ប្រទេសសិង្ហបុរី ៖ នៅឆ្នាំ២០២៤ អ្នកដំណើរមួយចំនួនអាចធ្វើដំណើរចេញពីអាកាសយានដ្ឋាន Changi របស់ប្រទេសសិង្ហបុរីបាន ដោយពុំចាំបាច់ប្រើប្រាស់លិខិតឆ្លងដែនទេ ដោយសារសិង្ហបុរីបានកែប្រែច្បាប់ចូលប្រទេសរបស់ខ្លួន ។ ច្បាប់នេះអនុញ្ញាតឱ្យអ្នកដំណើរបង្ហាញអត្តសញ្ញាណរបស់ពួកគេ តាមរយៈប្រព័ន្ធព័ត៌មានអត្តសញ្ញាណផ្ទាល់ខ្លួន ជំនួសការប្រើប្រាស់លិខិតឆ្លងដែន ។

លោកស្រី Josephine Tio រដ្ឋមន្ត្រីក្រសួងទំនាក់ទំនងសិង្ហបុរីបានថ្លែងក្នុងរដ្ឋសភា កាលពីថ្ងៃទី១៨ ខែកញ្ញា ឆ្នាំ២០២៣ ថា ប្រទេសសិង្ហបុរីនឹងកំណត់អត្តសញ្ញាណអ្នកដំណើរ តាមរយៈប្រព័ន្ធព័ត៌មានអត្តសញ្ញាណផ្ទាល់ខ្លួននៅតាមទីកន្លែងផ្សេងៗ ដូចជា កន្លែងដាក់អីវ៉ាន់ រហូតដល់ការិយាល័យត្រួតពិនិត្យមនុស្សចេញ-ចូលប្រទេស និងការឡើងលើយន្តហោះ ហើយយើងនឹងអនុវត្តវិធានការនេះចាប់ពីឆ្នាំ២០២៤ តទៅ ។ លោកស្រីថ្លែងថា ៖ «វិធានការនេះនឹងជួយផ្តល់ភាពងាយស្រួលដល់អ្នកដំណើរទាំងអស់ ដោយពួកគេមិនចាំបាច់បង្ហាញលិខិតឆ្លងដែនម្តងហើយម្តងទៀតនៅតាមកន្លែងបង្ហាញអត្តសញ្ញាណផ្សេងៗ» ។

សារព័ត៌មាន Bloomberg ចុះផ្សាយថា ការប្រកាសមិនប្រើប្រាស់លិខិតឆ្លងដែននេះ ដោយសារសិង្ហបុរីរំពឹងថា នៅឆ្នាំ២០២៤ ចំនួនអ្នកធ្វើដំណើរចូលសិង្ហបុរីនឹងកើនឡើងដូចក្នុងអំឡុងពេលមុនជំងឺកូវីដរាតត្បាត ហើយចំនួនអ្នកដំណើរនឹងកើនឡើងជាបន្តបន្ទាប់ ។ បច្ចុប្បន្ន សិង្ហបុរីកំពុងសាងសង់អគារទី៥ សម្រាប់ទទួលអ្នកដំណើរនៅអាកាសយានដ្ឋាន Changi ។ ជាមួយគ្នានេះ សិង្ហបុរីរំពឹងថា រថភ្លើងល្បឿនលឿនដែលតភ្ជាប់រវាងសិង្ហបុរីជាមួយរដ្ឋ Johor ស្ថិតនៅភាគខាងត្បូងប្រទេសម៉ាឡេស៊ី នឹងអាចដំណើរការនាពេលឆាប់ៗ ។

លោកស្រី Josephine Tio រដ្ឋមន្ត្រីក្រសួងទំនាក់ទំនងសិង្ហបុរីបន្តថា ៖ «ប្រព័ន្ធត្រួតពិនិត្យមនុស្សចេញ-ចូលប្រទេសរបស់យើង នឹងអាចទទួលបរិមាណអ្នកដំណើរដ៏ច្រើនយ៉ាងមានប្រសិទ្ធភាព និងផ្តល់នូវបទពិសោធន៍ពេញចិត្ត រួមទាំងការធានាសុវត្ថិភាពផងដែរ» ។

អាកាសយានដ្ឋាន Changi ទទួលបានការចាត់ចំណាត់ថ្នាក់ជាអាកាសយានដ្ឋានល្អបំផុតក្នុងពិភពលោក ដែលអាចទទួលអ្នកដំណើរប្រមាណជាង៥លាននាក់កាលពីខែមិថុនា ឆ្នាំ២០២៣ ។ ដូច្នេះ វាជាលើកដំបូងហើយសម្រាប់អាកាសយានដ្ឋាននេះ ដែលអាចទទួលអ្នកដំណើរបានច្រើន បើគិតចាប់ពីខែមករា ឆ្នាំ២០២០ ដែលជាអំឡុងពេលជំងឺកូវីដរាតត្បាត ។ នេះបង្ហាញថា ការធ្វើដំណើរជាអន្តរជាតិរបស់សិង្ហបុរីបានងើបឡើងវិញយ៉ាងច្បាស់ ៕ ប្រភព ៖ Bangkok biznews

បច្ចុប្បន្ន វិស័យទេសចរណ៍គឺជាឧស្សាហកម្មដែលកំពុងរីកចម្រើនយ៉ាងខ្លាំងក្នុងទ្វីបអាស៊ី។ ប្រទេសជាច្រើននៅអាស៊ីគឺជាគោលដៅទេសចរណ៍ដ៏ពេញនិយមសម្រាប់អ្នកធ្វើដំណើរមកពីជុំវិញពិភពលោក។ ប៉ុន្តែទោះជាយ៉ាងណាក៏ដោយ មិនមែនគ្រប់ប្រទេសទាំងអស់ក្នុងទ្វីបអាស៊ីសុទ្ធតែអាចទាក់ទាញភ្ញៀវទេសចរបានច្រើនរហូតនោះទេ។ ដូច្នេះហើយខាងក្រោមនេះគឺជាប្រទេសដែលមានអ្នកទស្សនាតិចបំផុតនៅអាស៊ី៖

១.ប្រទេសប៊ូតាន (Bhutan)៖ គឺជាប្រទេសដែលមានអ្នកទស្សនាតិចជាងគេបំផុតនៅអាស៊ី មូលហេតុគឺដោយសារប្រទេសនេះកំណត់ភ្ញៀវទេសចរបរទេសណាដែលអាចមកទស្សនាបានតែប៉ុណ្ណោះ។ ដូច្នេះ ដើម្បីទៅទស្សនាប្រទេសនេះបាន អ្នកទេសចរត្រូវតែកក់ការធ្វើដំណើររបស់ពួកគេជាមុនសិន តាមរយៈប្រតិបត្តិករទេសចរណ៍ផ្លូវការ។ កញ្ចប់ដំណើរកម្សាន្តដែលផ្តល់ជូនជាធម្មតាចន្លោះពី ២០០ ដុល្លារទៅ ២៥០ ដុល្លារក្នុងមួយថ្ងៃ ដោយរួមបញ្ចូល អាហារ កន្លែងស្នាក់នៅ ការដឹកជញ្ជូន ឧបករណ៍ចាំបាច់ និងមគ្គុទ្ទេសក៍ក្នុងតំបន់។ បច្ចុប្បន្ន ព្រះរាជាណាចក្រប៊ូតានមានភ្ញៀវទេសចរចំនួន ១៥៥,០០០ នាក់ជារៀងរាល់ឆ្នាំ។

២.ប្រទេសប៉ាពួញូហ្គីណេ (Papua New Guinea)៖ គឺជាប្រទេសដែលមានអ្នកមកទស្សនាតិចបំផុតទី ២ នៅអាស៊ី ដោយទទួលបានភ្ញៀវទេសចរប្រហែល ១៨៤,០០០ នាក់ក្នុងមួយឆ្នាំ មូលហេតុគឺដោយសារប្រទេសនេះមានការលំបាកដូចជាការខ្វះខាតហេដ្ឋារចនាសម្ព័ន្ធ និងដីខ្លាំង ដូច្នេះកន្លែងជាច្រើនអាចទៅដល់បានដោយការដើរប៉ុណ្ណោះ។ ប៉ាពួញូហ្គីណេគឺជាប្រទេសកោះដាច់ស្រយាលបំផុត និងមិនសូវមានប្រជាប្រិយភាពក្នុងគោលដៅទេសចរណ៍ឡើយ។ ភ្ញៀវទេសចរណ៍ដែលទៅប្រទេសនេះគឺត្រូវតែចូលរួមសកម្មភាពជាច្រើនរួមមាន ការឡើងភ្នំខ្ពស់ៗ ការជ្រមុជទឹក និងចូលរួមពិធីបុណ្យនានា។

៣.ប្រទេសប្រ៊ុយណេ (Brunei)៖ ប្រទេសដែលមានអ្នកទស្សនាតិចបំផុតទី ៣ នៅអាស៊ី គឺប្រ៊ុយណេ ដែលស្ថិតនៅអាស៊ីអាគ្នេយ៍។ ប្រទេសប្រ៊ុយណេ ទទួលបានភ្ញៀវទេសចរត្រឹមតែ ២១៨,០០០ នាក់ប៉ុណ្ណោះ មូលហេតុគឺដោយសារ ប្រ៊ុយណេជាប្រទេសអ៊ីស្លាមដ៏តឹងរ៉ឹង ហើយរំពឹងថាអ្នកទេសចររបស់ខ្លួននឹងគោរពតាមក្រមសីលធម៌អ៊ីស្លាម។ ភ្ញៀវទេសចរណ៍ដែលទៅប្រទេសនេះតម្រូវឱ្យស្លៀកពាក់សមរម្យ និងមិនអាចញ៉ាំអាហារនៅទីសាធារណៈបានឡើយ។

៤.ប្រទេសយេម៉ែន (Yemen)៖ យេម៉ែនស្ថិតនៅមជ្ឈិមបូព៌ា ជាប្រទេសដែលមានអ្នកទស្សនាតិចបំផុតទី ៤ នៅអាស៊ី។ ប្រទេសយ៉េម៉ែន ទទួលបានភ្ញៀវទេសចរត្រឹមតែ ៣៦៦,០០០ នាក់ប៉ុណ្ណោះ មូលហេតុគឺដោយសារប្រជាជនក្នុងប្រទេសនេះជ្រុលនិយមពេក ដែលជាហេតុធ្វើឱ្យវិស័យទេសចរណ៍ធ្លាក់ចុះយ៉ាងខ្លាំង៕

រាជធានីបាងកក៖ អតីតនាយករដ្ឋមន្រ្ដីដ៏មានឥទ្ធិពលរបស់ប្រទេសថៃ លោក ថាក់ស៊ីន ស៊ីណាវ៉ាត្រា បានចូលមន្ទីរពេទ្យវះកាត់ ក្រោយពេលគាត់បានជាប់ពន្ធនាគារ បន្ទាប់ពីការវិលត្រឡប់ មកដល់ប្រទេសកំណើតវិញ។

សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃពុធ ទី២០ ខែកញ្ញា ថា អតីតនាយករដ្ឋមន្រ្ដីដ៏មានឥទ្ធិពលរបស់ប្រទេសថៃ លោក ថាក់ស៊ីន ស៊ីណាវ៉ាត្រា (Thaksin Shinawatra) ដែលកំពុងតែជាប់ពន្ធនាគារ បានទទួលការវះកាត់ កាលពីសប្តាហ៍មុន។ នេះបើតាមកូនស្រីរបស់គាត់ បានអះអាង កាលពីថ្ងៃអង្គារ (ទី១៩ ខែកញ្ញា) ខណៈគ្រួសាររបស់គាត់ កំពុងតែស្វែងរកការដោះលែងគាត់ ឱ្យនៅក្រៅឃុំ។

មហាសេដ្ឋី វ័យ៧៤ឆ្នាំ រូបនេះ ត្រូវបានបណ្តេញចេញពីអំណាច ដោយអំពើរដ្ឋប្រហារយោធា នៅក្នុងអំឡុងឆ្នាំ២០០៦ ហើយគាត់បានចំណាយពេល ជាង១៥ឆ្នាំ នៅក្នុងការនិរទេសខ្លួន ដោយខ្លួនឯង។ លោក ថាក់ស៊ីន បានវិលត្រឡប់មកដល់ប្រទេសកំណើតវិញ កាលពីខែសីហា ហើយត្រូវបានតុលាការកាត់ទោសភ្លាមៗ ដោយបានសម្រេចផ្តន្ទាទោសដាក់ពន្ធនាគារ រយៈពេល៨ឆ្នាំ។ ប៉ុន្ដែក្រោយមក ព្រះមហាក្សត្រថៃ បានសម្រេចព្រះទ័យព្រះរាជទានបន្ធូរបន្ថយទោស មកនៅត្រឹម ជាប់គុក រយៈពេល១ឆ្នាំ។ លោក ថាក់ស៊ីន ត្រូវបានផ្ទេរទៅកាន់ទៅបន្ទប់ឯកជន ស្ថិតក្នុងមន្ទីរពេទ្យប៉ូលិស ដោយសារតែសុខភាពរបស់គាត់ ចុះខ្សោយ។

លោកស្រី ផេថុងថាន ស៊ីណាវ៉ាត្រា (Paetongtarn Shinawatra) ជាកូនស្រីរបស់លោក ថាក់ស៊ីន បានប្រាប់ដល់ក្រុមអ្នកយកព័ត៌មាន ថា «ប៉ារបស់ខ្ញុំបានវះកាត់ កាលពីសប្តាហ៍មុន ហើយខ្ញុំមិនបានដឹងថា នឹងត្រូវចំណាយពេលប៉ុន្មាន រហូតដល់ជាសះស្បើយនោះឡើយ»៕

ក្រុមហ៊ុន TikTok បានប្រើប្រាស់កម្មវិធីថ្មីមួយឈ្មោះ MyRTO ដើម្បីងាយស្រួលគ្រប់គ្រង និងតាមដានបុគ្គលិកមកធ្វើការក្នុងការិយាល័យ ក្រោយការធ្វើការពីផ្ទះ (Work From Home) ត្រូវបានបញ្ចប់ ដោយក្រុមហ៊ុននេះបានយក Software នៅក្នុងក្រុមហ៊ុនមកអភិវឌ្ឍន៍ជាថ្មី រួចដាក់ឈ្មោះថា «MyRTO» ។ កម្មវិធីនេះអាចត្រួតពិនិត្យ និងប្រមូលអវត្តមានបុគ្គលិក ព្រមទាំងបញ្ជូនទិន្នន័យទៅឱ្យអ្នកគ្រប់គ្រង, ផ្នែកធនធានមនុស្ស (HR) និងបុគ្គលិកទាំងអស់ ។

MyRTO បានអភិវឌ្ឍន៍ឡើងដើម្បីជួយឱ្យក្រុមហ៊ុន TikTok អាចគ្រប់គ្រងការធ្វើការរបស់បុគ្គលិកចំនួន៧.០០០នាក់នៅសហរដ្ឋអាមេរិក ។ បុគ្គលិកទាំងនេះបានធ្វើការនៅតាមទីក្រុងផ្សេងៗដូចជា Los Angeles, Washington និង New York ក្នុងអំឡុងពេលការឆ្លងរាតត្បាតនៃជំងឺកូវីដ-១៩ ។ ហេតុនេះ TikTok ត្រូវការឱ្យបុគ្គលិកត្រឡប់មកធ្វើការក្នុងការិយាល័យចំនួន៣ថ្ងៃ ឬ៥ថ្ងៃក្នុង១សប្តាហ៍ ហើយនឹងអនុវត្តចាប់ពីខែតុលា ឆ្នាំ២០២៣ តទៅ ។

លោកស្រី Jodi Seth អ្នកនាំពាក្យរបស់ក្រុមហ៊ុន TikTok លើកឡើងថា ៖ «ក្រៅពីការតាមដានបុគ្គលិក កម្មវិធី MyRTO អាចកំណត់ភាពច្បាស់លាស់នៃការបំពេញការងារឱ្យមានប្រសិទ្ធភាព និងជួយលើកកម្ពស់ទំនាក់ទំនងប្រកបដោយតម្លាភាព ។ ចំណុចសំខាន់ កម្មវិធីនេះនឹងជួយក្រុមហ៊ុនអាចរៀបចំគម្រោងការងារ និងការប្រជុំបានយ៉ាងល្អ» ។

បុគ្គលិកភាគច្រើនរបស់ក្រុមហ៊ុន TikTok បានសម្តែងការមិនពេញចិត្ត បន្ទាប់ពីពួកគេដឹងអំពីការប្រើប្រាស់កម្មវិធីថ្មី MyRTO ។ បុគ្គលិកមួយចំនួនប្រាប់ថា ខ្លួនមានអារម្មណ៍ភ្ញាក់ផ្អើល ហើយហាក់ដូចជាត្រូវក្រុមហ៊ុនតាមដានការងារ និងកន្លែងរស់នៅជារៀងរាល់ថ្ងៃ ហើយបើបុគ្គលិកណាមិនធ្វើតាម គឺនឹងត្រូវចាត់ការតាមច្បាប់របស់ក្រុមហ៊ុន ៕ ប្រភព ៖ beartaiBRIEF