ប្រទេសថៃ ៖ កាលពីថ្ងៃទី២ ខែសីហា ឆ្នាំ២០២៣ លោក Chaitawat Tulathon អគ្គលេខាធិការគណបក្សកាវក្លៃបានចេញសេចក្តីថ្លែងការណ៍មួយ ក្រោយពីគណបក្សភឿថៃប្រកាសបង្កើតរដ្ឋាភិបាលដោយគ្មានគណបក្សកាវក្លៃចូលរួមថា គណបក្សកាវក្លៃសូមទោសពលរដ្ឋថៃ ដែលគណបក្សនេះមិនអាចជំរុញឱ្យមានការបង្កើតរដ្ឋាភិបាលដោយជោគជ័យ និងគោរពតាមឆន្ទៈរបស់ពលរដ្ឋក្នុងពេលបោះឆ្នោត ។

លោក Chaitawat Tulathon បន្តថា គណបក្សភឿថៃបានប្រកាសថា នឹងបំបែកចេញពីគណបក្សកាវក្លៃដើម្បីបង្កើតរដ្ឋាភិបាលដោយខ្លួនឯង ។ ហេតុនេះ ក្នុងការជជែកគ្នារវាងមន្ត្រីតំណាងរវាងគណបក្សកាវក្លៃ និងគណបក្សភឿថៃ កាលពីព្រឹកថ្ងៃទី២ ខែសីហា កន្លងមក គណបក្សភឿថៃបានប្រាប់គណបក្សកាវក្លៃថា ត្រូវការដកខ្លួនចេញពី MOU ដែលយើងបានធ្វើវារួមគ្នាចំនួន២ច្បាប់ គឺ MOU របស់គណបក្សចម្រុះចំនួន៨ និង MOU រវាងគណបក្សភឿថៃ និងគណបក្សកាវក្លៃ ។

ក្នុងអំឡុងពេលជជែកគ្នាជាមួយគណបក្សភឿថៃ គណបក្សនេះមិនបានស្នើឱ្យគណបក្សកាវក្លៃពិចារណាដកថយរឿងការធ្វើវិសោធនកម្មច្បាប់មាត្រា១១២ ទេ ហើយរយៈពេលកន្លងមក ក៏មិនធ្លាប់បានចរចាគ្នាអំពីរឿងនេះសោះ ។ គណបក្សភឿថៃលើកហេតុផលថា គណបក្សនយោបាយស្ទើរទាំងអស់ដែលគណបក្សភឿថៃបានជជែកជាមួយនោះ ពួកគេមិនត្រូវការឱ្យគណបក្សកាវក្លៃចូលរួមបង្កើតរដ្ឋាភិបាលទេ មិនថាមានការធ្វើវិសោធនកម្មច្បាប់មាត្រា១១២ ឬក៏អត់ ។

គណបក្សភឿថៃមិនបានសុំឱ្យគណបក្សកាវក្លៃបោះឆ្នោតគាំទ្របេក្ខជននាយករដ្ឋមន្ត្រីរបស់គណបក្សភឿថៃ នៅថ្ងៃទី៤ ខែសីហា ទេ ព្រោះវាជាសិទ្ធិរបស់គណបក្សនីមួយៗ ។ ចំណែកការជជែកគ្នាកាលពីព្រឹកថ្ងៃទី២ ខែសីហា មេដឹកនាំគណបក្សភឿថៃមួយចំនួនបានសម្តែងក្តីបារម្ភថា ប្រសិនបើគណបក្សកាវក្លៃនឹងបោះឆ្នោតឱ្យបេក្ខជននាយករដ្ឋមន្ត្រីមកពីគណបក្សភឿថៃ គឺអាចធ្វើឱ្យសមាជិកព្រឹទ្ធសភាគ្មានទំនុកចិត្តមកលើគណបក្សភឿថៃ ព្រោះបារម្ភថា ប្រសិនបើគណបក្សកាវក្លៃបោះឆ្នោតគាំទ្រគណបក្សភឿថៃ ក្រោយពីបានជ្រើសរើសនាយករដ្ឋមន្ត្រីរួចរាល់ហើយ គណបក្សភឿថៃនឹងទាញយកគណបក្សកាវក្លៃមកចូលរួមបង្កើតរដ្ឋាភិបាលទៀត ។

ចុងក្រោយ គណបក្សកាវក្លៃសូមជម្រាបពលរដ្ឋថា មិនថាស្ថិតក្នុងឋានៈអ្វីចាប់ពីពេលនេះតទៅ គណបក្សកាវក្លៃនឹងធ្វើការក្នុងឋានៈជាអ្នកតំណាងឱ្យពលរដ្ឋយ៉ាងពេញទំហឹងបំផុត តាមអ្វីដែលយើងទទួលបានទំនុកចិត្តពីពលរដ្ឋដោយសារការបោះឆ្នោត ដើម្បីជំរុញគុណភាពជីវិតល្អប្រសើររបស់ពលរដ្ឋគ្រប់រូប ។ គណបក្សយើងនឹងជំរុញឱ្យកើតប្រព័ន្ធសេដ្ឋកិច្ចរបស់ប្រទេសថៃដើរទាន់ប្រទេសនានាលើពិភពលោក និងបើកឱកាសឱ្យពលរដ្ឋគ្រប់រូបបានរីកចម្រើនយ៉ាងស្មើភាពគ្នា ៕ ប្រភព ៖ Mono News

ថ្មីៗនេះមហាជនអ្នកប្រើប្រាស់បណ្តាញសង្គមកំពុងកើតក្តីខឹងសម្បារយ៉ាងខ្លាំងទៅលើតារាកំប្លែង និងជា YouTuber ជនជាតិម៉ាឡេស៊ីមានឈ្មោះថា Nigel Ng ឬត្រូវបានគេស្គាល់ថា Uncle Roger បានបណ្តុះបង្អាប់និងប្រើពាក្យមិនសមរម្យយ៉ាងខ្លាំងមកលើម្ហូបរបស់កម្ពុជា និងឡាវថា គ្រាន់តែជាម្ហូបកាកសំណល់ពីថៃប៉ុណ្ណោះ។

តារាកំប្លែង និងជា YouTuber ជនជាតិម៉ាឡេស៊ីមានឈ្មោះ Nigel Ng ហៅ Uncle Roger ហើយត្រូវបានគេស្គាល់ថាជាបុគ្គលល្បីឈ្មោះមួយរូបនៅលើឆាណែលយូធូបរបស់លោកមានអ្នកចុច Subscriber រហូតជាង៨លាន លើហ្វេកប៊ុកមានជាង៣លាននាក់ និងនៅលើទិកតុកមានរហូតដល់ជាង១០លាននាក់។ បច្ចុប្បន្នបុរសម្នាក់នេះមានវ័យ៣២ឆ្នាំ និងមានប្រវត្តិបញ្ចប់ការសិក្សានៅក្នុង២០១៤ ជំនាញវិស្វកម្ម និងជំនាញផ្នែកទស្សនវិជ្ជានៅសាកលវិទ្យាល័យ Northwestern សហរដ្ឋអាម៉េរិក។

អ្វីកាន់តែក្តៅងំក្នុងចិត្តប្រជាពលរដ្ឋខ្មែរ និងបានខឹងសម្បារទៅលើ YouTuber រូបនេះនោះគឺ Uncle Roger បានបង្ហោះវីដេអូមួយនៅលើឆាណែលយូធូបរបស់គេកាលពីថ្ងៃទី៣០ ខែកក្កដា ដើម្បីអបអរការទទួលបានចំនួន 8M SUBSCRIBER ប៉ុន្តែបែរជាបុរសម្នាក់នេះបានប្រើពាក្យមិនសមរម្យទាល់តែសោះមកលើម្ហូបខ្មែរ ដោយរូបគេបាននិយាយថា ម្ហូបខ្មែរនិងឡាវមិនឆ្ងាញ់ទេគ្រាន់ជាម្ហូបកាកសំណល់ពីថៃប៉ុណ្ណោះ។

បន្ទាប់ពីបុគ្គលខាងលើនេះប្រើពាក្យមិនសមរម្យ មើលស្រាលម្ហូបខ្មែរដូចនេះហើយអ្នកលេងបណ្តាញសង្គមកម្ពុជាមិនត្រឹមតែផ្ទុះកំហឹងកើតក្តីខឹងសម្បារនោះទេតែក៏ទាមទារឱ្យ Uncle Roger សូមទោសប្រជាជនខ្មែរផងដែរចំពោះពាក្យសម្តីរបស់គេ។

គួរបញ្ជាក់ផងដែរថា កាលពីថ្ងៃខែឧសភា កន្លងទៅនេះ Uncle Roger ក៏ត្រូវបានគេបិទមិនឱ្យប្រើគណនីបណ្តាញសង្គមចិន Weibo ផងដែរបន្ទាប់ពីលោកបាននិយាយលេងសើច ចំអកឱ្យរដ្ឋាភិបាលចិន ហើយលោកក៏ប្រឈមនឹងរដ្ឋាភិបាលចិនតាមចាប់ខ្លួនផងដែរ៕

អាស៊ីអាគ្នេយ៍គឺជាតំបន់មួយដែលមានបេតិកភណ្ឌវប្បធម៌ដ៏សម្បូរបែប និងឆ្លុះបញ្ចាំងពីប្រវត្តិសាស្រ្តនៃប្រាសាទបុរាណជាច្រើនកន្លែង បូករួមទាំងទេសភាព សាសនា និមិត្តរូបនៃវប្បធម៌ និងស្ថាបត្យកម្មក្នុងតំបន់ផងដែរ។ ដូច្នេះហើយខាងក្រោមនេះគឺជាប្រាសាទបុរាណទាំង ៥ ដែលធំជាងគេនិងចំណាស់បំផុតនៅអាស៊ីអាគ្នេយ៍៖

១.ប្រាសាទបូរ៉ូប៊ូឌួ(Borobudur)៖ ប្រាសាទពុទ្ធសាសនានេះស្ថិតនៅក្នុងប្រទេសឥណ្ឌូណេស៊ី ដែលត្រូវបានគេចាត់ទុកថាធំជាងគេនិងចំណាស់បំផុតនៅអាស៊ីអាគ្នេយ៍។ ប្រាសាទបូរ៉ូប៊ូឌួត្រូវបានសាងសង់ក្នុងសតវត្សទី ៩ នៃគ.ស និងជាតំបន់បេតិកភណ្ឌពិភពលោករបស់អង្គការយូណេស្កូ។

២.ប្រាសាទអង្គរវត្ត(Angkor Wat)៖ ប្រាសាទដ៏ល្បីល្បាញបំផុតមួយនៅលើពិភពលោកនេះ ស្ថិតនៅក្នុងប្រទេសកម្ពុជា ហើយត្រូវបានសាងសង់ឡើងក្នុងសតវត្សទី ១២។ ប្រាសាទអង្គរវត្តត្រូវបានគេចាត់ទុកថា ជាសមិទ្ធិផលស្ថាបត្យកម្មដ៏អស្ចារ្យបំផុតមួយនៃអរិយធម៌ខ្មែរ ហើយល្បីល្បាញខាងចម្លាក់ដ៏ប្រណិត និងប៉មដ៏ប្រណិត។

៣.ប្រាសាទឆៃវឌ្ឍនារាម(Chaiwatthanaram)៖ ប្រាសាទពុទ្ធសាសនារបស់ប្រទេសថៃ ត្រូវបានសាងសង់ឡើងក្នុងសតវត្សទី ១៧ នឹងត្រូវបានចាត់ទុកថាជាប្រាសាទដ៏ស្រស់ស្អាតបំផុតមួយនៅក្នុងតំបន់អាស៊ីអាគ្នេយ៍។

៤.ប្រាសាទបាកាន(Bagan)៖ ប្រាសាទដែលមានវត្តអារាមរាប់ពាន់នេះ ស្ថិតនៅក្នុងប្រទេសមីយ៉ាន់ម៉ា ហើយត្រូវបានសាងសង់ឡើងក្នុងសតវត្សទី ១១ និងទី ១២។ ប្រាសាទបាកានធ្លាប់ជារាជធានីនៃអាណាចក្រភូមាទីមួយ ហើយត្រូវបានគេចាត់ទុកថាជាកន្លែងបុរាណវត្ថុដ៏អស្ចារ្យបំផុតមួយនៅអាស៊ីអាគ្នេយ៍។

៥.ប្រាសាទហ៊ូ(Huế)៖ ប្រាសាទហ៊ូស្ថិតនៅក្នុងប្រទេសវៀតណាម គឺជាអតីតរាជធានីរបស់ចក្រភពវៀតណាម ហើយក៏ជាជម្រកនៃអគារ និងសំណង់បុរាណជាច្រើនផងដែរ។ ប្រាសាទហ៊ូត្រូវបានសាងសង់នៅដើមសតវត្សទី ១៩ និងជាបេតិកភណ្ឌវប្បធម៌ដ៏សម្បូរបែបបំផុតមួយនៅក្នុងតំបន់អាស៊ីអាគ្នេយ៍៕

ប្រទេសថៃ ៖ កាលពីថ្ងៃទី១ ខែសីហា ឆ្នាំ២០២៣ ភ្ញៀវទេសចរជាច្រើននាក់បានមកលេងទឹកជ្រោះ Tham Phra នៅស្រុកសេកា ខេត្តបឹងកាន ប្រទេសថៃ យ៉ាងសប្បាយរីករាយជាមួយបរិយាកាសមានភ្លៀងធ្លាក់ ។ ក្រោយមក ភ្លៀងក៏ចាប់ផ្តើមធ្លាក់ខ្លាំងឡើងៗ រហូតដល់អាជ្ញាធរដែនជម្រកសត្វព្រៃ បានចេញមកប្រកាសដាស់តឿនទៅកាន់ភ្ញៀវទេសចរឱ្យផ្អាកការលេងទឹក និងប្រមូលសម្ភារៈចេញពីភ្នំភូវួ ព្រោះបារម្ភថា ភ្លៀងធ្លាក់ខ្លាំងធ្វើឱ្យទឹកហូរពីតំបន់ព្រៃភ្នំ និងបណ្តាលឱ្យកើតគ្រោះថ្នាក់ដល់ភ្ញៀវទេសចរ ។

ក្រោយពីអាជ្ញាធរប្រកាសឱ្យភ្ញៀវទេសចរផ្អាកលេងទឹកមិនទាន់ផុតពីមាត់ផង ស្រាប់តែទឹកបានហូរពីលើភ្នំភូវួ ពិតមែន ។ គេសង្កេតឃើញថា ទឹកដ៏ច្រើនមហាសាលបានហូរធ្លាក់ពីលើភ្នំមកលើបរិវេណទឹកជ្រោះ Tham Phra រហូតធ្វើឱ្យភ្ញៀវទេសចរជាច្រើននាក់រត់ទៅកាន់ទីខ្ពស់ដើម្បីយករួចខ្លួន ខណៈភ្ញៀវទេសចរខ្លះទៀតជាប់នៅលើថ្មកណ្តាលទឹកជ្រោះ ។

អាជ្ញាធរបានប្រកាសឱ្យភ្ញៀវទេសចរទាំងអស់ស្វែងរកទីកន្លែងខ្ពស់ ហើយអាជ្ញាធរក៏ប្រញាប់ជួយសង្គ្រោះមនុស្សខ្លះទៀតឱ្យចុះពីលើភ្នំភូវួ ផងដែរ ។ រហូតដល់ជិតពេលព្រលប់ ទឹកក៏ចាប់ផ្តើមស្រកចុះ ទើបគេអាចជួយសង្គ្រោះភ្ញៀវទេសចរដែលជាប់លើថ្មនៅកណ្តាលទឹកជ្រោះបាន ។ ក្រោយមក អាជ្ញាធរក៏បញ្ជាបិទការលេងទឹកជ្រោះ Tham Phra ភ្លាមៗ ហើយគ្មានភ្ញៀវទេសចរណាម្នាក់រងរបួស និងស្លា.ប់ទេ ។

ក្រោយកើតហេតុ លោក Witsanu Phumpha ប្រធានដែនជម្រកសត្វព្រៃភូវួ បានណែនាំឱ្យមន្ត្រីប៉ាន់ស្មានស្ថានការណ៍ថា បើមេឃនៅតែភ្លៀង ហើយមានទឹកហូរពីលើភ្នំបន្តទៀត គឺត្រូវតែបិទតំបន់ទឹកជ្រោះនេះសិន ហើយរង់ចាំឱ្យទឹកមានសភាពធម្មតាវិញ ទើបអនុញ្ញាតឱ្យភ្ញៀវទេសចរមកកម្សាន្តឡើងវិញ ៕ ប្រភព ៖ amarin news

រដ្ឋធានីកៀវ៖ ស្របពេលបណ្ដាសហគមន៍អន្ដរជាតិ កំពុងតែថ្កោលទោស ចំពោះអំពើរដ្ឋប្រហារយោធា នៅក្នុងប្រទេសនីហ្សេ (Niger) កាលពីសប្ដាហ៍មុននោះ បែរជាលោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ថៅកែក្រុមហ៊ុនទាហានស៊ីឈ្នួលរបស់រុស្ស៊ី Wagner Group បានសាទរ ចំពោះសកម្មភាពខុសច្បាប់ទៅវិញ ដោយចាត់ទុក ថា នេះជាការផ្លាស់ប្តូរឆ្ពោះទៅរកឯករាជភាព ផ្ដាច់ចេញពីលោកខាងលិច ប៉ុន្ដែមន្រ្ដីជាន់ខ្ពស់អ៊ុយក្រែន អះអាង ថា រុស្ស៊ី ជាអ្នកទទួលខុសត្រូវ ចំពោះអំពើបះបោរនេះ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី២ ខែសីហា ថា មន្រ្ដីជាន់ខ្ពស់មួយរូបរបស់អ៊ុយក្រែន បានចោទប្រកាន់ដល់រដ្ឋាភិបាលក្រុងមូស្គូ ពីការរៀបចំអំពើរដ្ឋប្រហារយោធា នៅក្នុងប្រទេសនីហ្សេ។ ការចោទប្រកាន់នេះ បានសំដៅលើការជាប់ពាក់ព័ន្ធ ជា យុទ្ធសាស្ត្រស្តង់ដាររបស់រុស្ស៊ី។

លោក ម៉ូហាមេដ បាហ្ស៊ូម (Mohamed Bazoum) ប្រធានាធិបតីនីហ្សេ និង រដ្ឋាភិបាលជាប់ឆ្នោតតាមបែបប្រជាធិបតេយ្យរបស់គាត់ កាលពីថ្ងៃពុធ ទី២៦ ខែកក្កដា ត្រូវបានបណ្ដេញចេញពីអំណាច ដោយមេដឹកនាំយោធា នៅក្នុងរដ្ឋប្រហារលើកទី៧ ដែលប្រទេសត្រូវបានមើលឃើញ រយៈពេលតិចជាង៣ឆ្នាំ។

លោក មីខៃឡូ ប៉ូដូលយ៉ាក (Mykhailo Podolyak) ទីប្រឹក្សាប្រធានាធិបតីអ៊ុយក្រែន បានអះអាង ថា រុស្ស៊ី ជាអ្នកនៅពីក្រោយការរឹបអូសអំណាចដ៏គួរឱ្យភ្ញាក់ផ្អើលនេះ។

លោកទីប្រឹក្សា ប្រធានាធិបតីអ៊ុយក្រែន បានសរសេរ ថា «ឥឡូវនេះ វាកាន់តែច្បាស់ណាស់ ថា រុស្ស៊ី នៅពីក្រោយអ្វីដែលគេហៅថា ជា«រដ្ឋប្រហារយោធា» នៅក្នុងប្រទេសនីហ្សេ (Niger)។ សកម្មភាពទាំងនេះ ជាយុទ្ធសាស្ត្រស្ដង់ដាររបស់រុស្ស៊ី សម្រាប់បង្វែរការយកចិត្តទុកដាក់ទៅលើស្ថានការណ៍នេះ ហើយចាប់យកពេលវេលា និង ពង្រីកជម្លោះបន្ថែមទៀត»។

លោក មីខៃឡូ ប៉ូដូលយ៉ាក បានបន្ថែម ថា «រុស្ស៊ី មានសេណារីយ៉ូជាសកល សម្រាប់បង្កអស្ថិរភាព ដើម្បីធ្វើឱ្យខូចខាត ដល់សណ្តាប់ធ្នាប់សន្តិសុខរបស់ខពិភពលោក។ នេះដល់ពេលវេលាត្រូវតែសន្និដ្ឋានឲ្យត្រឹមត្រូវ ថា មានតែការដកប្រធានាធិបតីរុស្ស៊ី លោក វ៉្លាឌីមៀ ពូទីន ចេញ ហើយបញ្ជូនរុស្ស៊ី ទៅដើមកំណើតនយោបាយវិញ ទើបអាចធានាបាននូវការលុបបំបាត់នូវការបំពារបំពានច្បាប់ និង ធ្វើឲ្យមានស្ថិរភាពដល់ពិភពលោក។

ដោយឡែក វិមានក្រឹមឡាំងរបស់ប្រធានានាធិបតីរុស្ស៊ី បានអះអាង កាលពីថ្ងៃចន្ទ ថា ស្ថានភាព នៅក្នុងប្រទេសនីហ្សេ កំពុងតែបង្កឱ្យមានការព្រួយបារម្ភយ៉ាងខ្លាំង ក្រោយការធ្វើរដ្ឋប្រហាររដ្ឋប្រហារយោធារួចមក។ សកម្មភាពយោធាបែបនេះ ត្រូវបានថ្កោលទោស ដោយសហគមន៍អន្ដរជាតិ។

បើទោះជាយ៉ាងណាក្ដី អំពីរដ្ឋប្រហារនេះ ត្រូវបានស្វាគមន៍ និង គាំទ្រដោយលោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ថៅកែក្រុមហ៊ុនទាហានស៊ីឈ្នួល Wagner ដោយសារតែគាត់បានទទួលផលប្រយោជន៍ដ៏ធំសម្បើម នៅទ្វីបអាហ្វ្រិក។

លោក ឌីមីទ្រីប៉េស្កូវ (Dmitry Peskov) អ្នកនាំពាក្យ វិមានក្រឹមឡាំង បានបញ្ជាក់ នៅក្នុងការនិយាយតាមទូរស័ព្ទ ជាមួយនឹងក្រុមអ្នកកាសែត ថា រុស្ស៊ី បានអំពាវនាវដល់គ្រប់ភាគីទាំងអស់ នៅក្នុងប្រទេសនីហ្សេ ត្រូវតែបង្ហាញនូវភាពអត់ធ្មត់ និង វិលត្រឡប់ទៅរកការរក្សាសណ្តាប់ធ្នាប់ តាមផ្លូវច្បាប់ ឱ្យបានលឿនបំផុត។

ផ្ទុយទៅវិញ ក្រុមហ៊ុនទាហានស៊ីឈ្នួលរបស់រុស្ស៊ី Wagner មិនបានអះអាង អំពីទទួលខុសត្រូវ ចំពោះការធ្វើរដ្ឋប្រហារនេះឡើយ។ ប៉ុន្តែលោក ព្រីហ្គោហ្ស៊ីន បានសាទរ ចំពោះការធ្វើរដ្ឋប្រហាររបស់ពួកយោធា។

ក្រុមអ្នកប្រយុទ្ធរបស់លោក ព្រីហ្គោហ្ស៊ីណ បានដើរតួនាទីយ៉ាងសំខាន់ នៅក្នុងប្រទេសជាច្រើន នៅទ្វីបអាហ្រ្វិក ហើយបានបណ្ដាលឲ្យលោកខាងលិច មានការខកចិត្តយ៉ាងខ្លាំង ព្រោះអ្វីដែលថ្មីៗបំផុតនោះ បានមកដល់សាធារណរដ្ឋអាហ្រ្វិកកណ្តាល (CAR) នៅមុនការបោះឆ្នោតប្រជាមតិរដ្ឋធម្មនុញ្ញ។

សារជាសំឡេង នៅលើ Telegram របស់ Wagner Group កាលពីពេលថ្មីៗនេះ លោក ព្រីហ្គោហ្ស៊ីន បានអះអាង ថា អ្វីដែលបានកើតឡើង នៅក្នុងប្រទេសនីហ្សេ គឺគ្មានអ្វីក្រៅពីការតស៊ូរបស់ប្រជាជននីហ្សេ ប្រឆាំងនឹងពួកអាណានិគមរបស់ពួកគេ តែប៉ុណ្ណោះទេ។ ពួកអាណានិគម កំពុងតែព្យាយាមធ្វើតាមច្បាប់របស់ខ្លួន និង ដាក់លក្ខខណ្ឌរបស់ពួកគេ បន្ដរក្សាពួកគេ ឱ្យស្ថិតក្នុងស្ថានភាព ដែលទ្វីបអាហ្វ្រិក មានតាំងពីរាប់រយឆ្នាំមុន រហូតមក។

លោក ព្រីហ្គោហ្ស៊ីន បានបន្ថែមថា «សព្វថ្ងៃនេះ ការទទួលបានឯករាជភាពរបស់ប្រជាជននីហ្សេ នឹងមានប្រសិទ្ធភាព។ អ្វីដែលនៅសេសសល់ នឹងមិនមានការសង័្សយនោះឡើយ ព្រោះវាអាស្រ័យទៅលើប្រជាពលរដ្ឋនីហ្សេ ហើយថា តើអភិបាលកិច្ច នឹងមានប្រសិទ្ធភាពយ៉ាងណា ប៉ុន្តែរឿងដ៏សំខាន់បំផុតនោះ គឺប្រជាជននីហ្សេ កំពុងតែកម្ចាត់ពួកអាណានិគមរបស់ពួកគេរួចហើយ»៕