ប្រទេសវៀតណាម ៖ ក្នុងរយៈពេល៧ខែដំបូងនៃឆ្នាំ២០២៣ ប្រទេសវៀតណាមបាននាំចូលរថយន្តដំឡើងរួចគ្រប់ប្រភេទស្មើជិត៨ម៉ឺនគ្រឿង និងមានតម្លៃជួញដូរសរុបស្មើ១,៨៧ពាន់លានដុល្លារអាមេរិក កើនឡើង២,៤% ផ្នែកបរិមាណ និងកើនឡើង០,១% ផ្នែកតម្លៃ បើធៀបនឹងរយៈពេលដូចគ្នានៅឆ្នាំ២០២២ ។

ក្នុងរយៈពេលដូចគ្នានេះ ប្រទេសវៀតណាមបានទិញរថយន្តចំនួន៣៦.០៨៧គ្រឿងពីប្រទេសថៃ កើនឡើង៤៥,២% និងមានតម្លៃនាំចូលស្មើ៧៦២.២លានដុល្លារអាមេរិក ។ ចំណែកនៅខែកក្កដាតែមួយ រថយន្តនាំចូលពីប្រទេសថៃ ស្មើនឹង៣.៧១៤គ្រឿង ហើយតម្លៃការជួញដូរស្មើនឹង៨៤លានដុល្លារអាមេរិក ។

ក្នុងរយៈពេល៧ខែដំបូងនៃឆ្នាំ២០២៣ ប្រទេសថៃបានជាប់ចំណាត់ថ្នាក់ទី១ ក្នុងការនាំចេញរថយន្តទៅកាន់វៀតណាម ។ ដូច្នេះ តម្លៃមធ្យមរបស់រថយន្តដែលនាំចេញពីថៃទៅកាន់វៀតណាម គឺស្មើប្រមាណ២១.០០០ដុល្លារអាមេរិកក្នុង១គ្រឿង ។ អតិថិជនវៀតណាមពេញនិយមរថយន្តរបស់ថៃ ដូចជា Toyota Corolla Cross, Camry, Corolla Altis, Fortuner, Ford Everest, Honda HR-V, Mazda CX-30 និង CX-3, Forester Subaru ។

ចំណែករថយន្តនាំចូលពីប្រទេសឥណ្ឌូណេស៊ី ស្ថិតក្នុងចំណាត់ថ្នាក់ទី២ ក្នុងនោះចាប់ពីខែមករា រហូតដល់ខែកក្កដា ឥណ្ឌូណេស៊ីបាននាំចេញរថយន្តចំនួន២៩.៤៩៨គ្រឿងមកកាន់វៀតណាម ដែលតម្លៃការនាំចេញស្មើនឹង៣៩៩.៦៣លានដុល្លារអាមេរិក ក្នុងនោះរថយន្ត១គ្រឿងមានតម្លៃ១៣.៥០០ដុល្លារអាមេរិក ។ ចំណែកការនាំចូលរថយន្តឥណ្ឌូណេស៊ីរបស់វៀតណាម នៅខែកក្កដា ឆ្នាំ២០២៣ គឺស្មើចំនួន៣.៥២០គ្រឿង និងតម្លៃជួញដូរស្មើ៤៧,៨៥លានដុល្លារអាមេរិក ។

រីឯប្រទេសចិនស្ថិតក្នុងចំណាត់ថ្នាក់ទី៣ គឺរយៈពេល៧ខែដំបូងនៃឆ្នាំ២០២៣ វៀតណាមបាននាំចូលរថយន្តពីចិន ចំនួន៦.៤២០គ្រឿង ក្នុងនោះភាគច្រើនជារថយន្តដឹកទំនិញ និងរថយន្តសម្រាប់ប្រើប្រាស់ក្នុងឧស្សាហកម្មសំណង់ ។ ចំណែកការនាំចូលរថយន្តចិនរបស់វៀតណាម នៅខែកក្កដា ឆ្នាំ២០២៣ ស្មើចំនួន៥៩១គ្រឿង និងមានតម្លៃជួញដូរស្មើ២៦លានដុល្លារអាមេរិក ។

សរុបមក ក្នុងរយៈពេល៧ខែនៃឆ្នាំ២០២៣ វៀតណាមបាននាំចូលរថយន្តជាង៧២.០០០គ្រឿងពីប្រទេសថៃ, ឥណ្ឌូណេស៊ី និងចិន ស្មើនឹង៩០,២% នៃការនាំចូលរថយន្តដំឡើងរួចរបស់វៀតណាម ៕ ប្រភព ៖ AEC connect

បរទេស៖ ក្រុមអ្នករាវរកលោហធាតុស្ម័គ្រចិត្តបានរកឃើញកំណប់មាសដ៏ធំបំផុតរបស់ប្រទេសន័រវេសក្នុងសតវត្សរ៍នេះ ដែលមានអាយុកាលប្រហែល ១,៥០០ ឆ្នាំមុន។

យោងតាមប្រភពព័ត៌មាន Live Science ដែលបានរាយការណ៍នៅថ្ងៃទី ៨ ខែកញ្ញាថា ក្រុមអ្នកស្រាវជ្រាវបានរកឃើញកំណប់វត្ថុបុរាណមាស រួមទាំងបន្តោងចំនួន ៩ ដែលមាននិមិត្តសញ្ញាដ៏កម្រ ចិញ្ចៀនមាស ៣ និងគ្រាប់មាសចំនួន ១០ ខណៈកំពុងរុករក Rennesoy ដែលជាកោះឯកជនមួយនៅឆ្នេរសមុទ្រភាគនិរតីនៃប្រទេសន័រវែស។ ក្រោយពីជីករកឃើញកំណប់មាសដ៏មានតម្លៃនេះ ក្រុមអ្នកស្រាវជ្រាវក៏ប្រញាប់ទាក់ទងទៅសមត្ថកិច្ចមូលដ្ឋាន ដើម្បីត្រួតពិនិត្យបន្ថែម។

អាជ្ញាធរបាននិយាយថា ដុំមាសទាំងអស់នេះមានទម្ងន់ប្រហែល ៣,៥ អោន (១០០ ក្រាម) បន្ទាប់មកពួកគេក៏បានទាក់ទងទៅសារមន្ទីបន្តទៀត។ យោងតាមលោក Ole Madsen នាយកសារមន្ទីរបុរាណវិទ្យានៃសាកលវិទ្យាល័យ Stavanger បាននិយាយថា “នេះគឺជាការរកឃើញដ៏អស្ចារ្យបំផុតនៃសតវត្សរ៍នេះសម្រាប់មាសនៅក្នុងប្រទេសន័រវេស។ ថ្វីត្បិតតែចិញ្ចៀនមើលទៅដូចកាក់មាសក៏ដោយ ក៏វាត្រូវបានគេហៅថា “bracteates” ដែលជាគ្រឿងតុបតែង។

សាស្ត្រាចារ្យរង Hakon Reiersen នៃសាកលវិទ្យាល័យ Stavanger Archaeological Museum ជឿថាកំណប់មាសទាំងនេះអាចត្រូវបានលាក់ទុកដើម្បីសុវត្ថិភាព ឬត្រូវថ្វាយដល់ព្រះនៅពេលដែលចាំបាច់។ លោក Reiersen បានបន្តទៀត “គ្រឿងអលង្ការនេះត្រូវបានធ្វើឡើងដោយជាងមាសដែលមានជំនាញ ហើយត្រូវបានពាក់ដោយអ្នកដែលមានអំណាចបំផុតនៅក្នុងសង្គមកាលពី ៥០០ ឆ្នាំមុនក្នុងអំឡុងពេលនៃការធ្វើចំណាកស្រុក នៅពេលដែលគ្មានអធិរាជរ៉ូម៉ាំងគ្រប់គ្រងអឺរ៉ុបខាងលិច។ ការស្វែងរក bracteates ជាច្រើនគឺកម្រណាស់ ដូច្នេះយើងមិនមានរបកគំហើញណាមួយដែលអាចប្រៀបធៀបទៅនឹងការរកឃើញនេះទេ៕
ប្រភព៖vnexpress

ប្រទេសជប៉ុន ៖ ប្រទេសជប៉ុនបានស្វែងរកដំណោះស្រាយបញ្ហាភ្ញៀវទេសចរជាច្រើននាក់មកកម្សាន្តនៅភ្នំភ្លើងហ្វូជិ ដែលបណ្តាលឱ្យប៉ះពាល់ដល់បរិស្ថាន ។ ជំហានដំបូង អាជ្ញាធរជប៉ុននឹងដាក់កំណត់ចំនួនភ្ញៀវទេសចរអាចមកម្សាន្តនៅភ្នំនេះ ។ ចំណែកភ្ញៀវទេសចរនឹងគាំទ្រការប្រមូលពន្ធរបស់ប្រទេសជប៉ុន ដើម្បីដោះស្រាយបញ្ហាចំនួនភ្ញៀវទេសចរច្រើនលើសលប់ ។

ភ្នំភ្លើងហ្វូជិរបស់ជប៉ុនបានប្រឈមនឹងបញ្ហាចំនួនភ្ញៀវទេសចរលើសលប់មកកម្សាន្តនៅភ្នំនេះ ។ អាជ្ញាធរលើកឡើងថា ភ្នំភ្លើងហ្វូជិមានកម្ពស់៣.៧៧៦ម៉ែត្រ និងមានទីតាំងក្នុងខេត្ត Yamanashi និង Shizuoka ស្ថិតនៅភាគខាងកើតប្រទេសជប៉ុន ។ រហូតមក ភ្នំនេះតែងទទួលបានការពេញនិយមពីសំណាក់ភ្ញៀវទេសចរជាតិ និងអន្តរជាតិ ប៉ុន្តែកំណើនភ្ញៀវទេសចរមកកម្សាន្តលើភ្នំនាពេលថ្មីៗនេះ បានធ្វើឱ្យបំពុលបរិស្ថាន និងមានបញ្ហាជាច្រើនទៀត ។ ដូច្នេះ អាជ្ញាធរជប៉ុននឹងចាត់វិធានការតឹងរ៉ឹង ដូចជា កំណត់ចំនួនភ្ញៀវទេសចរជាដើម ។

កាលពី១០ឆ្នាំមុន ភ្នំភ្លើងហ្វូជិបានចុះក្នុងបញ្ជីបេតិកភណ្ឌពិភពលោក របស់អង្គការយូណេស្កូ ។ ដូច្នេះ វាកាន់តែជំរុញឱ្យភ្ញៀវទេសចរជាច្រើននាក់មកកម្សាន្តនៅទីនេះ ហើយប្រទេសជប៉ុនត្រូវតែដោះស្រាយបញ្ហាចំនួន៣ចំណុច គឺ ៖ ចំនួនភ្ញៀវទេសចរលើសកំណត់, កាត់បន្ថយផលប៉ះពាល់ដល់បរិស្ថានដែលបង្កឡើងដោយភ្ញៀវទេសចរ និងដោះស្រាយកន្លែងចំណតរថយន្តទំហំធំ ។

ទោះយ៉ាងណា ចំនួនភ្ញៀវទេសចរមកកម្សាន្តនៅប្រទេសជប៉ុនមិនធ្លាក់ចុះទេ ហើយនៅតំបន់កម្សាន្តដ៏ធំមួយឈ្មោះ «Subaru» មានភ្ញៀវទេសចរចូលទស្សនាប្រមាណ៤លាននាក់ នៅរដូវក្តៅឆ្នាំ២០២៣ កើនឡើង៥០% បើធៀបនឹងឆ្នាំ២០១៣ ។

កាលពីថ្ងៃទី៩ ខែកញ្ញា ឆ្នាំ២០២៣ លោក Masatake Izumi មន្ត្រីរដ្ឋាភិបាលប្រចាំខេត្តយ៉ាម៉ាណាស៊ិ បាននិយាយទៅកាន់សារព័ត៌មាន Reuters ថា លោកមានអារម្មណ៍ថា បច្ចុប្បន្ន ប្រទេសជប៉ុនជួបបញ្ហាជាច្រើនពាក់ព័ន្ធនឹងចំនួនភ្ញៀវទេសចរមកកម្សាន្តនៅភ្នំហ្វូជិ ។ មន្ត្រីប្រចាំខេត្តយ៉ាម៉ាណាស៊ិចង់ជំរុញការធ្វើដំណើរតាមរថភ្លើង ដើម្បីកាត់បន្ថយការកកស្ទះរបស់ភ្ញៀវទេសចរ ។ ចំណែកភ្ញៀវទេសចរបាននិយាយទៅកាន់សារព័ត៌មាន Reuters ថា ពួកគេនឹងគាំទ្រការប្រមូលពន្ធពីភ្ញៀវទេសចរសម្រាប់ដោះស្រាយបញ្ហានេះ ៕ ប្រភព ៖ TNN World

បរទេស៖ ក្នុងឱកាសនៃដំណើរទស្សនកិច្ចរបស់ប្រធានាធិបតីអាមេរិកលោក Joe Biden ទៅកាន់ប្រទេសវៀតណាម ក្រុមហ៊ុនអាកាសចរណ៍ Vietnam Airlines គ្រោងនឹងចុះហត្ថលេខាលើកិច្ចព្រមព្រៀងទិញយន្តហោះ Boeing ៧៣៧ Max ចំនួន ៥០ គ្រឿង ដែលមានតម្លៃរហូតដល់ ១០ ពាន់លានដុល្លារអាមេរិក។
ពិធីចុះហត្ថលេខារវាងក្រុមហ៊ុនអាកាសចរណ៍វៀតណាម និងក្រុមហ៊ុន Boeing ត្រូវបានគេរំពឹងថានឹងប្រព្រឹត្តទៅនៅថ្ងៃទី ១១ ខែកញ្ញា។ យន្តហោះថ្មីប្រភេទ Boeing ៧៣៧ Max អាចផ្ទុកអ្នកដំណើរអតិបរមាពី ២១០ ទៅ ២៣០ នាក់ ជាមួយនឹងចម្ងាយហោះហើរជាង ៣,០០០ គីឡូម៉ែត្រ។

កិច្ចព្រមព្រៀងនេះនឹងបម្រើដល់ផែនការរបស់ក្រុមហ៊ុនអាកាសចរណ៍វៀតណាមក្នុងការជំនួសយន្តហោះចាស់ដែលមានអាយុកាលជាងមួយទសវត្សរ៍។ កាលពីឆ្នាំមុន ក្រុមហ៊ុនអាកាសចរណ៍នេះក៏បានប្រកាសដេញថ្លៃយន្តហោះចាស់ៗមួយចំនួនផងដែរ។ បច្ចុប្បន្ន តម្រូវការយន្តហោះសកលបានកើនឡើង ខណៈដែលតម្រូវការធ្វើដំណើរបានងើបឡើងវិញ បន្ទាប់ពីជំងឺរាតត្បាត។ កាលពីឆ្នាំ ២០១៦ កន្លងទៅ ក្នុងអំឡុងទស្សនកិច្ចរបស់អតីតប្រធានាធិបតីអាមេរិក លោក Barack Obama ទៅកាន់ប្រទេសវៀតណាម ក្រុមហ៊ុន Vietjet Air ក៏បានចុះកិច្ចសន្យាទិញ យន្តហោះ Boeing ៧៣៧ Max ចំនួន ១០០ គ្រឿងផងដែរ។ ដូច្នេះហើយ សម្រាប់ក្រុមហ៊ុនផលិតយន្តហោះធំៗចំនួនពីរនៅលើពិភពលោកគឺ Boeing និង Airbus គ្រោងនឹងចេញលក់នូវចំនួនយន្តហោះថ្មីៗប្រណិតបន្ថែមទៀតនៅចុងឆ្នាំ ២០៣០ នេះបើ យោងតាមទីភ្នាក់ងារព័ត៌មាន Bloomberg ៕
ប្រភព៖vnexpress

ប្រទេសថៃ ៖ កសិករដាំដុះកញ្ឆានៅតំបន់ភាគឦសានប្រទេសថៃ បានអំពាវនាវឱ្យរដ្ឋាភិបាលថ្មីដាក់កញ្ឆាជាគ្រឿងញៀនដូចមុន ហើយជំរុញឱ្យដាំកញ្ឆាសម្រាប់ផ្នែកវេជ្ជសាស្ត្រតែប៉ុណ្ណោះ ពីព្រោះបច្ចុប្បន្ន ពួកគេទទួលរងផលប៉ះពាល់ដោយសារគោលនយោបាយកញ្ឆាសេរី ។

គេសង្កេតឃើញថា ចម្ការកញ្ឆាមួយកន្លែងនៅស្រុកមឿងមហាសារខាម ខេត្តមហាសារខាម ប្រទេសថៃ បានផ្លាស់ប្តូរមកដាំដំណាំចេកវិញ ដោយសារកញ្ឆាគ្មានទីផ្សារលក់ចេញ ។ លោក សាំលី រ៉ាក់សុទ្ធី សមាជិកសហគ្រាសសហគមន៍ «ណងម៉ង ផារួយ» លើកឡើងថា កាលពីមុន លោកបានដាំកញ្ឆាចំនួន៥០០ដើម និងចំណាយប្រាក់អស់២សែនបាត ប៉ុន្តែពេលនេះ នៅសល់ដើមកញ្ឆាត្រឹមតែ២ដើមប៉ុណ្ណោះ ព្រោះគ្មានទីផ្សារលក់ចេញ ។ លោករំពឹងថា លោក អនុថិន ឆាយវីរៈគូន នឹងលើកកម្ពស់ការដាំកញ្ឆាសេរី និងរកទីផ្សារឱ្យកសិករ ។

ចំណែកលោក ម៉ន់ទ្រី យៀមស៊ុងនឺម ប្រធានសហគ្រាសសហគមន៍ប្រចាំខេត្តនគរាជសីម៉ា លើកឡើងថា បច្ចុប្បន្ន កសិករដាំកញ្ឆានៅខេត្តនគរាជសីម៉ា បានទទួលរងផលប៉ះពាល់យ៉ាងខ្លាំង ដោយសារគោលនយោបាយកញ្ឆាសេរី ហើយកសិករមិនអាចលក់ទិន្នផលកញ្ឆាបានទេ ។ ដូច្នេះ ធ្វើឱ្យសមាជិកចំនួន៤៣២នាក់រងផលប៉ះពាល់ជាខ្លាំង ។ គោលនយោបាយកញ្ឆាសេរីបានធ្វើឱ្យកសិករដាំកញ្ឆានៅទូទាំងប្រទេសថៃរងផលប៉ះពាល់ ដោយសារស្លឹក, ឫស, ដើម និងទិន្នផលផលិតមិនអាចលក់ចេញបាន ព្រមទាំងធ្វើឱ្យតម្លៃធ្លាក់ចុះ ។ ម្យ៉ាងទៀត ប្រទេសថៃបាននាំចូលកញ្ឆាជាច្រើនពីក្រៅប្រទេសទៀតផង ។

លោក ម៉ន់ទ្រី យៀមស៊ុងនឺម សង្ឃឹមថា រដ្ឋាភិបាលថ្មីនឹងដាក់កញ្ឆាជាគ្រឿងញៀនដូចមុន និងជំរុញឱ្យដាំកញ្ឆាសម្រាប់ផ្នែកវេជ្ជសាស្ត្រតែប៉ុណ្ណោះ ដើម្បីគ្រប់គ្រងមិនឱ្យកញ្ឆារាលដាលទៅគ្រប់លំនៅឋានពលរដ្ឋ ។

រីឯកសិករនៅខេត្តឈៀងម៉ៃបាននាំគ្នាដាក់លិខិតស្នើទៅកាន់សាលាខេត្តឈៀងម៉ៃផងដែរ ដោយសារពួកគេទទួលក្លិនចេញពីរោងចក្រកែច្នៃកញ្ឆា ដែលមានទីតាំងនៅក្នុងទីប្រជុំជនមានអ្នកស្រុករស់នៅជាច្រើននាក់ និងជាតំបន់ពាណិជ្ជកម្មច្រើនជាងកសិកម្ម ។ ហេតុនេះ អាជ្ញាធរមិនគួរអនុញ្ញាតឱ្យដាំកញ្ឆា និងបង្កើតរោងចក្រកែច្នៃកញ្ឆាទេ ព្រោះក្លិនកញ្ឆាធ្វើឱ្យប៉ះពាល់សុខភាពអ្នកស្រុករស់នៅក្បែរនេះ ។ ដូច្នេះ ពួកគេបានសំណូមពរឱ្យរដ្ឋាភិបាលថ្មីចុះមកត្រួតពិនិត្យ និងពិចារណាផ្អាក ឬលុបចោលលិខិតអនុញ្ញាតដាំកញ្ឆា ។

លោក វីរៈផុង វង្សសែនស៊ី អ្នកជំនាញប្រចាំខេត្តឈៀងម៉ៃ លើកឡើងថា ជាបឋម លោកបានជ្រាបពីការបារម្ភរបស់អ្នកស្រុក បន្ទាប់មក លោកនឹងដាក់លិខិតទៅកាន់មន្ត្រីថ្នាក់ខេត្តឈៀងម៉ៃ ដើម្បីពិចារណាពីបញ្ហានេះបន្តទៀត ៕ ប្រភព ៖ Thai PBS

ប្រទេសវៀតណាម ៖ សារព័ត៌មានរ៉យទ័របានចុះផ្សាយថា រដ្ឋាភិបាលវៀតណាមនឹងចុះហត្ថលេខាលើកិច្ចព្រមព្រៀងពាណិជ្ជកម្មអង្ករជាមួយរដ្ឋាភិបាលហ្វីលីពីន នាពេលឆាប់ៗនេះ ដើម្បីជួយធានាដល់សន្តិសុខស្បៀង ។ នេះបើតាមការបញ្ជាក់ពីរដ្ឋាភិបាលវៀតណាម កាលពីថ្ងៃទី៧ ខែកញ្ញា ឆ្នាំ២០២៣ ។

ការប្រកាសរបស់រដ្ឋាភិបាលវៀតណាមនេះ ធ្វើឡើងបន្ទាប់ពីកិច្ចប្រជុំដាច់ដោយឡែករវាងនាយករដ្ឋមន្ត្រីវៀតណាម លោក Pham Minh Jing និងប្រធានាធិបតីហ្វីលីពីន លោក Ferdinand Marcos Jr. ក្រៅកិច្ចប្រជុំកំពូលអាស៊ាននៅប្រទេសឥណ្ឌូណេស៊ី ។ ប៉ុន្តែមិនទាន់មានព័ត៌មានលម្អិតបន្ថែមទៀតពាក់ព័ន្ធនឹងកិច្ចព្រមព្រៀងដែលបានគ្រោងទុកនោះទេ ។

កាលពីឆ្នាំ២០២២ ប្រទេសវៀតណាមបាននាំចេញអង្ករក្នុងបរិមាណយ៉ាងច្រើនស្ថិតក្នុងលំដាប់ទី៣ នៅលើពិភពលោក បន្ទាប់ពីប្រទេសឥណ្ឌា និងថៃ ។ ចំណែកហ្វីលីពីន គឺជាប្រទេសទិញអង្ករដ៏ច្រើនបំផុតរបស់វៀតណាម ។

នៅខែកក្កដា ឆ្នាំ២០២៣ ប្រទេសឥណ្ឌាដែលបានកាន់កាប់ចំណែកទីផ្សារជាង៤០% នៃពាណិជ្ជកម្មអង្ករលើពិភពលោក បានបញ្ជាឱ្យផ្អាកការនាំចេញអង្ករទៅក្រៅប្រទេស ។ ការផ្អាកការនាំចេញអង្កររបស់ឥណ្ឌា គឺដើម្បីដោះស្រាយបញ្ហាតម្លៃអង្ករក្នុងប្រទេស ទើបធ្វើឱ្យតម្លៃអង្ករនៅទូទាំងពិភពលោក កើនឡើងខ្ពស់បំផុតក្នុងរយៈពេល១៥ឆ្នាំ ហើយធ្វើឱ្យប្រទេសផ្សេងៗបារម្ភអំពីតម្លៃស្បៀង ខណៈបច្ចុប្បន្ន វាបានឡើងថ្លៃស្រាប់ហើយ ៕ ប្រភព ៖ mgronline