នៅលើពិភពលោកមានសាកលវិទ្យាល័យជាង ២៥.០០០ ដែលក្នុងនោះមានសកលវិទ្យាល័យត្រឹមតែ ៥ ប៉ុណ្ណោះដែលល្អបំផុតលើលោក ដោយសម្គាល់ទៅលើកេរ្តិ៍ឈ្មោះការសិក្សា, កេរ្តិ៍ឈ្មោះសាលា, សមាមាត្រនិស្សិត, កេរ្តិ៍ឈ្មោះនិយោជក, ទំនាក់ទំនងរបស់សាស្រ្តាចារ្យអន្តរជាតិ, និងទំនាក់ទំនងរបស់និស្សិតអន្តរជាតិ…ជាដើម នេះបើយោងតាមចំណាត់ថ្នាក់សាកលវិទ្យាល័យពិភពលោក QS។ ដូច្នេះហើយខាងក្រោមនេះគឺជាឈ្មោះសកលវិទ្យាល័យល្បីៗទាំង៥ នៅលើពិភពលោកសម្រាប់ឆ្នាំ ២០២៤ ដែលមានដូចជា៖

១. Massachusetts Institute of Technology (MIT) ៖ គឺជាសាកលវិទ្យាល័យឯកជនមួយដែលបានបើកដំណើរការនៅឆ្នាំ ១៩១៦ ហើយមានទីតាំងនៅខេមប្រីជ រដ្ឋម៉ាសាឈូសេត នៃប្រទេសសហរដ្ឋអាមេរិក។ ដែលនិស្សិតរបស់សកលវិទ្យាល័យនេះទទួលបានជ័យលាភីពានរង្វាន់ណូបែលចំនួន ៧៨ នាក់ក្នុងចំណោមនិស្សិតទាំង ១,០០០ នាក់នៅជុំវិញពិភពលោក។

២. University of Cambridge៖ សាកលវិទ្យាល័យខេមប្រីជ បង្កើតឡើងក្នុងឆ្នាំ ១២០៩ និងមានទីតាំងនៅខេមប្រីជ ប្រទេសអង់គ្លេស។ ហើយវាក៏ជាសាកលវិទ្យាល័យឯកជនដែលមានកិត្យានុភាពបំផុតមិនគួរឱ្យជឿផងដែរ។ ៣. University of Oxford៖ សាកលវិទ្យាល័យ Oxford បង្កើតឡើងក្នុងឆ្នាំ ១០៩៦ និងមានទីតាំងនៅប្រទេសអង់គ្លេស ដែលឱកាសនៃការចូលរៀនរបស់និស្សិតមានត្រឹមតែ ១៧.៥% ប៉ុណ្ណោះ។

៤. Harvard University៖ សកលវិទ្យាល័យហាវើត បង្កើតឡើងក្នុងឆ្នាំ ១៦៣៦ វាគឺជាសាកលវិទ្យាល័យមួយក្នុងចំណោមសាកលវិទ្យាល័យចំណាស់ជាងគេបំផុតនៅសហរដ្ឋអាមេរិក។ ដែលឱកាសនៃការចូលរៀនរបស់និស្សិតមានត្រឹមតែ ៥% ប៉ុណ្ណោះ។

៥. Stanford University៖ សាកលវិទ្យាល័យស្ទែនហ្វដ បង្កើតឡើងក្នុងឆ្នាំ ១៨៨៥ ដែលជាសាកលវិទ្យាល័យឯកជនមួយ នឹងមានទីតាំងស្ថិតនៅទីក្រុងស្ទែនហ្វដ នៃរដ្ឋកាលីហ្វ័រញ៉ា។ ដែលឱកាសនៃការចូលរៀនរបស់និស្សិតមានត្រឹមតែ ៤% ប៉ុណ្ណោះ៕

បរទេស៖ អ្នករចនាទូកជនជាតិអ៊ីតាលីលោក Marco Ferrari បានដាក់បង្ហាញនូវគំនិត Project Neptune hydrogen superyacht concept ដែលលុបបំបាត់ការព្រួយបារម្ភពីការបំភាយឧស្ម័ន។

យោងតាមប្រភពព័ត៌មាន IFL Science កាលពីថ្ងៃទី២៦ ខែមិថុនា បានឱ្យដឹងថា Neptune គឺជាទូកក្តោងទំនើបដ៏ធំមួយ ដែលមានទម្ងន់ប្រហែល ៥,០០០ តោន និងមានប្រវែង ១៣៧.៥ ម៉ែត្រ។ ទូកដ៏ធំនេះដែរត្រូវបានរចនាដោយផ្ទៃខាងក្រៅផលិតពីអាលុយមីញ៉ូមបុរាណ នឹងបំពាក់ដោយតំបន់ចុះចតពីរសម្រាប់ឧទ្ធម្ភាគចក្រ។ ចំណែកឯផ្ទៃខាងក្នុងវិញ មានបន្ទប់ចំនួន ៤ ដែលមានយ៉រឯកជននៅជាន់ខាងក្រោម និងបន្ទប់ប្រណីតចំនួន ៦ ផ្សេងទៀតដែលផ្ទុកអ្នកដំណើរសរុបចំនួន ២២ នាក់ រួមជាមួយគ្លីនិកមួយនៅលើឧទ្ធម្ភាគចក្រដែលអាចប្រើបាននៅពេលចាំបាច់។ លើសពីនេះ Neptune ក៏មានកន្លែងសម្រាប់អមជាមួយយានជំនិះផងដែរ ដូចជា ជិះស្គី ជិះទូកកាណូ ជិះទូកលេង ឧបករណ៍មុជទឹក និងឧបករណ៍នេសាទជាដើម។

បន្ថែមពីលើការរចនាដ៏ប្រណិត និងបំពាក់ដោយគ្រឿងបរិក្ខារជាច្រើនគម្រោង Project Neptune ក៏មានមុខងារពិសេសមួយគឺដំណើរការលើអ៊ីដ្រូសែន ដោយបញ្ចេញទឹកសុទ្ធជំនួសឱ្យសារធាតុដែលបង្កគ្រោះថ្នាក់ដល់បរិស្ថាន។ លោក Marco Ferrari ក៏បានបំពាក់នូវ Project Neptune ជាមួយនឹងបន្ទះកញ្ចក់រួមបញ្ចូលគ្នាជាមួយនឹងបន្ទះអ៊ីសូឡង់ ដើម្បីសន្សំសំចៃថាមពលក្នុងការផ្គត់ផ្គង់ឧបករណ៍ម៉ាស៊ីនត្រជាក់ផងដែរ៕ ប្រភព៖vnexpress

ប្រទេសវៀតណាម ៖ Agoda គឺជាក្រុមហ៊ុនផ្តល់សេវាកម្មផ្នែកទេសចរណ៍តាមអ៊ីនធើរណេតមើលឃើញថា បច្ចុប្បន្ន វិស័យទេសចរណ៍នៅវៀតណាមបានរីកចម្រើនជាងថៃ ។ ប៉ុន្តែថៃអាចរក្សាការមានប្រៀបរបស់ខ្លួនបាន ដោយថៃត្រូវកាត់បន្ថយការរឹតបន្តឹងទិដ្ឋាការ បង្កើនជើងហោះហើរ និងបង្កលក្ខណៈងាយស្រួលដល់អាជីវកម្មផ្នែកទេសចរណ៍ ។

ក្នុងរយៈពេល៥ខែដំបូងឆ្នាំ២០២៣ ការហោះហើរចូលប្រទេសវៀតណាមបានកើនឡើង ហើយវៀតណាមបានក្លាយជាប្រទេសគោលដៅលំដាប់ទី៣ នៅតំបន់អាស៊ី ខណៈជប៉ុនលេខ១ និងថៃលេខ២ ។ វៀតណាមបានរំកិលពីលំដាប់ទី៥ នៅឆ្នាំ២០១៩ ដែលជាអំឡុងមុនពេលមានជំងឺកូវីដ-១៩ ឆ្លងរាតត្បាត ។ នៅឆ្នាំ២០២២ ថៃធ្លាប់ស្ថិតនៅលំដាប់ទី១ ក្នុងការចាត់លំដាប់របស់ក្រុមហ៊ុន Agoda ប៉ុន្តែត្រូវបានជប៉ុនដណ្តើមបានលំដាប់ទី១ ក្រោយពីជប៉ុនបើកប្រទេសកាលពីខែតុលា ឆ្នាំ២០២២ ។

ទោះយ៉ាងណា ថៃបានទទួលភ្ញៀវទេសចរជាង១១លាននាក់នៅត្រឹមពាក់កណ្តាលឆ្នាំ២០២៣ និងច្រើនជាងចំនួនភ្ញៀវទេសចរនៅឆ្នាំ២០២២ ។ ដូច្នេះ ថៃត្រូវធ្វើឱ្យឧស្សាហកម្មទេសចរណ៍រីកចម្រើនយ៉ាងមាននិរន្តរភាព ខណៈការធ្វើដំណើរចេញ-ចូលប្រទេសថៃ និងការកម្សាន្តក្នុងប្រទេសបានងើបឡើងវិញ ។ នៅឆ្នាំ២០១៩ វិស័យទេសចរណ៍របស់ថៃ គឺជាផ្នែក១ ក្នុងចំណោម៥ របស់ផលិតផលក្នុងស្រុកសរុប (GDP) ។

CEO របស់ក្រុមហ៊ុន Agoda លោក Omri Morgenshtern លើកឡើងថា នៅពេលភ្ញៀវទេសចរកូរ៉េខាងត្បូងជាច្រើននាក់មកកម្សាន្តនៅប្រទេសថៃ ដូចគ្នានេះ ពួកគេក៏បានធ្វើដំណើរទៅកាន់ជប៉ុន និងវៀតណាមកើនឡើងផងដែរ ។ គេសង្កេតឃើញថា កូរ៉េខាងត្បូងបានសាងសង់រោងចក្រនៅវៀតណាមកាន់តែច្រើនក្នុងរយៈពេល២ទសវត្សរ៍កន្លងមក ។ ហេតុនេះ លោក លោក Omri Morgenshtern មើលឃើញថា បើប្រទេសនោះអាចទាក់ទាញការវិនិយោគ អាជីវកម្ម និងមនុស្សម្នាមកប្រទេសរបស់ខ្លួនបានច្រើនប៉ុនណា ប្រទេសនោះនឹងអាចជំរុញវិស័យទេសចរណ៍បានច្រើនដូចគ្នា ។

ចំណែកភ្ញៀវទេសចរចិនដែលធ្លាប់ស្ថិតក្នុងលំដាប់ទី១ មកកម្សាន្តនៅប្រទេសថៃ បានធ្លាក់មកនៅលំដាប់ទី៣ បន្ទាប់ពីកូរ៉េខាងត្បូង និងម៉ាឡេស៊ី ។ ហេតុនេះ ការកក់សំបុត្រធ្វើដំណើរមកថៃរបស់ភ្ញៀវទេសចរចិន តាមរយៈក្រុមហ៊ុន Agoda បានកើនឡើង៨០% នៅឆ្នាំ២០១៩ ។ ភ្ញៀវទេសចរចិនមកថៃបានកើនឡើងជាបន្តបន្ទាប់ ក្រោយពីចិនបើកប្រទេស កាលពីខែមករា ឆ្នាំ២០២៣ ប៉ុន្តែកំណើនភ្ញៀវទេសចរចិនមកថៃបានធ្លាក់ចុះវិញ ដោយសារថៃរឹតបន្តឹងទិដ្ឋាការ ៕ ប្រភព ៖ AEC Connect

រដ្ឋធានីវ៉ាសាវី៖ ស្របពេលមានការរំពឹងទុកពីមេដឹកនាំបេឡារុស នឹងអនុញ្ញាតឲ្យមានការសាងសង់បន្ទាយ សម្រាប់ទាហានស៊ីឈ្នួល Wagner នៅលើទឹកដីរបស់បេឡារុស នោះមក ធ្វើឲ្យបណ្ដាប្រទេសជាច្រើន ជាសមាជិកអង្គការសន្ធិសញ្ញាអាត្លង់ទិកខាងជើង ហៅកាត់ ណាតូ (តាមភាសាអង់គ្លេស) ឬ អូតង់ (តាមភាសាបារាំង) ត្រូវតែបង្កើនកម្លាំងការពារកាន់តែខ្លាំងឡើងបន្ថែមទៀត។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី២៧ ខែមិថុនា ថា ក្រោយការសម្របសម្រួលបញ្ចប់នូវការបះបោរ នៅលើទឹកដីររុស្ស៊ីនោះមក គេមានការរំពឹងទុក ថា មេដឹកនាំក្រុងមីនស្ក៍ (Minsk) លោក លូកាសេនកូ នឹងអនុញ្ញាតឲ្យកម្លាំងទាហានស៊ីឈ្នួលរបស់រុស្ស៊ី Wagner របស់លោក យ៉ែវហ្គេនី ព្រីហ្គោហ្ស៊ីន បង្កើតមូលដ្ឋានកងទ័ព នៅក្នុងប្រទេសបេឡារុស។ បញ្ហានេះ កំពុងតែធ្វើឲ្យប្រទេសឡាតវី (Latvia) និង លីទុយអានី (Lithuania) ធ្លាប់ជាអតីតរដ្ឋចំណុះឲ្យសហភាពសូវៀត និង ជាសមាជិករបស់អង្គការណាតូ បានអំពាវនាវដល់អង្គការសម្ពន្ធមិត្ដយោធាដ៏ខ្លាំងក្លារបស់ពិភពលោកមួយនេះ បង្កើនកម្លាំងការពារ នៅតាមព្រំដែនភាគខាងកើត ត្រៀមខ្លួនឆ្លើយតប នឹងករណីណាមួយ កើតឡើងជាយថាហេតុ។ ទន្ទឹមគ្នានេះ លោក អានឌ្រេ ឌូដា (Andrzej Duda) ប្រធានាធិបតីប៉ូឡូញ បានហៅសកម្មភាពបែបនេះ ជាសញ្ញាអវិជ្ជមាន។

លោក ឌូដា ប្រធានាធិបតីប៉ូឡូញ បានបញ្ជាក់ ថា «ការបោះមូលដ្ឋានយោធារបស់ក្រុមហ៊ុនទាហានស៊ីឈ្នួល Wagner នៅលើទឹកដីរបស់បេឡារុស ក្លាយជាបញ្ហាដ៏ធ្ងន់ធ្ងរបំផុតមួយ និង គួរឲ្យព្រួយបារម្ភខ្លាំងណាស់។ ដូច្នវយើងត្រូវតែធ្វើការសម្រេចចិត្ត ឲ្យបានម៉ឺងម៉ាត់បំផុត។ សកម្មភាពបែបនេះ ទាមទារឲ្យមានការឆ្លើយតបដ៏ខ្លាំងក្លា ពីអង្គការណាតូ»។

ជាមួយគ្នានេះ លោក ជេនស៍ ស្ដូលថែនប៊ឺគ (Jens Stoltenberg) អគ្គលេខាធិការអង្គការណាតូ បានសង្កត់ធ្ងន់ ថា «សម្ពន្ធមិត្តយោធា បានត្រៀមខ្លួនរួចរាល់អស់ហើយ សម្រាប់ការពារខ្លួន ប្រឆាំងនឹងការគំរាមកំហែងណាមួយ កើតឡើង មកលើទឹកដីរបស់ណាតូ»។

លោកប្រធានអង្គការណាតូ បានប្រាប់ដល់ក្រុមអ្នកសារព័ត៌មាន ថា«វាពិតជាលឿនពេក នៅក្នុងការវិនិច្ឆ័យចុងក្រោយ អំពីផលវិបាក សម្រាប់ស្វែងរកការពិត។ លោក យ៉ែវហ្គេនី ព្រីហ្គោហ្ស៊ី បានផ្លាស់ទៅកាន់ប្រទេសបេឡារុស ហើយទំនងជាកម្លាំងប្រដាប់អាវុធរបស់គាត់មួយចំនួន ក៏នឹងមានទីតាំង នៅក្នុងប្រទេសបេឡារុសផងដែរ។ ប៉ុន្ដែយើងបានបញ្ជូនសារយ៉ាងច្បាស់ ទៅកាន់រដ្ឋាភិបាលក្រុងមូស្គូ និង ក្រុងមីនស្ក៍ (Minsk) ថា អង្គការណាតូ នៅទីនោះ ត្រូវតែការពារគ្រប់សម្ពន្ធមិត្តរបស់ខ្លួន សូម្បីតែទឹកដីរបស់ណាតូ ត្រឹមតែមួយមិល្លីម៉ែត្រ ក៏មិនឲ្យប៉ះពាល់ ឬ រំលោភបំពាននោះដែរ»។

អាជ្ញាធររុស្ស៊ី បានអះអាង កាលពីថ្ងៃអង្គារ ថា ក្រុងមូស្គូ បានបិទសំណុំរឿងស៊ើបអង្កេតលើបទឧក្រិដ្ឋ នៅក្នុងការបះបោរមិនសម្រេច ដឹកនាំដោយលោក ព្រីហ្គោហ្ស៊ីន ហើយក៏នឹងមិនដាក់ការចោទប្រកាន់ ទៅលើករណីជាច្រើន ប្រឆាំងនឹងរូបគាត់ ឬ កម្លាំងប្រដាប់អាវុធរបស់គាត់។

ទីភ្នាក់ងារសន្ដិសុខសហព័ន្ធន៍ ហៅកាត់ FSB បានបញ្ជាក់ ថា ការស៊ើបអង្កេតរបស់ខ្លួន បានរកឃើញមានការជាប់ពាក់ព័ន្ធ នៅក្នុងការបះបោរ រយៈពេលតិចជាង២៤ម៉ោង ហើយបានបញ្ចប់សកម្មភាពប្រព្រឹត្ដឧក្រិដ្ឋកម្ម។ ដូច្នេះករណីនេះ នឹងមិនត្រូវដេញដោលបន្តទៀតនោះដែរ៕