ប្រទេសថៃ ៖ នៅថ្ងៃទី១១ ខែកក្កដា លោក Pita Limjaroenrat ក្នុងឋានៈជាមេដឹកនាំគណបក្ស និងបេក្ខជននាយករដ្ឋមន្ត្រីមកពីគណបក្សកាវក្លៃ បានបង្ហោះវីដេអូមួយថា មុនពេលបោះឆ្នោតនាយករដ្ឋមន្ត្រី នាថ្ងៃទី១៣ ខែកក្កដា ឆ្នាំ២០២៣ សូមផ្តល់ឱកាសឱ្យប្រទេសថៃមានរដ្ឋាភិបាលទទួលបានសំឡេងភាគច្រើនស្របតាមឆន្ទៈរបស់ពលរដ្ឋ និងប្រជាធិបតេយ្យ ។

លោក Pita Limjaroenrat បញ្ជាក់ថា កាលពីថ្ងៃទី១៤ ខែឧសភា ឆ្នាំ២០២៣ គឺជាថ្ងៃដែលបងប្អូនពលរដ្ឋបង្ហាញពីឆន្ទៈរបស់ខ្លួនតាមរយៈសន្លឹកឆ្នោត ដោយបានជ្រើសយកគណបក្សកាវក្លៃក្នុងសំឡេងឆ្នោតដ៏ច្រើនលើសលប់ ហើយធ្វើឱ្យយើងក្លាយជាគណបក្សលំដាប់ទី១ ក្នុងសភាតំណាងរាស្ត្រ និងមានសមាជិកសភាតំណាងរាស្ត្រចំនួន១៥២នាក់ ។

នេះបញ្ជាក់ឱ្យឃើញថា ពលរដ្ឋនៅទូទាំងប្រទេសត្រូវការឱ្យប្រទេសថៃមិនដូចពេលមុន ហើយខ្ញុំ និងគណបក្សកាវក្លៃបាននាំមុខបង្កើតរដ្ឋាភិបាល ។ យើងបានរួបរួមគណបក្សនយោបាយចំនួន៨ ឬស្មើ៧២% នៃអ្នកមានសិទ្ធិបោះឆ្នោត ។ ជាធម្មតា រដ្ឋាភិបាលចម្រុះដឹកនាំដោយគណបក្សកាវក្លៃនឹងបានដឹកនាំប្រទេស និងដោះស្រាយបញ្ហារបស់ពលរដ្ឋ ប៉ុន្តែមកដល់ថ្ងៃទី១១ ខែកក្កដា គឺរយៈពេលជិត២ខែហើយក្រោយការបោះឆ្នោត ដែលការបោះឆ្នោតជ្រើសរើសនាយករដ្ឋមន្ត្រីទើបតែមកដល់ ហើយយើងត្រូវរង់ចាំការសម្រេចចិត្តរបស់សមាជិកព្រឹទ្ធសភាថា តើការបង្កើតរដ្ឋាភិបាលនឹងស្របតាមឆន្ទៈរបស់ពលរដ្ឋដែរឬអត់ ?

ថ្ងៃនេះ ច្បាស់លាស់ថា ប្រទេសថៃស្ថិតក្នុងនយោបាយមិនប្រក្រតី ហើយអំណាចជាអ្នកតំណាងឱ្យពលរដ្ឋតាមរយៈការបោះឆ្នោតបានរលំម្តងហើយម្តងទៀត ដោយសារផ្លូវច្បាប់ ។ ភាពមិនប្រក្រតីនេះបណ្តាលមកពីរដ្ឋធម្មនុញ្ញឆ្នាំ២០១៧ ហើយនៅថ្ងៃនេះ វានៅជាមួយយើងដោយមិនអាចបដិសេធបាន ។ ប៉ុន្តែនេះជាឱកាសរបស់ប្រទេសថៃ ដែលពួកគេនឹងត្រឡប់មករកភាពប្រក្រតីខាងនយោបាយម្តងទៀត ដោយផ្តល់ឱកាសឱ្យប្រទេសថៃមានរដ្ឋាភិបាលស្របច្បាប់ និងឈានទៅដោះស្រាយបញ្ហាប្រទេសថៃតាមតម្រូវការរបស់ពលរដ្ឋ ដោយផ្តល់ឱកាសឱ្យប្រទេសថៃវិលមកកាន់មាគ៌ានយោបាយសភាដែលពលរដ្ឋជឿទុកចិត្ត និងអាចដាក់ក្តីសង្ឃឹមបាន ។

យើងត្រូវផ្តល់ឱកាសឱ្យប្រទេសថៃឆ្ពោះទៅរកលទ្ធភាពថ្មីៗ ប្រាក់ឈ្នួលសមរម្យ សេដ្ឋកិច្ចរីកចម្រើន បង្កើតសង្គមមួយដែលមនុស្សមានសិទ្ធិស្មើគ្នា និងមានច្បាប់គ្រប់គ្រងសិទ្ធិសេរីភាព ។ ការបោះឆ្នោតជ្រើសរើសនាយករដ្ឋមន្ត្រីថៃ នឹងប្រព្រឹត្តនាថ្ងៃទី១៣ ខែកក្កដា ឆ្នាំ២០២៣ ដែលវាមិនមែនជាការជ្រើសរើសលោក Pita Limjaroenrat ហើយមិនមែនជាការជ្រើសរើសគណបក្សកាវក្លៃ ប៉ុន្តែជាការជ្រើសរើសដើម្បីបញ្ជាក់ថា ប្រទេសថៃត្រូវឆ្ពោះទៅមុខតាមបែបប្រជាធិបតេយ្យ ដូចគ្នានឹងប្រទេសប្រកាន់លទ្ធិប្រជាធិបតេយ្យនៅទូទាំងពិភពលោក ។

នេះជាភារកិច្ចរួមគ្នារបស់យើងទាំងអស់ក្នុងឋានៈជាសមាជិករដ្ឋសភា អ្នកកាន់អំណាចជំនួសពលរដ្ឋថៃនៅទូទាំងប្រទេស ។ ក្នុងឱកាសនេះ ខ្ញុំសូមផ្តាំផ្ញើទៅកាន់សមាជិកសភា និងសមាជិកព្រឹទ្ធសភាគ្រប់រូបថា លោកអាចមិនចូលចិត្តគោលនយោបាយរបស់យើង ប៉ុន្តែពួកលោកអាចពិនិត្យមកលើខ្ញុំបាន វាយប្រហារខ្ញុំបាន ហើយអាចបោះឆ្នោតទម្លាក់ខ្ញុំចេញពីតំណែងក៏បាន ប៉ុន្តែការបោះឆ្នោតឱ្យរដ្ឋាភិបាលមានសំឡេងភាគច្រើន គឺជាការផ្តល់ឱកាសឱ្យប្រទេសថៃឆ្ពោះទៅមុខ ។

ក្នុងឱកាសនេះ ខ្ញុំសូមផ្តាំទៅកាន់ពលរដ្ឋថា យើងបានឆ្លងកាត់ការបោះឆ្នោតរួចហើយ ប៉ុន្តែបេសកកម្មមិនទាន់បញ្ចប់ទេ ។ ហេតុនេះ ការផ្លាស់ប្តូរប្រទេសមិនអាចកើតឡើងទេ បើគ្មានរដ្ឋាភិបាលទទួលសំឡេងភាគច្រើន ដែលនឹងដឹកនាំប្រទេសទៅថ្ងៃអនាគត ។ ខ្ញុំត្រៀមខ្លួនធ្វើជានាយករដ្ឋមន្ត្រីថៃរបស់អ្នកគ្រប់គ្នា មិនថាលោកនឹងជ្រើសរើសគណបក្សណា មានគំនិតផ្នែកនយោបាយបែបណា និងចង់បានសង្គមបែបណា គឺខ្ញុំនឹងធ្វើជានាយករដ្ឋមន្ត្រីគ្រប់គ្រងប្រទេសថៃ ដើម្បីសម្រេចក្តីសុបិនរបស់ពលរដ្ឋគ្រប់គ្នា ។

បើនេះជាអ្វីដែលលោកចង់ឃើញ សូមផ្តល់ឱកាសឱ្យប្រទេសថៃបានឆ្ពោះទៅមុខគ្រប់គ្រងដោយរដ្ឋាភិបាលចម្រុះចំនួន៨គណបក្ស ដែលដឹកនាំដោយនាយករដ្ឋមន្ត្រីឈ្មោះ Pita Limjaroenrat ៕ ប្រភព ៖ matichon

ប្រទេសចិន ៖ ប្រទេសនានាក្នុងតំបន់អាស៊ីអាគ្នេយ៍បានពឹងផ្អែកលើភ្ញៀវទេសចរចិន ដើម្បីទទួលបានប្រាក់ចំណូលផ្នែកទេសចរណ៍ ជាពិសេស ប្រទេសទាំងនេះរំពឹងថា សេដ្ឋកិច្ចនឹងងើបឡើងវិញក្រោយការរាតត្បាតនៃជំងឺកូវីដ-១៩ ប៉ុន្តែការរំពឹងទុកបានធ្លាក់ចុះ នៅពេលពលរដ្ឋចិនផ្អាកការធ្វើដំណើរទៅក្រៅប្រទេស ក្រោយសេដ្ឋកិច្ចចិនងើបឡើងវិញយឺតជាងការរំពឹងទុក ។

សារព័ត៌មាន Bloomberg រាយការណ៍ថា កាលពីខែឧសភា ឆ្នាំ២០២៣ ចំនួនភ្ញៀវទេសចរចិនមកកម្សាន្តនៅប្រទេសចំនួន៥ ក្នុងតំបន់អាស៊ីអាគ្នេយ៍ ស្មើប្រមាណពី១៤% ទៅ៣៩% ប៉ុណ្ណោះ បើធៀបនឹងរយៈពេលដូចគ្នាកាលពីឆ្នាំ២០១៩ ឬមុនពេលផ្ទុះជំងឺកូវីដ ។ ដូច្នេះ តួលេខនេះដោយសារពលរដ្ឋចិនស្ទាក់ស្ទើរក្នុងការចំណាយប្រាក់លើការធ្វើដំណើរទៅក្រៅប្រទេស ។

ក្រុមហ៊ុនឥណ្ឌូណេស៊ីឈ្មោះ Bahana Sekuritas បញ្ជាក់ថា កោះបាលី គឺជាកន្លែងសម្រាប់សម្រាកលំហែកាយដ៏ពេញនិយមបំផុត និងមានចំនួនភ្ញៀវទេសចរអន្តរជាតិច្រើនបំផុតនៅប្រទេសឥណ្ឌូណេស៊ី បានប្រឈមនឹងការធ្លាក់ចុះនៃតម្រូវការបន្ទប់សណ្ឋាគារប្រណីត ចាប់ពីខែមករា រហូតដល់ខែឧសភា ឆ្នាំ២០២៣ ។

ដូចគ្នានេះ ប្រទេសសិង្ហបុរី ក៏ប្រឈមនឹងបញ្ហាដូចគ្នាដែរ ។ បើតាមទិន្នន័យរបស់ក្រុមប្រឹក្សាទេសចរណ៍សិង្ហបុរីបង្ហាញថា ចំនួនភ្ញៀវទេសចរចិនមកកម្សាន្តនៅសិង្ហបុរី ចាប់ពីខែមករា ដល់ខែឧសភា ឆ្នាំ២០២៣ ស្មើត្រឹមតែ៣១០.៩០១នាក់ប៉ុណ្ណោះ ខណៈរយៈពេលដូចគ្នាកាលពីឆ្នាំ២០១៩ សិង្ហបុរីទទួលបានភ្ញៀវទេសចរចិនចំនួន១,៥៥លាននាក់ ។

បើទោះជាភ្ញៀវទេសចរចិន គឺជាក្រុមបង្កើតប្រាក់ចំណូលផ្នែកទេសចរណ៍ក្នុងតំបន់អាស៊ីអាគ្នេយ៍ និងប្រទេសជប៉ុនក្តី ប៉ុន្តែការធ្លាក់ចុះរបស់ភ្ញៀវទេសចរចិនបានធ្វើឱ្យប្រទេសជប៉ុនទទួលបានក្រុមអតិថិជនទិញផលិតផលថ្មី ។ ចាប់ពីខែមីនា រហូតដល់ខែឧសភា ឆ្នាំ២០២៣ ចំនួនការលក់ផលិតផលនៅជប៉ុនទៅឱ្យអតិថិជន (មិនមែនជាជនជាតិចិន) បានកើនឡើង៧០% នៃចំនួនការលក់ផលិតផលឱ្យភ្ញៀវទេសចរទាំងអស់ ខណៈក្នុងរយៈពេលដូចគ្នានៅឆ្នាំ២០១៩ ការលក់ផលិតផលស្មើត្រឹម២០% ប៉ុណ្ណោះ ។

សេដ្ឋកិច្ចចិនងើបឡើងវិញយឺត មិនមែនជាឧបសគ្គតែមួយក្នុងវិស័យទេសចរណ៍ទេ ព្រោះចំនួនជើងហោះហើររវាងប្រទេសចិន និងតំបន់ផ្សេងៗស្ថិតក្នុងកម្រិតទាបជាងមុនពេលផ្ទុះជំងឺកូវីដ ហើយការហោះហើរទៅក្រៅប្រទេសបានងើបឡើងវិញយឺតផងដែរ ។ ហេតុនេះ វាបានក្លាយជាកត្តាមួយរាំងស្ទះដល់ការងើបឡើងវិញនៃវិស័យទេសចរណ៍ចិន ។

ទោះយ៉ាងណា អ្នកវិភាគជាច្រើននាក់សម្លឹងឃើញថា វិស័យទេសចរណ៍ចិនក្នុងឆមាសទី២ ឆ្នាំ២០២៣ នឹងល្អប្រសើរឡើងវិញ ។ អ្នកវិភាគមកពីធនាគារសិង្ហបុរីរំពឹងថា ស្ថានភាពសេដ្ឋកិច្ចចិននាពេលបច្ចុប្បន្ន វាលឿនពេកសម្រាប់ឱ្យពលរដ្ឋចិនធ្វើដំណើរទៅក្រៅប្រទេស ប៉ុន្តែនៅឆមាសទី២ ឆ្នាំ២០២៣ នេះ ភ្ញៀវទេសចរចិននឹងទៅកម្សាន្តនៅប្រទេសនានាក្នុងតំបន់អាស៊ីអាគ្នេយ៍ម្តងទៀត ហើយប្រទេសទាំងនេះត្រូវប្រជែងគ្នាទាក់ទាញភ្ញៀវទេសចរចិនឱ្យមកប្រទេសខ្លួន ៕ ប្រភព ៖ beartai BRIEF