ប្រទេសថៃ ៖ រហូតមកដល់ថ្ងៃទី១៧ ខែធ្នូ ឆ្នាំ២០២៥ មានរយៈពេល១១ថ្ងៃហើយ ដែលកងទ័ពថៃបានបើកការវាយប្រ.ហារធ្វើសង្គ្រា.មឈ្លានពា.នក្នុងដែនអធិបតេយ្យកម្ពុជាទាំងកំរោល ខណៈវីរកងទ័ពកម្ពុជាចាំបាច់ត្រូវប្រើប្រាស់សិទ្ធិការពារខ្លួន និងបូរណភាពទឹកដី បន្ទាប់ពីអត់ធ្មត់ខ្លាំងរយៈពេល២៤ម៉ោង ។ សង្រ្គាមឈ្លានពា.នជាថ្មីដែលបង្កឡើងដោយកងទ័ពថៃបានអូសបន្លាយពេលយូរជាងសង្គ្រា.មកាលពីខែកក្កដា ហើយនាយករដ្ឋមន្ត្រីម៉ាឡេស៊ី លោក Anwar Ibrahim និងប្រធានាធិបតីអាមេរិក លោក Donald Trump បានជួយសម្របសម្រួលម្តងទៀត ប៉ុន្តែបែរជាមេដឹកនាំថៃទាត់ចោល ។

សង្គ្រាមរវាងកម្ពុជា-ថៃលើកនេះ មិនមែនជាជម្លោះព្រំដែនទេ គឺជាជម្លោះដែលថៃឈ្លានពានទឹកដីរបស់កម្ពុជាកាន់តែជ្រៅ ។ ថ្មីៗនេះ មហាអំណាចចិនក៏បានចេញមកអំពាវនាវជាថ្មីម្តងទៀតឱ្យថៃបញ្ឈប់សង្គ្រាមជាបន្ទាន់ និងងាកមកចរចាដោយសន្តិវិធី គោរពកិច្ចព្រមព្រៀងសន្តិភាពទីក្រុងគូឡាឡាំពួរ ពីព្រោះកម្ពុជា-ថៃជាប្រទេសជិតខាងគ្នា មិនអាចបំបែកពីគ្នាបាន ប៉ុន្តែត្រូវមេដឹកនាំថៃទាត់ចោល ដូចដែលធ្លាប់ទាត់ចោលការអំពាវនាវរបស់ម៉ាឡេស៊ី និងមហាអំណាចអាមេរិក ។

បច្ចុប្បន្ន ពលរដ្ឋថៃនៅព្រំដែនចាប់ផ្តើមធុញទ្រាន់នឹងមេដឹកនាំ និងកងទ័ពរបស់ខ្លួន ដែលបង្កសង្គ្រាមវាយប្រហារកម្ពុជាម្តងហើយម្តងទៀត និងអូសបន្លាយពេលយូរ ដោយសារពួកគេត្រូវស្នាក់នៅក្នុងជំរំភៀសសឹកមិនអាចប្រកបរបររកស៊ី បាត់បង់ចំណូល ហើយមិនដឹងសង្គ្រាមបញ្ចប់ពេលណា ។ ពលរដ្ឋខេត្តបុរីរាំបានអង្វរមេដឹកនាំ ក៏ដូចជាកងទ័ពឱ្យបញ្ចប់សង្គ្រាមឆាប់ៗ ដោយនិយាយថា បើមិនអាចចរចាជាមួយកម្ពុជាបានទេ គួរតែប្រយុទ្ធឱ្យដឹងឈ្នះ-ចាញ់ ដើម្បីចាកចេញពីជំរំភៀសសឹកត្រឡប់ទៅលំនៅឋានប្រកបរបរឡើងវិញ មិនចង់ឃើញសង្គ្រាមអូសបន្លាយយូរទេ ។

កាលពីថ្ងៃទី១៦ ខែធ្នូ ឆ្នាំ២០២៥ ពលរដ្ឋស្រុកបានក្រួត ខេត្តបុរីរាំ ដែលកំពុងស្នាក់នៅក្នុងជំរំភៀសសឹកមួយកន្លែងប្រាប់ថា ធុញទ្រាន់នឹងសង្គ្រាមដែលបង្កឡើងដោយរដ្ឋាភិបាល និងកងទ័ពថៃ ពួកគេចង់ត្រឡប់ទៅលំនៅឋានវិញឆាប់ៗ មិនចង់ជម្លៀសម្តងហើយម្តងទៀត ហើយការជម្លៀសលើកនេះមានរយៈពេល១០ថ្ងៃហើយ ។ ពលរដ្ឋសំណូមពរឱ្យរដ្ឋាភិបាល និងកងទ័ពដោះស្រាយបញ្ចប់ជម្លោះជាមួយកម្ពុជាឆាប់ៗតាមរយៈការចរចា បើចរចាមិនត្រូវគ្នា ឬមិនផ្តល់ប្រយោជន៍ដល់ថៃ ត្រូវតែប្រយុទ្ធឱ្យដឹងឈ្នះ-ចាញ់ ដោយសារមិនអាចប្រកបរបររកស៊ី បាត់បង់ប្រាក់ចំណូល និងប៉ះពាល់ដល់ជីវភាពគ្រួសារយ៉ាងខ្លាំង ។

ចំណែកពលរដ្ឋថៃក្នុងបណ្តាញសង្គមបានចេញមកស្តីបន្ទោសឱ្យនាយករដ្ឋមន្ត្រីចាំផ្ទះ លោក Anutin Charnvirakul ជាបន្តបន្ទាប់ ដោយសារតែបង្កសង្គ្រាមឈ្លានពានកម្ពុជា ដើម្បីបិទបាំងទោសកំហុសរបស់ខ្លួនបណ្តោយឱ្យពលរដ្ឋស្លាប់ដោយសារទឹកជំនន់រហូតដល់ជាង១,០០០នាក់ ជាពិសេស ពលរដ្ឋស្រុកហាតយៃ ខេត្តសុងក្លា និងបិទបាំងរឿងអាស្រូវបន្ទាប់ពីបែកធ្លាយរូបភាពលោក Anutin មានទំនាក់ទំនងជិតស្និទ្ធជាមួយមេឧក្រិដ្ឋកម្មបរទេស ។ សង្គ្រាមលើកនេះ គឺដើម្បីតែផលប្រយោជន៍នយោបាយ រកសំឡេងគាំទ្រពីពលរដ្ឋសម្រាប់ការបោះឆ្នោតនៅខែកុម្ភៈ ឆ្នាំ២០២៦ ទើបចោទប្រកាន់កម្ពុជាបង្កប់មីនយកលេសវាយប្រហារ ។

គួរបញ្ជាក់ថា បន្ទាប់ពីមានការអំពាវនាវពីមហាអំណាចចិនម្តងទៀត រដ្ឋមន្ត្រីក្រសួងការពារជាតិថៃ លោក Natthaphon Narkphanit និយាយថា កងទ័ពថៃនឹងវាយប្រហារកម្ពុជាមួយរយៈទៀតដើម្បីដណ្តើមទឹកដីកម្ពុជានៅតំបន់ដែលថៃចង់បាន មិនយូរទេ សង្គ្រាមនឹងបញ្ចប់ ខណៈនាយករដ្ឋមន្ត្រីថៃចោទប្រកាន់កម្ពុជាបាញ់មុន ហើយថា ដល់ពេលវេលាដែលកម្ពុជាសុំចរចាបញ្ចប់សង្គ្រាម ។ រីឯក្រសួងការបរទេសថៃបានកំណត់លក្ខខណ្ឌ៣ចំណុចសម្រាប់កម្ពុជា ទើបថៃបញ្ចប់សង្គ្រាម រួមមាន ៖ ១-ភាគីកម្ពុជាត្រូវប្រកាសឈប់បាញ់ជាមុន, ២-ការឈប់បាញ់ត្រូវតែកើតឡើងជាក់ស្តែង និងជាបន្តបន្ទាប់ និង៣-ភាគីកម្ពុជាត្រូវផ្តល់កិច្ចសហការក្នុងការបោសសម្អាតមីនដោយភាហ្មត់ចត់ និងស្មោះត្រង់ ៕

យោងតាមប្រព័ន្ធផ្សព្វផ្សាយកូរ៉េខាងត្បូង ថ្មីៗនេះ Influencer ល្បីជាជនជាតិចិនម្នាក់បានបង្កឱ្យមានភាពចម្រូងចម្រាសបន្ទាប់ពីធ្វើត្រាប់តាម Rosé សមាជិក BLACKPINK នៅក្នុងព្រឹត្តិការណ៍អ្នកគាំទ្រមួយ។

ព្រឹត្តិការណ៍មួយធ្វើឡើងដើម្បីជាកិត្តិយសដល់ Rosé ត្រូវបានប្រារព្ធឡើងនៅទីក្រុង Chengdu ប្រទេសចិន ដោយចាប់ផ្តើមនៅដើមខែធ្នូ។ ព្រឹត្តិការណ៍នេះត្រូវបានរចនាឡើងដើម្បីដាក់តាំងបង្ហាញទំនិញផ្សេងៗទាក់ទងនឹង Rosé និងមានកន្លែងថតរូបតាមប្រធានបទដែលផ្តោតទាំងស្រុងជុំវិញរូបភាពរបស់តារាចម្រៀងរូបនេះ។ ទោះជាយ៉ាងណាក៏ដោយ ភាពចម្រូងចម្រាសបានផ្ទុះឡើងនៅពេលដែល Influencer ជនជាតិចិន ម្នាក់ឈ្មោះ «Daisy» ត្រូវបានអញ្ជើញឱ្យចូលរួមពិធីបិទព្រឹត្តិការណ៍នេះ។ ពេញមួយកម្មវិធី ពិធីករនៅនឹងកន្លែងបានណែនាំ Daisy តាមរបៀបមួយដែលធ្វើឱ្យនាងហាក់ដូចជាតារានៃកម្មវិធី។

វីដេអូ និងរូបភាពដែលបានចែកចាយតាមអ៊ីនធឺណិតជាបន្តបន្ទាប់ បានបង្ហាញInfluencer រូបនេះកំពុងថតរូបជាមួយអ្នកគាំទ្ររបស់ Rosé ដោយក្តីរីករាយ ហើយថែមទាំងចុះហត្ថលេខាលើផលិតផលផ្លូវការដែលទាក់ទងនឹង Rosé ទៀតផង។ អាកប្បកិរិយានេះត្រូវបានអ្នកគាំទ្រជាច្រើនចាត់ទុកថាជារឿងគួរឱ្យអស់សំណើច។ រលកនៃការរិះគន់កាន់តែខ្លាំងឡើង នៅពេលដែលស្ទីល និងសម្លៀកបំពាក់របស់ Daisy ស្រដៀងនឹងសោភ័ណភាពម៉ូតសម្លៀកបំពាក់របស់ Rosé។ អ្នកប្រើប្រាស់អ៊ីនធឺណិតបានចោទប្រកាន់ Daisy ថាបានយកតម្រាប់តាម Idol របស់នាងដោយចេតនា និងលួចយកចំណាប់អារម្មណ៍នៅក្នុងព្រឹត្តិការណ៍មួយដែលមិនមែនសម្រាប់នាង។

បន្ទាប់ពីប្រតិកម្មតបវិញនេះ Daisy បានបង្ហោះសេចក្តីថ្លែងការណ៍មួយនៅលើបណ្តាញសង្គម។ នាងបាននិយាយថា «បន្ទាប់ពីបានឃើញភាពចម្រូងចម្រាសនេះ ខ្ញុំមានអារម្មណ៍ថាខ្ញុំត្រូវការបំភ្លឺ»។ យោងតាម Daisy នាងត្រូវបានអញ្ជើញឱ្យចូលរួមព្រឹត្តិការណ៍ដែលរៀបចំដោយផ្សារទំនើប ហើយសកម្មភាពទាំងអស់ត្រូវបានព្រមព្រៀងជាមុនជាមួយអ្នករៀបចំ។

Daisy បានសង្កត់ធ្ងន់ថា «សកម្មភាពទាំងអស់របស់ខ្ញុំគឺមានគោលបំណងផ្សព្វផ្សាយ Rosé ហើយខ្ញុំមិនទទួលបានសំណងណាមួយឡើយ»។ Daisy ក៏បានទទួលស្គាល់ការព្រួយបារម្ភរបស់អ្នកគាំទ្រ ហើយបានបន្ថែមថា «ខ្ញុំយល់យ៉ាងច្បាស់ថា Rosé និងអ្នកគាំទ្ររបស់នាងគួរតែជាចំណុចកណ្តាលនៃការចាប់អារម្មណ៍ជានិច្ច។ ប្រសិនបើសកម្មភាពណាមួយរបស់ខ្ញុំត្រូវបានគេយល់ឃើញថាមិនសមរម្យ ខ្ញុំនឹងគិតគូរដោយស្មោះ ហើយនឹងប្រុងប្រយ័ត្នបន្ថែមទៀតនាពេលអនាគត»។

បើទោះបីជាមានការពន្យល់របស់នាងក៏ដោយ ក៏មតិយោបល់អវិជ្ជមានដែលសំដៅទៅលើ Daisy មិនបានថមថយឡើយ។ អ្នកគាំទ្រជាច្រើននៅតែបន្តបង្ហាញពីការមិនពេញចិត្តរបស់ពួកគេ ដោយអះអាងថាគួរតែមានបន្ទាត់ច្បាស់លាស់រវាងការកោតសរសើរ និងការធ្វើត្រាប់តាមតារាល្បីៗ។ ហេតុការណ៍នេះបានបង្កឱ្យមានការជជែកវែកញែកជុំវិញការគ្រប់គ្រងរូបភាពម៉ាកយីហោ ភាពរសើបរបស់អ្នកគាំទ្រ និងហានិភ័យនៃការនាំយកតារាល្បីៗតាមអ៊ីនធឺណិតចូលរួមក្នុងព្រឹត្តិការណ៍ដែលផ្តោតលើសិល្បករ៕

ប្រទេសថៃ ៖ កងទ័ពថៃបានធ្វើសកម្មភាពឈ្លានពា.នដោយប្រដាប់អាវុ.ធមកលើដែនអធិបតេយ្យកម្ពុជាកាន់តែខ្លាំងដើម្បីបំពេញមហិច្ឆតាពង្រីកទឹកដី បន្ទាប់ពីមេដឹកនាំថៃទាត់ចោលការអន្តរាគមន៍សម្របសម្រួលរបស់ម៉ាឡេស៊ីជាប្រធានអាស៊ាន មហាអំណាចអាមេរិក និងមហាអំណាចចិន ។ កាលពីថ្ងៃទី១៦ ខែធ្នូ ឆ្នាំ២០២៥ គណៈរដ្ឋមន្ត្រីថៃបានអនុម័តថវិការហូតដល់ជាង២ពាន់ ៤រយលានបាត (ឬជាង៧៧លាន ៦សែនដុល្លារ) សម្រាប់ឱ្យកងទ័ពធ្វើប្រតិបត្តិការនៅព្រំដែនកម្ពុជា-ថៃ ខណៈកងទ័ពភូមិភាគ២ថៃហាមពលរដ្ឋបង្ហោះរូបភាព វីដេអូ ឬចែកចាយទីតាំងឈរជើងកងទ័ព និងកុំផ្សព្វផ្សាយពីផែនការវាយប្រ.ហារជាដាច់ខាត ។

កាលពីថ្ងៃទី១៦ ខែធ្នូ អ្នកនាំពាក្យរដ្ឋាភិបាលថៃ លោក Siripong Angkasakulkiat បាននិយាយក្រោយកិច្ចប្រជុំគណៈរដ្ឋមន្ត្រីថា គណៈរដ្ឋមន្ត្រីថៃបានសម្រេចអនុម័តថវិកាជាង២ពាន់ ៤រយលានបាត សម្រាប់ប្រតិបត្តិការកងទ័ពនៅព្រំដែនជាប់កម្ពុជា តាមសំណើរបស់ក្រសួងការពារជាតិបន្ទាប់ពីមានការស្នើសុំពីកងទ័ពជើងគោក និងជើងទឹក ។ រដ្ឋាភិបាលថៃរីករាយក្នុងការផ្តល់ថវិកានេះសម្រាប់ចំណាយពាក់ព័ន្ធនឹងសកម្មភាពកងទ័ពនៅព្រំដែនភាគខាងកើតប្រទេសថៃ ។

ចំណែកកងទ័ពភូមិភាគ២ថៃបានហាមពលរដ្ឋបង្ហោះរូបភាព វីដេអូ ឬចែកចាយទីតាំងឈរជើងកងទ័ព និងកុំផ្សព្វផ្សាយពីផែនការវាយប្រ.ហារជាដាច់ខាតដើម្បីកុំឱ្យសត្រូវដឹងខ្លួនមុន ។ កងទ័ពភូមិភាគ២ថៃបញ្ជាក់ថា ការចែកចាយទាំងនេះធ្វើឱ្យសត្រូវប្រុងប្រយ័ត្ន ត្រៀមខ្លួនទាន់ពេលវេលា និងប៉ះពាល់ដល់ប្រតិបត្តិការរបស់កងទ័ពថៃ ។

សារព័ត៌មាន Daily News រាយការណ៍នៅថ្ងៃទី១៧ ខែធ្នូ ឆ្នាំ២០២៥ ថា កងទ័ពថៃបានបើកការវាយប្រ.ហារកម្ពុជាជាបន្តបន្ទាប់ ហើយការចែកចាយទីតាំងឈរជើងកងទ័ព និងផ្សព្វផ្សាយពីផែនការកងទ័ពវាយប្រហារសត្រូវ គឹមិនផ្តល់ផលល្អទេ ។ ហេតុនេះ កងទ័ពភូមិភាគ២ សំណូមពរឱ្យពលរដ្ឋបញ្ឈប់ការចែកចាយទីតាំងឈរជើងកងទ័ព ហាមផ្សព្វផ្សាយពីផែនការវាយសត្រូវ ពីព្រោះនឹងធ្វើឱ្យសត្រូវដឹងខ្លួនមុន និងត្រៀមខ្លួនទាន់ពេលវេលា ថែមទាំងបង្កគ្រោះថ្នាក់ដល់កងទ័ពថៃដែលកំពុងធ្វើសង្គ្រាមឈ្លានពាន ។

គួរបញ្ជាក់ថា សកម្មភាពឈ្លានពានដោយប្រដាប់អាវុធរបស់កងទ័ពថៃបានបង្កឱ្យមានការខូចខាតយ៉ាងធ្ងន់ធ្ងរ ដោយគិតត្រឹមថ្ងៃទី១៦ ខែធ្នូ ជនស៊ីវិលកម្ពុជាបានបាត់បង់ជីវិតកើនឡើងរហូតដល់ចំនួន១៧នាក់ (ទារក១នាក់) និងរងរបួសជនស្លូតត្រង់ ៧៧នាក់ ។ កម្ពុជាសូមអំពាវនាវឱ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ចំពោះការរំលោភបំពានសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា-ថៃ និងសកម្មភាពឧក្រិដ្ឋកម្មសង្គ្រាមខុសច្បាប់របស់ថៃម្តងហើយម្តងទៀត ដោយទាមទារឱ្យថៃទទួលខុសត្រូវទាំងស្រុងចំពោះការរំលោភបំពានដ៏កំរោលនេះ ។

កម្ពុជាអំពាវនាវឱ្យថៃបញ្ឈប់រាល់អរិភាពជាបន្ទាន់ ដោយដកកម្លាំងចេញពីដែនអធិបតេយ្យរបស់កម្ពុជា និងចៀសវាងសកម្មភាពឈ្លានពានដែលគំរាមកំហែងសន្តិភាព និងស្ថិរភាពក្នុងតំបន់ ។ ទន្ទឹមនឹងនេះ កម្ពុជាអំពាវនាវឱ្យភាគីថៃងាកមកគោរពកិច្ចព្រមព្រៀងបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព និងកាតព្វកិច្ចទាំងឡាយនៅក្រោមច្បាប់អន្តរជាតិឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ ។

ក្រសួងការពារជាតិកម្ពុជាបានចេញសេចក្តីអំពាវនាវដល់ពលរដ្ឋដើម្បីចូលរួមរក្សាសុវត្ថិភាពកងកម្លាំងរបស់យើង ក៏ដូចជារក្សាការសម្ងាត់យោធា សូមបញ្ឈប់ការផ្សព្វផ្សាយជាបន្ទាន់នូវរាល់ព័ត៌មាន វីដេអូ ឬរូបភាពផ្សេងៗដែលអាចបង្ហាញពីសកម្មភាពប្រតិបត្តិការយោធា, ផែនទី, ការបង្ហាញពីការចល័ត ឬដាក់ពង្រាយកងទ័ព, ទីតាំងឈរជើង លេណដ្ឋាន (ត្រង់សេ), ជំរំជម្រក, ការចល័តសព្វាវុធ, ផ្លូវផ្គត់ផ្គង់សម្ភារៈបរិក្ខារ ឬស្បៀងអាហាររបស់កងទ័ព តាមគ្រប់បណ្តាញទំនាក់ទំនងសង្គម ដូចជា ៖ Facebook, TikTok, YouTube ឬប្រព័ន្ធផ្សព្វផ្សាយផ្សេងៗជាដាច់ខាត ៕

ប្រទេសថៃ៖ កីឡាការិនីកីឡាអេឡិចត្រូនិក (E-Sport ) តំណាងម្ចាស់ផ្ទះថៃ Warasin Naraphat ឬមានរហ័សនាមថា “Tokyogurl” ត្រូវបានដកសិទ្ធិចេញពីការប្រកួតកីឡាស៊ីហ្គេមលើកទី 33 បន្ទាប់ពីត្រូវបានគេចាប់បានថា បានប្រើប្រាស់កម្មវិធីដែលគ្មានការអនុញ្ញាតដើម្បីបន្លំក្នុងអំឡុងពេលការប្រកួត Arena of Valor ទល់នឹងក្រុមវៀតណាម។

យោងតាមការចុះផ្សាយរបស់សារព័ត៌មានក្នុងស្រុករបស់ថៃ នៅថ្ងៃទី១៦ ខែធ្នូ ឆ្នាំ២០២៥ សហព័ន្ធកីឡាអេឡិចត្រូនិកថៃ (TESF) បានបញ្ជាក់ថា កីឡាការនី Naraphat ត្រូវបានដកសិទ្ធិកាលពីថ្ងៃអង្គារ ទី១៦ ខែធ្នូ ឆ្នាំ២០២៥តទៅ បន្ទាប់ពីក្រុមបច្ចេកទេសបានរកឃើញថា នាងបានរំលោ.ភយ៉ាងធ្ងន់ធ្ងរលើបទប្បញ្ញត្តិបច្ចេកទេស តាមរយៈការប្រើប្រាស់កម្មវិធីជំនួយលើទូរស័ព្ទដៃ ដែលអាចអនុញ្ញាតឱ្យជនទី៣ អាចចូលលេងជំនួសនាងបាន អំឡុងពេលការប្រកួតនោះ ហើយនាងគ្រាន់តែអង្គុយបង្ហាញសកម្មភាព ដូចជានាងកំពុងតែប្រកួតផ្ទាល់តែប៉ុណ្ណោះ។

លើសពីនេះ Tokyogurl ក៏ថែមទាំងបានប្រើប្រាស់កាយវិការមិនសមរម្យ ក្នុងពេលផ្សាយផ្ទាល់ការប្រកួត ដោយការលើកម្រាមដៃកណ្តាល បង្ហាញនៅចំពោះមុខកាម៉េរាថែមទៀតផង ដែលរឿងនេះបានធ្វើឱ្យមហាជនរិះគន់លើនាងកាន់តែខ្លាំង។

ក្រោយកើតមានភាពចម្រូងចម្រាស់ទាំងនេះ ក្រុមកីឡាអេឡិចត្រូនិក Arena of Valor របស់ម្ចាស់ផ្ទះថៃ នៅតែចាញ់ការប្រកួតនេះដដែល ដោយត្រូវបានក្រុមនារីវៀតណាម ផ្ដួលក្រោមលទ្ធផល ៣-០ កាលពីថ្ងៃទី១៥ ខែធ្នូ ដែលធ្វើឲ្យអ្នកគាំទ្រក្រុមម្ចាស់ផ្ទះថៃកាន់តែបាក់មុខថែមមួយកម្រិតទៀត។

យ៉ាងណាក្រោយមានរឿងនេះកើតឡើង ការស៊ើបអង្កេតខ្លីបានធ្វើឡើង ពីសំណាក់ផ្នែកបច្ចេកទេសកីឡាស៊ីហ្គេម ហើយបានរាយការណ៍បញ្ហានោះទៅអ្នករៀបចំ។ បន្ទាប់មកល្បិចរបស់ កីឡាការិនី Tokyogurl ត្រូវបានលាតត្រដាង នាងត្រូវរងនូវពិន័យយ៉ាងធ្ងន់ ដោយត្រូវបានលុបឈ្មោះចេញពីព្រឹត្តិការណ៍ស៊ីហ្គេម លើកទី៣៣ ដោយស្វ័យប្រវត្តិ។

ដោយឡែក មិត្តរួមក្រុមរបស់នាង ក៏បានបង្ហាញអារម្មណ៍ខកចិត្តចំពោះទង្វើពិបាកនឹងទទួលយកនោះ លើបណ្តាញសង្គមថែមទៀតផង។ ប៉ុន្មានម៉ោងក្រោយពីមានរឿងអាស្រូវក្លែងបន្លំប្រើកម្មវិធីជំនួយនេះ សហព័ន្ធកីឡាអេឡិចត្រូនិកថៃ (TESF) ក៏បានសម្រេចចិត្តដកក្រុមនារីកីឡាអេលិចត្រូនិក លើវិញ្ញាសា Arena of Valor ទាំងអស់ចេញពីការប្រកួតស៊ីហ្គេមតែម្តង។

ជាមួយគ្នានេះដែរក្លឹបរបស់ Naraphat គឺ Talon ក៏បានយល់ស្របនឹងការសម្រេចចិត្តនេះផងដែរតាមរយៈការប្រកាសបញ្ចប់កិច្ចសន្យារបស់ Naraphat ភ្លាមៗដោយគ្មានការស្ទាក់ស្ទើ។ តាមការបញ្ជាក់ ការសម្រេចនេះនឹងចូលជាធរមាន ចាប់ពីថ្ងៃទី១៦ ធ្នូ នេះតទៅ៕

អគ្គរាជទូតខ្មែរប្រចាំនៅប្រទេសបារាំង បានណែនាំឲ្យអ្នកដំណើរបរទេស ដែលមានបំណងធ្វើដំណើរមកកាន់ប្រទេសកម្ពុជា ប៉ុន្តែត្រូវប្ដូរជើងហោះហើរនៅប្រទេសថៃ ឲ្យមានការប្រុងប្រយ័ត្ន ឬបើអាចគួរប្ដូរជើងហោះហើរតែម្ដង ព្រោះមានរបាយការណ៍ជាច្រើនបានបង្ហាញថា អ្នកដំណើរជាច្រើនត្រូវបានរំខានដោយការសួរសំណួរ និងត្រួតពិនិត្យដ៏តឹងរឹង មុននឹងពួកគេត្រូវបានអនុញ្ញាតឲ្យហោះមកប្រទេសកម្ពុជា ដែលបណ្ដាលឲ្យប៉ះពាល់អារម្មណ៍យ៉ាងខ្លាំង។

តាមរយៈការចែករំលែកនៅលើទំព័រហ្វេសប៊ុក កាលពីថ្ងៃទី១៥ ខែធ្នូ ឆ្នាំ២០២៥ លោក Luy David អគ្គរាជទូតខ្មែរប្រចាំនៅប្រទេសបារាំង បានលើកឡើងពីផលលំបាកយ៉ាងធ្ងន់ធ្ងរសម្រាប់អ្នកដំណើរបរទេស ជាពិសេសមកពីខាងប៉ែកអ៊ឺរ៉ុប ដែលត្រូវហោះហើយមកកាន់ប្រទេសកម្ពុជាតាមរយៈជើងហោះហើរពីទីក្រុងបាងកក ប្រទេសថៃ។

យោងតាមការដកស្រង់ពីរបាយការណ៍របស់អ្នកដំណើរបរទេសដេលបានមកដល់កម្ពុជា បានបង្ហាញថា អ្នកដំណើរជាច្រើនបានជួបប្រទះនឹងបញ្ហារំខានមួយចំនួននៅព្រលានយន្តហោះថៃ ដោយមន្រ្តីអាកាសចរណ៍ថៃបានសួរចម្លើយពួកគេយ៉ាងយូរ, ទាមទារហួសហេតុសម្រាប់ភស្តុតាងនៃមធ្យោបាយហិរញ្ញវត្ថុ, ត្រួតពិនិត្យលម្អិតជ្រុលហួសហេតុនៃការកក់សណ្ឋាគារ និងអ្នកដំណើរខ្លះបានអះអាងថា ពួកគេត្រូវបានដាក់ឲ្យរង់ចាំនៅក្នុងបរិយាកាសដ៏គួរឲ្យខ្លាច និងមានសម្ពាធ ហើយជួនកាលត្រូវជាប់ពាក់ព័ន្ធនឹងការសង្ស័យមិនសមហេតុផល។

ក្នុងករណីខ្លះទៀត ស្ថានភាពទាំងនេះត្រូវបានបណ្ដាលឲ្យមានបញ្ហាបាត់បង់ឥវ៉ាន់ ឬវ៉ាលីរបស់ពួកគេថែមទៀត នៅពេលធ្វើដំណើរមកដល់អាកាសយានដ្ឋានកម្ពុជា ដោយគ្មានការពន្យល់ឬបកស្រាយភ្លាមៗឡើយ។
ដោយសង្កេតឃើញពីការកើនឡើងនៃករណីទាំងនេះ លោក Luy David ក៏បានផ្ដល់ការណែនាំ ឲ្យអ្នកធ្វើដំណើរផ្សេងៗទៀតគួរជៀសវាងការឆ្លងកាត់ប្រទេសថៃ និងប្រើប្រាស់ក្រុមហ៊ុនអាកាសចរណ៍ថៃនៅពេលធ្វើដំណើរមកកាន់ប្រទេសកម្ពុជា ដើម្បីជាការប្រុងប្រយ័ត្ន និងបង្ការការរំខានផ្សេងៗ។

លោកបន្ថែមថា មានក្រុមហ៊ុនអាកាសចរណ៍អន្តរជាតិ និងផ្លូវឆ្លងកាត់ជំនួសជាច្រើនក្រៅពីក្រុមហ៊ុនថៃ ដែលផ្តល់ជូននូវសេវាកម្មល្អប្រសើរដោយការគោរព និងផ្ដល់នូវបទពិសោធន៍ធ្វើដំណើររលូនដោយគ្មានការរើសអើង ចំពោះអ្នកដំណើរដែលចង់ធ្វើដំណើរមកកម្ពុជា។

អគ្គរាជទូតកម្ពុជារូបនេះ ក៏បានឆ្លៀតគូសបញ្ជាក់ដែរថា ប្រទេសកម្ពុជានៅតែជាគោលដៅទេសចរណ៍ដ៏ស្វាគមន៍ និងមានសុវត្ថិភាពបំផុត។ តែទោះជាយ៉ាងណា ក៏យើងមានការសោកស្ដាយ ចំពោះបញ្ហាអកុសលទាំងឡាយ ដែលអ្នកដំណើរបានជួបប្រទះនៅមុនពេលបានមកដល់ទឹកដីកម្ពុជា៕

ប្រទេសវៀតណាម ៖ វៀតណាមបានបង្ហាញចំនួនភ្ញៀវទេសចរបរទេសដែលមកលេងប្រទេសរបស់ខ្លួនចាប់ពីដើមខែមករា រហូតដល់ពាក់កណ្តាលខែធ្នូ ឆ្នាំ២០២៥ លើសគោលដៅ និងច្រើនជាងបណ្តាឆ្នាំមុនៗ គឺស្មើរហូតដល់២១លាននាក់ បើទោះជាវៀតណាមប្រឈមបញ្ហាធូលីកខ្វក់ និងទឹកជំនន់ខ្លាំងក្តី ។ ភ្ញៀវទេសចរមកលេងវៀតណាមច្រើនជាងគេ គឺភ្ញៀវទេសចរចិន បន្ទាប់មក កូរ៉េខាងត្បូង តៃវ៉ាន់ អាមេរិក និងជប៉ុន ដោយសារវៀតណាមមានទីតាំងជាប់ឆ្នេរសមុទ្រ ធនធានធម្មជាតិសម្បូរបែប និងការចាប់អារម្មណ៍វប្បធម៌-ប្រវត្តិសាស្ត្រ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី១៦ ខែធ្នូ ឆ្នាំ២០២៥ ក្រសួងវប្បធម៌ កីឡា និងទេសចរណ៍វៀតណាមបញ្ជាក់ថា ភ្ញៀវទេសចរបរទេសមកលេងប្រទេសវៀតណាម ចាប់ពីដើមខែមករា រហូតដល់ពាក់កណ្តាលខែធ្នូ ឆ្នាំ២០២៥ គឺស្មើរហូតដល់២១លាននាក់ ដែលជាចំនួនច្រើនបំផុតទោះជាវៀតណាមប្រឈមនឹងបញ្ហាធូលីកខ្វល់លើអាកាស និងទឹកជំនន់ធ្ងន់ធ្ងរក្តី ។ នេះជាការកើនឡើងចំនួនភ្ញៀវទេសចរបរទេសគួរឱ្យកត់សម្គាល់បន្ទាប់ពីជំងឺកូវីដ-១៩ ឆ្លងរាតត្បាត ដែលធ្វើឱ្យភ្ញៀវទេសចរបរទេសមកវៀតណាមធ្លាក់ចុះ ។

បច្ចុប្បន្ន វៀតណាមបានក្លាយជាគោលដៅទេសចរណ៍ដ៏លេចធ្លោទាក់ទាញភ្ញៀវទេសចរបរទេសមកកម្សាន្តក្នុងចំណោមបណ្តាប្រទេសនៅតំបន់អាស៊ីអាគ្នេយ៍ ដោយសារវៀតណាមមានទីតាំងនៅជាប់ឆ្នេរសមុទ្រ ធនធានធម្មជាតិសម្បូរបែប ទេសភាពធម្មជាតិដ៏ស្រស់ស្អាត ព្រមទាំងការចាប់អារម្មណ៍ប្រវត្តិសាស្ត្រ និងវប្បធម៌ពីសំណាក់ភ្ញៀវទេសចរ ។

កាលពីថ្ងៃទី១៥ ខែធ្នូ ក្រសួងវប្បធម៌ កីឡា និងទេសចរណ៍វៀតណាមបានរៀបចំពិធីអបអរមួយនៅកោះ Phu Quoc (កោះត្រល់) ដែលបច្ចុប្បន្ន ស្ថិតនៅខេត្តអានសាង បន្ទាប់ពីភ្ញៀវទេសចរបរទេសមកលេងវៀតណាមរហូតដល់២១លាននាក់ និងលើសគោលដៅកំណត់ត្រឹមតែ២០លាននាក់នៅឆ្នាំ២០២៥ ។ នេះជាឆ្នាំដំបូងដែលវៀតណាមទទួលបានភ្ញៀវទេសចរលើសគោលដៅ និងខ្ពស់ជាងអំឡុងពេលមុនជំងឺកូវីដ-១៩ ឆ្លងរាតត្បាត ។

នៅមុនពេលជំងឺកូវីដ-១៩ ឆ្លងរាតត្បាត វៀតណាមធ្លាប់ទទួលបានភ្ញៀវទេសចរច្រើនបំផុតត្រឹមតែ១៨លាននាក់ប៉ុណ្ណោះ ។ បន្ទាប់មក នៅឆ្នាំ២០២១ ចំនួនភ្ញៀវទេសចរបរទេសបានធ្លាក់ចុះយ៉ាងខ្លាំង គឺភ្ញៀវទេសចរបរទេសមកលេងវៀតណាមមិនដល់១៦ម៉ឺននាក់ទេ ។

ចំនួនភ្ញៀវទេសចរបរទេសមកលេងវៀតណាមនៅឆ្នាំ២០២៥ កើនឡើងលើសឆ្នាំ២០២៤ រហូតដល់១៩.៣% ទោះជានៅឆ្នាំនេះ ទីក្រុងហាណូយមានធូលីកខ្វក់ខ្លាំង និងទីក្រុងវ៉េ ទីក្រុងហយអាន់ និងទីក្រុងញ៉ាចាង ដែលសុទ្ធតែជាទីក្រុងពេញនិយមបំផុតសម្រាប់ភ្ញៀវទេសចរ បានលិចលង់ដោយទឹកជំនន់ធ្ងន់ធ្ងរក្តី ។ តាមសេចក្តីរាយការណ៍ពីការិយាល័យស្ថិតិជាតិ ចាប់ពីមករា ដល់ខែវិច្ឆិកា ឆ្នាំ២០២៥ ភ្ញៀវទេសចរចិនបានមកលេងវៀតណាមច្រើនជាងគេ បន្ទាប់មក ភ្ញៀវទេសចរកូរ៉េខាងត្បូង តៃវ៉ាន់ អាមេរិក និងជប៉ុន ៕