នៅក្នុងប្រវត្តិសាស្រ្តអាស៊ានយើងនេះ បណ្តាប្រទេសទាំងអស់សុទ្ធសឹងតែធ្លាប់ធ្លាក់ក្នុងអាណានិគម លើកលែងតែប្រទេសថៃមួយគត់ ដែលអាចគេចផុតពីការត្រួតត្រារបស់ មហាអំណាចលោកខាងលិច និងជប៉ុន។
ការគេចផុតពីការធ្លាក់ចូលទៅកាន់អាណានិគមនេះ គឺដោយសារភាពវៃឆ្លាតរបស់ សម្ដេចជូឡាឡុងកន។ ដែលគ្រានោះ សម្ដេចជូឡាឡុងកន ដឹងថាអឺរ៉ុបនឹងមកពង្រីកឥទ្ធិពលនៅអាស៊ាន ដូច្នេះទ្រង់ក៏បានប្តូររបបនយោបាយទៅតាមបែបនយោបាយអឺរ៉ុបវិញ។
ម៉្យាងវិញទៀត ដោយសារថៃមានទីតាំងភូមិសាស្ត្រ អំណោយផល ដោយស្ថិតនៅចន្លោះតំបន់ត្រួតត្រាអាណានិគមអង់គ្លេសនៃឧបទ្វីបម៉ាឡេ និងអាណានិគមបារាំងនៃឥណ្ឌូចិន ហេតុដូច្នេះប្រទេសទាំងពីរ បានចុះកិច្ចព្រមព្រៀងមួយ ដើម្បីបែងចែកដែនឥទ្ធិពលគ្នា ដើម្បីគ្រប់គ្រងនគរសៀម។
យោងតាមកិច្ចព្រមព្រៀង ចុះឆ្នាំ១៨៩៦ បារាំងបានព្រមព្រៀងជាមួយអង់គ្លេសថានឹងទុកឱ្យនគរសៀមនៅជាប្រទេសឯករាជ្យ ដើម្បីទុកប្រទេសសៀមធ្វើជារបាំងរវាងដែនដីអាណានិគមអង់គ្លេស (ភូមា និងម៉ាឡេស៊ី) និងដែនដីអាណានិគមបារាំង (សហភាពឥណ្ឌូចិន)។
សូមបញ្ជាក់ផងដែរថា នៅក្នុងពិភពលោកយើងនេះ មានតែ៨ប្រទេសប៉ុណ្ណោះ ដែលមិនធ្លាប់ធ្លាក់ក្រោមអាណានិគម ដោយក្នុងនោះ១ប្រទេស មកពីទ្វីបអាហ្វ្រិក គឺអេព្យូពី និង៧ប្រទេសទៀត មកពីទ្វីបអាសុី ដែលរួមមាន៖
• អារ៉ាប៊ីសាអូឌីត
• ជប៉ុន
• ប៊ូតាន
• នេប៉ាល់
• ចិន
• អ៊ីរ៉ង
• ថៃ
