ប្រទេសថៃ ៖ ការធ្វើសាច់ក្រកឦសាន គឺជាមុខរបរមួយដែលបង្កើតប្រាក់ចំណូលអស់រយៈពេល៣០ឆ្នាំហើយ សម្រាប់ពលរដ្ឋចាស់ៗរស់នៅស្រុកស៊ីថូរ៉ាភូមិ ខេត្តសុរិន្ទ ប្រទេសថៃ ។ អ្នកស្រុកនៅទីនេះបានចេះចាំរូបមន្តធ្វើសាច់ក្រកឦសានឱ្យមានរសជាតិឆ្ងាញ់ និងលក់ចែកចាយនៅខេត្តសុរិន្ទផង និងលក់នៅតាមខេត្តផ្សេងៗផង ។

លោកយាយ វ៉ាន់ថង ឌួងអ៊ីន អាយុ៧៥ឆ្នាំ និយាយថា គាត់បានអង្គុយចងសាច់ក្រកអស់ប្រមាណ១០ឆ្នាំហើយ ដោយធ្វើការ២ថ្ងៃ ទៅ៣ថ្ងៃក្នុង១សប្តាហ៍ ។ ក្នុង១ថ្ងៃៗ គាត់អាចចងសាច់ក្រកបានចំនួន២.០០០ដុំ ហើយប្រាក់ចំណូលដែលទទួលបាននោះ គាត់សន្សំទុកសម្រាប់ព្យាបាលជំងឺប្រចាំកាយ ។

លោកយាយប្រាប់ថា ៖ «ពេលបានប្រាក់មក ខ្ញុំទុកទិញអង្ករហូបខ្លះ និងទិញម្ហូបអាហារប្រចាំថ្ងៃខ្លះ ហើយសល់ពីនេះ ទុកព្យាបាលជំងឺ ។ ក្នុង១ថ្ងៃ ខ្ញុំទទួលបានប្រាក់ចំនួន២០០បាត ហើយថ្ងៃខ្លះទៀតបានជាង១០០បាត គឺអាស្រ័យលើការធ្វើច្រើន ឬតិច ។ ប៉ុន្តែការងារនេះក៏នឿយហត់ដែរ ពីព្រោះខ្ញុំមានអាយុច្រើនហើយ» ។

ចំណែកពលរដ្ឋវ័យចំណាស់ខ្លះទៀតបានធ្វើសាច់ក្រក និងលក់ដោយខ្លួនឯងនៅតាមតំបន់ផ្សេងៗ ឬនៅតាមពិធីបុណ្យ ។ ពួកគាត់ចាប់ផ្តើមលក់សាច់ក្រកចាប់ពីពេល រសៀលរហូតដល់ព្រលប់ ក្នុងនោះសាច់ក្រក១ដុំ (តូច) មានតម្លៃចាប់ពី១បាត ទៅ២បាតប៉ុណ្ណោះ ។

អ៊ំប្រុសម្នាក់លក់សាច់ក្រកនៅតាមភូមិនិយាយថា ៖ «ខ្ញុំបានជិះម៉ូតូលក់សាច់ក្រកនៅតាមភូមិអស់ជាង២០ឆ្នាំ ហើយក្នុងមួយថ្ងៃៗ ខ្ញុំអាចរកប្រាក់បានចំនួន៣០០បាតដែរ ។ កាលពីមុន ខ្ញុំលក់សាច់ក្រកដាច់ជាងនេះ ប៉ុន្តែបច្ចុប្បន្ន មានអ្នកលក់ច្រើនគ្នា» ។

ប្រធានក្រុមផលិតសាច់ក្រកឦសានប្រចាំខេត្តសុរិន្ទ លោក ថាវីរ៉ាត់ សាណាមថង លើកឡើងថា ៖ «ការផលិតសាច់ក្រកនៅខេត្តសុរិន្ទបានលក់ចែកចាយទៅតាមខេត្តជាច្រើន និងបែងចែកតំបន់រៀងៗខ្លួន ដើម្បីកុំឱ្យពួកគេលក់ក្នុងតំបន់ដូចគ្នា ។ ការលក់សាច់ក្រកក្នុង១ឆ្នាំៗទទួលបានប្រាក់ច្រើនគួរសមអាចជួយគ្រួសារបាន ហើយក្នុងឋានៈខ្ញុំជាប្រធានក្រុម ខ្ញុំបានព្យាយាមសុំចុះឈ្មោះសហគ្រាស» ។

បច្ចុប្បន្ន មានអ្នកភូមិប្រមាណ១០០នាក់បានលក់សាច់ក្រកតាមម៉ូតូ ក្នុងនោះពួកគេបានលក់នៅខេត្តសុរិន្ទ និងខេត្តផ្សេងទៀតដូចជា បុរីរាំ ស៊ីសាកេត រ៉យអេត ឆាក់ឈើងសៅ និងសមុទ្រប្រាកាន ។ អ្នកភូមិ៨០% ក្នុងចំណោមអ្នកភូមិទាំងអស់ បានរកប្រាក់ចំណូលពីការលក់សាច់ក្រកឦសានចូលសហគមន៍ គឺជាមធ្យមចំនួន១៥លានបាតក្នុង១ឆ្នាំ ៕ ប្រភព ៖ Thai PBS

សហរដ្ឋអាមេរិក៖ អគារបោះពុម្ព 3D ដ៏ធំបំផុតរបស់ពិភពលោក ដែលមានទំហំជិត ៩៤០ ហ្វីតការ៉េនៅរដ្ឋផ្លរីដាត្រូវបានសាងសង់ជិតរួចហើយ ដែលវាមានគុណសម្បត្តិអាចទប់ទល់នឹងលក្ខខណ្ឌអាកាសធាតុខ្លាំងដូចជាការឡើងកំដៅខ្លាំង និងព្យុះភ្លៀងផងដែរ។

យោងតាមប្រភពព័ត៌មាន New Atlas កាលពីថ្ងៃទី ៤ ខែកក្កដា បានឱ្យដឹងថា ជាមួយនឹងគម្រោងអគារទីក្រុងចំនួន ១០០ នៅ Austin រដ្ឋ Texas និងបរិស្ថាន Mars របស់ NASA ស្ថាបត្យកម្មបោះពុម្ព 3D កំពុងមានការកើនឡើងយ៉ាងខ្លាំងនៅក្នុងសហរដ្ឋអាមេរិក។ ព្រឹត្តិការណ៍ដ៏សំខាន់មួយទៀតគឺ Printed Farms ដែលជាអគារបោះពុម្ព 3D ដ៏ធំបំផុតរបស់ពិភពលោកហៀបនឹងបញ្ចប់។

អគារបោះពុម្ព 3D Printed Farms មានបណ្តោយប្រវែង ៤៧ម៉ែត្រ ទទឹង ២៥ម៉ែត្រ និងកម្ពស់ ៤ម៉ែត្រ។ ដើម្បីសាងសង់អាគារ Printed Farms នេះបាន យើងត្រូវប្រើម៉ាស៊ីនព្រីន BOD2 3D របស់ក្រុមហ៊ុន COBOD ដែលជាម៉ាស៊ីនបង្កើតផ្ទះបោះពុម្ព 3D ពីរជាន់ដំបូងគេនៅអឺរ៉ុប។ ស្រដៀងនឹងគម្រោងបោះពុម្ព 3D ផ្សេងទៀតដែរ ដំណើរការសាងសង់ពាក់ព័ន្ធនឹងម៉ាស៊ីនរ៉ូបូតដ៏ទំនើប ដែលបាញ់ល្បាយដូចស៊ីម៉ងត៍ចេញពីក្បាលម៉ាស៊ីន បង្កើតជាជញ្ជាំងក្នុងស្រទាប់ជាច្រើន។ ម៉ាស៊ីនព្រីនមិនមានទំហំធំល្មមសម្រាប់សាងសង់លំនឹងទាំងមូលក្នុងពេលតែមួយនោះទេ ផ្ទុយទៅវិញវាត្រូវបានបោះពុម្ពតាមតំបន់ ដោយចាប់ផ្តើមពីផ្នែកម្ខាងនៃអគារ និងបញ្ចប់វិញដោយផ្នែកកណ្តាល។

នៅពេលដែលការបោះពុម្ព 3D ត្រូវបានបញ្ចប់ អ្នកសាងសង់បានដំឡើងដំបូល បង្អួច និងទ្វារ អមដោយឧបករណ៍អគ្គិសនី និងបរិក្ខារជាច្រើនទៀត។ អគារនេះត្រូវបានរចនាឡើងដោយគិតពីលក្ខខណ្ឌអាកាសធាតុក្នុងតំបន់ ដូច្នេះវាអាចទប់ទល់នឹងកំដៅខ្លាំង រួមជាមួយខ្យល់បក់ខ្លាំង និងជាពិសេសនោះវាអាចទប់ទល់នឹងព្យុះត្រូពិចបានទៀតផង។ ភាពបត់បែន និងអត្ថប្រយោជន៍នៃការបោះពុម្ព 3D ក៏ត្រូវបានឆ្លុះបញ្ចាំងនៅក្នុងជញ្ជាំងអគារផងដែរ ជាមួយនឹងរន្ធខ្យល់ដើម្បីធ្វើឱ្យអគារត្រជាក់ដោយធម្មជាតិ ៕ ប្រភព៖vnexpres

រាជធានីតូក្យូ៖ ថ្វីបើមានការតវ៉ាពីក្រុមសកម្មជនជាច្រើន ទាំងនៅកូរ៉េខាងត្បូង និង សហជីពនេសាទជប៉ុន ប្រឆាំងនឹងផែនការរបស់រដ្ឋាភិបាលក្រុងតូក្យូ បញ្ចេញទឹកសំណល់ចេញពីរោងចក្រនុយក្លេអ៊ែរ ដែលបានរងគ្រោះមហន្ដរាយ ពីការរញ្ជួយដីកម្រិតខ្លាំង និង មហារលកយក្សស៊ូណាមិ យ៉ាងណាក្ដី ប៉ុន្ដែឥឡូវនេះ ទីភ្នាក់ងារថាមពលអាតូមិកអន្ដរជាតិ (IAEA) របស់អង្គការសហប្រជាជាតិ ក៏បានប្រកាស អំពីកម្រិតសុវត្ថិភាព ហើយវាមានផលប៉ះពាល់តិចតួដល់មនុស្ស និង បរិស្ថាន។

សារព័ត៌មានរបស់សិង្ហបុរី CNA បានចេញផ្សាយ នៅថ្ងៃព្រហស្បតិ៍ ទី៦ ខែកក្កដា ថា លោក រ៉ាហ្វាអែល ហ្គ្រូសស៊ី (Rafael Grossi) អគ្គនាយកទីភ្នាក់ងារថាមពលអាតូមិកអន្តរជាតិ (IAEA) បានចុះទៅពិនិត្យទីតាំងរោងចក្រថាមពលនុយក្លេអ៊ែរហ៊្វូគីស៊ីម៉ា ដាយអ៊ីឈិ (Fukushima Daiichi) កាលពីថ្ងៃពុធ (ទី៥ ខែកក្កដា) និង បានជួបជាមួយអ្នកស្រុក។ ក្រោយមក គាត់បានអះអាង អំពីសុវត្ថិភាព សម្រាប់ផែនការរបស់ប្រទេសជប៉ុន បញ្ចេញទឹកសំណល់មានធាតុវិទ្យុសកម្ម ដែលត្រូវបានចម្រោះរួចហើយ ចេញពីរោងចក្រថាមពលនេះ ដើម្បីបង្ហូរទឹកសំណល់ទាំងនោះ ចូលទៅក្នុងមហាសមុទ្រប៉ាស៊ីហ្វិក។

ទីភ្នាក់ងារ IAEA របស់អង្គការសហប្រជាជាតិ បានបញ្ជាក់ កាលពីថ្ងៃអង្គារ នៅក្នុងព្រឹត្តិការណ៍ដ៏សំខាន់មួយ សម្រាប់ការរុះរើរោងចក្រថាមពលនុយក្លេអ៊ែរ ដែលត្រូវបានបំផ្លាញ នៅក្នុងហេតុការណ៍គ្រោះរញ្ជួយដីដ៏ខ្លាំងក្លា និង មហារលកយក្សស៊ូណាមិ កាលពីអំឡុងឆ្នាំ២០១១ ថា ការត្រួតពិនិត្យ រយៈពេល២ឆ្នាំមកនេះ រកឃើញ ថា ផែនការរបស់ជប៉ុន សម្រាប់ការបង្ហូរទឹកសំណល់ ចេញពីរោងចក្រហ៊្វូគូស៊ីម៉ា ដាយអ៊ីឈិ នេះ នឹងមានផលប៉ះពាល់តិចតួច ដល់មនុស្ស ឬ បរិស្ថាន។

សហជីពនេសាទជប៉ុន បានជំទាស់តវ៉ា ប្រឆាំងនឹងផែនការនេះ អស់រយៈពេលជាយូរមកហើយ ដោយបានអះអាង ថា រដ្ឋាភិបាលគួរតែលុបចោលផែនការជួសជុលនូវការខូចខាតកេរ្តិ៍ឈ្មោះរបស់ខ្លួន។ ប្រទេសមួយចំនួន បានហាមឃាត់នូវផលិតផលអាហារមួយចំនួនរបស់ជប៉ុន ព្រោះតែពួកគេភ័យខ្លាចវិទ្យុសកម្ម។ ជប៉ុន តែងតែធ្វើតេស្ត លើម្ហូបអាហារសមុទ្រ ចេញពីតំបន់ហ៊្វូគូស៊ីម៉ា (Fukushima) ជាប្រចាំ ហើយរកឃើញ ថា វាមានសុវត្ថិភាពតាមស្ដង់ដារ។

លោក រ៉ាហ្វាអែល ហ្គ្រូសស៊ី នាយកទីភ្នាក់ងារថាមពលអាតូមិកអន្តរជាតិ បានសង្កត់ធ្ងន់ ថា វាមិនមានបញ្ហាអ្វីត្រូវរង់ចាំនោះឡើយ ក្រោយការវាស់ស្ទង់ទៅលើរោងចក្រថាមពលនុយក្លេអ៊ែរ ដែលរងគ្រោះមហន្ដរាយ ហើយការផ្តល់ចំណីឱ្យសត្វរុយ ក្លាយជាភស្ដុតាង បញ្ជាក់ ថា ទឹកសំណល់មានធាតុវិទ្យុសកម្ម ត្រូវបានចម្រោះចេញនោះ បង្ហាញ អំពីការគ្មានគ្រោះថ្នាក់។

លោក វ៉ាង វ៉ែនប៊ិន (Wang Wenbin) អ្នកនាំពាក្យ ក្រសួងការបរទេសចិន កាលពីថ្ងៃពុធ បានរិះគន់ដល់ចំណាត់ការ ឆ្ពោះទៅរកការបង្ហូរទឹក បញ្ចេញពីរោងចក្រថាមពលនុយក្លេអ៊ែរហ៊្វូគីស៊ីម៉ាដាយអ៊ិឈិ ហើយថែមទាំង បានគំរាម អំពីចំណាត់វិធានការផ្សេងៗ ប្រសិនបើផែនការនេះគួរតែដំណើរការទៅមុខ។

អ្នកនាំពាក្យ ក្រសួងការបរទេសចិន បានសង្កត់ធ្ងន់ ថា «នាយកដ្ឋានពាក់ព័ន្ធរបស់រដ្ឋាភិបាលក្រុងប៉េកាំង នឹងពង្រឹងនូវការត្រួតពិនិត្យ លើបរិស្ថានដែនសមុទ្រ និង ត្រួតពិនិត្យដល់ការនាំចូលផលិតផលសមុទ្រ សម្រាប់ធានាដល់សុខភាព និង សន្តិសុខស្បៀងអាហារ សម្រាប់សាធារណជន»។ បើទោះជាយ៉ាងណាក៏ដោយ គាត់បានបដិសេធ ចំពោះការផ្តល់ព័ត៌មានលម្អិតជាក់លាក់ អំពីសកម្មភាពប្រភេទណា នឹងត្រូវរដ្ឋាភិបាលចិន ប្រកាន់យកនោះ។

ក្រុមសកម្មជនជាច្រើន នៅក្នុងប្រទេសកូរ៉េខាងត្បូង និង កូរ៉េខាងត្បូង បានបង្កើននូវការតវ៉ារបស់ពួកគេ ប្រឆាំងនឹងផែនការរបស់រដ្ឋាភិបាលជប៉ុន បញ្ចេញទឹកសំណល់ពីរោងចក្រថាមពលនុយក្លេអ៊ែរហ៊្វូគីស៊ីម៉ា ដាយអ៊ិឈិ ដោយសារតែពួកគេខ្លាចមានគ្រោះថ្នាក់ បង្កឡើងដោយវិទ្យុសកម្ម។

រដ្ឋាភិបាលក្រុងសេអ៊ូល បានបញ្ជាក់ កាលពីថ្ងៃពុធ ថា កូរ៉េខាងត្បូង គោរពតាមការសម្រេចចិត្តរបស់ទីភ្នាក់ងារថាមពលអាតូមិកអន្ដរជាតិ (IAEA) របស់អង្គការសហប្រជាជាតិ សម្រាប់ផែនការរបស់រដ្ឋាភិបាលក្រុងតូក្យូ បញ្ចេញទឹកសំណល់ ចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា ថ្វីបើមានប្រតិកម្មប្រឆាំង និង ការតវ៉ា នៅក្នុងប្រទេសអាស៊ីបូព៌ាមួយនេះ កំពុងតែកើនឡើងខ្លាំងយ៉ាងណាក្ដី។

លោក ផាក ឃូយឿន (Park Ku-yeon) អនុប្រធានទី១ នៃការិយាល័យសម្របសម្រួលគោលនយោបាយរបស់ប្រទេសកូរ៉េខាងត្បូង កាលពីថ្ងៃពុធ បានបញ្ជាក់ នៅក្នុងសន្និសីទសារព័ត៌មានប្រចាំថ្ងៃ ថា «IAEA ជាស្ថាប័នមានសិទ្ធិអំណាចជាសកល ហើយគោលជំហរ ជាមូលដ្ឋានរបស់រដ្ឋាភិបាលក្រុងសេអ៊ូល គឺយើងគោរពតាមការសម្រេចចិត្តរបស់ទីភ្នាក់ងារជំនាញរបស់អង្គការសហប្រជាជាតិ មួយនេះ។ រីឯរដ្ឋាភិបាលក្រុងសេអ៊ូល ក៏នឹងផ្តល់នូវការវិភាគរបស់ខ្លួន លើការពិនិត្យចុងក្រោយរបស់ IAEA ខណៈការវាយតម្លៃឯករាជ្យរបស់កូរ៉េខាងត្បូង ត្រូវបានបញ្ចប់»។

រដ្ឋាភិបាលក្រុងតូក្យូ និង ក្រុមមន្រ្តីជំនាញរបស់ជប៉ុន បញ្ជាក់ ថា ទឹកនៅក្នុងរោងចក្រហ៊្វូគូស៊ីម៉ា ត្រូវបានចម្រោះ យកធាតុវិទ្យុសកម្ម ចេញអស់ភាគច្រើនរួចមកហើយ ហើយវាក៏នឹងមិនមានផលប៉ះពាល់ សម្រាប់កម្រិតសុវត្ថិភាពនោះទេ។ ប៉ុន្ដែការសម្រេចចិត្តណាមួយរបស់ទីភ្នាក់ងារ IAEA ក៏ត្រូវគេរំពឹងទុក ថា អាចនឹងធ្វើឡើង នៅក្នុងសប្ដាហ៍នេះ៕

កំពូលតារាអាស៊ីដ៏ល្បីគឺអ្នកនាង Coco Lee ដែលជាម្ចាស់បទ Before I fall in Love បានធ្វើអត្តឃាតនៅវ័យ ៤៨ឆ្នាំ ដោយសារជំងឺបាក់ទឹកចិត្ត (Depression)។ តារាចម្រៀងស្រីហុងកុង Coco Lee បានទទួលមរណភាពកាលពីថ្ងៃពុធ ទី៥ ខែកក្កដា ឆ្នាំ២០២៣ បន្ទាប់ពីអ្នកនាងបានប្រយុទ្ធប្រឆាំងជាមួយនឹងជំងឺធ្លាក់ទឹកចិត្តអស់ជាច្រើនឆ្នាំមកហើយ។ Coco Lee ត្រូវបានគេចាត់ទុកថាជាសិល្បករឈានមុខគេដែលល្បីជុំវិញពិភពលោក។

គួររំលឹកដែរថា កំពូលតារាចម្រៀង Coco Lee កើតនៅថ្ងៃទី១៧ ខែមករា ឆ្នាំ១៩៧៥ ដែលមានដើមកំណើតនៅហុងកុង។ នៅពេល Coco Lee មានអាយុ ៩ឆ្នាំ ឪពុករបស់នាងត្រូវបានស្លាប់ ហើយម្តាយរបស់នាងបាននាំនាងនិងប្អូនស្រីនាងម្នាក់ទៀតទៅរស់នៅ San Francisco សហរដ្ឋអាមេរិក។ Coco Lee ធ្លាប់បានសិក្សានៅសាកលវិទ្យាល័យកាលីហ្វ័រញ៉ា អ៊ីរវីន ប៉ុន្តែនាងមិនទាន់រៀនចប់ទេ ដោយសារការស្រឡាញ់វិស័យចម្រៀងខ្លាំងពេក Coco Lee ក៏បានសម្រេចចិត្តបោះបង់ការសិក្សាដើម្បីផ្តោតលើវិស័យចម្រៀងវិញ។

នៅឆ្នាំ ១៩៩២ Coco Lee បានត្រឡប់មកហុងកុងវិញ ហើយបានចូលរួមក្នុងការប្រលងពានរង្វាន់ New Talent Singing Awards និងជាជើងឯករង ដោយបានចុះហត្ថលេខាជាមួយ Capital Artists ពួកគេក៏បានចេញអាល់ប៊ុមភាសាចិនកុកងឺ Love from Now On និង Promise Me ក្នុងឆ្នាំ ១៩៩៤ ។ បន្ទាប់មក Coco Lee ចាប់ផ្តើមទទួលបានភាពល្បីល្បាញខ្លាំងបំផុតនៅឆ្នាំ ១៩៩៦ បន្ទាប់ពីបានចុះកុងត្រាជាមួយ Sony សម្រាប់អាល់ប៊ុមចម្រៀងរបស់នាង ដែលអាល់ប៊ុមរបស់នាងលក់ដាច់បំផុតនៅអាស៊ីក្នុងរយៈពេលដ៏ខ្លី។

ក្នុងទសវត្សរ៍ឆ្នាំ ២០១០ និង ២០១៣ Coco Lee នៅតែជាតារាស្រីជួរមុខដ៏ល្បីរបស់អាស៊ី។ នៅឆ្នាំ ២០១៤-២០១៦ Coco Lee បានឈ្នះពានរង្វាន់ជាសិល្បករលំដាប់ពិភពលោក រួមជាមួយតារាចម្រៀងល្បីៗជាច្រើនទៀត។ បន្ទាប់មកក្នុងឆ្នាំ ២០១៩-២០២០ នាងបានដើរកម្សាន្ត និងចូលរួមព្រឹត្តិការណ៍សប្បុរសធម៌ជាច្រើនកន្លែងជុំវិញពិភពលោក។

ដូច្នេះការចាកចេញរបស់ Coco Lee គឺជាការបាត់បង់ដ៏ធំមួយទៀតសម្រាប់ឧស្សាហកម្មតន្ត្រីអាស៊ី។ ព្រោះកន្លងមកនាងត្រូវបានគេចាត់ទុកថាជាសិល្បករអាស៊ីដំបូងគេ និងជាតារាដែលជោគជ័យបំផុតរបស់ពិភពលោក៕

ប្រទេសសិង្ហបុរី ៖ សារព័ត៌មាន Bloomberg រាយការណ៍ថា ភ្នាក់ងាររូបិយវត្ថុសិង្ហបុរី (MAS) នឹងផ្លាស់ប្តូរសិទ្ធិពិសេសផ្នែកពន្ធដល់ការិយាល័យគ្រួសារ (Family office) ដើម្បីជំរុញការងារក្នុងស្រុក និងការវិនិយោគលើទីផ្សារភាគហ៊ុនក្នុងប្រទេស ។

នាយកគ្រប់គ្រងភ្នាក់ងាររូបិយវត្ថុសិង្ហបុរី (MAS) លើកឡើងថា សិទ្ធិប្រយោជន៍ផ្នែកពន្ធអាចជួយជំរុញអាជីវកម្មខាងលើឱ្យវិនិយោគក្នុងគម្រោងពាក់ព័ន្ធនឹងអាកាសធាតុ និងបរិច្ចាគក្នុងផ្នែកសប្បុរសធម៌សិង្ហបុរីកាន់តែច្រើន ។

ការិយាល័យគ្រួសារ (Family office) ដែលសម្លឹងរកការលើកលែងពន្ធប្រភេទ 13 O និង 13 U ត្រូវតែមានទ្រព្យសម្បត្តិអប្បបរមានៅក្រោមតម្រូវការគ្រប់គ្រង និងការចំណាយក្នុងអាជីវកម្ម ។ ប្រទេសសិង្ហបុរីនឹងផ្លាស់ប្តូរវិធីប្រមូលពន្ធដូចខាងក្រោមនេះ ៖

១-លើកទឹកចិត្តឱ្យការិយាល័យគ្រួសារចូលរួមក្នុងការវិនិយោគចម្រុះ និងគាំទ្រការវិនិយោគក្នុងអាជីវកម្មបញ្ចេញកាបូនឌីអុកស៊ីតស្មើសូន្យ ។ បើការវិនិយោគក្នុងក្រុមហ៊ុនទាំងនេះដោយមិនសម្លឹងឃើញផលប្រយោជន៍ ឬប្រាក់វិនិយោគមកវិញ ភ្នាក់ងាររូបិយវត្ថុសិង្ហបុរីនឹងកាត់បន្ថយពន្ធចំនួន២ដុល្លារសិង្ហបុរីនៅរៀងរាល់ការចំណាយប្រាក់ដុល្លារ ។២-ការវិនិយោគជាមួយក្រុមហ៊ុនដែលមិនបានចុះឈ្មោះនៅសិង្ហបុរី រួមទាំងប្រាក់កម្ចីផ្ទាល់ខ្លួន នឹងទទួលបានសិទ្ធិពិសេសផ្នែកពន្ធដូចគ្នា ។
៣-កាត់បន្ថយពន្ធទ្វេដងនៃប្រាក់វិនិយោគក្នុងភាគហ៊ុនដែលបានចុះឈ្មោះនៅសិង្ហបុរី និងមូលនិធិជួញដូរមានសិទ្ធិ រួមទាំងមូលនិធិមិនបានចុះឈ្មោះនៅសិង្ហបុរី ។

ការិយាល័យគ្រួសារ គឺជាអាជីវកម្មមួយដែលបង្កើតឡើងដោយមហាសេដ្ឋី ដើម្បីគ្រប់គ្រងកិច្ចការគ្រួសារ និងការវិនិយោគផ្សេងៗ ។ បច្ចុប្បន្ន ការិយាល័យគ្រួសារអាចទទួលបានសិទ្ធិលើកលែងពន្ធតាមលក្ខខណ្ឌវិនិយោគនៅសិង្ហបុរី ។ សិទ្ធិពិសេសនេះបានជួយបង្កើនការិយាល័យគ្រួសារនៅសិង្ហបុរីពីចំនួន៤០០កន្លែងនៅឆ្នាំ២០២០ មកស្មើ១.១០០កន្លែងនៅឆ្នាំ២០២២ ។

បើទោះជាការិយាល័យគ្រួសារកើនឡើងនឹងជួយបង្កើនបរិមាណទ្រព្យសកម្មក្តី ប៉ុន្តែទ្រព្យសម្បត្តិភាគច្រើនមិនបានវិនិយោគនៅសិង្ហបុរីទេ ដោយប្រាក់វិនិយោគទាំងនេះមិនបានជួយគាំទ្រអាជីវកម្មម្ហូបអាហារ និងផ្តល់ការងារឱ្យពលរដ្ឋតាមការរំពឹងទុកឡើយ ។ ទោះយ៉ាងណា ផែនការកែលម្អសិទ្ធិពិសេសផ្នែកពន្ធអាចជួយដោះស្រាយបញ្ហាទាំងនេះបាន ៕ ប្រភព ៖ Bangkok biznews

ប្រទេសវៀតណាម ៖ វៀតណាមបានហាមចាក់បញ្ចាំងភាពយន្តរឿង Barbie របស់អាមេរិកនៅប្រទេសខ្លួនជាដាច់ខាត ព្រោះភាពយន្តនេះបានបង្ហាញនូវផែនទីពាក់ព័ន្ធនឹងភាពជាម្ចាស់កម្មសិទ្ធិរបស់ចិនលើសមុទ្រចិនខាងត្បូង ។ វៀតណាម គឺជាប្រទេសមួយក្នុងចំណោមប្រទេសដែលប្រឆាំងនឹងការអះអាងជាម្ចាស់កម្មសិទ្ធិរបស់ចិនលើសមុទ្រចិនខាងត្បូង ។

ភាពយន្តរឿង Barbie គឺជារឿងរ៉ាវដកស្រង់ចេញពីតុក្កតាដ៏ល្បីល្បាញមួយ ហើយរឿងនេះនឹងត្រូវដាក់បញ្ចាំងក្នុងរោងភាពយន្ត នៅថ្ងៃទី២០ ខែកក្កដា ឆ្នាំ២០២៣ ។ ភាពយន្តនេះបានទាក់ទាញការចាប់អារម្មណ៍យ៉ាងខ្លាំងក្នុងបណ្តាញសង្គម ជាពិសេស អ្នកស្រឡាញ់ Barbie ដែលរង់ចាំឱ្យគេបញ្ចាំងរឿងនេះក្នុងរោងកុន ប៉ុន្តែសម្រាប់ពលរដ្ឋវៀតណាមវិញ នឹងមិនបានទស្សនារឿងនេះទេ ។

តាមសេចក្តីរាយការណ៍ប្រាប់ថា គេមិនទាន់ច្បាស់ថា តើឈុតឆាកមួយណាដែលធ្វើឱ្យវៀតណាមលើកឡើងថា វាជាឈុតឆាកមិនសមរម្យ ប៉ុន្តែគេគ្រាន់តែដឹងថា ខ្សែភាពយន្តនេះបានបង្ហាញនូវផែនទីបុរាណមួយ ខណៈប្រទេសចិនតែងប្រើប្រាស់ផែនទីនេះបង្ហាញពីភាពជាម្ចាស់កម្មសិទ្ធិលើសមុទ្រចិនខាងត្បូង ។

ប្រទេសចិនបានសាងសង់មូលដ្ឋានទ័ពក្នុងតំបន់នោះអស់រយៈពេលជាច្រើនឆ្នាំ ហើយចិនតែងយាមល្បាតតាមនាវាជានិច្ចដើម្បីព្យាយាមបង្ហាញថា ខ្លួនជាម្ចាស់កម្មសិទ្ធិលើតំបន់នេះ ។ ក្រៅពីប្រទេសចិនហើយ នៅមានប្រទេសផ្សេងទៀតអះអាងថា ពួកគេជាម្ចាស់កម្មសិទ្ធិលើតំបន់នេះដូចគ្នា រួមមាន វៀតណាម ហ្វីលីពីន តៃវ៉ាន់ ម៉ាឡេស៊ី និងព្រុយណេ ។

Barbie មិនមែនជាភាពយន្តតែមួយដែលវៀតណាមបានហាមចាក់បញ្ចាំងនៅប្រទេសរបស់ខ្លួនទេ កាលពីពេលកន្លងមក ក៏មានភាពយន្ត Animation រឿង «Abominable» និងរឿង «Uncharted» ក៏ត្រូវបានវៀតណាមហាមឃាត់ដែរ ដោយសារហេតុផលដូចគ្នានេះ ៕ ប្រភព ៖ beartai