បរទេស៖ ការបំផ្ទុះគ្រាប់បែកនៅក្នុងមន្ទីរពេទ្យ Gaza បានសម្លាប់មនុស្ស ៥០០ នាក់ និងរងរបួសជាច្រើននាក់ទៀត ខណៈដែលក្រុមហាម៉ាស់កំពុងចោតប្រកាន់ទៅលើអ៊ីស្រាអែលថាជាអ្នកបំផ្ទុះគ្រាប់បែក ដោយអ៊ីស្រាអែលក៏បានតបវិញថា វាជាគ្រាប់កាំជ្រួចរបស់កម្លាំងផ្សេងទេ។

យោងតាមសារព័ត៌មាន CNN ដែលបានរាយការណ៍កាលពីថ្ងៃទី ១៨ ខែតុលាថ្មីៗនេះថា ការផ្ទុះនៅមន្ទីរពេទ្យ Al-Hali ក្នុងទីក្រុង Gaza ពោរពេញទៅដោយអ្នករបួស និងជនភៀសខ្លួនជាច្រើននាក់ ខណៈដែលក្រុមហាម៉ាសបាននិយាយថាមានមនុស្សយ៉ាងតិច ៥០០ នាក់ត្រូវបានសម្លាប់។ ក្រុមហាម៉ាសក៏បានឱ្យដឹងទៀតថា ការផ្ទុះនេះអាចបណ្តាលមកពីការវាយប្រហារដោយមីស៊ីលរបស់អ៊ីស្រាអែល ហើយបានពណ៌នាការវាយប្រហារនេះថាជាអំពើប្រល័យពូជសាសន៍ដ៏គួរឱ្យរន្ធត់បំផុត។

នៅក្នុងថ្ងៃដដែលនោះ អ៊ីស្រាអែលក៏បានចង្អុលបង្ហាញថាវាជាកាំជ្រួចពីកម្លាំង«ជីហាដ»មួយទៀតនៅប៉ាឡេស្ទីនដែលបានបាញ់ទៅទីនោះ។ ដូច្នេះ យោងតាមទីភ្នាក់ងារស៊ើបការណ៍សម្ងាត់របស់អ៊ីស្រាអែលបាននិយាយថាក្រុមជីហាដគឺជាអ្នកទទួលខុសត្រូវចំពោះឧប្បត្តិហេតុដ៏រន្ធត់នេះ។ ទោះជាយ៉ាងណា ក្រុមជីហាដក៏បានបដិសេធការលើកឡើងនេះដែរ ដោយពួកគេបាននិយាយថា អ៊ីស្រាអែលកំពុងព្យាយាមជៀសវាងការទទួលខុសត្រូវចំពោះអំពើឃោរឃៅរបស់ខ្លួន។

បច្ចុប្បន្នរថយន្តសង្គ្រោះបន្ទាន់ និងរថយន្តឯកជនកំពុងជួយដឹកអ្នករបួសជាង ៣៥០ នាក់ពីមន្ទីរពេទ្យ Al-Ali ទៅកាន់មន្ទីរពេទ្យ Al-Shifa ដែលជាមន្ទីរពេទ្យសំខាន់មួយនៅក្នុងតំបន់ហ្គាហ្សា។ នាយកមន្ទីរពេទ្យ Al-Shifa និយាយថា មន្ទីរពេទ្យរបស់ខ្លួនកំពុងទទួលរងនូវចំនួនអ្នករបួសយ៉ាងខ្លាំងពីការវាយប្រហារលើកមុនរួចទៅហើយ រីឯប្រេងដែលប្រើជាឥន្ធនៈសម្រាប់ផលិតអគ្គិសនីក្នុងមន្ទីរពេទ្យក៏នឹងអស់ក្នុងពេលឆាប់ៗនេះផងដែរ៕

ប្រទេសថៃ ៖ ព្រះសង្ឃ និងលោកនេននៅវត្តអារញ្ញវ៉ាត ឬវត្តបានប៉ុង ស្ថិតនៅឃុំបានប៉ុង ស្រុកហាងដុង ខេត្តឈៀងម៉ៃ ប្រទេសថៃ បានជួយថែទាំដំណាំស្រូវជាមួយអ្នកភូមិ ក្នុងបរិវេណផ្ទៃដីវត្តប្រមាណជិត១ហិកតា ។ ចំណែកទិន្នផលស្រូវដែលទទួលបាន ព្រះសង្ឃនឹងបែងចែកឱ្យអ្នកភូមិ ជាពិសេស អ្នកមានប្រាក់ចំណូលតិច ដើម្បីជួយសម្រាលបន្ទុកការចំណាយផ្សេងៗ ។

ព្រះចៅអធិការវត្តអារញ្ញវ៉ាត ស្រុកហាងដុង ខេត្តឈៀងម៉ៃ ព្រះនាម អាឆាព្រីឆា មានសង្ឃដីកាថា ៖ «ព្រះសង្ឃបានជួយធ្វើស្រែជាមួយអ្នកភូមិអស់រយៈពេលជាច្រើនឆ្នាំហើយ ចំណែកស្រូវដែលបានមក គឺទុកប្រើប្រាស់សម្រាប់ការងារប្រតិបត្តិធម៌ក្នុងវត្ត, ថ្វាយព្រះសង្ឃ និងលោកនេន ព្រមទាំងចែកឱ្យអ្នកភូមិ ។ សម្រាប់អ្នកភូមិ គឺចែកឱ្យអ្នកដែលបានមកជួយធ្វើស្រែ, មនុស្សចាស់ជរា និងជនក្រីក្រ» ។

អ្នកភូមិក្នុងតំបន់នេះប្រាប់ថា ព្រះសង្ឃបានធ្វើស្រែជាមួយពួកគាត់អស់រយៈពេលជិត១០ឆ្នាំហើយ ហើយការធ្វើស្រែនេះ មិនប្រើប្រាស់ជីគីមីទេ ។ ចំណែកស្រូវដែលព្រះសង្ឃយកមកចែកឱ្យអ្នកភូមិនោះ គឺអាចជួយអ្នកភូមិបានច្រើនណាស់ក្នុងពេលតម្លៃទំនិញផ្សេងៗកើនឡើងជាបន្តបន្ទាប់ ។

អ្នកស្រី វឌ្ឍនា វង្សសែនចៃ ជាអ្នកភូមិរស់នៅឃុំបានប៉ុង ស្រុកហាងដុង ខេត្តឈៀងម៉ៃ និយាយថា ៖ «ខ្ញុំរីករាយណាស់ដែលព្រះសង្ឃបានផ្តល់ស្រូវ និងទឹកជួយក្មេងៗ និងអ្នកក្រីក្រនៅទីនេះ» ។

ចំណែកព្រះសង្ឃគង់នៅស្រុកហាងដុង ខេត្តឈៀងម៉ៃ មានសង្ឃដីកាថា ៖ «ការធ្វើស្រែនេះមិនខុសនឹងវិន័យព្រះសង្ឃទេ ពីព្រោះវាជាការប្រតិបត្តិការងារជួយសង្គ្រោះដើម្បីផលប្រយោជន៍សាធារណៈ ។ លើសពីនេះ មិនត្រឹមតែមិនខុសនឹងវិន័យសង្ឃនោះទេ ប៉ុន្តែវាជារឿងល្អ» ។

ព្រះសង្ឃសង្ឃឹមថា នឹងអាចប្រមូលផលស្រូវនៅខែវិច្ឆិកា ឆ្នាំ២០២៣នេះ បន្ទាប់មក ព្រះសង្ឃនឹងបែងចែកស្រូវមួយចំនួនទៅឱ្យអ្នកភូមិដែលមានជីវភាពខ្វះខាត និងអ្នកត្រូវការដើម្បីដោះស្រាយជីវភាពចំពោះមុខ ៕ ប្រភព ៖ Thai PB

ប្រទេសថៃ ៖ កាលពីថ្ងៃទី១៨ ខែតុលា ឆ្នាំ២០២៣ នៅវិមានរដ្ឋាភិបាលនាទីក្រុងប៉េកាំង លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានថ្លែងក្នុងអំឡុងពេលលោកជួបពិភាក្សាជាមួយលោក Li Qiang នាយករដ្ឋមន្ត្រីនៃសាធារណរដ្ឋប្រជាមានិតចិនថា លោកសូមអរគុណសម្រាប់ការអញ្ជើញលោកឱ្យមកបំពេញទស្សនកិច្ចជាផ្លូវការនៅប្រទេសចិន ព្រមទាំងមានការទទួលស្វាគមន៍យ៉ាងកក់ក្តៅ ។

លោក សេដ្ឋា ថាវីស៊ីន នាយករដ្ឋមន្ត្រីថៃបន្តថា ឯកអគ្គរដ្ឋទូតចិនប្រចាំប្រទេសថៃ បានទំនាក់ទំនងមកលោកតាំងពីមុនពេលលោកឡើងកាន់តំណែងមកម៉្លេះ រហូតដល់លោកកាន់តំណែងជានាយករដ្ឋមន្ត្រីថៃរួចហើយ ក៏មានការទំនាក់ទំនងគ្នារហូតមក ។ លោកផ្ទាល់ និងឯកអគ្គរដ្ឋទូតចិនប្រចាំប្រទេសថៃ បានទំនាក់ទំនងការងារជាមួយគ្នាយ៉ាងកក់ក្តៅ ហើយជឿជាក់ថា ប្រទេសចិន និងថៃ គឺជាមិត្តភក្តិដ៏ល្អនឹងគ្នា ។

លោកនាយករដ្ឋមន្ត្រីថៃបន្ថែមថា លោកសូមសម្តែងការសោកស្តាយចំពោះហេតុការណ៍បា.ញ់ប្រហា.រនៅ Siam Paragon ដែលបណ្តាលឱ្យជនជាតិចិនស្លា.ប់បា.ត់បង់ជីវិត ។ វាជាហេតុការណ៍តែមួយប៉ុណ្ណោះ ហើយហេតុការណ៍នេះនឹងមិនកើតឡើងទៀតទេ ព្រោះប្រទេសថៃបានចាត់វិធានការការពារសន្តិសុខភ្ញៀវទេសចរជាតិ និងអន្តរជាតិ ហើយលោកនាយករដ្ឋមន្ត្រីថៃរីករាយ ប្រសិនបើភាគីចិនមានសំណើ ឬការណែនាំផ្សេងៗ ។ ប្រទេសថៃបារម្ភ និងត្រៀមខ្លួនថែទាំសុវត្ថិភាពភ្ញៀវទេសចរចិនជានិច្ច ហើយលោក សេដ្ឋា ថាវីស៊ីន ក៏បានអញ្ជើញលោកនាយករដ្ឋមន្ត្រីចិនឱ្យមកបំពេញទស្សនកិច្ចជាផ្លូវការនៅប្រទេសថៃផងដែរ ។

ចំណែកលោក Li Qiang នាយករដ្ឋមន្ត្រីចិនបានសង្កត់ធ្ងន់លើការអភិវឌ្ឍទំនាក់ទំនងរវាងប្រទេសថៃ និងចិន ដើម្បីក្លាយជាសហគមន៍មួយមានអនាគតរួមគ្នា ។ ក្នុងឱកាសនេះដែរ នាយករដ្ឋមន្ត្រីនៃប្រទេសទាំងពីរក៏បានពិភាក្សាអំពីប្រធានបទសំខាន់ៗរួមគ្នា ដូចជា ទំនាក់ទំនងជិតស្និទ្ធរវាងថៃ និងចិន ដែលប្រទេសទាំងពីរគឺជាមិត្តភក្តិដ៏ល្អនឹងគ្នាអស់រយៈពេលយូរមកហើយ ។ លើសពីនេះ ប្រទេសទាំងពីរនឹងឈ្វេងយល់ពីស្ថានការណ៍នយោបាយ និងអភិវឌ្ឍន៍ទំនាក់ទំនងឱ្យមានប្រយោជន៍ដល់ពលរដ្ឋប្រទេសទាំងពីរ ៕ ប្រភព ៖ Mono News

ប្រសិនបើគេនិយាយដល់ប្រទេសផ្តាច់ការជាងគេលើលោក ប្រាកដណាស់មនុស្សភាគច្រើននឹងគិតទៅដល់កូរ៉េជើងមុនគេ ដែលមានការហាមឃាត់ និងបិទសិទ្ធជាច្រើនមិនឱ្យពលរដ្ឋខ្លួនមិនឃើញពិភពលោកខាងក្រៅជាដើម។តែយ៉ាងមិញ ក្រៅពីកូរ៉េខាងជើង ក៏នៅមានប្រទេសតួកមេនីស្ថាន (Turkmenistan) មួយទៀតផងដែរ ដែលត្រូវបានគេចាត់ទុកថាជាប្រទេសផ្តាច់ការជាងគេលើលោក ឬអាចថាផ្តាច់ការជាងកូរ៉េខាងជើងទៀតឯណោះ។
តួកមេនីស្ថាន (Turkmenistan) ស្ថិតនៅអាសុីកណ្តាល ដែលប្រជាជននៅក្នុងប្រទេសនេះត្រូវបានរដ្ឋាភិបាល បិទសិទ្ធ និងមានការរឹតបន្តឹងច្បាប់ជាខ្លាំង។ជាក់ស្តែង នៅក្នុងរាជធានីប្រទេសនេះ ដែលមានអគារស្រោបដោយមាស មិនអនុញ្ញាតឱ្យរថយន្តសេរីចាស់ ឬកង្វក់ បើកចូលទីក្រុងនោះទេ។ មិនតែប៉ុណ្ណោះសូម្បីតែរថយន្តមានពណ៌ខ្មៅក៏ត្រូវបានហាមឃាត់មិនឱ្យនាំចូលប្រទេសនេះផងដែរ។លើសពីនេះទៅទៀត មនុស្សប្រុសស្រី ដែលជាគូស្នេហា មិនអនុញ្ញាតឱ្យកាន់ដៃគ្នានៅទីសាធារណនោះទេ ព្រោះវាខុសទៅនឹងប្រពៃណី។

ម្យ៉ាងវិញទៀត ការទទួលទានជាតិអាកុលតម្រូវឱ្យមានកម្រិត និងថ្ងៃសៅរ អាទិត្យ ហាមដាច់ខាតមិនឱ្យមានការលក់ និងទទួលទានគ្រឿងស្រវឹងនោះទេ។អ្វីដែលសំខាន់នោះ រដ្ឋាភិបាល តែងតែឃ្លាំមើល រាល់ការចូល Google របស់ប្រជាជនអំពីវេបសាយ ដែលពួកគេបានចូល search ដើម្បីធានាបានថាពលរដ្ឋរបស់ខ្លួនមិនមានការបញ្ចេញព័ត៌មានអាក្រក់ និងអសន្តិសុខណាមួយនៅក្នុងប្រទសខ្លួនឱ្យទៅពិភពលោកខាងក្រៅបានឃើញ។សូមបញ្ជាក់ថា ជាប្រចាំឆ្នាំ ប្រទេសតួកមេនីស្ថាន (Turkmenistan) មានភ្ញៀវទេសចរណ៍ទៅទស្សនាតិចជាងប្រទេសកូរ៉េខាងជើងនោះទេ ដោយភ្ញៀវទេសចរណ៍ភាគច្រើនតម្រូវឱ្យធ្វើដំណើរតាមមគ្គុទេសក៍ទេសចរណ៍ ដើម្បីធានាបាននូវសុវត្ថិភាពរបស់ពួកគេ៕

ប្រភព៖ Amnesty

ប្រទេសថៃ ៖ សារព័ត៌មានថៃឈ្មោះ PPTV HD 36 បានចុះផ្សាយថា វាបានក្លាយជាព័ត៌មានល្បីមួយនៅក្នុងបណ្តាញសង្គម និងមានការចែកចាយបន្តគ្នាជាច្រើនអំពីរឿងរ៉ាវក្រុមអ្នកបើករថយន្តដឹកភ្ញៀវទេសចរនៅខេត្តភូកេត ប្រទេសថៃ នាំគ្នាវា.យត.ប់ភ្ញៀវទេសចរបរទេស ដោយសារភ្ញៀវទេសចរឱ្យថ្លៃធ្វើដំណើរមិនគ្រប់ចំនួន ។

តាមរយៈការត្រួតពិនិត្យក្នុងវីដេអូបង្ហាញថា ហេតុការណ៍នេះបានកើតឡើងកាលពីថ្ងៃទី៨ ខែតុលា ឆ្នាំ២០២៣ នៅមុខសណ្ឋាគារមួយកន្លែងក្នុងឃុំប៉ាតង ស្រុកក្រាធូ ។ នៅពេលព័ត៌មាននេះត្រូវបានចែកចាយក្នុងបណ្តាញសង្គមបណ្តាលឱ្យប៉ះពាល់ដល់មុខមាត់ និងវិស័យទេសចរណ៍ប្រទេសថៃ ហើយពលរដ្ឋថៃក៏បានរិះគន់អំពីការប្រព្រឹត្តមិនគប្បីរបស់មនុស្សមួយក្រុមនេះផងដែរ ។

ក្រោយពីសមត្ថកិច្ចប្រចាំឃុំប៉ាតងបានឃើញវីដេអូវាយភ្ញៀវទេសចរបរទេស ក៏បានចាត់ឱ្យកម្លាំងសមត្ថកិច្ចចុះទៅត្រួតពិនិត្យនៅតំបន់នេះភ្លាមៗ ។ សមត្ថកិច្ចឱ្យដឹងថា ជនបង្កហេតុ គឺជាអ្នកបើករថយន្តដឹកភ្ញៀវទេសចរក្នុងតំបន់នេះ រីឯភ្ញៀវទេសចរដែលត្រូវបានគេវាយនោះមកពីប្រទេសអារ៉ាប៊ី សាអូឌីត ។ ប៉ុន្តែក្រោយពីត្រូវគេវាយរួច ភ្ញៀវទេសចររូបនេះមិនបានទៅប្តឹងសមត្ថកិច្ចទេ ។

តាមរយៈការត្រួតពិនិត្យដំបូងបង្ហាញថា អ្នកបើករថយន្តដឹកភ្ញៀវទេសចរ គឺឈ្មោះ លោក អនុសន អាយុ២៩ឆ្នាំ និងមានបក្ខពួកចំនួន២នាក់ទៀតបានរួមគ្នាវាយត.ប់ភ្ញៀវទេសចរបរទេស ក្នុងនោះម្នាក់ឈ្មោះ លោក អភិស៊ីត អាយុ២៦ឆ្នាំ និងលោក ណាស់ប៊ូឡ អាយុ២៨ឆ្នាំ ។ ជនបង្កហេតុទាំង៣នាក់ប្រកបមុខរបរជាអ្នកបើករថយន្តដឹកភ្ញៀវទេសចរ និងត្រូវបានសមត្ថកិច្ចចាប់ខ្លួនរួចរាល់ហើយ ។

ជនបង្កហេតុឈ្មោះ អនុសន ប្រាប់ថា មុនដំបូង ខ្លួនបានបើករថយន្តទៅទទួលភ្ញៀវទេសចរខាងលើមកពីផ្លូវរ៉ាជអុទិស ហើយភ្ញៀវទេសចររូបនេះប្រាប់ថា ឱ្យខ្លួនដឹកទៅកាន់សណ្ឋាគារនៅម្តុំវៀនកាលីន និងយល់ព្រមថា នឹងឱ្យថ្លៃដឹកចំនួន២០០បាត ។ ប៉ុន្តែនៅពេលខ្លួនដឹកភ្ញៀវទេសចរទៅដល់សណ្ឋាគារដែលបានប្រាប់នោះ ស្រាប់តែភ្ញៀវទេសចរនិយាយថា មិនមែនជាកន្លែងស្នាក់នៅទេ ហើយក៏ឱ្យខ្លួនដឹកទៅសណ្ឋាគារមួយទៀតឈ្មោះ អមតៈ ។ ដូច្នេះ ខ្លួនក៏បានគិតប្រាក់បន្ថែមទៀត សរុបស្មើនឹង៤០០បាត ប៉ុន្តែភ្ញៀវទេសចរឱ្យប្រាក់តែ៣០០បាតប៉ុណ្ណោះ ទើបមានការឈ្លោះប្រកែកគ្នាឡើង ។

ក្រោយមក ជនបង្កហេតុឈ្មោះ អនុសន ក៏បានទូរស័ព្ទហៅបក្ខពួកមកជួយ ដោយសារភ្ញៀវទេសចរបានយកកូនសោររថយន្តរបស់ខ្លួន ។ ហេតុនេះ ខ្លួន និងបក្ខពួក២នាក់ទៀតអត់ធ្មត់លែងបាន ក៏នាំគ្នាវាយភ្ញៀវទេសចររូបនេះតែម្តងទៅ ។ សមត្ថកិច្ចចោទប្រកាន់ថា ជនទាំង៣នាក់នេះបានរួមគ្នាវា.យដំរាងកាយភ្ញៀវទេសចរ ហើយសមត្ថកិច្ចនឹងចាត់ការពួកគេតាមផ្លូវច្បាប់ ។ លើសពីនេះ សមត្ថកិច្ចបានទំនាក់ទំនងទៅកាន់ការិយាល័យដឹកជញ្ជូនប្រចាំខេត្តភូកេត ដើម្បីដកប័ណ្ណបើកបរពួកគេផងដែរ ៕ ប្រភព ៖ PPTV HD 36