សារព័ត៌មានបរទេសចុះផ្សាយថា ក្រុមហ៊ុន Zoom ដែលផ្តល់សេវាកម្មប្រជុំតាមអនឡាញ បានហៅបុគ្គលិករបស់ខ្លួនដែលធ្វើការនៅខាងក្រៅឱ្យត្រឡប់មកការិយាល័យវិញ យ៉ាងហោចណាស់ ចំនួន២លើកក្នុង១សប្តាហ៍ ។ គោលការណ៍ថ្មីនេះនឹងអនុវត្តនៅខែសីហា ឆ្នាំ២០២៣ ឬនៅខែកញ្ញា ឆ្នាំ២០២៣ សម្រាប់ប្រទេសមួយចំនួនដែល Zoom មានការិយាល័យនៅទីនោះ ។

បើទោះជា Zoom គឺជាក្រុមហ៊ុនទទួលបានផលប្រយោជន៍ខ្លាំងបំផុតពីការបំពេញការងារនៅក្រៅការិយាល័យ ប៉ុន្តែនាយកគ្រប់គ្រងក្រុមហ៊ុន Zoom គិតថា ប្រព័ន្ធការងារចម្រុះមានប្រសិទ្ធភាពខ្លាំង ហើយការត្រឡប់មកធ្វើការនៅការិយាល័យវិញនឹងជួយឱ្យក្រុមហ៊ុនមានស្ថានភាពល្អប្រសើរឡើង ដូចជា ភាពច្នៃប្រឌិតថ្មីៗ និងគាំទ្រការប្រើប្រាស់កម្មវិធី Zoom របស់អតិថិជននៅទូទាំងពិភពលោក ។

គំនិតនេះបានក្លាយជាគោលការណ៍ថ្មីសម្រាប់ឱ្យបុគ្គលិកចំនួន៧.៤០០នាក់របស់ក្រុមហ៊ុន Zoom ដែលពួកគេធ្វើការនៅឆ្ងាយពីក្រុមហ៊ុនប្រមាណ៨០គីឡូម៉ែត្រ ឱ្យត្រឡប់មកធ្វើការនៅក្នុងក្រុមហ៊ុន យ៉ាងហោចណាស់ ចំនួន២លើកក្នុង១សប្តាហ៍ ។

បច្ចុប្បន្ន កម្មវិធី Zoom ស្ថិតនៅក្រោមការដាក់សម្ពាធដោយសារចំនួនក្រុមហ៊ុនគូប្រជែងផ្សេងទៀតកើនឡើង ក៏ដូចជាការអភិវឌ្ឍជាបន្តបន្ទាប់របស់ក្រុមហ៊ុនបច្ចេកវិទ្យាធំ ដូចជា ក្រុមហ៊ុន Microsoft ផងដែរ ។ ហេតុនេះ Zoom ចាំបាច់ត្រូវបង្កើនការអភិវឌ្ឍកម្មវិធីរបស់ខ្លួន ដើម្បីឱ្យអតិថិជននៅតែប្រើប្រាស់កម្មវិធីនេះ ។

ទោះយ៉ាងណា គោលការណ៍របស់ក្រុមហ៊ុន Zoom នៅតែអាចបត់បែនបាន ខណៈក្រុមហ៊ុននេះបានជួលអ្នកជំនាញជាន់ខ្ពស់ជាច្រើននាក់មកពីក្រៅប្រទេស ហើយក្រុមហ៊ុនសង្ឃឹមថា ក្រុមហ៊ុនជាច្រើនក៏បានជួលបុគ្គលិកពីបរទេសផងដែរ ។ ដូច្នេះ បច្ចេកវិទ្យារបស់ Zoom នៅតែចាំបាច់សម្រាប់ការប្រើប្រាស់នៅក្នុងក្រុមហ៊ុនភាគច្រើន ដើម្បីភ្ជាប់ក្រុមការងារដែលធ្វើការដាច់ដោយឡែកពីគ្នាឱ្យពួកគេមានទំនាក់ទំនង និងអាចធ្វើការងារយ៉ាងមានប្រសិទ្ធភាព ៕ ប្រភព ៖ beartai BRIEF

នៅបណ្តាក្រុមហ៊ុនអាកាសចរណ៍ទាំងអស់លើពិភពលោកមានយន្តហោះសរុបចំនួន ៤៨,០៣៨ គ្រឿងក្នុងចំណោមប្រទេសទាំង ១០១ ក្នុងនោះប្រទេសកម្ពុជាមានយន្តហោះសរុប ៤៣ គ្រឿង នេះបើយោងតាមប្រភព Millitary Factory ។ ដូច្នេះហើយតើអ្នកដឹងទេ? ប្រទេសណាខ្លះដែលមានយន្តហោះច្រើនជាងគេបំផុតនៅលើពិភពលោក?

១.ប្រទេសអាមេរិក(United States)៖ អាមេរិកជាប្រទេសដែលមានយន្តហោះច្រើនជាងគេបំផុតនៅលើពិភពលោក ជាមួយនឹងយន្តហោះសរុប ១៣,២៤៦ គ្រឿងក្នុងនោះយន្តហោះចម្បាំងមាន ២,៧៤០ គ្រឿង។

២.ប្រទេសរុស្សី(Russia)៖ រុស្សីមានយន្តហោះសរុប ៤,១៧៣ គ្រឿងដែលក្នុងនោះយន្តហោះចម្បាំងមាន ១,៥១១ គ្រឿង។

៣.ប្រទេសចិន(China)៖ ចិនមានយន្តហោះសរុប ៣,២៨៥ គ្រឿង ក្នុងនោះយន្តហោះចម្បាំងមាន ១,៥៧១ គ្រឿង។

៤.ប្រទេសឥណ្ឌា(India)៖ ឥណ្ឌាមានយន្តហោះសរុប ២,១៨២ គ្រឿងដែលក្នុងនោះយន្តហោះចម្បាំងមាន ៦៩៤ គ្រឿង។

៥.កូរ៉េខាងត្បូង(South Korea)៖ កូរ៉េខាងត្បូងជាប្រទេសដែលមានយន្តហោះច្រើនជាងគេទីប្រាំនៅលើពិភពលោក ជាមួយនឹងយន្តហោះសរុប ១,៥៩៥ គ្រឿងក្នុងនោះយន្តហោះចម្បាំងមាន ៤៩២ គ្រឿង។

៦.ប្រទេសជប៉ុន(Japan)៖ ជប៉ុនគឺជាប្រទេសដែលមានយន្តហោះសរុប ១,៤៤៩ គ្រឿង។

៧.ប្រទេសប៉ាគីស្ថាន(Pakistan)៖ ប៉ាគីស្ថានមានយន្តហោះសរុប ១,៣៨៧ គ្រឿងដែលក្នុងនោះយន្តហោះចម្បាំងមាន ៤៤៧ គ្រឿង។

៨.ប្រទេសអេហ្ស៊ីប(Egypt)៖ អេហ្ស៊ីបគឺជាប្រទេសដែលមានយន្តហោះសរុប ១,០៦២ គ្រឿង ក្នុងនោះយន្តហោះចម្បាំងមាន ៣៣៨ គ្រឿង។

៩.ប្រទេសទួគី(Turkey)៖ ប្រទេសទួគីមានយន្តហោះសរុប ១,០៥៧ គ្រឿងដែលក្នុងនោះយន្តហោះចម្បាំងមាន ១៥៧ គ្រឿង។

១០.ប្រទេសបារាំង(France)៖ បារាំងគឺជាប្រទេសដែលមានយន្តហោះសរុប ១,០៥៥ គ្រឿង៕

សម្បកចេកអាចជួយការពារមេរោគ និងសត្វល្អិតបំផ្លាញដំណាំ ហើយវាជាវត្ថុធាតុផ្សំពីធម្មជាតិដែលផ្តល់ប្រយោជន៍ច្រើនដល់រុក្ខជាតិ ។ សម្បកចេកសម្បូរទៅដោយសារធាតុចិញ្ចឹមចាំបាច់ ដែលជួយដល់ការលូតលាស់របស់រុក្ខជាតិ ដូចជា ប៉ូតាស្យូម ម៉ាញ៉េស្យូម កាល់ស្យូម និងផូស្វ័រ ។ លើសពីនេះ សម្បកចេកក៏អាចជួយបង្កើនការលូតលាស់របស់អតិសុខុមប្រាណនៅក្នុងដី ធ្វើឱ្យដីមានជីវជាតិ ដែលជួយឱ្យរុក្ខជាតិដុះលូតលាស់ល្អ ។

នេះជាវិធីងាយៗក្នុងការធ្វើជីកសិកម្មពីសម្បកចេក ៖
វិធីទី១-យកសម្បកចេកមកហាន់ជាចំណិតតូចៗ រួចយកវាទៅកប់ក្នុងដីក្បែរដំណាំ ឬរុក្ខជាតិ ព្រោះសម្បកចេកនឹងរលាយបន្តិចម្តងៗ បន្ទាប់មក វាក៏បញ្ចេញសារធាតុចិញ្ចឹមទៅក្នុងដី ។
វិធីទី២-កិនសម្បកចេកឱ្យហ្មត់ ហើយយកវាទៅរោយពីលើដីជុំវិញដំណាំ ឬរុក្ខជាតិ ព្រោះសម្បកចេកកិនហ្មត់អាចរលាយបានលឿនជាងសម្បកចេកហាន់ជាចំណិត ។
វិធីទី៣-យកសម្បកចេកទៅស្ងោរ បន្ទាប់មក យកទឹករបស់វាមកស្រោចលើកូនរុក្ខជាតិ ព្រោះទឹកនេះសម្បូរដោយសារធាតុចិញ្ចឹមចាំបាច់ជួយដល់ការលូតលាស់របស់រុក្ខជាតិ ។ ហេតុនេះ គួរស្ងោរសម្បកចេកនៅរៀងរាល់២សប្តាហ៍ ទៅ៣សប្តាហ៍ម្តង ។

វិធីទី៤ ៖
-លាងសម្បកចេកឱ្យស្អាត
-ហាន់សម្បកចេកជាចំណិតតូចៗ
-យកសម្បកចេកទៅដាក់ក្នុងធុង
-ចាក់ទឹកចូលក្នុងធុងឱ្យលិចសម្បកចេក
-បិទគម្របធុង ហើយទុកវារយៈពេលចាប់ពី២សប្តាហ៍ ទៅ៣សប្តាហ៍
-នៅពេលសម្បកចេករលាយហើយ យើងត្រូវត្រងយកទឹករបស់វា
-យកទឹកសម្បកចេកទៅស្រោចលើដំណាំ ឬរុក្ខជាតិ នៅរៀងរាល់២សប្តាហ៍ ទៅ៣សប្តាហ៍ម្តង ។

សរុបមក សម្បកចេក គឺជាជីកសិកម្មធម្មជាតិមួយប្រភេទដែលមានសុវត្ថិភាព ប្រសិទ្ធភាព ធ្វើឱ្យរុក្ខជាតិរឹងមាំ និងដុះលូតលាស់ល្អ ។ យើងអាចប្រើប្រាស់វាសម្រាប់ធ្វើជាសារធាតុចិញ្ចឹមរុក្ខជាតិបាន ហើយមិនចាំបាច់បារម្ភពីសារធាតុគីមីប៉ះពាល់សុខភាពឡើយ ។ ម្យ៉ាងទៀត ការប្រើប្រាស់ជីសម្បកចេក អាចឱ្យយើងអាចសន្សំសំចៃថវិកាផងដែរ ៕ ប្រភព ៖ sanook

បរទេស៖ អតីតប្រធានាធិបតីអាមេរិក លោក Donald Trump បានប្តេជ្ញាថានឹងកាត់ទោសគូប្រជែង Joe Biden ភ្លាមៗប្រសិនបើគាត់ត្រូវបានជាប់ឆ្នោតជាថ្មីម្តងទៀតនៅឆ្នាំ ២០២៤។
ថ្លែងទៅកាន់ហ្វូងអ្នកគាំទ្រនៅក្នុងព្រឹត្តិការណ៍រៃអង្គាសប្រាក់នៅទីក្រុង Montgomery រដ្ឋ Alabama កាលពីថ្ងៃទី ៦ ខែសីហា អតីតប្រធានាធិបតី Donald Trump បាននិយាយថា លោកនឹងតែងតាំងរដ្ឋអាជ្ញាពិសេសមួយដើម្បីស៊ើបអង្កេតអំពើខុសច្បាប់ដែលអាចកើតមានក្នុងគ្រួសារ Biden នៅថ្ងៃដំបូងនៃការវិលត្រឡប់របស់លោកទៅកាន់សេតវិមាន ប្រសិនបើគាត់ឈ្នះការបោះឆ្នោតសកលឆ្នាំ ២០២៤។

លោក Trump បានធ្វើការចោតប្រកាន់គ្រួសារលោក Biden ថាបានចំណេញដោយខុសច្បាប់ពីទំនាក់ទំនងជាមួយអ៊ុយក្រែន និងទទួលសំណូកពីប្រទេសចិន រួមជាមួយប្រទេសដទៃទៀត។ ទោះជាយ៉ាងណាក៏ដោយ ប្រធានាធិបតីលោក Joe Biden បានចេញមុខបដិសេធការចោទប្រកាន់ទាំងនេះ។

បច្ចុប្បន្ន អតីតប្រធានាធិបតីអាមេរិក Donald Trump ក៏កំពុងប្រឈមមុខនឹងការស៊ើបអង្កេតពាក់ព័ន្ធនឹងការចោទប្រកាន់ថាបានរក្សាទុកឯកសារដែលបានចាត់ថ្នាក់ដោយខុសច្បាប់នៅឯអចលនទ្រព្យ Mar-a-Lago ក្នុងរដ្ឋផ្លរីដា និងរារាំងកិច្ចខិតខំប្រឹងប្រែងរបស់រដ្ឋាភិបាលក្នុងការប្រមូលព័ត៌មានទាំងនោះមកវិញ។ លើសពីនេះទៀត គាត់ក៏ត្រូវបានចោទប្រកាន់ពីបទក្លែងបន្លំហិរញ្ញវត្ថុ និងក្លែងបន្លំកំណត់ត្រាអាជីវកម្មនៅទីក្រុង Manhattan និងទីក្រុងញូវយ៉ក ដើម្បីចំណាយប្រាក់លាក់បាំងទំនាក់ទំនងរបស់គាត់ជាមួយតារាសិចក្នុងអំឡុងយុទ្ធនាការបោះឆ្នោតឆ្នាំ ២០១៦។

ទោះយ៉ាងណា លោក Trump បានបដិសេធការចោទប្រកាន់ទាំងអស់នេះ ហើយបានសារភាពថាមិនមានកំហុសអ្វីទាំងអស់។ គាត់បាននិយាយនៅក្នុងព្រឹត្តិការណ៍នៅទីក្រុង Montgomery ថាការកាត់ទោសទាំងបីនេះគឺផ្អែកលើ “ការចោទប្រកាន់ក្លែងក្លាយទាំងស្រុង” និងជ្រៀតជ្រែកសំឡេងឆ្នោតរបស់គាត់៕ ប្រភព៖cafef.com

រាជធានីបាងកក៖ ក្រោយពេលមេដឹកនាំគណបក្សប្រឆាំងឈ្នះឆ្នោត នៅក្នុងប្រទេសថៃ ខកខាន មិនបានទទួលសំឡេងគាំទ្រ ពីសមាជិកសភា ជាក្រុមអភិរក្សនិយម និង សមាជិកព្រឹទ្ធសភា ត្រូវបានពួកយោធាតែងតាំង រួចមក គណបក្សភឿថៃ ដែលមានសមាជិកសភាច្រើនលំដាប់ទី២ ក៏ងាកទៅចាប់ដៃជាមួយនឹងគណបក្សភូមចៃថៃ ដែលមេដឹកនាំរបស់គណបក្សមួយនេះ មានតំណែង ជាឧបនាយករដ្ឋមន្រ្ដី និង ជារដ្ឋមន្រ្ដីក្រសួងសុខាភិបាលសាធារណៈ នៅក្នុងរដ្ឋាភិបាលរបស់លោកនាយករដ្ឋមន្រ្ដី ប្រាយុទ្ធ ចាន់-អូ-ចា មេដឹកនាំរដ្ឋប្រហារយោធា។

សារព័ត៌មាន CNA បានចេញផ្សាយ នៅថ្ងៃអង្គារ ទី៨ ខែសីហា ថា គណបក្សភឿថៃ បានប្រកាស កាលពីថ្ងៃចន្ទ ថា គណបក្សមានសំឡេងច្រើនលំដាប់លេខ២មួយនេះ កំពុងតែបង្កើតសម្ពន្ធមិត្ដ ជាមួយនឹងគណបក្សភូមចៃថៃ (Bhumjaithai) និង បើកចំហដល់គណបក្សផ្សេងៗទៀត ចូលរួម នៅក្នុងការបង្កើតរដ្ឋាភិបាលថ្មី ក្រោយការបោះឆ្នោត កាលពីជិត៣ខែកន្លងមកនេះ។

គណបក្សភឿថៃ ក្រោមការដឹកនាំរបស់គ្រួសារមហាសេដ្ឋី ស៊ីណាវ៉ាត្រា បានឈ្នះសំឡេងគាំទ្រ ភាគច្រើនលំដាប់ទី២ នៅក្នុងការបោះឆ្នោតសកលរបស់ប្រទេសថៃ កាលពីថ្ងៃទី១៤ ខែឧសភា ឆ្នាំ២០២៣។ គណបក្សភឿថៃ កាលពីសប្ដាហ៍មុន បានព្យាយាមបង្កើតរដ្ឋាភិបាលមួយ ជាមួយនឹងគណបក្សឆ្ពោះទៅមុខ (Move Forward Party) ហៅកាត់ MFP ដែលជាអ្នកឈ្នះឆ្នោត ប៉ុន្ដែមេដឹកនាំរបស់គណបក្សមួយនវ មិនបានទទួលការគាំទ្រ ពីសមាជិកសភា និង ព្រឹទ្ធសភា ដែលជាពួកអភិរក្សនិយម។

គណបក្សឆ្ពោះទៅមុខ បានទទួលអាសនៈសភា ចំនួន១៥១នាក់ នៅក្នុងការបោះឆ្នោតសកលរបស់ប្រទេសថៃ កាលពីថ្ងៃទី១៤ ខែឧសភា ខណៈគណបក្សភឿថៃ បានទទួលអាសនៈសភាចំនួន១៤១នាក់ និង គណបក្សភូមចៃថៃ (Bhumjaithai) ដែលមានសមាជិកច្រើនលំដាប់លេខ៣ ដោយបានទទួលអាសនៈសភា ចំនួន៧១នាក់។

លោក ឆូលណាន់ ស្រីកែវ (Cholnan Srikaew) មេដឹកនាំគណបក្សភឿថៃ បានបញ្ជាក់ ថា« គណបក្សភឿថៃ និង គណបក្សភូមចៃថៃ នឹងបង្កើតរដ្ឋាភិបាលថ្មី ដោយមានការគាំទ្រ មកពីគណបក្សផ្សេងៗទៀត។ រីឯលោក ស្រេតថា ថាវីស៊ីន (Srettha Thavisin) មហាសេដ្ឋីអចនទ្រព្យ នៅតែជាបេក្ខជននាយករដ្ឋមន្រ្ដីដដែល»។

មេដឹកនាំគណបក្សភឿថៃ បានប្រាប់ដល់សន្និសីទសារព័ត៌មាន ថា«យើងសូមថ្លែងអំណរគុណដល់គណបក្សភូមចៃថៃ ទទួលយកការអញ្ជើញឲ្យចូលរួមបង្កើតរដ្ឋាភិបាលថ្មី។ ដូច្នេះយើងអាចត្រួសត្រាយនូវការជាប់គាំងនយោបាយនេះ»។

ថៃ ជាប្រទេសសេដ្ឋកិច្ចធំបំផុតលំដាប់លេខ២ នៅក្នុងប្លុកអាស៊ាន ប៉ុន្ដែប្រទេសមួយនេះ បានហ៊ុមព័ទ្ធ ដោយភាពមិនប្រាកដប្រជាខាងនយោបាយ ចាប់តាំងពីគណបក្សប្រឆាំងនានា បានយកឈ្នះ លើគណបក្សប្រជែង គាំទ្រដោយយោធា ដែលកំពុងតែគ្រប់គ្រងអំណាច នៅក្នុងការបោះឆ្នោត កាលពីខែឧសភា។

គណបក្ស Move Forward បានធ្វើយុទ្ធនាការកែទម្រង់ច្បាប់ ស្តីពីការប្រមាថដ៏ចម្រូងចម្រាសរបស់ប្រទេសថៃ ទើបធ្វើឲ្យសមាជិកព្រឹទ្ធសភា ដែលត្រូវបានពួកយោធា តែងតាំង មិនបោះឆ្នោតគាំទ្រលោក ភីថា លីមចារឿនរ៉ាត (Pita Limjaroenrat) មេដឹកនាំគណបក្សនេះ ក្លាយជានាយករដ្ឋមន្ត្រី។ ចាប់តាំងពីពេលនោះមក ក្រុមអ្នកគាំទ្រគណបក្សឈ្នះឆ្នោតមួយនេះ បានចេញមកតាមដងផ្លូវ ហើយអំពាវនាវឱ្យអ្នកនយោបាយទាំងអស់ គោរពតាមឆន្ទៈរបស់ប្រជាជន។

ក្រោយពេលព្រឹទ្ធសភាបានរារាំងដល់ការឈរឈ្មោះរបស់មេដឹកនាំគណបក្សឆ្ពោះទៅមុខ សម្រាប់តំណែងនាយករដ្ឋមន្ត្រី ជាលើកទីពីររួចមក គណបក្សភឿថៃ បានដកខ្លួនចេញពីសម្ពន្ធភាពទាំង៨ ក្រោមការដឹកនាំរបស់គណបក្ស MFP។ ប៉ុន្ដែឥឡូវនេះ គណបក្សភឿថៃ បានអះអាង ថា ភឿថៃ នឹងព្យាយាមផ្ដាច់ខ្លួនចេញ ដើម្បីបង្កើតរដ្ឋាភិបាលថ្មីមួយ។

លោក ឆូលណាន់ មេដឹកនាំគណបក្សភឿថៃ បានបញ្ជាក់ទៀត ថា «យើងមិនទទួលបានការគាំទ្រគ្រប់គ្រាន់ មកពីគណបក្សផ្សេងទៀត និង ព្រឹទ្ធសភា នោះឡើយ ខណៈគណបក្សឆ្ពោះទៅមុខ កំពុងតែព្យាយាម បង្កើតរដ្ឋាភិបាល។ គណបក្សភឿថៃ (Pheu Thai) នឹងមានឱកាសជោគជ័យខ្ពស់ នៅក្នុងការបង្កើតរដ្ឋាភិបាល ជាមួយនឹងគណបក្សភូមចៃថៃ»។

លោក អានុទីន ឆានវីរ៉ាគុល (Anutin Charnvirakul) មេដឹកនាំគណបក្សភូមចៃថៃ ក៏បានអះអាង ថា គណបក្សរបស់គាត់ នឹងនៅតែស្ថិតក្នុងសម្ពន្ធភាពនេះ ក្រោមការដឹកនាំរបស់គណបក្សភឿថៃ ល្គឹកណាគណបក្សឆ្ពោះទៅមុខ មិនស្ថិតក្នុងសម្ពន្ធភាពជាមួយគ្នា ហើយពួកគេនឹងមិនអាចបង្កើតរដ្ឋាភិបាលបាន ជាមួយនឹងសំឡេងភាគតិចនោះឡើយ។

សមាជិកសភាទាំង២របស់ប្រទេសថៃ នឹងចូលរួមបោះឆ្នោតជ្រើសរើសនាយករដ្ឋមន្ត្រី ហើយក្រោយមកនឹងបង្កើតរដ្ឋាភិបាល។ ប៉ុន្ដែកាលបរិច្ឆេទ នៅមិនទាន់កំណត់ សម្រាប់ការបោះឆ្នោតជ្រើសរើសនាយករដ្ឋមន្ត្រីរបស់ប្រទេសនេះជាថ្មីនោះ នៅឡើយ ព្រោះសភាទាំង២ នៅបន្ដរង់ចាំការសម្រេចរបស់តុលាការធម្មនុញ្ញ ថាតើ លោក ភីថា លីមចារឿនរ៉ាត មេដឹកនាំគណបក្សឆ្ពោះទៅមុខ នឹងអាចឈរឈ្មោះ ជានាយករដ្ឋមន្រ្ដី សម្រាប់សភាបោះឆ្នោតជ្រើសរើស ជាថ្មីដែរឬយ៉ាងណា៕