ប្រទេសថៃ ៖ បន្ទាប់ពីមហាអំណាចចិនចេញមកអំពាវនាវជាថ្មីឱ្យបញ្ចប់សង្គ្រា.មរវាងកម្ពុជា-ថៃ ហើយចិនសង្ឃឹមថា ភាគីទាំងពីរនឹងអត់ធ្មត់ជាអតិបរមា បញ្ឈប់ការប្រយុ.ទ្ធ និងកាត់បន្ថយភាពតានតឹងនៅតាមបណ្តោយព្រំដែន ចិននៅតែរក្សាជំហរតួនាទីស្ថាបនារបស់ខ្លួនដើម្បីជំរុញការចរចាសន្តិភាពរវាងប្រទេសទាំងពីរនោះ រដ្ឋមន្ត្រីក្រសួងការបរទេសថៃបញ្ជាក់ថា ថៃចង់បញ្ចប់សង្គ្រា.មឈ្លានពាននេះ ប៉ុន្តែកម្ពុជាត្រូវតែឈប់បា.ញ់មុន ។

រដ្ឋមន្ត្រីក្រសួងការបរទេស លោក Sihasak Phuangketkeow បានផ្តល់សម្ភាសន៍ជាមួយសារព័ត៌មាននៅថ្ងៃទី១៦ ខែធ្នូ ឆ្នាំ២០២៥ ថា មន្ត្រីការបរទេសថៃបានជួបឯកអគ្គរដ្ឋទូតចិនប្រចាំប្រទេសថៃ ដែលក្នុងជំនួបនេះ ឯកអគ្គរដ្ឋទូតចិនចង់ឃើញកម្ពុជា-ថៃបញ្ចប់សង្គ្រា.ម និងត្រឡប់មកចរចាសន្តិភាព ចិនចង់ឱ្យភាគីទាំងពីរដោះស្រាយជម្លោះដោយសន្តិវិធី ។ ថៃក៏បង្ហាញពីគោលជំហរការបញ្ចប់សង្គ្រា.ម ប្រសិនបើឈប់បា.ញ់ គឺកម្ពុជាត្រូវតែឈប់មុន ទើបឈានដល់ការចរចាគ្នា ។

ចំណែកការចោទប្រកាន់កម្ពុជាប្រើប្រាស់អាវុធថ្មី ឬសង្ស័យកម្ពុជាយកអាវុធរបស់ចិនមកតបតជាមួយថៃក្នុងសង្គ្រាមព្រំដែន រដ្ឋមន្ត្រីក្រសួងការបរទេស លោក Sihasak ថា អាវុធដែលចិនផ្តល់ឱ្យកម្ពុជា គឺជាអាវុធចាស់ ចិនមិនបានផ្តល់អាវុធថ្មីឱ្យកម្ពុជាទេ ថៃអាចតាមដានថា តើកម្ពុជាបានអាវុធពីណា ហើយថៃក៏បានជជែកពីបញ្ហាអាវុធជាមួយចិនផងដែរ ។ ក្រៅពីនេះ លោកបានទាត់ចោលព័ត៌មានដែលចុះផ្សាយថា កម្ពុជាជួលទាហានស៊ីឈ្នួលបរទេសមកជួយប្រយុទ្ធជាមួយថៃ គឺជាព័ត៌មានគ្មានប្រភពច្បាស់លាស់ ។

លោកក៏បានរំលឹកពីការជជែកគ្នាតាមទូរស័ព្ទរវាងនាយករដ្ឋមន្ត្រីថៃ លោក Anutin Charnvirakul និងប្រធានាធិបតីអាមេរិក លោក Donald Trump កាលពីពេលកន្លងមកថា នៅថ្ងៃនោះ នាយករដ្ឋមន្ត្រីថៃមិនបានជជែកពីការឈប់បាញ់កម្ពុជាទេ ។ បើឈប់បាញ់ គឺកម្ពុជាត្រូវតែឈប់មុន ព្រមទាំងជជែកគ្នាថា តើនឹងឈប់បាញ់នៅពេលណា និងមានលក្ខខណ្ឌអ្វីខ្លះ ។ លោកប្រធានាធិបតី Trump គំរាមដំឡើងពន្ធគយយ៉ាងខ្លាំងក្លាដើម្បីដោះស្រាយជម្លោះព្រំដែនដែលផ្ទុះឡើងជាថ្មីរវាងកម្ពុជា-ថៃ និងដាក់សម្ពាធឱ្យប្រទេសទាំងពីរបញ្ចប់ជម្លោះប្រដាប់អាវុធ វិលទៅគោរពបទឈប់បាញ់នោះ គឺលោក Trump អាចនឹងរង់ចាំឱ្យប្រទេសទាំងពីរចរចាគ្នាបញ្ចប់សង្គ្រាម ព្រោះមិនបានបញ្ជាក់ពីការបញ្ឈប់ចរចាពន្ធគយ ។

កាលពីថ្ងៃទី១៥ ខែធ្នូ អ្នកនាំពាក្យក្រសួងការបរទេសចិន លោក Guo Jiakun និងឯកអគ្គរដ្ឋទូតចិនប្រចាំកម្ពុជា លោក Wang Wenbin បានស្នើឱ្យកម្ពុជា-ថៃបញ្ឈប់សង្គ្រាម ដោយនិយាយថា អាទិភាពចម្បងបំផុត គឺបញ្ឈប់ការប្រយុទ្ធគ្នា និងការពារអាយុជីវិតជនស៊ីវិល បន្ទាប់ពីចិនមើលឃើញថៃបាននិងកំពុងពង្រីកជម្លោះពីព្រំដែនគោករហូតដល់ដែនទឹក ។ ការអន្តរាគមន៍របស់មហាអំណាចចិន គឺជារឿងល្អ បន្ថែមពីលើការអន្តរាគមន៍របស់ប្រទេសនានា រួមទាំងមហាអំណាចអាមេរិកឱ្យថៃគោរពបទឈប់បាញ់ និងកិច្ចព្រមព្រៀងសន្តិភាព ប៉ុន្តែថៃនៅតែរឹងទទឹង ។

កងទ័ពថៃបានបើកឆាកវាយប្រហារមុនមកលើកម្ពុជា ប៉ុន្តែបែរជាឱ្យកម្ពុជាឈប់បាញ់មុន ។ បើនិយាយពាក្យថា «ឈប់បាញ់» សម្រាប់កម្ពុជាមិនមែនជាអ្នកចាប់ផ្តើមមុនទេ រាល់ការផ្ទុះអាវុធ គឺថៃចាប់ផ្តើមមុនទាំងអស់ ហេតុនេះ ភាគីថៃទៅវិញទេដែលជាអ្នកត្រូវឈប់បាញ់មកលើកម្ពុជា ។ កម្ពុជាមិនចង់មានសង្គ្រាមទេ ពលរដ្ឋកម្ពុជាចង់រស់នៅដោយស្ងប់ស្ងាត់គ្មានការឈ្លានពានពីប្រទេសជិតខាង ប៉ុន្តែថៃនៅតែបន្តបាញ់ប្រហារ ទើបកម្ពុជាចាំបាច់បត្រូវប្រើប្រាស់សិទ្ធិការពារខ្លួន និងទឹកដី ។

គួរបញ្ជាក់ថា ថៃនៅតែផ្គើនបន្តឈ្លានពានមិនព្រមឈប់បាញ់លើកម្ពុជា ទោះជាមានការអំពាវនាវពីមហាអំណាចអាមេរិក មហាអំណាចចិន ម៉ាឡេស៊ីជាប្រធានអាស៊ាន និងប្រទេសជាច្រើនក្តី រហូតមកដល់ថ្ងៃទី១៦ ខែធ្នូ កងទ័ពថៃបានបន្តការបាញ់ប្រហារមកលើកងកម្លាំងកម្ពុជានៅយោធភូមិភាគទី៤ និងយោធភូមិភាគទី៥ ។ វីរកងទ័ពកម្ពុជាបាននិងកំពុងបន្តឈរជើងយ៉ាងរឹងមាំ ស្វាហាប់ មោះមុត និងនៅតែតស៊ូប្រយុទ្ធយ៉ាងស្វិតស្វាញតតាំងជាមួយសត្រូវឈ្លានពាននៅគ្រប់សមរភូមិទាំងអស់ ក្នុងការបំពេញតួនាទីរបស់ខ្លួនដើម្បីការពារបូរណភាពទឹកដីកម្ពុជា ៕

ប្រទេសថៃ ៖ ពេលផ្តល់សម្ភាសន៍ជាមួយសារព័ត៌មាននៅវិមានរដ្ឋាភិបាលនាថ្ងៃទី១៦ ខែធ្នូ ឆ្នាំ២០២៥ នាយករដ្ឋមន្ត្រីថៃចាំផ្ទះ លោក Anutin Charnvirakul និយាយបំភ្លៃថា ថៃមិនមែនជាភាគីចាប់ផ្តើមវាយប្រ.ហារមុនទេ និងចោទប្រកាន់កម្ពុជាបង្កសង្គ្រា.មមុន ហើយលោកបានផ្តាំផ្ញើឱ្យប្រធានាធិបតីអាមេរិក លោក Donald Trump ប្រាប់កម្ពុជាឈប់បា.ញ់តបត ឬទម្លាក់អាវុ.ធ ។ រីឯការរឹតបន្តឹងការនាំចេញប្រេងឥន្ធនៈទៅឡាវតាមច្រកព្រំដែនឆងម៉េត ខេត្តឧប៊ុនរ៉ាជថានី ព្រោះខ្លាចបញ្ជូនបន្តទៅកម្ពុជានោះ លោក Anutin បញ្ជាក់ថា គ្មានការបញ្ជូនបន្តទេ ។

បន្ទាប់ពីបញ្ចប់កិច្ចប្រជុំក្រុមប្រឹក្សាសន្តិសុខជាតិនៅវិមានរដ្ឋាភិបាលនៅថ្ងៃទី១៦ ខែធ្នូ លោក Anutin និយាយថា កាលពីថ្ងៃទី១៥ ខែធ្នូ រថយន្តដឹកប្រេងឥន្ធនៈរាប់សិបគ្រឿងបានកកស្ទះនៅច្រកព្រំដែនឆងម៉េត ឃុំឆងម៉េត ស្រុកស៊ិរិនថន ខេត្តឧប៊ុនរ៉ាជថានី ដែលបម្រុងនាំចេញទៅឡាវ ប៉ុន្តែត្រូវបានរឹតបន្តឹង បើតាមការត្រួតពិនិត្យ គឺគ្មានការនាំចេញប្រេងបន្តទៅកម្ពុជាទេ ។ ចំណែកពិភពលោកថា កងទ័ពថៃប្រើប្រាស់អាវុធធុនធ្ងន់គ្រប់ប្រភេទវាយប្រហារកម្ពុជា ដូចជា ៖ យន្តហោះទម្លាក់គ្រាប់បែក F-16 យន្តហោះចម្បាំង Gripen កាំភ្លើងធំ រថក្រោះ ដ្រូនទម្លាក់គ្រាប់បែក ដ្រូនពាំក្បាលគ្រាប់ ដ្រូនបាញ់ផ្សែងពុល និងដ្រូនអត្តឃាតនោះ លោក Anutin ជំរុញឱ្យពិភពលោកទៅពិនិត្យមើលអាវុធដែលកម្ពុជាប្រើប្រាស់ជាមួយថៃ ។

ក្រៅពីនេះ លោក Anutin បាននិយាយពីលោកប្រធានាធិបតី Trump ប្រកាសដំឡើងពន្ធទំនិញកម្ពុជា-ថៃដើម្បីដាក់សម្ពាធឱ្យបញ្ចប់សង្គ្រាមថា ៖ «ខ្ញុំមិនតបតទេ ហើយក៏មិនដឹងថា តើមានប្រទេសណាខ្លះដែលបានដាក់សម្ពាធឱ្យថៃបញ្ចប់សង្គ្រាមឈ្លានពានកម្ពុជា» ។

លោក Anutin មិនឆ្លើយសំណួររបស់អ្នកសារព័ត៌មានដែលសួរថា កាលពីថ្ងៃទី១៥ ខែធ្នូ ក្រសួងការបរទេសចិនបានអំពាវនាវជាថ្មីឱ្យកងទ័ពថៃបញ្ចប់សង្គ្រាមបា.ញ់ប្រហារកម្ពុជា ។ បន្ទាប់មក អ្នកសារព័ត៌មានសួរទៀតថា តើយល់ឃើញយ៉ាងណា ពេលលោកប្រធានាធិបតី Trump គំរាមដំឡើងពន្ធទំនិញកម្ពុជា-ថៃដើម្បីបញ្ចប់សង្គ្រាម? លោក Anutin និយាយយ៉ាងខ្លីថា ៖ «លោក Trump ត្រូវទៅសុំឱ្យកម្ពុជាឈប់បាញ់ថៃ ថៃមិនបានបាញ់មុនទេ» ។

គួរបញ្ជាក់ថា កងទ័ពថៃបានបើកការវាយប្រហារកម្ពុជាតាំងពីថ្ងៃទី៧ ខែធ្នូ រហូតមកដល់ថ្ងៃទី១៦ ខែធ្នូ កងទ័ពថៃនៅតែផ្គើនបន្តវាយប្រហារកម្ពុជាដោយប្រើប្រាស់អាវុធធុនធ្ងន់គ្រប់ប្រភេទ ទោះមានកិច្ចខិតខំសម្របសម្រួលពីម៉ាឡេស៊ីជាប្រធានអាស៊ាន មហាអំណាចអាមេរិក និងមហាអំណាចចិនក៏ដោយ ។ ថ្មីៗនេះ លោកប្រធានាធិបតី Trump បានផ្តល់សម្ភាសន៍ជាមួយកាសែត Wall Street Journal ថា លោកទើបតែបានគំរាមដំឡើងពន្ទគយដើម្បីដោះស្រាយជម្លោះដែលផ្ទុះឡើងជាថ្មីរវាងកម្ពុជា-ថៃ ។ ប្រទេសទាំងពីរនឹងប្រឈមជាមួយការដំឡើងពន្ធគយខ្លាំងក្លាពីអាមេរិក បើពួកគេមិនបញ្ឈប់ជម្លោះប្រដាប់អាវុធ និងវិលទៅគោរពបទឈប់បាញ់ទេនោះ ។

ចំណែកឯកអគ្គរដ្ឋទូតចិនប្រចាំកម្ពុជា លោក Wang Wenbin បានបង្ហោះសារកាលពីយប់ថ្ងៃទី១៥ ខែធ្នូ ថា ៖ «អាទិភាពខ្ពស់បំផុត គឺបញ្ឈប់សង្គ្រាម និងការពារពលរដ្ឋស៊ីវិល ។ យើងសង្ឃឹមថា ភាគីទាំងពីរ (កម្ពុជា-ថៃ) នឹងអត់ធ្មត់ជាអតិបរមា ចាត់គ្រប់វិធានការឈានទៅរកបទឈប់បាញ់ឱ្យបានឆាប់បំផុត ដើម្បីកសាងសន្តិភាព ស្ថិរភាពនៅតាមព្រំដែន និងផលប្រយោជន៍ពលរដ្ឋ ។ ចិននឹងបន្តធ្វើអ្វីៗគ្រប់យ៉ាងតាមដែលអាចធ្វើបានដើម្បីលើកកម្ពស់ការសន្ទនាឈានទៅកសាងសន្តិភាព ចិននឹងបន្តដើរតួនាទីស្ថាបនាតាមវិធីរបស់ខ្លួនក្នុងការនាំមកនូវបទឈប់បាញ់រវាងកម្ពុជា-ថៃ» ។

នៅថ្ងៃទី១៥ ខែធ្នូ អ្នកនាំពាក្យក្រសួងការបរទេសចិន លោក Guo Jiakun ប្រកាសថា មហាអំណាចិនប្តេជ្ញាជំរុញឱ្យមានបទឈប់បាញ់រវាងកម្ពុជា-ថៃ និងងាកមកចរចាសន្តិភាព ពីព្រោះកម្ពុជា-ថៃជាប្រទេសជិតខាង មិនអាចបំបែកចេញពីគ្នា ។ ចិនសង្ឃឹមថា ភាគីទាំងពីរនឹងអត់ធ្មត់ជាអតិបរមា និងចាត់វិធានការទាំងអស់ដើម្បីបញ្ឈប់ការប្រយុទ្ធ កាត់បន្ថយភាពតានតឹងឱ្យបានឆាប់រហ័ស ដោយចិននឹងបន្តមើលឆន្ទៈរបស់ភាគីទាំងពីរធ្វើឱ្យអស់ពីសមត្ថភាពដើម្បីសន្តិភាព ព្រមទាំងដើរតួនាទីស្ថាបនាតាមរបៀបរបស់ខ្លួនដើម្បីឱ្យមានបទឈប់បាញ់ ។

មេដឹកនាំថៃបានរៀបចំផែនការជាមួយកងទ័ពបង្កសង្គ្រាមឈ្លានពានកម្ពុជាជាថ្មីដោយយកលេសគ្រាប់មីន បែរជាចោទប្រកាន់កម្ពុជាបា.ញ់មុន ។ ហេតុនេះ មានតែរង់ចាំការបង្ហាញភស្តុតាងរូបភាពពីផ្កាយរណប និងលទ្ធផលស៊ើបអង្កេតរបស់ក្រុមអ្នកសង្កេតការណ៍អាស៊ាន (AOT) ក្នុងកិច្ចប្រជុំរដ្ឋមន្ត្រីការបរទេសអាស៊ាននាពេលខាងមុខ តើថៃនឹងមានពាក្យអ្វីដោះសា ៕

ប្រទេសថៃ ៖ កាលពីថ្ងៃទី១៥ ខែធ្នូ ឆ្នាំ២០២៥ ស្ថានទូតរុស្ស៊ីប្រចាំប្រទេសថៃ បានចេញសេចក្តីប្រកាសទាត់ចោលព័ត៌មានពលរដ្ឋរុស្ស៊ីធ្វើទាហានស៊ីឈ្នួលក្នុងជម្លោះរវាងកម្ពុជា-ថៃ ថានេះជាព័ត៌មានក្លែងក្លាយក្នុងគោលបំណងបំផ្លា.ញទំនាក់ទំនងមិត្តភាពយូរអង្វែងរវាងរុស្ស៊ីជាមួយថៃ និងប៉ះពាល់ដល់សិទ្ធិរបស់ពលរដ្ឋរុស្ស៊ីដែលស្នាក់នៅប្រទេសថៃ ក្នុងនាមជាភ្ញៀវទេសចរ និងធ្វើជំនួញ ។

យោងតាមសេចក្តីប្រកាសរបស់ស្ថានទូតរុស្ស៊ីក្នុងហ្វេសប៊ុកផេកផ្លូវការកាលពីថ្ងៃទី១៥ ខែធ្នូ សារព័ត៌មានមួយចំនួននៅប្រទេសថៃបានចុះផ្សាយព័ត៌មានក្លែងក្លាយថា កម្ពុជាជួលពលរដ្ឋរុស្ស៊ីធ្វើជាទាហានស៊ីឈ្នួលក្នុងជម្លោះជាមួយថៃ គឺជាព័ត៌មានមិនពិត ។ ព័ត៌មាននេះត្រូវបានប្រឌិតឡើងដោយប្រភពពីខាងក្រៅតំបន់ ក្នុងគោលបំណងធ្វើឱ្យប៉ះពាល់ដល់សិទ្ធិពលរដ្ឋរុស្ស៊ីស្នាក់នៅប្រទេសថៃ ក្នុងឋានៈជាភ្ញៀវទេសចរ ឬធ្វើជំនួញ និងដើម្បីបំផ្លាញមិត្តភាពយូរអង្វែងរវាងរុស្ស៊ី-ថៃ ។

ក្រសួងការបរទេសរុស្ស៊ីមានគោលជំហរច្បាស់លាស់ចំពោះជម្លោះព្រំដែនរវាងកម្ពុជា-ថៃ ដោយអ្នកនាំពាក្យក្រសួងការបរទេសរុស្ស៊ីបានបញ្ជាក់រួចហើយក្នុងសេចក្តីប្រកាសកាលពីថ្ងៃទី១១ ខែធ្នូ ឆ្នាំ២០២៥ ថា ៖ «ប្រទេសរុស្ស៊ីមានទំនាក់ទំនងមិត្តភាព និងកិច្ចសហប្រតិបត្តិការជាមួយកម្ពុជា-ថៃ ។ យើងគាំទ្រឱ្យប្រទេសទាំងពីរដោះស្រាយបញ្ហាដោយសន្តិវិធីដើម្បីបញ្ចប់ជម្លោះព្រំដែន» ។

គួរបញ្ជាក់ថា សារព័ត៌មាននានារបស់ថៃបានចុះផ្សាយចោទប្រកាន់ថា កម្ពុជាជួលពលរដ្ឋរុស្ស៊ីធ្វើជាទាហានស៊ីឈ្នួលក្នុងជម្លោះជាមួយថៃ បន្ទាប់ពីកងទ័ពថៃបើកការវាយប្រហារកម្ពុជាយ៉ាងធ្ងន់ធ្ងរអស់រយៈពេលជាច្រើនថ្ងៃ ដែលនេះជាទម្លាប់របស់សារព័ត៌មានថៃតែងតែងចោទប្រកាន់ និងលាបពណ៌កម្ពុជាដោយគ្មានមូលដ្ឋានរហូតមក ។ ជាក់ស្តែង កាលពីថ្ងៃទី១១ ខែធ្នូ ហ្វេសប៊ុកផេក Army Military Force និងសារព័ត៌មាន Thai Tribune បានចុះផ្សាយព័ត៌មានចោទប្រកាន់ និងភូតកុហកថា ៖ «កម្ពុជាបញ្ជូនទាហានស៊ីឈ្នួលបរទេសមកកាន់តំបន់ព្រំដែន ដើម្បីជួយបង្ហោះដ្រូនអត្តឃាតជាមួយទាហានកម្ពុជា ដូចកាលពីពេលប៉ះទង្គិចគ្នាលើកដំបូង» ។

ក្រសួងការពារជាតិកម្ពុជាបានច្រានចោលការផ្សព្វផ្សាយរបស់ហ្វេសប៊ុកផេក Army Military Force និងសារព័ត៌មាន Thai Tribune ដែលចោទប្រកាន់កម្ពុជាប្រើប្រាស់ទាហានស៊ីឈ្នួលបរទេសមកជួយបង្ហោះដ្រូនអត្ត.ឃា.តក្នុងជម្លោះព្រំដែនជាមួយ-ថៃ ។ ក្រសួងការពារជាតិកម្ពុជាបានទាត់ចោលនូវខ្លឹមសារដែលចុះផ្សាយក្នុងសារព័ត៌មានថៃនេះ និងអះអាងថា គឺជាព័ត៌មានភូតកុហុក ប្រឌិត ក្លែងក្លាយ និងលាបពណ៌មកលើកម្ពុជាតែប៉ុណ្ណោះ ។

កម្ពុជាទាមទារឱ្យភាគីថៃបញ្ឈប់រាល់ការផ្សព្វផ្សាយព័ត៌មានមិនពិតមានចេតនាក្នុងគោលដៅបង្វែរការចាប់អារម្មណ៍ពីការរំលោភបំពានច្បាប់អន្តរជាតិរបស់ខ្លួន ដោយលាបពណ៌កម្ពុជាដើម្បីយកលេសប្រើប្រាស់អាវុធកាន់តែសាហាវមកលើកម្ពុជា ។ ការផ្សព្វផ្សាយព័ត៌មានក្លែងក្លាយរបស់ថៃ គឺប្រាសចាកពីការពិតទាំងស្រុងក្នុងចេតនាមូលបង្កាច់ លាបពណ៌កម្ពុជា ដើម្បីបំភ័ន្តមតិសារព័ត៌មានជាតិ និងអន្តរជាតិ ព្រមទាំងបិទបាំងចេតនាការឈ្លានពានរបស់ថៃមកលើអធិបតេយ្យភាពស្របច្បាប់របស់កម្ពុជា និងបង្កការញុះញង់ ៕