបល់របស់អ្នកលេងបណ្តាញសង្គមថៃ ដូចជា ពលរដ្ឋថៃពេញចិត្តនឹងព័ត៌មាននេះ អរគុណអ្នកមានចំណែកពាក់ព័ន្ធអំពីការកំណត់សិទ្ធិរបស់ពលករបរទេស ហើយប្រទេសថៃនឹងមានក្តីសុខ ។ ចំណែកពលរដ្ឋថៃម្នាក់ទៀតថា យល់ស្រប ព្រោះសាសន៍ទាំងពីរនេះប្រឆាំងនឹងថៃច្រើនណាស់ ។ រីឯម្នាក់ទៀតសរសេរថា មករស់នៅប្រទេសថៃដើម្បីក្រពះ ប៉ុន្តែអង្គុយជេរពលរដ្ឋថៃ គឺមិនគួរទទួលយកទៀតទេ ចំណែកពលករខុសច្បាប់ដែលមកឆ្លងទន្លេនៅថៃមានច្រើនណាស់ ដែលថៃត្រួតពិនិត្យមិនឃើញ ។

ចំណែកពលរដ្ឋថៃម្នាក់ទៀតសរសេរថា ល្អណាស់ ជាពិសេស កុំទទួលយកពលករខ្មែរជារៀងរហូតតែម្តង ។ រីឯពលរដ្ឋថៃម្នាក់ទៀតថា ពលករចាស់ដែលផុតកិច្ចសន្យាហើយ ត្រូវបញ្ជូនត្រឡប់ទៅកម្ពុជាវិញឱ្យអស់ ។ ដូចគ្នានេះ ពលរដ្ឋថៃផ្សេងទៀតថា ល្អហើយ ត្រូវជំរុញពលកម្មក្នុងប្រទេសរបស់ខ្លួនជាមុនសិន ពីព្រោះពលរដ្ឋថៃគ្មានការងារធ្វើច្រើន ហើយបន្ទាប់ពីការប្រកួតស៊ីហ្គេមនៅកម្ពុជា ប្រទេសថៃត្រូវបង្កើនចំណាត់ការ ព្រោះតាមព័ត៌មានថា កម្ពុជាទំនាក់ទំនងមកថៃមិនឱ្យទទួលពលកររបស់ខ្លួន ដើម្បីកម្ពុជាយកពួកគេទៅអភិវឌ្ឍន៍នៅប្រទេសរបស់ខ្លួនវិញ ។ រីឯអ្នកបញ្ចេញមតិចុងក្រោយជាពលករខ្មែរលើកឡើងថា អរគុណបាទ ព្រោះមិនចាំបាច់អស់ប្រាក់ធ្វើលិខិតឆ្លងដែន ។

ទំព័រហ្វេសប៊ុកថៃឈ្មោះ TOURLONG បញ្ជាក់ថា បើអ្នកណាម្នាក់ប្រទះឃើញពលករខុសច្បាប់ និងធ្វើការងារដែលប្រទេសថៃហាមឃាត់ ឬធ្វើការនៅថៃដោយគ្មានច្បាប់អនុញ្ញាត (Work Permit) អាចទូរស័ព្ទមកប្តឹងតាមរយៈលេខនេះ ១៦៩៤ ៕

ប្រភព ៖ TOURLONG

ប្រទេសសិង្ហបុរី ៖ សារព័ត៌មាន Bloomberg រាយការណ៍ថា រដ្ឋាភិបាលសិង្ហបុរីជឿជាក់ថា ការងើបឡើងវិញនៃវិស័យទេសចរណ៍ដែលបានលើកកម្ពស់ផ្នែកសេវាកម្មនឹងជួយជំរុញឱ្យប្រទេសសិង្ហបុរីអាចចៀសផុតពីវិបត្តិសេដ្ឋកិច្ចនៅឆ្នាំ២០២៣ បើទោះជាសេដ្ឋកិច្ចពិភពលោកនឹងធ្លាក់ចុះក្តី ។

របាយការណ៍បញ្ជាក់ថា មន្ត្រីសិង្ហបុរីបានរក្សាការព្យាករសម្រាប់កំណើនផលិតផលក្នុងស្រុកសរុប (GDP) ក្នុងចន្លោះពី០,៥% ដល់២,៥% ហើយមន្ត្រីសិង្ហបុរីបញ្ជាក់ថា សេដ្ឋកិច្ចសិង្ហបុរីនឹងកើនឡើងតាមការរំពឹងទុក ។

កាលពីថ្ងៃទី២៥ ខែឧសភា កន្លងមក ក្រសួងពាណិជ្ជកម្ម និងឧស្សាហកម្មសិង្ហបុរីបានផ្សព្វផ្សាយពីការព្យាករសេដ្ឋកិច្ចក្នុងត្រីមាសទី១ ឆ្នាំ២០២៣ ដែលបង្ហាញឱ្យឃើញថា GDP បានធ្លាក់ចុះមកស្មើ០,៤% បើធៀបនឹងត្រីមាសទី៤ ឆ្នាំ២០២២ ។ ដូច្នេះ វាល្អប្រសើរជាងការរំពឹងទុកកាលពីពេលមុននេះថា GDP នឹងធ្លាក់ចុះ០,៧% ។

អ្នកនាង Yong Yik Wei ប្រធានសេដ្ឋវិទូនៃក្រសួងពាណិជ្ជកម្ម និងឧស្សាហកម្ម លើកឡើងថា ៖ «យើងរំពឹងថា សិង្ហបុរីនឹងមិនកើតវិបត្តិសេដ្ឋកិច្ចផ្នែកបច្ចេកទេសនៅឆ្នាំ២០២៣ ទេ ប៉ុន្តែបើពិចារណាពីហានិភ័យផ្សេងៗ និងសេដ្ឋកិច្ចទន់ខ្សោយ គឺយើងមិនអាចបដិសេធបានថា សេដ្ឋកិច្ចនៅក្នុងត្រីមាសខ្លះនឹងធ្លាក់ចុះ ។ ទោះយ៉ាងណា វាមិនមែនជាការព្យាករដំបូងរបស់យើងទេ» ។

បើទោះជាក្រសួងពាណិជ្ជកម្ម និងឧស្សាហកម្មទទួលស្គាល់ថា ហានិភ័យនៃសេដ្ឋកិច្ចពិភពលោកបានកើនឡើង ហើយអាចដាក់បន្ទុកដល់ការប្រើប្រាស់ និងការវិនិយោគផ្នែកអាជីវកម្មកាន់តែច្រើនក្តី ប៉ុន្តែអ្នកនាង Yong Yik Wei បញ្ជាក់ថា ផ្នែកសេវាកម្មនៅតែអាចបត់បែនបាន និងមានចំណែកក្នុងកំណើនសេដ្ឋកិច្ច រួមទាំងការជួលកម្លាំងពលកម្មផងដែរ ៕ ប្រភព ៖ bangkokbiznews

យោងតាមការជូនដំណឹងពីផេក Cambodia 2023 បានឱ្យដឹងថាប្រទេសថៃបញ្ជូនប្រតិភូកីឡាច្រើនជាងគេក្នុងការប្រកួតកីឡាអាស៊ាននប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះដោយក្នុងនោះមានអត្តពលិកប្រកួតចំនួន៣០៤នាក់ មន្រ្តីបច្ចេកទេសចំនួន៣២៥ សរុបប្រតិភូចំនួន ៦២៩ នាក់ខណៈកម្ពុជាជាម្ចាស់ផ្ទះនៅលេខរៀងទី៣ បន្ទាប់ពីឥណ្ឌូនេស៊ី។

ជាមួយគ្នានេះដែរ តាមការបញ្ជាក់តាមរយៈផេកផ្លូវការ CAMSOC បានឱ្យដឹងថា ថៃបានបញ្ជូនគណៈប្រតិភូច្រើនជាងគេដូចទៅការប្រកួតកីឡាអាស៊ីអាគ្នេយ៍ដូចគ្នា ដោយការប្រកួតកីឡាប៉ារ៉ាហ្គេមប្រទេសនេះបានបញ្ជូនអត្តពលិកចូលរួមប្រកួតមានចំនួន៣០៤នាក់ មន្រ្តីបច្ចេកទេសចំនួន៣២៥ សរុបប្រតិភូចំនួន ៦២៩នាក់។ ចំណែកប្រទេសកម្ពុជាវិញស្ថិតនៅលេខរៀងទី៣ ដែលប្រតិភូសរុបចំនួន៣៤៣នាក់ ដែលមានអត្តពលិកចំនួន២៥២នាក់ និង មន្រ្តីបច្ចេកទេស៩១នាក់។

ប្រទេសឈរលេខរៀងទី២គឺ ឥណ្ឌូនេស៊ី ដោយបានបញ្ជូនប្រតិភូសរុបចំនួន ៥៨០នាក់ ដោយអត្តពលិកមានចំនួន២៧៥នាក់ និងមន្រ្តីបច្ចេកទេសមានចំនួន ៣០៥នាក់ ខណៈប្រទេសទីម័រខាងកើតមានចំនួនតិចជាងគេដោយប្រតិភូសរុបមានចំនួន៣១នាក់ប៉ុណ្ណោះ ដោយមានអត្តពលិកចំនួន១៣នាក់ និងមន្រ្តីបច្ចេកទេស ១៨នាក់។ ចំណែកឯប្រទេសព្រុយណេ ក៏តិចដូចគ្នាដោយប្រតិសរុបមានចំនួន៣២នាក់ ដោយអត្តពលិកមានចំនួន២០នាក់ និងមន្ត្រីបច្ចេកទេស១២នាក់។

គួរបញ្ជាក់ថា កីឡាអាស៊ានប៉ារ់ាហ្គេមលើកទី១២ នឹងប្រព្រឹត្តទៅរាជធានីភ្នំពេញចាប់ពីថ្ងៃទី៣-៩ ខែមិថុនា ឆ្នាំ២០២៣ ដែលមាន១៤ប្រភេទកីឡាក្នុងការប្រកួតរួមមាន៖១. អត្តពលកម្ម ២. វាយសី ៣. ប៊ូស្យា ៤.អុក ៥.បាល់បោះពិការភ្នែក ៦.បាល់ទាត់ (ម្ខាង៧នាក់) ៧.បាល់ទាត់ (ម្ខាង៥នាក់) ៨.យូដូ ៩.លើកទម្ងន់ ១០.ហែលទឹក ១១. វាយកូនឃ្លីលើតុ ១២.បាល់ទះអង្គុយ ១៣.បាល់បោះជិះរទេះ និង ១៤.កីឡាអេឡិចត្រូនិច៕

ប្រទេសចិន ៖ អ្នកជំនាញចិនបានដាស់តឿនថា ជំងឺកូវីដនឹងឆ្លងរាតត្បាតនៅប្រទេសចិនជាថ្មី ហើយពលរដ្ឋចិននឹងឆ្លងជំងឺនេះរហូតដល់៦៥លាននាក់ក្នុង១សប្តាហ៍ ក្នុងអំឡុងពេលជំងឺកូវីដឆ្លងខ្លាំងនៅចុងខែមិថុនា ឆ្នាំ២០២៣ ។

គេហទំព័ររបស់ចិនឈ្មោះ Global Times បានចុះផ្សាយថា លោក Zhong Nanshan អ្នកជំនាញផ្នែកជំងឺផ្លូវដង្ហើមលំដាប់ទី១ នៅប្រទេសចិន លើកឡើងថា ពលរដ្ឋចិនប្រមាណ៦៥លាននាក់នឹងឆ្លងជំងឺកូវីដក្នុង១សប្តាហ៍ ខណៈជំងឺកូវីដនឹងឆ្លងរាតត្បាតជាថ្មីនៅប្រទេសចិន រហូតដល់ចុងខែមិថុនា ឆ្នាំ២០២៣ ។

កាលពីថ្ងៃទី២២ ខែឧសភា កន្លងមក លោក Zhong Nanshan អ្នកជំនាញផ្នែកជំងឺផ្លូវដង្ហើមបានលើកឡើងក្នុងកិច្ចប្រជុំផ្នែកវិទ្យាសាស្ត្រនៅទីក្រុងក្វាងចូវថា ជំងឺកូវីដបានឆ្លងរាតត្បាតចំនួន២លើកនៅប្រទេសចិន គឺនៅចុងខែមេសា និងខែឧសភា ឆ្នាំ២០២៣ ។ លោកបន្តថា រដ្ឋាភិបាលចិនបានអនុម័តយកវ៉ាក់សាំងប្រឆាំងនឹងជំងឺកូវីដចំនួន២ប្រភេទ ដែលវាអាចប្រឆាំងនឹងពូជ XBB ហើយរដ្ឋាភិបាលចិននឹងអនុម័តវ៉ាក់សាំងជាច្រើនទៀត ។

មជ្ឈមណ្ឌលគ្រប់គ្រង និងបង្ការជំងឺរបស់ចិនបានរាយការណ៍ពីការឆ្លងរាតត្បាតនៃជំងឺកូវីដនៅទីក្រុងប៉េកាំងថា ជំងឺកូវីដជាជំងឺ១ ក្នុងចំណោម៥ ដែលឆ្លងរាតត្បាតខ្លាំងនៅទីក្រុងប៉េកាំង ក្នុងចន្លោះពីថ្ងៃទី១៥ ដល់ថ្ងៃទី២១ ខែឧសភា កន្លងមក ។ ជំងឺទាំង៥ប្រភេទនេះ មានអ្នកឆ្លងសរុបស្មើនឹង៩៨,៩% នៃជំងឺទាំងអស់ ។

ចំណែកមន្ត្រីសុខាភិបាលចិនបញ្ជាក់ថា XBB គឺជាពូជកូវីដចុងក្រោយបង្អស់ដែលគេបានប្រទះឃើញនៅចិន នាពេលបច្ចុប្បន្ន ។ XBB កើតមកពីពូជអូមីក្រុង ហើយវាងាយឆ្លងជាងអូមីក្រុង ដែលធ្លាប់ឆ្លងរាតត្បាតនៅប្រទេសចិនកាលពីមុន ៕ ប្រភព ៖ TNN World

បរទេស៖ Tesla Model Y គឺជាម៉ូដែលរថយន្តដែលលក់ដាច់បំផុតនៅទូទាំងពិភពលោកក្នុងត្រីមាសទីមួយនៃឆ្នាំនេះ ដោយវ៉ាដាច់ Toyota Corolla និង RAV4 ។ នេះបើយោងតាមទិន្នន័យចុងក្រោយពីក្រុមហ៊ុនស្រាវជ្រាវទីផ្សាររថយន្ត JATO នឹងប្រភពទិន្នន័យដែលប្រមូលបានយ៉ាងត្រឹមត្រូវសម្រាប់ទីផ្សារចំនួន ៥៣ នៅទូទាំងពិភពលោក បូករួមទាំងព័ត៌មាន និងការប៉ាន់ស្មានសម្រាប់ទីផ្សារសំខាន់ៗផ្សេងទៀត។

កាលពីខែសីហាឆ្នាំមុន នាយកប្រតិបត្តិ Tesla លោក Elon Musk បានប្រកាសនៅក្នុងកិច្ចប្រជុំម្ចាស់ភាគហ៊ុនប្រចាំឆ្នាំថា Model Y នឹងក្លាយជារថយន្តថ្មីដែលលក់ដាច់បំផុតនៅលើពិភពលោកក្នុងឆ្នាំ ២០២៣ នេះ។ ដូច្នេះហើយ ការរំពឹងរបស់លោក Elon Musk បានក្លាយជាការពិត ទិន្នន័យដែលប្រមូលបាននៅក្នុងត្រីមាសទី ១ បានបង្ហាញថា Tesla Model Y ជាប់ចំណាត់ថ្នាក់លេខ១ នៅលើពិភពលោក ដែលដឹកនាំជាមួយនឹងរថយន្តចំនួន ២៦៧,២០០ គ្រឿងដែលបានចែកចាយដល់អតិថិជន កើនឡើង ៦៩% ធៀបនឹងរយៈពេលដូចគ្នាកាលពីឆ្នាំមុន។

ចំណាត់ថ្នាក់លេខ ២ គឺ Toyota Corolla ជាមួយនឹងការលក់ ២៥៦,៤០០ គ្រឿង ជាមួយនឹងនិន្នាការធ្លាក់ចុះ រួមទាំងការថយចុះ ២៩% នៅក្នុងប្រទេសចិន និង ១០% នៅសហរដ្ឋអាមេរិក បើធៀបនឹងរយៈពេលដូចគ្នាកាលពីឆ្នាំមុន។ ចំណាត់ថ្នាក់លេខ ៣,៤ និងលេខ ៥ សុទ្ធតែជាកម្មសិទ្ធិរបស់ម៉ាកតូយ៉ូតាទាំងអស់។
រថយន្ត Hilux លក់បាន ២១៤,៧០០ គ្រឿង, RAV4 លក់បាន ២១១,០០០ គ្រឿង និង Camry លក់បាន ១៦៦,២០០ គ្រឿង។ រថយន្ត RAV4 និង Camry ត្រូវបានលក់ជាចម្បងនៅក្នុងទីផ្សារអភិវឌ្ឍន៍ ខណៈដែល រថយន្ត Hilux ត្រូវបានលក់យ៉ាងខ្លាំងនៅក្នុងប្រទេសកំពុងមានសេដ្ឋកិច្ចរីកចម្រើន៕ ប្រភព៖vnexpress