ប្រទេសថៃ ៖ កាលពីថ្ងៃទី១៤ ខែកក្កដា កន្លងមក លោក Somchai Pornratanacharoen ប្រធានសមាគមពាណិជ្ជកម្មលក់ដុំ និងលក់រាយប្រទេសថៃ បានបង្ហាញការខកចិត្តក្រោយការបោះឆ្នោតជ្រើសរើសនាយករដ្ឋមន្ត្រីថៃ នៅថ្ងៃទី១៣ ខែកក្កដា ព្រោះលទ្ធផលបង្ហាញថា លោក Pita Limjaroenrat មិនទទួលបានជោគជ័យក្នុងការបោះឆ្នោតលើកទី១ ទេ ។

ប្រធានសមាគមពាណិជ្ជកម្ម លោក Somchai លើកឡើងថា លោកមានអារម្មណ៍ខកចិត្តជាមួយមនុស្សដែលគិតថា ខ្លួនឯងមានកិត្តិយសខ្ពង់ខ្ពស់នៅក្នុងប្រទេស ហើយលោកសម្លឹងឃើញថា អ្វីគ្រប់យ៉ាងជាការរៀបចំគម្រោងទុកមុន និងមិនមែនជាការបោះឆ្នោតទេ ព្រោះគេបានរៀបចំផែនការរួចអស់ហើយ ។ ដូច្នេះ ការបោះឆ្នោតកាលពីថ្ងៃទី១៣ ខែកក្កដា គ្រាន់តែជាការរៀបចំពិធីប៉ុណ្ណោះ ។

លោកបន្តថា ការបោះឆ្នោតជ្រើសរើសនាយករដ្ឋមន្ត្រីថៃលើកទី២ គឺគណបក្សនយោបាយទាំង៨ គួរតែជំរុញលោក Pita ម្តងទៀតឱ្យដល់ទីបំផុត ដើម្បីអស់ការសង្ស័យថា ហេតុអ្វីវាមិនអាចទៅមុខបាន ? ហើយបើការបោះឆ្នោតលើកទី២ នេះ លោក Pita នៅតែមិនជាប់ទៀត លោក Pita គួរតែដកថយ ។ ប៉ុន្តែចំណុចសំខាន់ គឺគណបក្សកាវក្លៃ និងគណបក្សភឿថៃ ត្រូវសហការគ្នាឱ្យស្អិតរមួតដើម្បីបង្កើតរដ្ឋាភិបាល ព្រោះនេះជាសំឡេងគាំទ្ររបស់ពលរដ្ឋ បើទោះជានាយករដ្ឋមន្ត្រីថៃ មិនមែនជាលោក Pita ក្តី ។ បច្ចុប្បន្ន ទោះជាយកអ្នកណាម្នាក់មកធ្វើជានាយករដ្ឋមន្ត្រីថៃ ប៉ុន្តែត្រូវប្រញាប់បង្កើតរដ្ឋាភិបាល ។

ហេតុនេះ ការដោះស្រាយស្ថានការណ៍នយោបាយនៅប្រទេសថៃ គឺត្រូវបង្កើតរដ្ឋាភិបាលថ្មីឱ្យឆាប់រហ័សបំផុត ព្រោះសេដ្ឋកិច្ច និងភាពរីកចម្រើនរបស់ប្រទេសមិនអាចរង់ចាំបានទេ ។ សព្វថ្ងៃ កម្លាំងទិញនៅតាមទីផ្សារនានាមិនល្អដូចមុន ព្រោះពលរដ្ឋគ្មានប្រាក់ចាយ ហើយនៅពេលបង្កើតរដ្ឋាភិបាលថ្មីរួច ត្រូវចេញវិធានការជំរុញ ឬធ្វើឱ្យពលរដ្ឋមានប្រាក់ចំណូលបន្ថែមទៀតឱ្យបានឆាប់រហ័ស ។ ចំណែកស្ថានភាពតម្លៃទំនិញវិញគ្មានការឡើងថ្លៃទេ ព្រោះបើឡើងថ្លៃទំនិញ យើងនឹងគ្មានអ្នកទិញមិនខាន ៕ ប្រភព ៖ khaosod

ប្រទេសអេស្ប៉ាញ ៖ រដ្ឋមន្ត្រីក្រសួងការងារប្រទេសអេស្ប៉ាញ លោកស្រី Yolanda Diaz បានស្នើគម្រោងមួយដើម្បីដោះស្រាយបញ្ហាវិសមភាពសង្គម តាមរយៈការផ្តល់ប្រាក់ឧបត្ថម្ភចំនួន២ម៉ឺនអឺរ៉ូបឱ្យយុវជនគ្រប់រូប ។ ពួកគេអាចយកប្រាក់នេះទៅចំណាយក្នុងការរៀនសូត្រ, ការបណ្តុះបណ្តាលជំនាញនានា និងបង្កើតអាជីវកម្មផ្ទាល់ខ្លួន នៅពេលពួកគេមានអាយុគ្រប់១៨ឆ្នាំ ។

យោងតាមព័ត៌មានក្នុងគេហទំព័ររបស់លោកស្រី Yolanda Diaz បានប្រកាសពីគោលនយោបាយគណបក្សលោកស្រី មុនពេលការបោះឆ្នោតនៅទូទាំងប្រទេសអេស្ប៉ាញ ដែលនឹងប្រព្រឹត្តទៅនាថ្ងៃទី២៣ ខែកក្កដា បញ្ជាក់ថា គម្រោងនេះបានត្រៀមថវិកាប្រមាណ១ម៉ឺនលានអឺរ៉ូ ដែលបានមកពីការប្រមូលពន្ធពីអ្នកមានទ្រព្យសម្បត្តិច្រើន ។

គោលដៅរបស់គម្រោងខាងលើ គឺការធានាឱ្យយុវជនទាំងអស់មានឱកាសស្មើគ្នា ដោយមិនគិតពីប្រវត្តិគ្រួសារ ឬប្រាក់ចំណូលទេ ។ យុវជនអេស្ប៉ាញគ្រប់រូបដែលមានអាយុ១៨ឆ្នាំ នឹងទទួលបានប្រាក់ឧបត្ថម្ភពីរដ្ឋាភិបាលជាបន្តបន្ទាប់ រហូតដល់ពួកគេមានអាយុ២៣ឆ្នាំ ដើម្បីគាំទ្រដល់ការរៀនសូត្រ, ការបណ្តុះបណ្តាលជំនាញ និងអាចបង្កើតអាជីវកម្មផ្សេងៗ ។

លោកស្រី Yolanda Diaz រដ្ឋមន្ត្រីក្រសួងការងារអេស្ប៉ាញថ្លែងថា ៖ «ការផ្តល់ប្រាក់ឧបត្ថម្ភពីរដ្ឋាភិបាល គឺជាការជួយដល់យុវវ័យអេស្ប៉ាញឱ្យមានអនាគតល្អ និងផ្តល់ឱកាសឱ្យពួកគេបានរៀនសូត្របន្ត ឬចាប់ផ្តើមបង្កើតមុខរបរផ្ទាល់ខ្លួន ដោយពុំចាំបាច់ពឹងផ្អែកលើការទំនុកបម្រុងពីឪពុកម្តាយ ឬក្រុមគ្រួសាររបស់ខ្លួន» ។

លោកស្រីរដ្ឋមន្ត្រីបញ្ជាក់ថា គម្រោងនេះឈ្មោះថា «ដើមទុនចាប់ផ្តើមជីវិត» នឹងអនុវត្តចំពោះយុវជនអេស្ប៉ាញគ្រប់រូប ដោយមិនគិតពីស្ថានភាពសេដ្ឋកិច្ចគ្រួសាររបស់ពួកគេឡើយ ។ រដ្ឋាភិបាលអេស្ប៉ាញនឹងប្រមូលពន្ធពីអ្នកមានទ្រព្យសម្បត្តិច្រើន ហើយយកចំណូលពន្ធទាំងនេះមកជួយយុវជននៅទូទាំងប្រទេស ។

មូលហេតុដែលលោកស្រី Yolanda Diaz ស្នើគម្រោងនេះឡើង ដោយសារលោកស្រីមើលឃើញពីបញ្ហាវិសមភាពសង្គម ។ លោកស្រីថ្លែងថា លោកស្រីមិនអាចធ្វើការតាមក្តីសុបិនរបស់ខ្លួនបានទេ ដោយសារគ្រួសារលោកស្រីគ្មានប្រាក់គ្រប់គ្រាន់ដើម្បីបញ្ជូនលោកស្រីឱ្យរៀនផ្នែកនេះ ៕ ប្រភព ៖ beartai

បរទេស៖ យោងតាមការចុះផ្សាយរបស់ Live Science កាលពីថ្ងៃទី ១៣ ខែកក្កដា បានឱ្យដឹងថា ក្រុមអ្នកបុរាណវត្ថុវិទូបានរកឃើញផ្នូរបុរាណសម័យសំរិទ្ធជាច្រើននៅលើកោះ Cyprus ក្បែរមហាសមុទ្រមេឌីទែរ៉ាណេ ដែលក្នុងផ្នូរបុរាណនោះមានកំណប់ដូចជាមកុដមាសសុទ្ធ រួមទាំងវត្ថុនិងត្បូងមានតម្លៃជាច្រើនទៀត។

ក្រុមអ្នកបុរាណវិទូ បាននិយាយថា វត្ថុបុរាណដែលធ្វើអំពីមាសសុទ្ធទាំងនេះ ត្រូវបាននាំចូលពីប្រទេសអេហ្ស៊ីប និងអរិយធម៌សំខាន់ៗជាច្រើនទៀតនៅក្នុងតំបន់ រួមទាំង មីណូអាននៅលើកោះក្រេត និងមីស៊ីណានក្នុងប្រទេសក្រិច។ អ្នកបុរាណវិទូលោក Peter Fischer សាស្រ្តាចារ្យទទួលបន្ទុកនៅសកលវិទ្យាល័យ Gothenburg ក្នុងប្រទេសស៊ុយអែត ក៏បាននិយាយថា ការនាំចូលមាសនាសម័យនោះ ជួយបញ្ជាក់ពីទំហំពាណិជ្ជកម្មនៅមេឌីទែរ៉ាណេ កំឡុងសម័យយុគសំរិទ្ធ ប្រហែលឆ្នាំ ១០៥០ ដល់ ១៦៤០ មុនគ.ស។

ដូច្នេះវត្ថុបុរាណដែលគួរឱ្យកត់សម្គាល់បំផុតនោះគឺមកុដមាសដែលមានរូបគោ ក្របី សត្វតោ និងផ្កា។ នៅក្នុងរចនាប័ទ្ម Minoan មកុដនេះប្រហែលជាត្រូវបានធ្វើឡើងនៅក្នុងប្រទេសអេហ្ស៊ីបនាកំឡុងរាជវង្សទី ១៨ ចន្លោះឆ្នាំ ១២៩៥ និង ១៥៥០ មុនគ.ស ក្នុងរជ្ជកាលរបស់ស្តេចផារ៉ោន Akhenaten និង Nefertiti ។ លោក Fisher បានបញ្ជាក់ថា ទ្រព្យសម្បត្តិរបស់ឥស្សរជនរបស់កោះនេះបានមកពីការគ្រប់គ្រងរ៉ែទង់ដែងនៅក្នុងជួរភ្នំ Troodos ភាគខាងលិចនៃប្រទេស Cyprus ដូច្នេះ ទង់ដែងដែលធ្វើអំពីមាសសុទ្ធនេះគឺជាតម្រូវការដ៏អស្ចារ្យបំផុតនាសម័យនោះ៕ ប្រភព៖vnexpress

គេបានប្រទះឃើញកប៉ាល់ដឹកទំនិញដ៏ធំ១គ្រឿងនៅកណ្តាលសមុទ្រខ្សាច់នាភាគនិរតីប្រទេសអាហ្វ្រិកខាងត្បូង ក្រោយពីកប៉ាល់នេះបានបាត់កាលពី៥០០ឆ្នាំមុន ។ កប៉ាល់មានឈ្មោះថា «Bom Jesus» ឬ «The Good Jesus» ជារបស់ជនជាតិព័រទុយហ្គាល់ ហើយវាបានធ្វើដំណើរចាកចេញពីទីក្រុង Lisbon កាលពីថ្ងៃទី៧ ខែមីនា ឆ្នាំ១៥៣៣ ។

ចាប់តាំងពីពេលនោះមក គ្មានអ្នកណាម្នាក់បានដឹងពីជោគវាសនារបស់កប៉ាល់នេះទេ ។ ក្រោយមក នៅឆ្នាំ២០០៨ ក្នុងអំឡុងពេលគេកំពុងជីកយករ៉ែពេជ្រក្នុងសមុទ្រខ្សាច់ Namibia នៅជិតឆ្នេរសមុទ្រប្រទេសអាហ្វ្រិកខាងត្បូង ស្រាប់តែគេប្រទះឃើញកម្ទេចកម្ទីនាវា ។

អ្នកប្រទះឃើញប្រាប់ថា កប៉ាល់នេះបានដឹកទំនិញ និងទ្រព្យសម្បត្តិជាច្រើនដូចជា មាសប្រាក់ ទង់ដែង និងកាក់មាសសុទ្ធជាច្រើនដុំ ប៉ុន្តែវាបានជួបខ្យល់ព្យុះបោកបក់ខ្លាំងក្នុងអំឡុងពេលធ្វើដំណើរទៅកាន់ប្រទេសឥណ្ឌា ហើយបណ្តាលវាឱ្យលិចទៅក្នុងទឹកសមុទ្រ ។ លើសពីនេះ គេក៏បានប្រទះឃើញឆ្អឹងមនុស្សចំនួន២ដុំ ឬ៣ដុំនៅតាមចំណុចផ្សេងៗលើកប៉ាល់ផងដែរ ។

នាយកស្ថាប័នស្រាវជ្រាវបុរាណវិទ្យាផ្នែកសមុទ្រនៅអាហ្វ្រិកខាងត្បូងលើកឡើងថា គេបានប្រទះឃើញកំណប់ទ្រព្យផ្សេងទៀតដូចជា ចានសំរិទ្ធ និងបង្គោលលោហៈទំហំធំក្នុងកប៉ាល់នេះ ក្រៅពីមាសប្រាក់ដែលគេរកឃើញនាពេលកន្លងមក ។ ក្រៅពីនេះ មានកាំភ្លើងបុរាណដែលមានអាយុមិនក្រោម៥០០ឆ្នាំ, ត្រីវិស័យ និងដាវជាច្រើនប្រភេទ ៕ ប្រភព ៖ Bangkok biznews

បរទេស៖ កាលពីថ្ងៃទី ១៤ ខែកក្កដា មជ្ឈមណ្ឌលគ្រប់គ្រង និងបង្ការជំងឺរបស់ចិន បាននិយាយថា ចាប់តាំងពីថ្ងៃទី ១ ខែមិថុនា ដល់ថ្ងៃទី ១០ ខែកក្កដា ប្រទេសចិនកំពុងជួបប្រទះនឹងការផ្ទុះជំងឺមេរោគស្វា Monkey B virus ចំនួន ១០៦ ករណី។

ក្នុងចំណោម ១០៦ ករណី ខេត្តក្វាងទុងមាន ៤៨ ករណីច្រើនជាងគេ បន្ទាប់មកទីក្រុងប៉េកាំងមាន ៤៥ ករណី ខេត្តជាំងស៊ូ ៨ ករណី ខេត្តហ៊ូប៉ី និងសានទុង ២ ករណី និងហ្សឺជាំង ១ ករណី។ ទោះជាយ៉ាងណាក៏ដោយ យោងតាម CDC របស់ចិន ជំងឺមេរោគស្វា Monkey B virus មិនទាន់មានលក្ខណៈណាមួយធ្ងន់ធ្ងរ ឬស្លាប់បាននោះទេ។

ការផ្ទុះឡើងនេះមានលក្ខណៈមួយចំនួនដូចជាករណីភាគច្រើនចំពោះបុរសដែលរួមភេទជាមួយបុរសដូចគ្នា ហើយឆ្លងជាចម្បងតាមរយៈការទំនាក់ទំនងពីបុរសទៅបុរស។ ហានិភ័យនៃការឆ្លងតាមរយៈរបៀបទំនាក់ទំនងផ្សេងទៀតមានកម្រិតទាប ហើយអ្នកទំនាក់ទំនងជិតស្និទ្ធភាគច្រើនដែលមិនសកម្មផ្លូវភេទមិនត្រូវបានឆ្លងទេ។ ជំងឺមេរោគស្វា Monkey B virus នេះមានរោគសញ្ញាដូចជា គ្រុនក្តៅ ផ្តាសាយ និងហើមកូនកណ្តុរ។

យោងតាមប្រធាន CDC របស់ចិន មនុស្សដែលមានទំនាក់ទំនងជិតស្និទ្ធជាមួយនឹងករណីជំងឺមេរោគស្វា មិនចាំបាច់នៅដាច់ដោយឡែកនោះទេ គ្រាន់តែត្រូវតាមដានសុខភាពដោយខ្លួនឯងតាមការណែនាំរយៈពេល ២១ ថ្ងៃគិតចាប់ពីកាលបរិច្ឆេទនៃការទាក់ទងចុងក្រោយជាមួយករណីនេះ។ ក្នុងអំឡុងពេលនៃការតាមដានដោយខ្លួនឯង ទំនាក់ទំនងជិតស្និទ្ធអាចរស់នៅ និងធ្វើការបានជាធម្មតា ប៉ុន្តែគួរតែជៀសវាងការរួមភេទ និងបរិច្ចាគឈាម ហើយអ្នកត្រូវវាស់សីតុណ្ហភាពរាងកាយប្រចាំថ្ងៃ និងទៅមណ្ឌលសុខភាពនៅពេលបង្ហាញរោគសញ្ញាសុខភាពខុសប្រក្រតី។

អង្គការសុខភាពពិភពលោក (WHO) បានប្រកាសអាសន្នរោគស្វាជាសកល (PHEIC) នៅក្នុងខែកក្កដា ឆ្នាំ ២០២២ ហើយបានបញ្ចប់វានៅខែឧសភា ឆ្នាំ ២០២៣ ។ ទោះបីជាករណីនៃជំងឺនេះជាទូទៅមាននិន្នាការធ្លាក់ចុះជាសាកលក៏ដោយ ក៏ប្រទេស និងដែនដីមួយចំនួនកំពុងមើលឃើញការកើតឡើងវិញនៃករណីជំងឺមេរោគស្វា ជាពិសេសនៅក្នុងតំបន់អាស៊ីប៉ាស៊ីហ្វិក៕ ប្រភព៖vnexpress

ប្រទេសថៃ ៖ កាលពីថ្ងៃទី១៤ ខែកក្កដា កន្លងមក បណ្តាផ្នែកឯកជន និងអ្នកជំនាញជាច្រើននាក់បានសម្តែងការបារម្ភពីផលប៉ះពាល់សេដ្ឋកិច្ច និងទេសចរណ៍ប្រទេសថៃ ក្រោយពីលោក Pita Limjaroenrat មេដឹកនាំគណបក្សកាវក្លៃ មិនបានជាប់ធ្វើជានាយករដ្ឋមន្ត្រី ក្នុងការបោះឆ្នោតកាលពីថ្ងៃទី១៣ ខែកក្កដា ។ លោក Pita ទទួលបានសំឡេងគាំទ្រត្រឹមតែ៣២៤ពិន្ទុប៉ុណ្ណោះ ហើយមានសមាជិកព្រឹទ្ធសភាត្រឹមតែ១៣រូបប៉ុណ្ណោះដែលបោះឆ្នោតគាំទ្រលោក ។

ប្រធានសាកលវិទ្យាល័យសភាពាណិជ្ជកម្មថៃ និងប្រធានមជ្ឈមណ្ឌលប្រឹក្សាការព្យាករសេដ្ឋកិច្ច និងធុរកិច្ច បានលើកឡើងថា បើការបង្កើតរដ្ឋាភិបាលនៅអូសបន្លាយរហូតដល់ខែសីហា ដល់ខែកញ្ញា ឆ្នាំ២០២៣ ផលប៉ះពាល់សេដ្ឋកិច្ចនឹងមិនធ្ងន់ធ្ងរទេ ព្រោះវាស្ថិតក្រោមការកំណត់ Timeline ប៉ុន្តែបើពេលនោះ មិនអាចបោះឆ្នោតជ្រើសរើសនាយករដ្ឋមន្ត្រីបានទេ វានឹងឈានដល់ការប្រឆាំងតវ៉ាដោយប្រើហិង្សា ។ ហេតុនេះ ប្រទេសថៃនឹងបាត់បង់ភ្ញៀវទេសចរបរទេសចំនួន១លាននាក់ក្នុង១ខែ រហូតដល់ចុងឆ្នាំ២០២៣ ហើយថៃនឹងបាត់បង់ប្រាក់ចំណូលទេសចរណ៍រាប់លានបាតផងដែរ ។

ចំណែកលោក Chamnan Srisawat ប្រធានក្រុមប្រឹក្សាឧស្សាហកម្មទេសចរណ៍បានបង្ហាញក្តីបារម្ភថា បើមានការធ្វើបាតុកម្មតវ៉ាខ្លាំងក្លាដោយសារការបង្កើតរដ្ឋាភិបាលយឺតយ៉ាវនោះ វានឹងមានផលប៉ះពាល់ដល់វិស័យទេសចរណ៍មិនខាន ។ ដូច្នេះ ប្រទេសថៃត្រូវតែជំរុញការបង្កើតរដ្ឋាភិបាលថ្មីឱ្យបានឆាប់រហ័ស ។

រីឯលោក At Phisanwanich នាយកមជ្ឈមណ្ឌលសិក្សាពាណិជ្ជកម្មអន្តរជាតិនៃសាកលវិទ្យាល័យសភាពាណិជ្ជកម្មថៃបញ្ជាក់ថា បើទោះជាលោក Pita Limjaroenrat ទទួលបានសំឡេងគាំទ្រពីសមាជិកសភា និងព្រឹទ្ធសភាក្តី ប៉ុន្តែលោកត្រូវប្រឈមមុខជាមួយតុលាការធម្មនុញ្ញសម្រេចសេចក្តីលើករណីលោកកាន់ភាគហ៊ុនប្រព័ន្ធផ្សព្វផ្សាយ ។ បើទីបំផុត លោក Pita នៅតែគ្មានការគាំទ្រឱ្យធ្វើជានាយករដ្ឋមន្ត្រី គណបក្សកាវក្លៃនឹងក្លាយជាគណបក្សប្រឆាំង ។ ដូច្នេះ គេនឹងបង្កើតគណបក្សកាន់អំណាចថ្មីទៀត ហើយលោកជឿថា រយៈពេលដឹកនាំប្រទេសថៃនឹងមិនដល់៤ឆ្នាំទេ ។

លោក Pita មេដឹកនាំគណបក្សកាវក្លៃ និងជាបេក្ខជននាយករដ្ឋមន្ត្រីទី៣០ របស់ប្រទេសថៃ បានផ្តល់សម្ភាសន៍ក្រោយពីបញ្ចប់ការបោះឆ្នោតជ្រើសរើសនាយករដ្ឋមន្ត្រី កាលពីថ្ងៃទី១៣ ខែកក្កដា ថា លោកនៅតែមានទំនុកចិត្តជាមួយគណបក្សចូលរួមបង្កើតរដ្ឋាភិបាល ហើយលោកព្រមទទួលយក ប៉ុន្តែមិនព្រមចុះចាញ់ទេ ។ លោក Pita នឹងប្រើពេលវេលាស្វែងរកយុទ្ធសាស្ត្រប្រមូលសំឡេងគាំទ្រ ដើម្បីទទួលបានជោគជ័យក្នុងការបោះឆ្នោតជ្រើសរើសនាយករដ្ឋមន្ត្រី នៅថ្ងៃទី១៩ ខែកក្កដា ឆ្នាំ២០២៣ ៕ ប្រភព ៖ Mono News