ឥរិយាបថល្អទាំង ៥ ដែលអ្នកគួរអនុវត្តជារៀងរាល់ព្រឹក

ពិតណាស់ ជារៀងរាល់ព្រឹកអ្នកគួរតែអនុវត្តវិធីទាំងនេះ ដើម្បីទទួលបានសុខភាពល្អ រាងកាយមាំមួន ខួរក្បាលស្រឡះ និងមានសម្រស់ស្រស់ស្អាត។ ដូច្នេះហើយ ឥរិយាបថល្អទាំង ៥ ដែលអ្នកគួរអនុវត្តជារៀងរាល់ព្រឹក មានដូចជា៖

១.ក្រោកមុនម៉ោង ៧ ព្រឹក៖ ការក្រោកមុនម៉ោង ៧ ព្រឹកជារៀងរាល់ថ្ងៃ ជួយឱ្យអ្នកមានអារម្មណ៍ស្រស់ថ្លា កម្លាំងពេញលេញ និងអាចរៀបចំផែនការណាមួយដែលត្រូវធ្វើពេញមួយថ្ងៃបានយ៉ាងល្អ។

២.ផឹកទឹក៖ ការផឹកទឹកមួយកែវភ្លាមៗនៅពេលក្រោកពីគេងជារៀងរាល់ព្រឹក នឹងជួយឱ្យប្រព័ន្ធរំលាយអាហាររបស់អ្នកដំណើរការបានល្អ ការពាររាងកាយពីការខ្សោះជាតិទឹក ក៏ដូចជាបំពេញតម្រូវការរបស់រាងកាយ និងជួយឱ្យការបន្ទោរបង់មានប្រសិទ្ធភាពពេញលេញផងដែរ។

៣.ស្រូបយកពន្លឺព្រះអាទិត្យនៅពេលព្រឹក៖ ការប៉ះនឹងពន្លឺព្រះអាទិត្យនៅពេលព្រឹកជារៀងរាល់ថ្ងៃ អាចជួយឱ្យសុខភាពរាងកាយកាន់តែប្រសើរឡើង ក៏ដូចជាជួយក្នុងការសម្រកទម្ងន់បានយ៉ាងល្អផងដែរ ព្រោះពន្លឺថ្ងៃពេលព្រឹកជួយឱ្យរាងកាយសំយោគវីតាមីន D ដែលជាវីតាមីនចាំបាច់បំផុតសម្រាប់រាងកាយ។

៤.ធ្វើលំហាត់ប្រាណ៖ ការធ្វើលំហាត់ប្រាណស្រាលៗដូចជា យូហ្គា ការដើរ ឬរត់តិចៗ នៅពេលព្រឹកជារៀងរាល់ថ្ងៃ នឹងជួយសម្រួលដល់ប្រព័ន្ធឈាម បង្កើនការរំលាយអាហារ ក៏ដូចជាជំរុញឱ្យរាងកាយដុតបំផ្លាញជាតិខ្លាញ់បានយ៉ាងល្អ។

៥.ធ្វើអាហារពេលព្រឹកដោយខ្លួនឯង៖ ការធ្វើអាហារពេលព្រឹកដោយខ្លួនឯងជារៀងរាល់ថ្ងៃ នឹងជួយផ្តល់ឱកាសល្អក្នុងការជ្រើសរើសអាហារដែលខ្លួនចង់ញ៉ាំ ក៏ដូចជាជ្រើសរើសអាហារដែលមានប្រូតេអ៊ីនខ្ពស់ ដែលជួយបង្កើនការរំលាយអាហារ និងជួយឱ្យរាងកាយដុតកាឡូរីពេញមួយថ្ងៃ៕
ប្រភព៖sanook