ដូចមហាជនជ្រាបមកហើយថារឿងថើបមាត់គ្នារបស់ ភិទិ និងតួស្រី ត្រូវគូស្នេហ៍ប្រចណ្ឌមានរឿងឈ្លោះទាស់ទែងគ្នាខណៈខាងប្រុសសន្យាថាមិនឱ្យមានជាលើកទី២ឡើយ។ ទន្ទឹមនឹងមានរឿងក្តៅគគុកនេះតួអង្គស្រីដែលបានថើបមាត់គ្នាជាមួយ ភិទិ បានចេញមុខមកបញ្ជាក់ដែលគេស្គាល់ថាជាកញ្ញា អ៊ីងអ៊ីង។ ទោះយ៉ាងណាការចេញមកបញ្ជាក់ថារឿងនោះគ្រាន់តែជារឿងការងារស្រាប់តែមានមតិថាដូចយកភ្លើងមកដុតថែម។
នៅរសៀលថ្ងៃទី៣០ ខែសីហា នេះនៅលើបណ្តាញសង្គមរបស់កញ្ញា អ៊ីងអ៊ីង បានចេញមកបញ្ជាក់ថា «អ្នកយល់គេនឹងយល់ អ្នកមិនយល់នៅតែមិនយល់ ទោះនិយាយដល់ស្លាប់ក៏គ្មានបានអ្វីមកវិញដែរ។ គ្រប់យ៉ាងគឺដើម្បីការងារ វាគ្រាន់តែជាការសម្ដែង។ បើថតកុនមិនមាន scene ស្នេហ៍ scene sweet ថើបអីទេ មិនបាច់ថតកុនម៉ងទៅ។ សំខាន់នៅតែជាមនុស្សស្មោះស ការស្រលាញ់គឺការជឿជាក់បើគេចង់ថើបគ្នាពិតមែនឬក្បត់នោះ គេមិនបង្ហាញ video public នោះទេ។ អ្នកណាយល់ពីគ្នាគេនឹងនៅតែស្រលាញ់រាប់អានគ្នា
បើអ្នកមិនយល់មានតែបាក់បែក»។
តារាសម្តែងក្នុងវីដេអូចម្រៀង «ពីរនាក់បានហើយ» បន្តទៀតថា «ខ្ញុំខំធ្វើការថតទាំងគ្មានពេលគេងគ្រប់គ្រាន់ ១ថ្ងៃគេងបានតែ៤ម៉ោង ព្រោះចង់បានការងារគុណភាពនិងល្អ។ សួរថាហត់ទេគឺហត់ខ្លាំងណាស់ សឹងតែគ្មានពេលគេង។ ការងារមួយៗមិនស្រួលទេណា សូមគិតក្នុងផ្លូវវិជ្ជមាន គ្រប់យ៉ាងជាសិល្បៈ ជាការងារ ជាការសម្ដែងណា។ សូមអរគុណគ្រប់គ្នាអរគុណដល់អ្នកដែលយល់»។
បើតាមការបញ្ជាក់របស់តារាស្រីរូបនេះបានឱ្យដឹងថា ឈុតថើបគ្នាជាមួយ ភិទិ នេះស្ថិតនៅក្នុង scene មួយក្នុងរឿង «លាក់ភ្លើង» របស់ស្ថានីយ៍ទូរទស្សន៍ហង្សមាស។
ទន្ទឹមនឹងការបកស្រាយពន្យល់ទៅកាន់មហាជនពីឈុតថើបគ្នានេះមានមតិបានលើកឡើងថា អ៊ីងអ៊ីង ចេញមកបែបនេះដូចជាយកភ្លើងដុតថែមស្របពេលដែលគូស្នេហ៍ ភិទិ កំពុងមានអារម្មណ៍អន់ចិត្តនិងប្រចណ្ឌ។ ការលើកឡើងនេះ អ៊ីងអ៊ីង បានបញ្ជាក់នៅក្នុងខម្មិនដែរថា នាងក៏មានបញ្ហានៅខាងខ្លួនឯងដូចគ្នាទើបនាងpost បញ្ជាក់ដោយមិនបានpostឱ្យខាងណានោះទេ៕
