ប្រហិតក្តាម គឺជាចំណីអាហារដែលមនុស្សជាច្រើននាក់ចូលចិត្តបរិភោគ ពីព្រោះវាងាយស្រួលបរិភោគ មានរសជាតិឆ្ងាញ់ ថែមទាំងងាយស្រួលរកទិញផងដែរ ។ ដូច្នេះ មិនប្លែកទេ ដែលប្រហិតក្តាមបានក្លាយជាអាហារចំណង់ចំណូលចិត្តរបស់ពួកគេ ។ ប៉ុន្តែតើដឹងឬទេថា ប្រហិតក្តាមដែលយើងបានបរិភោគមករហូតនោះ វាមិនបានផលិតឡើងពីសាច់ក្តាមទេ សូម្បីតែ១% ក៏គ្មានដែរ ។

យើងនឹងណែនាំឱ្យអ្នកទាំងអស់គ្នាស្គាល់ពីគ្រឿងផ្សំរបស់ប្រហិតក្តាមថា ការពិត តើគេធ្វើប្រហិតក្តាមមកពីគ្រឿងផ្សំអ្វីខ្លះ ? ប្រសិនបើគ្មានសាច់ក្តាមទេនោះ ហើយហេតុអ្វីបានជាគេហៅថា ប្រហិតក្តាម ?

ប្រហិតក្តាម បើទោះជាវាមានឈ្មោះថាក្តាម ការពិត គេមិនបានធ្វើវាពីសាច់ក្តាមទេ ប៉ុន្តែគេធ្វើវាពីសាច់ត្រីកិនហ្មត់លាយជាមួយម្សៅ, អំបិល, ស្ករ និងគ្រឿងផ្សំផ្សេងទៀត ។ បន្ទាប់មក គេយកវាទៅសម្ងួតឱ្យស្ងួត និងដាក់បន្ថែមពណ៌ចូលដើម្បីមើលទៅគួរឱ្យចង់បរិភោគ និងទាក់ទាញអ្នកទិញ ។

ក្រៅពីនេះ វាអាចដោយសារគេនិយមបរិភោគប្រហិតក្តាមជាមួយទឹកជ្រលក់គ្រឿងសមុទ្រ ដែលតែងមានគ្រឿងផ្សំដូចជា ក្រូចឆ្មារ និងម្ទេស ។ ហេតុនេះហើយ ទើបធ្វើឱ្យប្រហិតក្តាមមានរសជាតិស្រដៀងគ្នានឹងអាហារសមុទ្រផ្សេងទៀត ៕ ប្រភព ៖ sanook

ប្រទេសចិន ៖ នៅពេលនិយាយដល់ផ្លែទំពាំងបាយជូរ ជនជាតិចិននឹងនឹកឃើញដល់ទីក្រុង Turpan ស្ថិតក្នុងតំបន់ស៊ីនជាំង (Xinjiang) ដែលជាទីកន្លែងដាំដុះដំណាំទំពាំងបាយជូរមានឈ្មោះល្បីល្បាញ ហើយគេបានដាក់ឈ្មោះថា «ទីក្រុងទំពាំងបាយជូរ» នៅប្រទេសចិន ។ ទីក្រុង Turpan បានដាំទំពាំងបាយជូរអស់រយៈពេលជាង២.០០០ឆ្នាំ ហើយគឺជាទីក្រុងតែមួយគត់នៅប្រទេសចិន ដែលមានទីតាំងភូមិសាស្ត្រអំណោយផលដល់ការដាំដុះ និងឧស្សាហកម្មផលិតទំពាំងបាយជូរ ។

ចាប់ពីពាក់កណ្តាលខែ រហូតដល់ចុងខែសីហា រៀងរាល់ឆ្នាំ គឺជារដូវកាលប្រមូលផលផ្លែទំពាំងបាយជូរនៅទីក្រុង Turpan ។ នៅទីក្រុងនេះមានសីតុណ្ហភាពខ្ពស់, មានពន្លឺព្រះអាទិត្យយូរ ហើយសីតុណ្ហភាពរវាងពេលថ្ងៃ និងពេលយប់ខុសគ្នាខ្លាំង ។ ហេតុនេះ វាបានអំណោយផលដល់ការដុះលូតលាស់ដំណាំទំពាំងបាយជូរ ខណៈក្នុងទីក្រុងនេះមានកន្លែងស្តុកទឹកនៅក្រោមដីយ៉ាងច្រើន ។

ផ្លែទំពាំងបាយជូរដែលដាំនៅទីក្រុង Turpan មានបរិមាណជាតិស្ករខ្ពស់ និងរសជាតិផ្អែមជាពិសេស ។ ចំណែកនៅស្រុក Sunson គឺជាកន្លែងផលិតទំពាំងបាយជូរក្រៀម ហើយចាប់ពីដើមខែសីហា រហូតដល់ចុងខែកញ្ញា ជារៀងរាល់ឆ្នាំ គឺជារដូវកាលប្រមូលផលផ្លែទំពាំងបាយជូរក្នុងស្រុកនេះ ។ កសិករក្នុងតំបន់និយាយថា តាមធម្មតា ទំពាំងបាយជូរស្រស់មានទម្ងន់៥គីឡូក្រាម អាចកែច្នៃធ្វើជាទំពាំងបាយជូរក្រៀមបាន១គីឡូក្រាម ហើយប្រាក់ចំណូលចម្បងរបស់ពួកគេ គឺបានមកពីការលក់ទំពាំងបាយជូរស្រស់ និងក្រៀម ។

នៅខែសីហា ឆ្នាំ២០២៣ ទីក្រុង Turpan បានរៀបចំការតាំងពិព័រណ៍ស្រាទំពាំងបាយជូរ ដែលបានទាក់ទាញក្រុមហ៊ុនស្រានៅតំបន់ស៊ីនជាំង ជាង៨០ក្រុមហ៊ុន ។ លើសពីនេះ គេក៏បានតាំងបង្ហាញផលិតផលស្រាទំពាំងបាយជូរជិត១.០០០ប្រភេទទៀត ។ បច្ចុប្បន្ន ទីក្រុង Turpan បានបង្កើតរោងចក្រផលិតស្រាទំពាំងបាយជូរនាំមុខជាច្រើនកន្លែង ហើយនាំចេញទៅកាន់១០ប្រទេសនិងតំបន់ ដូចជា ប្រទេសអង់គ្លេស, បារាំង, អ៊ីតាលី, ជប៉ុន និងសិង្ហបុរី ជាដើម ៕ ប្រភព ៖ China face

បរទេស៖ សហរដ្ឋអាមេរិកបានជំរុញឱ្យពលរដ្ឋរបស់ខ្លួនចាកចេញពីប្រទេសហៃទី “ជាបន្ទាន់” ដោយសារតែភាពចលាចលអសន្តិសុខក្នុងប្រទេសនេះកើនឡើង។

យោងតាមស្ថានទូតអាមេរិកប្រចាំប្រទេសហៃទីបាននិយាយកាលពីថ្ងៃទី ៣០ ខែសីហាថា “ដោយសារតែស្ថានភាពអសន្តិសុខនាពេលបច្ចុប្បន្ន និងការប្រឈមផ្នែកហេដ្ឋារចនាសម្ព័ន្ធ ប្រជាពលរដ្ឋអាមេរិកនៅក្នុងប្រទេសហៃទីគួរតែចាកចេញឱ្យបានឆាប់តាមដែលអាចធ្វើទៅបាន។

ដូច្នេះហើយ បច្ចុប្បន្នស្ថានភាពអសន្តិសុខនៅប្រទេសហៃទី ជាពិសេសទីក្រុង Port-au-Prince កាន់តែធ្ងន់ធ្ងរក្នុងរយៈពេលប៉ុន្មានខែថ្មីៗនេះ។ ក្រុមក្មេងទំនើងកាន់តែខ្លាំងឡើងចាប់តាំងពីការធ្វើឃាតប្រធានាធិបតី Jovenel Moise ក្នុងខែកក្កដា ឆ្នាំ២០២១ ហើយកំពុងគ្រប់គ្រងប្រហែល ៨០% នៃរដ្ឋធានីរបស់ប្រទេសហៃទី។ ស្ថានទូតអាមេរិកនៅក្នុងប្រទេសហៃទីត្រូវបានបិទជាបណ្ដោះអាសន្ននៅដើមខែនេះ ដោយសារអំពើហិង្សាក្រុមក្មេងទំនើងរីករាលដាល។ ក្រសួងការបរទេសសហរដ្ឋអាមេរិកបានចេញសេចក្តីណែនាំ “កុំធ្វើដំណើរ” ទៅកាន់ប្រទេសហៃទី នៅចុងខែកក្កដានេះដោយសង្កត់ធ្ងន់លើហានិភ័យនៃការចាប់ពង្រត់។ អំពើហិង្សាដោយក្រុមមនុស្សបានបង្ខំប្រជាជនហៃទីយ៉ាងហោចណាស់ ១៦៥,០០០ នាក់ឱ្យភៀសខ្លួនចេញពីផ្ទះសម្បែង និងផ្លាស់ទៅទីជម្រកបណ្ដោះអាសន្ន។
ដូច្នេះថ្មីៗនេះ សហរដ្ឋអាមេរិក កំពុងរៀបចំផែនការពង្រាយកម្លាំងប៉ូលិសចម្រុះជាតិសាសន៍ដែលដឹកនាំដោយប្រទេសកេនយ៉ាទៅកាន់ប្រទេសហៃទី។ កម្លាំងនេះនឹងមានភារកិច្ចបង្ក្រាបក្រុមក្មេងទំនើង ជាចម្បងនៅទីក្រុង Port-au-Prince៕
ប្រភព៖vnexpress

ប្រទេសជប៉ុន ៖ នាយករដ្ឋមន្ត្រីជប៉ុន លោក Fumio Kishida បានបរិភោគអាហារសមុទ្រដែលចាប់បាននៅឆ្នេរសមុទ្រខេត្ត Fukushima ព្រមទាំងបញ្ជាក់ថា វាមានរសជាតិឆ្ងាញ់ និងសុវត្ថិភាព ។ លោកនាយករដ្ឋមន្ត្រីជប៉ុនបរិភោគអាហារសមុទ្រនេះ ដើម្បីកាត់បន្ថយការបារម្ភពាក់ព័ន្ធនឹងផលប៉ះពាល់ដោយសារការបង្ហូរទឹកមានលាយសារធាតុវិទ្យុសកម្មចេញពីរោងចក្រថាមពលនុយក្លេអ៊ែរចូលក្នុងសមុទ្រ ។

រដ្ឋាភិបាលជប៉ុនបានចេញផ្សាយវីដេអូមួយបង្ហាញពីនាយករដ្ឋមន្ត្រីជប៉ុន លោក Fumio Kishida និងរដ្ឋមន្ត្រី៣រូបទៀតបរិភោគអាហារសមុទ្រស្រស់ៗដែលចាប់បានពីឆ្នេរសមុទ្រខេត្ត Fukushima កាលពីថ្ងៃទី៣០ ខែសីហា ឆ្នាំ២០២៣ ។ ក្នុងវីដេអូនេះ គេឃើញមេដឹកនាំប្រទេសជប៉ុនបានអញ្ជើញឱ្យអ្នកទស្សនាបរិភោគអាហារសមុទ្ររបស់ជប៉ុនដែលមានរសជាតិឆ្ងាញ់ និងសុវត្ថិភាព ដើម្បីគាំទ្រការនេសាទនៅតំបន់ភាគឦសានប្រទេសជប៉ុន ។

លោក Yasutoshi Nishimura រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្ម ដែលទទួលខុសត្រូវផ្នែកគោលនយោបាយនុយក្លេអ៊ែរ បានលើកឡើងក្រោយពីជួបជាមួយនាយករដ្ឋមន្ត្រីជប៉ុនថា លោក Fumio Kishida បានបរិភោគអាហារសមុទ្រជាមួយបាយ ។ លោក Yasutoshi Nishimura និយាយថា ៖ «រដ្ឋាភិបាលជប៉ុនចង់ជូនដំណឹងទៅកាន់ពលរដ្ឋជប៉ុន និងប្រទេសនានាថា អាហារសមុទ្រដែលចាប់បាននៅជិតរោងចក្រថាមពល Fukushima មានសុវត្ថិភាព» ។

ការផ្សព្វផ្សាយវីដេអូនេះកើតឡើងក្រោយពីប្រទេសចិនហាមនាំចូលអាហារសមុទ្រគ្រប់ប្រភេទពីជប៉ុនភ្លាមៗ ដោយសារជប៉ុនចាប់ផ្តើមបង្ហូរទឹកលាយសារធាតុវិទ្យុសកម្មចេញពីរោងចក្រថាមពលនុយក្លេអ៊ែរចូលក្នុងមហាសមុទ្រប៉ាស៊ីហ្វិក កាលពីថ្ងៃទី២៤ ខែសីហា ឆ្នាំ២០២៣ ។ ក្រៅពីនេះ ជប៉ុនបានប្រឈមនឹងការប្រឆាំងតវ៉ា និងការគំរាមផ្សេងៗដូចជា ការហៅទូរស័ព្ទរំខានដល់អាជីវកម្មជប៉ុន និងការអំពាវនាវហាមនាំចូលផលិតផលជប៉ុន ។

នាយករដ្ឋមន្ត្រីជប៉ុន លោក Fumio Kishida បានពន្យល់ទៅប្រទេសនានាថា ការបង្ហូរទឹកចេញពីរោងចក្រគ្មានគ្រោះថ្នាក់ដល់សុខភាពទេ ហើយគ្រប់លក្ខខណ្ឌបានអនុវត្តតាមស្តង់ដារវិទ្យាសាស្ត្រ ហើយជប៉ុននឹងផ្សព្វផ្សាយទិន្នន័យត្រួតពិនិត្យការបំពុលទឹកសមុទ្រយ៉ាងបើកចំហ ។

លោកនាយករដ្ឋមន្ត្រីជប៉ុនមានគម្រោងធ្វើដំណើរទៅប្រទេសឥណ្ឌូណេស៊ី និងឥណ្ឌា សរុបរយៈពេល៧ថ្ងៃ គឺចាប់ពីថ្ងៃទី៥ ខែកញ្ញា ឆ្នាំ២០២៣ តទៅ ដើម្បីចូលរួមក្នុងកិច្ចប្រជុំកំពូលមេដឹកនាំអាស៊ាន និងក្រុមប្រទេស G20 ។ អ្នកវិភាគនិយាយថា តើលោកនាយករដ្ឋមន្ត្រីជប៉ុននឹងមានឱកាសជជែកជាមួយមេដឹកនាំចិនដែរឬទេ? ខណៈលោកនាយករដ្ឋមន្ត្រី Li Qiang នឹងចូលរួមក្នុងកិច្ចប្រជុំអាស៊ាន ហើយប្រធានាធិបតីចិន លោក ស៊ី ជិនពីង អាចចូលរួមកិច្ចប្រជុំក្រុមប្រទេស G20 ៕ ប្រភព ៖ Nation World News