ប្រទេសថៃ ៖ រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវបានបញ្ជាក់កាលពីថ្ងៃទី១៦ ខែធ្នូ ឆ្នាំ២០២៥ ថា ប្រេងឥន្ធនៈដែលនាំចូលពីថៃ គឺប្រើប្រាស់តែក្នុងប្រទេសឡាវប៉ុណ្ណោះ គ្មានការនាំចេញបន្តទៅកម្ពុជាទេ ពីព្រោះខុសច្បាប់ ឡាវនឹងសហការត្រួតពិនិត្យ និងចែករំលែកទិន្នន័យការជួញដូរប្រេងជាមួយថៃ ។ ការច្រានចោលព័ត៌មាននាំចេញប្រេងថៃបន្តទៅកម្ពុជា ក្រោយពីថៃរឹតបន្តឹងការនាំចេញប្រេងទៅឡាវតាមច្រកព្រំដែនឆងម៉េត ឃុំឆងម៉េត ស្រុកស៊ិរិន ខេត្តឧប៊ុនរ៉ាជថានី ដោយសារខ្លា.ចមានការនាំចេញបន្តទៅកម្ពុជា បណ្តាលឱ្យរថយន្តដឹកប្រេងរាប់សិបគ្រឿងកកស្ទះនៅច្រកព្រំដែនឆងម៉េតកាលពីថ្ងៃទី១៥ ខែធ្នូ ។

កាលពីថ្ងៃទី១៦ ខែធ្នូ លោក ម៉ាឡៃថង កុមម៉ាស៊ីត រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវ បានប្រជុំជាមួយរដ្ឋមន្ត្រីក្រសួងថាមពលថៃ ដោយលោក ម៉ាឡៃថង បានបង្ហាញក្តីបារម្ភ និងយល់ពីថៃរឹតបន្តឹងការនាំចេញប្រេងមកប្រទេសឡាវដើម្បីកុំឱ្យឡាវនាំចេញបន្តទៅកម្ពុជា និងបញ្ជាក់ថា ឡាវមិនបាននាំចេញប្រេងបន្តទៅកម្ពុជាទេ ពីព្រោះខុសច្បាប់ពាក់ព័ន្ធនឹងទំនិញឆ្លងកាត់ឡាវ ។ ក្រៅពីនេះ ឡាវរីករាយសហការត្រួតពិនិត្យ និងចែករំលែកទិន្នន័យការជួញដូរប្រងជាមួយថៃ ដើម្បីបង្ហាញភាពច្បាស់លាស់ ។ នេះបើតាមការលើកឡើងរបស់លោក ប្រាសឺត សិនសុខប្រាសឺត មន្ត្រីក្រសួងថាមពលថៃ ។

ថៃបាននាំចេញប្រេងទៅប្រទេសឡាវក្នុងបរិមាណធម្មតា មិនកើនឡើងទេ ដោយសារមានការបញ្ជាក់ច្បាស់លាស់ពីឈ្មួញនាំចូលប្រេង និងនាយកដ្ឋានគយឡាវ ប៉ុន្តែឡាវទទួលស្គាល់ថា ការនាំចូលប្រេងពីថៃមានបរិមាណខុសៗគ្នាក្នុង១លើកៗ និងមានរថយន្តដឹកប្រេងជាមធ្យមប្រមាណ២០គ្រឿងក្នុង១ថ្ងៃ បើកឆ្លងកាត់ច្រកព្រំដែនឆងម៉េត ។ នៅថ្ងៃខ្លះ រថយន្តដឹកប្រេងពីថៃនាំចូលឡាវមានតែ៥គ្រឿងប៉ុណ្ណោះ ថ្ងៃខ្លះទៀតមានច្រើនរហូតដល់៥០គ្រឿង ។ ចាប់ពីខែវិច្ឆិកា ដល់ខែមេសា ជារៀងរាល់ឆ្នាំ គឺជាពេលបញ្ចប់រដូវវស្សាគ្មានភ្លៀង ប្រទេសឡាវមានតម្រូវការប្រេងច្រើនជាងរដូវវស្សា សម្រាប់ប្រើប្រាស់ក្នុងប្រតិបត្តិការអាជីវកម្មនៅប្រទេសឡាវ ជាពិសេស ឧស្សាហកម្មរ៉ែនៅភាគខាងត្បូង ។

លោក ម៉ាឡៃថង រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវបញ្ជាក់ថា ៖ «ក្រសួងថាមពលឡាវ ឈ្មួញជួញដូរប្រេង នាយកដ្ឋានគយ និងស្ថាប័នពាក់ព័ន្ធ ផ្តល់ភាពសំខាន់ និងតាមដានត្រួតពិនិត្យយ៉ាងតឹងរ៉ឹងលើការនាំចេញប្រេងបន្ត ។ ប្រេងដែលនាំចូលពីថៃសម្រាប់តែប្រើប្រាស់ក្នុងប្រទេសឡាវប៉ុណ្ណោះ គ្មានការនាំចេញបន្តទៅកម្ពុជាទេ ហើយក្រសួងថាមពល និងស្ថាប័នពាក់ព័ន្ធអនុវត្តគ្រប់វិធានការដើម្បីឱ្យប្រាកដចិត្តថា គ្មានការនាំចេញប្រេងទៅកម្ពុជាតាមវិធីណាទាំងអស់» ។

កាលពីថ្ងៃទី១៦ ខែធ្នូ បន្ទាប់ពីបញ្ចប់កិច្ចប្រជុំក្រុមប្រឹក្សាសន្តិសុខជាតិនៅវិមានរដ្ឋាភិបាល នាយករដ្ឋមន្ត្រីថៃចាំផ្ទះ លោក Anutin Charnvirakiul និយាយថា តាមការត្រួតពិនិត្យ គឺគ្មានការនាំចេញប្រេងបន្តទៅកម្ពុជាឡើយ ។ បន្ទាប់មក ថៃក៏បានសូមទោសឡាវចំពោះការរឹតបន្តឹងការនាំចេញប្រេងតាមច្រកព្រំដែនឆងម៉េត ដោយថាខ្លួនគ្មានចេតនាធ្វើបាបឡាវ ឬបង្កការលំបាកដល់ពលរដ្ឋឡាវទេ ប៉ុន្តៃដោយសារស្ថានការណ៍ព្រំដែនរវាងកម្ពុជា-ថៃ និងមិនពាក់ព័ន្ធជាមួយប្រទេសផ្សេងៗ ។

គួរបញ្ជាក់ថា ថ្មីៗនេះ ថៃចាប់ផ្តើមរឹតបន្តឹងការនាំចេញប្រេងទៅកាន់ឡាវ ដើម្បីកុំឱ្យឡាវលក់ប្រេងបន្តឱ្យកម្ពុជា ដែលធ្វើឱ្យរថយន្តដឹកប្រេងរហូតដល់៨០គ្រឿង កកស្ទះបន្តគ្នារង់ចាំឆ្លងកាត់ច្រកព្រំដែនឆងម៉េតទៅឡាវ ។ ស្ថានភាពនេះកើតឡើងក្រោយពីលោក វីរៈយុទ្ធ រ៉ាក់ស៊ីន មេបញ្ជាការកងទ័ពភូមិភាគទី២ថៃ បានចុះហត្ថលេខាលើបទបញ្ជាមួយដើម្បីគ្រប់គ្រងការនាំចេញប្រេង និងសម្ភារៈយោធានៅច្រកព្រំដែនឆងម៉េតជាអចិន្ត្រៃយ៍ ដោយអនុវត្តចាប់ពីម៉ោង២៤និង០០នាទីថ្ងៃទី១៥ ខែធ្នូ ។

ការធ្វើបែបនេះដោយសារមានការសង្ស័យឡាវអាចនាំចេញប្រេងបន្តទៅកម្ពុជា ហើយថៃមើលឃើញថា បច្ចុប្បន្ន កម្ពុជាកំពុងប្រឈមនឹងការខ្វះខាតប្រេង និងសម្ភារៈយុទ្ធសាស្ត្រផ្សេងៗ ។ ហេតុនេះ ថៃក៏សម្រេចចិត្តរឹតបន្តឹងការនាំចេញប្រេងទៅឡាវ ក្នុងគោលបំណងទប់ស្កាត់ការចែកចាយបន្តទៅឱ្យកម្ពុជាដើម្បីដាក់សម្ពាធកម្ពុជា ។

តាំងពីថៃបិទព្រំដែនគោកជាឯកតោភាគីមក រាជរដ្ឋាភិបាលកម្ពុជាបានប្រកាសរួចហើយថា នឹងបញ្ឈប់ការនាំចូលប្រេងគ្រប់ប្រភេទពីថៃ ដោយស្វែងរកការនាំចូលពីប្រទេសផ្សេងជំនួសវិញ ខណៈពលរដ្ឋកម្ពុជាក៏ឈប់គាំទ្រប្រេងថៃដូចមុន ។ ថៃនៅតែយល់ច្រឡំថា កម្ពុជាប្រើប្រាស់ប្រេងរបស់ខ្លួន ទើបបិទការនាំចេញប្រេងទៅឡាវ ប៉ុន្តែគ្មានប្រយោជន៍ ដោយសារកម្ពុជាឈប់ប្រើប្រាស់ប្រេងថៃយូរមកហើយ ៕

ប្រទេសថៃ ៖ ពិភពលោកដឹងហើយថា ប្រទេសថៃបង្កសង្គ្រា.មបើកការវាយប្រ.ហារមុន បន្ទាប់ពីរៀបចំផែនការចោទប្រកាន់កម្ពុជាបង្កប់មីនថ្មី ខណៈកម្ពុជាអត់ធ្មត់ខ្លាំងបំផុតរហូតដល់រយៈពេល២៤ម៉ោងក្រោយ ទើបប្រើប្រាស់សិទ្ធិការពារខ្លួនវិញ ។ កម្ពុជាគោរពបទឈប់បា.ញ់ និងកិច្ចព្រមព្រៀងសន្តិភាពទីក្រុងគូឡាឡាំពួររហូតមក ប៉ុន្តែថៃបែរជាទាត់ចោល និងធ្វើសង្គ្រា.មឈ្លានពា.នកម្ពុជាយ៉ាងធ្ងន់ធ្ងរ ដោយការប្រើប្រាស់សព្វាវុ.ធគ្រប់ប្រភេទ រួមទាំងយន្តហោះទម្លាក់គ្រា.ប់បែក បែរជាដាក់លក្ខខណ្ឌឱ្យកម្ពុជាអនុវត្តតាមលក្ខខណ្ឌរបស់ខ្លួន ។

ក្រសួងការបរទេសថៃបានបញ្ជាក់គោលជំហរជាថ្មីកាលពីថ្ងៃទី១៦ ខែធ្នូ ឆ្នាំ២០២៥ ទាមទារឱ្យកម្ពុជាប្រកាសឈប់បា.ញ់មុន និងយល់ព្រមអនុវត្តតាមលក្ខខណ្ឌ៣ចំណុចនេះជាមុន ទើបកងទ័ពថៃបញ្ចប់សង្គ្រា.មបា.ញ់ប្រហារ ហើយក្រសួងការបរទេសថៃនឹងព្យាយាមនាំពលរដ្ឋថៃចាកចេញពីរាជធានីភ្នំពេញ និងទីក្រុងប៉ោយប៉ែត ត្រឡប់មកប្រទេសថៃវិញ ។ ការបញ្ជាក់គោលជំហររបស់ក្រសួងការបរទេសថៃ បន្ទាប់ពីមានកិច្ចខិតខំសម្របសម្រួលពីម៉ាឡេស៊ីជាប្រធានអាស៊ាន មហាអំណាចអាមេរិក និងមហាអំណាចចិនឱ្យថៃបញ្ចប់សង្គ្រា.មជាបន្ទាន់ ងាកមកចរចាដោយសន្តិវិធី និងគោរពកិច្ចព្រមព្រៀងសន្តិភាព ។

កាលពីថ្ងៃទី១៦ ខែធ្នូ នៅមជ្ឈមណ្ឌលរាយការណ៍ព័ត៌មានពីសង្គ្រាមកម្ពុជា-ថៃ អ្នកស្រី Maratee Nalita Andamo អ្នកនាំពាក្យរងក្រសួងការបរទេសថៃបានបញ្ជាក់ពីគោលជំហរបញ្ចប់សង្គ្រាមក្រោយពីប្រទេសនានា រួមទាំងមហាអំណាចអាមេរិក-ចិនអំពាវនាវឱ្យថៃឈប់បា.ញ់ប្រហារកម្ពុជា ដោយអ្នកស្រីថា ថៃបង្ហាញគោលជំហរច្បាស់លាស់រហូតមក តាមរយៈនាយករដ្ឋមន្ត្រី រដ្ឋមន្ត្រីក្រសួងការបរទេស និងអ្នកនាំពាក្យក្រសួងការបរទេស ។ ការឈប់បាញ់អាស្រ័យលើភាគីទាំងសងខាង និងត្រូវបង្ហាញឱ្យឃើញដោយការឈប់បាញ់ជាក់ស្តែង ដែលថៃរង់ចាំឱ្យកម្ពុជាឈប់បាញ់មុន ។

ប្រទេសថៃបានកំណត់លក្ខខណ្ឌចំនួន៣ ដើម្បីបញ្ចប់សង្គ្រាមនេះ រួមមាន ៖
១-កម្ពុជាត្រូវតែប្រកាសឈប់បាញ់មុន ក្នុងឋានៈជាប្រទេសល្មើសអធិបតេយ្យថៃ
២-កម្ពុជាត្រូវឈប់បាញ់ពិតប្រាកដ និងឈប់បាញ់រហូត មិនមែនឈប់បាញ់ហើយត្រឡប់មកបាញ់ឡើងវិញ និង
៣-កម្ពុជាត្រូវសហការបោសសម្អាតមីនជាមួយថៃ ដែលថៃផ្តោតខ្លាំងលើចំណុចនេះរហូតមកដោយអនុវត្តតាមអនុសញ្ញាអូតាវ៉ា ។

អ្នកនាំពាក្យរងក្រសួងការបរទេសថៃនិយាយដោយឥតខ្មាស់អៀនថា កងទ័ពថៃបើកឆាកវាយប្រហារកម្ពុជា គឺជាការប្រើប្រាស់សិទ្ធិការពារខ្លួនតាមមាត្រា៥១ នៃធម្មនុញ្ញអង្គការសហប្រជាជាតិ និងស្របតាមច្បាប់មនុស្សធម៌អន្តរជាតិ ដែលនេះជាគោលការណ៍ថៃប្រកាន់ខ្ជាប់យ៉ាងម៉ឺងម៉ាត់ ។ រដ្ឋមន្ត្រីការបរទេសថៃនឹងចូលរួមកិច្ចប្រជុំរដ្ឋមន្ត្រីក្រសួងការបរទេសអាស៊ានពិសេស (Special ASEAN Ministers’ Meeting) នៅថ្ងៃទី២២ ខែធ្នូ ដែលរៀបចំដោយក្រសួងការបរទេសម៉ាឡេស៊ី ។

ក្រៅពីនេះ ក្រសួងការបរទេសថៃនឹងព្យាយាមនាំពលរដ្ឋថៃចាកចេញពីរាជធានីភ្នំពេញ គឺមានពលរដ្ឋថៃបានចុះឈ្មោះនៅស្ថានទូតថៃប្រចាំរាជធានីភ្នំពេញ ដើម្បីធ្វើដំណើរត្រឡប់មកប្រទេសថៃវិញ ចំនួន៦៦៩នាក់ ហើយចំនួននេះនឹងផ្លាស់ប្តូររាល់ថ្ងៃ ។ កាលពីថ្ងៃទី១៥ ខែធ្នូ ពលរដ្ឋថៃចំនួន៣៥២នាក់ បានធ្វើដំណើរចាកចេញពីរាជធានីភ្នំពេញ, ៤នាក់រង់ចាំការបញ្ជាក់ដើម្បីត្រឡប់មកថៃ និងនៅសល់ ៣១៧នាក់ទៀត ។ រីឯពលរដ្ឋថៃនៅទីក្រុងប៉ោយបែត គឺប្រមាណពី៥,០០០នាក់ ទៅ៦,០០០នាក់ ។

ក្រសួងការបរទេសថៃនឹងផ្តល់ភាពងាយស្រួលដោយសម្រួលឯកសារធ្វើដំណើររបស់ពលរដ្ឋថៃដើម្បីចាកចេញពីអាកាសយានដ្ឋាននៅខាងត្បូងរាជធានីភ្នំពេញ និងអាកាសយានដ្ឋាននៅខេត្តសៀមរាប ដោយអំពាវនាវឱ្យពលរដ្ឋថៃដែលស្នាក់នៅកម្ពុជា ហើយចង់ត្រឡប់មកថៃវិញអាចទាក់ទងមកកាន់ស្ថានទូតថៃ ឬស្ថានកុងស៊ុលគ្រប់ពេលវេលា ។

គួរបញ្ជាក់ថា រដ្ឋាភិបាលថៃចាំផ្ទះបានបើកដៃឱ្យកងទ័ពវាយប្រហារកម្ពុជាជាថ្មី គឺជាសង្គ្រាមបំផ្លិចបំផ្លាញកម្ពុជាដើម្បីកេងចំណេញនយោបាយផ្ទៃក្នុងរបស់ខ្លួន និងបំពេញមហិច្ឆតាឈ្លានពានដែនអធិបតេយ្យកម្ពុជា ។ ថៃនៅតែផ្គើនបន្តឈ្លានពានមិនព្រមឈប់បាញ់លើកម្ពុជា បើទោះមានកិច្ចខិតខំសម្របសម្រួលម្តងហើយម្តងទៀតពីម៉ាឡេស៊ីជាប្រធានអាស៊ាន មហាអំណាចអាមេរិក និងមហាអំណាចចិន ដោយកងទ័ពថៃបានប្រើប្រាស់យន្តហោះទម្លាក់គ្រាប់បែក F-16 ចូលកាន់តែជ្រៅក្នុងដែនអធិបតេយ្យកម្ពុជា ។

កម្ពុជាមិនមែនជាភាគីចាប់ផ្តើមបាញ់មុនទេ រាល់ការផ្ទុះអាវុធទាំងអស់ គឺចាប់ផ្តើមពីថៃមុន ហេតុនេះ ការស្នើឱ្យឈប់បាញ់ គឺថៃទៅវិញទេដែលត្រូវឈប់បាញ់មកលើកម្ពុជា ។ កម្ពុជាចង់បានសុខសន្តិភាព គ្មានការរំលោភបំពានពីប្រទេសជិតខាង ប៉ុន្តែកងទ័ពថៃនៅតែបន្តបាញ់ប្រហារ និងទម្លាក់គ្រាប់បែកចូលក្នុងទឹកដីកម្ពុជាកាន់តែជ្រៅ ទើបកម្ពុជាចាំបាច់ត្រូវប្រើប្រាស់សិទ្ធិការពារខ្លួន និងទឹកដី ។

ថៃបង្កសង្គ្រាមឈ្លានពានលើកនេះ ប្រសិនបើមហាអំណាចនានា អង្គការសហប្រជាជាតិ និងអាស៊ានមិនលូកដៃជួយអន្តរាគមន៍ទេនោះ សង្គ្រាមនឹងមិនបញ្ចប់ងាយៗឡើយ ហើយប្រទេសថៃនឹងបន្តចោទប្រកាន់កម្ពុជាមិនឈប់ឈរដើម្បីលាក់បាំងទង្វើអាក្រក់របស់ខ្លួន និងដើរតួជាប្រទេសរងគ្រោះ ៕

ប្រទេសថៃ៖ ភាពភ័យខ្លាចនៅក្នុងចំណោមអ្នកនាំចេញ និងវិនិយោគិនធំៗរបស់ថៃកាន់តែកើនឡើងខ្ពស់ ដោយសង្ស័យថាសហរដ្ឋអាមរិកអាចនឹងបញ្ចប់ការចរចាពាណិជ្ជកម្មជាមួយថៃ បន្ទាប់ពីនាយករដ្ឋមន្រ្តីថៃ ទាត់ចោលសំណើរឈប់បា.ញ់របស់លោក ត្រាំ ចំពេលដែលនាយករដ្ឋមន្រ្តីកម្ពុជាបង្ហាញការស្វាគមន៍យ៉ាងពេញចិត្តចំពោះសំណើរនេះ។

យោងតាមការចុះផ្សាយរបស់សារព័ត៌មាន Thai Examiner កាលពីថ្ងៃទី១៦ ខែធ្នូ ឆ្នាំ២០២៥ កិច្ចព្រមព្រៀងពាណិជ្ជកម្មរបស់ប្រទេសថៃជាមួយសហរដ្ឋអាមេរិកកំពុងស្ថិតនៅមាត់ជ្រោះ ខណៈដែលសង្គ្រាមជាមួយប្រទេសកម្ពុជាកាន់តែធ្ងន់ធ្ងរឡើង។ ការភ័យខ្លាចគឺថាលោក ដូណាល់ ត្រាំ អាចនឹងលុបចោលការចរចា និងដាក់ពន្ធគយខ្ពស់ដល់ប្រទេសថៃ ដែលជាការរំពឹងទុកដ៏គួរឱ្យព្រួយបារម្ភជាពិសេសសម្រាប់អ្នកនាំចេញថៃ។

ប្រភពខាងលើនេះបន្ថែមទៀតថា ប្រទេសថៃអាចនឹងលេងជាមួយភ្លើង ដោយសារសង្គ្រាមថៃ-កម្ពុជាបានរីករាលដាលកាន់តែធំ ដែលនេះប្រឈមនឹងហានិភ័យនៃការឆ្លើយតបដោយផ្ទាល់ពីទីក្រុងវ៉ាស៊ីនតោន ទោះបីជារដ្ឋាភិបាលថៃព្យាយាមទទូចអាមេរិក កុំឲ្យយកការចរចាពាណិជ្ជកម្ម និងពន្ធគយ មកពាក់ព័ន្ធជាមួយបញ្ហាព្រំដែនរវាងថៃ និង កម្ពុជាហើយក៏ដោយ។

គួររម្លឹកថា កាលពីថ្ងៃទី១២ ខែធ្នូ ឆ្នាំ២០២៥ លោក ត្រាំ បានបើកកិច្ចពិភាក្សាតាមទូរស័ព្ទជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងនាយករដ្ឋមន្ត្រីថៃ លោក អានុទីន។ ក្រោយជំនួបនេះលោក ត្រាំ បានប្រកាសថា ភាគីជម្លោះទាំង២ បានយល់ព្រមបញ្ឈប់ការប្រយុទ្ធគ្នា ដោយវិលត្រឡប់ទៅរកបទឈប់បាញ់វិញ។

ក្រោយមកទៀត នាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៉ីម ក៏បានជំរុញឱ្យមានបទឈប់បាញ់ផងដែរ តែលោក អានុទីន បែរជាច្រានចោលបទឈប់បាញ់នេះ ដោយប្រកាសយ៉ាងផ្គើនថា ប្រទេសថៃនឹងបន្តវា.យប្រហារលើកម្ពុជារហូតដល់ពួកគេមានអារម្មណ៍ថាសុវត្ថិភាព ខណៈដែលខាងកម្ពុជាឯណេះ សម្ដេចធិបតីបានស្វាគមន៍សំណើរបស់លោក អាន់វ៉ា យ៉ាងពេញទំហឹងដើម្បីបញ្ចប់ជម្លោះ ហើយវិលទៅរកសន្តិភាព។

ដោយឡែក នៅក្នុងបទសម្ភាសន៍ផ្ដាច់មុខជាមួយ Wall Street Journal លោក ត្រាំ បាននិយាយថា លោកបានគំរាមដំឡើងពន្ធលើកម្ពុជា និងថៃ ក្នុងជំនួបតាមទូរស័ព្ទជាមួយមេដឹកនាំនៃប្រទេសទាំង២ ប្រសិនបើមិនមានបទឈប់បាញ់ទេនោះ។ រហូតដល់នៅថ្ងៃអង្គារ ទី១៦ ខែធ្នូ រដ្ឋមន្ត្រីពាណិជ្ជកម្មថៃ លោកស្រី Suphajee Suthamphan បានទទួលស្គាល់ថា កិច្ចចរចាពាណិជ្ជកម្មជាមួយ សហរដ្ឋអាមេរិកមិនមានភាពរីកចម្រើននោះទេ ជាមួយការបញ្ជាក់ថាសហរដ្ឋអាមេរិកបានកែប្រែលក្ខខណ្ឌរបស់ខ្លួនឡើយ៕