ប្រទេសថៃ ៖ លោក Chuvit Kamolwisit អតីតអ្នកនយោបាយថៃដ៏ល្បីឈ្មោះម្នាក់បានបង្ហោះសារក្នុងបណ្តាញសង្គមថា ការលេងល្បែងនយោបាយនៅប្រទេសថៃ កុំគិតថា នឹងទទួលបានសំឡេងគាំទ្រពីសមាជិកព្រឹទ្ធសភា រហូតដល់៣៧៦ពិន្ទុឱ្យសោះ ។ បច្ចុប្បន្ន ត្រូវគិតត្រឹមតែធ្វើយ៉ាងណា ឱ្យលោក Pita Limjaroenrat មេដឹកនាំគណបក្សកាវក្លៃ បានធ្វើជាបេក្ខជននាយករដ្ឋមន្ត្រីបោះឆ្នោតលើកទី២ ក៏គ្មានឱកាសផង ។

ដំណើររឿងរបស់លោក Pita Limjaroenrat គឺដូចគ្នានឹងរឿងរបស់លោក Thanathorn Juangroongruangkit ដែរ ដែលតុលាការធម្មនុញ្ញបានសម្រេចដកសមាជិកភាពចេញពីសភា ។ ការដាក់ឈ្មោះលោក Pita Limjaroenrat ធ្វើជាបេក្ខជននាយករដ្ឋមន្ត្រីក្នុងការបោះឆ្នោតលើកទី២ បែរក្លាយជាការលាគ្នានៅកណ្តាលរដ្ឋសភាទៅវិញ ហើយជំហានបន្ទាប់ទៀត គេនឹងរំលាយគណបក្សកាវក្លៃ ហើយគណបក្សនេះមិនអាចដាក់ឈ្មោះលោក Pita Limjaroenrat ធ្វើជាបេក្ខជននាយករដ្ឋមន្ត្រីទៀតទេ ។

លោក Chuvit Kamolwisit បន្តថា បើគណបក្សភឿថៃដាក់ឈ្មោះលោក Srettha Thavisin ក៏ត្រូវប្រាកដចិត្តថា អាចឆ្លងកាត់ការបោះឆ្នោតគាំទ្រពីសមាជិកព្រឹទ្ធសភាតែម្តងប៉ុណ្ណោះ ។ ដូច្នេះ វាដល់ពេលគេជំរុញឱ្យគណបក្សកាវក្លៃក្លាយជាបក្សប្រឆាំងពេញលក្ខណៈ ព្រោះបើមានឈ្មោះគណបក្សកាវក្លៃចូលរួមបង្កើតរដ្ឋាភិបាលដែរនោះ វានឹងធ្វើឱ្យគណបក្សភឿថៃមិនទទួលបានសំឡេងគាំទ្រឱ្យសមាជិកព្រឹទ្ធសភា ដើម្បីឱ្យលោក Srettha Thavisin ធ្វើជានាយករដ្ឋមន្ត្រីទេ ។ ពេលនោះ សមាជិកព្រឹទ្ធសភានឹងរកលេសមិនបោះឆ្នោតឱ្យ ហើយវាធ្វើឱ្យខូចការណ៍ទៀត ។

អតីតអ្នកនយោបាយរូបនេះបន្ថែមថា គណបក្សកាវក្លៃទទួលបានសំឡេងឆ្នោតច្រើនក្នុងលំដាប់ទី១ បើតាមគោលការណ៍លទ្ធិប្រជាធិបតេយ្យ គឺគណបក្សនេះត្រូវមានសិទ្ធិបង្កើតរដ្ឋាភិបាល ប៉ុន្តែបែរជាមិនទទួលបានអ្វីសោះ សូម្បីតែប្រធានសភា, មិនអាចធ្វើជានាយករដ្ឋមន្ត្រី និងមិនអាចបង្កើតរដ្ឋាភិបាលបានទៀត ។ កន្លងមក ខ្ញុំធ្លាប់ដាស់តឿនហើយថា គណបក្សកាវក្លៃត្រូវកាន់តំណែងជាប្រធានសភាឱ្យបាន ។ ប៉ុន្តែតំណែងប្រធានសភាបានធ្លាក់ទៅក្នុងកណ្តាប់ដៃលោក Wan Muhamad Noor Matha ហេតុនេះ លទ្ធផលបានចេញមកហើយ គឺមិនអាចដាក់ឈ្មោះលោក Pita Limjaroenrat ឱ្យគេបោះឆ្នោតធ្វើជានាយករដ្ឋមន្ត្រីលើកទី២ បានទៀតទេ ។

ចុងក្រោយ គណបក្សកាវក្លៃមិនទទួលបានអ្វីសោះពីការលេងល្បែងនយោបាយនេះ ហើយសំឡេងឆ្នោតរបស់ពលរដ្ឋបែរជានៅលំដាប់ចុងក្រោយ ។ គណបក្សកាវក្លៃបង្វិលស្ថានការណ៍នយោបាយមិនទាន់ ហើយបានធ្លាក់ចុះក្នុងទីដ៏ជ្រៅ ចំណែកកូនបាល់បានទៅលើគណបក្សភឿថៃ ហើយបើភឿថៃដើរមិនបានល្អទេ នឹងអាចបាត់បង់ឱកាសដូចគ្នា ។ ដូច្នេះ ភឿថៃត្រូវលេបទឹកមាត់ខ្លួនឯងវិញដើម្បីបង្កើតរដ្ឋាភិបាល គឺត្រូវសហការជាមួយគណបក្សផ្លាំងប្រាឆារ៉ាត, រួមថៃសាងឆាតិ និងភូមិចៃថៃ និងលែងដៃចោលគណបក្សកាវក្លៃ ៕ ប្រភព ៖ khao chao baan

នៅលើពិភពលោកមានប្រទេសតិចណាស់ដែលមានបរិស្ថានស្អាត ដោយបូករួមនឹងគោលនយោបាយល្អ សិទ្ធសេរីភាពប្រជាជន គុណភាពខ្យល់ ទឹក ធម្មជាតិ ជីវចម្រុះ អនាម័យ និងទីជម្រកប្រកបដោយនិរន្តរភាព។ យោងតាមអ្នកស្រាវជ្រាវនៅសាកលវិទ្យាល័យ Yale និងសាកលវិទ្យាល័យ Columbia បានសហការជាមួយវេទិកាសេដ្ឋកិច្ចពិភពលោក ដើម្បីវាស់ស្ទង់ការអនុវត្តបរិស្ថាន The Environmental Performance Index (EPI) និងមិត្តភាពបរិស្ថាននៃប្រទេសចំនួន ១៨០ ជុំវិញពិភពលោក ដោយរកឃើញថាមានប្រទេសចំនួន ១០ ប៉ុណ្ណោះដែលមានបរិស្ថានស្អាតជាងគេបំផុតលើពិភពលោកក្នុងឆ្នាំ ២០២៣ ។ ដូចនេះ ប្រទេសទាំង ១០ នោះមានដូចជា៖

១.ប្រទេសដាណឺម៉ាក (Denmark)៖ គឺជាប្រទេសដែលមានបរិស្ថានស្អាតជាងគេបំផុតលើពិភពលោក ជាមួយនឹងពិន្ទុ EPI សរុប ៨២.៥ និងជាប្រទេសដ៏លេចធ្លោក្នុងការគ្រប់គ្រងសំណល់បានល្អ មានគោលនយោបាយដ៏ទូលំទូលាយ និងមានប្រសិទ្ធភាពបំផុតក្នុងការកាត់បន្ថយការបំភាយឧស្ម័នផ្ទះកញ្ចក់ និងទប់ស្កាត់ការប្រែប្រួលអាកាសធាតុ។

២.ប្រទេសលុចសំបួរ (Luxembourg)៖ គឺជាប្រទេសដែលមានការវិវឌ្ឍន៍យ៉ាងខ្លាំងក្នុងការកាត់បន្ថយផលប៉ះពាល់អវិជ្ជមានលើបរិស្ថានរបស់ខ្លួន ជាមួយនឹងពិន្ទុ EPI សរុប ៨២.៣ លុចសំបួរជាប្រទេសដែលមានព្រៃឈើច្រើន និងឧទ្យានធម្មជាតិដ៏ធំទូលាយ។

៣.ប្រទេសស្វីស (Switzerland)៖ ស្វីសគឺជាប្រទេសដែលស្អាតជាងគេទី ៣ នៅលើពិភពលោកជាមួយនឹងពិន្ទុ EPI សរុប ៨១.៥ ប្រទេសស្វីសត្រូវបានគេស្គាល់ថាមានទឹកស្អាត និងសត្វព្រៃដ៏សម្បូរបែប។

៤.ប្រទេសអង់គ្លេស (United Kingdom)៖ ចក្រភពអង់គ្លេសជាប្រទេសស្អាតបំផុតទីបួនក្នុងពិភពលោកដែលទទួលបានពិន្ទុ EPI ៨១.៣ ចក្រភពអង់គ្លេសមានពិន្ទុល្អឥតខ្ចោះសម្រាប់ទឹកផឹក អនាម័យ និងមិនមានការបំភាយ ឬការបំពុលឡើយ។

៥.ប្រទេសបារាំង (France)៖ ប្រទេសបារាំងមានពិន្ទុ EPI ៨០ ដែលធ្វើឱ្យវាក្លាយជាប្រទេសស្អាតបំផុតទី ៥ នៅលើពិភពលោក។ ប្រទេសបារាំងមានគោលនយោបាយដ៏ល្អឥតខ្ចោះក្នុងការផ្តួចផ្តើមផ្នែកបរិស្ថានរួមមានទួរប៊ីនអ៊ីដ្រូនៅតាមដងទន្លេរបស់ខ្លួន និងហាមឃាត់ផ្សារទំនើបមិនឱ្យបោះចោលអាហារល្អៗដែលមិនប្រើ។

៦.ប្រទេសអូទ្រីស (Austria)៖ ជាមួយនឹងពិន្ទុ EPI ៧៩.៦ អូទ្រីសគឺជាប្រទេសដែលស្អាតជាងគេទីប្រាំមួយនៅក្នុងពិភពលោក។ ប្រទេសអូទ្រីសជាប់ចំណាត់ថ្នាក់ទីបី សម្រាប់វិស័យកសិកម្ម និងទីប្រាំសម្រាប់ភាពរឹងមាំនៃប្រព័ន្ធអេកូ

៧.ប្រទេសហ្វាំងឡង់ (Finland)៖ គឺជាប្រទេសស្អាតបំផុតទី ៧ នៅលើពិភពលោក ជាមួយនឹងពិន្ទុ បរិស្ថាន (៩៩.៣) និងគុណភាពខ្យល់ (៩៨.៨) ប្រទេសហ្វាំងឡង់ត្រូវបានគេស្គាល់ថា ជាប្រទេសដែលមានអនាម័យល្អ និងមានព្រៃឈើដ៏ស្រស់ស្អាតផងដែរ។

៨.ប្រទេសស៊ុយអ៊ែត (Sweden)៖ ពិន្ទុ EPI របស់ស៊ុយអែតគឺ ៧៨.៧ ដោយប្រទេសនេះផ្តោតលើនិរន្តរភាពធម្មជាតិ និងបានបង្កើនភាពបៃតងនៅទូទាំងប្រទេស និងមានការអភិរក្សព្រៃឈើរាប់ពាន់ហិចតាផងដែរ។

៩.ប្រទេសន័រវេស (Norway)៖ ន័រវេសគឺជាប្រទេសដែលមានបរិស្ថានស្អាតជាងគេបំផុត ទី ៩ នៅលើពិភពលោក ជាមួយពិន្ទុ EPI ៧៧.៧ ន័រវេសត្រូវបានគេស្គាល់ថាជាប្រទេសដែលមានបរិយាកាសធម្មជាតិបរិសុទ្ធ និងជាប្រទេសសំបូរព្រៃឈើផងដែរ។

១០.ប្រទេសអាល្លឺម៉ង់ (Germany)៖ ប្រទេសអាឡឺម៉ង់គឺជាប្រទេសដែលស្អាតជាងគេទី ១០ ហើយក៏ជាប្រទេសដែលជឿនលឿនខាងបច្ចេកវិទ្យាបំផុតនៅក្នុងពិភពលោកផងដែរ។ សម្រាប់ EPI វិញគឺ ៧៧.២ ជាមួយនឹងពិន្ទុដ៏ល្អឥតខ្ចោះសម្រាប់អនាម័យ សុវត្ថិភាព ជីវចម្រុះ និងជម្រក៕

ក្នុងករណីដែលអ្នកមិនអាចប្រើប្រាស់អ៊ីនធឺណែតបានដូចជា 3G 4G 5G អ្នកអាចងាកមកចាប់យក Wifi វិញដោយមិនប្រើលេខសម្ងាត់បានយ៉ាងងាយ នឹងមិនសូវមានអ្នកដឹងពីរបៀបនេះទេ។
ការប្រើប្រាស់ Wifi មិនត្រឹមតែធ្វើឱ្យល្បឿនភ្ជាប់អ៊ីនធឺណែតលឿនជាងមុនប៉ុណ្ណោះទេ ថែមទាំងជួយសន្សំសំចៃថវិការបស់យើងផងដែរ ដោយមិនចាំបាច់ចំណាយលុយនោះឡើយ។ ដូច្នេះហើយដើម្បីភ្ជាប់ Wifi ឥតគិតថ្លៃ អ្នកត្រូវអនុវត្តដូចខាងក្រោម៖

របៀបទទួលបាន Wifi ដោយមិនប្រើលេខសម្ងាត់៖
ជំហានទី ១: ទាញយកកម្មវិធី Wifi Master ទៅកាន់ឧបករណ៍របស់អ្នក។ Wifi Master គឺជាកម្មវិធីដែលនឹងជួយអ្នកចូលប្រើ Wifi ឥតគិតថ្លៃនៅលើទូរស័ព្ទ Android និង iPhone ។
ជំហានទី ២: បន្ទាប់ពីការទាញយកបានជោគជ័យ សូមចាប់ផ្តើមកម្មវិធីនេះ ហើយអនុញ្ញាតឱ្យមានសិទ្ធិចូលប្រើមួយចំនួន បើក wifi key សកល។
ជំហានទី ៣: សម្រាប់អ្នកប្រើប្រាស់ iPhone គ្រាន់តែបើក Settings ជ្រើសរើស Wifi ។
នៅក្នុងបញ្ជី wifi ដែលបង្ហាញ សូមជ្រើសរើសភ្ជាប់ទៅ wifi ដោយប្រើពាក្យ Wifi Master Key ការតភ្ជាប់ឥតគិតថ្លៃ។សម្រាប់ឧបករណ៍ដែលប្រើប្រព័ន្ធប្រតិបត្តិការ Android សូមបើកកម្មវិធី Wifi Master ចុចប៊ូតុង Get more free Wifi ដើម្បីស្វែងរក និងភ្ជាប់ទៅ wifi ឥតគិតថ្លៃដែលបង្ហាញនៅលើកម្មវិធី។ អ្នកគួរតែជ្រើសរើសបណ្តាញ wifi ដែលមានល្បឿនលឿន សុវត្ថិភាពល្អ សញ្ញាខ្លាំងមុនពេលភ្ជាប់។

ដោះសោ wifi ជាមួយមុខងារ Find Wifi របស់ Facebook៖
ដើម្បីជួយអ្នកប្រើប្រាស់ភ្ជាប់អ៊ីនធឺណែតគ្រប់ពេលវេលា គ្រប់ទីកន្លែង Facebook បានផ្តល់មុខងារស្វែងរក Wifi ឥតគិតថ្លៃសម្រាប់អ្នកប្រើប្រាស់។
ជំហានទី ១៖ បើកកម្មវិធី Facebook បន្ទាប់មកជ្រើសរូបសញ្ញាបីនៅជ្រុងខាងលើនៃអេក្រង់។
ជំហានទី ២៖ ចុច Settings & privacy ជ្រើសរើស Find wifi អ្នកនឹងឃើញផែនទីនៃបណ្តាញ wifi ដែលនៅជិតបំផុត។
ជំហានទី ៣៖ ភ្ជាប់ និងប្រើប្រាស់បណ្តាញ wifi នៃហាង និងអាជីវកម្មជុំវិញតំបន់ដែលអ្នកមានវត្តមាន ប្រសិនបើអ្នកចង់បាន អ្នកអាចទៅហាងទាំងនេះដើម្បីទិញគ្រឿងផ្គត់ផ្គង់។

ភ្ជាប់វ៉ាយហ្វាយដោយគ្មានពាក្យសម្ងាត់ជាមួយនឹងមុខងារស្វែងរកវ៉ាយហ្វាយ៖
មិនមែនគ្រប់បណ្តាញ wifi ទាំងអស់សុទ្ធតែមានកំណត់ពាក្យសម្ងាត់ទេ ជាមួយនឹងមុខងារស្វែងរក wifi នៅលើទូរសព្ទរបស់អ្នក អ្នកនៅតែអាចស្វែងរក និងចូលប្រព័ន្ធដែលមិនត្រូវការពាក្យសម្ងាត់។
ជំហានទី ១: នៅលើទូរសព្ទរបស់អ្នក បើកការកំណត់ ជ្រើសរើស Wifi ។
ជំហានទី ២: ស្វែងរក និងភ្ជាប់ទៅបណ្តាញ wifi ដែលមិនមានកំណត់ពាក្យសម្ងាត់៕ ប្រភព៖cafef.com

រាជធានីបាងកក៖ ក្រុមអ្នកជំនាញតាក់តែងច្បាប់រដ្ឋធម្មនុញ្ញ បានរិះគន់ដល់ចំណាត់ការរបស់ស្ថាប័ននីតិប្បញ្ញត្ដិរបស់ថៃ ក្រោយពេលសមាជិកសភា និង ព្រឹទ្ធសភា ភាគច្រើន បានច្រាលចោលនូវការតែងតាំងជាថ្មីរបស់មេដឹកនាំគណបក្សឆ្ពោះទៅមុខ (Move Forward Party) ហៅកាត់ MFP សម្រាប់ការបោះឆ្នោតជ្រើសរើសនាយករដ្ឋមន្រ្ដីរបស់ប្រទេសថៃ នៅក្នុងជុំទី២។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃសុក្រ ទី២១ ខែកក្កដា ថា ស្របពេលប្រទេសថៃ កំពុងតែមានភាពមិនច្បាស់លាស់ ជុំវិញជម្លោះតែងតាំងបេក្ខភាពនាយករដ្ឋមន្រ្ដី រួចមក ក្រុមអ្នកជំនាញផ្នែកច្បាប់ បានលើកឡើង ជាសំណួរ ថាតើដំណោះស្រាយរបស់សភា ដែលបានបដិសេធនូវការតែងតាំងជាថ្មីរបស់លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ សម្រាប់ការបោះឆ្នោតជ្រើសរើសនាយករដ្ឋមន្រ្ដី នៅជុំទី២នេះ មានលក្ខណៈស្របតាមរដ្ឋធម្មនុញ្ញដែរឬអត់ ។ ក្រុមអ្នកជំនាញច្បាប់ បានអះអាង ថា បញ្ហានេះ គួរតែបញ្ជូនទៅកាន់តុលាការធម្មនុញ្ញ ជាអ្នកសម្រេច។

លោក ប័រវ៉ាន់សាក់ អ៊ូវ៉ាន់ណូ (Borwornsak Uwanno) អតីតប្រធានគណៈកម្មាធិការតាក់តែងរដ្ឋធម្មនុញ្ញថៃ កាលពីថ្ងៃព្រហស្បតិ៍ បានរិះគន់ដល់ចំណាត់ការរបស់សភា នៅតាមបណ្ដាញសង្គមហ្វេសប៊ុក ដោយលើកឡើង ថា តុលាការធម្មនុញ្ញ គួរតែលើកយកបញ្ហានេះ ទៅដោះស្រាយ។

អតីតប្រធានគណៈកម្មាធិការតាក់តែងរដ្ឋធម្មនុញ្ញថៃ រូបនេះ បានសរសេរ ថា «ការអំពាវនាវទាមទារឱ្យមានបទប្បញ្ញត្តិ នាសម័យប្រជុំសភា បានធ្វើឱ្យខូចដល់ច្បាប់រដ្ឋធម្មនុញ្ញថៃ បើទោះជាច្បាប់ធម្មនុញ្ញនេះ គ្របដណ្តប់យ៉ាងពិសេស សម្រាប់ការបោះឆ្នោតជ្រើសរើសនាយករដ្ឋមន្ត្រី យ៉ាងណាក្ដី ។ ករណីនេះ ពិតជាគួរឲ្យអាណិតខ្លាំងណាស់ សម្រាប់ប្រទេសថៃ»។

អ្នកជំនាញច្បាប់ជាន់ខ្ពស់រូបនេះ បានបញ្ជាក់ ថា គាត់ពិតជាមានការសោកស្ដាយបំផុត ព្រោះសមាជិកសភា និង ព្រឹទ្ធសភា បានបោះឆ្នោត ប្រឆាំងនឹងការតែងតាំងជាថ្មីរបស់លោក ភីថា ។ គាត់បានកត់សម្គាល់ឃើញ ថា ការបកស្រាយរបស់សភា នៅមិនទាន់ចប់នៅឡើយ។ អ្នកណាម្នាក់ ដែលបានគិត ថា សិទ្ធិរបស់ខ្លួន ត្រូវបានរងផលប៉ះពាល់ ពាក់ព័ន្ធនឹងបញ្ហានេះ អាចនឹងដាក់ញត្តិ ទៅកាន់ការិយាល័យអ្នកត្រួតពិនិត្យពាក្យបណ្ដឹង ដើម្បីកំណត់ ថាតើដំណោះស្រាយរបស់សភា កំពុងតែរំលោភលើមាត្រាទី២១៣ នៃរដ្ឋធម្មនុញ្ញ ដែរឬយ៉ាងណា។ អ្នកជំនាញច្បាប់រូបនេះ បានលើកឡើង ដោយបង្ហាញទៅលើករណីរបស់លោក ភីថា ។

លោក ប័រវ៉ាន់សាក់ អ៊ូវ៉ាន់ណូ អ្នកជំនាញច្បាប់ជាន់ខ្ពស់ បានសង្កត់ធ្ងន់ ថា ញត្តិនឹងអាចដាក់ទៅការិយាល័យអ្នកត្រួតពិនិត្ដពាក្យបណ្ដឹង ដែលនឹងដាក់ញត្តិនោះ បញ្ជូនទៅកាន់តុលាការធម្មនុញ្ញ។ អ្នករងគ្រោះ ក៏អាចដាក់ញត្តិ ដោយផ្ទាល់ ទៅកាន់តុលាការធម្មនុញ្ញ ផងដែរ ប្រសិនបើអ្នកត្រួតពិនិត្យពាក្យបណ្ដឹង មិនយល់ព្រម។ ខ្ញុំនឹងរង់ចាំមើល ថាតើចំណាត់ការរបស់សភា បានរំលោភរដ្ឋធម្មនុញ្ញដែរឬអត់។ ខ្ញុំក៏នឹងចាំមើលបន្ដទៀត ថាតើតុលាការធម្មនុញ្ញ នឹងសម្រេចយ៉ាងណា ចំពោះរឿងនេះ។

ការធ្វើអត្ថាធិប្បាយរបស់អ្នកជំនាញច្បាប់រូបនេះ បានកើតឡើង ស្របពេលសមាជិកសភា និង ព្រឹទ្ធសភា ភាគច្រើន កាលពីថ្ងៃពុធ ទី១៩ ខែកក្កដា ឆ្នាំ២០២៣ បានបោះឆ្នោត ច្រានចោលនូវការតែងតាំងជាថ្មីរបស់លោក ភីថា សម្រាប់ការជ្រើសរើសនាយករដ្ឋមន្រ្ដី ក្រោមហេតុផល ថា បទប្បញ្ញត្តិ នៃកិច្ចប្រជុំសភា មាត្រា៤១ បានហាមឃាត់នូវការតែងតាំងឡើងវិញនូវសំណើដែលបានរងបរាជ័យ នៅក្នុងសម័យប្រជុំសភាដដែល លុះត្រាតែមានកាលៈទេសៈថ្មី ត្រូវដាក់បញ្ចូល។ ពួកគេបានលើកឡើង ថា សំណើតែងតាំង នៅមុននេះ ទាក់ទងនឹងការតែងតាំងលោក ភីថា ហើយត្រូវបានសភា មិនបោះឆ្នោតគាំទ្ររួចម្ដងមកហើយ កាលពីថ្ងៃទី១៣ ខែកក្កដា ក្រោយពេលគាត់ មិនបានទទួលសំឡេង ភាគច្រើន យ៉ាងតិចចំនួន៣៧៥សំឡេង មកពីក្នុងចំណោមសមាជិកសភាទាំង២ តាមច្បាប់កំណត់ នៅក្នុងការបោះឆ្នោតជុំទី១។

លោក ជេដេ ដូណាវ៉ានិក (Jade Donavanik) អ្នកប្រាជ្ញច្បាប់ និង ជាអតីតទីប្រឹក្សា នៃក្រុមប្រឹក្សាធម្មនុញ្ញមួយរូប បានលើកឡើង ថា គាត់ជឿថា «ការតែងតាំងរបស់លោក ភីថា កាលពីថ្ងៃទី ១៣ ខែកក្កដា មិនមែនជាសំណើផ្លូវការនោះដែរ ដូច្នេះបទប្បញ្ញត្តិនេះ មិនគួរត្រូវលើកយកមកអនុវត្តនោះឡើយ។ ការតែងតាំងបេក្ខជននាយករដ្ឋមន្រ្ដី មិនមែនជាសំណើផ្លូវការនោះទេ។ ប៉ុន្ដែការជជែកដេញដោលគ្នា នៅក្នុងសភា ក្រៅពីចំណុចនេះ»។

លោក ខុមសាន ភូខុង (Khomsan Phokhong) សាស្រ្ដាចារ្យផ្នែកច្បាប់ នៃសាកលវិទ្យាល័យសុខោទ័យធម្មាធិរ៉ាត (Sukhothai Thammathirat Open University) បានចង្អុលបង្ហាញ ថា បទប្បញ្ញត្ដិមាត្រា៤១ អាចត្រូវលើកលែងបាន លុះត្រាតែមានករណីថ្មី ត្រូវបានណែនាំ។ ជាឧទាហរណ៍ លោក ភីថា អាចត្រូវតែងតាំង សម្រាប់តំណែងនាយករដ្ឋមន្ត្រី នៅជុំបន្ទាប់ សម្រាប់ការបោះឆ្នោត កាលពីថ្ងៃព្រហស្បតិ៍ ប្រសិនបើមានបេក្ខជនផ្សេងទៀត ត្រូវបានតែងតាំងជាមួយគាត់ ផងដែរ។

លោកសាស្រ្ដាចារ្យផ្នែកច្បាប់ ខុមសាន ភូខុង បានបន្ថែម ថា «ករណីនេះ មានន័យ ថា កាលៈទេសៈផ្សេងគ្នា ហើយប្រធានសភា អាចសម្រេច អនុញ្ញាតដល់ការតែងតាំងជាថ្មីសម្រាប់លោក ភីថា»។

ជាការឆ្លើយតបទៅនឹងលោក ប័រវ៉ាន់សាក់ អ៊ូវ៉ាន់ណូ នោះ លោក សេន ស៊េរីស៊ូវ៉ាន់ផែនណន (Sen Seree Suwanpanont) អតីតអ្នកតាក់តែងច្បាប់រដ្ឋធម្មនុញ្ញ បានបញ្ជាក់ ថា សមាជិកសភា និង ព្រឹទ្ធសមាជិក រាប់រយនាក់ បានយល់ស្រប ថា ការតែងតាំងលោក ភីថា មិនត្រូវបានអនុញ្ញាត ក្រោមបទប្បញ្ញត្តិ នៃកិច្ចប្រជុំសភា។ ដូច្នេះសមាជិកសភាទាំងនោះ បានបោះឆ្នោត ប្រឆាំងនឹងការព្យាយាមជាលើកទី២របស់លោក ភីថា សម្រាប់ការបោះឆ្នោតជ្រើសរើសនាយករដ្ឋមន្រ្ដី នៅក្នុងជុំទី២។

អតីតអ្នកតាក់តែងច្បាប់រដ្ឋធម្មនុញ្ញ រូបនេះ បានសង្កត់ធ្ងន់ ថា «គណបក្សឆ្ពោះទៅមុខ អាចតែងតាំងជាថ្មីសម្រាប់លោក ភីថា នៅក្នុងការបោះឆ្នោតជុំទី២ ប្រសិនបើគណបក្សនេះចង់ធ្វើ ប៉ុន្តែយើងនឹងឈរលើគោលការណ៍ដូចគ្នា។ គណបក្សនេះ មានសិទ្ធិដាក់ញត្តិ ទៅកាន់ការិយាល័យអ្នកត្រួតពិនិត្យ ឬ តុលាការធម្មនុញ្ញ។

ស្របគ្នានេះ លោក ឆៃថាវ៉ាត ទូឡាថុន (Chaithawat Tulathon) អគ្គលេខាធិការគណបក្សឆ្ពោះទៅមុខ បានអះអាង កាលពីថ្ងៃព្រហស្បតិ៍ ថា គាត់បានជួបពិភាក្សា ជាមួយនឹងឥស្សរជនសំខាន់ៗរបស់គណបក្សភឿថៃ ដើម្បីចរចាគ្នា អំពីវិធីសាស្រ្ដ ត្រូវដំណើរការជាមួយនឹងការបង្កើតរដ្ឋាភិបាលថ្មី។

លោក ឆៃថាវ៉ាត ទូឡាថុន បានបញ្ជាក់ ថា «យើងកំពុងតែព្យាយាម ធ្វើឲ្យប្រាកដ ថា រដ្ឋាភិបាលមួយ មានដៃគូសម្ពន្ធភាពចំនួន៨គណបក្ស ត្រូវបង្កើតឡើង ប្រកបដោយជោគជ័យ»។

ក្រោយពេលមានការសួរថា តើ គណបក្សឆ្ពោះទៅមុខ នឹងធ្វើអ្វីប្រសិនបើគណបក្សភឿថៃ តែងតាំងបេក្ខភាពនាយករដ្ឋមន្រ្ដីរបស់ខ្លួន គឺលោក ស្រេតថា ថាវីស៊ីន (Srettha Thavisin) សម្រាប់ការបោះឆ្នោតជ្រើសរើសនាយករដ្ឋមន្ត្រី នៅជុំទី២នោះ? ប៉ុន្ដែលោកអគ្គលេខាធិការគណបក្ស MFP បានលើកឡើង ថា បញ្ហានេះ នឹងត្រូវពិភាក្សាគ្នា នៅក្នុងកិច្ចប្រជុំសមាជិកសភារបស់បក្ស និង ក្រុមនាយកប្រតិបត្តិ នៃគណបក្សឆ្ពោះទៅមុខ។

ពាក់ព័ន្ធនឹងការសាកសួរ អំពីការលើកឡើងរបស់លោក Srettha ដោយអះអាង ថា គណបក្សភឿថៃ នឹងប្រឆាំង ចំពោះការធ្វើវិសោធនកម្មលើមាត្រា១១២ នៃក្រមព្រហ្មទណ្ឌ នោះ លោក ឆៃថាវ៉ាតបានត្រឹមតែនិយាយ ថា ករណីនេះ នៅមិនទាន់ពិភាក្សា ជាមួយនឹងភឿថៃ នៅឡើយ។

លោកបានបន្តថា៖ «សម្ពន្ធមិត្តចម្រុះទាំង៨គណបក្ស នឹងជួបពិភាក្សាគ្នា នៅក្នុងរយៈពេលប៉ុន្មានថ្ងៃខាងមុខនេះ ហើយអ្វីៗនឹងបង្ហាញយ៉ាងច្បាស់ នៅពេលនោះ»។
លោក ខុមសាន ភូខុង សាស្រ្ដាចារ្យច្បាប់ បានបន្ដ ថា នេះមានន័យ ថា ស្ថានការណ៍ នឹងខុសគ្នា ហើយប្រធានសភា អាចសម្រេច អនុញ្ញាតឲ្យតែងតាំងលោក ភីតា ជាថ្មី៕

វាជារឿងដែលមនុស្សភាគច្រើនធ្លាប់សង្ស័យសម្រាប់ដបភេសជ្ជៈពិបាកបើកគំរប ប៉ុន្តែមិនដឹងថា នឹងទៅរកចម្លើយនៅទីណា ។ ហេតុអ្វីគេមិនផលិតគំរបរបស់វាឱ្យងាយស្រួលបើកផឹក និងមិនចាំបាច់ប្រើប្រាស់ឧបករណ៍ជំនួយ ។

ជាទូទៅ ដបសម្រាប់ដាក់ភេសជ្ជៈផ្សេងៗមានគំរបបិទជិតឈឹង និងមិនអាចបើកវាដោយដៃទទេបានទេ គឺដើម្បីឱ្យប្រាកដចិត្តថា ភេសជ្ជៈនៅក្នុងដបនេះនៅថ្មីៗជានិច្ច និងគ្មានលាយឡំជាមួយមេរោគ ។ ហេតុនេះ ការបិទគំរបជិតនឹងជួយការពារមិនឱ្យខ្យល់ និងមេរោគផ្សេងៗចូលទៅក្នុងដប ។ នេះជាបញ្ហាសំខាន់យ៉ាងខ្លាំងសម្រាប់ភេសជ្ជៈដូចជា កូកាកូឡា ប៉ិបស៊ី ស្រាបៀរ និង Wine ជាដើម ។ វានឹងបាត់បង់រសជាតិដើម និងកាបូនឌីអុកស៊ីត បើវាប៉ះគ្នាជាមួយខ្យល់ខាងក្រៅ ។ ក្រៅពីនេះ ការបិទគំរបជិត ក៏ជួយការពារការលិចធ្លាយផងដែរ ដោយសារគំរបនេះមានតួនាទីការពារកុំឱ្យភេសជ្ជៈខូចគុណភាព និងរក្សាភាពស្អាត ។

គំរបដបភេសជ្ជៈបានផលិតឡើងពីសន្លឹកដែក ដែលផ្នែកខាងក្នុងមានទ្រនាប់ការពារកុំឱ្យជ្រាបទឹក ។ នៅពេលបានបិទគំរបវាជិត គេនឹងអាចរក្សានូវគុណភាពភេសជ្ជៈ ឬផលិតផលនៅក្នុងដបបានល្អ ។ គំរបប្រភេទនេះត្រូវបានផលិតដំបូងកាលពីឆ្នាំ១៨៩១ នៅសហរដ្ឋអាមេរិក ហើយគេចាត់ទុកថា វាមានប្រវត្តិយូរយាបំផុត និងមានតម្លៃថោក ។ ក្រៅពីនេះ គេបានប្រើប្រាស់ឧបករណ៍បិទគំរបដបភេសជ្ជៈបានឆាប់រហ័ស និងអាចបិទគំរបរហូតដល់១សែនដបក្នុង១ម៉ោង ៕ ប្រភព ៖ sanook

ប្រទេសឡាវ ៖ ក្រុមហ៊ុនរបស់ចិនឈ្មោះ China Southern Power Grid (CSG) កំពុងតែសម្លឹងមើលឱកាសប្រកបអាជីវកម្មបបន្ថែមទៀតនៅប្រទេសឡាវ ក្រោយពីក្រុមហ៊ុននេះបានវិនិយោគលើផ្នែកថាមពល និងទទួលបានប្រាក់ចំណេញជាបន្តបន្ទាប់ រហូតក្លាយជាដៃគូពាណិជ្ជកម្មនៅប្រទេសនេះ ។

សារព័ត៌មាន Vientiane Times ចុះផ្សាយថា លោក Li Xinhao នាយកគ្រប់គ្រងទូទៅផ្នែកសហការអន្តរជាតិរបស់ក្រុមហ៊ុន CSG បានលើកឡើងនៅខែកក្កដា ឆ្នាំ២០២៣ ថា ប្រទេសដៃគូពាណិជ្ជកម្មក្នុងតំបន់អាស៊ានបានជួយគ្នាទៅវិញទៅមក ដើម្បីធ្វើឱ្យការផ្គត់ផ្គង់ថាមពលអគ្គិសនីមានតុល្យភាព ។ ប្រទេសចិនបាននាំចេញថាមពលទៅកាន់តំបន់អាស៊ានក្នុងរដូវក្តៅ និងនាំចូលថាមពលក្នុងរដូវវស្សា នៅពេលសមត្ថភាពផលិតអគ្គិសនីកើនឡើងនៅប្រទេសទាំងនេះ ។

ហេតុនេះ ក្រុមហ៊ុន CSG បានដាក់ផែនការបង្កើតខ្សែបញ្ជូនបន្ថែមនៅប្រទេសឡាវ និងជួយពង្រីកខ្សែបញ្ជូនផ្សេងៗទៅកាន់ប្រទេសជិតខាងរបស់ឡាវ ដើម្បីបង្កើនទំនាក់ទំនងរវាងប្រទេសក្នុងតំបន់ទន្លេមេគង្គ និងតំបន់ Lan Xang នាថ្ងៃអនាគត ។ ប្រទេសឡាវមានសមត្ថភាពគ្រប់គ្រាន់ដើម្បីផលិតថាមពលវារីអគ្គិសនីចែកចាយទៅកាន់ប្រទេសជិតខាង ដោយសារនៅតំបន់អាស៊ានមានទន្លេឆ្លងកាត់ ទើបក្រុមហ៊ុន CSG សម្លឹងឃើញថា វាជាឱកាសល្អសម្រាប់ក្រុមហ៊ុនពង្រីកការវិនិយោគថាមពលបន្ថែមទៀត ។

ទោះយ៉ាងណា ការធ្វើពាណិជ្ជកម្មថាមពលអគ្គិសនីរវាងប្រទេសឡាវ និងចិន នាពេលនេះចាត់ទុកថា មានចំនួនតិចនៅឡើយ ដោយសារមានការដំឡើងខ្សែបញ្ជូនអគ្គិសនីតភ្ជាប់គ្នាត្រឹមតែ១១៥គីឡូវ៉ុលប៉ុណ្ណោះ ។ គេនឹងបង្កើតបណ្តាញបញ្ជូនថាមពលទំហំ៥០០គីឡូវ៉ុល នាប៉ុន្មានឆ្នាំខាងមុខ ដើម្បីធ្វើពាណិជ្ជកម្មថាមពលរវាងប្រទេសទាំងពីរបន្ថែមទៀត ។ ចំណែករថភ្លើងតភ្ជាប់ប្រទេសឡាវ និងចិន បានដំណើរការដោយក្រុមហ៊ុន CSG សហការជាមួយសហគ្រាសរដ្ឋឡាវ EDL ហើយវាបានជួយប្រទេសឡាវធ្វើបង្គោលអគ្គិសនីនៅតាមបណ្តោយផ្លូវរថភ្លើងផងដែរ ៕ ប្រភព ៖ AEC connect