អេស្ប៉ាញ៖ យោងតាមប្រភពព័ត៌មាន Reuters កាលពីថ្ងៃទី៣០ ខែមិថុនា បានឱ្យដឹងថា អ្នកជំនាញកំពុងធ្វើការដើម្បីបង្កើតស្បូនសិប្បនិម្មិតសម្រាប់ទារកមិនគ្រប់ខែ បន្ទាប់ពីការធ្វើតេស្តដោយជោគជ័យទៅលើសត្វ។
នៅក្នុងការធ្វើតេស្តនោះ គំរូសុកសិប្បនិម្មិតបានបង្កើតឡើងវិញនូវបរិយាកាសការពារជាមួយនឹងធុងថ្លាដែលធ្វើពីវត្ថុធាតុដើមដែលឆបគ្នានឹងជីវសាស្រ្ត ដោយនៅខាងក្នុងសួត ពោះវៀន និងខួរក្បាលរបស់ទារកអាចបន្តអភិវឌ្ឍបាន។ កុងតឺន័រទាំងនោះបានតភ្ជាប់ទៅនឹងប្រព័ន្ធឈាមរត់សារធាតុរាវ amniotic ដើម្បីរក្សាទារកឱ្យនៅដាច់ដោយឡែកពីការរំញោចខាងក្រៅ ប៉ុន្តែនៅតែអាចចូលដំណើរការបានសម្រាប់ការត្រួតពិនិត្យអ៊ុលត្រាសោន។

គោលបំណងនៃការបង្កើតស្បូនសិប្បនិម្មិតនេះ គឺដើម្បីថែរក្សាអាយុជិវិតរបស់ទារក ព្រោះកន្លងទៅយោងតាមតួលេខរបស់អង្គការសុខភាពពិភពលោក បានបង្ហាញថា ទារកភាគច្រើននៅលើពិភពលោកបានបាត់បង់ជីវិត ឬពិការ ដោយសារហានិភ័យនៃការកើតមិនគ្រប់ខែ។ ដូច្នេះហើយបច្ចុប្បន្នក្រុមអ្នកស្រាវជ្រាវវេជ្ជសាស្ត្រ BCNAtal និង Fundacion La Caixa កំពុងព្យាយាមបង្កើតប្រព័ន្ធដែលអនុញ្ញាតឱ្យទារកត្រូវបានរក្សាទុកនៅខាងក្រៅរាងកាយរបស់ម្តាយ ប៉ុន្តែនៅតែស្ថិតក្រោមលក្ខខណ្ឌគភ៌ ដូចជាបន្តដកដង្ហើមតាមទងផ្ចិត ការញ៉ាំតាមរយៈទងផ្ចិត រុំព័ទ្ធដោយសារធាតុរាវនៅសីតុណ្ហភាពថេរ។ ក្រុមអ្នកជំនាញក៏បានធ្វើការសិក្សាលើសត្វចៀម និងរក្សាទារកក្នុងផ្ទៃរយៈពេល ១២ ថ្ងៃ ដោយពួកគេក៏មានគម្រោងធ្វើការពិសោធន៍ជាមួយសត្វជ្រូកផងដែរ មុនពេលណែនាំការសាកល្បងនេះទៅឱ្យមនុស្សក្នុងរយៈពេលប៉ុន្មានឆ្នាំខាងមុខ។

លោក Kelly Werner សាស្ត្រាចារ្យរងផ្នែកជំងឺកុមារនៅសាកលវិទ្យាល័យ Columbia បាននិយាយថា គម្រោងនេះគឺពិតជាស្មុគស្មាញណាស់ ពាក់ព័ន្ធនឹងឯកទេសវេជ្ជសាស្ត្រផ្សេងៗគ្នា ហើយត្រូវការវិស្វករមកពីគ្រប់វិស័យទៀត។ ប៉ុន្តែទោះជាយ៉ាងណាក៏ដោយ លទ្ធផលវិជ្ជមានរបស់ក្រុមអេស្ប៉ាញត្រូវបានធ្វើតេស្តយ៉ាងម៉ត់ចត់ក្នុងការសាកល្បងព្យាបាលមនុស្សដើម្បីវាយតម្លៃសុវត្ថិភាព និងផលប៉ះពាល់។ លោកក៏បានបន្តទៀតថា “នេះគឺជាការអភិវឌ្ឍន៍ដ៏គួរឱ្យរំភើបមួយ ប៉ុន្តែសុកសិប្បនិម្មិតមិនមានបំណងជំនួសសុកធម្មជាតិនោះទេ៕ ប្រភព៖vnexpress

រាជធានីបាងកក៖ ស្របពេលការបោះឆ្នោតជ្រើសរើសតំណែងប្រធានសភាថ្មី នៅក្នុងប្រទេសថៃ នឹងត្រូវធ្វើឡើង នៅថ្ងៃអង្គារ ទី៤ ខែកក្កដា ប៉ុន្ដែគណបក្សប្រឆាំង ចំនួន២ ដែលបានអាសនៈច្រើនជាងគេ នៅក្នុងការបោះឆ្នោតសកល កាលពីថ្ងៃទី១៤ ខែឧសភា នៅតែមិនទាន់ត្រូវរ៉ូវគ្នា លើការដណ្ដើមកាន់កាប់តំណែងកំពូល នៅក្នុងស្ថាប័ននីតិប្បញ្ញត្ដិមួយនេះ ប៉ុន្ដែតំណាងសម្ពន្ធភាពគណបក្សចម្រុះទាំង៨របស់ពួកគេ នៅតែមានសង្ឃឹម ថា នឹងអាចសម្របសម្រួល បញ្ចប់នូវការជាប់គាំងនេះ។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃចន្ទ ទី៣ ខែកក្កដា ថា គណបក្សឆ្ពោះទៅមុខ (Move Forward Party ) ហៅកាត់ MFP ជាអ្នកទទួលបានអាសនៈច្រើនជាងគេ និង គណបក្សភឿថៃ (Pheu Thai) ជាអ្នកទទួលបានសំឡេងលំដាប់លេខ២ នៅក្នុងការបោះឆ្នោតសកល កាលពីថ្ងៃទី១៤ ខែឧសភា ឆ្នាំ២០២៣។ ប៉ុន្ដែរហូតមកដល់ពេលនេះ គណបក្សទាំង២ នៅក្នុងចំណោមសម្ពន្ធភាពទាំង៨គណបក្ស នៅតែមិនអាចបញ្ចប់នូវការជាប់គាំង អំពីជម្លោះតំណែងប្រធានសភា នៅក្នុងកិច្ចប្រជុំរបស់ពួកគេ ជាមួយគណបក្សជាដៃគូចំនួន៦ផ្សេងទៀត កាលពីថ្ងៃអាទិត្យ។

បើទោះជាយ៉ាងនេះក្ដី ក្រុមតំណាងគណបក្សទាំងនេះ បានអះអាង ថា ពួកគេសង្ឃឹម ថា គណបក្សឆ្ពោះទៅមុខ និង គណបក្សភឿថៃ នឹងអាចដោះស្រាយបញ្ហាទាំងនេះរួចរាល់ នៅថ្ងៃចន្ទ នេះ។

សម្ពន្ធភាពគណបក្ស ចំនួន៨ ដឹកនាំដោយគណបក្សឆ្ពោះទៅមុខ បានចូលរួម នៅក្នុងកិច្ចប្រជុំ នៅឯទីស្នាក់ការកណ្ដាលរបស់គណបក្សឆ្ពោះទៅមុខ នៅក្នុងមានគោលបំណង ដោះស្រាយជម្លោះ អំពីការការប្រជែងតំណែងប្រធានសភា។ សម្ពន្ធភាពរបស់គណបក្សទាំង៨នេះ កាលពីមុនដំបូងឡើយ បានឯកភាពគ្នា គាំទ្រដល់លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ ជានាយករដ្ឋមន្រ្ដីថ្មីរបស់ប្រទេសថៃ។

លោកប្រធានគណបក្សឆ្ពោះទៅមុខ បានបញ្ជាក់ ក្រោយកិច្ចប្រជុំ កាលពីថ្ងៃអាទិត្យ ថា ដៃគូគណបក្សចម្រុះទាំង៨ បានពិភាក្សាគ្នា លើបញ្ហាតំណែងប្រធានសភា។ រីឯការចរចានេះ បានបង្ហាញ អំពីសញ្ញាវិជ្ជមានជាច្រើន។ បើទោះជាយ៉ាងណាក៏ដោយ លោកប្រធាន បានអះអាង ថា គណបក្សរបស់គាត់ នឹងនៅតែរង់ចាំចម្លើយដ៏ជាក់លាក់ មកពីគណបក្សភឿថៃ។

លោកប្រធានគណបក្សឆ្ពោះទៅមុខ ភីថា បានសង្កត់ធ្ងន់ ថា «ប្រសិនបើប្រជាជនបដិសេធ យើងត្រូវតែសុំទោសដល់ពួកគាត់។ យើងមានគោលបំណងដ៏សំខាន់បំផុត ត្រូវតែបង្កើតរដ្ឋាភិបាលចម្រុះថ្មីមួយ ហើយរួបរួមគ្នា ដោះស្រាយគ្រប់បញ្ហារបស់ប្រជាជន»។

លោក ភីថា លីមចារឿនរ៉ាត បានបន្ថែម ថា គាត់បដិសេធនូវការធ្វើអត្ថាធិប្បាយ អំពីលទ្ធភាពបេក្ខជនផ្សេងទៀត សម្រាប់ទទួលតំណែងប្រធានសភា។ ចំណែកការរំពឹងទុកថ្មីផ្សេងទៀត នឹងមិនត្រូវទទួលយកនោះឡើយ ព្រោះវានាំឲ្យប៉ះពាល់ ដល់ការបង្កើតរដ្ឋាភិបាល និង ធ្វើឲ្យប្រជាជន មានការយល់ច្រឡំ។

លោក ឆូលណាន ស្រីកែវ (Cholnan Srikaew) ប្រធានគណបក្សភឿថៃ បានអះអាង ក្រោយកិច្ចប្រជុំ កាលពីថ្ងៃអាទិត្យ ថា គណបក្សភឿថៃ នឹងពិគ្រោះយោបល់ជាមួយនឹងសមាជិកទាំងអស់របស់គណបក្ស នៅក្នុងកិច្ចប្រជុំផ្ទៃក្នុងមួយ នៅថ្ងៃចន្ទនេះ។ បើទោះជាយ៉ាងណាក៏ដោយ គាត់នៅតែសង្ឃឹម ថា បញ្ហានេះ នឹងត្រូវតែមានដំណោះស្រាយមួយដ៏សមស្រប។ ប្រសិនបើលទ្ធផល ខុសពីការរំពឹងទុករបស់ប្រជាជន វានឹងប៉ះពាល់ដល់សម្ពន្ធមិត្ត និង ការបង្កើតរដ្ឋាភិបាល។ ប៉ុន្ដែគាត់សង្ឃឹម ថា បញ្ហាទាំងនេះ នឹងត្រូវដោះស្រាយបាន នៅថ្ងៃត្រង់ នាថ្ងៃចន្ទ។

លោក ឆូលណាន ស្រីកែវ មេដឹកនាំបក្សភឿថៃ បានថ្លែង កាលពីដំបូង ថា គណបក្សឆ្ពោះទៅមុខ គួរនឹងទទួលបានកៅអីរដ្ឋមន្រ្ដី ចំនួន១៤ បូកនឹងតំណែងនាយករដ្ឋមន្រ្ដី ហើយគណបក្សភឿថៃ គួរនឹងទទួលបានតំណែង នៅក្នុងជួរគណៈរដ្ឋមន្រ្ដី ចំនួន១៤ បូកនឹងតំណែងប្រធានសភា។

លោក វ៉ាន់ មូហាម៉ាដ ណ័រម៉ាថា (Wan Muhammad Nor Matha) ប្រធានគណបក្សប្រាចាឆាត ( Prachachat) ជាសម្ពន្ធភាពមួយ នៅក្នុងចំណោម៨គណបក្ស បានអះអាង កាលពីថ្ងៃអាទិត្យ ថា គាត់នៅតែសង្ឃឹមយ៉ាងមុតមាំ ថា គណបក្សឆ្ពោះទៅមុខ (MFP) និង ភឿថៃ (Pheu Thai) នឹងប្រើប្រាស់ រយៈពេល៤០ម៉ោងបន្ទាប់ពីនេះ សម្របសម្រួលគ្នា ព្រោះវាជាពេលវេលា សម្រាប់ជ័យជម្នះរបស់ប្រជាជន។

ស្របគ្នានេះដែរ លោក ឆៃថាវ៉ាត ទូឡាថុន (Chaithawat Tulathon) អគ្គលេខាធិការគណបក្សឆ្ពោះទៅមុខ បានអះអាង ថា គណបក្សរបស់គាត់ នឹងសម្របសម្រួល ជាមួយនឹងគណបក្សភឿថៃ លើបញ្ហាងនេះ នៅថ្ងៃចន្ទ ព្រោះការបោះឆ្នោតជ្រើសរើសប្រធានសភាថ្មី នឹងត្រូវធ្វើឡើង នៅថ្ងៃអង្គារ ៕

ក្រុមហ៊ុន Apple ត្រូវបានរំពឹងថា នឹងចាប់ផ្តើមផលិត iPhone15 នៅក្នុងខែមិថុនានេះ ហើយនឹងគ្រោងចេញលក់ជាផ្លូវការនៅក្នុងខែកញ្ញា តាមទម្លាប់រាល់ដង។

នាថ្មីៗនេះ មានព័ត៌មានចរាមអារ៉ាមមួយចំនួនបានចេញផ្សាយថា iPhone 15 ទាំងអស់ គឺសុទ្ធតែមាន Dynamic Island, រន្ធ USB-C និងបំពាក់ឈីប A17 ដូចៗគ្នា។ មិនតែប៉ុណ្ណោះម៉ូឌែល iPhone 15, iPhone 15 Plus, iPhone 15 Pro និង iPhone 15 Pro Max។ សម្រាប់ម៉ូឌែល Pro និង Pro Max នឹងមានគែម bezel តូចជាងមុន និងជ្រុងរាងកោង។

អ្វីដែលគេសង្ស័យថាទៀតនោះគឺថា Apple ប្រហែលជាត្រូវបង្ខំចិត្តផ្លាស់ប្តូររន្ធសាក មកខ្សែ Type C វិញ ដើម្បីអាចលក់នៅទ្វីបអឺរ៉ុបបាន។

ការផ្លាស់ប្តូរមកប្រើប្រាស់រន្ធដោត USB-C បែបនេះ ក៏ដោយសភាអឺរ៉ុប និងរដ្ឋសមាជិកសហភាពអឺរ៉ុបចំនួន ២៧ បានព្រមព្រៀងគ្នាលើសេចក្តីសម្រេច កំណត់ឱ្យទូរសព្ទចល័ត និងឧបករណ៍អេឡិចត្រូនិកផ្សេងទៀតនៅក្នុងសហភាពអឺរ៉ុប ត្រូវតែប្រើប្រាស់រន្ធសាកថ្មស្តង់ដាតែមួយជាកំហិត ដែលនោះគឺរន្ធសាក Type- C ៕

ប្រភព៖ sanook

ជា​ទូទៅ​លោក​អ្នក​តែង​តែ​ចាប់​អារម្មណ៍​​លើ​អាយុកាល​របស់​​ពពួក​សត្វ​ធំ​ៗ​ដូច​ជា​ដំរី អណ្ដើក ​ត្រី​បាឡែន ត្រីឆ្លាម​ ​ដែល​អាច​រស់​នៅ​បាន​អាយុ​​រាប់​សិប​ឆ្នាំ ប៉ុន្តែ​បើ​និយាយ​ពី​អំបូរ​សត្វ​​អាយុ​ខ្លី​វិញ អាច​មិន​សូវ​មាន​មនុស្ស​ច្រើន​បាន​ដឹង។

មេយ៍ហ្លាយ គឺជាប្រភេទសត្វកន្ទុំរុយម្យ៉ាង ដែលមានជីវិតខ្លីជាងគេបំផុត លើផែនដីយើងនេះ គឺសត្វប្រភេទនេះអាចរស់នៅបានត្រឹមតែ១ថ្ងៃ ឬ២៤ម៉ោងប៉ុណ្ណោះ។ មេយ៍ហ្លាយ ក៏ត្រូវបានគេហៅថា “សត្វល្អិតដែលរស់នៅបានតែ១ថ្ងៃ​” ក៏ព្រោះតែអាយុរស់នៅដ៏ខ្លីរបស់ពួកវា។ យ៉ាងហោចណាស់ មានពួកមេយ៍ហ្លាយ ២៥០០ប្រភេទផ្សេងៗគ្នា នៅលើពិភពលោកយើងនេះ ហើយលើសពីនេះ សមាជិកខ្លះរបស់មេយ៍ហ្លាយ ងាប់ទៅវិញភ្លាមបន្ទាប់ពីកើតបានត្រឹមតែ ២ទៅ៣ម៉ោងប៉ុណ្ណោះ។

ពេលកើតមកភ្លាម មេយ៍ហ្លាយ ចំណាយពេលហើរលេងសប្បាយប្រៀបបីដូចជាអារក្ខទេវី នៅតាមដើមឈើអញ្ចឹង។ យ៉ាងណាក៏ដោយ មេយ៍ហ្លាយ ក៏ផ្តល់ផលប្រយោជន៍ដែរ គឺវាជាចំណីអាហារសម្រាប់សត្វប្រភេទខ្លះទៀត ហើយពួកវាក៏ជាប្រភេទសត្វបន្តពូជ។ អំឡុងពេលមានជីវិតដ៏ខ្លីនេះ មេយ៍ហ្លាយ បង្កើតជាក្រុម ហើយហើររាំលេងជាមួយគ្នា គ្រប់ទីកន្លែងទាំងអស់ដែលវាទៅដល់ រហូតដល់ពេលវាស្លាប់ទៅវិញ៕

ប្រភព៖ Wikipedia

ប្រទេសថៃ ៖ កសិករចិញ្ចឹមគោ និងក្របីនៅប្រទេសថៃបានសម្តែងក្តីរីករាយ ក្រោយពីវៀតណាមយល់ព្រមឱ្យឈ្មួញអាចនាំចេញសត្វគោ និងក្របីថៃទៅលក់នៅប្រទេសរបស់ខ្លួន ប៉ុន្តែការលក់ចេញមានតម្លៃទាប ។ ហេតុនេះ កសិករថៃបានស្នើទៅកាន់រដ្ឋាភិបាលថ្មីឱ្យជួយស្វែងរកទីផ្សារនាំចេញ និងដោះស្រាយបញ្ហាតម្លៃចំណីសត្វផងដែរ ដើម្បីកាត់បន្ថយដើមទុនក្នុងការចិញ្ចឹមសត្វរបស់ពួកគេ ។

កាលពីថ្ងៃទី២ ខែកក្កដា កន្លងមក នៅបរិវេណទិញ-លក់គោ និងក្របីមួយកន្លែងនៅស្រុកមឿង ខេត្តខនកែន ដែលបានបើករៀងរាល់ថ្ងៃអាទិត្យ គេសង្កេតឃើញថា មានឈ្មួញមកពីខេត្តជាច្រើនក្នុងតំបន់ឦសានបានយកគោ និងក្របីមកលក់នៅទីនេះយ៉ាងអ៊ូអរ ក្រោយពីប្រទេសវៀតណាមយល់ព្រមឱ្យថៃអាចនាំចេញសត្វគោ និងក្របីទៅលក់នៅវៀតណាម ។

លោក ប៊ុនម៉ា ស្រ៊ីឈុំឈឺន អាយុ៥៨ឆ្នាំ ជាអ្នកស្រុករស់នៅស្រុកក្រាក់ណួន ខេត្តខនកែន និយាយថា ការលក់ដូរគោនាពេលនេះបានកប់កបជាបន្តបន្ទាប់ ហើយបើទោះជាការជួញដូរល្អប្រសើរឡើងក្តី ប៉ុន្តែតម្លៃលក់ចេញថោកដូចមុនអីចឹង ។ លោករៀបរាប់ថា ៖ «ពេលនេះ តម្លៃគោ១ក្បាលស្មើជាង២ម៉ឺនបាតប៉ុណ្ណោះ ខណៈកាលពីមុន គោ១ក្បាលមានតម្លៃចាប់ពី៣ម៉ឺនបាត ទៅ៤ម៉ឺនបាត ហើយដោយសារតម្លៃគោថោក ទើបធ្វើឱ្យកសិករអាចលក់គោបានលឿនជាងមុន ។ ថ្ងៃនេះ ខ្ញុំយកគោ៧ក្បាលមកលក់ ហើយខ្ញុំអាចលក់ដាច់បាន៦ក្បាល ។ នេះចាត់ទុកថា លក់ដាច់បានគួរសមដែរ ប៉ុន្តែបើពេលមុនពិធីបុណ្យផ្សេងៗវិញនឹងអាចលក់ដាច់ជាងនេះ និងបានតម្លៃខ្ពស់ជាង ដូចជា ពេលចូលឆ្នាំថ្មី ឬពេលច្រូតស្រូវ ព្រោះពួកឈ្មួញដណ្តើមគ្នាទិញសាច់គោយកទៅលក់ពេលបុណ្យ» ។

កសិកររូបនេះបន្តថា ៖ «ពេលខ្លះ គោនៅក្នុងភូមិស្រុកមិនគ្រប់គ្រាន់សម្រាប់តម្រូវការទិញទៀតផង ។ ហេតុនេះ ខ្ញុំសូមផ្តាំទៅកាន់រដ្ឋាភិបាលថ្មីដែលនឹងដឹកនាំប្រទេស ត្រូវជួយអន្តរាគមន៍តម្លៃគោ, ស្វែងរកឈ្មួញ និងស្វែងរកទីផ្សារនាំចេញនៅក្រៅប្រទេសឱ្យបានច្រើនជាងនេះ ដើម្បីជួយកសិករចិញ្ចឹមគោ ។ លើសពីនេះ ខ្ញុំចង់ឱ្យតម្លៃចំណីសត្វធ្លាក់ចុះផងដែរ ដើម្បីកាត់បន្ថយការចំណាយដើមទុន» ។

ចំណែកលោក ផានុផុង សាំងកេតឈុន អាយុ២៣ឆ្នាំ ជាឈ្មួញជួញដូរគោមកពីខេត្តណងប៊ួឡាំភូ និយាយថា តម្លៃគោមិនទាន់ឡើងថ្លៃទេ គឺវាមានតម្លៃថោកដូចមុន ។ បច្ចុប្បន្ន វៀតណាមបានអនុញ្ញាតឱ្យថៃលក់គោទៅប្រទេសរបស់ខ្លួន ប៉ុន្តែតម្លៃនៅតែថោកដដែល ៕ ប្រភព ៖ Thairath