សហរដ្ឋអាមេរិក ៖ ភ្លើងឆេះព្រៃនៅប្រទេសកាណាដាបណ្តាលឱ្យមានផ្សែងខ្មៅរសាត់ឆ្លងកាត់ព្រំដែនទៅដល់រដ្ឋនានារបស់អាមេរិក ហើយរដ្ឋជាច្រើនរបស់អាមេរិកបានប្រកាសជូនដំណឹងទៅពលរដ្ឋអំពីគុណភាពអាកាសធាតុ ក្នុងនោះញូវយ៉កបានក្លាយជាទីក្រុងមួយមានគុណភាពអាកាសធាតុអាក្រក់បំផុតក្នុងចំណោមទីក្រុងផ្សេងៗ ។ អាជ្ញាធរប្រចាំទីក្រុងញូវយ៉កបានជូនដំណឹងទៅពលរដ្ឋរស់នៅក្នុងទីក្រុងនេះឱ្យថែទាំសុខភាព ខណៈបរិយាកាសនៅតំបន់កណ្តាល និងភាគខាងកើតអាមេរិកកាន់តែអាក្រក់ ។

ចំណែកក្រុមហ៊ុន google បានប្រកាសឱ្យបុគ្គលិករបស់ខ្លួនដែលធ្វើការនៅទីក្រុងញូវយ៉ក និងតំបន់ឆ្នេរសមុទ្រភាគខាងកើតអាមេរិកធ្វើការនៅផ្ទះទៀតផង ។ លើសពីនេះ ផលប៉ះពាល់បណ្តាលពីភ្លើងឆេះព្រៃនៅកាណាដា បានធ្វើឱ្យគេពន្យារពេលការប្រកួតកីឡាជាច្រើនប្រភេទ រីឯសួនច្បារ និងសួនសត្វជាច្រើនកន្លែងត្រូវបិទទ្វារ ខណៈសាលារៀនជាច្រើនផ្អាកការធ្វើសកម្មភាពនៅកណ្តាលថ្ងៃដើម្បីសុវត្ថិភាពសិស្ស ។ លើសពីនេះ ការិយាល័យអាកាសចរណ៍កណ្តាលបានបញ្ជាឱ្យផ្អាកជើងហោះហើរមកកាន់អាកាសយានដ្ឋាន LaGuardia នៅទីក្រុងញូវយ៉កផងដែរ ។

អភិបាលទីក្រុងញូវយ៉ក លោកស្រី Kathy Hochul បានលើកឡើងថា គុណភាពអាកាសធាតុនៅទីក្រុងញូវយ៉កដ៏អាក្រក់នេះ ចាត់ទុកថា ជាវិបត្តិមួយត្រូវតែដោះស្រាយជាបន្ទាន់ ហើយវានឹងកើតឡើងបន្តច្រើនថ្ងៃទៀត ។ លោកស្រីបន្ថែមថា លោកស្រីបានឱ្យគេត្រៀមរកម៉ាស់ប្រមាណ១លានម៉ាស់មកចែកឱ្យពលរដ្ឋ និងស្នើសុំពលរដ្ឋកុំចេញក្រៅនៅពេលនេះ ។

កាលពីថ្ងៃទី៦ ខែមិថុនា កន្លងមក សារព័ត៌មាន Heatmap បានចុះផ្សាយថា ពលរដ្ឋរស់នៅតំបន់ឆ្នេរសមុទ្រភាគខាងកើតអាមេរិកបានស្រូបយកជាតិពុលយ៉ាងច្រើន ដោយសារភ្លើងឆេះព្រៃនៅឆ្នាំ២០២៣ នេះ បើធៀបនឹងពលរដ្ឋរស់នៅតំបន់ឆ្នេរសមុទ្រភាគខាងលិច ។ ចំណែកសារព័ត៌មាន The New York Times បានចុះផ្សាយនៅថ្ងៃទី៧ ខែមិថុនា ថា ពលរដ្ឋអាមេរិកបានប្រឈមនឹងបរិយាកាសអួរអាប់កើនឡើងរហូតដល់២៧ដងក្នុងរយៈពេល១០ឆ្នាំកន្លងមក ៕ ប្រភព ៖ pptv hd 36

ប្រទេសថៃ ៖ ក្រសួងពាណិជ្ជកម្មថៃបានប្រកាសថា ហាមនាំចេញខ្សាច់ធម្មជាតិគ្រប់ប្រភេទទៅក្រៅប្រទេស ហើយការហាមឃាត់នេះនឹងអនុវត្តចាប់ពីថ្ងៃទី១១ ខែវិច្ឆិកា ឆ្នាំ២០២៣ តទៅ ។ ក្រសួងពាណិជ្ជកម្មថៃឱ្យដឹងថា បច្ចុប្បន្ន ប្រទេសថៃកំពុងខ្វះខាតខ្សាច់ប្រើប្រាស់ ហើយថៃបានចំណាយប្រាក់អស់១.៣២៦លានបាតក្នុង១ឆ្នាំលើការនាំចូលខ្សាច់ទៀតផង ។ ម្យ៉ាងទៀត ប្រទេសថៃនឹងអភិរក្សខ្សាច់ជាធនធានធម្មជាតិដ៏សំខាន់ និងចៀសវាងផលប៉ះពាល់ដល់បរិស្ថាន ។

លោក រុនណារ៉ុង ផុលភិផាត់ អគ្គនាយកដ្ឋានពាណិជ្ជកម្មក្រៅប្រទេសលើកឡើងថា នាយកដ្ឋានពាណិជ្ជកម្មក្រៅប្រទេសបានពិនិត្យ និងកែលម្អវិធានការការនាំចេញខ្សាច់នៅក្រោមការប្រកាសរបស់ក្រសួងពាណិជ្ជកម្មថា កំណត់ឱ្យខ្សាច់ក្លាយជាផលិតផលត្រូវហាមនាំចេញទៅក្រៅប្រទេស ។ ការហាមនាំចេញខ្សាច់នេះ ដើម្បីឱ្យស្របនឹងស្ថានភាពពាណិជ្ជកម្ម និងជាការអភិរក្សធនធានធម្មជាតិ ក៏ដូចជាការពារផលប៉ះពាល់បរិស្ថានប្រទេសថៃផងដែរ ។

ក្រសួងពាណិជ្ជកម្មថៃបានប្រកាសហាមនាំចេញខ្សាច់គ្រប់ប្រភេទទៅក្រៅប្រទេស លើកលែងតែការនាំចេញខ្សាច់ដើម្បីធ្វើជាគំរូ ឬការស្រាវជ្រាវផ្សេងៗ ឬយកខ្សាច់ជាប់ខ្លួនទៅក្រៅប្រទេសដើម្បីប្រើប្រាស់ផ្ទាល់ខ្លួន ក្នុងបរិមាណមិនលើសពី២គីឡូក្រាម ហើយនឹងអនុវត្តចាប់ពីថ្ងៃទី១១ ខែវិច្ឆិកា ឆ្នាំ២០២៣ តទៅ ។

ខ្សាច់ គឺជាធនធានធម្មជាតិដ៏សំខាន់មួយក្នុងផ្នែកឧស្សាហកម្មសំណង់ ព្រមទាំងឧស្សាហកម្មកែវ និងកញ្ចក់ ។ កាលពីឆ្នាំ២០២២ ប្រទេសថៃបាននាំចេញខ្សាច់ទៅក្រៅប្រទេស ប្រមាណ៨៨៥.១១តោន ស្មើនឹងទឹកប្រាក់១៧.៤៦លានបាត ។ ជាមួយគ្នានេះ ប្រទេសថៃបាននាំចូលខ្សាច់ប្រមាណ១.៨១៧.០២៩តោន ស្មើនឹងទឹកប្រាក់១.៣២៦លានបាត ។ បច្ចុប្បន្ន ប្រទេសថៃខ្វះខាតខ្សាច់សម្រាប់បំពេញតម្រូវការប្រើប្រាស់ក្នុងប្រទេស ហើយត្រូវនាំចូលខ្សាច់ពីក្រៅប្រទេសបន្ថែមទៀត ។

ការជីកយកខ្សាច់មកធ្វើអាជីវកម្មនឹងធ្វើឱ្យប្រទេសថៃជួបបញ្ហាបាក់ច្រាំងទន្លេ និងប៉ះពាល់ដល់បរិស្ថានផងដែរ ប្រសិនបើគ្មានការរៀបចំវត្ថុធាតុដើម ហើយនៅតែមានការនាំចេញខ្សាច់ទៅក្រៅប្រទេសបែបនេះ ។ ក្រសួងពាណិជ្ជកម្មសូមឱ្យក្រុមហ៊ុនអាជីវកម្មនានាដែលមានបំណងនាំចេញខ្សាច់ ត្រូវតែសិក្សា និងឈ្វេងយល់ឱ្យបានច្បាស់លាស់ជាមុន ចៀសវាងមានបញ្ហា ៕ ប្រភព ៖ Nation

បរទេស៖ លោក Mark Zuckerberg បាននិយាយថាអ្វីដែលមាននៅលើវ៉ែនតាឆ្លាតវៃរបស់ Apple គឺគ្មានអ្វីប្លែកទេ ខណៈដែលតម្លៃនៃផលិតផលនេះមានកម្រិតខ្ពស់។

យោងតាមប្រភព The Verge កាលពីថ្ងៃទី៨ ខែមិថុនា បានឱ្យដឹងថា ក្រុមហ៊ុន Apple ទើបតែដាក់បង្ហាញនៅផលិតផលថ្មីរបស់ខ្លួនជាផ្លូវការ ជាមួយនឹងវ៉េតា Vision Pro ដែល មានតម្លៃខ្ពស់បំផុតនៅលើទីផ្សាររហូតដល់ ៣,៥០០ ដុល្លារ។ Vision Pro គឺជាវ៉េនតា 3D ដែលធ្វើការរចនាបែបវិទ្យាសាស្ត្រ នឹងមានសមត្ថភាពគ្រប់គ្រងទាំងស្រុងដោយដៃ ភ្នែក និងកាយវិការសំឡេង ហើយអ្វីដែលពិសេសនោះវ៉ែនតានេះក៏អាចឆ្លុះមើលពីអនាគតកាលបានទៀតផង។

យោងតាមនាយកប្រតិបត្តិ Meta ដែលជាអ្នកបានត្រួតពិនិត្យលើវ៉ែនតា Vision Pro របស់ Apple បាននិយាយថា «វ៉ែនតានេះមិនមានលក្ខណៈពិសេសថ្មីអ្វីដែលយើងមិនបានរកឃើញ ឬគិតនោះទេ»។
ស្របពេលជាមួយគ្នានេះដែលក្រុមហ៊ុន Meta ក៏មានផលិតផលវ៉ែនតាថ្មីរបស់ខ្លួនដែលត្រូវបានប្រកាសដោយក្រុមហ៊ុនកាលពីដើមខែ ជាមួយនឹងវ៉េនតា Meta Quest 3 នឹងមានតម្លៃត្រឹមតែ ៤៩៩ ដុល្លារ ហើយត្រូវបានគេរំពឹងថានឹងដាក់លក់នៅចុងឆ្នាំនេះ។ ប្រធានក្រុមហ៊ុន Meta ជឿជាក់ថាផលិតផលរបស់គាត់គឺមានតម្លៃសមរម្យសម្រាប់មនុស្សគ្រប់គ្នា ជាមួយនឹងគុណភាពខ្ពស់ផងដែរ។

គួរបញ្ជាក់ដែរថា វ៉ែតា Vision Pro គឺជាឧបករណ៍ផ្នែករឹងដំបូងរបស់ Apple ក្នុងវិស័យនិម្មិត និងការពិតបន្ថែម។ ផលិតផលនេះប្រើប្រាស់ស៊ុមអាលុយមីញ៉ូម ផ្ទៃកញ្ចក់ជាមួយនឹងឧបករណ៍ដ៏មានឥទ្ធិពលជាច្រើនដូចជា M២, R១ chip, ឧបករណ៍ចាប់សញ្ញា និងកាមេរ៉ារាប់សិប។ កញ្ចក់ចំហៀងនីមួយៗមានអេក្រង់ Micro LED ទំហំ ២៣ លានភីកសែល ដែលមានដង់ស៊ីតេខ្ពស់ជាងទូរទស្សន៍ ៤K ហើយវ៉ែនតានេះត្រូវបានគេរំពឹងថានឹងដាក់លក់នៅដើមឆ្នាំ ២០២៤៕ ប្រភព៖vnexpress

រដ្ឋមន្ត្រីការបរទេសសិង្ហបុរីលោក Vivian Balakrishnan បានចេញមុខសូមទោសទៅកាន់ប្រជាជនម៉ាឡេស៊ី បន្ទាប់ពីតារាកំប្លែងម្នាក់​មានជនជាតិដើមសិង្ហបុរី បច្ចុប្បន្នរស់នៅអាមេរិក បានយកការបាត់ខ្លួនរបស់ MH370 របស់ប្រទេសម៉ាឡេសុី ធ្វើជារឿងកំប្លែង។នៅក្នុងអំឡុងពេលសម្តែងនៅទីក្រុងញូវយ៉ក តារាកំប្លែងស្រី Chia បាននិយាយលេងសើចទាក់ទងនឹងការផ្តាច់ខ្លួនឆ្នាំ១៩៦៥របស់សិង្ហបុរី ពីម៉ាឡេសុី ដោយលើកឡើងថាសិង្ហបុរីបានជាប្រទេសលំដាប់ទីមួយនៅអាសុី ខណៈម៉ាឡេស៊ីនៅតែជាប្រទេសកំពុងអភិវឌ្ឍនៅឡើយ។

មិនតែប៉ុណ្ណោះនាងក៏និយាយលេងសើចពាក់ព័ន្ធទៅនឹងការធ្លាក់យន្តហោះ MH370 របស់ម៉ាឡេសុីថែមទៀតផងដែរ ដោយនាងនិយាយថា៖” យន្តហោះម៉ាឡេសុី មានអាចហោះហើរបានទេ ពេលធ្វើដំណើរតាមក្រុមហ៊ុនអាកាសចរម៉ាឡរសុី ប្រយ័ត្នយន្តហោះចុះចតខុសព្រលាន”។

ពាក្យមួយឃ្លានេះ គឺសម្តៅទៅលើការធ្លាក់យន្តហោះ MH370 កាលពីថ្ងៃទី៨ ខែមីនា ឆ្នាំ២០១៤កន្លងទៅ ដោយបានឆក់យកជីវិតអ្នកដំណើរ២២៧នាក់។

ប្រជាជនម៉ាឡេស៊ីមានការភ្ញាក់ផ្អើលខ្លាំង បន្ទាប់ពីនាង Chia ដែលជាអ្នកកំប្លែងអាជីពនៅទីក្រុងញូវយ៉ក ធ្វើការលេងសើចលើសពេក ដែលអាចនឹងបំផ្លាញទំនាក់ទំនងរវាងប្រទេសទាំងពីរ។

ជុំវិញករណីនេះ ម៉ាឡេសុី និងសិង្ហបុរី បានធ្វើការថ្កោលទោស និងបិទសិទ្ធមិនឱ្យតារាកំប្លែងរូបនេះវិលចូលប្រទេសវិញនោះទេ ដោយស្នើសុំឱ្យចេញមុខសូមទោសជាសាធារណៈថែមទៀតផងដែរ៕

ប្រភព៖ CNA

ស្ពាន​បេតុង Eshima Ohashi ក្នុង​ប្រទេស​ជប៉ុន ដែល​ភ្ជាប់​ក្រុង Matsue ខេត្ត Shimane ទៅ​កាន់ Sakaiminato ខេត្ត Tottori មាន​សភាព​ចោទ​យ៉ាង​ខ្លាំង។

ស្ពាន Eshima Ohashi មាន​ប្រវែង​សរុប ១,៧​គីឡូម៉ែត្រ និង​ទទឹង ១១,៤​ម៉ែត្រ។ សម្រាប់​អ្នក​ទើប​រៀន​បើកបរ​ថ្មីៗ ប្រហែល​ជា​មិន​អាច​បើក​ឆ្លង​ផុត​ស្ពាន​​​នេះ​បាន​ទេ ដោយសារ​ជម្រាល​ដ៏​ខ្ពស់​គួរឱ្យ​ខ្លាច។

​ស្ពាន​ដ៏​អស្ចារ្យ​នេះ មាន​ជម្រាល ៦,១​ភាគ​រយ​ទៅ​ខាង​ខេត្ត Shimane និង​ជម្រាល ៥,‌១​ភាគរយ​ទៅ​ខេត្ត Tottori ដែល​មើល​ទៅ​ស្រដៀង​នឹង Rollercoaster(ម៉ាស៊ីន​ជិះ​កម្សាន្ត​មាន​ផ្លូវ​ឡើង​ចុះ​ខ្ពស់​ៗ)។ ថ្មី​ៗ​នេះ ស្ពាន Eshima Ohashi បាន​លេច​ឡើង​លើ​ពាណិជ្ជកម្ម​របស់​ក្រុមហ៊ុន​មួយ ដែល​ថត​ធ្វើតេស្ត​សមត្ថភាព​យានយន្ត៕

ប្រទេសជប៉ុន ៖ នៅដើមខែមិថុនា ឆ្នាំ២០២៣ គណៈរដ្ឋមន្ត្រីជប៉ុនបានអនុម័តផែនការបន្ថែមអត្ថប្រយោជន៍ការងារដល់ពលករបរទេសមានជំនាញ ដើម្បីទាក់ទាញឱ្យពលករបរទេសចង់មកធ្វើការនៅប្រទេសជប៉ុន និងដោះស្រាយបញ្ហាខ្វះខាតកម្លាំងពលកម្មផងដែរ ។ លើសពីនេះ ប្រទេសជប៉ុនមានគោលបំណងទាក់ទាញពលករបរទេសមានជំនាញមកធ្វើការនៅប្រទេសរបស់ខ្លួន ស្របពេលមានការប្រកួតប្រជែងរវាងប្រទេសនានានៅលើពិភពលោកផងដែរ ។

កាលពីថ្ងៃទី៩ ខែមិថុនា នាយករដ្ឋមន្ត្រីជប៉ុន លោក Kishida Fumio បានថ្លែងនៅមុនកិច្ចប្រជុំគណៈរដ្ឋមន្ត្រីថា ប្រទេសជប៉ុនត្រូវដោះស្រាយបញ្ហាខ្វះខាតកម្លាំងពលកម្មនៅក្នុងប្រទេស ។ ជប៉ុនចាំបាច់ត្រូវបង្កលក្ខណៈងាយស្រួល និងបរិយាកាសការងារល្អដើម្បីឱ្យពលករបរទេសមើលឃើញថា ជប៉ុនជាប្រទេសមួយគួរឱ្យចង់រស់នៅ និងធ្វើការ ។

វិធានការលើកទឹកចិត្តពលករបរទេសមានជំនាញរបស់រដ្ឋាភិបាលជប៉ុន គឺជាការពង្រីកសិទ្ធិ និងអត្ថប្រយោជន៍ការងារផ្សេងៗសម្រាប់ជនបរទេសមកធ្វើការនៅជប៉ុន ។ កាលពី៤ឆ្នាំមុន ប្រទេសជប៉ុនធ្លាប់បានពង្រីកសិទ្ធិ និងអត្ថប្រយោជន៍ការងារសម្រាប់ពលករបរទេស ដើម្បីផ្តល់ឱកាសឱ្យពលករបរទេសមានជំនាញអាចស្នើសុំស្នាក់នៅប្រទេសជប៉ុន ហើយជប៉ុនអនុញ្ញាតឱ្យពួកគេអាចនាំស្វាមី ឬភរិយា ព្រមទាំងកូនមករស់នៅជប៉ុនទៀតផង ។ ទោះយ៉ាងណា ជប៉ុនអនុញ្ញាតសិទ្ធិស្នាក់នៅសម្រាប់ពលករបរទេសមានជំនាញតែ២ក្រុមប៉ុណ្ណោះ គឺការងារសំណង់ និងការងារលើនាវា ហើយនាពេលកន្លងមក មានពលករបរទេសទទួលបានសិទ្ធិនេះត្រឹមតែ១១នាក់ប៉ុណ្ណោះ ។

មុននេះ សមាជិកមួយចំនួនរបស់គណបក្សប្រជាធិបតេយ្យសេរីបានសម្តែងការបារម្ភថា ការបន្ថែមអត្ថប្រយោជន៍ការងារដល់ពលករបរទេសនេះ នឹងធ្វើឱ្យមានបញ្ហាជនអន្តោប្រវេសន៍មករស់នៅប្រទេសជប៉ុនកាន់តែច្រើន ប៉ុន្តែរដ្ឋាភិបាល និងគណៈរដ្ឋមន្ត្រីជប៉ុនបញ្ជាក់ថា ជប៉ុនកំពុងប្រឈមនឹងបញ្ហាខ្វះខាតកម្លាំងពលកម្មជាខ្លាំង ដូច្នេះ ជប៉ុនត្រូវតែដោះស្រាយបញ្ហានេះជាបន្ទាន់ ៕ ប្រភព ៖ TNN World