ភាគហ៊ុនរបស់ក្រុមហ៊ុន YG Entertainment ដែលគ្រប់គ្រងកំពូលតារា K-pop BLACKPINK បានធ្លាក់ចុះ ៩% នៅថ្ងៃសុក្រ ទី១៥ កញ្ញា នៅទីក្រុងសេអ៊ូល ចំពេលមានពាក្យចចាមអារ៉ាមពេញបណ្តាញអ៊ីធឺណិត Lisa Manoban បានច្រានចោលសំណើរលើកទី២លើកិច្ចសន្យាដែលដាក់ទៅនាងមានតម្លៃ ៥០ពាន់លានវ៉ុនប្រមាណ ៣៧.៦ លានដុល្លារ។

ពាក្យចចាមអារ៉ាមបានផ្ទុះឡើងអស់រយៈពេល ២ ខែកន្លងមកដែលថា YG កំពុងព្យាយាមពិភាក្សាដើម្បីឈានដល់កិច្ចព្រមព្រៀងថ្មីជាមួយគ្រាប់ពេជ្ររបស់ខ្លួន។ កិច្ចសន្យាផ្តាច់មុខរវាងសិល្បករ និងទីភ្នាក់ងារនៅក្នុងប្រទេសកូរ៉េជាធម្មតាមានរយៈពេលមិនលើសពី៧ឆ្នាំឡើយ។

ទោះយ៉ាងណា ទាក់ទងនឹងពាក្យចចាមអារ៉ាមកិច្ចសន្យាក្នុងសំណើរជិត៤០លានដុល្លារនេះក្រុមហ៊ុន YG បានចេញសេចក្តីថ្លែងការណ៍មួយនៅថ្ងៃទី១៥ កញ្ញា ដោយនិយាយថា “យើងកំពុងពិភាក្សាអំពីការបន្តកិច្ចសន្យាជាមួយ Lisa ។ ពាក្យចចាមអារ៉ាមដែលកំពុងកើតឡើងគឺមិនមានអ្វីបញ្ជាក់នោះទេ»។
បើតាមការចុះផ្សាតតារា K-pop កំពូលៗ ត្រូវបានគេរាយការណ៍ថា រកបានប្រហែល១លានដុល្លារក្នុងមួយឆ្នាំ ក្នុងប្រាក់ខែគោល ក្រោមលក្ខខណ្ឌនៃកិច្ចសន្យាជាមួយភ្នាក់ងាររបស់ពួកគេ។

គួរបញ្ជាក់ថា Lisa អាយុ ២៦ ឆ្នាំ ដែលជាជនជាតិថៃត្រូវបានគេនិយាយថានាងមានទ្រព្យសម្បត្តិប្រហែល២៥ លានដុល្លារ៕

នាយករដ្ឋមន្ត្រីថ្មី ស្រេតថា ថាវីស៊ីន (Srettha Thavisin) បាននិយាយថាលោកមិនយល់ស្របនឹងការប្រើប្រាស់កញ្ឆាជាកម្សាន្តនោះទេ បើទោះបីជាប្រទេសថៃបានធ្វើឱ្យកញ្ឆារបស់ស្របច្បាប់ក៏ដោយ។ នាយករដ្ឋមន្ត្រីថៃ បាននិយាយនៅថ្ងៃទី១៥ ខែកញ្ញា នេះថា «គោលនយោបាយកញ្ឆារបស់រដ្ឋាភិបាលរបស់យើងនឹងធ្វើឡើងសម្រាប់គោលបំណងវេជ្ជសាស្រ្ត»។នៅក្នុងខែមិថុនា ឆ្នាំ២០២២ ប្រទេសថៃបានដកកញ្ឆាចេញពីបញ្ជីគ្រឿងញៀន ដោយអនុញ្ញាតឱ្យប្រជាជនប្រើប្រាស់កញ្ឆាសម្រាប់គោលបំណងវេជ្ជសាស្រ្ត។ នេះជាវិធានការដំបូងក្នុងការធ្វើឱ្យស្របច្បាប់នូវការប្រើប្រាស់ និងការដាំដុះកញ្ឆានៅអាស៊ី ក្នុងបរិបទនៃកិច្ចខិតខំប្រឹងប្រែងរបស់ប្រទេសថៃ ក្នុងការស្តារសេដ្ឋកិច្ច និងទេសចរណ៍ឡើងវិញ បន្ទាប់ពី Covid-19 ក៏ដូចជាស្វែងរកទីផ្សារអាហារ និងឱសថដែលកំពុងលូតលាស់ផលិតផលកញ្ឆា។

ឧស្សាហកម្មកញ្ឆាថៃត្រូវបានគេរំពឹងថានឹងមានតម្លៃដល់ទៅ ១.២ ពាន់លានដុល្លារក្នុងរយៈពេលប៉ុន្មានឆ្នាំខាងមុខនេះ ជាមួយនឹងអាជីវកម្មរាប់ពាន់បានលេចឡើងចាប់តាំងពីប្រទេសនេះបានធ្វើឱ្យកញ្ឆាស្របច្បាប់។ កាលពីដើមសប្តាហ៍នេះលោកនាយករដ្ឋមន្ត្រី ស្រេត ថា ដែលជារដ្ឋមន្ត្រីក្រសួងហិរញ្ញវត្ថុ ក៏បានប្រកាសនូវគោលនយោបាយសេដ្ឋកិច្ចជាបន្តបន្ទាប់ ដើម្បីលើកកម្ពស់ការប្រើប្រាស់ និងការចំណាយ នៅពេលដែលដំណើរការងើបឡើងវិញនៃសេដ្ឋកិច្ចធំទីពីររបស់អាស៊ីអាគ្នេយ៍។

គោលនយោបាយរបស់ប្រទេសថៃធ្វើឱ្យកញ្ឆាស្របច្បាប់ទទួលបានជោគជ័យខ្លះៗ ខណៈដែលភ្ញៀវទេសចរអន្តរជាតិរាប់លាននាក់បានសម្រុកទៅប្រទេសថៃដើម្បីចូលរួមក្នុងកម្មវិធីមួយដែលទាក់ទងនិងកញ្ឆា។ ក្រសួងទេសចរណ៍របស់ប្រទេសថៃបាននិយាយថា ទីក្រុងភាគខាងជើងនៃខេត្តឈៀងម៉ៃបានស្វាគមន៍ភ្ញៀវទេសចរអន្តរជាតិជាងមួយលាននាក់កាលពីឆ្នាំមុន ដែលកើនឡើងពីភ្ញៀវទេសចរចំនួន៣១,០០០ នាក់ក្នុងឆ្នាំ២០២១។

យោងតាមការស្ទង់មតិរបស់សមាគមគ្រូពេទ្យចិត្តសាស្រ្តថៃ ប្រទេសនេះបានកត់ត្រាមនុស្សជាង១១ លាននាក់ដែលបានប្រើប្រាស់កញ្ឆាសម្រាប់ការកម្សាន្តក្នុងឆ្នាំ ២០២២ ដែលកើនឡើងជាច្រើនដងធៀបនឹងមនុស្ស១.៨៩ លាននាក់ក្នុងឆ្នាំ២០២១។ រដ្ឋាភិបាលថៃ បានកត់ត្រាមនុស្សប្រហែល១.១ លាននាក់បានចុះឈ្មោះដើម្បីដាំកញ្ឆា។

គួរបញ្ជាក់ផងដែរថា ប្រទេសថៃ គឺជាអ្នកដាំ និងផលិតកញ្ឆាដ៏ធំនៅក្នុងទសវត្សរ៍ឆ្នាំ ១៩៧០និង ១៩៨០ មុនពេលដែលរដ្ឋាភិបាលបានសហការជាមួយសហរដ្ឋអាម៉េរិកដើម្បីបង្ក្រាបបន្ថែមទៀតលើផលិតកម្មនេះ។ ចាប់តាំងពីពេលនោះមក ប្រទេសថៃបានក្លាយជាប្រទេសមួយក្នុងចំណោមប្រទេសដែលអនុវត្តគោលនយោបាយតឹងតែងបំផុតក្នុងការទប់ស្កាត់គ្រឿងញៀន និងគ្រឿងស្រវឹង៕

បរទេស៖ ថ្មីៗនេះ កាលពីថ្ងៃទី ១៤ ខែកញ្ញា សភាម៉ិកស៊ិកបានបើកសវនាការលើ “បាតុភូតអាកាសដែលមិនស្គាល់អត្តសញ្ញាណ” (UAP) ដែលជាពាក្យប្រើបច្ចុប្បន្នដើម្បីពិពណ៌នាអំពី UFO ។ UAP ក៏ជាកម្មវត្ថុនៃសវនាការសភានៅសហរដ្ឋអាមេរិកក្នុងរយៈពេលពីរឆ្នាំកន្លងមកនេះផងដែរ។

យោងតាមអ្នកយកព័ត៌មានម៉ិកស៊ិកលោក Jaime Maussan និងវេជ្ជបណ្ឌិតយោធា José de Jesús Zalce Benítez បានបង្ហាញសាកសពមួយដែលដាក់ក្នុងប្រអប់ដូចមឈូស។ សាកសពនោះមានកម្ពស់មិនលើសពីមួយម៉ែត្រទេ ហើយហាក់ដូចជាស្គមស្គាំងខ្លាំងជាមួយស្បែកប្រផេះ និងក្បាលធំ។ លោក Maussan និងសហការីរបស់គាត់ បានបញ្ជាក់អំពីការធ្វើតេស្ត DNA ដែលបង្ហាញថា សាកសពនេះមិនមែនជាមនុស្សទេ ហើយពោះរបស់វាមានស៊ុតដែលអាចប្រើសម្រាប់បន្តពូជបាន។ លោក Maussan ក៏បានបន្តទៀតថា អដ្ឋិធាតុទាំងនោះបានមកពីប្រទេសប៉េរូ ហើយការធ្វើតេស្តកាបូន-១៤ បង្ហាញថាពួកគេមានអាយុ ១,០០០ ឆ្នាំ។

ប៉ុន្តែ លោក David Anderson ជំនួយការសាស្ត្រាចារ្យផ្នែកនរវិទ្យាដែលធ្វើការនៅសាកលវិទ្យាល័យ Radford ក្នុងរដ្ឋ Virginia និងអ្នកវិទ្យាសាស្ត្រផ្សេងៗទៀត បានធ្វើការបដិសេធព័ត៌មានដែលលោក Maussan បានលើកឡើងខាងលើ ដោយពួកគេបាននិយាយថា “ដើម្បីកំណត់អាយុនៃសាកសពមនុស្សភពក្រៅបាន គឺយើងត្រូវតែដឹងពីសមាមាត្រកាបូន-១៤ នៅលើភពក្រៅរបស់ពួកគេ មិនមែនភពផែនដីទេ”។

យោងតាមលោក Andrew Nelson ប្រធាននាយកដ្ឋាននរវិទ្យានៃសាកលវិទ្យាល័យ Western ក្នុងរដ្ឋ Ontario បានធ្វើការសិក្សាបង្ហាញថា សាកសពមួយចំនួនគឺជាសាកសពមនុស្សដែលត្រូវបានកែប្រែដោយចេតនាឱ្យមើលទៅដូចជាមនុស្សភពក្រៅជាដើម។ ទោះបីជាលោក Maussan បានលើកឡើងអំពីភស្តុតាង DNA និងកាបូនក៏ដោយ ក៏គាត់មិនបានបញ្ជូនលទ្ធផលតេស្តសម្រាប់សហគមន៍វិទ្យាសាស្ត្រដើម្បីធ្វើការត្រួតពិនិត្យឱ្យបានច្បាស់លាស់នោះទេ។ ដូច្នេះហើយ សាកសពនោះគឺមិនទាន់មាននរណាម្នាក់អាចដឹងច្បាស់ថាវាជាអ្វីឱ្យប្រាកដនោះឡើយ៕
ប្រភព៖vnexpress

ប្រទេសថៃ ៖ នាយករដ្ឋមន្ត្រីប្រទេសថៃបានប្រកាសក្នុងកិច្ចប្រជុំសភាថា ប្រទេសថៃនឹងដំឡើងប្រាក់ឈ្នួលអប្បបរមាប្រចាំថ្ងៃរហូតដល់៤០០បាតឱ្យបានឆាប់បំផុត ក្រោយពីភាគីប្រឆាំងសាកសួរអំពីគោលនយោបាយដំឡើងប្រាក់ឈ្នួលឱ្យនិយោជិកចំនួន៦០០បាត ។

កាលពីថ្ងៃទី១២ ខែកញ្ញា ឆ្នាំ២០២៣ លោក Settha Thaweesin នាយករដ្ឋមន្ត្រីថ្មី បានលើកឡើងពាក់ព័ន្ធនឹងរឿងអត្រាការងាររបស់ពលរដ្ឋថា ថៃ គឺជាប្រទេសមានភាពទាក់ទាញសម្រាប់ពលករ ហើយអត្រាគ្មានការងារធ្វើរបស់ពលរដ្ឋថៃស្មើនឹង១% ខណៈពលរដ្ឋថៃមានការងារធ្វើ ។ លើសពីនេះ ប្រទេសថៃមានតម្រូវការនាំចូលពលករបរទេសផងដែរ ។

លោកនាយករដ្ឋមន្ត្រីបន្តថា ប្រទេសថៃបានគោរពសិទ្ធិមនុស្ស, លើកកម្ពស់ជីវភាពរស់នៅ, សេចក្តីថ្លៃថ្នូរ, សុវត្ថិភាពរបស់ពលករ ព្រមទាំងយកចិត្តទុកដាក់ទៅលើនិយោជក និងនិយោជិក ។ ក្រៅពីនេះ រដ្ឋាភិបាលថៃមានវិធានការជំរុញសេដ្ឋកិច្ចរយៈពេលខ្លី និងវិស័យទេសចរណ៍ ដើម្បីប្រមូលប្រាក់ចូលក្នុងផ្នែកសេវាកម្ម ទើបអាចដំឡើងប្រាក់ឈ្នួលអប្បបរមាប្រចាំថ្ងៃតាមតម្រូវការរបស់ពលរដ្ឋថៃ ក៏ដូចជាពលករបរទេស ។

ក្រៅពីជំរុញផ្នែកសេវាកម្មហើយ យើងនឹងកាត់បន្ថយថ្លៃដើមថាមពល និង Logistics ហើយបន្ទាប់ពីការប្រកាសគោលនយោបាយនេះ យើងនឹងអនុវត្តជាបន្ទាន់ ព្រោះរដ្ឋាភិបាលមានគោលដៅដំឡើងប្រាក់ឈ្នួលអប្បបរមាប្រចាំថ្ងៃដល់ពលរដ្ឋឱ្យសមរម្យ និងអាចចាយវាយគ្រប់គ្រាន់ ។

លោក Settha Thaweesin នាយករដ្ឋមន្ត្រីថៃ លើកឡើងថា ៖ «រដ្ឋាភិបាលនឹងរៀបចំឱ្យមានការចរចាចំនួន៣ភាគី គឺនិយោជក, និយោជិក និងរដ្ឋាភិបាល ដើម្បីស្វែងរកកិច្ចព្រមព្រៀងរួមគ្នា ដោយដាក់គោលដៅដំឡើងប្រាក់ឈ្នួលអប្បបរមាប្រចាំថ្ងៃ ស្មើនឹង៤០០បាតឱ្យបានឆាប់បំផុត» ៕ ប្រភព ៖ Thai PBS

អាវយឺតពណ៌ក្រហមដែលព្រះនាង Diana ពាក់មិនយូរប៉ុន្មានបន្ទាប់ពីភ្ជាប់ពាក្យជាមួយព្រះអង្គម្ចាស់ Charles ទទួលបាន ១.១លានដុល្លារក្នុងការដេញថ្លៃ។ អាវយឺតចាក់ដែលមានរូប សត្វចៀមខ្មៅក្នុងចំណោមចៀមសជាច្រើនត្រូវបានព្រះនាង Diana ពាក់នៅឯការប្រកួតប្រណាំងសេះក្នុងខែមិថុនាឆ្នាំ ១៩៨១ ក្នុងនាមជាសមាជិកអនាគតនៃគ្រួសាររាជវង្សអង់គ្លេស។

អាវយឺតនេះបានក្លាយជាអាវដ៏ល្បីមួយដែលលក់ក្នុងតម្លៃ ១,១ លានដុល្លារក្នុងការដេញថ្លៃតាមអ៊ីនធឺណិតនៅថ្ងៃទី១៤ ខែកញ្ញា។ ចំនួនទឹកប្រាក់ដែលប្រមូលបានគឺ ១០ដងខ្ពស់ជាងការប៉ាន់ប្រមាណដំបូងរបស់ក្រុមហ៊ុន Sotheby’s ក្នុងការដាក់ដេញថ្លៃចន្លោះ ៥០,០០០ – ៨០,០០០ ដុល្លារ។

យោងតាមក្រុមហ៊ុនខាងលើនេះបានបញ្ជាក់ថា តម្លៃនេះគឺជាតម្លៃខ្ពស់បំផុតមិនធ្លាប់មាននៅក្នុងការដេញថ្លៃសម្រាប់សម្លៀកបំពាក់របស់ព្រះនាង Diana ដែលខ្ពស់ជាងរ៉ូបដែលបាន ដែលប្រមូលបាន ៦០៤,៨០០ ដុល្លារក្នុងខែមករា។ នេះក៏ជាអាវយឺតថ្លៃបំផុតក្នុងប្រវត្តិសាស្ត្រការដេញថ្លៃពិភពលោកផងដែរ។

គួរបញ្ជាក់ថាព្រះនាង Diana ប្រសូតនៅថ្ងៃទី១ ខែកក្កដា ឆ្នាំ ១៩៦១ ក្នុងគ្រួសារអភិជនមួយនៃភាគអាគ្នេយ៍នៃប្រទេសអង់គ្លេស។ ព្រះនាងបានជួបព្រះអង្គម្ចាស់ Charles ជាលើកដំបូងនៅចុងឆ្នាំ ១៩៧៧ និងបានភ្ជាប់ពាក្យនៅខែកុម្ភៈ ឆ្នាំ១៩៨១ ព្រមទាំងរៀបចំពិធីមង្គលការនៅខែកក្កដាឆ្នាំដដែល និងបានលែងលះគ្នានៅឆ្នាំ១៩៩៦ ។ ព្រះនាងបានសោយទិវង្គតនៅឆ្នាំ ១៩៩៧ ក្នុងគ្រោះថ្នាក់ចរាចរណ៍នៅទីក្រុងប៉ារីស ប្រទេសបារាំង ខណៈកំពុងរត់គេចពីអ្នកសារព័ត៌មាន។

ព្រះនាង Diana ត្រូវបានប្រជាជនស្រឡាញ់ចូលចិត្តដោយសារតែទ្រង់បានប្រើកិត្តិនាមរបស់ខ្លួនដើម្បីលើកកម្ពស់ការយល់ដឹងអំពីបញ្ហាជាច្រើន ចាប់ពីជំងឺឃ្លង់ អំពើហិង្សាក្នុងគ្រួសារ រហូតដល់សុខភាពផ្លូវចិត្ត៕

តាមការបញ្ជាក់ពីក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា កាលពីថ្ងៃទី១៤ ខែកញ្ញា ឆ្នាំ២០២៣ កម្ពុជាសម្រេចបានការនាំចេញផលិតផលជលផល ទៅកាន់ទីផ្សារប្រទេសចិនជាលើកដំបូ។ ការនាំចេញផលិតផលជលផលមាន២ប្រភេទគឺ អន្ទង់បង្កក និងកំពឹសទឹកសាបបង្កក ក្នុងបរិមាណសរុប១០ តោន។

ការនាំចេញផលិតផលជលផលកម្ពុជាទៅកាន់ទីផ្សារប្រទេសចិនជាលើកដំបូងនេះ ធ្វើឡើងដោយក្រុមហ៊ុន Kim Chou Co., Ltd Import Export and International Transportation ។ បើតាមលោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៥ ខែកញ្ញា ឆ្នាំ២០២៣នេះ បានថ្លែងថាការនាំចេញជើងដំបូងនេះ គឺជាជោគជ័យមួយជំហាន និងថា នៅមានការងារច្រើនទៀតដែលត្រូវធ្វើ។

ទន្ទឹមនឹងការនាំចេញនេះ អាទិភាពដំបូង គឺធ្វើយ៉ាងណារក្សានូវគុណភាព ស្របតាមស្តង់ដារអនាម័យ និងភូតគាមអនាម័យ កំណត់ដោយរដ្ឋបាលគយចិន ដើម្បីធានាឱ្យបានថា ផលិតផលជលផលរបស់ខ្មែរនៅតែអាចនាំចូលទៅកាន់ទីផ្សារប្រទេសចិនបាន។ ចំណែកការងារបន្ទាប់ គឺជំរុញឲ្យផលិតផលជលផលរបស់ខ្មែរ មានគុណភាពកាន់តែខ្ពស់ មានសោភណ្ឌភាពកាន់តែល្អ មានសុវត្ថិភាព និងមានរសជាតិកាន់តែឆ្ងាញ់ ក្នុងគោលដៅពង្រឹងនិងពង្រីកតម្រូវការរបស់អតិថិជននៅលើទីផ្សារប្រទេសចិន។

អ្នកនាំពាក្យរូបនេះបានបញ្ជាក់ទៀតថា នៅពេលដែលសេចក្ដីត្រូវការនៅទីផ្សារចិនកើនឡើង ការនាំចេញផលិតផលជលផលពីកម្ពុជាទៅកាន់ប្រទេសចិននឹងមានកំណើន។ ចំណែកវារីវប្បករ អ្នកចិញ្ចឹមត្រីនៅស្រុកខ្មែរ នឹងមានការងារធ្វើកាន់តែច្រើន។តាមរយៈការជំរុញការនាំចេញផលិតផលជលផលខ្មែរទៅកាន់ទីផ្សារប្រទេសចិននេះ ក្រសួងសង្ឃឹមថា វានឹងអាចជួយបង្កើនជីវភាពបងប្អូនវារីវប្បករនៅស្រុកខ្មែរយើងឲ្យកាន់តែមានការរីកចម្រើនទៅមុខ និងរួមចំណែកជួយដល់កំណើនសេដ្ឋកិច្ចជាតិផងដែរ៕