កាលពីថ្ងៃទី៥ ខែធ្នូ ឆ្នាំ២០២២ មានករណីគ្រោះងថ្នាក់ចរាចរណ៍មួយរវាងរថយន្តឡិចស៊ីសLEXUS NX200t បុកម៉ូតូមួយគ្រឿងលើស្ពានជ្រោយចង្វារ ដែលបានធ្វើឱ្យមនុស្ស២នាក់រងរបួសធ្ងន់ និងទារកអាយុ៦០ថ្ងៃ បានបាត់បង់ជីវិតក្រោយសម្រាកព្យាបាលបានប៉ុន្មានថ្ងៃ។

ពេលនោះ ជនបង្កបានស្នើសុំទៅគ្រួសារជនរងគ្រោះ ដោយសងជាសំណង២៥០០ដុល្លារ ដើម្បីបញ្ចប់រឿង។ យោងតាមការបង្ហោះគណនីហ្វេកប៊ុកមួយឈ្មោះថា Pholla Phorn បានឱ្យដឹងថា៖”នៅថ្ងៃទី១៩ ខែសីហា ឆ្នាំ២០២៣ ក្រុមគ្រួសារជនរងគ្រោះ បានទទួលសំណង១មុឺនដុល្លារទៀត ពីជនបង្ក ដើម្បីបញ្ចប់រឿង”។

ករណីនេះ បានធ្វើឱ្យអ្នកលេងបណ្តាញសង្គមខ្មែរ ហាក់សម្តែងការមិនពេញចិត្ត និងអាណិតដល់ទារកដែលបានស្លាប់ ដោយមិនអាចយកជនបង្កមកដាស់ទោសបាន។

តែយ៉ាងណាមិញ ស្នងការនគរបាលរាជធានីភ្នំពេញធ្លាប់បានបញ្ជាក់ម្តងដែរថា៖”បើទោះបីជាមានការបញ្ចប់សំណងរដ្ឋប្បវេណីយ៉ាងណាក៏ដោយ ក៏ករណីគ្រោះថ្នាក់នេះនៅជាប់បណ្តឹងអាជ្ញា ហើយកម្លាំងជំនាញកំពុងក៏សាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់”។

ហេតុដូច្នេះ មហាជន ជាពិសេសអ្នកប្រើប្រាស់បណ្ដាញសង្គម នៅតែរង់ចាំមើលចំណាត់ការរបស់សមត្ថកិច្ចជាបន្តទៀត៕

នាព្រឹកថ្ងៃចន្ទ ទី២១ ខែសីហា ឆ្នាំ២០២៣ នេះ សម្តេចអគ្គមហាសេនាបតីតេជោ ហ៊ុន សែន នឹងអញ្ជើញចូលរួមសម័យប្រជុំដំបូងរបស់រដ្ឋសភា សម្រាប់នីតិកាលទី៧ នឹងត្រូវធ្វើឡើង ក្រោមព្រះរាជអធិបតីភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។

សម័យប្រជុំនេះ គឺជាព្រឹត្តការណ៍ដ៏សំខាន់ ដោយអនុវត្តតាមរដ្ឋធម្មនុញ្ញ និងច្បាប់ប្រទេស ក្រោយពេលដែល កម្ពុជារៀបចំការបោះឆ្នោតជាតិជ្រើសតាំងតំណាងរាស្រ្ត អាណត្តិទី៧ ប្រកបដោយភាពជោគជ័យ ហើយព្រះករុណាជាអម្ចាស់ជីវិតតម្កល់លើត្បូង ព្រះអង្គទ្រង់បានចេញព្រះរាជសារអញ្ជើញតំណាងរាស្ត្រជាប់ឆ្នោតទាំងអស់ ឱ្យចូលរួមប្រជុំនៅថ្ងៃដំបូងនេះក្នុងនោះមានតំណាងរាស្ត្រជាប់ឆ្នោតមកពីគណបក្សប្រជាជនកម្ពុជា១២០រូប និងមកពីគណបក្សហ៊្វុនស៊ិនប៉ិចចំនួន៥រូប។

លុះដល់ថ្ងៃស្អែក ទី២២ ខែសីហា ឆ្នាំ២០២៣ រដ្ឋសភាបោះឆ្នោតជាកញ្ចប់រៀបចំ ក្បាលម៉ាស៊ីនរដ្ឋសភា ក្បាលម៉ាស៊ីនគណៈកម្មការទាំង ១០ និងក្បាលម៉ាស៊ីនរាជរដ្ឋាភិបាល។ បន្ទាប់មក នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី អញ្ជើញស្បថនៅព្រះបរមរាជវាំង ចូលកាន់តំណែងជាផ្លូវការ៕

តារាចម្រៀងវ័យក្មេង ឃុយ ម៉ីហៀង អតីតបេក្ខភាព The Voice Kids Cambodia បានធ្វើឱ្យអ្នកលេងបណ្តាញសង្គមចាប់អារម្មណ៍យ៉ាងខ្លាំងទៅលើទឹកដមសំឡេងរបស់នាងតាមបែបរដឺនក្រោយពីបានច្រៀងដោយគ្មានភ្លេងនៅបទចម្រៀងមួយបទដែលផ្ទុះការគាំទ្រខ្លាំងនៅលើបណ្តាញសង្គមមានចំណងជើងថា «ចន្ទ្រារំពឹង»។

«ចន្ទ្រារំពឹង» គឺជាបទរបស់តារាចម្រៀង ចេន សាយចៃ ដែលទទួលបានការគាំទ្រខ្លាំងរយៈពេលចុងក្រោយនេះនៅលើបណ្តាញសង្គមទិកតុកខណៈមួយបទនេះបានចេញប្រមាណ២ឆ្នាំមកហើយ និងការច្រៀង Live Version ខ្ទង់១ឆ្នាំ។ ទន្ទឹមនឹងបទចម្រៀងមួយបទនេះផ្ទុះការគាំទ្រនោះគេសង្កេតឃើញថា អ្នកគាំទ្របានស្នើឱ្យតារាចម្រៀងវ័យក្មេង ឃុយ ម៉េងហៀង បង្ហើរសំឡេងនៅក្នុងបទចម្រៀងមួយបទនេះ។

តបតាមការសំណូមពររបស់អ្នកគាំទ្រ ម៉ីហៀង បានបង្ហើរសំឡេងតាមបែបរដឺនបទ «ចន្ទ្រារំពឹង» ដោយសំឡេងផ្ទាល់គ្មានភ្លេងនោះទេ។ ទោះជាការបង្ហើរសំឡេងដោយគ្មានភ្លេង ហើយខ្លីក្តីប៉ុន្តែទឹកដមសំឡេងតារាចម្រៀងវ័យក្មេងប្រចាំផលិតកម្មរស្មីហង្សមាសរូបនេះទទួលបានការកោតសរសើរយ៉ាងខ្លាំងពីសំណាក់អ្នកលេងបណ្តាញសង្គម។

គួរបញ្ជាក់ផងដែរថា បច្ចុប្បន្ននេះ ឃុយ ម៉ីហៀង មានវ័យ១៨ឆ្នាំហើយ បន្ទាប់ពីប្រកួតប្រជែងក្នុងកម្មវិធី The Voice Kids Cambodia កាលពី៦ឆ្នាំមុនពេលនេះយុវតីរូបនេះប្រែសម្រស់ខ្លាំង។ មិនត្រឹមតែប៉ុណ្ណោះ ជារឿយៗ ម៉ីហៀង តែងតែទទួលបានការសរសើរពីអ្នកលេងបណ្តាញសង្គមក្រោយនាងបង្ហើរសំឡេងខ្លីៗតាមរយៈបទជាតិនិងអន្តរជាតិបង្ហោះនៅលើប្រព័ន្ធទិកតុក៕

ជាការពិតណាស់ ប្រទេសខ្មែរតែងតែប្រកាន់ភ្ជាប់នូវទំនៀមទំលាប់ប្រពៃណីជាច្រើន ដែលមានតាំងពីយូរយារណាស់មកហើយ។ ដូច្នេះមនុស្សភាគច្រើនប្រាកដជាដឹងច្បាស់ហើយអំពីចំណុចទាំង ១៦ របស់ស្រ្តីដែលចាស់បុរាណហៅថាចង្រៃ មានដូចជា កន្លងជើងប្ដី, ជេរប្រទេចប្តី, ដើរខ្លាំងៗបែបទន្រ្តំជើង, ហូបបាយគ្មានរបៀប, និងចេញចូលគ្មានសណ្ដាប់ធ្នាប់ជាដើម-ល-។ ចុះចំពោះបុរសវិញតើមានចំណុចអ្វីខ្លះដែលចាស់បុរាណហាមមិនឱ្យប្រព្រឹត្តទៅលើស្ត្រី? ខាងក្រោមនេះគឺជាអ្វីដែលមនុស្សប្រុសមិនគួរប្រព្រឹត្តព្រោះវាត្រូវបានចាស់បុរាណហៅ ថា “ចង្រៃ”៖

១. ដេកស៊ីកម្លាំងប្រពន្ធ។
២. ស្រែកគំហ៊កដាក់ប្រពន្ធ កូន ដោយគ្មានវិចារណញ្ញាណ។
៣. ប្រច័ណ្ឌដោយគ្មានហេតុផល។
៤. ដេកមិនខ្វល់ពីសុខទុក្ខប្រពន្ធកូន។
៥. ផឹកស៊ីមិនលោះថ្ងៃ។
៦. វាយដំប្រពន្ធកូន។
៧. មិនចេះទុកដាក់របស់ដែលប្រើប្រាស់រួចចូលកន្លែងដើម។
៨. លេបខាយ ញាក់មុខ ញាក់ភ្នែក ដាក់ស្រីផ្សេង។
៩. បំផ្លាញទ្រព្យសម្បត្តិក្នុងផ្ទះ។
១០. ហូកចុក ស៊ីឆ្ងាញ់តែម្នាក់ឯង មិនគិតពីប្រពន្ធកូន។
១១. ប្រើពាក្យ អញ ហែង។
១២. ប្រើសម្តីអសុរោះ ជេរប្រមាថ ប្រពន្ធ កូន។
១៣. ទុកមិត្តភក្តិ បនភឿនសំខាន់ជាងប្រពន្ធកូន។
១៤. មិនគិតការងារក្នុងបរិវេណផ្ទះ បណ្តោយឱ្យកខ្វក់។
១៥. មិនចេះលៃលកពេល នៅក្បែរប្រពន្ធឱ្យបានច្រើន។
១៦. លួចមានស្រីក្រៅ ឬមានប្រពន្ធចុងជាដើម៕

គួរបញ្ជាក់ដែលថា ចង្រៃគឺជាឧបទ្រព ហើយឧបទ្រព គឺជាសភាពដែលបង្អាប់សិរីសួស្ដី នឹងបណ្ដាលឱ្យមានទុក្ខ កង្វល់ ភយន្ដរាយជាដើម។ កាលណាបើបុរសមានគ្រប់ចំណុចខាងលើនេះបញ្ជាក់ថា អ្នកជាបុរសកំពូលចង្រៃគួរកែប្រែចេញទៅ។ ប៉ុន្តែបើអ្នកមានត្រឹមតែ ៥-៦ ចំណុចគឺស្ថិតក្នុងលក្ខខណ្ឌធម្មតា តែបើអ្នកគ្មានសូម្បី ១ ចំណុចនោះ គឺអស្ចារ្យជាទីបំផុត៕

មកទល់ពេលនេះព្រឹទ្ធាចារ្យគុនល្បុក្កតោក្រមាមាស ស៊ាន គឹមសៀន បានចេញពីបន្ទប់សង្គ្រោះបន្ទាន់ហើយបន្ទាប់ពីមានអាការៈធូរស្រាលពីជំងឺ ខណៈនាយករដ្ឋមន្រ្ដីនៃកម្ពុជា នីតិកាលទី ៧នៃរដ្ឋសភា ឯកឧត្តម ហ៊ុន ម៉ាណែត និងលោកជំទាវ ពេជ ចន្ទមុន្នី ឧបត្ថម្ភទំនុកបម្រុងទាំងស្រុងលើការព្យាយាលរបស់លោកគ្រូ ស៊ាន គឹមសៀន។

នៅលើទំព័រហ្វេកប៊ុករបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នៅរសៀលថ្ងៃទី១៩ ខែសីហា បានឱ្យដឹងថា «លោកគ្រូព្រឹទ្ធាចារ្យ ក្បាច់គុនល្បុក្កតោខ្មែរ ស៊ាន គឹមសៀន បានធ្លាក់ខ្លួនឈឺ និងបញ្ជូនចូលសង្គ្រោះបន្ទាន់នៅមន្ទីរពេទ្យមិត្តភាពកម្ពុជា-ចិន ព្រះកុសម: ។ ដោយទទួលបានការយកចិត្តទុកដាក់ដ៏ខ្ពង់ខ្ពស់ ពីសំណាក់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី រួមជាមួយក្រុមគ្រូពេទ្យជំនាញក្នុងការព្យាបាល ធ្វើឱ្យស្ថានភាពជំងឺរបស់លោកគ្រូព្រឹទ្ធាចារ្យ បានធូរស្រាល និងចាក២ចេញពីបន្ទប់សង្គ្រោះបន្ទាន់ហើយ ។ ការចំណាយទាំងអស់ទាំងក្នុងការព្យាបាល ស្នាក់នៅ និងហូបចុក គឺបានឧបត្ថម្ភទំនុកបម្រុងដោយ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី»។

គួរបញ្ជាក់ផងដែរថា កាលពីយប់ថ្ងៃទី១៣ សុខភាពរបស់លោកគ្រូ ស៊ាន គឹមសៀន មានអាការៈធ្វើទុក្ខខ្លាំងបន្ទាប់ពីបានវះកាន់រហូតត្រូវបញ្ជូនទៅសង្គ្រោះបន្ទាន់ នៅមន្ទីរពេទ្យមិត្តភាពកម្ពុជា-ចិន ព្រះកុសម:។ លោកគ្រូគឺជាស្ថាបនិកចងក្រងដួងព្រលឹងក្បាច់គុនបុរាណខ្មែរល្បុក្កតោ និងជាតួឯកក្នុងភាពយន្តរឿង «ព្រលឹងល្បុក្កតោ» ដែលអ្នកជំនាន់ក្រោយត្រូវដឹងគុណបំណាច់ដ៏ធំធេងរបស់លោក ដែលបានលះបង់យ៉ាងធំធេងនូវការរស់ឡើងវិញនៃក្បាច់គុនបុរាណខ្មែរល្បុក្កតោ៕