ប្រទេសវៀតណាម ៖ សារព័ត៌មាន Vietnam News បានចុះផ្សាយថា រដ្ឋាភិបាលវៀតណាមបានអនុម័តផែនការអភិវឌ្ឍន៍បណ្តាញអគ្គិសនីជាតិថ្មី លើកទី៨ ។ ផែនការនេះត្រូវការទឹកប្រាក់វិនិយោគចំនួន១.៣៤៧សែនលានដុល្លារអាមេរិក ដើម្បីកាត់បន្ថយការផលិតអគ្គិសនីពីធ្យូងថ្ម និងកែលម្អបណ្តាញអគ្គិសនីនៅប្រទេសវៀតណាមនៅឆ្នាំ២០៣០ ។

ផែនការអភិវឌ្ឍន៍បណ្តាញអគ្គិសនីនេះ គឺក្នុងគោលបំណងធានាសុវត្ថិភាពផ្នែកថាមពលរបស់វៀតណាម ដោយសារវៀតណាមបានដាក់គោលដៅរក្សាអត្រាកំណើនផលិតផលក្នុងស្រុកសរុប (GDP) ប្រចាំឆ្នាំស្មើនឹង៧% រហូតដល់ឆ្នាំ២០៣០ ហើយវៀតណាមចង់ផ្លាស់ប្តូរការរក្សាកាបូនឱ្យស្ថិតក្នុងកម្រិតកណ្តាល នៅត្រឹមឆ្នាំ២០៥០ ផងដែរ ។

ការសម្រេចបានផែនការនេះនឹងធ្វើឱ្យការផលិតអគ្គិសនីពីធ្យូងថ្មធ្លាក់ចុះនៅសល់ត្រឹម២០% នៃថាមពលអគ្គិសនីទាំងអស់នៅឆ្នាំ២០៣០ ខណៈការបែងចែកថាមពលកកើតឡើងវិញក្នុងចំណោមប្រភពថាមពលផ្សេងៗក្នុងប្រទេសវៀតណាមសរុប នឹងកើនឡើងពី៦៧,៥% ទៅ៧១,៥% ។ ផែនការនេះបង្ហាញឱ្យឃើញថា វៀតណាមនឹងអាចបង្កើនកម្លាំងផលិតអគ្គិសនីរហូតដល់២ដង គឺក្នុងបរិមាណជាង១៥០ជីហ្គាវ៉ាត់នៅឆ្នាំ២០៣០ ខណៈកាលពីឆ្នាំ២០២០ វៀតណាមអាចផលិតអគ្គិសនីបានត្រឹម៦៩ជីហ្គាវ៉ាត់ ។

នៅឆ្នាំ២០៣០ ថាមពលធ្យូងថ្មស្មើនឹង៣០,១៣ជីហ្គាវ៉ាត់ ឬស្មើ២០% នៃប្រភពថាមពលអគ្គិសនីទាំងអស់ បន្ទាប់មក វារីអគ្គិសនីស្មើ១៩,៥%, ថាមពលខ្យល់១៨,៥% និងថាមពលព្រះអាទិត្យ៨,៥% ហើយបណ្តាអគារការិយាល័យ និងផ្ទះសម្បែងពលរដ្ឋប្រមាណពាក់កណ្តាលនៅប្រទេសវៀតណាម នឹងប្រើប្រាស់ថាមពលអគ្គិសនីពីផ្ទាំងសូឡាស្រូបពន្លឺព្រះអាទិត្យ ។ គួរបញ្ជាក់ថា នៅឆ្នាំ២០៣០ ប្រទេសវៀតណាមក៏បានដាក់គោលដៅនាំចេញថាមពលបៃតងផងដែរ ចាប់ពី៥ជីហ្គាវ៉ាត់ ទៅ១០ជីហ្គាវ៉ាត់ ៕ ប្រភព ៖ AEC connect

ព្រឹត្តិការណ៍អាស៊ានប៉ារ៉ាហ្គេម លើកទី១២ ឆ្នាំ២០២៣ ដែលបានប្រកួតជាផ្លូវការចាប់ពីថ្ងៃទី៣-៦ ខែមិថុនា ឆ្នាំ២០២៣ នៅរាជធានីភ្នំពេញ កម្ពុជាសម្រេចបានមេដាយសរុបចំនួន៧០គ្រឿង ក្នុងនោះមានមេដាយមាស ៩គ្រឿង ប្រាក់ ១៨គ្រឿង និងសំរឹទ្ធ ៤៣គ្រឿង ឈរនៅលេខរៀងទី៨ក្នុងចំណោម១១ប្រទេស។ ការទទួលបានមេដាយសរុប៧០គ្រឿងនេះ គឺជា ប្រវត្តិសាស្រ្តថ្មីមួយរបស់កម្ពុជាដែលទទួលបានច្រើនជាងគេបំផុតក្នុងអំឡុងការប្រកួតកីឡាប៉ារ៉ាហ្គេមនាពេលកន្លងមក។

ក្នុងចំណោមមេដាយចំនួន៧០គ្រឿងដែលអត្តពលិកកម្ពុជារកបាននេះផ្នែកកីឡាប៉ារ៉ាអត្តពលកម្ម រកបានមេដាយច្រើនជាងគេ ដែលទទួលបានសរុបមានចំនួន៤៣ គ្រឿង ក្នុងនោះមានមេដាយមាស៦គ្រឿង ប្រាក់១៣គ្រឿង និងសំរឹទ្ធ២៤គ្រឿង។

សូមបញ្ជាក់ថា ចំណាត់ថ្នាក់កំពូលនៅក្នុងតារាងនៃព្រឹត្តិការណ៍អាស៊ានប៉ារ៉ាហ្គេមលើកទី១២ គឺបានទៅលើប្រទេសឥណ្ឌូនេស៊ី ដែលសម្រេចបានមេដាយមាសចំនួន១៥៩គ្រឿងតួលេខសរុបចំនួន៤០១គ្រឿង។ ប្រទេសថៃឈរនៅលេខរៀងទី២ មានមេដាយសរុបចំនួន ៣២៨គ្រឿង។ ចំណែកឯលេខរៀងទី៣ គឺប្រទេសវៀតណាម ទទួលបានមេដាយសរុបចំនួន ២០១គ្រឿង៕

ក្រោយពីមានការរិះគន់ពីអ្នកលេងបណ្តាញសង្គមខ្លាំងក្លាទៅការបង្ហោះបុរសម្នាក់លួចទំពាំង ពេលនេះម្ចាស់ចម្ការ និងជាម្ចាស់ទំពាំងបានចេញវីដេអូបញ្ចប់រឿងដោយមិនវែកញែករកអ្នកខុស អ្នកត្រូវ។ ក្នុងនោះអ្នកស្រីក៏បានបញ្ជាក់ថា ហេតុផលដែលមានការបង្ហោះនោះដោយសារតែសោកស្តាយរបស់ព្រោះអ្វីដែលខ្លួនខិតខំដាំចេញជាលទ្ធផលនិងសង្ឃឹមថាបានប្រាក់ត្រឡប់មកវិញត្រូវចោរលួចយកបាត់ទៅ។ អ្នកស្រីក៏បានបន្ថែមថា គាត់មិនចិត្តចង្អៀតអ្វីនោះដែរបើសិនជាសុំត្រឹមត្រូវនោះ។

រឿងទំពាំង ក្លាយជាប្រធានបទជជែកវែកយ៉ាងខ្លាំងនៅលើបណ្តាញសង្គម ដែលបានកើតឡើងនៅចម្ការមួយកន្លែងស្ថិតនៅភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប ដែលបុរសជាអ្នកលួចនោះមានអាយុ២៧ឆ្នាំ។ ដោយសារតែមានការរិះគន់ដល់ខ្លួនយ៉ាងច្រើនលើសលុប នៅថ្ងៃទី៩ ខែមិថុនា អ្នកស្រីជាម្ចាស់ចំការបានចេញវីដេអូមកបញ្ជាក់ជូនមហាជន និងមកបញ្ចប់រឿងនេះដោយមិនវែកញែករកអ្នកខុសអ្នកត្រូវ។

អ្នកស្រីជាម្ចាស់ចម្ការ បានឱ្យដឹងថា ខ្លួនបានដំណាំរយៈពេល៥ឆ្នាំមកហើយមិនទាន់បានផលនោះទេ ដោយសារតែបានផលហើយចោរលួចជាហូរហែ អ្វីដែលខ្លួនខំធ្វើព្រោះចង់បានចំណូលមកវិញដូចគ្នា ដោយសារតែមានចិត្តខឹងចិត្តក្តៅ គេមានកម្លាំងមាំមួនបែរជាលួចចូលធ្វើឱ្យខូចខាតរបងហើយត្រូវជុសជុលវិញខ្លួនឯងទៀតទើបមានការបង្ហោះ។

បន្ថែមពីលើនេះអ្នកស្រីបានបញ្ជាក់ទៀតថា បើសិនជាចូលចម្ការគាត់ហើយមានការសុំត្រឹមត្រូវនោះ អ្នកស្រីមិនចិត្តចង្អៀតនោះទេ ហើយរឿងនេះពួកគាត់ទាំងពីរនាក់ក៏បានសូមទោស និងធ្វើកិច្ចសន្យាបញ្ចប់រឿងរួចរាល់ហើយ៕

ស្ថាប័ន Miss Grand Cambodia 2023 បានប្រកាសជាសាធារណៈនៅល្ងាចថ្ងៃទី៨ ខែមិថុនា ឆ្នាំ២០២៣ ដកបេក្ខភាព កែវ ស្រីលីន តំណាងខេត្តកំពតព្រោះតែហេតុផលចំនួន២ធំៗ ខណៈស្ថាប័នកញ្ញាឯកដ៏អស្ចារ្យនៃកម្ពុជាបានព្យាយាមទុកឱកាសឱ្យជាច្រើនដង។

ចំពោះមូលហេតុនៃការដកបេក្ខភាព កែវ ស្រីលីន ទី១ ដោយសារតែបេក្ខនារីរូបនេះមិនគោរពតាមគោលការណ៍ និង លក្ខខណ្ឌកុងត្រារបស់ក្រុមហ៊ុន។ មូលហេតុទី២ កែវ ស្រីលីន មិនគោរពពេលវេលា ពិបាកក្នុងការទំនាក់ទំនង ហើយសា្ថប័ន Miss Grand នឹងរៀបចំធ្វើទៅតាមផ្លូវច្បាប់តាមការចែងក្នុងកុងត្រា។

ដំណឹងនៃការប្រកាសដកបេក្ខភាព កែវ ស្រីលីន ចេញពីកម្មវិធី Miss Grand Cambodia 2023 ក៏មានអ្នកគាំទ្រវិស័យនេះបង្ហាញការសោកស្តាយដែរព្រោះគេរំពឹងថានាងនឹងអាចចូលTop នៅក្នុងកម្មវិធីជាក់ជាមិនខាន ព្រោះនាងជាអតីតលំដាប់រងទី៣ កាលពី Miss Grand Cambodia 2022 ។

ជាមួយគ្នានឹងការដក កែវ ស្រីលីន ចេញពីកម្មវិធី ព្រោះមិនគោរពវិន័យ ពេលវេលា ទាំងដែលក្រុមហ៊ុនផ្តល់ឱកាសឱ្យជាច្រើនដងក៏មានពាក្យចចាមអារ៉ាមលើបណ្តញសង្គមថាមានការជំពាក់រហូតម្ចាស់បំណុលបង្ហោះនៅលើហ្វេកប៊ុកទៀតផង៕

កាលពីពេលថ្មីៗនេះ ​ឥណ្ឌាបានដាក់សម្ពោធជាផ្លូវការ នូវអគាររដ្ឋសភាជាតិថ្មីមួយកន្លែង ដោយមានការតុបតែងយ៉ាងស្រស់បំព្រង ដោយមានឆ្លាក់ចម្លាក់កូរសមុទ្រទឹកដោះ ដែលបានទទួលបានស្ងើចសរសើរមិនដាច់ពីមាត់នាយករដ្ឋមន្រ្តីឥណ្ឌា លោក Narendra Modi   ទៅលើស្នាដៃវិចិត្រករ ដែលបានគូររូបកូរសមុទ្រទឹកដោះនេះ ផងដែរ។

លោក Naresh Kumawat ដែលជាវិចិត្រករ និងអ្នកនៅពីក្រោយរូបចម្លាក់នេះ បានលើកឡើថា៖” ចម្លាក់កូរសមុទ្រទឹកដោះនេះ មានប្រវែង២២.៨ម៉ែត្រ និងកម្ពស់២.៧ម៉ែត្រ ដែលជាការបំផុសគំនិត និងយកគំរូតាមរូបចម្លាក់សមុទ្រទឹកដោះ នៅប្រាសាទអង្គរវត្តរបស់កម្ពុជា”។

លោកបានបន្ថែមទៀតថា៖” ខ្ញុំពិតជាសំណាងណាស់ ដែលបានឆ្លាក់រូបសំណាក សម្រាប់អាគាររដ្ឋសភាជាតិថ្មីនេះ​ ទាំងរូបចម្លាក់ព្រះដៃ៨ (amrit)  និងជាពិសេសរូបចម្លាក់កូរសមុទ្រទឹកដោះនេះតែម្តង។ សម្រាប់រូបគោសមុទ្រទឹកដោះនេះ យើងបានពិភាក្សាយ៉ាងយកចិត្តទុក្ខដាក់ជាមួយនឹងក្រសួងវប្បធម៌ និងមជ្ឈមណ្ឌលសិល្បៈរបស់យើង ព្រោះថាយើងមិនចង់ឱ្យមានការឆ្លាក់រូបខុសពី រូបដើមនៅប្រាសាទអង្គរវត្តនោះទេ”។

សូមបញ្ជាក់ផងដែរថា អគាររដ្ឋសភាថ្មីរបស់ឥណ្ឌានេះ ត្រូវបានសាងសង់ឡើង ចំណោយថវិការរយលានដុល្លារអាមេរិក ដែលអាចផ្ទុកសមាជិកចំនួន ៨៨៨រូប និងមានបំពាក់សម្ភារៈបរិក្ខារទំនើបៗជាច្រើនថែមទៀតផងដែរ៕

ប្រភព៖ News Room Post