បរទេស៖ យោងតាមរដ្ឋាភិបាលក្នុងតំបន់នៃកោះ Faroe ដែលជាទឹកដីស្វយ័តរបស់ដាណឺម៉ាកបាននិយាយកាលពីថ្ងៃទី ១៥ ខែមិថុនា ថាសត្វផ្សោតជាង ៥០០ ក្បាលត្រូវបានគេសម្លាប់ចោល ដោយសារពិធីបុណ្យសាសនា។

អ្នកនាំពាក្យរបស់រដ្ឋាភិបាល Faroese ក៏បានបន្ថែមទៀតថា ជារៀងរាល់រដូវក្តៅ ប្រជាជននៅទីនេះតែងតែប្រារព្ធពិធីសាសនាមួយ ដោយធ្វើការបរបាញ់សត្វបង្ហូរឈាម ដែលរឿងនេះធ្វើឱ្យមានការចាប់អារម្មណ៍យ៉ាងខ្លាំងជុំវិញពិភពលោក និងធ្វើឱ្យអ្នកអភិរក្សធម្មជាតិសត្វខឹងសម្បារ ដោយពួកគេបានចាត់ទុកសកម្មភាពនេះព្រៃផ្សៃណាស់។

អង្គការបរិស្ថាន Sea Shepherd ក៏បានរិះគន់ខ្លាំងៗលើការអនុញ្ញាតរបស់កប៉ាល់ទ័ពជើងទឹកដាណឺម៉ាកផងដែរ ក្នុងការមិនរារាំងនិងបណ្តោយឱ្យប្រជាជនធ្វើអ្វីតាមចិត្ត។ ទោះជាយ៉ាងណាក៏ដោយការបរបាញ់នៅតែត្រូវបានគាំទ្រយ៉ាងទូលំទូលាយ ដោយសារប្រជាជននៅទីនោះបានប្រកែកថាប្រព័ន្ធផ្សព្វផ្សាយបរទេស និងអង្គការក្រៅរដ្ឋាភិបាលមិនគោរពវប្បធម៌ និងប្រពៃណីក្នុងស្រុករបស់ពួកគេ។

ជារៀងរាល់ឆ្នាំ ប្រជាជននៅកោះហ្វារ៉ូ តែងតែសម្លាប់ត្រីធំៗជាច្រើនប្រភេទ ប្រហែល ៨០០ ក្បាល។ ក្នុងឆ្នាំ ២០២២ អាជ្ញាធរក៏បានកំណត់ចំនួនសត្វផ្សោតពណ៌សនៅអាត្លង់ទិក ដែលឱ្យពួកគេសម្លាប់ក្នុងមួយឆ្នាំៗមកត្រឹម ៥០០ ក្បាល បន្ទាប់ពីពួកគេធ្លាប់ធ្វើការសម្លាប់សត្វផ្សោតច្រើនជាង ១,៤០០ ក្បាល។ ទោះជាយ៉ាងណាក៏ដោយមនុស្សជាច្រើននៅលើពិភពលោក ហាក់មិនពេញចិត្តនូវទង្វើព្រៃផ្សៃរបស់ប្រជាជនក្នុងតំបន់នោះផងដែរ។ ប្រភព៖vnexpress

រដ្ឋធានីវ៉ាស៊ីនតោន៖ ក្រោយការលុបចោលដំណើរទស្សនកិច្ចរបស់ខ្លួន ក្រោមការចោទប្រកាន់ ប្រឆាំងនឹងក្រុងប៉េកាំង អំពីការបញ្ជូនបាឡុងចារកម្ម ហោះឈបយកការណ៍ នៅពីលើដែនអាកាស នៃតំបន់ហាមឃាត់ដ៏រស៊ើបបំផុតរបស់សហរដ្ឋអាមេរិក កាលពីដើមឆ្នាំ២០២៣នោះមក ប្រមុខការទូតរបស់ប្រទេសមហាអំណាចកំពូលរបស់ពិភពលោក ទាំងយោធា និង សេដ្ឋកិច្ច គ្រោងនឹងធ្វើដំណើរបំពេញទស្សនកិច្ច ទៅកាន់ប្រទេសចិន ដោយផ្ដោតយ៉ាងសំខាន់ ទៅលើសន្ដិភាព នៅច្រកសមុទ្រតៃវ៉ាន់។

សារព័ត៌មាន Taiwan News បានចេញផ្សាយ កាលពីព្រឹក ថ្ងៃសុក្រ ទី១៦ ខែមិថុនា ថា លោក ដាញ៉ែល ជេ. គ្រីថែនប្រ៊ីនខ៍ (Daniel J. Kritenbrink) ឧបការី រដ្ឋមន្រ្ដីក្រសួងការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ា និង តំបន់ប៉ាស៊ីហ្វិក បានបញ្ជាក់ កាលពីថ្ងៃពុធ ថា លោក អេនតូនី ប៊្លីនខេន (Antony Blinken) ប្រមុខការទូតសហរដ្ឋអាមេរិក នឹងបញ្ជាក់ អំពីការគាំទ្ររបស់រដ្ឋាភិបាលក្រុងវ៉ាស៊ីនតោន ចំពោះសន្ដិភាពក្នុងតំបន់ នៅច្រកសមុទ្រតៃវ៉ាន់ នៅក្នុងអំឡុងដំណើរទស្សនកិច្ចរបស់គាត់ ទៅកាន់ប្រទេសចិន ចន្លោះពីថ្ងៃទី១៨-១៩ ខែមិថុនា។

លោកឧបការី រដ្ឋមន្រ្ដីក្រសួងការបរទេសសហរដ្ឋអាមេរិក រូបនេះ បានថ្លែង នៅក្នុងអំឡុងសន្និសីទសារព័ត៌មានពិសេសមួយរបស់ក្រសួងការបរទេស ថា «ខ្ញុំគិត ថា អ្នកនឹងអាចប្រមើលមើល ថា លោកប្រមុខការទូតសហរដ្ឋអាមេរិក នឹងរំឭកឡើងវិញនូវចំណាប់អារម្មណ៍របស់ក្រុងវ៉ាស៊ីនតោន នៅក្នុងការថែរក្សាសន្តិភាព និង ស្ថិរភាព នៅទូទាំងច្រកសមុទ្រតៃវ៉ាន់។ បញ្ហាច្រកសមុទ្រតៃវ៉ាន់ «ក្លាយជាបញ្ហាដ៏សំខាន់បំផុត និង ក៏ជាបញ្ហាប្រឈម ហើយវាជាចំណុចដ៏រសើបបំផុត រវាងសហរដ្ឋអាមេរិក និង ប្រទេសចិន»។

លោកឧបការី រដ្ឋមន្រ្ដីក្រសួងការបរទេស ដាញ៉ែល ជេ. គ្រីថែនប្រ៊ីនខ៍ បានបន្ថែម ថា នេះជាលើកដំបូង ដែលលោករដ្ឋមន្រ្ដី ប្ល៊ីនខេន នឹងធ្វើដំណើរទៅកាន់ប្រទេសចិន នៅក្នុងឋានៈជាប្រមុខការទូតសហរដ្ឋអាមេរិក ហើយក៏ជារដ្ឋមន្រ្ដីការបរទេសលើកដំបូង បានធ្វើដំណើរទៅកាន់ប្រទេសចិន ចាប់តាំងពីឆ្នាំ២០១៨មក។ នៅក្នុងដំណើរទស្សនកិច្ច នាពេលខាងមុខនេះ លោករដ្ឋមន្រ្ដី គ្រោងនឹងរៀបចំកិច្ចប្រជុំជាបន្តបន្ទាប់ ជាមួយមន្ត្រីកំពូលៗរបស់ចិន នៅក្នុងរដ្ឋធានីប៉េកាំង។

លោកឧបការីរដ្ឋមន្រ្ដីក្រសួងការបរទេសសហរដ្ឋអាមេរិក ទទួលបន្ទុកអាស៊ីខាងកើត និង កិច្ចការតំបន់ប៉ាស៊ីហ្វិក រូបនេះ បានសង្កត់ធ្ងន់ ថា ដំណើរទស្សនកិច្ចរបស់ប្រមុខការទូតសហរដ្ឋអាមេរិក មានគោលដៅសំខាន់ៗចំនួន៣ រួមមាន ទី១-លោករដ្ឋមន្រ្ដី មានគោលបំណង បង្កើតបណ្ដាញទំនាក់ទំនងជាចំហ សម្រាប់ពិភាក្សា អំពីបញ្ហាប្រឈមសំខាន់ៗ ដើម្បីដោះស្រាយនូវការយល់ខុស និង រារាំងដល់ការគណនាខុស។ ទី២-លោករដ្ឋមន្រ្ដី នឹងការពារតម្លៃ និង ផលប្រយោជន៍របស់សហរដ្ឋអាមេរិក ហើយបង្ហាញនូវការព្រួយបារម្ភ អំពីបញ្ហាមួយចំនួន និង ពិភាក្សា អំពីបញ្ហាប្រឈម លើសន្តិសុខក្នុងតំបន់ និង ពិភពលោក។ ទី៣-លោករដ្ឋមន្រ្ដី នឹងស្វែងរកនូវកិច្ចសហប្រតិបត្តិការ ប្រកបដោយសក្តានុពល លើវិស័យ ជាច្រើន មានជាអាទិ៍៖ បញ្ហាអាកាសធាតុ និង សេដ្ឋកិច្ច ក៏ដូចជា ការបង្កើននូវការផ្លាស់ប្តូរ រវាងប្រជាជន នៃប្រទេសទាំងពីរ។

លោកឧបការី រដ្ឋមន្រ្ដីការបរទេស សហរដ្ឋអាមេរិក បានបន្ថែម ថា «ការផ្តោតយ៉ាងសំខាន់របស់យើង ជាថ្មីម្តងទៀត ត្រូវតែមានការពិភាក្សា ដោយភាពស្មោះត្រង់ និង ដោយផ្ទាល់ ហើយប្រកបដោយការស្ថាបនា លើផ្នែកទាំង៣នេះ»។

លោក ខឺត កាមបែល (Kurt Campbell) មន្រ្ដីសម្របសម្រួលកិច្ចការតំបន់ឥណ្ឌូ-ប៉ាស៊ីហ្វិក បានបញ្ជាក់ ថា នៅពេលនិយាយ អំពីការចូលរួម ជាមួយប្រទេសចិន នោះ សហរដ្ឋអាមេរិក មានគោលបំណង«គ្រប់គ្រងនូវការប្រកួតប្រជែង» ហើយសហការគ្រប់ទីកន្លែង ដែលអាចធ្វើទៅបាន ខណៈនៅតែថែរក្សាទំនាក់ទំនងយ៉ាងច្បាស់លាស់។

មន្រ្ដីសម្របសម្រួលកិច្ចការតំបន់ឥណ្ឌូ-ប៉ាស៊ីហ្វិក រូបនេះ បានចង្អុលបង្ហាញ ថា «នៅក្នុងរយៈពេល២ឆ្នាំចុងក្រោយនេះ មានចំនួនប្រទេស និង អង្គការនានា បានសម្តែងនូវការគាំទ្រ ចំពោះសន្តិភាព និង ស្ថិរភាពនៅច្រកសមុទ្រតៃវ៉ាន់ កាន់តែកើនឡើងច្រើន។ នេះជាការអភិវឌ្ឍន៍ដ៏សំខាន់មួយ សម្រាប់សេចក្តីថ្លែងការណ៍ដ៏ច្បាស់លាស់ ជុំវិញការព្រួយបារម្ភជាសកល អំពីសំណុំ នៃបញ្ហាទាំងនេះ។ ខ្ញុំគិត ថា សហរដ្ឋអាមេរិក កំពុងតែស្វែងរកនូវការប្តេជ្ញាចិត្តយ៉ាងច្បាស់លាស់ជាទ្វេភាគី និង ការប្តេជ្ញាចិត្តយ៉ាងមុតមាំ នៅក្នុងការថែរក្សាសន្តិភាព និង ស្ថិរភាព…។

ដំណើរទស្សនកិច្ចរបស់លោកប្រមុខការទូតសហរដ្ឋអាមេរិក កើតឡើង ចំពេលទំនាក់ទំនងរវាងសហរដ្ឋអាមេរិក និង ចិន កំពុងតែធ្លាក់ចុះដល់កម្រិតទាបបំផុត។ កាលពីខែមុន លោក វីល្លីយ៉ាម ប៊ឺនស៍ (William Burns) ប្រមុខទីភ្នាក់ងារស៊ើបការណ៍សម្ងាត់ CIA បានធ្វើដំណើរទៅកាន់ប្រទេសចិន ដើម្បីជួបពិភាក្សា ជាមួយnwgសមភាគីរបស់គាត់ ហើយថែមទាំងបើកបណ្តាញទំនាក់ទំនង នៅក្នុងបណ្តាញស៊ើបការណ៍សម្ងាត់។

ទន្ទឹមគ្នានេះ ក្រសួងការពារជាតិតៃវ៉ាន់ ក៏កំពុងតែរៀបចំ ធ្វើសមយុទ្ធយោធា Han Kuang (ហាន គួង) ប្រចាំឆ្នាំរបស់ខ្លួន នៅខែក្រោយ ចន្លោះពីថ្ងៃទី២៤ដល់២៨ខែកក្កដា។ បន្ថែមពីលើនេះ តៃវ៉ាន់ កាលពីថ្ងៃអង្គារ (ទី១៣ ខែមិថុនា) ក៏បានចេញផ្សាយនូវសៀវភៅណែនាំចុងក្រោយបំផុតរបស់ខ្លួន ការពារដល់ជនស៊ីវិល ដោយរួមបញ្ចូលទាំងការណែនាំ អំពីរបៀបបង្កើតឧបករណ៍ជម្លៀសបន្ទាន់ នៅក្នុងករណីមានព្រឹត្តិការណ៍វាយលុកឈ្លានពាន ពីចិន លើមកកោះតៃវ៉ាន់៕

ប្រទេសចិន ៖ Regent International គឺជាអាផាតមិនដ៏ល្បីឈ្មោះមួយនៅទីក្រុងហាងចូវ ប្រទេសចិន និងមានមនុស្សរស់នៅក្នុងអាផាតមិននេះប្រមាណជាង២ម៉ឺននាក់ ហើយចំនួននេះស្មើនឹងចំនួនមនុស្សរស់នៅក្នុងទីក្រុងមួយដែរ ។ អាផាតមិននេះបានបង្កលក្ខណៈងាយស្រួល និងផ្តល់សេវាកម្មគ្រប់បែបយ៉ាងសម្រាប់អ្នករស់នៅ ក្នុងនោះភាគច្រើនជាយុវវ័យ ។

អគារអាផាតមិន Regent International មានរាងជាអក្សរ S និងមានទីតាំងស្ថិតនៅមជ្ឈមណ្ឌលអាជីវកម្មក្នុងទីក្រុងហាងចូវ ។ គេបានសាងសង់អគារនេះឡើង និងរចនាម៉ូដឱ្យក្លាយជាសណ្ឋាគារទំនើបមួយ ប៉ុន្តែក្រោយមក សណ្ឋាគារនេះត្រូវបានគេផ្លាស់ប្តូរមកធ្វើជាអាផាតមិនសម្រាប់ជួលវិញ ក្នុងនោះមានបន្ទប់រាប់ពាន់បន្ទប់ មានតូច និងធំទៅតាមតម្រូវការ ។

អាផាតមិននេះមានកម្ពស់សរុប២០៦ម៉ែត្រ ស្មើជាង៣០ជាន់ ហើយវាបានក្លាយជាទីប្រជុំជនដែលមានសេវាកម្មសម្បូរបែប និងបង្កលក្ខណៈងាយស្រួលក្នុងការប្រកបអាជីវកម្មផ្សេងៗដូចជា ភោជនីយដ្ឋានធំៗសម្រាប់ផ្តល់សេវាកម្មដល់អ្នករស់នៅរាប់ម៉ឺននាក់ មានអាងហែលទឹក ហាងកាត់សក់ និងហាងធ្វើក្រចក ជាដើម ។ អ្នករស់នៅក្នុងអាផាតមិនភាគច្រើនជាយុវវ័យដែលទើបបញ្ចប់ការសិក្សាពីសាកលវិទ្យាល័យ ឬកំពុងតែសិក្សានៅសាកលវិទ្យាល័យឆ្នាំចុងក្រោយ ។

សារព័ត៌មានចិនចុះផ្សាយថា ក្នុងអាផាតមិននេះ សម្រាប់បន្ទប់ទំហំតូចគ្មានបង្អួច គេនឹងដាក់ជួលក្នុងតម្លៃប្រមាណ១.៥០០យាន់ក្នុង១ខែ ចំណែកបន្ទប់ធំ និងមានរានហាលនៅខាងមុខ តម្លៃជួលស្មើនឹង៤.០០០យាន់ក្នុង១ខែ ឬច្រើនជាងនេះ ។

អគារអាផាតមិន Regent International គឺជាអគារមួយក្នុងចំណោមអគារដ៏ធំបំផុតនៅប្រទេសចិន ហើយចំនួនអ្នករស់នៅក្នុងអគារនេះបានធ្វើឱ្យគេជជែកវែកញែកក្នុងបណ្តាញសង្គមចិនផងដែរ ។ បើពិចារណាពីចំនួនបន្ទប់ និងចំនួនជាន់របស់អគារនេះ គេប៉ាន់ស្មានថា អគារនេះមានមនុស្សរស់នៅចាប់ពី១១.០០០នាក់ រហូតដល់២២.០០០នាក់ ៕ប្រភព ៖ khaosod

រដ្ឋធានីកៀវ៖ ស្របពេលរដ្ឋាភិបាលក្រុងកៀវ កំពុងតែបើកប្រតិបត្ដិការវាយបក រំដោះទឹកដីរបស់ខ្លួន ចេញពីការកាន់កាប់របស់ទាហានរុស្ស៊ី នោះ បណ្ដាប្រទេសបស្ចិមលោកជាច្រើន រឹតតែផ្ដល់កម្លាំងទឹកចិត្ដ កាន់តែខ្លាំងក្លាឡើងបន្ថែមទៀត ដល់កងទ័ពអ៊ុយក្រែន ជាមួយនឹងការផ្ដល់ជំនួយគ្រឿងយុទ្ធោបករណ៍ទំនើបៗ កាន់តែច្រើនឡើង ស្របពេលប្រមុខអង្គការណាតូ បានផ្ដល់តម្រុយ អំពីការបញ្ជូនយន្ដហោះចម្បាំងដ៏ទំនើប ផលិតដោយសហរដ្ឋអាមេរិក។

សារព័ត៌មាន The New Voice of Ukraine (ឌឺ ញូវ វ៉យ អហ្វ អ៊ុយក្រែន) បានចេញផ្សាយ កាលពីព្រឹក ថ្ងៃសុក្រ ទី១៦ ខែមិថុនា ថា លោក ជេនស៍ ស្ដូលថែនប៊ឺគ (Jens Stoltenberg) អគ្គលេខាធិការអង្គការណាតូ បានបញ្ជាក់ ថា បណ្ដាប្រទេសជាច្រើន នៃសមាជិកអង្គការសម្ពន្ធភាពយោធាដ៏ខ្លាំងក្លាមួយនេះ មានគោលបំណង បង្ហាត់បង្រៀនដល់អាកាសយានិកអ៊ុយក្រែន អំពីវិធីសាស្រ្ដបើកបរយន្ដហោះចម្បាំងដ៏ទំនើប ប្រភេទ F-16 និង យន្ដហោះចម្បាំងផ្សេងៗទៀតរបស់លោកខាងលិច។ ការបណ្ដុះបណ្ដាលបែបនេះ នឹងផ្ដល់ភាពងាយស្រួល សម្រាប់ជម្រើសរបស់យើង នៅក្នុងការបញ្ជូនយន្ដហោះចម្បាំងទំនើបៗរបស់លោកខាងលិច ទៅកាន់ប្រទេសអ៊ុយក្រែន។

លោកប្រមុខអង្គការណាតូ ជេនស៍ ស្ដូលថែនប៊ឺគ បានបន្ដ ថា ដាណាម៉ាក កំពុងតែដើរតួនាំមុខគេ នៅក្នុងសម្ពន្ធភាពយន្តហោះចម្បាំងរបស់អ៊ុយក្រែន រួមជាមួយនឹងប្រទេសហូល្លង់ដ៍ ផងដែរ។

ជាមួយគ្នានេះដែរ សហរដ្ឋអាមេរិក បានបញ្ជាក់ ថា នៅក្នុងរយៈពេលប៉ុន្មានខែខាងមុខ បណ្ដាប្រទេសជាសម្ពន្ធមិត្តរបស់លោកខាងលិច នឹងធ្វើការរួមគ្នា ដើម្បីកំណត់ ថា តើនៅពេលណា ប្រទេសណា និង ចំនួនយន្តហោះប៉ុន្មានគ្រឿង នឹងត្រូវផ្ទេរទៅកាន់ប្រទេសអ៊ុយក្រែន។ ប៉ុន្ដែអង្គការណាតូ បានបញ្ជាក់ ថា ការផ្តល់យន្តហោះចម្បាំងដ៏ទំនើប F-16 ជាប់ទាក់ទងនឹងអ៊ុយក្រែន នឹងមិនត្រូវប្រើប្រាស់វា ដើម្បីវាយប្រហារ ទៅលើទឹកដីរបស់រុស្ស៊ី នោះឡើយ។

វិទ្យាស្ថានសិក្សាពីសង្គ្រាម (ISW) បានឲ្យដឹង ថា លោកប្រធានអង្គការណាតូ បានផ្តល់តម្រុយ ថា សម្ពន្ធមិត្តលោកខាងលិច អាចនឹងបញ្ជូនយន្តហោះចម្បាំង F-16 ទៅកាន់ប្រទេសអ៊ុយក្រែន នៅក្នុងរយៈពេលប៉ុន្មានខែខាងមុខនេះ។ ទន្ទឹមគ្នានេះ សភាជាន់ទាបរបស់ស្វីស កាលពីថ្ងៃទី១៤ ខែមិថុនា បានអនុម័តបញ្ឈប់នូវការប្រើប្រាស់រថក្រោះ Leopard-2 ចំនួន២៥គ្រឿងរបស់ខ្លួន ហើយបញ្ជូនរថក្រោះទាំងនោះ ត្រឡប់ទៅកាន់ប្រទេសអាល្លឺម៉ង់ វិញ សម្រាប់ផ្ទេរទៅកាន់ប្រទេសអ៊ុយក្រែន។

ជាមួយគ្នានេះដែរ សហរដ្ឋអាមេរិក ចក្រភពអង់គ្លេស ហូល្លង់ដ៍ និង ដាណឺម៉ាក កាលពីថ្ងៃព្រហស្បតិ៍ បានប្រកាសរួមគ្នា ថា បណ្ដាប្រទេសសម្ពន្ធមិត្តទាំងនេះ នឹងផ្តល់ទ្រព្យសម្បត្ដិការពារដែនអាកាស ជា«អាទិភាពខ្ពស់» សម្រាប់ជួយដល់ប្រទេសអ៊ុយក្រែន។ ចំណែកការដឹកជញ្ជូនគ្រឿងយុទ្ធោការណ៍ទាំងនោះ ក៏បានចាប់ផ្តើមហើយដែរ។

លោក ឡយដ៍ អូស្ទីន (Lloyd Austin) ប្រមុខការពារជាតិសហរដ្ឋអាមេរិក បានបញ្ជាក់ ថា «រដ្ឋាភិបាលក្រុងកៀវ មានលទ្ធភាពអាចកែលម្អ ឬ ក៏ជួសជុលប្រព័ន្ធការពារដែនអាកាសដែលខូចខាតរបស់ខ្លួន ហើយអាចយកវាទៅប្រើប្រាស់ នៅក្នុងសមរភូមិឡើងវិញ»៕