បរទេស៖ អ្នកមុជទឹកម្នាក់ជនជាតិក្រិកបានរកឃើញអដ្ឋិធាតុរបស់ HMS Triumph ដែលជានាវាមុជទឹកសម្ងាត់បំផុតរបស់កងទ័ពជើងទឹកអង់គ្លេសក្នុងកំឡុងសង្គ្រាមលោកលើកទីពីរ។
នាវាមុជទឹក HMS Triumph បានបាត់ខ្លួនយ៉ាងអាថ៌កំបាំង ខណៈពេលដែលកំពុងប្រតិបត្តិការនៅឆ្នេរសមុទ្រនៃប្រទេសក្រិកក្នុងឆ្នាំ ១៩៤២ ដែលគិតមកដល់បច្ចុប្បន្នគឺជាង ៨០ ឆ្នាំមកហើយ។

យោងតាមប្រភពព័ត៌មាន Business Insider កាលពីថ្ងៃទី១៤ ខែមិថុនា បានឱ្យដឹងថា អ្នកមុជទឹកជនជាតិក្រិចម្នាក់ឈ្មោះ Kostas Thoctarides បានប្រកាសថាគាត់បានរកឃើញបំណែកនាវាមុជទឹកសម្ងាត់បំផុតកាលពី ៨០ ឆ្នាំមុនបន្ទាប់ពីគាត់បានការស្វែងរក អស់រយៈពេលប្រហែល ២០ ឆ្នាំមកហើយ ដែល Kostas បានកំណត់ទីតាំងនាវាមុជទឹក ហើយកប៉ាល់ HMS Triumph បានលិចនៅក្នុងសមុទ្រ Aegean ដែលជាវិស្វកម្មគួរឱ្យចាប់អារម្មណ៍បំផុត។

ក្រុមអ្នកមុជទឹកបានរកឃើញភស្តុតាងមួយចំនួននៃមូលហេតុនៃការលិចរបស់នាវា HMS Triumph ដោយផ្នែកខាងមុខរងការខូចខាតយ៉ាងដំណំ និងមានស្លាកសញ្ញាផ្ទុះ ដែលបណ្តាលឱ្យកប៉ាល់ និងនាវិករបស់វាលិចទៅបាតសមុទ្រ រួមទាំងសមាជិកនាវិក ៦៤នាក់ទៀត ក៏ត្រូវបានស្លាប់ទាំងអស់នៅក្នុងការលិចនាវានោះផងដែរ។

លោក Kostas Thoctarides អ្នករកឃើញបំណែកនាវាបាននិយាយថា ការស្វែងរក HMS Triumph គឺពិបាកខ្លាំងណាស់ដោយសារពេលវេលាអាកាសធាតុចរន្តក្រោមដីគឺពិតជាអាក្រក់ខ្លាំង។ ទោះជាយ៉ាងណាក៏ដោយ ក៏ពួកយើងនូវតែខិតខំស្វែងរកភុស្តតាងជាច្រើនទៀតនៃការលិចនាវានេះ៕ ប្រភព៖vnexpress

ប្រទេសចិន ៖ ផលប៉ះពាល់ដោយសារបាតុភូតអេលនីណូបានកើតឡើងជាបន្តបន្ទាប់ និងធ្វើឱ្យភ្លៀងធ្លាក់តិចជាងធម្មតា ហើយប្រទេសជាច្រើនប្រឈមនឹងបញ្ហាគ្រោះរាំងស្ងួតធ្ងន់ធ្ងរ ។ ចំណែកនៅប្រទេសចិនក៏បានជួបនឹងគ្រោះរាំងស្ងួតដែរ បើទោះជានៅឆ្នាំ២០២៣ នេះ គ្រោះរាំងស្ងួតនឹងមិនធ្ងន់ធ្ងរស្មើនឹងឆ្នាំ២០២២ ក្តី ប៉ុន្តែដោយសារអាកាសធាតុកាន់តែក្តៅ និងបរិមាណទឹកភ្លៀងធ្លាក់ចុះតិចតួច គេគិតថា នៅតំបន់ភាគកណ្តាល និងភាគនិរតីប្រទេសចិនត្រូវប្រឈមនឹងគ្រោះរាំងស្ងួតខ្លាំង ។

ហេតុនេះ ខេត្តជាច្រើននៅប្រទេសចិនបានណែនាំឱ្យពលរដ្ឋជួយសន្សំសំចៃទឹក ដើម្បីរក្សាបរិមាណទឹកប្រើប្រាស់ឱ្យបានគ្រប់គ្រាន់ ។ ក្រុមហ៊ុនផ្គត់ផ្គង់ទឹកស្អាតមួយកន្លែងនៅទីក្រុងហុយតង ខេត្តលៀងសាន និងខេត្តស៊ីឈួន បានជូនដំណឹងទៅកាន់ពលរដ្ឋថា នាពេលកន្លងមក បរិមាណភ្លៀងធ្លាក់ក្នុងតំបន់មានតិចតួច ហើយបច្ចុប្បន្ន ទីក្រុងកំពុងប្រឈមនឹងបញ្ហាខ្វះខាតទឹកស្អាតសម្រាប់ផ្គត់ផ្គង់ពលរដ្ឋ ។ ក្រុមហ៊ុននេះប្រកាសថា ក្រុមហ៊ុននឹងផ្អាកការផ្គត់ផ្គង់ទឹកនៅពេលយប់ ដើម្បីរក្សាបរិមាណទឹកស្អាតសម្រាប់ប្រើប្រាស់ឱ្យគ្រប់គ្រាន់ ។

គេសង្កេតឃើញថា ការណែនាំរបស់ក្រុមហ៊ុនឱ្យពលរដ្ឋសន្សំសំចៃទឹកនោះ ចំណុចទី១២ បញ្ជាក់ថា ការងូតទឹកញឹកញាប់ពេក គឺមិនល្អសម្រាប់សុខភាពស្បែកទេ ។ ដូច្នេះ ពលរដ្ឋគួរងូតទឹកពី២ដង ទៅ៤ដងប៉ុណ្ណោះក្នុង១ខែ វាសមរម្យបំផុត ។ ប៉ុន្តែពលរដ្ឋរស់នៅទីក្រុងហុយតងមានចម្ងល់នឹងការណែនាំនេះ ហើយពួកគេយល់ពីស្ថានការណ៍ខ្វះខាតទឹកប្រើប្រាស់នាពេលបច្ចុប្បន្ន ។ មនុស្សជាច្រើននិយាយថា បើឱ្យពលរដ្ឋងូតទឹកពី២ដង ទៅ៤ដងប៉ុណ្ណោះក្នុង១ខែ ខណៈប្រទេសចិនកំពុងមានអាកាសធាតុក្តៅបែបនេះ គឺជារឿងពិបាកធ្វើ ។

ចំណែកអ្នកជំនាញនៅចិនលើកឡើងថា ការត្រឡប់មកវិញនៃបាតុភូតអេលនីណូនៅឆ្នាំ២០២៣ នឹងធ្វើឱ្យប្រទេសចិនប្រឈមជាមួយអាកាសធាតុក្តៅខ្លាំងក្នុងឆ្នាំ២០២៣ និងឆ្នាំ២០២៤ ។ កាលពីឆ្នាំ២០០៩ ប្រទេសចិនធ្លាប់ជួបនឹងបាតុភូតអេលនីណូ ហើយចិនបានប្រឈមនឹងគ្រោះរាំងស្ងួតខ្លាំងក្នុងតំបន់ជាច្រើន និងមានរយៈពេលយូរខែ គឺចាប់ពីខែមិថុនា ឆ្នាំ២០០៩ រហូតដល់ខែមេសា ឆ្នាំ២០១០ ៕ ប្រភព ៖ Mono News

បើនិយាយទៅដល់ទន្លេវែងជាងគេនៅលើលោក ច្បាស់ណាស់គេប្រាកដជានឹកឃើញដល់ទន្លេនីល (Nile) នៃទ្វីបអាហ្រ្វិក ដែលមានប្រវែង៦៦៥០គីឡូម៉ែត្រ។  ចុះអ្នកទាំងអស់គ្នាដែរដឹងឬអត់ទន្លេមេគង្គ  ដែលជាសរសៃឈាមនៃប្រទេសកម្ពុជា ឈរនៅលេខប៉ុន្មានជាទន្លេវែងជាងគេបំផុតលើលោក?

ទន្លេមេគង្គជាទន្លេវែងជាងគេលំដាប់លេខ១២ នៅលើពិភពលោក និងឈរនៅលេខ៣នៅទ្វីបអាសុី។  ទន្លេនេះមានប្រវែងប្រហែល ៤៩០៩គីឡូម៉ែត្រ ដែលឆ្លងកាត់ប្រទេសចំនួន៦ប្រទេសគឺ ប្រទេសចិន ប្រទេសភូមា ប្រទេសថៃ ប្រទេសឡាវ ប្រទេសកម្ពុជា ប្រទេសវៀតណាម និងហូរចាក់ចូលក្នុងសមុទ្រចិនខាងត្បូង។ ទន្លេនេះមានទំហំគ្រប់ដណ្តប់លើផ្ទៃដីប្រហែល ២.៦លានគីឡូម៉ែត្រការ៉េ។

ទន្លេមេគង្គជាសរសៃឈាមរបស់ប្រទេសកម្ពុជា ដោយហូរកាត់៥ខេត្ត​​ដែលមានដូចជា ខេត្តស្ទឹងត្រែង ខេត្តក្រចេះ ខេត្តកំពង់ចាម រាជធានីភ្នំពេញ និងព្រៃវែង ហើយបានបញ្ចប់នៅព្រំប្រទល់វៀតណាម។ ទន្លេមេគង្គក៏បានហូរកាត់ផ្លូវជាតិលេខ១ត្រង់ចំនុចស្ពានអ្នកលឿងផងដែរ។

ទន្លេមេគង្គជាធម្មតាត្រូវបានបំបែកទៅជា២គឺ អាងទន្លេមេគង្គលើនៅក្នុងប្រទេសចិន និងអាងទន្លេមេគង្គក្រោមរាប់ចាប់ពីប្រទេសមីយ៉ាន់ម៉ា ឡាវ ថៃ កម្ពុជា និងវៀតណាម៕

តារាចម្រៀង ឈីន រតនៈ បានចែករំលែកបទពិសោធន៍ផ្ទាល់ខ្លួនក្នុងនាមជាអតីតបេក្ខភាពមួយរូបរបស់កម្មវិធី The Voice Cambodia រដូវកាលទី២ ថាអំឡុងពេលប្រលងជាពេលត្រូវសន្សំពិន្ទុពីមហាជនព្រោះពឹងលើសមត្ថភាពតែមួយមុខមិនអាចជោគជ័យឡើយ ដូច្នេះមុនប្រើពេលសម្តីណាមួយត្រូវគិតពិចារណាឱ្យបានច្រើនដង។

នៅល្ងាចថ្ងៃទី១៥ ខែមិថុនា ឆ្នាំ២០២៣ នៅលើបណ្តាញសង្គមរបស់តារាចម្រៀងប្រចាំផលិតកម្មហង្សមាស និងជាអតីតបេក្ខភាពមួយរូបបានចែករំលែកថា « បទពិសោធន៍ខ្លះៗក្នុងនាមខ្ញុំក៏ធ្លាប់ជាបេក្ខភាពប្រឡងកម្មវិធី The Voice Cambodia រដូវកាលទី 2 មួយរូបពេលវេលាដែលកំពុងប្រឡងគឺជាពេលដែលអ្នកគួរសន្សំពិន្ទុះក្តីស្រលាញ់ពី គណៈកម្មការ ជាពិសេសពុកម៉ែបងប្អូនមហាជនតែម្តង សមត្ថភាពតែមួយមុខ មិនអាចជួយឱ្យអ្នកជោគជ័យបានឡើយ ត្រូវបូកផ្សំជាមួយនិងអត្តចរិតផងដែរ ទើបអាចទទួលបានការគាំទ្រពីពុកម៉ែបងប្អូនមហាជនបានយូរអង្វែង » ។

ម្ចាស់បទ «មួយឆាវ» រូបនេះបានបន្ថែមទៀតថា «ដូច្នេះមុននិងប្រើប្រាស់ពាក្យសម្តីសូមគិតពិចារណាឱ្យច្រើនដងមុននិងនិយាយអ្វីមួយ នេះគ្រាន់តែជាបទពិសោធន៍បន្តិចបន្តួចសម្រាប់ចែករំលែកដល់បេក្ខភាពជំនាន់ក្រោយតែប៉ុណ្ណោះ»៕

តារាសម្តែង នី មុន្នីនាថ បានបង្ហាញអារម្មណ៍រំភើបចិត្តជាខ្លាំងបន្ទាប់ពីខ្លួនត្រូវបានឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាលកោតសរសើរ បន្ទាប់ពីតារាសម្តែងរូបនេះបានកៀងគរអ្នកសិល្បៈជាច្រើនរូបចូលរួមក្នុងព្រឹត្តិការណ៍ទិវាពិភពលោកនៃអ្នកបរិច្ចាគឈាម កាលពីថ្ងៃទី១៤ មិថុនានេះ។

នៅលើបណ្តាញសង្គមហ្វេកប៊ុកនាថ្ងៃទី១៥ ខែមិថុនា នេះ នី មុន្នីនាថ ដែលជាប្រធានមូលនិធិមូលនិធិឈាម នី មុនីនាថ បានសរសេរយ៉ាងដូច្នេះថា «ជាមហាកិតិ្តយសសម្រាប់នាងខ្ញុំ ដែលទទួលបានការកោតសរសើរពី ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាលក្នុងព្រឹត្តិការណ៍ ទិវាពិភពលោកនៃអ្នកបរិច្ចាគឈាម ថ្ងៃទី១៤ មិថុនានេះ នៅមជ្ឈមណ្ឌលជាតិផ្តល់ឈាម។ រួមគ្នា ផ្តល់ឈាម ផ្តល់ប្លាស្មា យើងអាចធ្វើបានច្រើនដង ដើម្បីជួយជីវិតមនុស្ស!»។

ជាមួយការកោតសរសើរនេះ តារាសម្តែងទឹកភ្នែក នី មុនីនាថ បានអរគុណយ៉ាងខ្លាំងបំផុតដល់លោក G-Devith និងសិល្បករ សិល្បការិនី ជាច្រើនរូបទៀតទោះជារវល់យ៉ាងណាក៏បានឆ្លៀតផ្តល់ជាកិត្តិយសចូលរួមកម្មវិធីមនុស្សធម៌តាមរយៈការបរិច្ចាគឈាមក្រោមប្រធានបទ «ទិវាពិភពលោកនៃអ្នកបរិច្ចាគឈាម»។

គួរបញ្ជាក់ផងដែរថា ក្នុងទិវាខាងលើដែលប្រព្រឹត្តទៅកាលពីពេលថ្មីៗនេះគេសង្កេតឃើញមានវត្តមានតារាល្បីៗជាច្រើនចូលរួមមានដូចជា៖ លោក ជី ដេវីត , ប៉ែន ចំរ៉ុង,រចនា រ៉ាវ៉ាឌី, ព្រីន,អេឡិច ហ្សូរ៉ា, Athika ,ជេ ស៊ីកា និងសិល្បករផ្សេងទៀតចូលរួមដែលជារឿងគម្រូមួយសម្រាប់ការចូលរួមបរិច្ចាគឈាម៕