ប្រទេសអារ៉ាប៊ី សាអូឌីត ៖ នៅថ្ងៃទី២១ ខែតុលា ឆ្នាំ២០២៣ នៅទីក្រុងរីយ៉ាដ ប្រទេសអារ៉ាប៊ី សាអូឌីត លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បាននិយាយមកកាន់ក្រុមសារព័ត៌មានថា តាមរយៈការជជែកជាមួយក្រុមហ៊ុនឯកជនចំនួន៤ គឺលោកមានអារម្មណ៍ចម្លែកចិត្តយ៉ាងខ្លាំង ដោយសារប្រទេសអារ៉ាប៊ី សាអូឌីត មានតែខ្សាច់ ប៉ុន្តែមានក្រុមហ៊ុនធំលំដាប់ពិភពលោក ដែលធ្វើពាណិជ្ជកម្មលក់ទំនិញកសិកម្ម និងបសុសត្វនៅអាមេរិកខាងត្បូង, អឺរ៉ុប និងអាស៊ី ។

លោក សេដ្ឋា ថាវីស៊ីន នាយករដ្ឋមន្ត្រីថៃបានជជែកពិភាក្សាជាច្រើនប្រធានបទ ដូចជា ផ្នែកកសិកម្ម បសុសត្វ និងរឿងសត្វគោ ជាដើម ។ វាជាគោលនយោបាយចម្បងរបស់រដ្ឋាភិបាលថៃ ដើម្បីជំរុញរួមគ្នាជាមួយប្រទេសអារ៉ាប៊ី សាអូឌីត ។ លើសពីនេះ លោកនាយករដ្ឋមន្ត្រីថៃក៏បានពិភាក្សាពីការធ្វើសណ្តែកសៀងផងដែរ ដែលលោកមានទំនុកចិត្តថា ទីផ្សារពិភពលោកមានតម្រូវការខ្ពស់ ។

លោកនាយករដ្ឋមន្ត្រីថៃបន្តថា បើអាចទៅរួច លោកនឹងឱ្យរដ្ឋមន្ត្រីក្រសួងកសិកម្មថៃនាំក្រុមហ៊ុនឯកជនមកជជែកជាមួយក្រុមហ៊ុន SABIC ហើយលោករីករាយដែលប្រទេសទាំងពីរបានធ្វើអ្វីរួមគ្នា ព្រោះប្រទេសថៃមានគម្រោងធំៗជាច្រើនដែលត្រូវជជែកគ្នាបន្ត ។ SABIC គឺជាក្រុមហ៊ុនផលិតសារធាតុគីមីនៅប្រទេសអារ៉ាប៊ី សាអូឌីត និងជាក្រុមហ៊ុនធំបំផុតលើពិភពលោក ។

រឿងគួរឱ្យរីករាយមួយទៀត គឺលោកនាយករដ្ឋមន្ត្រីថៃបានសួរនាំក្រុមហ៊ុន SABIC អំពីទំនាក់ទំនងជាមួយក្រុមហ៊ុនប្រេងឥន្ធនៈថៃ PTT និងក្រុមហ៊ុនឯកជនជាច្រើនទៀត តើក្រុមហ៊ុននេះមានឧបសគ្គអ្វីទេពាក់ព័ន្ធនឹងការវិនិយោគ និងការប្រកបអាជីវកម្មនៅប្រទេសថៃ ? ក្រុមហ៊ុននេះប្រាប់ថា គ្មានទេ ព្រោះគ្រប់យ៉ាងទទួលបានការគាំទ្រយ៉ាងល្អ ។

ក្រុមហ៊ុន SABIC ចង់ឱ្យប្រទេសទាំងពីរពង្រឹងទំនាក់ទំនងល្អជាមួយគ្នាបន្តទៀត ហើយលោកនាយករដ្ឋមន្ត្រីថៃក៏បានអរគុណភ្នាក់ងារផ្សេងៗផងដែរ ដែលបានសហការជាមួយក្រុមហ៊ុន SABIC ហើយធ្វើឱ្យក្រុមហ៊ុននេះសរសើរប្រទេសថៃ ។ ចុងក្រោយ លោកសង្ឃឹមថា ការវិនិយោគទុននឹងអភិវឌ្ឍន៍ទៅមុខបន្តទៀតលើគ្រប់វិស័យ ៕ ប្រភព ៖ mono

ស្ត្រីមួយចំនួនដែលចូលចិត្តការហោះហើរទៅក្រៅប្រទេស ក៏ដូចជាចំណាយពេលជិះយន្តហោះក្នុងរយៈពេលយូរចាំបាច់ត្រូវប្រើផលិតផល ៥ យ៉ាងដូចខាងក្រោមនេះ ដើម្បីថែរក្សាស្បែក ដែលអ្នកគួរតែដឹងជាពិសេសពេលជិះយន្តហោះ។ ដូច្នេះរបស់ប្រើប្រាស់ទាំងនោះមានដូចជា៖

១.ជែលថែរក្សាបបូរមាត់៖ អាកាសត្រជាក់នៅពេលជិះយន្តហោះអាចធ្វើឱ្យបបូរមាត់អ្នកស្ងួត ដូច្នេះអ្នកគួរតែប្រើក្រែមដើម្បីថែរក្សាបបូរមាត់ ក៏ដូចជាបន្ថែមសំណើមដល់បបូរមាត់ ឬចំណុចស្ងួតផ្សេងៗនៅលើដៃ ឬកែងដៃ។

២.ក្រដាសជូតសម្អាតគ្រឿងសម្អាង៖ ក្នុងអំឡុងពេលហោះហើរចម្ងាយឆ្ងាយ ប្រសិនបើអ្នកមិនចូលចិត្តបន្ទប់ទឹកក្នុងយន្តហោះទេ អ្នកអាចជ្រើសរើសក្រដាសជូតសម្អាតគ្រឿងសម្អាង ដែលងាយស្រួលប្រើ និងមិនរមាស់ ក៏ដូចជាអាចប្រើសម្រាប់លាងសម្អាតមុខទាំងមូល រួមទាំងភ្នែកផងដែរ។

៣.ក្រែមលាបដៃ៖ ជាការពិតណាស់កុំធ្វេសប្រហែសនៅចំណុចទាំងនេះ ទោះជាយ៉ាងណាក៏ដោយ អ្នកក៏គួរតែថែរក្សាស្បែកនៅលើដៃរបស់អ្នកផងដែរ ដើម្បីការពារកុំឱ្យស្ងួត ឬប្រេះរបកស្បែក។

៤.អាល់កុល៖ អាកុលគឺជារបស់ប្រើប្រាស់ដ៏ចាំបាច់មួយដែលអ្នកមិនអាចខ្វះបាន ព្រោះវាអាចជួយកំចាត់សារធាតុកខ្វក់នៅលើយន្តហោះ ក៏ដូចជាកាត់បន្ថយមេរោគផ្សេងៗនៅលើកៅអីយន្តហោះផងដែរ។

៥.ក្រែមលាបមាត់៖ គ្រឿងសំអាងដែលមិនអាចខ្វះបានសម្រាប់នារីគឺ ក្រែមលាបមាត់។ ដូច្នេះអ្នកត្រូវជ្រើសរើសក្រែមលាបមាត់ដែលជាប់បានយូរនៅលើបបូរមាត់របស់អ្នកសម្រាប់ពេលហោះហើរជាច្រើន៕
ប្រភព៖kormedi.com

តៃវ៉ាន់ ៖ យើងមានគម្រោងរៀបចំពិធីអាពាហ៍ពិពាហ៍ និងជាមិត្តជាមួយបរិស្ថានផងដែរ ។ យើងសង្ឃឹមថា ភ្ញៀវរបស់យើងនឹងយកសម្ភារៈមកខ្លួនឯងសម្រាប់ទទួលនំខេកអាពាហ៍ពិពាហ៍ និងយកអ្វីនៅសេសសល់ទៅវិញផងដែរ ។ នេះជាការលើកឡើងរបស់អ្នកនាង អៃរិ ស៊ូ ជនជាតិតៃវ៉ាន់ អាយុ៣៣ឆ្នាំ អំពីពិធីរៀបអាពាហ៍ពិពាហ៍របស់នាង ដែលនឹងរៀបចំឡើងនៅខែមករា ឆ្នាំ២០២៤ ។

អ្នកនាង អៃរិ ស៊ូ មានគោលបំណងថែរក្សាបរិស្ថាន និងចោលសំរាមក្នុងពិធីរៀបអាពាហ៍ពិពាហ៍របស់នាងឱ្យមានបរិមាណតិចបំផុត ។ នាង និងស្វាមីបានរៀបចំការថតរូប Pre-Wedding នៅមុខគំនរសំរាមដ៏ធំ និងសរសេរថា ៖ «កម្ចាត់សំរាមរហូតដល់អស់ពីពួកយើង» ។ ការថតរូបជាមួយគំនរសំរាមនេះ ដើម្បីបង្ហាញដល់ភ្ញៀវដែលមកចូលរួមក្នុងពិធីអាពាហ៍ពិពាហ៍ឃើញថា ក្នុងមួយថ្ងៃ ពលរដ្ឋតៃវ៉ាន់បានចោលសំរាមច្រើនកម្រិតណា ។

អ្នកនាងរៀបរាប់ថា នៅពេលនាងទៅថតរូប គឺនាងតាំងចិត្តត្រឹមថតរូបដោយស្ងាត់ៗនៅមុខទ្វារប៉ុណ្ណោះ ដើម្បីកុំឱ្យរំខានដល់ការធ្វើការរបស់បុគ្គលិកប្រមូលសំរាម ប៉ុន្តែនៅពេលអាជ្ញាធរឃើញ គេក៏ទទួលស្វាគមន៍ពួកនាងដោយក្តីរីករាយ ហើយធ្វើឱ្យនាង និងស្វាមីសប្បាយចិត្តណាស់ ។ នៅពេលសាច់ញាតិឃើញរូបថតនេះ ពួកគេក៏រីករាយ និងពេញចិត្តផងដែរ ក្នុងការយកសម្ភារៈមកចូលរួមពិធីអាពាហ៍ពិពាហ៍របស់នាង ។

គួរបញ្ជាក់ថា តៃវ៉ាន់មានពលរដ្ឋសរុបប្រមាណ២៣លាននាក់ ហើយតៃវ៉ាន់មានគម្រោងកែច្នៃសំរាមឡើងវិញតាំងពីឆ្នាំ១៩៨៧ មកម៉្លេះ ។ សំរាមនៅតាមលំនៅឋានពលរដ្ឋជាង៥០% បានដំណើរការកែច្នៃឡើងវិញតាមរយៈប្រព័ន្ធផ្លូវការមួយ ដែលគេចាត់ទុកថា វាជាអត្រាខ្ពស់បំផុតនៅលើពិភពលោក ។

នាយកមន្ទីរសុខាភិបាលប្រចាំទីក្រុងផូលីលើកឡើងថា បរិមាណសំរាមនៅតៃវ៉ាន់បានកើនឡើងយ៉ាងឆាប់រហ័ស ។ ជាក់ស្តែង បើគេពិនិត្យមើលក្នុងអំឡុងឆ្នាំ១៩៨០ ឃើញថា បរិមាណសំរាមស្មើប្រមាណតែ២០តោនក្នុង១ថ្ងៃ ប៉ុន្តែបច្ចុប្បន្ន បរិមាណសំរាមស្មើរហូតដល់៥០តោនក្នុង១ថ្ងៃ ៕ ប្រភព ៖ TNN World

វ៉ាស៊ីនតោន៖កាលពីថ្ងៃអាទិត្យទី២២ ខែតុលានេះ ប្រធានាធិបតីអាមេរិកលោកចូបៃដិនបានពិភាក្សាជុំវិញបញ្ហាចម្រូងចម្រាស់រវាងអ៊ីស្រាអែលនិងក្រុមហាម៉ាស់ជាមួយនឹងមេដឹកនាំនៃមហាអំណាចលោកខាងលិច ខណៈអ៊ីស្រាអែលកំពុងតែបង្កើនការវាយប្រហារមកលើតំបន់ហ្កាហ្សា។
ជំនួបមេដឹកនាំសំខាន់ៗលោកខាងលិចរួមមាន៖ ចក្រភពអង់គ្លេស កាណាដា បារាំង អាល្លឺម៉ង់ និងអ៊ីតាលីដោយផ្តោតលើបញ្ហារ សង្គ្រាមរវាង អ៊ីស្រាអែល-ហាម៉ាស់។ មេដឹកនាំទាំងអស់ក្នុងកិច្ចប្រជុំ ក៏បានរំលឹកឡើងវិញនូវការគាំទ្ររបស់ពួកគេទៅកាន់អ៊ីស្រាអែល និងសិទ្ធរបស់ខ្លួននៅក្នុងការការពារប្រឆាំងនឹងអំពើភេរវកម្ម និងបានអំពាវនាវឲ្យប្រកាន់ខ្ជាប់នូវច្បាប់មនុស្សធម៌អន្តរជាតិ ព្រមទាំងសន្ធិសញ្ញាការពារជនស៊ីវិលផងដែរ។

កិច្ចពិភាក្សារបស់មេដឹកនាំទាំងនោះក៏បាននិយាយទាក់ទងទៅនឹងប្រជាពលរដ្ឋរបស់ពួកគេដែលជាប់នៅក្នុងសង្គ្រាមអីស្រាអែល-ហាម៉ាស់ ជាពិសេសអ្នកដែលចង់ចាកចេញពីតំបន់ហ្កាហ្សា ព្រោះតែការប្រយុទ្ធគ្នានេះបានផ្ទុះឡើងដោយមិនបានត្រៀមទុកជាមុនហើយមនុស្សរាប់សិបនាក់បានបាត់បង់ជីវិតនៅតាមដែនអាកាសនៅក្នុងតំបន់ហ្កាហ្សាដោយពួកអ៊ីស្រាអែល ដែលស្ថានការនោះកាន់តែអាក្រក់ទៅៗជារៀងរាល់ថ្ងៃ។

បើទោះជាយ៉ាងណាក៏ដោយ មេដឹកនាំលោកខាងលិចទាំងអស់ក៏បានសម្តែងនូវការប្តេជ្ញាចិត្តនៅក្នុងការជួយសម្របសម្រួល ដើម្បីធានាបានស្ថេរភាពនិងសុត្ថិភាពតាមរយៈម្ហូបអាហារ ទឹក ថ្នាំពេទ្រនិងជំនួយផ្សេងៗដើម្បីបំពេញតម្រូវការមនុស្សជាតិ។

ពួកគេក៏បានសន្យាផងដែរក្នុងទំនាក់ទំនងការទូតយ៉ាងស្អិតរមួតគឺក្នុងន័យសម្របសម្រួល កុំឲ្យសង្គ្រាមនោះមានការរីករាលដាលកាន់តែធំនិងខ្លាំងឡើង ធានាបាននូវស្ថេរភាពនៅក្នុងតំបន់នៃមជ្ឈមបូព៌ា ដំណើរឆ្ពោះទៅរកដំណោះស្រាយមួយយ៉ាងមានប្រសិទ្ធភាព និងសន្តិភាពជានិរន្តផងដែរ៕ CAN News

សហរដ្ឋអាមេរិក៖ យោងតាមប្រភពព័ត៌មាន CNN ដែលបានរាយការណ៍កាលពីថ្ងៃទី ២១ ខែតុលាថា ពលរដ្ឋអាមេរិកកាំងជាច្រើននាក់ កំពុងទទួលរងនូវការឆ្លងមេរោគ leishmaniasis ដែលជាជំងឺស្បែកបង្កឡើងដោយសត្វរុយខ្សាច់។

រុយខ្សាច់ គឺជារុយតូចៗដែលមានពណ៌ទឹកក្រូច នឹងមានទំហំប្រហែលមួយភាគបួននៃទំហំមូស។ សត្វរុយប្រភេទនេះ ច្រើនតែរស់នៅក្នុងតំបន់ក្តៅ ដោយជាធម្មតាវានៅជនបទ និងព្រៃឈើ ក៏ដូចជាតំបន់ផ្សេងទៀតនៃពិភពលោក។ នេះបើយោងតាមការស្រាវជ្រាវបានឱ្យដឹងថាពួកវាចម្លងប៉ារ៉ាស៊ីត ដែលជាសារពាង្គកាយកោសិកាតែមួយបណ្តាលឱ្យមានជំងឺឆ្លងហៅថា leishmaniasis ។ ពួកវាសកម្មបំផុតនៅពេលយប់ ហើយពួកវាក៏អាចរអិលខ្លួនចូលក្នុងមុង ឬក៏ចូលក្នុងតង់ និងបង្អួចបានយ៉ាងងាយ ដោយសារខ្លួនរបស់ពួកវាតូចខ្លាំងណាស់។

វេជ្ជបណ្ឌិត Mary Kamb អ្នកឯកទេសខាងរោគរាតត្បាតផ្នែកវេជ្ជសាស្រ្តនៅមជ្ឈមណ្ឌលគ្រប់គ្រងរបស់សហរដ្ឋអាមេរិកបាននិយាយថា ពេលខ្លះអ្នកមិនបានកត់សំគាល់ថាអ្នកត្រូវបានសត្វល្អិតទាំងនេះខាំនោះទេ។ ដូច្នេះនៅពេលរុយខ្សាច់ខាំនឹងមានរោគសញ្ញាពីរផ្សេងៗគ្នា ដោយរោគសញ្ញាទីមួយនឹងបណ្តាលឱ្យអ្នកកើតជំងឺស្បែក ខណៈដែលរោគសញ្ញាទីពីរបណ្តាលឱ្យខូចសរីរាង្គខាងក្នុង។

ទោះជាយ៉ាងណាក៏ដោយ ជំងឺទាំងនេះមិនមានគ្រោះថ្នាក់ដល់អាយុជីវិតរបស់មនុស្សឡើយ ហើយវានឹងជាសះស្បើយឡើងវិញក្នុងរយៈពេល ៣-៤ ខែក្រោយ ប៉ុន្តែអាចនឹងមានស្លាកស្នាមនៅលើស្បែកបន្តិចបន្តួចជាដើម។
គួរបញ្ជាក់ដែរថា បច្ចុប្បន្នជំងឺស្បែក leishmaniasis ដែលបង្កឡើងដោយសត្វរុយខ្សាច់ កំពុងមានការរីករាលដាលយ៉ាងខ្លាំងនៅក្នុងរដ្ឋតិចសាស់ ភាគខាងត្បូងសហរដ្ឋអាមេរិក ហើយក៏ត្រូវបានរកឃើញមួយចំនួននៅបណ្តាប្រទេសផ្សេងៗជុំវិញពិភពលោកផងដែរ៕

បរទេស៖ ថ្មីៗនេះប្រទេសអាឡឺម៉ង់ មានបំណងចង់ស្តារទំនាក់ទំនងសេដ្ឋកិច្ចជាមួយរុស្ស៊ីឡើងវិញ បន្ទាប់ពីកាត់បន្ថយការពឹងផ្អែកលើថាមពលរបស់រុស្ស៊ីអស់រយៈជាយូរ។

យោងតាមលោក Steffen Kotre សមាជិកសភា Bundestag របស់អាឡឺម៉ង់បាននិយាយថា ការបោះបង់ចោលថាមពលរបស់រុស្ស៊ី និងជំនួសមកវិញនូវការផ្គត់ផ្គង់ឧស្ម័នផ្សេងទៀត គឺជាកំហុសដ៏ធំមួយរបស់ប្រទេស។ បច្ចុប្បន្ន តម្លៃប្រេងសាំងខ្ពស់បាននាំទៅរកភាពគ្មានឧស្សាហកម្មនៅក្នុងប្រទេសអាល្លឺម៉ង់ ដូច្នេះដើម្បីធានាបាននូវការប្រកួតប្រជែង អាល្លឺម៉ង់គួរតែយល់ព្រមទិញឧស្ម័នពីរុស្ស៊ីវិញ ក៏ដូចជានាំចូលថាមពលផ្សេងៗពីរុស្ស៊ីផងដែរ។

លោក Steffen Kotre ក៏បានបន្តទៀតថា យើងត្រូវតែផ្លាស់ប្តូរ ដោយសារតែប្រទេសអាល្លឺម៉ង់ឥឡូវនេះត្រូវចំណាយកាន់តែច្រើនសម្រាប់ឧស្ម័នពីប្រភពជំនួស ជាងដែលខ្លួនធ្លាប់ចំណាយសម្រាប់ឧស្ម័នរុស្ស៊ី។ ឧស្ម័នរុស្ស៊ីមានផលចំណេញ និងជាមិត្តភាពបរិស្ថាននៃការផ្គត់ផ្គង់បច្ចុប្បន្នរបស់យើង ដូច្នេះឧស្ម័នធម្មជាតិរាវជាចម្បងពីសហរដ្ឋអាមេរិកគឺមិនអាចជំនួសរុស្ស៊ីបានទេ។ ទោះជាយ៉ាងណាក៏ដោយ ប្រទេសអាឡឺម៉ង់នៅតែមានការព្រួយបារម្ភយ៉ាងខ្លាំងចំពោះទំនាក់ទំនងរបស់ខ្លួនជាមួយរុស្ស៊ី ហើយក៏បារម្ភថាការផ្គត់ផ្គង់ឧស្ម័ននៅតែអាចប្រឈមនឹងហានិភ័យក្នុងរដូវកាលកំដៅ ដោយសារជម្លោះអ៊ីស្រាអែល និងប៉ាឡេស្ទីនផងដែរ។

គួរបញ្ជាក់ដែរថា បំពង់បង្ហូរប្រេងរវាងរុស្ស៊ី និងអាល្លឺម៉ង់ ត្រូវបានខូចខាត និងបិទកាលពីឆ្នាំមុន នៅក្នុងឧបទ្ទវហេតុមួយដែលត្រូវបានចាត់ទុកថាជាការបំផ្លិចបំផ្លាញ។ ជាលទ្ធផល អាឡឺម៉ង់បានបាត់បង់ការចូលទៅកាន់ឧស្ម័នរុស្ស៊ីដោយផ្ទាល់ ដែលធ្លាប់បានបំពេញតម្រូវការថាមពលរបស់ខ្លួនប្រហែលពាក់កណ្តាល។ ទោះជាយ៉ាងណាក៏ដោយ បច្ចុប្បន្នអាជ្ញាធរអាល្លឺម៉ង់មិនទាន់បានបន្តដំណើរការបញ្ជាក់នៅឡើយទេ ដោយសារតែភាពតានតឹងផ្នែកនយោបាយជាមួយទីក្រុងម៉ូស្គូជុំវិញជម្លោះអ៊ុយក្រែន៕
ប្រភព៖cafef.com

ប្រទេសចិន៖ ថ្មីៗនេះប្រទេសចិនត្រូវបានមនុស្សជាច្រើនកោតសរសើរចំពោះភាពងាយស្រួលនៃការឡើងជណ្តើរយន្តនៅលើភ្នំ Tianyu ខណៈមានមនុស្សមួយចំនួនក៏បាននិយាយដែរថាការធ្វើបែបនេះកំពុងបំផ្លាញសម្រស់ធម្មជាតិរបស់ភ្នំ។

យោងតាមទីភ្នាក់ងារទេសចរណ៍នៅក្នុងប្រទេសចិន បានឱ្យដឹងថា ការដំឡើងប្រព័ន្ធជណ្តើរយន្តនៅលើភ្នំ Tianyu ភាគខាងកើតនៃខេត្ត Zhejiang គឺដើម្បីជួយអ្នកទេសចររីករាយនឹងទេសភាពដ៏ស្រស់ស្អាតដោយមិនចាំបាច់រំខានការឡើងភ្នំនោះទេ។ ដូច្នេះ ប្រព័ន្ធជណ្តើរយន្តជួយឱ្យអ្នកទស្សនាចំណាយពេលត្រឹមតែ ១០ នាទីដើម្បីផ្លាស់ទីពីជើងភ្នំទៅជិតកំពូលភ្នំ Tianyu ។ នៅពេលដែលមិនមានជណ្តើរយន្ត ភ្ញៀវទេសចរត្រូវចំណាយពេលប្រហែល ៥០ នាទីដើម្បីឡើងភ្នំ។

អ្នកគ្រប់គ្រងក្រុមហ៊ុនអភិវឌ្ឍន៍ទេសចរណ៍ បាននិយាយថា ដំបូងឡើយពួកគេមានគម្រោងចង់សាងសង់រថយន្តខ្សែកាប ប៉ុន្តែបន្ទាប់មកបានប្តូរទៅជណ្តើរយន្ត ដោយសារតែពួកគេគិតថាការដំឡើងប្រព័ន្ធជណ្តើរយន្តអាចដឹកជញ្ជូនមនុស្សបានច្រើន និងមានសុវត្ថិភាពជាង។ បច្ចុប្បន្នប្រព័ន្ធជណ្តើរយន្តនៅលើភ្នំ Tianyu មានប្រវែង ៣៥០ ម៉ែត្រ ហើយបានចែកចេញជា ៣ ផ្នែក ដែលមានតម្លៃសាងសង់ ១០ លានយន់ (ប្រហែល ១.៤ លានដុល្លារអាមេរិក) រីឯតម្លៃសំបុត្រតាមជណ្តើរយន្តគឺ ៣០ យន់ (ប្រហែល ៤ ដុល្លារ)។

ទោះជាយ៉ាងណាក៏ដោយ ប្រព័ន្ធជណ្តើរយន្ត “ឡើងភ្នំដោយមិនប្រឹងប្រែង” បានបង្កឱ្យមានភាពចម្រូងចម្រាសជាច្រើននៅលើបណ្តាញសង្គមចិននាពេលៗថ្មីនេះ។ ដោយអ្នកទេសចរណ៍ជាច្រើនបាននិយាយថា ការដំឡើងប្រព័ន្ធជណ្តើរយន្តនៅលើភ្នំគឺពិតជាល្អខ្លាំងណាស់សម្រាប់មនុស្សចាស់ និងក្មេងៗ ខណៈដែលពួកគេមិនចាំបាច់ប្រើកម្លាំងដើម្បីឡើងឡើយ ទោះជាយ៉ាងណាក៏មានមនុស្សមួយចំនួនបាននិយាយថាការសាងសង់ជណ្តើរយន្តបានបំផ្លាញទេសភាពធម្មជាតិ ក៏ដូចជាបទពិសោធន៍នៃការឡើងភ្នំផងដែរ។

គួរបញ្ជាក់ដែរថា ក្រៅពីភ្នំ Tianyu ប្រទេសចិន ក៏បានសាងសង់ជណ្តើរយន្តនៅលើជម្រាលភ្នំមួយចំនួនផ្សេងទៀតដូចជាប្រព័ន្ធជណ្តើរយន្ត South Sky ប្រវែង ១០៤ ម៉ែត្រនៅក្នុងតំបន់ទេសចរណ៍ Shenxianju នៃខេត្ត Zhejiang ផងដែរ៕