រាជធានីតូក្យូ៖ ក្រោយពេលរដ្ឋាភិបាលក្រុងតូក្យូ បានសម្រេចបង្ហូរទឹក ចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា ដែលបានបន្សាបជាតិវិទ្យុសកម្ម បញ្ចូលទៅក្នុងមហាសមុទ្រប៉ាស៊ីហ្វិកនោះភ្លាម ក៏មានប្រតិកម្មយ៉ាងខ្លាំង មកពីក្រុងប៉េកាំង ហើយបានហាមឃាត់នូវការនាំចូលម្ហូបអាហារសមុទ្រ មកពីខេត្តចំនួន១០របស់ជប៉ុន ប៉ុន្ដែឥឡូវនេះ ប្រេសិតរបស់សហរដ្ឋអាមេរិក បែរយកត្រីនៅក្នុងតំបន់នោះ មករៀបចំពិធីជប់លៀង ហើយថែមទាំងបានស្ដីបន្ទោសដល់ចិន ជុំវិញបញ្ហានេះ។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃសុក្រ ទី១ ខែកញ្ញា ថា បេសកជនរបស់សហរដ្ឋអាមេរិក ប្រចាំនៅប្រទេសជប៉ុន កាលពីថ្ងៃព្រហស្បតិ៍ (ទី៣១ ខែសីហា) បានរៀបចំពិធីជប់លៀងមួយ ដោយយកត្រីចេញពីតំបន់ហ៊្វូគូស៊ីម៉ា (Fukushima) ហើយគាត់ថែមទាំងបានអះអាង ថា ទឹកបង្ហូរចេញពីរោងចក្រថាមពលនុយក្លេអែរ ដែលរងគ្រោះមហន្ដរាយ ពីមហារលកយក្សស៊ូណាមិ ដែលត្រូវបានបន្សាបជាតិវិទ្យុសកម្ម មានសុវត្ថិភាពល្អជាងទឹកបង្ហូរចេញពីរោងចក្រ នៅក្នុងប្រទេសចិន។

រដ្ឋាភិបាលក្រុងប៉េកាំង កាលពីសប្តាហ៍មុន បានហាមឃាត់នូវការនាំចូលម្ហូបអាហារសមុទ្រទាំងអស់ មកពីប្រទេសជិតខាងរបស់ចិន ក្រោយពេលជប៉ុន បានចាប់ផ្តើមបញ្ចេញទឹកសំណល់ ចេញពីរោងចក្រថាមពលនុយក្លេអ៊ែរហ៊្វគូស៊ីម៉ា ចូលទៅក្នុងមហាសមុទ្រប៉ាស៊ីហ្វិក។ ចិន បានចោទប្រកាន់ក្រុងតូក្យូ ថា ជប៉ុន ចាត់ទុកមហាសមុទ្រ ដូចជា«លូបង្ហូរទឹកសំណល់»។

លោក រ៉ាម អេម៉ាញូល (Rahm Emanuel) ឯកអគ្គរដ្ឋទូតសហរដ្ឋអាមេរិក បានថ្លែង នៅក្នុងអំឡុងទៅពិនិត្យមើលតំបន់រោងចក្រនុយក្លេអ៊ែរ ដែលត្រូវបានបំផ្លិចបំផ្លាញ នៅក្នុងអំឡុងឆ្នាំ២០១១ ថា «អស់រយៈពេលមួយទសវត្សរ៍កន្លងមកនេះ ជប៉ុនបានធ្វើរឿងត្រឹមត្រូវ តាមវិធីសាស្រ្ដដ៏ល្អ។ ភាពហ្មត់ចត់ខាងវិទ្យាសាស្រ្ដអន្ដរជាតិ តម្លាភាព និង ការអញ្ជើញសហគមន៍អន្ដរជាតិ មកតាមដានមើលដំណើរការរបស់ខ្លួន បន្សាបទឹកនៅក្នុងរោងចក្រនោះ។ ទឹកបង្ហូរចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា មានសុវត្ថិភាពល្អប្រសើរជាងទឹកដែលបញ្ចេញពីរោងចក្រចំនួន៤ នៅប្រទេសចិន បង្ហូរចូលទៅក្នុងមហាសមុទ្រ ដោយមិនបានចម្រោះឲ្យល្អ។

ក្រុមហ៊ុនប្រតិបត្ដិការរោងចក្រថាមពល TEPCO បានឲ្យដឹង ថា ទឹកដែលត្រូវបានបង្ហូរ ចេញពីរោងចក្រនុយថាមពលនុយក្លេអ៊ែរហ៊្វូគូស៊ីម៉ា ត្រូវបានបន្សាប ឬ ចម្រោះជាតិវិទ្យុសកម្មទាំងអស់ លើកលែងតែសារធាតុទ្រីធៀម (Tritium)។ រីឯកម្រិត Tritium ក៏ស្ថិតនៅក្នុងដែនកំណត់សុវត្ថិភាព និង ទាបជាងការបញ្ចេញពីស្ថានីយថាមពលនុយក្លេអ៊ែរ នៅក្នុងប្រតិបត្តិការធម្មតារបស់រោងចក្រនេះ រួមទាំង រោងចក្រនៅក្នុងប្រទេសចិន ផងដែរ។

ដោយឡែក ការប្រឆាំងជាសាធារណៈ នៅក្នុងប្រទេសចិន បានកើនឡើង ចាប់តាំងពីពេលនោះមក ជាមួយនឹងការគប់ដុំឥដ្ឋ និង ស៊ុតចូលនៅក្នុងសាលារៀន និង ស្ថានកុងស៊ុលរបស់ជប៉ុន ប្រចាំនៅប្រទេសចិន។ រីឯអាជីវកម្មនៅក្នុងប្រទេសជប៉ុន ក៏បានរងនូវការហៅតាមទូរស័ព្ទរំខាន មកពីប្រេសចិន ថែមទៀតផង។

អាជ្ញាធរក្រុងតូក្យូ បានបញ្ជាក់ កាលពីថ្ងៃទី២៧ ខែសីហា ថា ម្ហូបអាហារសមុទ្រ នាំចេញពីខេត្តនានារបស់ជប៉ុន រកមិនឃើញមានជាតិវិទ្យុសកម្មនោះឡើយ។ ផលិតផលអាហារសមុទ្រទាំងអស់ សុទ្ធតែមានសុវត្ថិភាព។

លោក ចន លី (John Lee) មេដឹកនាំកោះហុងកុង បានបញ្ជាក់ កាលពីថ្ងៃទី២២ ខែសីហា ថា គាត់បានណែនាំដល់រដ្ឋាភិបាលរបស់គាត់ ឱ្យធ្វើសកម្មភាពភ្លាមៗ ដើម្បីការទប់ស្កាត់នូវការនាំចូលម្ហូមអាហារសមុទ្រមួយចំនួន មកពីប្រទេសជប៉ុន។

ការប្រកាសរបស់អាជ្ញាធរហុងកុង បានធ្វើឡើង ក្រោយពេលរដ្ឋបាលគយទូទៅ នៅក្នុងប្រទេសចិន បានគំរាម អំពីការហាមប្រាមដល់អាហារទាំងអស់ពីរាជធានី-ខេត្ត ចំនួន១០របស់ជប៉ុន រួមមាន រាជធានីតូក្យូ (Tokyo), ខេត្តហ៊្វូគូស៊ីម៉ា (Fukushima), ឆីបា (Chiba), តូឈីហ្គិ (Tochigi), អ៊ីប្រារ៉ាគិ (Ibaraki), ហ្គុនម៉ា (Gunma), មីយ៉ាហ្គិ (Miyagi), នីអ៊ិហ្កាតា (Niigata), ណាហ្កាណូ (Nagano) និង ខេត្ដសៃតាម៉ា (Saitama)។

ប្រទេសជប៉ុន បានប្រកាស ថា ការបញ្ចេញទឹកចេញពីរោងចក្រថាមពលនុយក្លេអ៊ែរ ដែលបានរងគ្រោះមហន្ដរាយ ដោយមហារលកយក្សស៊ូណាមិ គឺមានសុវត្ថិភាព។ ស្របគ្នានេះដែរ ទីភ្នាក់ងារថាមពលអាតូមិកអន្តរជាតិ (IAEA) ដែលជាអ្នកឃ្លាំមើលនុយក្លេអ៊ែររបស់អង្គការសហប្រជាជាតិ បានបំភ្លឺ អំពីផែនការនេះ កាលពីខែមុន ដោយបានបញ្ជាក់ ថា ទឹកចម្រោះនោះ បានបំពេញតាមស្តង់ដារអន្តរជាតិ ហើយថា ផលប៉ះពាល់របស់វា នឹងមកលើមនុស្ស និង បរិស្ថាន មានកម្រិតតិចតួចប៉ុណ្ណោះ៕

បរទេស៖ យោងតាមប្រភពព័ត៌មាន CGTN កាលពីថ្ងៃទី៣០ ខែសីហា បានឱ្យដឹងថា រោងចក្រអ៊ីដ្រូសែនពណ៌បៃតងដ៏ធំបំផុតរបស់ប្រទេសចិនចាប់ផ្តើមដំណើរការបន្ទាប់ពីបន្ទះស្រូបពន្លឺព្រះអាទិត្យដំបូងត្រូវបានដំឡើងនៅក្នុង Khoxa តំបន់ស្វយ័ត Xinjiang Uyghur។ រោងចក្រនេះអាចផលិតអ៊ីដ្រូសែនដោយមិនបញ្ចេញកាបូន នឹងជំនួសដោយវិធីសាស្រ្តចាស់នៃការប្រើប្រាស់ឧស្ម័នធម្មជាតិ។ រោងចក្ររបស់ Sinopec នៅទីក្រុង Xinjiang បានប្រើប្រាស់ថាមពលពន្លឺព្រះអាទិត្យដើម្បីផលិតអ៊ីដ្រូសែន ១០,០០០ តោន/ឆ្នាំក្នុងដំណាក់កាលដំបូង ហើយនឹងកើនឡើងជាលំដាប់ដល់ ២០,០០០ តោនក្នុងមួយឆ្នាំ។

ដូចនេះ ក្រុមហ៊ុនគីមីឥន្ធនៈតែមួយគត់របស់ Sinopec នៅក្នុង Xinjiang បានផ្គត់ផ្គង់ប្រហែល ៧០% នៃធនធានប្រេងនៅភាគខាងត្បូង Xinjiang ។ អ៊ីដ្រូសែនដែលប្រើក្នុងដំណើរការចម្រាញ់បច្ចុប្បន្នបានបញ្ចេញកាបូនឌីអុកស៊ីតយ៉ាងច្រើន ដោយជំនួសការផលិតអ៊ីដ្រូសែនតាមរយៈឧស្ម័នធម្មជាតិនឹងប្រើ photovoltaics ដើម្បីរួមចំណែកយ៉ាងសំខាន់ក្នុងការកាត់បន្ថយការបំភាយឧស្ម័ន និងធានាបាននូវប្រភពថាមពលពន្លឺព្រះអាទិត្យដែលមានស្ថេរភាពសម្រាប់ផលិតអ៊ីដ្រូសែន។

រោងចក្រអ៊ីដ្រូសែនពណ៌បៃតងថ្មីនេះត្រូវបានគេរំពឹងថានឹងកាត់បន្ថយការបញ្ចេញកាបូនឌីអុកស៊ីតចំនួន ៤៨៥,០០០ តោនក្នុងមួយឆ្នាំ ដែលជាការកត់សម្គាល់របកគំហើញនៅក្នុងកិច្ចខិតខំប្រឹងប្រែងរបស់ប្រទេសចិនក្នុងការកាត់បន្ថយការបំភាយឧស្ម័ន។ លោក Liu Ziying អនុប្រធានផ្នែកគ្រប់គ្រងផលិតផលបាននិយាយថា ការផ្លាស់ប្តូរនៃឧស្សាហកម្មគីមីនេះដើរតួនាទីយ៉ាងសំខាន់ក្នុងការសម្រេចបាននូវគោលដៅនៃការបំភាយឧស្ម័នកាបូនិច។ ដូចនេះការបំភាយឧស្ម័នកាបូនិចនៃឧស្សាហកម្មគីមីទូទាំងប្រទេសមានចំនួនប្រហែល ២០% នៃការបំភាយឧស្ម័នឧស្សាហកម្មរបស់ប្រទេសចិន៕
ប្រភព៖vnexpress

រដ្ឋធានីកៀវ៖ រហូតមកដល់ពេលនេះ ថ្វីបើអ៊ុយក្រែន កំពុងតែធ្វើសង្គ្រាមរំដោះទឹកដីរបស់ខ្លួន ចេញពីការកាន់កាប់របស់រុស្ស៊ី យ៉ាងណាក្ដី ក៏លោកប្រធានាធិបតី ហ្សេឡែនស្គី នៅតែមិនអនុញ្ញាតឲ្យមន្រ្ដីខិលខូចមួយចំនួន នៅសំងំកើបលុយ ពីអំពើពុករលួយបានដោយស្រួលនោះដែរ ហើយឥឡូវនេះ គាត់បានអះអាង ថា សំណូកចន្លោះពី ៣០០០ដុល្លារ ទៅ ១៥ ០០០ដុល្លារ ត្រូវបានបង់ សម្រាប់ការលើកលែងកាតព្វកិច្ចការងារយោធា លើផ្នែកវេជ្ជសាស្រ្ត។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី៣១ ខែសីហា ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានហៅអ្វីដែលគាត់បានពិពណ៌នា ថា អំពើពុករលួយជាប្រព័ន្ធ នៅក្នុងការលើកលែងផ្នែកវេជ្ជសាស្រ្តរបស់ប្រទេស សម្រាប់បំពេញការងារ នៅក្នុងជួរកងទ័ព។ ប្រព័ន្ធពុករលួយបែបនេះ ក្លាយជាកម្មវត្ថុ នៃការទទួលសំណូកយ៉ាងទូលំទូលាយ និង ការធ្វើដំណើរទៅក្រៅប្រទេសរបស់មនុស្សមួយចំនួន។

លោកប្រធានាធិបតី បានសង្កត់ធ្ងន់ ថា សំណូក ចន្លោះពី ៣ 000 ដុល្លារ ទៅ ១៥ 000ដុល្លារត្រូវបានបង់ សម្រាប់ការលើកលែងផ្នែកវេជ្ជសាស្រ្ត គេចចេញពីកាតព្វកិច្ចការងារយោធា។

បញ្ហាអំពើពុករលួយ នៅក្នុងការជ្រើសរើសយោធារបស់អ៊ុយក្រែន ត្រូវបានលាតត្រដាង កាលពីខែមិថុនា ខណៈការស៊ើបអង្កេតរបស់ប្រព័ន្ធផ្សព្វផ្សាយ បានរាយការណ៍ អំពីទ្រព្យសម្បត្តិគ្រួសាររបស់លោក យ៉ែវហេន បូរីស៊ូវ (Yevhen Borysov) មន្រ្ដីជាន់ខ្ពស់ ប្រចាំតំបន់អូដេសា (Odesa) ។ ការស៊ើបអង្កេតនោះ ក៏បានរាយការណ៍ អំពីអចលនទ្រព្យ និង រថយន្តទំនើបៗមានតម្លៃរាប់លានដុល្លារ ត្រូវបានចោទប្រកាន់ ថា ជាកម្មសិទ្ធិនៃសមាជិកគ្រួសាររបស់លោក បូរីស៊ូវ នៅក្នុងប្រទេសអេស្ប៉ាញ។

បើតាមរបាយការណ៍របស់ប្រព័ន្ធផ្សព្វផ្សាយក្នុងស្រុក បានអះអាង ថា លោក បូរីស៊ូវ ត្រូវបានចោទប្រកាន់ ពីបទ «កិបកេងទ្រព្យសម្បតិ្ដដោយខុសច្បាប់»។ ប៉ុន្ដែគាត់បានបដិសេធរាល់ការប្រព្រឹត្ដខុសឆ្គង ហើយគាត់ថែមទាំងអះអាង ថា គាត់មិនមានជាប់ពាក់ព័ន្ធជាមួយនឹងទ្រព្យសម្បត្តិ នៃគ្រួសាររបស់គាត់ នោះឡើយ។

លោកប្រធានាធិបតី ហ្សេឡែនស្គី បានបង្រ្កាបលើអំពើពុករលួយ នៅក្នុងដំណើរការពង្រាងយោធាជាអាទិភាពមួយ ខណៈកងកម្លាំងរបស់គាត់ កំពុងតែបន្តធ្វើសង្គ្រាម អស់រយៈពេល១៨ខែ កន្លងមកនេះ ដើម្បីទប់ទល់នឹងការឈ្លានពានរបស់រុស្ស៊ី។ ការលុបបំបាត់អំពើពុករលួយនៅក្នុងស្ថាប័នរដ្ឋាភិបាលរបស់អ៊ុយក្រែន ក្លាយជាកត្តាសំខាន់ សម្រាប់ប្រទេសអ៊ុយក្រែន ដើម្បីចូលរួមជាមួយសហភាពអឺរ៉ុប៕

BLACKPINK បានចាប់ផ្តើមដំណើរទេសចរណ៍ពិភពលោក ‘BORN PINK’ របស់ពួកគេនៅក្នុងខែតុលា ឆ្នាំ២០២២ ដោយទាក់ទាញទស្សនិកជនទូទាំងពិភពលោកនៅក្នុងទីក្រុងធំៗជាងគេ និងមានការទទួលស្គាល់បំផុត។ អស់រយៈពេលជិតមួយឆ្នាំ ដំណើរតន្ត្រីរបស់ពួកគេបានបន្តឥតឈប់ឈរ ដោយឈានដល់ការប្រគំតន្រ្តីវគ្គផ្តាច់ព្រ័ត្រដ៏ធំដែលបានគ្រោងទុកនៅខែកញ្ញា នៅឯ Gocheok Sky Dome ដ៏ល្បីល្បាញក្នុងទីក្រុងសេអ៊ូល។ គិតត្រឹមពេលនេះ ប្រាក់ចំណូលរបស់ BLACKPINK ពីការប្រគំតន្ត្រីទេសចរណ៍ពិភពលោករយៈពេលមួយឆ្នាំរបស់ពួកគេត្រូវបានប៉ាន់ប្រមាណហើយចំនួនកំពុងកើនឡើងខ្លាំង។

ឆ្លងកាត់ការប្រគំតន្រ្តីនៅប្រទេសជាច្រើននៅទូទាំងអាម៉េរិកខាងជើង អឺរ៉ុប អាស៊ី និងអូសេអានីពួកគេត្រូវបានគេរាយការណ៍ថារកបានចំនួន ៣៥០ ពាន់លានវ៉ុន ដែលស្មើនឹងប្រមាណ ២៦៤.៥លានដុល្លារ។ តួលេខដ៏គួរឱ្យភ្ញាក់ផ្អើលនេះ បានធ្វើឱ្យអ្នកនិយមលេងអ៊ីនធឺណិត សម្តែងការកោតសរសើរ ចំពោះចំនួនដ៏ច្រើនសន្ធឹកសន្ធាប់ដែលក្រុមចម្រៀងនេះ ទទួលបានត្រឹមតែពីដំណើរទេសចរណ៍ពិភពលោករបស់ពួកគេប៉ុណ្ណោះ។

ការដែលទទួលបានតួលេខនេះចំពេលមានការវិវត្តន៍ជាបន្តបន្ទាប់នៃឆាក K-pop ក្រុមតិចតួចណាស់ដែលបានបង្កើតនិងមានឥទ្ធិពលដូចជា BLACKPINK ដែលល្បីល្បាញសម្រាប់ភាពស្រស់ស្អាត និងភាពជោគជ័យជាប់គ្នានៅលើតារាងតន្ត្រី បានផ្លាស់ប្តូរជានិច្ចនូវគំរូនៃអត្ថន័យនៃការក្លាយជាតារាពិភពលោក។ ខណៈពេលដែលទេពកោសល្យតន្ត្រីរបស់ពួកគេ និងអ្នកគាំទ្រដ៏ច្រើនសន្ធឹកសន្ធាប់គួរឱ្យចាប់អារម្មណ៍នោះ វាគឺជាប្រាក់ចំណូលដ៏គួរឱ្យភ្ញាក់ផ្អើលរបស់ក្រុម BLACKPINK ពីការប្រគំតន្រ្តីនេះបានក្លាយជាប្រធានបទក្នុងចំណោមអ្នកគាំទ្រ និងសហគមន៍អ៊ីនធឺណិត៕

ទីក្រុងចូហានណេសប៊ឺគ៖ គ្រោះអគ្គិភ័យបានឆាបឆេះ នៅអគារមួយកន្លែង នៅក្នុងទីក្រុងចូហានណេសប៊ឺគ (Johannesburg) ប្រទេសអាហ្វ្រិកខាងត្បូង ជាទីក្រុងដែលបណ្ដាប្រទេសប៊្រីក (BRICS) បានជួបប្រជុំកំពូល កាលពីប៉ុន្មានថ្ងៃមុននេះ។

សារព័ត៌មាន Al Jazeera បានចេញផ្សាយ កាលពីថ្ងៃព្រហស្បតិ៍ ទី៣១ ខែសីហា ថា បើតាមប្រព័ន្ធផ្សព្វផ្សាយក្នុងស្រុក និង ទីភ្នាក់ងារសង្គ្រោះបន្ទាន់ បានអះអាង ថា មានមនុស្សយ៉ាងហោចណាស់ ចំនួន៦៣នាក់ បានបាត់បង់ជីវិត និង ជាង៤០នាក់ផ្សេងទៀត រងរបួស ហើយត្រូវបានបញ្ជូនទៅកាន់មន្ទីរពេទ្យ ក្រោយការកើតមានគ្រោះអគ្គិភ័យ ឆាបឆេះអគារជាច្រើនជាន់ នៅក្នុងទីក្រុងចូហានណេសប៊ឺគ (Johannesburg) ប្រទេសអាហ្វ្រិកខាងត្បូង។

លោក រ៉ូប៊ឺត មូលោដហ្ស៊ី (Robert Mulaudzi) អ្នកនាំពាក្យ ទីភ្នាក់ងារគ្រប់គ្រងគ្រាអាសន្នទីក្រុងចូហានណេសប៊ឺគ បានបញ្ជាក់ ថា គ្រោះអគ្គិភ័យ បានឆាបឆេះអគារមួយកន្លែង កាលពីព្រឹក ថ្ងៃព្រហស្បតិ៍ (ទី៣១ ខែសីហា) ស្ថិតក្នុងសង្កាត់ពាណិជ្ជកម្ម នាកណ្តាលរបស់ទីក្រុងនេះ។ រីឯចំនួនអ្នកស្លាប់ កំពុងតែបន្តកើនឡើង ខណៈរកឃើញសាកសព ចំនួន៦៣នាក់ នៅក្នុងកន្លែងកើតហេតុ ហើយមនុស្សជាង៤០នាក់ផ្សេងទៀត បានរងរបួស។

បើទោះជាយ៉ាងណាក៏ដោយ ភ្លាមៗនោះ អាជ្ញាធរប្រទេសអាហ្វ្រិកខាងត្បូង នៅមិនទាន់បានបញ្ជាក់ អំពីមូលហេតុ នៃគ្រោះអគ្គិភ័យនេះ នៅឡើយ៕