ប្រទេសថៃ ៖ ក្រោយពីថ្ងៃទី១១ ខែកញ្ញា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានថ្លែងគោលនយោបាយនៅរដ្ឋសភា និងចាប់ផ្តើមបំពេញការងារថ្ងៃដំបូងរបស់លោកក្នុងកិច្ចប្រជុំគណៈរដ្ឋមន្ត្រី ។ លោក សេដ្ឋា ថាវីស៊ីន លើកឡើងថា លោកនឹងបំពេញការងារដោយមិនខ្លាចនឿយហត់ ។

ខាងក្រុមនេះ គឺជាការងារសំខាន់ៗចំនួន៥ របស់លោក សេដ្ឋា ថាវីស៊ីន នាយករដ្ឋមន្ត្រីថ្មី ៖
១-កាត់បន្ថយការចំណាយក្នុងជីវភាពរស់នៅ ៖ ជំហានដំបូង រដ្ឋាភិបាលថៃនឹងបញ្ចុះតម្លៃអគ្គិសនី, បញ្ចុះតម្លៃហ្គាសសម្រាប់ចម្អិនអាហារ និងបញ្ចុះតម្លៃប្រេងម៉ាស៊ូត ដោយតម្លៃមិនលើសពី៣០បាតក្នុង១លីត្រ ។

២-ទាក់ទាញវិនិយោគិននៅលើពិភពលោក ៖ លោក សេដ្ឋា ថាវីស៊ីន បានធ្វើដំណើរទៅចូលរួមកិច្ចប្រជុំសមាជអង្គការសហប្រជាជាតិ ហើយលោកបានជជែកជាមួយនាយកគ្រប់គ្រងក្រុមហ៊ុនធំៗដូចជា លោក Elon Musk, ក្រុមហ៊ុន Microsoft, Google និងក្រុមហ៊ុនជាច្រើនទៀត ។

៣-ជំរុញការទំនាក់ទំនងជាមួយប្រទេសនានា ៖ លោក សេដ្ឋា ថាវីស៊ីន បានធ្វើដំណើរទស្សនកិច្ចទៅកាន់ប្រទេសកម្ពុជា, ព្រុយណេ, ម៉ាឡេស៊ី, សិង្ហបុរី, ហុងកុង និងចិន ចាប់ពីថ្ងៃទី១៦ ដល់ថ្ងៃទី១៩ ខែតុលា ឆ្នាំ២០២៣ ។ លើសពីនេះ លោកនាយករដ្ឋមន្ត្រីថៃ ក៏មានគម្រោងជួបជាមួយលោកប្រធានាធិបតីចិន ស៊ី ជិនពីង ផងដែរ ដើម្បីពិភាក្សាអំពីគម្រោង «ខ្សែក្រវ៉ាត់១ ផ្លូវ១ ឬ One Belt one Road» ហើយលោកមានគម្រោងធ្វើដំណើរទៅកាន់ប្រទេសអារ៉ាប៊ី សាអូឌីត ដើម្បីចូលរួមកិច្ចប្រជុំ ASEAN-GCC Economic Cooperation (GCC) ។

៤-ជួយកសិករផ្អាកការសងបំណុលធនាគារ ៖ រដ្ឋាភិបាលថៃបានប្រកាសឱ្យកសិករផ្អាកសងបំណុលធនាគាររយៈពេល៣ឆ្នាំ, បង្កើនប្រាក់ចំណូលកសិករ, ជំរុញ Soft Power, ដោះស្រាយបញ្ហាគ្រោះរាំងស្ងួតដោយសារបាតុភូតអេលនីណូ ។ លោក សេដ្ឋា ថាវីស៊ីន លើកឡើងថា លោកនឹងជំរុញឱ្យជីវភាពពលរដ្ឋថៃបានល្អប្រសើរជាងមុន ហើយក៏មានការអញ្ជើញនាយកគ្រប់គ្រងធនាគារប្រទេសថៃមកចូលរួមពិភាក្សាផងដែរ ។

៥-ជំរុញវិស័យទេសចរណ៍ ៖ គោលនយោបាយចម្បងក្នុងការជំរុញវិស័យទេសចរណ៍ គឺការលើកលែងទិដ្ឋាការសម្រាប់ភ្ញៀវទេសចរចិន និងកាហ្សាក់ស្ថាន ដើម្បីជួយឱ្យសេដ្ឋកិច្ចប្រទេសថៃល្អប្រសើរឡើង គឺអនុវត្តចាប់ពីថ្ងៃទី២៥ ខែកញ្ញា ឆ្នាំ២០២៣ រហូតដល់ខែកុម្ភៈ ឆ្នាំ២០២៤ ។ លើសពីនេះ រដ្ឋាភិបាលថៃក៏មានគោលនយោបាយផ្តល់ប្រាក់ឱ្យពលរដ្ឋថៃក្នុងម្នាក់ចំនួន១ម៉ឺនបាតផងដែរ ។

នៅពេលលោក សេដ្ឋា ថាវីស៊ីន ឡើងកាន់តំណែងជានាយករដ្ឋមន្ត្រីប្រទេសថៃ លោកបានជួបនឹងហេតុការណ៍ធំៗដូចជា ការបា.ញ់ប្រហា.រនៅ Siam Paragon, ទឹកជំនន់នៅភាគខាងជើងប្រទេសថៃ និងសង្គ្រាមនៅប្រទេសអ៊ីស្រាអែលជាមួយប៉ាឡេស្ទីន ។ ភាគីនានាកំពុងសង្កេតមើលថា តើរដ្ឋាភិបាលរបស់លោក សេដ្ឋា ថាវីស៊ីន នឹងដោះស្រាយរឿងរ៉ាវទាំងអស់នេះដោយរបៀបណា ? ប្រភព ៖ chiangmai news

ប្រទេសអ៊ីស្រាអែល ៖ ក្រុមហាម៉ាស់បានប្រកាសថា ពួកគេនឹងដោះលែងចំណាប់ខ្មាំងជាជនបរទេសទាំងអស់ រួមទាំងជនជាតិថៃផងដែរ នៅពេលស្ថានការណ៍សមស្រប ហើយពួកគេចាត់ទុកថា ក្រុមចំណាប់ខ្មាំងទាំងនេះ ប្រៀបដូចជាភ្ញៀវរបស់ពួកគេដែរ ។

នៅថ្ងៃទី១៧ ខែតុលា ឆ្នាំ២០២៣ សារព័ត៌មានបរទេសចុះផ្សាយថា លោក អាប៊ូ អូបៃដា (Abu Obaida) អ្នកនាំពាក្យរបស់ក្រុមហាម៉ាស់ បាននិយាយកាលពីថ្ងៃទី១៦ ខែតុលា ថា ពួកគេនឹងដោះលែងក្រុមចំណាប់ខ្មាំងទាំងអស់ដែលមិនមែនជាជនជាតិអ៊ីស្រាអែល ខណៈចំណាប់ខ្មាំងទាំងនេះត្រូវបានក្រុមហាម៉ាស់ចាប់ខ្លួន ។ ពួកគេគឺជាភ្ញៀវរបស់យើង ហើយយើងសូមទោសដែលបានចាប់ខ្លួនពួកគេ ។ ដូច្នេះ ចំណាប់ខ្មាំងបរទេសនឹងត្រូវដោះលែងយ៉ាងពិតប្រាកដ នៅពេលស្ថានការណ៍សមស្រប ។

ក្រុមហាម៉ាស់បានចាប់មនុស្សធ្វើជាចំណាប់ខ្មាំងប្រមាណពី២០០នាក់ ទៅ២៥០នាក់ ប៉ុន្តែកងទ័ពអ៊ីស្រាអែលបញ្ជាក់ថា ចំណាប់ខ្មាំងដែលក្រុមហាម៉ាស់ចាប់ខ្លួនទៅកាន់តំបន់ Gazana Strip ស្មើចំនួន១៩៩នាក់ ។ ហេតុនេះ វាបានកើនឡើងពីចំនួន១៥៥នាក់ ដែលកងទ័ពអ៊ីស្រាអែលធ្លាប់ប្រកាសនាពេលកន្លងមក ។

ចំណែកលោក មុសា អាប៊ូ ម៉ាហ្សុក (Moussa Abu Marzouk) ជាមន្ត្រីជាន់ខ្ពស់ម្នាក់ទៀតរបស់ក្រុមហាម៉ាស់និយាយថា យើងមិនអាចបញ្ជាក់ពីចំនួនក្រុមចំណាប់ខ្មាំងជនបរទេសឱ្យច្បាស់លាស់ និងមិនទាន់អាចដោះលែងពួកគេទេ ដោយសារប្រទេសអ៊ីស្រាអែលបានបន្តទម្លាក់គ្រាប់បែកនៅតំបន់ Gazana Strip ជាបន្តបន្ទាប់ ។

រីឯលោក ខាលេត មេសាល (Khaled Meshal) ប្រធានការិយាល័យជនភៀសខ្លួនប្រចាំទីក្រុងដូហា ប្រទេសកាតា និងក្នុងឋានៈជាអតីតមេដឹកនាំក្រុមហាម៉ាស់និយាយថា ក្រុមហាម៉ាស់មានអ្វីដែលខ្លួនត្រូវការ គឺពួកគេចង់ឱ្យដោះលែងជនជាតិប៉ាឡេស្ទីនទាំងអស់ ដែលជាប់ក្នុងពន្ធនាគាររបស់ប្រទេសអ៊ីស្រាអែលបច្ចុប្បន្ន ។ ចំណែកអាជ្ញាធរអ៊ីស្រាអែលនៅមិនទាន់ធ្វើអត្ថាធិប្បាយអ្វីទេ ពាក់ព័ន្ធនឹងការប្រកាសរបស់ក្រុមហាម៉ាស់ ៕ ប្រភព ៖ Amarin TV

តាមការឱ្យដឹងពីក្រសួងទេសចរណ៍នៅថ្ងៃទី១៧ តុលា បានបង្ហាញថាប្រជាពលរដ្ឋដែលបានដើរកម្សាន្តនាឱកាសពិធីបុណ្យភ្ជំបិណ្ឌ ចាប់ពីថ្ងៃទី១៣ ដល់ ថ្ងៃទី១៥ ខែតុលា ឆ្នាំ២០២៣ មានទេសចរជាតិប្រមាណ ១,៨៩ លាននាក់ និងទេសចរបរទេសប្រមាណ ២,៧ ម៉ឺននាក់ ខណៈខេត្តត្បូឃ្មុំក្លាយជាគោលដៅសំខាន់មានទេសចរមកកម្សាន្តច្រើនជាងគេ។

តួលេខទេសចរខាងលើនេះបានបង្ហាញថាភ្ញៀវជាតិកើនឡើង ៥២,២% ធៀបរយៈពេលដូចគ្នាឆ្នាំ២០២២ និង ភ្ញៀវរបរទេសកើនឡើង ៩០,៥% ធៀបរយៈពេលដូចគ្នាឆ្នាំ២០២២។ ប្រភពដដែលបានគូសបញ្ជាក់ថាគោលដៅទេសចរណ៍សំខាន់ៗរយៈពេល០៣ថ្ងៃនេះ រួមមាន៖
១. ត្បូងឃ្មុំ : ៤៤០,៣០០ នាក់
២. បាត់ដំបង : ២១១,៣២៩ នាក់
៣. កំពង់ឆ្នាំង : ១៦៨,០៦១ នាក់
៤. ព្រះសីហនុ : ១៥៧,០៤៦ នាក់
៥. សៀមរាប : ១២៥,៤៤៩ នាក់
ជាការកត់សម្គាល់លើរបាយការណ៍ស្ថិតិទេសចរណ៍នេះ រួមមានស្ថិតិទេសចរផ្ទៃក្នុងសរុបប្រមាណ ១,៩២ លាននាក់នេះ គឺរដ្ឋបាលរាជធានីខេត្តបានរាប់បញ្ចូលចំនួន ទេសចរជាតិ និងចំនួនបងប្អូនប្រជាពលរដ្ឋដែលបានធ្វើដំណើរកម្សាន្តនៅតាមរមណីយដ្ឋាន និងគោលដៅទេសចរណ៍ទូទាំងប្រទេស ព្រមជាមួយបងប្អូនប្រជាពលរដ្ឋដែលលេងកម្សាន្តនៅតាមភូមិស្រុក និងតាមទីតាំងរៀបចំកម្មវិធីនានា។

ជាមួយគ្នានេះ តាមគោលដៅទេសចរណ៍ខេត្តមួយចំនួនបានរៀបចំព្រឹត្តិការណ៍ផ្សេងៗ ដើម្បីទាក់ទាញទេសចរណ៍ឱ្យមកកម្សាន្តខេត្តរបស់ខ្លួន ក្នុងនោះខេត្តត្បូងឃ្មុំបានរៀបចំព្រឹត្តិការណ៍បុណ្យអុំទូកបណ្តែតប្រទីប ភូមិមួយផលិតផលមួយ ការប្រគំតន្ដ្រីខ្នាតយក្ស និងការបាញ់កាំជ្រួច និងខេត្តកំពង់ឆ្នាំង មានរៀបចំព្រឹត្តិការណ៍ទេសចរណ៍ជំនឿព្រះពុទ្ធសាសនាដែលមានការចូលរួមពីទេសចរបរទេសផងដែរ និងការរៀបចំកម្មវិធីដទៃទៀតនៅគ្រប់រាជធានីខេត្ត ពិសេសនៅតាមទីប្រជុំជនទីរួមខេត្ត ទីរួមស្រុក តំបន់គោលដៅទេសចរណ៍សំខាន់ៗ វត្តអារាម និងនៅតាមភូមិស្រុកនានា គឺជាកត្តាដែលបានទាក់ទាញទេសចរដើរកម្សាន្តយ៉ាងច្រើនកុះករ៕

ប្រទេសថៃ៖ ដំណឹងល្អសម្រាប់ភ្ញៀវទេសចរណា ដែលមានគម្រោងធ្វើដំណើរទៅក្រៅប្រទេសជាមួយក្រុមហ៊ុន Air Asia បានធ្វើការប្រូម៉ូសិនសំបុត្រយន្តហោះម្តងទៀតដោយឥតគិតថ្លៃ ទាំងជើងហោះហើរក្នុងប្រទេស និងក្រៅប្រទេស ដោយមានកៅទំនេរជាង ៣០,០០០ កៅអី។ ដូច្នេះ ភ្ញៀវទេសចរអាចធ្វើការកក់ចាប់ពីថ្ងៃទី ១៦ ខែតុលា ឆ្នាំ ២០២៣ នេះតទៅ ដល់ថ្ងៃទី ២៥ ខែតុលា ឆ្នាំ ២០២៣ វេលាម៉ោង ៩:០០ ព្រឹក ដល់ម៉ោង ១១:០០ យប់ នឹងធ្វើដំណើរចាប់ពីថ្ងៃទី ៤ ខែមីនា ឆ្នាំ ២០២៤ ដល់ថ្ងៃទី ១៩ ខែមីនា ឆ្នាំ ២០២៥។

ការប្រូម៉ូសិនមានកំណត់ ដោយប្រូម៉ូសិនពិសេសនេះមានសម្រាប់តែជើងហោះហើរដែលមានលេខកូដ FD ប៉ុណ្ណោះ។ ទោះជាយ៉ាងណាក៏ដោយ សម្រាប់តម្លៃសំបុត្ររបស់ Air Asia មិនរាប់បញ្ចូលពន្ធព្រលានយន្តហោះឡើយ រីឯពន្ធប្រេងឥន្ធនៈ សេវាបន្ថែម និងថ្លៃសេវាផ្សេងៗទៀត តម្លៃប្រូម៉ូសិនចាប់ផ្តើមពី ០ បាត ក្នុងមួយផ្លូវ ដោយអ្នកអាចកក់បានតាមរយៈ airasia.com និង airasia superapp ប៉ុណ្ណោះយោងទៅតាមលក្ខខណ្ឌរបស់ក្រុមហ៊ុន។

គួរបញ្ជាក់ដែរថា តម្លៃសំបុត្រមួយជើងចាប់ផ្តើមពី ០ បាតសម្រាប់តែជើងហោះហើរក្នុងស្រុកដូចជា បាំងកកទៅឈៀងម៉ៃ, បុរីរ៉ាំ, អ៊ូប៊ុន រាជថានី, ឧដុង្គថានី, នគរស៊ីធម្មរាត, ដាវ, ស៊ូរ៉ាត់ថានី, និងភូកេត។ ចំណែកឯជើងហោះហើរក្រៅប្រទេសវិញមានដូចជា ពីឈៀងម៉ៃ ទៅដាណាង និងហាណូយ, ក្វាងចូវ, ម៉ាកាវ, ឆុងឈីង, ក្រុង Shenzhen, ទីក្រុង Chengdu (Tianfu), សិង្ហបុរី, កូឡុំប៊ី, ទីក្រុងហូជីមិញ, Johor Bahru, វៀងច័ន្ទ, សៀមរាប, ភ្នំពេញ, និងយ៉ាំងហ្គោន។

របៀបកក់ប្រាក់ប្រូម៉ូសិន ០ បាតពី Air Asia៖
-ការកក់សំបុត្រយន្តហោះ Air Asia ចាប់ផ្តើមពីថ្ងៃទី ១៦ ខែតុលា ឆ្នាំ ២០២៣ វេលាម៉ោង ៩:០០ ព្រឹក ដល់ថ្ងៃទី ២៥ តុលា ២០២៣ វេលាម៉ោង ១១:០០ យប់។
-រយៈពេលធ្វើដំណើរចាប់ផ្តើមនៅថ្ងៃទី ៤ មីនា ២០២៤ ដល់ ១៩ មីនា ២០២៥។
-ការកក់សំបុត្រយន្តហោះ Air Asia តាមរយៈ airasia.com និង airasia Superapp តែប៉ុណ្ណោះ៕
ប្រភព៖sanook

ប្រទេសវៀតណាម ៖ Cushman & Wakefield គឺជាក្រុមហ៊ុនផ្តល់សេវាកម្មផ្នែកអចលនទ្រព្យពាណិជ្ជកម្មលំដាប់ពិភពលោក បានកត់សម្គាល់ថា វៀតណាមបានក្លាយជាប្រទេសគោលដៅរបស់បណ្តាក្រុមហ៊ុនជាច្រើនផ្នែកផលិត និង Logistics ដោយសារការរីកចម្រើនផ្នែក Ecommerce រួមផ្សំនឹងតម្រូវការកើនឡើងក្នុងវិស័យអចលនទ្រព្យ ដែលមានប្រព័ន្ធ Logistics នាំមុខគេនៅវៀតណាម ។

អ្នកជំនាញរបស់ក្រុមហ៊ុនលើកឡើងថា វៀតណាមជាទីតាំងយុទ្ធសាស្ត្រជាប់ច្រករបៀងសេដ្ឋកិច្ចភាគខាងត្បូងរបស់ប្រទេសចិន ។ ដូច្នេះ វៀតណាមជាទីតាំងរបស់ការិយាល័យធំៗនៃក្រុមហ៊ុនឧស្សាហកម្ម, គីមី, ពាណិជ្ជកម្ម និងបច្ចេកវិទ្យាអេឡិចត្រូនិកជាច្រើន ។ ក្រុមហ៊ុនផលិតឧបករណ៍អេឡិចត្រូនិកលំដាប់ពិភពលោកជាច្រើនបានជ្រើសរើសវៀតណាមធ្វើជាគោលដៅរបស់ពួកគេ ដូចជា ៖ Panasonic, LG Display, Canon, Foxconn, Samsung, Jinko Solar និងក្រុមហ៊ុនជាច្រើនទៀត ។

ក្រៅពីនេះ វៀតណាមមានប្រៀបផ្នែកប្រព័ន្ធគមនាគមន៍សម្បូរបែប ដោយសារប្រទេសនេះមានឆ្នេរសមុទ្រយ៉ាងវែងសម្រាប់ធ្វើជាទីតាំងរបស់កំពង់ផែធំៗជាច្រើនកន្លែង ។ លើសពីនេះ វៀតណាមមានផ្លូវរថភ្លើងចំនួន២ខ្សែតភ្ជាប់ជាមួយប្រទេសចិន រួមទាំងមានផ្លូវប្រវែងរាប់សែនគីឡូម៉ែត្រជាច្រើនខ្សែទៀត ។

ចំណុចគួរកត់សម្គាល់ គឺក្នុងរយៈពេលប៉ុន្មានឆ្នាំមកនេះ មានការវិនិយោគក្នុងប្រព័ន្ធកំពង់ផែជាច្រើននៅវៀតណាម ព្រមទាំងបំពាក់ដោយគ្រឿងបរិក្ខារទំនើបៗស្របតាមស្តង់ដារអន្តរជាតិ ជាពិសេស កំពង់ផែទូរកុងតឺន័រនៅទីក្រុងហាយហ្វុង និងទីក្រុងហូជីមិញ ។ កំពង់ផែទាំងពីរកន្លែងនេះស្ថិតក្នុងចំណោមកំពង់ផែដ៏ធំបំផុតនៅលើពិភពលោក ចំនួន៥០ ។

លក្ខខណ្ឌគួរឱ្យទាក់ទាញទាំងនេះបានធ្វើឱ្យវៀតណាមមានសក្តានុពលគ្រប់គ្រាន់ ដើម្បីប្រកួតប្រជែងជាមួយមជ្ឈមណ្ឌល Logistics លំដាប់ពិភពលោកផ្សេងៗ ដូចជា ៖ ទីក្រុងឌូបៃរបស់សហព័ន្ធអារ៉ាប់រួម, ហុងកុង ឬសូម្បីតែសិង្ហបុរី និងទីក្រុងសៀងហៃរបស់ចិន ។ ហេតុនេះ វៀតណាមមិនត្រឹមតែត្រូវការក្លាយជាមជ្ឈមណ្ឌលដឹកជញ្ជូនទំនិញលំដាប់ពិភពលោកប៉ុណ្ណោះទេ ប៉ុន្តែវៀតណាមក៏ជាតំបន់តភ្ជាប់ដ៏សំខាន់សម្រាប់ខ្សែសង្វាក់ផ្គត់ផ្គង់ផលិតកម្មលំដាប់ពិភពលោកផងដែរ ៕ ប្រភព ៖ AEC connect