ប្រទេសជប៉ុន ៖ នៅថ្ងៃទី១០ ខែមិថុនា សារព័ត៌មានប្រទេសជប៉ុនបានចុះផ្សាយថា យន្តហោះរបស់ប្រទេសថៃប្រភេទ Airbus A330-300 បានបុកគ្នាជាមួយយន្តហោះមួយគ្រឿងទៀតរបស់ក្រុមហ៊ុនអាកាសចរណ៍ EVA Air នៅអាកាសយានដ្ឋាន Haneda ក្នុងទីក្រុងតូក្យូ ប្រទេសជប៉ុន ។

យន្តហោះប្រភេទ Airbus A330-300 របស់ប្រទេសថៃ ដែលមានជើងហោះហើរឈ្មោះ TG 683 បានហោះហើរចេញពីអាកាសយានដ្ឋាន Haneda ទីក្រុងតូក្យូ ប្រទេសជប៉ុន ឆ្ពោះទៅកាន់អាកាសយានដ្ឋានសុវណ្ណភូមិ ប្រទេសថៃ បានបុកគ្នាជាមួយយន្តហោះប្រភេទ A330-300 របស់ក្រុមហ៊ុនអាកាសចរណ៍ EVA Air របស់តៃវ៉ាន់ ដែលមានជើងហោះហើរឈ្មោះ BR 183 ហោះសំដៅមកកាន់ទីក្រុងតៃប៉ិរបស់តៃវ៉ាន់ ។

ក្រសួងគមនាគមន៍ជប៉ុនឱ្យដឹងថា នៅព្រឹកថ្ងៃទី១០ ខែមិថុនា យន្តហោះទាំងពីរគ្រឿងនេះបានបុកគ្នានៅជិតបរិវេណផ្លូវ Taxiway ក្នុងអាកាសយានដ្ឋាន Haneda នៅទីក្រុងតូក្យូ ។ ការិយាល័យអាកាសយានដ្ឋានតូក្យូបានបញ្ជូនភ្នាក់ងារទៅកាន់កន្លែងកើតហេតុដើម្បីពិនិត្យហេតុការណ៍នេះ ហើយគេក៏បានបិទ runway នៅជិតចំណុចកើតហេតុផងដែរ ។ ប៉ុន្តែមិនទាន់មានសេចក្តីរាយការណ៍ថា មានអ្នកណាម្នាក់រងរបួសទេ រីឯក្រុមហ៊ុនអាកាសចរណ៍ថៃលើកឡើងថា ពួកគេកំពុងត្រួតពិនិត្យទិន្នន័យឱ្យបានលម្អិតក្នុងហេតុការណ៍នេះ ។

ក្រុមហ៊ុនអាកាសចរណ៍ Japan Airlines និង All Nippon Airways បញ្ជាក់ថា ជើងហោះហើរមួយចំនួននៅក្នុងប្រទេសជប៉ុន និងក្រៅប្រទេស ត្រូវបានពន្យារពេលហោះហើរនៅថ្ងៃទី១០ ខែមិថុនា ដោយសារហេតុការណ៍យន្តហោះបុកគ្នានេះ ។ ចំណែកមូលហេតុបណ្តាលឱ្យកើតគ្រោះថ្នាក់ គឺស្ថិតនៅក្រោមការស៊ើបអង្កេតនៅឡើយ ហើយភ្នាក់ងារបានធ្វើការផ្លាស់ទីយន្តហោះទាំងពីរគ្រឿងចេញពី runway រួចហើយ ៕ ប្រភព ៖ Nation

ប្រទេសចិន៖ ប្រព័ន្ធប្រកាសអាសន្ននៃការរញ្ជួយដីថ្មីនៅក្នុងប្រទេសចិនរួមមានស្ថានីយត្រួតពិនិត្យជាង ១៥,០០០ កន្លែង ដែលមានតួនាទីផ្តល់ព័ត៌មានដល់ប្រជាជនមួយចំនួនធំក្នុងរយៈពេលមួយវិនាទី។

យោងតាមប្រភពព័ត៌មាន CGTN ដែលបានរាយការណ៍កាលពីថ្ងៃទី ៨ ខែមិថុនា ថាការសាងសង់ផ្នែកសំខាន់នៃប្រព័ន្ធប្រកាសអាសន្នរញ្ជួយដីថ្មីក្នុងប្រទេសចិនត្រូវបានបញ្ចប់។ លោក Min Yiren នាយករដ្ឋបាលរញ្ជួយដីចិន (CEA) បាននិយាយថា នេះគឺជាប្រព័ន្ធព្រមានជាមុនអំពីការរញ្ជួយដីដ៏ធំបំផុតរបស់ពិភពលោក គោលដៅរបស់វាគឺដើម្បីជូនដំណឹងដល់សាធារណជនអំពីការរញ្ជួយដីដែលនឹងកើតឡើងប៉ុន្មានវិនាទីខាងមុខ និងរាយការណ៍ពីទំហំរញ្ជួយដី។

ប្រទេសចិនបានបង្កើតប្រព័ន្ធប្រកាសអាសន្នគ្រោះរញ្ជួយដីតាំងពីទសវត្សរ៍ឆ្នាំ ១៩៩០ មកម្លេះ ហើយក៏បានសាងសង់ប្រព័ន្ធរាយការណ៍ពីអាំងតង់ស៊ីតេនៃការរញ្ជួយដីភ្លាមៗនៅក្នុងតំបន់ដែលមានហានិភ័យខ្ពស់មួយចំនួននៅឆ្នាំ ២០១៨ ផងដែរ។
យោងតាមការសិក្សាមួយនៅក្នុងកាសែត Northwestern Seismological បាននិយាយថា ការដឹងពីការរញ្ជួយដីជាមុន ៣ វិនាទីអាចជួយសង្គ្រោះជីវិតជនរងគ្រោះបាន ១៤% រយៈពេល ១០ វិនាទីអាចជួយសង្គ្រោះជីវិតជនរងគ្រោះបាន ៣៩% ហើយ ២០ វិនាទីជាមុនអាចជួយសង្គ្រោះជីវិតបាន ៦៣% ។ ដើម្បីកាត់បន្ថយការបំផ្លិចបំផ្លាញពីការរញ្ជួយដី ប្រព័ន្ធអាចផ្ញើការជូនដំណឹងតាមរយៈឧបករណ៍ជាច្រើន រួមទាំងទូរទស្សន៍ ទូរសព្ទចល័ត ស្ថានីយ៍វិទ្យុ និងច្រកទ្វារព្រមានជាច្រើនទៀត។

បច្ចុប្បន្ន ប្រព័ន្ធនេះរួមមានស្ថានីយត្រួតពិនិត្យជាង ១៥.០០០ មជ្ឈមណ្ឌលជាតិចំនួន ៣ មជ្ឈមណ្ឌលថ្នាក់ខេត្តចំនួន ៣១ និងមជ្ឈមណ្ឌលព័ត៌មានថ្នាក់ស្រុកចំនួន ១៧៣ ។ ការធ្វើតេស្តព្រមានជាមុនរបស់សហគមន៍កំពុងដំណើរការនៅក្នុងតំបន់ដែលងាយនឹងរញ្ជួយដីជាច្រើន រួមទាំងខេត្តស៊ីឈួន និងយូណាននៅភាគនិរតី ប៉េកាំង ធានជីន និងហ៊ូប៉ីនៅភាគខាងជើង និងហ្វូជៀននៅភាគខាងកើត៕ ប្រភព៖vnexpress

សហរដ្ឋអាមេរិក ៖ ភ្លើងឆេះព្រៃនៅប្រទេសកាណាដាបណ្តាលឱ្យមានផ្សែងខ្មៅរសាត់ឆ្លងកាត់ព្រំដែនទៅដល់រដ្ឋនានារបស់អាមេរិក ហើយរដ្ឋជាច្រើនរបស់អាមេរិកបានប្រកាសជូនដំណឹងទៅពលរដ្ឋអំពីគុណភាពអាកាសធាតុ ក្នុងនោះញូវយ៉កបានក្លាយជាទីក្រុងមួយមានគុណភាពអាកាសធាតុអាក្រក់បំផុតក្នុងចំណោមទីក្រុងផ្សេងៗ ។ អាជ្ញាធរប្រចាំទីក្រុងញូវយ៉កបានជូនដំណឹងទៅពលរដ្ឋរស់នៅក្នុងទីក្រុងនេះឱ្យថែទាំសុខភាព ខណៈបរិយាកាសនៅតំបន់កណ្តាល និងភាគខាងកើតអាមេរិកកាន់តែអាក្រក់ ។

ចំណែកក្រុមហ៊ុន google បានប្រកាសឱ្យបុគ្គលិករបស់ខ្លួនដែលធ្វើការនៅទីក្រុងញូវយ៉ក និងតំបន់ឆ្នេរសមុទ្រភាគខាងកើតអាមេរិកធ្វើការនៅផ្ទះទៀតផង ។ លើសពីនេះ ផលប៉ះពាល់បណ្តាលពីភ្លើងឆេះព្រៃនៅកាណាដា បានធ្វើឱ្យគេពន្យារពេលការប្រកួតកីឡាជាច្រើនប្រភេទ រីឯសួនច្បារ និងសួនសត្វជាច្រើនកន្លែងត្រូវបិទទ្វារ ខណៈសាលារៀនជាច្រើនផ្អាកការធ្វើសកម្មភាពនៅកណ្តាលថ្ងៃដើម្បីសុវត្ថិភាពសិស្ស ។ លើសពីនេះ ការិយាល័យអាកាសចរណ៍កណ្តាលបានបញ្ជាឱ្យផ្អាកជើងហោះហើរមកកាន់អាកាសយានដ្ឋាន LaGuardia នៅទីក្រុងញូវយ៉កផងដែរ ។

អភិបាលទីក្រុងញូវយ៉ក លោកស្រី Kathy Hochul បានលើកឡើងថា គុណភាពអាកាសធាតុនៅទីក្រុងញូវយ៉កដ៏អាក្រក់នេះ ចាត់ទុកថា ជាវិបត្តិមួយត្រូវតែដោះស្រាយជាបន្ទាន់ ហើយវានឹងកើតឡើងបន្តច្រើនថ្ងៃទៀត ។ លោកស្រីបន្ថែមថា លោកស្រីបានឱ្យគេត្រៀមរកម៉ាស់ប្រមាណ១លានម៉ាស់មកចែកឱ្យពលរដ្ឋ និងស្នើសុំពលរដ្ឋកុំចេញក្រៅនៅពេលនេះ ។

កាលពីថ្ងៃទី៦ ខែមិថុនា កន្លងមក សារព័ត៌មាន Heatmap បានចុះផ្សាយថា ពលរដ្ឋរស់នៅតំបន់ឆ្នេរសមុទ្រភាគខាងកើតអាមេរិកបានស្រូបយកជាតិពុលយ៉ាងច្រើន ដោយសារភ្លើងឆេះព្រៃនៅឆ្នាំ២០២៣ នេះ បើធៀបនឹងពលរដ្ឋរស់នៅតំបន់ឆ្នេរសមុទ្រភាគខាងលិច ។ ចំណែកសារព័ត៌មាន The New York Times បានចុះផ្សាយនៅថ្ងៃទី៧ ខែមិថុនា ថា ពលរដ្ឋអាមេរិកបានប្រឈមនឹងបរិយាកាសអួរអាប់កើនឡើងរហូតដល់២៧ដងក្នុងរយៈពេល១០ឆ្នាំកន្លងមក ៕ ប្រភព ៖ pptv hd 36

ប្រទេសថៃ ៖ ក្រសួងពាណិជ្ជកម្មថៃបានប្រកាសថា ហាមនាំចេញខ្សាច់ធម្មជាតិគ្រប់ប្រភេទទៅក្រៅប្រទេស ហើយការហាមឃាត់នេះនឹងអនុវត្តចាប់ពីថ្ងៃទី១១ ខែវិច្ឆិកា ឆ្នាំ២០២៣ តទៅ ។ ក្រសួងពាណិជ្ជកម្មថៃឱ្យដឹងថា បច្ចុប្បន្ន ប្រទេសថៃកំពុងខ្វះខាតខ្សាច់ប្រើប្រាស់ ហើយថៃបានចំណាយប្រាក់អស់១.៣២៦លានបាតក្នុង១ឆ្នាំលើការនាំចូលខ្សាច់ទៀតផង ។ ម្យ៉ាងទៀត ប្រទេសថៃនឹងអភិរក្សខ្សាច់ជាធនធានធម្មជាតិដ៏សំខាន់ និងចៀសវាងផលប៉ះពាល់ដល់បរិស្ថាន ។

លោក រុនណារ៉ុង ផុលភិផាត់ អគ្គនាយកដ្ឋានពាណិជ្ជកម្មក្រៅប្រទេសលើកឡើងថា នាយកដ្ឋានពាណិជ្ជកម្មក្រៅប្រទេសបានពិនិត្យ និងកែលម្អវិធានការការនាំចេញខ្សាច់នៅក្រោមការប្រកាសរបស់ក្រសួងពាណិជ្ជកម្មថា កំណត់ឱ្យខ្សាច់ក្លាយជាផលិតផលត្រូវហាមនាំចេញទៅក្រៅប្រទេស ។ ការហាមនាំចេញខ្សាច់នេះ ដើម្បីឱ្យស្របនឹងស្ថានភាពពាណិជ្ជកម្ម និងជាការអភិរក្សធនធានធម្មជាតិ ក៏ដូចជាការពារផលប៉ះពាល់បរិស្ថានប្រទេសថៃផងដែរ ។

ក្រសួងពាណិជ្ជកម្មថៃបានប្រកាសហាមនាំចេញខ្សាច់គ្រប់ប្រភេទទៅក្រៅប្រទេស លើកលែងតែការនាំចេញខ្សាច់ដើម្បីធ្វើជាគំរូ ឬការស្រាវជ្រាវផ្សេងៗ ឬយកខ្សាច់ជាប់ខ្លួនទៅក្រៅប្រទេសដើម្បីប្រើប្រាស់ផ្ទាល់ខ្លួន ក្នុងបរិមាណមិនលើសពី២គីឡូក្រាម ហើយនឹងអនុវត្តចាប់ពីថ្ងៃទី១១ ខែវិច្ឆិកា ឆ្នាំ២០២៣ តទៅ ។

ខ្សាច់ គឺជាធនធានធម្មជាតិដ៏សំខាន់មួយក្នុងផ្នែកឧស្សាហកម្មសំណង់ ព្រមទាំងឧស្សាហកម្មកែវ និងកញ្ចក់ ។ កាលពីឆ្នាំ២០២២ ប្រទេសថៃបាននាំចេញខ្សាច់ទៅក្រៅប្រទេស ប្រមាណ៨៨៥.១១តោន ស្មើនឹងទឹកប្រាក់១៧.៤៦លានបាត ។ ជាមួយគ្នានេះ ប្រទេសថៃបាននាំចូលខ្សាច់ប្រមាណ១.៨១៧.០២៩តោន ស្មើនឹងទឹកប្រាក់១.៣២៦លានបាត ។ បច្ចុប្បន្ន ប្រទេសថៃខ្វះខាតខ្សាច់សម្រាប់បំពេញតម្រូវការប្រើប្រាស់ក្នុងប្រទេស ហើយត្រូវនាំចូលខ្សាច់ពីក្រៅប្រទេសបន្ថែមទៀត ។

ការជីកយកខ្សាច់មកធ្វើអាជីវកម្មនឹងធ្វើឱ្យប្រទេសថៃជួបបញ្ហាបាក់ច្រាំងទន្លេ និងប៉ះពាល់ដល់បរិស្ថានផងដែរ ប្រសិនបើគ្មានការរៀបចំវត្ថុធាតុដើម ហើយនៅតែមានការនាំចេញខ្សាច់ទៅក្រៅប្រទេសបែបនេះ ។ ក្រសួងពាណិជ្ជកម្មសូមឱ្យក្រុមហ៊ុនអាជីវកម្មនានាដែលមានបំណងនាំចេញខ្សាច់ ត្រូវតែសិក្សា និងឈ្វេងយល់ឱ្យបានច្បាស់លាស់ជាមុន ចៀសវាងមានបញ្ហា ៕ ប្រភព ៖ Nation

បរទេស៖ លោក Mark Zuckerberg បាននិយាយថាអ្វីដែលមាននៅលើវ៉ែនតាឆ្លាតវៃរបស់ Apple គឺគ្មានអ្វីប្លែកទេ ខណៈដែលតម្លៃនៃផលិតផលនេះមានកម្រិតខ្ពស់។

យោងតាមប្រភព The Verge កាលពីថ្ងៃទី៨ ខែមិថុនា បានឱ្យដឹងថា ក្រុមហ៊ុន Apple ទើបតែដាក់បង្ហាញនៅផលិតផលថ្មីរបស់ខ្លួនជាផ្លូវការ ជាមួយនឹងវ៉េតា Vision Pro ដែល មានតម្លៃខ្ពស់បំផុតនៅលើទីផ្សាររហូតដល់ ៣,៥០០ ដុល្លារ។ Vision Pro គឺជាវ៉េនតា 3D ដែលធ្វើការរចនាបែបវិទ្យាសាស្ត្រ នឹងមានសមត្ថភាពគ្រប់គ្រងទាំងស្រុងដោយដៃ ភ្នែក និងកាយវិការសំឡេង ហើយអ្វីដែលពិសេសនោះវ៉ែនតានេះក៏អាចឆ្លុះមើលពីអនាគតកាលបានទៀតផង។

យោងតាមនាយកប្រតិបត្តិ Meta ដែលជាអ្នកបានត្រួតពិនិត្យលើវ៉ែនតា Vision Pro របស់ Apple បាននិយាយថា «វ៉ែនតានេះមិនមានលក្ខណៈពិសេសថ្មីអ្វីដែលយើងមិនបានរកឃើញ ឬគិតនោះទេ»។
ស្របពេលជាមួយគ្នានេះដែលក្រុមហ៊ុន Meta ក៏មានផលិតផលវ៉ែនតាថ្មីរបស់ខ្លួនដែលត្រូវបានប្រកាសដោយក្រុមហ៊ុនកាលពីដើមខែ ជាមួយនឹងវ៉េនតា Meta Quest 3 នឹងមានតម្លៃត្រឹមតែ ៤៩៩ ដុល្លារ ហើយត្រូវបានគេរំពឹងថានឹងដាក់លក់នៅចុងឆ្នាំនេះ។ ប្រធានក្រុមហ៊ុន Meta ជឿជាក់ថាផលិតផលរបស់គាត់គឺមានតម្លៃសមរម្យសម្រាប់មនុស្សគ្រប់គ្នា ជាមួយនឹងគុណភាពខ្ពស់ផងដែរ។

គួរបញ្ជាក់ដែរថា វ៉ែតា Vision Pro គឺជាឧបករណ៍ផ្នែករឹងដំបូងរបស់ Apple ក្នុងវិស័យនិម្មិត និងការពិតបន្ថែម។ ផលិតផលនេះប្រើប្រាស់ស៊ុមអាលុយមីញ៉ូម ផ្ទៃកញ្ចក់ជាមួយនឹងឧបករណ៍ដ៏មានឥទ្ធិពលជាច្រើនដូចជា M២, R១ chip, ឧបករណ៍ចាប់សញ្ញា និងកាមេរ៉ារាប់សិប។ កញ្ចក់ចំហៀងនីមួយៗមានអេក្រង់ Micro LED ទំហំ ២៣ លានភីកសែល ដែលមានដង់ស៊ីតេខ្ពស់ជាងទូរទស្សន៍ ៤K ហើយវ៉ែនតានេះត្រូវបានគេរំពឹងថានឹងដាក់លក់នៅដើមឆ្នាំ ២០២៤៕ ប្រភព៖vnexpress