តើលោកអ្នកដឹងទេ? ត្រីប្រភេទណាខ្លះដែលកាចសាហាវបំផុតលើលោក? ច្បាស់ណាស់ប្រាកដជាអ្នកគិតថាជាត្រីពីរ៉ាញ៉ាហើយ ប៉ុន្តែមិនមែនមានតែត្រីពីរ៉ាញ៉ាមួយទេដែលគ្រោះថ្នាក់នោះ។ ដូច្នេះហើយខាងក្រោមនេះគឺជាប្រភេទត្រីទាំង ៥ ដែលកាចសាហាវបំផុតលើលោក៖

១.Goliath Tigerfish៖ Tigerfish គឺឃាតករសម្លាប់មនុស្សយ៉ាងឃោឃៅបំផុត ដោយវាអាចវាយប្រហារអ្នកឱ្យខ្ទេចឆ្អឹងភ្លាមៗក្នុងរយៈពេលតិចជាង ១ នាទី ជាក់ស្តែងសូម្បីតែសត្វក្រពើ ត្រីឆ្លាម ឬសត្វធំៗជាច្រើនទៀតក៏ស្ថិតនៅក្នុងបញ្ជីររបស់ត្រីបិសាចនេះដែរ។

២. Piranha៖ លោកអ្នកប្រាកដជាស្គាល់ហើយថាត្រីពីរ៉ាញ៉ានេះកាចសាហាវប៉ុណ្ណា ត្រីពីរ៉ាញ៉ាមានប្រភពកំណើតនៅតំបន់ Amazon ដែលវាមានធ្មេញមុតស្រួច និងថ្គាមខ្លាំងបំផុត វាអាចវាយប្រហារអ្នកឱ្យស្លាប់ភ្លាមៗក្នុងរយៈពេលត្រឹមតែ ១ នាទីប៉ុណ្ណោះ។

៣. Needlefish៖ Needlefish គឺជាត្រីម្ចុលដែលមានធ្មេញមុតស្រួចខ្លាំងណាស់ និងមានល្បឿនលឿន វាអាចវាយប្រហារអ្នកឱ្យស្លាប់ភ្លាមៗបានយ៉ាងរហ័ស ហើយពួកវាត្រូវបានគេចាត់ទុកថាជាសត្វដែលមានគ្រោះថ្នាក់បំផុតលើផែនដី។

៤.Stonefish៖ Stonefish គឺជាត្រីថ្មដែលគ្រោះថ្នាក់បំផុតលើលោក វាមានឆ្អឹងខ្នងម្ជុលចំនួន ១៣ នឹងមានសារធាតុពុលដ៏កាចសាហាវ ដោយគ្រាន់តែប៉ះវា ពិសរបស់វានឹងបណ្តាលឱ្យអ្នកស្លាប់ភ្លាមៗក្នុងរយៈពេល ១០ នាទី។

៥. Blue-Ringed Octopus៖ សត្វនេះត្រូវបានគេរកឃើញនៅមហាសមុទ្រប៉ាស៊ីហ្វិចនិងមហាសមុទ្រឥណ្ឌាហើយវាក៏ជាប់ឈ្មោះជាសត្វដែលសម្លាប់មនុស្សច្រើនជាងគេបំផុតនៅក្នុងសមុទ្រផងដែរ៕

ប្រទេសថៃ ៖ សារព័ត៌មានថៃបានចុះផ្សាយថា ប្រទេសថៃបានស្នើចុះឈ្មោះទីក្រុងបុរាណឧទ្យានជាតិប្រវត្តិសាស្ត្រស៊្រីទេព ដែលមានទីតាំងស្ថិតក្នុងខេត្តពេជ្រឆាប៊ូន ធ្វើជាបេតិកភណ្ឌពិភពលោក ជាមួយអង្គការយូណេស្កូ ។ នាពេលបច្ចុប្បន្ន ទីក្រុងបុរាណនេះបានបញ្ចូលក្នុងបញ្ជីឈ្មោះបឋមរបស់អង្គការអប់រំវិទ្យាសាស្ត្រ និងវប្បធម៌អង្គការសហប្រជាជាតិ អស់រយៈពេលជិត១០ឆ្នាំហើយ ។

មន្ត្រីតំណាងអង្គការយូណេស្កូ (UNESCO) បានចុះមកត្រួតពិនិត្យនៅទីក្រុងបុរាណនេះ ដើម្បីវាយតម្លៃអំពីសក្តានុពល និងការត្រៀមខ្លួនគ្រប់ផ្នែករបស់ប្រទេសថៃ ។ ចំណែកឯកសារដាក់ពាក្យសុំចុះឈ្មោះទាំងអស់ គឺទទួលបានការវាយតម្លៃ និងឆ្លងកាត់ការត្រួតពិនិត្យសម្រាប់ការអនុម័តលើកចុងក្រោយ ព្រមទាំងមានការនាំមន្ត្រីទូតមកទស្សនាការអនុវត្តការងារនៅប្រទេសថៃផងដែរ ។

ប្រទេសថៃសង្ឃឹមថា នឹងទទួលបានដំណឹងល្អក្នុងការពិចារណាឱ្យប្រទេសថៃទទួលបានការចុះបញ្ជីទីក្រុងបុរាណស៊្រីទេព ធ្វើជាបេតិកភណ្ឌពិភពលោកថ្មី នៅក្នុងកិច្ចប្រជុំគណៈកម្មការបេតិកភណ្ឌពិភពលោក លើកទី៤៥ ចាប់ពីថ្ងៃទី១០ ដល់ថ្ងៃទី២៥ ខែកញ្ញា ឆ្នាំ២០២៣ នៅទីក្រុងរីយ៉ាដ ប្រទេសអារ៉ាប៊ី សាអូឌីត ។

ប្រទេសថៃបានអញ្ជើញមន្ត្រីទូតចំនួន៧ប្រទេសជាសមាជិក ដូចជា អាហ្សង់ទីន, បែលហ្ស៊ិក, អេហ្ស៊ីប, ឥណ្ឌា, អ៊ីតាលី, ម៉ិកស៊ិក និងនីហ្សេរីយ៉ា មកទស្សនាទីកន្លែងពិតប្រាកដ ដើម្បីបង្ហាញថា ប្រទេសថៃបានត្រៀមខ្លួនរួចរាល់អស់ហើយតាមការណែនាំរបស់ក្រសួងការបរទេស ។ ប្រទេសថៃចាត់ទុកថា នេះគឺជាឱកាសដ៏សំខាន់មួយក្នុងការសុំសំឡេងគាំទ្រការចុះបញ្ជីទីក្រុងបុរាណនេះជាមួយអង្គការយូណេស្កូ ៕ ប្រភព ៖ Thailand and Neighbours

បរទេស៖ ក្រោយពីបានបញ្ចប់ការផ្ទេរពី PSG ទៅ Al Hilal ខ្សែប្រយុទ្ធប្រេស៊ីល Neymar Júnior បានទទួលលាភសំណាងយ៉ាងធំពីអារ៉ាប៊ីសាអូឌីត និងជាកីឡាករដែលមានប្រាក់បៀវត្សរ៍ខ្ពស់បំផុតនៅលើពិភពលោក នេះបើយោងតាម Transfer New Live។ ដូច្នេះអត្ថប្រយោជន៍ដែល Neymar ទទួលបានពីអារ៉ាប៊ីសាអូឌីតមានដូចជា៖

• ភូមិគ្រឹះមួយដែលមានបន្ទប់គេងចំនួន ២៥។
• អាងហែលទឹកទំហំ ៤០x១០ ម៉ែត្រ និងសូណាចំនួន ៣។
• បុគ្គលិកពេញម៉ោងចំនួន ៥ នៅក្នុងភូមិគ្រឹះ។
• ឡាន Bentley Continental GT ចំនួនមួយគ្រឿង, Aston Martin DBX មួយគ្រឿង, និង Lamborghini Huracán ចំនួនមួយគ្រឿងទៀត សរុបទាំងអស់ ៣ គ្រឿង។
• មានអ្នកបើកបរផ្ទាល់ខ្លួន ២៤ ម៉ោង។
• រាល់វិក្កយបត្រសម្រាប់សណ្ឋាគារ ភោជនីយដ្ឋាន និងសេវាកម្មផ្សេងៗក្នុងអំឡុងពេលថ្ងៃសម្រាករបស់ Neymar នឹងត្រូវបានផ្ញើទៅកាន់ទីស្នាក់ការកណ្តាលរបស់ក្លឹបដែលត្រូវបង់។
• យន្តហោះឯកជនមួយសម្រាប់គាត់ក្នុងការធ្វើដំណើរ។
• សម្រាប់ការបង្ហោះតាមប្រព័ន្ធសង្គមនីមួយៗដែលផ្សព្វផ្សាយពីអារ៉ាប៊ីសាអូឌីតនឹងទទួលបាន ៥០០.០០០ អឺរ៉ូ (ជាង ៥៤០,០០០ ដុល្លារ)។
•ចំពោះប្រាក់បៀវត្សរ៍ប្រចាំឆ្នាំវិញគឺជាង ១០០ លានដុល្លារ។

គួរបញ្ជាក់ដែរថា Al Hilal គឺជាក្លឹបដែលជោគជ័យបំផុតនៅអារ៉ាប៊ីសាអូឌីត ដូច្នេះខ្សែប្រយុទ្ធប្រេស៊ីលវ័យ ៣១ ឆ្នាំរូបនេះនឹងបង្ហាញខ្លួនដំបូងជាមួយនឹងការប្រកួតទល់នឹង Al Fayha នៅថ្ងៃទី ១៩ ខែសីហា ឆ្នាំ២០២៣ ៕

ប្រទេសថៃ ៖ ក្រុមកសិកររស់នៅស្រុកប្រាវ ខេត្តឈៀងម៉ៃ ប្រទេសថៃ បានសហការគ្នាធ្វើការជាក្រុមដើម្បីដាំដើមមៀនមានគុណភាពខ្ពស់កម្រិត AA និង A រហូតដល់៧០% ។ កសិករដាំមៀននិយាយថា តម្លៃផ្លែមៀននៅឆ្នាំ២០២៣ បានកើនឡើងខ្ពស់ ក្នុងនោះផ្លែមៀនកម្រិត AA មានតម្លៃ៣៨បាតក្នុង១គីឡូក្រាម ខណៈកាលពីឆ្នាំ២០២២ វាមានតម្លៃត្រឹមតែ៩បាតប៉ុណ្ណោះ ។

ការកាត់មែកដើម្បីឱ្យដើមមៀនមានកម្ពស់ទាប បានជួយឱ្យកសិកររស់នៅស្រុកប្រាវ ខេត្តឈៀងម៉ៃ ងាយស្រួលក្នុងការប្រមូលផលផ្លែមៀន និងឆាប់រហ័ស ព្រមទាំងជួយកាត់បន្ថយការជួលកម្លាំងកម្មករផងដែរ ។ កសិករចំនួន៣៦នាក់បានសហការគ្នាដាំដើមមៀននៅលើផ្ទៃដី៣៦រ៉ៃ និងប្រមូលផលលក់អស់រយៈពេលជាង៣ឆ្នាំហើយ ដោយផ្លែមៀនរបស់ពួកគេមានគុណភាពខ្ពស់ និងមានការថែទាំបច្ចេកទេសដាំដុះពីសាកលវិទ្យាល័យមេជោ ។ ការដាំដុះតាមបច្ចេកទេសត្រឹមត្រូវអាចជួយកាត់បន្ថយការចំណាយដើមទុន ហើយទិន្នផលដែលទទួលបានចាប់ពី៦៥% ដល់៧០% គឺជាផ្លែមៀនមានទំហំធំៗ និងលក់បានតម្លៃខ្ពស់ ចំណែកឈ្មួញទទួលទិញ ក៏ពុំហ៊ានសុំបញ្ចុះថ្លៃដែរ ។

លោក អាន់ណុប ខាំមួន ជាសមាជិកចម្ការមៀនប្រចាំស្រុកប្រាវ ខេត្តឈៀងម៉ៃ និយាយថា ៖ «ពួកយើងបានធ្វើការជាក្រុម ហើយពួកយើងអាចចរចាតម្លៃមៀននៅលើទីផ្សារបានខ្លះ ។ ឧទាហរណ៍ ពេលយើងប្រមូលផលផ្លែមៀនបានចំនួនប៉ុន្មានតោន គឺយើងបានចរចាតម្លៃជាមួយអ្នកទិញ ភាគច្រើន យើងចរចាតម្លៃជាមួយអ្នកទិញជាមុនសិន» ។

នៅឆ្នាំ២០២៣ ផ្លែមៀនមានតម្លៃខ្ពស់ជាងឆ្នាំមុនៗ ក្នុងនោះផ្លែមៀនកម្រិត AA មានតម្លៃ៣៨បាតក្នុង១គីឡូក្រាម រីឯកម្រិត A តម្លៃ៣០បាតក្នុង១គីឡូក្រាម ខណៈកាលពីឆ្នាំ២០២២ ផ្លែមៀនកម្រិត AA មានតម្លៃត្រឹមតែ៩បាតក្នុង១គីឡូក្រាម ។ ហេតុនេះ កសិករនៅខេត្តឈៀងម៉ៃអាចរកប្រាក់ចំណេញបានខ្ពស់បំផុតពីការលក់ផ្លែមៀន ។ លោក ថងឌី តាក់សៃ ជាប្រធានក្រុមកសិករដាំមៀន និយាយថា ៖ «ក្រុមកសិករបានដាក់គម្រោងដាំមៀននៅឆ្នាំបន្ទាប់ទៀត ដើម្បីទប់ស្កាត់បញ្ហាតម្លៃផ្លែមៀនធ្លាក់ចុះ» ។

កសិករនៅខេត្តឈៀងម៉ៃអាចប្រមូលផលផ្លែមៀនបានចំនួន១២០តោននៅឆ្នាំ២០២៣ និងទទួលទិញផ្លែមៀនពីកសិករជាង២៤០នាក់ ដែលមានផ្លែមៀនសរុបចំនួន១.០០០តោន ។ ទិន្នផលផ្លែមៀនក្នុងខេត្តចំនួន៨ ស្ថិតនៅភាគខាងជើងប្រទេសថៃ ស្មើនឹង៩សែន៧ម៉ឺនតោន និងធ្លាក់ចុះប្រមាណ៥% បើធៀបនឹងឆ្នាំ២០២២ ដោយសារអាកាសធាតុក្តៅខ្លាំង និងបរិមាណទឹកមិនគ្រប់គ្រាន់ ។ រីឯផ្លែមៀនតាមរដូវកាល គេបានលក់នៅតាមទីផ្សារច្រើនបំផុតក្នុងខែសីហា ៕ ប្រភព ៖ Thai PBS

ជប៉ុន៖ មនុស្សជាង ៥០,០០០ នាក់ ត្រូវបានជាប់គាំងនៅអាកាសយានដ្ឋានជប៉ុន ដោយសារឥទ្ធិពលនៃព្យុះទីហ្វុង ដែលធ្វើឱ្យអ្នកទេសចររាប់រយនាក់ត្រូវស្នាក់នៅមួយរយៈនៅអាកាសយានដ្ឋាន Kansai ប្រទេសជប៉ុន ជាមួយនឹងស្ថានភាពមិនល្អ។

យោងតាមប្រភពព័ត៌មាន Nikkei Asia ដែលបានរាយការណ៍នៅថ្ងៃទី១៧ ខែសីហាថា ព្យុះទីហ្វុងបានបោកបក់ភាគខាងលិចនៃប្រទេសជប៉ុន ដែលបណ្តាលឱ្យមានការរំខានយ៉ាងខ្លាំងដល់សេវាកម្មផ្លូវអាកាស និងរថភ្លើងក្នុងអំឡុងថ្ងៃឈប់សម្រាកនារដូវក្តៅ។ ក្រុមហ៊ុនអាកាសចរណ៍ធំជាងគេពីររបស់ប្រទេសជប៉ុនគឺ Japan Airlines និង All Nippon Airways បានលុបចោលជើងហោះហើរជាង ៥៦០ ទៅកាន់ភាគខាងលិចនៃប្រទេស ដែលប៉ះពាល់ដល់អ្នកដំណើរជាង ៥០,០០០ នាក់។

ការលុបចោលជើងហោះហើរដែលមិនរំពឹងទុកនេះបានធ្វើឱ្យមនុស្សប្រហែល ៦៥០ នាក់ត្រូវបានបង្ខំឱ្យស្នាក់នៅមួយរយៈក្នុងអាកាសយានដ្ឋាន Kansai ។ ពួកគេជាប់នៅទីនេះ ដោយសារសេវាផ្លូវដែក និងផ្លូវថ្នល់ត្រូវបានរំខាន។ កត្តានោះបានជំរុញឱ្យក្រុមគ្រប់គ្រងព្រលានត្រូវចែកថង់ដេក និងទឹកដល់អ្នកដែលខកខានជើងហោះហើរ។

យោងតាមទីភ្នាក់ងារឧតុនិយមជប៉ុន ព្យុះទីហ្វុង នឹងបន្តបោកបក់នៅខេត្ត Wakayama ដោយរំកិលទៅភាគខាងជើងកាត់តាមកោះសំខាន់របស់ Honshu ។ ដោយសារភ្លៀងធ្លាក់ខ្លាំង រដ្ឋាភិបាលទីក្រុង Tottori បានចេញសេចក្តីប្រកាសអាសន្នខ្ពស់បំផុតសម្រាប់អ្នកស្រុក ១៨០,០០០ នាក់ឱ្យការពារខ្លួន ជាពិសេស ស្ថានភាពនេះអាចនាំឱ្យមានទឹកជំនន់ និងការរអិលបាក់ដីនៅតំបន់មួយចំនួន៕ ប្រភព៖cafef.com

រដ្ឋធានីមូស្គូ៖ នៅក្នុងរយៈពេលចុងក្រោយ នៃសង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន អស់រយៈពេលជាង១ឆ្នាំកន្លងមកនេះ មានការកត់សម្គាល់ជាច្រើ គឺដ្រូនប្រយុទ្ធ បែរជាហោះទៅវាយប្រហារ ចូលជ្រៅ ទៅក្នុងប្រទេសរុស្ស៊ី ហើយឥឡូវនេះ ចៅហ្វាយក្រុងមូស្គូ បានអះអាង ពីការបាញ់ទម្លាក់ដ្រូនរបស់អ៊ុយក្រែន នៅក្នុងរដ្ឋធានីជាបេះដូង នៃមហាអំណាចកំពូលនុយក្លេអ៊ែររបស់ពិភពលោក។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃសុក្រ ទី១៨ ខែសីហា ថា ដ្រូនយោធារបស់អ៊ុយក្រែន បានធ្លាក់ នៅលើអគារ នៅក្នុងទីក្រុងមូស្គូ ក្រោយពេលប្រព័ន្ធការពារដែនអាកាសរបស់រុស្ស៊ី បានបាញ់ទម្លាក់ នៅក្នុងវាយប្រហារចុងក្រោយនេះ។

លោក ស៊ើរហ្គេ ស៊ូបយ៉ានីន (Sergei Sobyanin) អភិបាលទីក្រុងមូស្គូ បានបញ្ជាក់ នៅក្នុងសេចក្ដីថ្លែងការណ៍មួយ តាមបណ្ដាញសង្គមតេឡេក្រាម ថា ប្រព័ន្ធការពារដែនអាកាសរបស់រុស្ស៊ី បានបាញ់ទម្លាក់ដ្រូនមួយគ្រឿង កាលពីព្រឹក ថ្ងៃសុក្រ ហើយកម្ទេចកម្ទេបានធ្លាក់ទៅលើអគារជាច្រើន នៃមជ្ឈមណ្ឌលពាណិជ្ជកម្ម នៅក្នុងរដ្ឋធានីមូស្គូ ដែលមានចម្ងាយត្រឹមតែប្រហែល៥គីឡូម៉ែត្រ ពីវិមានក្រឹមឡាំង។

ឃ្លីបវីដេអូមួយ ត្រូវបានគេបង្ហោះ នៅលើបណ្ដាញផ្សព្វផ្សាយរបស់រុស្ស៊ី បានបង្ហាញ ពីផ្សែងក្រា ហុយឡើងទៅលើអាកាស នៅចន្លោះអគារកប់ពពក នៅក្នុងរដ្ឋធានីមូស្គូ។ អ៊ុយក្រែន បានបើកការវាយប្រហារ នៅវេលាម៉ោង៤ព្រឹក វេលាព្រឹក វេលាក្នុងតំបន់៕

សហរដ្ឋអាមេរិក ៖ ទីក្រុងញូវយ៉ករបស់អាមេរិកបានក្លាយជាទីក្រុងចុងក្រោយគេ ដែលបានប្រកាសហាមឃាត់ការប្រើប្រាស់កម្មវិធី TikTok របស់ប្រទេសចិន នៅលើឧបករណ៍របស់រដ្ឋាភិបាល ដោយសារបារម្ភថា អ្នកប្រើកម្មវិធីនេះគ្មានសុវត្ថិភាព ។ មុននេះ រដ្ឋជាច្រើននៅអាមេរិកបានប្រកាសហាមប្រើកម្មវិធីនេះរួចហើយ ។

TikTok គឺជាកម្មវិធីពេញនិយមមួយក្នុងចំណោមកម្មវិធីផ្សេងទៀតនៅអាមេរិក ហើយមានពលរដ្ឋអាមេរិកប្រើប្រាស់រហូតដល់១៥០លាននាក់ ។ វាមិនត្រឹមតែត្រូវបានគេហាមឃាត់ក្នុងរដ្ឋមួយចំនួនប៉ុណ្ណោះទេ ប៉ុន្តែសភាអាមេរិកត្រូវការឱ្យរដ្ឋទាំងអស់របស់អាមេរិកហាមឃាត់ដូចគ្នា ព្រោះបារម្ភថា ឥទ្ធិពលរបស់ចិននឹងប៉ះពាល់ដល់សន្តិសុខសង្គមអាមេរិក ។

អភិបាលក្រុងញូវយ៉កបញ្ជាក់ថា TikTok គឺជាកម្មវិធីគ្រោះថ្នាក់ដល់អ្នកប្រើប្រាស់ និងគំរាមកំហែងសុវត្ថិភាពបណ្តាញបច្ចេកទេសរបស់ទីក្រុងផងដែរ ។ ទោះយ៉ាងណា អ្នកគ្រប់គ្រងកម្មវិធីនេះបញ្ជាក់ថា ក្រុមហ៊ុនមិនបានចែករំលែកព័ត៌មានរបស់អ្នកប្រើប្រាស់នៅអាមេរិកទៅឱ្យរដ្ឋាភិបាលចិនទេ ហើយក្រុមហ៊ុនបានកំណត់វិធានការសំខាន់ដើម្បីការពារព័ត៌មានផ្ទាល់ខ្លួន និងសុវត្ថិភាពរបស់អ្នកប្រើប្រាស់ ។

មន្ត្រីបម្រើការងាររាជការនៅទីក្រុងញូវយ៉កត្រូវលុបកម្មវិធី TikTok ចេញពីឧបករណ៍របស់រដ្ឋាភិបាលក្នុងរយៈពេល៣០ថ្ងៃ ហើយពួកគេនឹងមិនអាចប្រើប្រាស់កម្មវិធីនេះនៅលើឧបករណ៍ និងបណ្តាញអ៊ីនធើរណេតផ្សេងៗក្នុងទីក្រុងនេះបានទៀតទេ ។

ការហាមប្រើប្រាស់ TikTok គឺជាប្រធានបទក្តៅនៅអាមេរិកអស់មួយរយៈមកហើយ ។ បើគេក្រឡេកទៅមើលសម័យស្ថិតក្រោមការគ្រប់គ្រងរបស់លោក ដូណាល់ ត្រាំ គឺលោកបានគំរាមថា អាមេរិកមិនអនុញ្ញាតឱ្យពលរដ្ឋប្រើកម្មវិធីនេះ ប៉ុន្តែពេលនោះ មិនទាន់មានការចាត់វិធានការណាមួយទេ ។ ចុងក្រោយ នៅក្រោមការគ្រប់គ្រងរបស់លោក ចូ បៃដិន សភាអាមេរិកបានចេញច្បាប់ថ្មីកាលពីដើមឆ្នាំ២០២៣ ដើម្បីហាមប្រើប្រាស់ TikTok នៅអាមេរិក ៕ ប្រភព ៖ Mono News