ប្រទេសថៃ ៖ គណបក្សកាវក្លៃបានធ្វើសន្និសីទសារព័ត៌មានមួយ ប្រកាសតែងតាំងបេក្ខជនរបស់គណបក្សភឿថៃធ្វើជានាយករដ្ឋមន្ត្រី និងដឹកនាំបង្កើតរដ្ឋាភិបាល ដោយបញ្ចប់ការបន្តអំណាចពីរដ្ឋាភិបាលចាស់ ។ គណបក្សកាវក្លៃលើកឡើងថា លោក Pita Limjaroenrat នៅតែផ្តល់កម្លាំងចិត្ត ប៉ុន្តែលោកមិនអាចទទួលយករឿងការរំលាយគណបក្សកាវក្លៃទេ ។

នៅថ្ងៃទី២១ ខែកក្កដា លោក Chaitawat Tulathon អគ្គលេខាធិការគណបក្សកាវក្លៃ បានធ្វើសន្និសីទសារព័ត៌មានពីការវិវឌ្ឍការចរចាបង្កើតរដ្ឋាភិបាល ។ លោកលើកឡើងថា ការបោះឆ្នោតនៅទូទាំងប្រទេសថៃ កាលពីថ្ងៃទី១៤ ខែឧសភា ឆ្នាំ២០២៣ គឺជាការប្រកាសអំពីបំណងប្រាថ្នាយ៉ាងច្បាស់លាស់របស់ពលរដ្ឋថា ពួកគេត្រូវការផ្លាស់ប្តូររដ្ឋាភិបាល ដោយការបោះឆ្នោតជ្រើសរើសគណបក្សកាវក្លៃ និងគណបក្សភឿថៃ រហូតទទួលបានជ័យជម្នះក្នុងលំដាប់ទី១ និងទី២ ។

ដូច្នេះ គោលដៅធំបំផុតរបស់គណបក្សកាវក្លៃ ក្នុងឋានៈជាគណបក្សទទួលបានសំឡេងឆ្នោតច្រើនលំដាប់ទី១ គឺការបង្កើតរដ្ឋាភិបាលថ្មីឱ្យសម្រេច ដើម្បីបញ្ឈប់ការបន្តអំណាចពីរដ្ឋាភិបាលចាស់ ។ ប៉ុន្តែក្នុងរយៈពេល២ខែកន្លងមក ស្ថានការណ៍គ្រប់យ៉ាងបង្ហាញយ៉ាងច្បាស់ថា គ្រប់ភាគីទាំងអស់សុទ្ធតែជាបក្ខពួកតែមួយ ។

អ្នកទាំងអស់នេះមិនព្រមឱ្យគណបក្សកាវក្លៃដឹកនាំបង្កើតរដ្ឋាភិបាលទេ ហើយពួកគេលើកយករឿងការធ្វើវិសោធនកម្មច្បាប់មាត្រា១១២ មកបាំងមុខ ហើយអះអាងពីការស្មោះស្ម័គ្រភក្តីចំពោះព្រះមហាក្សត្រថៃ មកតតាំងជាមួយសំឡេងឆ្នោតរបស់ពលរដ្ឋ ។ ក្រៅពីនេះ ពួកគេប្រើប្រាស់គណៈកម្មការរៀបចំការបោះឆ្នោត និងតុលាការធម្មនុញ្ញ ដើម្បីកាត់ផ្តាច់សិទ្ធិនយោបាយរបស់គណបក្សមានសំឡេងនាំមុខ ព្រមទាំងរំលាយគណបក្សកាវក្លៃឱ្យបាន ។

ហេតុនេះ យើងមើលឃើញថា សមាជិកព្រឹទ្ធសភាបានរំលោភលើមតិសាធារណជន ដោយពួកគេមិនបោះឆ្នោតជ្រើសរើសនាយករដ្ឋមន្ត្រី តាមសំឡេងភាគច្រើនរបស់សភាតំណាងរាស្ត្រ ដើម្បីរារាំងមិនឱ្យដាក់ឈ្មោះលោក Pita Limjaroenrat ធ្វើជានាយករដ្ឋមន្ត្រី ក្នុងការបោះឆ្នោតលើកទី២ ។ គណបក្សកាវក្លៃមិនទទួលយកការបកស្រាយនេះទេ យើងសូមទោសបងប្អូនប្រជាពលរដ្ឋទាំងអស់ផងដែរ ហើយព្រមទទួលស្គាល់ត្រង់ទៅត្រង់មកថា ពួកគេមិនព្រមឱ្យគណបក្សកាវក្លៃដឹកនាំបង្កើតរដ្ឋាភិបាលទេ ។

ទោះយ៉ាងណា មូលហេតុដែលលោក Pita Limjaroenrat មិនអាចក្លាយជានាយករដ្ឋមន្ត្រីបាន មិនមែនមានន័យថា ភារកិច្ចបង្កើតរដ្ឋាភិបាលថ្មីដើម្បីបញ្ឈប់អំណាចរបស់រដ្ឋាភិបាលចាស់ នឹងមិនជោគជ័យនោះទេ ។ គោលដៅខ្ពស់បំផុតរបស់យើងក្នុងឋានៈជាគណបក្សលំដាប់ទី១ នៅតែដូចមុន គឺការបង្កើតរដ្ឋាភិបាលថ្មីដើម្បីកាត់ផ្តាច់ការបន្តអំណាចពីរដ្ឋាភិបាលចាស់ឱ្យសម្រេច ។

ចំណុចសំខាន់ក្នុងថ្ងៃនេះ (ថ្ងៃទី២១ ខែកក្កដា) គឺមិនមែនលោក Pita Limjaroenrat បានធ្វើជានាយករដ្ឋមន្ត្រីឬក៏អត់នោះទេ ប៉ុន្តែគឺរឿងប្រទេសថៃនឹងត្រឡប់មកគោរពប្រជាធិបតេយ្យបានឬមិនបាន ហើយប្រទេសថៃអាចបញ្ឈប់ការបន្តអំណាចពីរដ្ឋាភិបាលចាស់បានឬអត់ ។ គណបក្សកាវក្លៃនឹងបើកឱកាសឱ្យគណបក្សលំដាប់ទី២ គឺគណបក្សភឿថៃ ជាអ្នកដឹកនាំបង្កើតរដ្ឋាភិបាលជាមួយគណបក្សចំនួន៨ ទៀត ដែលធ្លាប់បានធ្វើកិច្ចព្រមព្រៀង MOU ជាមួយគ្នា ។

ដូច្នេះ ក្នុងកិច្ចប្រជុំរដ្ឋសភាលើកក្រោយទៀត គណបក្សកាវក្លៃនឹងស្នើឈ្មោះបេក្ខជនមកពីគណបក្សភឿថៃធ្វើជានាយករដ្ឋមន្ត្រី ទី៣០ គឺដូចគ្នានឹងគណបក្សភឿថៃធ្លាប់គាំទ្រគណបក្សកាវក្លៃដែរ ។

ចំណែកប្រធានបទ «មានអ៊ំ (លោក ប្រាយុទ្ធ ចាន់អូចា) គឺគ្មានយើង» គឺជាគោលជំហរច្បាស់លាស់របស់គណបក្សកាវក្លៃ ។ ដូច្នេះ យើងនៅតែប្រកាន់គោលជំហរដូចដើមថា មិនចូលរួមបង្កើតរដ្ឋាភិបាលជាមួយគណបក្សផ្លាំងប្រាឆារ៉ាត់ និងបក្សរួមថៃសាងឆាតិទេ ។ បើទោះជាគ្មានលោក Prawit Wongsuwon នៅក្នុងគណៈរដ្ឋមន្ត្រី តាមពាក្យសន្យាជាមួយពលរដ្ឋក្តី យើងនឹងមិនបាត់បង់ជំនឿរឿងនេះទេ ។ ពួកយើងបានព្យាយាមយ៉ាងល្អបំផុតដើម្បីឱ្យការបង្កើតរដ្ឋាភិបាលធ្វើឡើងតាមមតិសាធារណៈ ឬជំរុញឱ្យមានការបង្កើតរដ្ឋាភិបាល និងបញ្ឈប់អំណាចរបស់រដ្ឋាភិបាលចាស់ឱ្យបាន ៕ ប្រភព ៖ sanook

ពេលវេលានៃការគេងគឺពិតជាសំខាន់ខ្លាំងណាស់សម្រាប់រាងកាយ ជាទូទៅយោងតាមការសិក្សាមនុស្សគ្រប់គ្នា គួរតែសម្រាកឱ្យបាន ៨ ម៉ោងជារៀងរាល់ថ្ងៃទើបគ្រប់គ្រាន់ក្នុងការទ្រទ្រង់សុខភាព និងធ្វើឱ្យអារម្មណ៍ស្រស់ស្រាយ។ ប៉ុន្តែទោះជាយ៉ាងណាក៏ដោយ ក៏មានមនុស្សមួយចំនួនបានអះអាងថាពួកគេបានសម្រាក ៨ ម៉ោងដែរ ហេតុអ្វីបានជាមានអារម្មណ៍មិនស្រស់ស្រាយទៅវិញ? ដូច្នេះមូលហេតុនៃការគេង ៨ ម៉ោងហើយភ្ញាក់ឡើងមិនស្រស់ស្រាយនោះគឺដោយសារ៖

១.មានភាពតានតឹង
២.ការគេងភ្ញាក់ៗ ឬគេងកន្ត្រាក់
៣.ស្រមុក
៤.រមួលជើង
៥.គិតច្រើន ឬស្រមើស្រមៃច្រើនពេក។

ដូចនេះដើម្បីជួយឱ្យអ្នកគេងលក់ស្រួល ឬគេងលក់ស្ងប់ស្ងល់ជាមុន អ្នកគួរអនុវត្តវិធីដូចខាងក្រោម៖
១.ធ្វើលំហាត់ប្រាណឱ្យបានទៀងទាត់។
២.គ្រប់គ្រងបរិស្ថានឱ្យបានត្រឹមត្រូវ ជៀសវាងសំឡេងរំខាន ឬខ្យល់ខ្លាំង។
៣.ធ្វើឱ្យចិត្តរបស់អ្នកស្ងប់មុនពេលចូលគេង និងរៀបចំកន្លែងគេងឱ្យបានស្អាត។
៤.កុំប្រើគ្រែសម្រាប់សកម្មភាពផ្សេងទៀតដូចជាការអាន ឬការបរិភោគ។
៦.ប្រសិនបើអ្នកមិនអាចគេងលើសពី ៣០ នាទី សូមក្រោកពីដំណេក ធ្វើសកម្មភាពផ្សេងទៀតរហូតដល់ងងុយគេង។
៧.ជៀសវាងគ្រឿងស្រវឹង និងកាហ្វេមុនពេលចូលគេង។
៨.ផឹកទឹកដោះគោ ចេក ឬអាហារផ្សេងទៀតដែលមានសារធាតុ tryptophan ខ្ពស់ ដើម្បីជួយឱ្យអ្នកគេងលក់ស្រួល៕ ប្រភព៖sanook

សុខភាពបេះដូង មិនទាល់តែអ្នកជំងឺទើបត្រូវយកចិត្ដទុកដាក់នោះទេ ចំពោះអ្នកមានសុខភាពធម្មតាក៏ត្រូវខ្វាយខ្វល់ និងការពារឱ្យបានល្អ ព្រោះថាជំងឺបេះដូងគឺជាជំងឺដែលគ្រោះថ្នាក់ ហើយពិបាកព្យាបាលនៅពេលដែលកើតមាន។ ដូច្នេះអ្វីដែលសំខាន់ យើងត្រូវចេះថែរក្សាសុខភាពបេះដូងបានឱ្យល្អដោយការទទួលទានអាហារមួយចំនួនដូចខាងក្រោម៖

១.ស៊ុត៖ ស៊ុតមានប្រូតេអ៊ីនច្រើន និងល្អសម្រាប់សុខភាព។ យោងតាមការសិក្សាបានឱ្យដឹងថា ការទទួលទានស៊ុតមួយគ្រាប់ក្នុងមួយថ្ងៃអាចជួយកាត់បន្ថយកម្រិតនៃជាតិខ្លាញ់មិនល្អ ជួយសម្អាតសរសៃឈាមបេះដូង និងបង្កើនកម្រិតនៃជាតិខ្លាញ់ល្អក្នុងរាងកាយ។

២.ផ្លែប៊ឺ៖ ផ្លែប៊ឺមានជាតិខ្លាញ់ច្រើន និងមានសារធាតុចិញ្ចឹមដែលល្អសម្រាប់រាងកាយ ដូចនេះការទទួលទានផ្លែប៊ឺនឹងទទួលបានថាមពលខ្ពស់ ក្នុងការកាត់បន្ថយហានិភ័យនៃជំងឺសរសៃឈាមបេះដូង។

៣.គ្រាប់ធញ្ញជាតិ៖ គ្រាប់ធញ្ញជាតិដូចជា គ្រាប់អាល់ម៉ុន សណ្តែកសៀង សណ្តែកខ្មៅ គ្រាប់ល្ងខ្មៅ គ្រាប់ល្ងស និងគ្រាប់ធញ្ញជាតិផ្សេងទៀត មានវីតាមីននិងខ្លាញ់ខ្ពស់ដែលល្អសម្រាប់រាងកាយ ដូច្នេះហើយ អ្នកគួរតែជ្រើសរើសទទួលទានគ្រាប់ធញ្ញជាតិទាំងនេះជារៀងរាល់ថ្ងៃ ដើម្បីជំនួយដល់ប្រព័ន្ធរំលាយអាហារ និងការពារបេះដូង។

៤.ត្រីសមុទ្រ៖ ត្រីសាម៉ុន ត្រីធូណាក្រហម ត្រីសាឌីន និងត្រីសមុទ្រដទៃទៀត ត្រូវបានគេកត់សម្គាល់ឃើញថាមានជាតិខ្លាញ់ធម្មជាតិដ៏ល្អសម្រាប់រាងកាយ ដែលវាជួយដល់ឈាមឱ្យរត់បានល្អ និងកាត់បន្ថយហានិភ័យនៃជំងឺបេះដូង។

៥.ប្រេងអូលីវ៖ ប្រេងអូលីវគឺល្អបំផុតក្នុងការចំអិនអាហារដែលវាមានអត្ថប្រយោជន៍ជាច្រើនដល់សុខភាព ដូចជា ការពារបេះដូង ការពារថ្លើម កាត់បន្ថយសម្ពាធឈាមឡើងខ្ពស់ និងជួយសម្រួលដល់ប្រព័ន្ធរំលាយអាហារ…ជាដើម៕ ប្រភព៖sanook