បរទេស៖ យោងតាមប្រភពព័ត៌មាន Live Science ដែលបានរាយការណ៍កាលពីថ្ងៃទី ១៦ ខែកក្កដាថា រន្ទះបានជ្រាបចូលទៅក្នុងខ្លួនមនុស្សរយៈពេលមួយវិនាទី ហើយប្រហែល ៩០% នៃមនុស្សត្រូវបានបាត់បង់ជីវិត។

មនុស្សភាគច្រើនដែលស្លាប់ដោយសាររន្ទះបាញ់គឺជាការស្លាប់ភ្លាមៗដោយការគាំងបេះដូង ពីព្រោះវ៉ុលខ្លាំងរបស់រន្ទះធ្វើឱ្យរំខានដល់ចង្វាក់បេះដូងធម្មជាតិ។ ផ្លេកបន្ទោរក៏អាចបណ្ដាលឱ្យជនរងគ្រោះខ្ទេចត្រចៀក ដោយសាររលកសម្ពាធ ធ្វើឱ្យប្រព័ន្ធផ្លូវដង្ហើម ខ្វិន ឬបណ្តាលឱ្យរលាកបន្ទាប់បន្សំទៅនឹងសក់ឆេះ ឬសម្លៀកបំពាក់ខូចខាតជាដើម។

ទោះជាយ៉ាងណាក៏ដោយ មានមនុស្សភាគតិចណាស់ដែលបានរស់រានមានជីវិតដោយសាររន្ទះបាញ់ ប៉ុន្តែអ្នកនៅរស់រានមានជីវិតទាំងនោះអាចជួបប្រទះបញ្ហាជាច្រើនដូចជា ការខូចខាតសរសៃប្រសាទ ជំងឺស្ត្រេសក្រោយការប៉ះទង្គិចផ្លូវចិត្ត រលាកស្បែក និងមានរូបរាងនៃផ្កាផ្លេកបន្ទោរនៅលើស្បែកជាដើម។

លោក Mary Ann Cooper អ្នកជំនាញសុវត្ថិភាពរន្ទះនៅ National និងជាសាស្ត្រាចារ្យផ្នែកវេជ្ជសាស្ត្រសង្គ្រោះបន្ទាន់នៅសាកលវិទ្យាល័យ Illinois បាននិយាយថា យើងមិនច្បាស់ទេថាតើរោគសញ្ញាទាំងនេះ កើតឡើងដោយរបៀបណានោះទេ ដោយសារតែចំនួនតិចតួចនៃរន្ទះបាញ់ និងការខ្វះខាតថវិកាសម្រាប់ស្រាវជ្រាវ។ ទោះជាយ៉ាងណាក៏ដោយ អ្នកជំនាញជឿថា មូលហេតុនៃរោគសញ្ញាទាំងនេះ គឺអាចមកពីការរំខានដល់ជាលិកាដែលបណ្តាលមកពីរន្ទះ រួមផ្សំជាមួយនឹងរបួសត្រង់ៗ នឹងបណ្តាលមកពីការផ្លាស់ប្តូរសម្ពាធបរិយាកាសភ្លាមៗផងដែរ។ ដូចនេះ មនុស្សដែលធ្លាប់បានរន្ទះបាញ់ អាចមកពីចរន្តដីនៅក្បែរនោះ ឬកំពុងឈរក្បែរវត្ថុមួយដែលត្រូវបានរន្ទះបាញ់ជាដើម៕ ប្រភព៖vnespress

ប្រទេសថៃ ៖ អ្នកនាំពាក្យក្រសួងការបរទេសអាមេរិកបានលើកឡើងថា អាមេរិកបារម្ភអំពីការវិវឌ្ឍក្នុងប្រព័ន្ធច្បាប់ប្រទេសថៃ ក្រោយពីមេដឹកនាំគណបក្សនយោបាយដែលទទួលជោគជ័យក្នុងការបោះឆ្នោត និងទទួលបានសំឡេងឆ្នោតលំដាប់ទី១ ប៉ុន្តែពាក់ព័ន្ធនឹងពាក្យបណ្តឹងចំនួន២ករណីខុសៗគ្នា ។

កាលពីថ្ងៃទី១៧ ខែកក្កដា កន្លងមក សារព័ត៌មានរ៉យទ័របានរាយការណ៍ថា លោក Matthew Miller អ្នកនាំពាក្យក្រសួងការបរទេសអាមេរិកបានឆ្លើយតបនឹងសំណួររបស់អ្នកសារព័ត៌មាន ពាក់ព័ន្ធនឹងស្ថានការណ៍នយោបាយប្រទេសថៃក្រោយការបោះឆ្នោតថា រដ្ឋាភិបាលក្រុងវ៉ាស៊ីនតោនគ្មានទំនុកចិត្តសម្រាប់ការបោះឆ្នោតរបស់ប្រទេសថៃលើកនេះទេ ប៉ុន្តែអាមេរិកគាំទ្ររាល់ដំណើរការការងារដែលឆ្លុះបញ្ចាំងពីឆន្ទៈរបស់ពលរដ្ឋ ។

លោក Matthew Miller អ្នកនាំពាក្យក្រសួងការបរទេសអាមេរិកលើកឡើងថា ៖ «យើងកំពុងសង្កេតមើលស្ថានការណ៍យ៉ាងដិតដល់ក្រោយការបោះឆ្នោតនៅប្រទេសថៃ រួមទាំងអ្វីដែលបានកើតឡើងក្នុងដំណើរការផ្លូវច្បាប់កាលពីពេលថ្មីៗនេះផងដែរ ហើយពួកយើងមានការបារម្ភ» ។

សារព័ត៌មានរ៉យទ័របានរាយការណ៍ទៀតថា តុលាការធម្មនុញ្ញបានទទួលយកញត្តិរបស់លោក Pita Limjaroenrat និងគណបក្សកាវក្លៃដែលបានស្នើធ្វើវិសោធនកម្មច្បាប់ព្រហ្មទណ្ឌ មាត្រា១១២ ។ ចំណែកគណៈកម្មការរៀបចំការបោះឆ្នោតបានបញ្ជូនសំណុំរឿងទៅតុលាការធម្មនុញ្ញ ដើម្បីពិចារណាលើលោក Pita Limjaroenrat មេដឹកនាំគណបក្សកាវក្លៃ បានកាន់កាប់ភាគហ៊ុនប្រព័ន្ធផ្សព្វផ្សាយបំពាននឹងច្បាប់បោះឆ្នោត ។ ករណីទាំងពីរនេះធ្វើឱ្យគេបារម្ភថា លោក Pita Limjaroenrat អាចខ្វះខាតគុណសម្បត្តិធ្វើជាសមាជិកសភាតំណាងរាស្ត្រ ឬគណបក្សកាវក្លៃអាចត្រូវគេរំលាយ ដូចគ្នានឹងគណបក្សអនាគតថ្មី ធ្លាប់ត្រូវបានគេរំលាយកាលពីឆ្នាំ២០២០ ។

នៅពេលអ្នកសារព័ត៌មានសួរបន្ថែមពាក់ព័ន្ធនឹងករណីទាំងពីរនេះ លោក Matthew Miller អ្នកនាំពាក្យក្រសួងការបរទេសអាមេរិកបញ្ជាក់ថា ៖ «ខ្ញុំមិនចង់ទាយនោះទេ ហើយយើងត្រូវធ្វើដូចម្តេចជាមួយរឿងមិនទាន់កើតឡើង ។ ប៉ុន្តែស្ថានការណ៍នយោបាយដែលបានកើតឡើងនៅប្រទេសថៃនាពេលថ្មីៗនេះ គួរឱ្យបារម្ភ» ៕ ប្រភព ៖ Bangkok biznews

រដ្ឋធានីសេអ៊ូល៖ ស្របពេលប្រទេសកូរ៉េខាងត្បូង កំពុងតែរងគ្រោះ ដោយសារទឹកជំនន់ដ៏ធ្ងន់ធ្ងរ ដែលបានសម្លាប់មនុស្សជាង៤០នាក់ និង បង្កនូវការខូចខាតដល់ហេដ្ឋារចនាសម្ព័ន្ធមួយចំនួននោះ បែរជារលកកម្ដៅ វាយប្រហារ ទៅលើប្រទេសចិន តំបន់អឺរ៉ុប តំបន់សមុទ្រមេឌីទែររ៉ាណេ និង ផ្នែកជាច្រើនផ្សេងទៀត នៅលើពិភពលោក។

សារព័ត៌មានរបស់ចក្រភពអង់គ្លេស BBC បានចេញផ្សាយ នៅថ្ងៃអង្គារ ទី១៨ ខែកក្កដា ថា រលកកម្ដៅ កំពុងតែបន្តរាលដាលពាសពេញ នៅតំបន់ភាគខាងត្បូងទ្វីបអឺរ៉ុប ជាមួយនឹងសីតុណ្ហភាព នៅកណ្តាលមេឌីទែរ៉ាណេ ហើយគេរំពឹង ថា អាកាសធាតុក្ដី នឹងឡើងដល់កំពូល នៅថ្ងៃនេះ។ រីឯកោះ Sardinia របស់អ៊ីតាលី ត្រូវបានគេរំពឹងថា នឹងឡើងកម្ដៅ រហូតដល់កម្រិតខ្ពស់ ជាមួយនឹងសីតុណ្ហភាព ៤៦អង្សាសេ នៅរសៀល ថ្ងៃអង្គារ។ ទន្ទឹមគ្នានេះ អាជ្ញាធរ ក៏បានព្រមាន ថា កម្ដៅឡើងខ្លាំង អាចនឹងបន្តអូសបន្លាយ រយៈពេល១០ថ្ងៃទៀត នៅតាមតំបន់មួយចំនួនរបស់ប្រទេសអ៊ីតាលីប្រទេសអេស្បាញ បានប្រឈមមុខនឹងរលកកម្ដៅកើនឡើងជាប់ៗគ្នា ខណៈសីតុណ្ហភាព កាលពីម្សិលមិញ បានឡើង រហូតដល់៤៤អង្សាសេ នៅភាគខាងត្បូងរបស់ប្រទេសអឺរ៉ុបមួយនេះ។ រីឯសហរដ្ឋអាមេរិក នៅពាក់កណ្តាលអធ្រាត្រយប់ ថ្ងៃចន្ទ គឺសីតុណ្ហភាព នៅតាមស្ថានីយអាកាសធាតុ ស្ថិតនៅ Death Valley រដ្ឋកាលីហ្វ័រញ៉ា បានឡើង រហូតដល់៤៩អង្សាសេ។

បើទោះជាភ្លៀងបានធ្លាក់មកយ៉ាងខ្លាំង នាំមកជាមួយនឹងព្យុះទីហ្វុង Talim វាយលុកទៅលើឆ្នេរសមុទ្រ នាភាគខាងត្បូងរបស់ប្រទេសចិន យ៉ាងណាក្ដី ប៉ុន្ដែរលកកម្ដៅក៏កំពុងតែគ្របដណ្តប់ ទៅលើតំបន់មួយចំនួន នាភាគខាងជើងរបស់ប្រទេសមហាយក្សអាស៊ីមួយនេះ។

បើតាមការិយាល័យឧតុនិយមរបស់ចក្រភពអង់គ្លេស បានឱ្យដឹងថា កាលពីចុងសប្តាហ៍កន្លងទៅ ប្រទេសចិន បានកត់ត្រា អំពីសីតុណ្ហភាពឡើងខ្ពស់បំផុត មិនធ្លាប់មានពីមុនមក ដោយឡើងកម្ដៅ រហូតដល់ជាង៥២អង្សាសេ នៅក្នុងខេត្តស៊ីនជាង (Xinjiang)។ ជាមួយគ្នានេះ ក្រុងប៉េកាំង ក៏បានកត់ត្រាថ្ងៃដ៏ក្តៅបំផុត នៅក្នុងខែមិថុនា នៅក្នុងរយៈពេលជាង៦០ឆ្នាំ ដោយបារតឡើងដល់ ៤១,១អង្សាសេ។

ស្របគ្នានេះដែរ ប្រទេសជប៉ុន កាលពីថ្ងៃចន្ទ បានផ្អាកជាបណ្ដោះអាសន្ននូវព្រឹត្ដិការណ៍ក្រៅផ្ទះ ហើយសកម្មភាពមួយចំនួន បានបង្ហាញ ពាក់ព័ន្ធនឹងអាកាសធាតុក្តៅខ្លាំង។

ក្រសួងមហាផ្ទៃកូរ៉េខាងត្បូង បានបញ្ជាក់ ថា គ្រោះទឹកជំនន់ នៅក្នុងប្រទេសអាស៊ីបូព៌ាមួយនេះ បានសម្លាប់មនុស្ស ចំនួន៤១នាក់ និង ៩នាក់ផ្សេងទៀតកំពុងតែបាត់ខ្លួន។ ចំណែកប្រតិបត្ដិការសង្គ្រោះ និង រុករកមនុស្ស នៅក្នុងផ្លូវរូងក្រោមដី ប្រវែង៤៣០ម៉ែត្រ ស្ថិតក្នុងCheongju, ខេត្ត North Chungcheong បានបិទបញ្ចប់ កាលពីល្ងាចថ្ងៃចន្ទ ដោយបានរកឃើញសាកសពរបស់មនុស្ស ចំនួន១៤នាក់៕

បរទេស៖ កំពូលតារាបាល់ទាត់របស់ពិភពលោក Messi បានធ្វើការបង្ហាញខ្លួនដំបូងនៅក្លិបបាល់ទាត់ Inter Maimi ជាមួយអ្នកគាំទ្រជិត ២ ម៉ឺននាក់ កាលពីថ្ងៃទី១៦ ខែកក្កដា ឆ្នាំ២០២៣។

Inter Miami បានរៀបចំពិធីបង្ហាញវត្តមាន Messi ជាលើកដំបូងនៅសហរដ្ឋអាមេរិក ដោយបង្កឱ្យមានការកកស្ទះចរាចរណ៍យ៉ាងខ្លាំង។ យោងតាមប្រភពព័ត៌មាន Daily Mail មានមនុស្សជាច្រើនបានជួបជុំគ្នាដើម្បីអបអរ Messi ដែលក្នុងនោះមានជនជាតិអាហ្សង់ទីនប្រហែល ១០០,០០០ នាក់ក៏បានរស់នៅក្នុងទីក្រុងម៉ៃអាមីផងដែរ។ អ្នកគាំទ្របានសម្រុកចូលទៅកន្លែងអង្គុយរបស់ពួកគេយ៉ាងអន្ទះសា ដោយរង់ចាំការមកដល់របស់ Messi។ កៅអីចំនួន ១៨,០០០ នៃកីឡាដ្ឋាន DRV PNK បានពេញអស់ហើយ ដូច្នេះអ្នករៀបចំត្រូវដំឡើងកន្លែងឈរបន្ថែមទៀតដើម្បីបំពេញតម្រូវការរបស់អ្នកគាំទ្រ។

Inter Miami ត្រូវបានបង្កើតឡើងដោយអតីតកីឡាករ David Beckham និងអ្នកវិនិយោគមួយចំនួនក្នុងឆ្នាំ ២០១៨។ ក្លិបនេះក៏បានចូលរួមជាមួយ MLS តាំងពីឆ្នាំ ២០២០ ហើយលទ្ធផលល្អបំផុតគឺស្ថិតនៅលំដាប់ទីប្រាំមួយក្នុងដូវកាលមុន។
បច្ចុប្បន្ន ពួកគេស្ថិតនៅបាតតារាង MLS Eastern League ក្នុង ២០ ប្រកួត ដោយឈ្នះ ៥ ស្មើ ២ និង ចាញ់ ១៣ សរុបគឺ ១៧ ពិន្ទុ ហើយមាន ៩ ពិន្ទុតាមពីក្រោយដោយក្រុមជម្រុះ។

នៅម៉ោងប្រហែល ៧ យប់ Messi បាននាំប្រពន្ធនិងកូនៗរបស់គាត់ទៅកាន់ទីធ្លានៃកម្មវិធីនោះ ដោយលោកបាននិយាយថា ខ្ញុំពិតជាសប្បាយចិត្តណាស់ ខ្ញុំចង់ចាប់ផ្តើមហ្វឹកហាត់ និងលេងបាល់នៅទីនេះ ហើយខ្ញុំនឹងឈ្នះដើម្បីជួយក្លិបនេះឱ្យរីកចម្រើនបន្តទៅមុខរហូត។ យើងប្រាកដជាមានពេលវេលាដ៏រីករាយជាមួយគ្នា ហើយខ្ញុំពិតជាអរគុណអ្នកទាំងអស់គ្នាសម្រាប់អ្វីដែលបានកើតឡើងនៅថ្ងៃនេះ។គួរបញ្ជាក់ដែរថា ខ្សែប្រយុទ្ធវ័យ ៣៦ ឆ្នាំរូបនេះ បានចុះហត្ថលេខាលើកិច្ចសន្យារយៈពេល ២ ឆ្នាំកន្លះជាមួយក្លឹប Inter Miami ដោយគាត់អាចចាប់ផ្តើមការប្រកួតជាលើកដំបូងរបស់គាត់ក្នុងក្លិបនេះនៅថ្ងៃទី ២១ ខែកក្កដា ទល់នឹង Cruz Azul ក្នុងក្របខ័ណ្ឌ Leagues Cup ៕ ប្រភព៖vnexpress

ប្រទេសថៃ ៖ អ្នកនាង Paethongthan Shinawatra (ហៅ អុង អ៊ីង) ជាបេក្ខជននាយករដ្ឋមន្ត្រីមកពីគណបក្សភឿថៃ បានផ្តល់បទសម្ភាសន៍ជាមួយក្រុមអ្នកសារព័ត៌មាន ពាក់ព័ន្ធនឹងករណីលោក Pita Limjaroenrat មេដឹកនាំគណបក្សកាវក្លៃ និងជាបេក្ខជននាយករដ្ឋមន្ត្រី ។ អ្នកនាង អុង អ៊ីង បានប្រកាសថា ប្រសិនបើការបោះឆ្នោតជ្រើសរើសនាយករដ្ឋមន្ត្រី លើកទី២ នៅថ្ងៃទី១៩ ខែកក្កដា ទទួលបានពិន្ទុមិនកើនឡើងទេ វានឹងជាតួនាទីរបស់គណបក្សភឿថៃ ។

អ្នកនាង អុង អ៊ីង បានលើកឡើងថា លោក Pita ធ្លាប់លើកឡើងថា សូមប្រឹងប្រែងឱ្យអស់ពីសមត្ថភាព មុននឹងឈានដល់ថ្ងៃទី១៩ ខែកក្កដា ។ ចំណែកគណបក្សភឿថៃបានគាំទ្រលោក Pita ឱ្យធ្វើជានាយករដ្ឋមន្ត្រីយ៉ាងពេញទំហឹង ប៉ុន្តែលទ្ធផលនឹងចេញមកដូចម្តេចនោះ យើងត្រូវរង់ចាំមើលសិន ។

អ្នកនាង អុង អ៊ីង បន្តទៀតថា បើលោក Pita ធ្លាក់ក្នុងការបោះឆ្នោតជ្រើសរើសនាយករដ្ឋមន្ត្រី លើកទី២ គណបក្សភឿថៃបានជជែកពិភាក្សាគ្នារួចហើយថា នឹងបញ្ជូនឈ្មោះលោក Srettha Thavisin ធ្វើជាបេក្ខជននាយករដ្ឋមន្ត្រីប្រទេសថៃ ប៉ុន្តែយើងនឹងអនុវត្តម្តងមួយជំហាន ។

អ្នកនាងនិយាយថា ៖ «នយោបាយប្រទេសថៃត្រូវផ្តោតលើការបង្កើតរដ្ឋាភិបាលឱ្យពលរដ្ឋបាននៅពេលណា ព្រោះប្រទេសជាតិត្រូវអភិវឌ្ឍន៍ទៅមុខបន្តទៀត ។ ប៉ុន្តែពេលនេះ ខ្ញុំយល់ថា ច្បាប់នៅប្រទេសថៃមិនធម្មតាទេ និងមានអន្ទាក់ច្រើន ហើយយើងត្រូវតែឆ្លងកាត់វាឱ្យបាន ។ ម្យ៉ាងទៀត យើងត្រូវដោះស្រាយបញ្ហាជីវភាពរបស់ពលរដ្ឋ បើយើងអាចដោះស្រាយបាន ប្រទេសជាតិនឹងរីកចម្រើន ហើយអន្តរជាតិនឹងមានទំនុកចិត្តមកវិនិយោគនៅប្រទេសថៃ ។ ខ្ញុំចង់ឱ្យអ្នករាល់គ្នាផ្តោតលើរឿងនេះជាចម្បង» ៕ ប្រភព ៖ chiangmai news